Arkivi mujor: Shtator 2016

Bota, Shkenca

Të dhëna të reja për të kuptuar vrimat e zeza

Komento

vrima-e-zezeShkencëtarët vazhdojnë të zbulojnë misteret e vrimave të zeza në hapësirë, të cilat kanë një forcë gravitacionale aq të madhe sa që nuk lejojnë as reflektimin e dritës. Vrimat e zeza krijohen kur yje super gjigandë shpërthejnë duke krijuar supernova me një shkëlqim të ndritshëm. E gjithë materja e shpërndarë nga ky shpërthim i fuqishëm mblidhet në një hapësirë të vogël nga graviteti. Tani një satelit japonez ka sjellë të dhëna që po ndihmojnë për të deshifruar sekretetet e vrimave të zeza që rezultojnë nga ky fenomen i gjithësisë.

Vrimat e zeza nuk dallohen nga syri i njeriut. Por teleskopë specialë i zbulojnë ato, duke diktuar si ndikojnë tek yjet që kanë pranë.

Në shkurt, agjencia hapësinore e Japonisë dërgoi në orbitë satelitin Astro-H për të studiuar struktura të mëdha të kozmosit, si për shembull vrimat e zeza që ekzistojnë në qendër të thuajse të gjitha galaksive.

Por sateliti pësoi defekt pas një muaji në hapësirë. Megjithatë, gjatë periudhës që funksionoi kishte mbledhur të dhëna shumë të rëndësishme për Perseusin, një bashkësi me qindra galaksi që ndodhet 240 milionë vjet larg Tokës.

Sateliti Astro-H kishte në bord një spektometër special me rreze X, i cili tregoi se gazi tepër i nxehtë në qendër të bashkësisë së galaksive lëvizte shumë më ngadalë se mendohej:

“Kjo na jep mundësi të bëjmë matje të sakta të energjisë që ushqen këtë masë gazi nga vrimat e zeza, masive, pra na jep mundësi të kemi një ide më të plotë të evolimit të galaksive: si formohen yjet, si ftohet gradualisht gazi që pastaj formon yjet,” thotë fizikani Brian McNamara.

Studiuesit po analizojnë edhe një lloj materjeje që quhet plazma e nxehtë, si dhe gazet që rrethojnë galaksitë.

“Këto janë gaze që nuk janë ftohur dhe kondensuar si shiu në atmosferë, duke rezultuar në formimin e yjeve apo planeteve. Pra kjo masë gazi përmban potencial për të ardhmen dhe ne po përpiqemi të kuptojmë se çfarë të ardhmeje ka përpara kjo galaksi dhe galaksi të tjera,” thotë studiuesi McNamara.

Vrimat e zeza super masive mund të ndikojnë tek forma dhe mënyra e evolimit të galaksive:

“Energjia e çliruar nga këto vrima të zeza është e lidhur ngushtë me proceset atmosferike dhe përbën lëndën nga e cila do të formohen yjet e ardhshme,”thotë zoti McNamara.

Kjo nënkupton se masa e padukshme gjigande në zemër të galaksive është pulsi që dikton si do të zhvillohet galaksia në të ardhmen. (voa)

Maqedonia

Tetova në alarm, Gruevski toleron “Jugohromin”, ministri i BDI-së heshtë

Komento

jugohrom“Deri në prill të vitit 2016 duhet t’i plotësonin standardet, ajo ishte vendimi i qeverisë që u soll para dy viteve, përderisa ajo nuk respektohet, do të merën masa ligjore”, u shpreh Vlladimir Peshevski, zëvendëskryeministër.

Këtë deklaratë zëvendëskryeministri Peshevski e kishte dhënë në dhjetor të vitit të kaluar, i pyetur se çfarë do të ndërmerret nëse kombinati metalurgjik “Jugohrom” nuk përmbush standardet ekologjike.

Kaloi edhe ky afat dhe deri tani nuk është plotësuar kushti kryesor siç është vendosja e filtrave për uljen e nivelit të ndotjes së ajrit. Afati tjetër shtesë i dhënë nga Qeveria është 31 tetori i këtij viti.

Ish kryeministri dhe kryetari i VMRO-DPMNE , Nikolla Gruevski theksoi se kësaj kompanie për plotësimin e standardeve do ju duhet së paku edhe një vit.

“E fundit e cila ka filluar investimin është Jugohromi i Jugunovcës, investimi i të cilës pritet që të përfundoj vitin e ardhshëm dhe është në zhvillim e sipër”, tha Nikolla Gruevski, Kryetar i VMRO-DPMNE-së.

