Fjalimi për tubimin e 10 shtatorit 2016Të nderuar aktiviste e aktivistë të Lëvizjes VETËVENDOSJE!

Të nderuar përkrahës, dashamirë e miq të Lëvizjes,

Zonja dhe Zotërinj,

1 shtatori ishte një ditë e rëndësishme mësimi. Jo për nxënësit e mirë të shkollave, sepse ata e filluan vitin shkollor më 5 shtator.

Por për nxënësit e dobët të regjimit, ata që e ndoqën orën e parë të mësimit politik më 1 shtator: e cila shkurt dhe qartë ua mësoi se nuk ka marrëveshje a vendim tradhëtie që mund të imponohet me dhunë, e aq më pak që pranohet nga populli. Se nuk mund ta luftojnë dot qytetarin e organizuar, të vendosur në të drejtën e tij.

Se sa më autoritar e i kriminalizuar të jetë regjimi aq më e madhe, më e fuqishme dhe më efikase duhet të jetë rezistenca.

Dhe ishte kjo rezistencë që ngadhënjeu më 1 shtator.

Kjo rezistencë që mbartej në nënshkrimin e peticionit të qytetarëve, në argumentimin shkencor të ekspertëve, në zërin e protestës së popullit, në gazin lotësjellës të deputetëve të opozitës, veçanërisht të VETËVENDOSJE!-s, në këmbëngulësinë dinjitoze të deputetëve mospajtues të koalicionit. Dhe nga këtu dua t’i uroj dhe falenderoj të gjithë, në emër të Lëvizjes VETËVENDOSJE!, në emër tuajin.

Por të mos e harrojmë një gjë. Kjo rezistencë do të kishte qenë e pamundur pa punën e palodhshme, pa sakrificën vetëmohuese të aktivistit politik, pa ju.

Ju të gjithë këtu, dhe shumë të tjerë që nuk janë këtu jeni meritorët që ia shkaktuat këtë humbje regjimit, që ia pamundësuat këtij regjimi agresionin ndaj territorit të Republikës.

I kaluam një vit të plotë nën terrorin e regjimit. Na arrestuan, na dërguan në burg, na rrahën, na shajtën, na i thyen dyert e shtëpive e terrorizuan familjet, na i thyen dyert e zyres, na quajtën armiq e terrorist.

Sot këtu me ne nuk janë Atdheu, Frashëri, Petriti, Adea, Egzoni e Astriti, sepse po i mbajnë të burgosur e në arrest shtëpiak. Regjimi po i mban këta të arrestuar nën akuzën për terrorizëm, dhe atë pa asnjë provë të vetme. Këta po mbahen në burg vetëm e vetëm se janë aktivistë të Lëvizjes, të rëndësishëm dhe të palodhshëm.

Këtu nuk është as Glauku. Kryetari i grupit parlamentar sot mbahet i ngujuar në shtëpi nga regjimi.

Sot këtu nuk janë as Imeri e Leotrimi. Edhe ata në arrest shtëpiak.

Ky regjim i dëboi nga Kosova Dejonën, Boikenin e Arbërin, duke ua ndaluar atyre hyrjen në Kosovë. Ky regjim pra, që do ta spastrojë Kosovën nga shqiptarët.

Të gjithë këta sepse nuk pranuan t’i nënshtrohen këtij regjimi. Nuk pranuan ta lejojnë regjimin që ta shkatërrojë të përbashktën tonë Republikën, dhe ta tjetërsojë pronën e përbashkët tonën, territorin e kësaj republike. Dhe në këtë betejë të tyre, nuk u dorëzuan kurrë. Dhe e bënë që të dorëzohet regjimi.

Akuzat ndaj tyre, dhe mbajtja e tyre në burg, ka qëllim ndalimin e së vërtetës. Gjunjëzimi i regjimit e thotë zëshëm se këta kishin të drejtë. Rezistenca kishte të drejtë, dhe ishte e drejtë. Dhe është çdoherë e drejtë, sa herë që na cenohet vullneti, e përbashkëta, barazia e dinjiteti. Është e drejtë dhe e domosdoshme të revoltohemi dhe të rezistojmë kur padrejtësitë e krimi na e uzurpojnë Republikën.

Pra, 1 shtatori ishte mësim i mirë edhe për ne. Nga 1 shtatori e kemi kuptuar qartë se kur kemi të drejtë, jemi të vendosur, jemi të angazhuar, kemi gadishmëri për sakrificë, organizohemi, fitorja është e pashmangshme.

Dhe jo çfarëdo fitoreje, por fitore e vërtetë, përmbajtësore e popullore.

Por është fitore në një betejë, betejë shumë të rëndësishme e vendimtare, por megjithatë njëra prej tyre. Kjo betejë e gjatë e la Serbinë pa Zajdenicë, Malin e Zi pa 8200 hektarët që donte t’ia dhuronte regjimi, e treshen kriminale Veseli-Mustafa-Thaçi me maskë të çjerrur, lakuriq në krim e tradhëti, në korrupcion e zhvatje, shantazh e frikësim ndaj qytetarëve.

Tash për tash. Sepse përpjekja e rezistenca vazhdon.

Deri në çlirimin e plotë të shtetit nga klani mafioz. Deri në zhbërjen e plotë të strukturave paralele të krimit e ato të Serbisë. Kështu i lëshohet udhë ndërtimit të Republikës.

Klani pronto dhe përkrahësit e tij, bashkë me ndarjet e padrejtësitë ligjore të planit të Ahtisaarit e kanë shndërruar republikën e Kosovës në shtet kundër popullit. Është kundër popullit sepse është shtet i kapur, dhe është kundër popullit sepse juridikisht, edhe proceduralisht edhe përmbajtësisht, është kundër vullnetit politik të tij.

Ky vit rezistence ishte njëkohësisht vit beteje mes konjukturës së korruptuar politikisht e financiarisht që e kontrollon shtetin dhe qytetarëve vullnetplotë që duan ta çlirojnë Republikën.

Ta luftosh regjimin e kriminalizuar e të korruptuar nënkupton t’i luftosh vendimet e marrëveshjet e tij, të cilat janë qartazi kriminale e të korruptuara. Këto të dyja nuk ndahen.

Vendimet e regjimit të korruptuar nuk mund të jenë të mira për Republikën. Përkrahja për vendimet është përkrahje për qenien politikisht të korruptuar të regjimit.

Të shiturit të shesin. Dhe këta të shitur, këta kriminelë me sako të shtrenjta, kanë treguar që janë të gatshëm të shesin çdo gjë.

Asnjëherë sikur këtë vit nuk është shpërfaqur kaq vrazhdë dhe kaq banalisht kapja e shtetit, egërsia e regjimit. Por asnjëherë sikur këtë vit nuk ka pasur kaq shumë qytetarë të angazhuar, të vetëdijshëm e të vendosur për ta luftuar këtë regjim.

Dhe kështu duhet të vazhdojmë.

Kështu do të vazhdojmë. 1 shtatori e dëshmon që kundërshtimi deklarativ pa kundërshtimin aktiv është i kotë. Nuk mund të kundërshtosh me fjalë pa kundërshtuar me vepër. Përveç se hipokrizi, ky lloj kundërshtimi është edhe përkrahje për regjimin. Sepse regjimi nuk ka nevojë për përkrahjen e opozitës. Ai ka nevojë vetëm që opozita ta lë atë të qetë në punën tij.

Ne nuk do ta lëmë të qetë. Do ta pengojmë punën e tij, sepse puna e tij është ta pengojë frymëmarrjen e Republikës, ta ndalojë jetësimin e vullnetit politik të popullit, ta pamundësojë realizimin e interesave tona kolektive. Puna e tij është të na përçajë e sundojë.

Ne duhet të bashkohemi e të fitojmë. Sikur këtë vit. Sikur më 1 shtator. LVV

Në çfarë vende tjera mund të gjeni gazlotsjellës në parlament?Shembulli nga historia. Një shkrim nga profesorja e Universitetit të Richmondit, Sandra Joireman, për Wahington Post.