Edhe pas disa tentimeve, TV21 nuk arriti në asnjë mënyrë që të bie në kontakt me Ministrin e Mjedisit Jetësorë Bashkim Ameti.

Përgjigje nuk arritëm të marrim edhe nga drejtuesit e “Jugohrom”.

Por ai që inicioi protestat e vitit të kaluar kundër ndotjes së ajrit në rajonin e Tetovës, Arianit Xhaferi nga “Eco Guerilla” thotë se Ministrat e Mjedisit nuk kanë fuqi vendimmarrëse.

“Ministrat e Mjedisit që kanë qenë deri tani, të gjithë kanë qenë të njëmendje që kanë thënë se do e mbyllim Jugohromin nëse nuk plotësohen kushtet, por një gjë e tillë nuk ka ndodhur për shkak se roli i tyre më sa duket në atë qeveri është thjeshtë roli i një figure pasi që nuk kanë fuqi vendimmarrëse, mesa duket nuk kanë ndonjë impakt tek ajo që ata quajnë partner koalicioni, apo tek VMRO-DPMNE”, tha Arianit Xhaferi, Kryetar i “Eco Guerilla”.

Sipas analizave të bëra nga organizata ekologjike “Eco Guerila”, Jugohromi qiellin e Pollogut e pasuron me 30 ton pluhur kancerogjen në dit. Ndërsa me vendosjen e filtrave vetëm 800 kilogram pluhur. (Tv21)

Shqipëria

Schröder: Optimist për Shqipërinë; Mbështetje planit “Merkel” për Ballkanin

Komento

gerhard-schroeder-ish-kancellari-i-brdNë përfundim të vizitës së tij në Shqipëri, ish-kancelari gjerman Gerhard Schröder shprehet optimist për hapat e ndërmarra nga Shqipëria në rrugën drejt Bashkimit Europian.

“Përshtypja ime është se, progresi që është arritur këtu vitet e fundit është mëse i qartë. Përveç kësaj, procesi i reformës që ka lançuar dhe së fundmi realizuar qeveria, do ta shtyjë Europën të reflektojë dhe Shqipërinë ta kuptojë se është pjesë integrale e Bashkimit Europian. Të paktën unë shpresoj për këtë. Është bërë shumë për këtë dhe kjo rezulton edhe nga të gjitha bisedat që kam zhvilluar. Prandaj, unë shpresoj dhe pres që ky proces pozitiv të vazhdojë më tej”, thotë Gerhard Schröder, ish-kancelar i Gjermanisë.

Por si socialdemokrat, ai nuk harron të veçojë rolin e qeverisë së majtë.

“Unë shpresoj që ky proces, nën drejtimin e zotit Rama, të vazhdojë kështu dhe i uroj atij fat në zgjedhjet e ardhshme. As që bëhet fjalë dhe as që pritet ndryshe prej meje, sepse është një pjesë e të majtëve demokratë në Europë dhe një pjesë e mirë e tyre”, shprehet më tej Schröder.

Edhe pse ishte Angela Merkel, ajo që e largoi nga skena politike, ai e mbështet atë kur flitet për Shqipërinë.

“‎Znj. Merkel e bëri të qartë se në marrëdhëniet midis Shqipërisë dhe Gjermanisë ka vazhdimësi. Unë jam i lumtur për faktin se në të njëjtin vend, ku isha sot, dhe pikërisht në forumin që mora pjesë u artikulua qartë se marrëdhëniet janë të ngushta dhe besimplota. Gjermania, nën drejtimin e znj. Merkel, do të vazhdojë të mbështesë dëshirën e Shqipërisë për t’u bërë anëtare e Bashkimit Europian, çfarë është një zhvillim i mirë”, shpjegon Schröder.

E në fund, Gerhard Schröder ka dhe një këshillë për politikën shqiptare.

“Unë besoj se Shqipëria qëndron tanimë përpara çështjes dhe domosdoshmërisë të lejojë të bëhen realitet zhvillimet pozitive që ndodhën, e pikërisht atë çfarë Parlamenti vendosi për Reformën në Drejtësi dhe ndryshimet kushtetuese. Pra, siç thuhet në gjuhën e politikës, ta implementojë atë. Unë mendoj se do t’ia dalë mbanë dhe shpresoj se kjo do të çojë në hapjen e bisedimeve për anëtarësimin në Bashkimin Europian”, deklaroi Gerhard Schröder.

/ Top Channel

Kosova

Vetëvendosje me propozime për kufirin me Malin e Zi

Komento

visar-ymeriNë Kosovë, lëvizja Vetëvendosje prezantoi të martën një propozim pesëpikësh për zgjidhjen e situatës së krijuar në vend për shkak të marrëveshjes për shënimin e kufirit me Malin e Zi.