Prestigjiozja amerikane e nis me rezymenë e sulmeve me gaz lotsjellës, vezëve dhe shpërthimeve molotov që kryhen rëndom nga opozita e Kosovës për të kundërshtuar vendimet që nuk përputhen me planprogramin e tyre. “Qeveria krijoi një sistem vëzhgimi më profesional dhe shtoi kontrollet ndaj deputetëve në hyrje të parlamentit,” përcjell botasot.info. Pse? Sepse Kosova kundërshton ratifikimin e marrëveshjes për demarkacionin me Malin e Zi. Në kohën kur tensionet për territore janë mes shteteve të ndryshme, këtu bëhet fjalë për konflikt mes partive të një shteti.

Pasi tregohet rrugëtimi drejt pavarësisë dhe historia e shkurtër si shtet i pavarur, më tej Wahington Post shkruan:

“Tani si kusht për liberalizimin e vizave me BE-në, Kosova duhet të ratifikojë demarkacionin në kufi me Malin e Zi. Pasi Mali i Zi ishte pjesë e Serbisë, ky është hapi i parë i qartësimit të kufijve për shtetin e ri.* Më e vështirë do jetë më pas caktimi i kufijve me shtetin e Serbisë,” përcjell botasot.info. Ratifikimi mbështetet nga partitë në pushtet PDK dhe LDK, ndërsa përkundër tensioneve të brendshme, Mali i Zi nuk ka mbajtur qëndrime kontraverse, duke dëshmuar njëherësh edhe marrëdhëniet miqësore me shtetin fqinj.

Në çfarë vende tjera mund të gjeni gazlotsjellës në parlament?

Tre partitë opozitare AAK, NISMA dhe VETëVENDOSJA kundërshtojnë demarkacionin me pretekstin se vija e tanishme kufitare është kryer në kohën kur vendimet merreshin në Beograd dhe se ajo pjesë tradicionalisht ka qenë e Kosovës. Thuajse prej gjashtë muajsh protesta të dhunshme, Kosova e ka pasur të pamundur funkcionimin e saj si shtet normal. Papunësia te të rinjtë 15 deri në 24 vjet është 55 përqind. Jo befasisht emigrimi ilegal nga Kosova në perëndim ka marrë hov, pasi kërkojnë të gjejnë një vend pune, që nuk ua siguron vendlindja. Liberalizimi i vizave do ndihmonte ekonominë e Kosovës, por kjo nuk mund të arrihet pa marrëveshjen rreth kufirit. Vendi që protestoi paqësisht për autonomi dhe më pas luftoi për pavarësi e ka të vështirë të pranojë atë që mund të quhet humbja e territoreve.

Shkencëtari politik, Andrew Owsiak, thekson se nëse një shtet sistemon kufijtë e saj është e vështirë të futet në konflikt me fqinjët. Por këtu ka një përjashtim. Kur shteti i ri përpiqet të thith këto kufij, atëherë përbën rrezik për futjen në konflikt.

Shembulli nga historia

Nga 1998 deri 2000 Etiopia dhe Eritrea luftuan brutalisht për trekëndëshin Badme, ku vdiqën dhjetëmijëra persona. Aty bëhej fjalë për territore me djerrina me vetëm një fshat të vogël. Shembulli më i ri është Sudani dhe Sudani jugor që luftojnë për regjionin kufitar Abyei. Disa vëzhgues mendojnë se krijimi i shteteve të reja mund të ndalojë dhunën, por këto shembuj tregojnë se ratifikimi i kufijve mund të ringjallë konflikte.

Pavarësisht këtyre shembujve, Mali i Zi asnjëherë nuk ka luftuar Kosovën, bile të dyja shtetet u ndanë nga Serbia. Por demarkacioni është hapi i parë i fillimeve të komplikimeve të marrëdhënieve mes shteteve. Në të njëjtën pikë Kosova duhet të ratifikojë marrëveshjen me Serbinë, përkundër që kjo e fundit nuk e njeh pavarësinë e saj. Kur shohim tensione dhe arrestime për ratifikimin e kufirit me Malin e Zi, atëherë natyrisht që mund të dridhet paqja kur do vijë koha për caktimin e demarkacionit me Serbinë. /Bota sot/

Ministri i Administrimit të Pushtetit Lokal në qeverinë e Kosovës, Ljubomir Mariç, tha se qeveria e Kosovës ka themeluar ekipin menaxhues për themelimin e Asociacionit të komunave me shumicë serbe.