Kryetari i kësaj lëvizjeje, Visar Ymeri, tha se “marrëveshja duhet të jetë në përputhje me rregullat e të Drejtës Ndërkombëtare Publike”. Ai tha se kjo lëvizje propozon që parlamenti i Kosovës, “të themelojë një komision gjithë-partiak dhe mbi-partiak”, që të jap udhëzimet për shënimin e kufirit dhe të ” të themelohet edhe një komision hetimor për marrëveshjen e 26 gushtit”, të vitit 2015 që u nënshkrua ndërmjet Kosovës dhe Malit të Zi.

Në pikën e tretë, Vetëvendosje propozon që “kryeministri i Kosovës, përmes një shkrese zyrtare, t’i dërgojë kërkesë homologut të tij nga Mali i Zi, për rishikim të marrëveshjes”.

Vetëvendosje propozon që “kryeministri i Kosovës, përmes një shkrese zyrtare, të zotohet para institucioneve të Bashkimit Evropian për zgjidhje të drejte në lidhje me demarkacionin, dhe të kërkojë që kjo të mos jetë pengesë për procesin e liberalizimit të vizave dhe proceset e mëtutjeshme për integrime evropiane”.

Sipas Vetëvendosje “duhet të organizohet një konferencë shkencore ndërkombëtare në Prishtinë për çështjen e demarkacionit”.

Kryeministri i Kosovës, Isa Mustafa, ka paralajmëruar se do të ftojë opozitën për të diskutuar për çdo argument të mundshëm rreth kësaj marrëveshjeje.

Marrëveshja më Malin e Zi, çoi në krizë të thellë politike në vend për shkak të mospajtimeve ndërmjet qeverisë dhe opozitës e cila pohon se marrëveshja e dëmton Kosovën për mbi 8 mijë hektarë tokë dhe hedh poshtë pohimet e Komisionit Shtetërorë për kufirin se shënimi i tij është në pajtim me dokumentet në fuqi, përfshirë edhe planin në bazë të të cilit është shpallur pavarësia e Kosovës.

Më një shtator kryeministri i Kosovës, Isa Mustafa tërheqjen nga rendi i ditës në parlamentin e Kosovës të projektligjit për ratifikimin e marrëveshjes. Sipas, përfaqësuesve të opozitës kjo në fakt nënkupton rënie të kësaj marrëveshjeje dhe tash është koha për rishikim të plotë të saj.

Më 26 gusht të vitit 2015, Kosova dhe Mali i Zi nënshkruan në Vjenë marrëveshjen për shënimin e kufirit ndërmjet tyre. Ndërsa Mali i Zi e ka ratifikuar marrëveshjen, në Kosovë ajo nxiti mospajtime të thella.

Kryeministri i Malit të Zi, Milo Gjukanoviç, tha në fillim të shtatorit se mospajtimet në Kosovë lidhur me shënimin e kufirit ndërmjet të dyja vendeve janë çështje e brendshme e Kosovës dhe pret që ajo të zgjidhet nëpërmjet dialogut të brendshëm të saj.

Debati për kufirin në Kosovë u përcoll gjatë një viti me skena të dhunshme në parlament e ndonjëherë edhe jashtë tij.

Ratifikimi i marrëveshjes është kusht që Kosova duhet ta përmbushë para se të përfshihet në regjimin e udhëtimit pa viza në Bashkimin Evropian. (voa)

Shqipëria

Tiranë: Raport periodik i Bankës Botërore mbi gjendjen ekonomike

Komento

raporti-periodik-i-bbBanka Botërore deklaroi sot se rritja ekonomike e Shqipërisë pritet të jetë këtë vit 3.2 për qind, duke zbutur varfërinë dhe papunësinë.

Në Raportin e Rregullt Ekonomik për Europën Juglindore thuhet se rritja ekonomike e Shqipërisë po shtohet nga viti në vit, ndonëse borxhi publik dhe papunësia janë ende të larta, megjithë një rënie të lehtë që shënuan.

“Deficiti fiskal dhe borxhi publik pësuan rënie si rezultat i reformave që u ndërmorën në Shqipëri” pohuan përfaqësuesit e Bankës Botërore.

Shkalla e punësimit në Shqipëri këtë vit arriti 6.7 përqind, falë rritjes ekonomike dhe reformave në tregun e punës.

Rritja ekonomike dhe reformat krijuan vende pune, por papunësia është ende e lartë. Punësimi vijon të jetë nën nivelet e para-krizës, në Shqipëri.

Sipas studiuesve të Bankës Botërore, rigjallërimi i konsumit dhe investimet private, të mbështetura nga projektet e sektorit të energjisë, pritet të udhëheqin rimëkëmbjen ekonomike në Shqipëri.

Nga ana tjetër, deficitet e llogarive korrente u përkeqësuan disi në 2016 për shkak të rritjes së deficitit tregtar në mallra dhe rënies së transfertave.

Edhe investimet e huaja direkte shënuan rënie, duke reflektuar ecurinë e tregjeve ndërkombëtare dhe pasigurinë politike” thuhet në raport.

Sipas autorëve, deficiti fiskal u ngushtua për shkak të reduktimit të shpenzimeve. Sa më shumë të fuqizohen parametrat fiskalë aq më shumë pritet të bjerë borxhi publik.

Kreditimi nga bankat për ekonominë private po zgjerohet dhe ka një rimëkëmbje të përkohshme të kreditimit, por raporti i kredive të këqija ende i lartë.

Sipas raportit të Bankës Botërore, bankat private janë likuide dhe të mirëkapitalizuara, kreditë e këqija u reduktuan në të gjitha vendet e rajonit, përveç Shqipërisë.

Ekspertët e Bankës Botërore pohojnë se rritja e qëndrueshme ekonomike përballet me rreziqe të shtuara si paqëndrueshmëria e tregjeve financiare, eksportet e ulëta të rajonit, dobësia e Greqisë dhe tensionet e Turqisë. Por ka edhe rreziqe të brendshme si zgjedhjet dhe pasiguria politike.

Banka Botërore theksoi se rritje ekonomike e qëndrueshme përballë rreziqeve të shtuara të situatës mund të arrihet vetëm me reforma këmbëngulëse dhe me përmirësimin e klimës së biznesit.

Studiuesit vlerësuan se rreziqet në rritje theksojnë urgjencën e reformave strukturore për të konsoliduar rimëkëmbjen e saponisur.

Sipas Bankës Botërore janë veçanërisht të ngutshme për t’u trajtuar: heqja e pengesave për punësimin formal, përmirësimi i klimës së biznesit dhe qeverisjes, barazi dhe cilësi në sistemet e mbrojtjes sociale, si dhe ecja në integrimin europian. (voa)

Bota

Shkëmbime të ashpra në debatin Clinton-Trump

Komento

clinton-trumpKandidatët për president Hillary Clinton dhe Donald Trump u përballën të hënën mbrëma në debatin e parë mes tyre, ndërkohë që janë mbërthyer në një garë të fortë për Shtëpinë e Bardhë.

Zoti Trump kritikoi zonjën Clinton se për 30 vjet nuk kishte bërë asgjë për krijimin e vendeve të punës. “Sekretare, ju nuk keni një plan”, tha zoti Trump.

“Donaldi jeton në botën e tij,” u përgjigj zonja Clinton.

I pyetur se përse nuk deklaron taksat, Donald Trump tha se ai do t’i publikojë ato kur zonja Clinton të publikojë të 33,000 emailat që janë fshirë.

Zonja Clinton pranoi se kishte bërë gabim për çështjen e serverit privat dhe se nëse do t’i jepej një shans tjetër do të vepronte ndryshe.

Sulmet kibernetike ishin një temë për të cilën u debatua. Zonja Clinton kritikoi rivalin Trump për lavdërimet ndaj Presidentit rus, Vladimir Putin, dhe ndaj sugjerimit të tij që Rusia të piratojë qeverinë amerikane.

Kandidatët folën për grupin Shteti Islamik. “Jam i tëri për NATO-n, por ajo duhet të fokusohet te terrorizmi,” tha zoti Trump, i cili shtoi se NATO-ja duhet të dërgojë trupa në Lindjen e Mesme për të çrrënjosur ISIS-in.

Zonja Clinton tha se NATO-ja po e lufton terrorizmin, dërgoi trupa në Afganistan pikërisht për të luftuar terrorizmin.

Ajo kritikoi zotin Trump për çështjen e armëve bërthamore, që ajo tha se ai i trajton me shkujdesje. Qëndrimi i tij për armët bërthamore është thellësisht tronditës, – tha zonja Clinton. Ajo tha se SHBA do t’i respektojë marrëveshjet me aleatët.

Trump u përgjigj: Armët bërthamore janë kërcënimi më i madh ndaj vendit tonë.

Ai foli për çështjen e gjykimit dhe temperamentit që duhet të kenë kandidatët. “Unë kam gjykim shumë më të mirë se sa ajo dhe një temperament shumë më të mirë. Temperamenti im është arma ime më e fortë,” tha zoti Trump.

Zoti Trump kritikoi ashpër marrëveshjen me Iranin. Është marrëveshja më e keqe që është bërë ndonjëherë në histori, tha ai.