Ai i bëri këto komente në Bruksel, ku edhe bëri publik emrat e katër anëtarët të ekipit menaxhues për themelimin e këtij asociacioni. Ai tha se ekipi i emëruar javën e kaluar nga autoritetet e Prishtinës do të bashkërendohet prej tij dhe do të ketë për detyrë hartimin e Statutit dhe krijimin e Bashkësisë së komunave serbe.

“Këtë herë procesi fillon me mbështetjen e plotë të qeverisë në Prishtinë dhe të gjithë faktorëve relevantë politikë, që është shumë e rëndësishme për ne”, tha ministri Mariç duke nënvizuar se ekipi gjatë këtyre dy ditëve të fundit ka zhvilluar takime njohëse me zyrtarë të ndryshëm të institucioneve evropiane.

Por këto pohime janë hedhur poshtë nga ministrja për Dialog në qeverinë e Kosovës, Edita Tahiri.

Në një komunikatë për opinion thuhet se “Dezinformatat që kanë dalë nga Serbia, se gjoja është formuar grupi punues apo menaxhues për Asociacionin, dua të them se kjo është një gënjeshtër e radhës e Serbisë, sepse grupi menaxhues është krijuar në vitin 2013 sipas Marrëveshjes së Brukselit dhe këtë grup e ka krijuar Ministria e Administrimit të Pushtetit Lokal të Republikës së Kosovës”.

Më tej në komunikatë thuhet se “ky grup nuk është formuar nga Presidenti i Kosovës apo Kryeministri i Kosovës, dhe se ky grup menaxhues është manipuluar nga Qeveria e Serbisë, të cilët i kanë sjellë në Bruksel dhe kanë provuar që të organizojnë takime në Bashkimin Evropian”.

Zonja Tahiri ka thënë se formimi i asociacionit nuk është në agjendë, dhe nuk mund të zbatohet asnjë veprim pa u përmbushur nga Serbia të gjitha marrëveshjet e arritura deri më tani.

Më 25 gusht të vitit të kaluar, Kosova dhe Serbia arritën marrëveshje për krijimin e asociacionit të komunave me shumicë serbe. Sipas marrëveshjes, serbët në veriun e Kosovës do të kenë më shumë te drejta dhe asociacioni i komunave do të ketë përgjegjësinë për disa fusha siç janë shëndetësia, arsimi, zhvillimi ekonomik e planifikimi urban e rural si dhe do të ketë të drejtë të marrë fonde nga Beogradi.

Qeveria thotë se asociacioni është në pajtim me ligjet e kushtetutën e Kosovës dhe propozimin e të dërguarit të Kombeve të Bashkuara Martti Ahtisaari në bazë të të cilit është shpallur edhe pavarësia e Kosovës, ndërsa kanë mohuar çdo mundësi që ai të ketë përgjegjësi ekzekutive. Por, për opozitën asociacioni mund të çojë në ndarjen e brendshme të Kosovës. Që nga 22 shtatori i vitit të kaluar punët e parlamentit janë përshkuar nga gazi lotsjellës dhe skenat e dhunës për shkak të mospajtimeve lidhur me marrëveshjet me Serbinë sikurse edhe asaj për shënimin e kufirit me Malin e Zi.

Marrëveshja ishte pjesë e bisedimeve për normalizimin e marrëdhënieve ndërmjet të dyja palëve që i siguruan Serbisë negociatat për anëtarësim në Bashkimin Evropian. (voa)

Nga Brukseli shqiptarët dhe serbët në qeverinë e Kosovës japin informacione kontradiktore lidhur me formimin e ekipit menaxhues për krijimin e asociacionit të komunave me shumicë serbe.