Rivalja Clinton kundërshtoi. Ajo e quajti marrëveshjen me Iranin të suksesshme.

Clinton: Cila do të ishte alternativa e zotit Trump në këtë rast?

Trump: Për të qenë president duhet të kesh forcë dhe ajo nuk e ka këtë forcë.

Clinton: Ju flisni për forcë ndërkohë që unë kam vizituar dhe negociuar me kaq shumë vende.

Trump: Ju keni shumë përvojë, por një përvojë të keqe.

Kandidati Trump tha se zonja Clinton ka shpenzuar qindra miliona dollarë për reklama kundër meje dhe kjo nuk është e ndershme.

Zonja Clinton tha se do ta mbështeste rezultatin e zgjedhjeve. Dikush do të fitojë e dikush jo, tha ajo.

Zoti Trump tha se qëllimi i tij është që Amerika të bëhet përsëri madhështore. “Nëse ajo fiton, unë absolutisht do ta mbështes rezultatin”, tha ai.

Njëqind milionë njerëz mendohet se e ndoqën debatin në Universitetin Hofstra në afërsi të Nju Jorkut. Kjo është audienca më e madhe ndonjëherë që ndjek një debat presidencial në SHBA.

Është hera e parë që amerikanët panë dy kandidatët ballë për ballë në të njëjtin podium. Sondazhet politike i jepnin zonjës Clinton një avantazh të lehtë para debatit.

Clinton dhe Trump tashmë i kanë bërë të qarta qëndrimet e tyre mbi shumë çështje jetike, duke përfshirë ekonominë, emigracionin, ushtrinë dhe terrorizmin, prandaj debati kishte të bënte më tepër me çështjet e temperamentit, besueshmërisë dhe shkallën e pëlqimit të votuesve për secilin kandidat.

Gruaja dhe fëmijët e zotit Trump ishin në sallë, po ashtu edhe ish-Presidenti Bill Clinton dhe vajza e çiftit Clinton, Chelsea.

Debati ndahej në gjashtë segmente 15-minutëshe. Temat kryesore ishin tre: Drejtimi i Amerikës, arritja e begatisë dhe siguria e Amerikës.

Nga tre debatet presidenciale, debati i parë është tradicionalisht më i ndjekuri, dhe zhvillohet në një moment kritik, thotë Matthew Dallek i Universitetit “George Washington”. “Tashmë rezultatet janë shumë më të barabarta se ç’pritej, kështu që debati ka peshë më të madhe për të dy kandidatët”, thotë ai.

Debatet televizive presidenciale filluan në vitin 1960, me një debat ndërmjet Richard Nixon dhe John Kennedy. Që nga ajo kohë, debatet televizive kanë ndikuar në disa gara presidenciale. “Në një vit normal, debatet janë mënyra e vetme për ta ndryshuar garën pas mbarimit të konventave të partive. Është momenti kur numri më i madh i njerëzve ndjekin garën nëpërmjet mediave,” thotë profesori për qeverisjen në Universitetin “George Mason”, Jeremy Mayer.

Mundësi dhe rreziqe

Të dy konkurrentët vuajnë prej një mospëlqimi të lartë nga votuesit dhe debatet ofrojnë mundësi të reja, por edhe rreziqe. Zoti Meyer thotë se “debati mund t’u ofrojë kandidatëve një shans të dytë për të krijuar një tjetër përshtypje, ose për të çimentuar përshtypjen negative”.

Gjatë viteve të fundit, debatet presidenciale nuk kanë patur ndikimin e zgjedhjeve të mëparshme. Profesori Wayne thotë se: “Mund të na kujtohen dy debate të rëndësishme në historinë amerikane: debati i vitit 1960, ndërmjet demokratit John Kennedy dhe republikanit Richard Nixon; si dhe ai i vitit 1976, ndërmjet republikanit Gerald Ford dhe demokratit Jimmy Carter. Në të dyja këto debate u bënë gabime dhe paraqitjet nuk ishin të duhurat, duke ndikuar për rrjedhojë në rezultatin e zgjedhjeve.”

Do të ketë gjithsej tre debate presidenciale, si dhe një përballje ndërmjet dy kandidatëve për zëvendëspresident, demokratit Tim Kaine dhe republikanit Mike Pence. (voa)

Bota

NATO: Perëndimi po humb luftën e informacionit ndaj rusisë, IS-it

Komento

natoKomandantët e NATO-s janë duke i bërë thirrje Perëndimit të shtojë përpjekjet për t’iu kundërvënë betejës në fushën e informacionit që kanë hapur kundërshtarët.Komandantët paralajmërojnë se vendet si Rusia po shfrytëzojnë lirinë e shtypit në mediat perëndimore për të përhapur dezinformata.

Forcat që ishin në krye të marrjes me forcë nga Rusia të Krimesë në vitin 2014 ishin nga persona me uniforma pa shenja dalluese, por të armatosur rëndë. Moska fillimisht mohoi se ata ishin ushtarë rusë. Por pas disa javësh, njësi të ngjashme, të paidentifikuara u shfaqën në rajonet lindore të Ukrainës.

Dislokimi i njëkohshëm i propagandës dhe fuqisë ushtarake është bërë i njohur me termin “lufta hibride.”

Duke folur në Asamblenë e Përgjithshme të Kombeve të Bashkuara këtë muaj, Presidenti ukrainas Petro Poroshenko tha se taktika të tilla janë duke u përdorur kundër gjithë botës perëndimore.

“Presioni politik, propaganda e hapur, ndërhyrjet në procesin zgjedhor, presioni ekonomik, operacionet e fshehta dhe të hapura ushtarake, sulmet kibernetike, keqpërdorimi i masave diplomatike. Këto janë metodat moderne të luftës së padeklaruar.”

Në një konferencë mbi luftën e informacionit të organizuar nga Instituti “Royal United Services” këtë javë në Londër, Drejtori i Komunikimeve Strategjike të NATO-s Janis Sarts, tha se Perëndimi është mbrapa në këtë fushë.

“Teknologjia është e jona. Kompanitë më të mëdhe të reklamave janë në vendet tona. Megjithatë, ne po e diskutojmë këtë çështje sepse jemi të detyruar nga një sërë aktorësh si Rusia, Shteti Islamik, dhe në një formë më delikate edhe nga Kina.”

Konferenca u përqëndrua tek zgjerimin e medias shtetërore ruse si kanali 24 orësh i lajmeve, “Rusia Sot” ose RT, i cili shpesh është akuzuar se është në shërbim të propagandës së Kremlinit.

Redaktori i revistës “The Economist”, Edward Lucas thotë se kanalet si RTnuk duhet të konsiderohen si gazetari.

“Rusia vërtetë është përqëndruar në fushën e propagandës. Dhe ata gënjejnë pa patur aspak turp. Ata i kuptojnë dobësitë e mediave tona në mjedisin e pas-Luftës së Ftohtë, që përparësi kanë drejtësinë mbi të vërtetën”.

Zoti Lucas thotë se Perëndimi duhet të bëjë më shumë për atë që ai e quan ‘higjienë të medias sociale’.

“Ka një problem real me komente në internet, dhe me llogaritë e rreme në mediat sociale, në veçanti në Twitter. Rusët janë duke shpenzuar shumë para në krijimin e dhjetëra mijëra llogarive të rreme për të shpërndarë propagandën e tyre.”

Zyrtarët e NATO-s thonë se Rusia e bërë strategjinë e informacionit një nga shtyllat kryesore të planifikimit të konflikteve, ndërsa në Perëndim me informacionin merren zyrat e veçanta të marrëdhënieve me publikun. Mark Laity ështëShef i Komunikimit Strategjik në NATO.

“Ne jemi ende duke bërë një luftë të paefektshme, kur në fakt kostoja për të patur komunikimin e duhur është tepër të ulët në krahasim me kostot e tjera.”

Zoti Laity thekson se Rusia ka përdorur strategjinë e disinformacionit dhe luftën hibride në ndërhyrjen e saj në Siri, siç ishte edhe rasti i fundit i disa ditëve më parë, i bombardimit të një autokolone ndihmash në Alepo. Ai shton se Perëndimi duhet të mësojë se si të kundërpërgjigjet. (voa)

Bota, Maqedonia, Shëndeti

OBSH: Ndotja e ajrit shkakton 6,5 milionë vdekje në vit

Komento

jugohromiNjë raport i ri nga Organizata Botërore e Shëndetësisë thotë se më shumë se 90 për qind e popullsisë së botës është e ekspozuar ndaj ndotjes së ajrit, gjë që kontribuon në një numër problemesh shëndetësore. Të dhënat e reja të publikuara sot nga agjencia e OKB-së tregojnë se problemi është më i përhapur në qytetet e mëdha, por njerëzit mund të habiten pasi të mësojnë se sa e keqe është cilësia e ajrit edhe në zonat rurale.

drejtorja-e-obshDuke folur në Gjenevë sot, drejtorja e OBSH-së për shëndetin publik dhe mjedisin, Dr. Maria Neira, e cilëson situatën si një emergjencë e shëndetit publik global:

“Ndotja e ajrit shkakton 6,5 milionë vdekje çdo vit, dhe është një sfidë e madhe dhe ndoshta një nga problemet më të mëdha shëndetësore, dhe rreziku më i madh mjedisor për shëndetin. Për ne është shumë e rëndësishme t’i bëjmë të ditura këto të dhëna, për politikanët që të kuptojnë, për qytetarët që të jenë të vetëdijshëm, dhe për vendet që të bëjnë diçka dhe për të gjithë ne që të promovojmë nisma që do të shkaktojnë uljen e ndotjes së ajrit, dhe duke bërë kështu, mund të ulim numrin e 6,5 milionë vdekjeve të shkaktuara nga ndotja e ajrit çdo vit , të cilat janë të papranueshme” thotë Dr. Maria Neira.