Në Bruksel ekipet teknike të Prishtinës dhe Beogradit po zhvillojnë bisedime në kuadër të dialogut Kosovë – Serbi të ndërmjetësuar nga Bashkimi Evropian. Kësaj radhe sipas ministres së Dialogut Edita Tahiri, në Bruksel po diskutohet për lëvizjen e lirë, reciprocitetin në targat e automjeteve, kadastrën, diplomat dhe rivitalizimin e urës mbi lumin Ibër. Por ajo hedh poshtë pohimet e palës serbe, sipas së cilës po diskutohet edhe për asociacionin e komunave me shumicë serbe. Paraditen e së enjtes(08.09) ministri i Administrimit të Pushtetit Lokal në qeverinë e Kosovës, Ljubomir Mariq, në një komunikatë të lëshuar nga ministria që ai drejton, thuhet se qeveria e Kosovës e ka krijuar ekipin menaxhues për themelimin e Asociacionit të Komunave me shumicë Serbe. Por ky njoftim, vetëm disa orë më pas, u hodh poshtë nga ministrja e Dialogut Edita Tahiri.

Ljubomir Mariq, i cili gjendet në Bruksel, bëri të ditur emrat e katër anëtarëve – sikurse thotë – të ekipit menaxhues për themelimin e Asociacionit të Komunave me shumicë Serbe. Ai tha se ekipi është emëruar javën e shkuar nga autoritetet e Prishtinës dhe do të udhëhiqet prej tij, ku për detyrë do të ketë hartimin e statutit dhe krijimin e asociacionit.

“Këtë herë procesi fillon me mbështetjen e plotë të qeverisë në Prishtinë dhe të gjithë faktorëve relevantë politikë, që është shumë e rëndësishme për ne. Ekipi gjatë këtyre dy ditëve ka zhvilluar takime njohëse me zyrtarë të ndryshëm të institucioneve evropiane”, thotë ministri Mariq.

Më tej ai thotë se 2ne jemi të kënaqur me vendimin final të Hashim Thaçit dhe kryeministrit Isa Mustafa; që më në fund procesi i formimit të asociacionit ka nisur nga pika zero. Ne kemi ardhur në Bruksel për t’i njohur bashkëbiseduesit tanë dhe opinionin ndërkombëtar me vizionin e një realiteti të ri pozitiv në Kosovë, që do të vijë nga themelimi i asociacionit”, thuhet në deklaratën për media të këtij ekipi.

Vetëm disa orë pas këtij njoftimi të ministrit serb në qeverinë e Kosovës, ministrja për Dialog e po kësaj qeverie, Edita Tahiri, i hodhi poshtë këto pohime.

Në një delaratë të shkruar për medie të ministres Tahiri thuhet, se “disinformatat që kanë dalë nga Serbia, se gjoja është formuar grupi punues apo menaxhues për Asociacionin, dua të them se kjo është një gënjeshtër e radhës e Serbisë, sepse grupi menaxhues është krijuar në vitin 2013 sipas marrëveshjes së Brukselit dhe këtë grup e ka krijuar Ministria e Administrimit të Pushtetit Lokal të Republikës së Kosovës.” Ajo më tej theksoi, se “ky grup nuk është formuar nga Presidenti i Kosovës apo Kryeministri i Kosovës dhe se ky grup menaxhues është manipuluar nga Qeveria e Serbisë, që i ka sjellë në Bruksel dhe kanë provuar të organizojnë takime në Bashkimin Evropian, por nuk ia kanë dalë”, thotë në deklaratën e saj Adita Tahiri.

Ministrja Tahiri thotë se “formimi i Asociacionit të Komunave me shumicë Serbe nuk është në agjendën e takimeve në Bruksel dhe nuk mund të zbatohet asnjë veprim pa u përmbushur nga Serbia të gjitha marrëveshjet e arritura deri më tani”.

Kosova dhe Serbia në gusht të vitit të shkuar nënshkruan marrëveshje për krijimin e Asociacionit të Komunave me shumicë Serbe. Sipas kësaj marrëveshjeje, Asociacioni do të ketë përgjegjësi në disa fusha siç janë shëndetësia, arsimi, zhvillimi ekonomik si dhe planifikimi urban. Kjo marrëveshje tash e një vit po kundërshtohet ashpër nga partitë politike opozitare, ku për pasojë vendi u përfshi në një krizë politike që u manifestua edhe me dhunë brenda parlamentit të Kosovës dhe me protesta nëpër rrugët e Prishtinës. Qeveria e Kosovës thotë se Asociacioni është në pajtim me ligjet e kushtetutën e Kosovës, ndërsa opozita thotë se me krijimin e asociacionit shënohet ndarja e brendshme e Kosovës në vija etnike. (dw)