OBSH-ja vlerëson se më shumë se 92 për qind e njerëzve preken nga ndotja e ajrit, dhe ajri i cilësisë së dobët kontribuon në më shumë se gjashtë milionë vdekje në vit. Pothuajse të gjithë këto vdekje – rreth 90 për qind – kanë ndodhur në vende me të ardhura të ulëta ose mesatare.

Të dhënat u mblodhën nga rreth 3.000 mjedise në të gjithë botën. Organizata Botërore e Shëndetësisë, nuk pranoi të thotë publikisht se cili shtet ka ndotjen më të madhe, por të dhënat tregojnë se vendet e Azisë jug-lindore dhe rajoni perëndimor i Paqësorit, duke përfshirë Kinën, Malajzinë dhe Vietnamin, kanë nivelet më të larta të ndotjes. (voa)

Kosova

Dhimbja e LDK-së, votuesit e saj po i bashkohen VETËVENDOSJE!-s

Komento

fatura-lvvPartia e cila po përjeton rënien më të madhe në elektorat, LDK-ja, e cila deri këtu erdhi duke shndërruar veten në vegël të PDK-së dhe ShIK-ut, nuk ka arritur assesi të këndellet pas rezultateve të një sondazhi të fundit i realizuar nga kompania “UBO Consulting”. LDK-ja, e cila s’ka mbetur më shumë se një patericë e Kadri Veselit, ka ripërtypur akuza e shpifje tashmë të njohura, që nuk e shpëtojnë dot nga humbja e vazhdueshme e përkrahjes nga qytetarët.

Siç ka bërë me dije vetë kompania UBO Consulting, sondazhi është realizuar me metodologjinë e OMNIBUS-it, dhe në këtë cikël, ne si Lëvizje VETËVENDOSJE! kemi kontraktuar një numër pyetjesh, për të cilat kemi paguar 1.770 euro, me procedura të rregullta bankare dhe në mënyrë krejt transparente (fatura e bashkangjitur). Pyetje të tilla kontraktohen edhe nga subjekte të tjera, dhe nuk ka kurrfarë parregullsie në këtë mes.

Kjo sjellje e LDK-së, duke mos pranuar të vërtetën, por duke iu kundërvënë më veprime historike, nuk është as e re e as e papritur. Në vitin 2013, e drejtuar edhe atëbotë nga Isa Mustafa, kur ky i fundit kandidonte për kryetar të Prishtinës, LDK-ja nuk i pranonte as sondazhet e institutit slloven ‘IFIMES’, i cili e nxirrte fitues kandidatin e VETËVENDOSJE!-s Shpend Ahmetin. Duke mos u marrë seriozisht as atëherë me gjendjen e rëndë në të cilën ndodhej dhe duke u deklaruar se do ta fitonte Prishtinën “me duar në xhepa”, Isa Mustafa dhe LDK-ja i humbën zgjedhjet në kryeqytet, gjë të cilën sot e asaj dite nuk po mund ta pranojnë.

 

Frazeologjia boshe për politika zhvillimore, nuk e ndihmon dot një subjekt politik që gënjen për hapjen e 120 mijë vendeve të punës, dhe mosrealizmin e premtimit e zëvendëson me arrogancë e sajim të gënjeshtrave të reja. Kurse, deklarimeve bajate e të pavërteta në lidhje me përfaqësuesit e huaj diplomatikë dhe kontakteve të tyre me ne, më së miri iu dha përgjigje Përfaqësuesja Speciale e BE-së në Kosovë, Nataliya Apostolova, e cila erdhi në takim në zyrat tona, tre ditë pasi LDK-ja dhe klani Pronto donin ta paraqisnin organizatën tonë si “terroriste”. E me akuza për kaos, ekzekutime, anarki e vrasje, LDK nuk bën gjë tjetër përveç vetëvrasje politike.

Përpjekja qyqare e LDK-së për të etiketuar, shpifur e akuzuar, nuk do ta ndalë dështimin dhe rënien e mëtutjeshme të kësaj partie të kapur e të kontrolluar nga kokat e krimit në Kosovë. Sikurse nuk e ndihmoi dot as Prokuroria e Policia e kapur duke sajuar raste e duke terrorizuar aktivistët tanë, e as RTK, si mjet propagandues i këtij pushteti kriminal.

Ndonëse LDK mund ta kenë përjetuar shumë rëndë rezultatin e sondazhit të fundit, sondazhi nuk është molotov, armë e as kurrfarë lëndë e rrezikshme, përveçse një mjet jashtëzakonisht institucional, i aplikuar dhe i preferuar në secilin vend demokratik. Por, duket se kjo gjë nuk i bën përshtypje një partie që po e sheh fundin e frikshëm të saj. Këtu duhet theksuar faktin se me gjithë akuzat që LDK drejton ndaj nesh, shumica e përkrahësve të rinj të subjektit tonë vijnë pikërisht nga votuesit e LDK-së, dhe kjo pa dyshim e shqetëson këtë parti, e vetëdijshme për tradhtinë që iu bëri këtyre votuesve (foto e bashkangjitur). Pra, 18.5% e votuesve të LDK-së, sipas sondazhit vijnë tek Lëvizja VETËVENDOSJE! Kjo është dhimbja e vërtetë e LDK-së.

Në fund, Lëvizja VETËVENDOSJE! e fton LDK-në që t’iu japë fund kumtesave me akuza e shpifje, por fillimisht le të publikojë sondazhet në të cilat po thirren, e për të cilat po deklaron se ka rritje të vazhdueshme. Dhe më pas, e ftojmë këtë subjekt, i ftojmë përfaqësuesit e saj, ne debate publike televizive dhe çfarëdo format tjetër, ku diskutohet për sondazhin dhe cilëndo çështje tjetër. (LVV)

levizja-e-votuesve

Bota, Shkenca

Silicon Valley tërheq imigrantë dhe shkencëtarë

Komento

silicon-valleySilicon Valley në Kaliforni, e njohur për kompanitë e teknologjisë së lartë, mund të përshkruhet si vendi i shkrirjes së kulturave dhe gjuhëve të ndryshme. Dhe e gjithë kjo është përqendruar brenda kompanive teknologjike të rajonit. Të jesh emigrant dhe të përpiqesh të ngresh një kompani, kjo mund të jetë e vështirë në disa vende, por jo domosdo në Silicon Valley. Materiali në vazhdim na sjell shembullin e kompanisë Osmo e cila ofron produkte për fëmijë.

Hayley Chu dhe vëllai i saj duket se e dinë si funksionon kjo lodër që sapo e blenë. Rochelle Chu është nëna e tyre.

“Nuk kishte manual për të lexuar por thjesht hapën lodrën dhe po argëtohen.”

Ata po testojnë lodrën e fundit nga Osmo për kodimin. U mëson fëmijëve nga 5 vjeç e lart konceptet themelore të kodimit. Si komandat me bazë logjike me këto blloqe në mënyrë që figura në Ipad të bëjë lëvizjet e duhura. Pramod Sharma është bashkëthemelues i kompanisë Osmo.

“Rëndësi ka ideja dhe mendimet gjatë procesit. Më pak rëndësi ka gjuha e kodimit.”

Nëna, Rochelle Chu, e vlerëson këtë.

“Pozitiviteti qendron pikërisht tek prezantimi miqësor tek kodimi duke luajtur dhe eksperimetuar lirisht.”

Bashkëthemeluesi i Osmos, Pramod Sharma, thotë se të mos qënurit i drojtur për të eksperimentuar është edhe vetë kultura e kompanive në Silicon Valley.

“Si të bëhemi krijues me pak burime? Kjo është sfida. Liria për të vepruar i bën gjërat më të lehta. Mund të bësh pothuasje gjithçka”, thotë zoti Sharma.

Ai thotë se lodra e kodimit nga Osmo vlerësohet kudo sepse të mësuarit për të komunikuar me kompjuterin i kapërcen dallimet gjuhëore dhe kulturore. Prandaj, thotë ai, kompania e tij përbëhet nga njerëz nga mbarë bota.

“Gjithnjë jemi në përpjekje për shumëllojshmëri nga pikpamja kulturore sepse ajo që po ndërtojmë është për fëmijët që janë kudo dhe përpiqen të mësojnë”,thotë zoti Sharma.

Por shumëllojshmëria vihet re kudo në Silicon Valley ku gjuha kompjuterike dhe teknologjia janë ura lidhëse mes kulturave të ndryshme që jetojnë dhe punojnë këtu.

“Në bazë të eksperiencës time më shumë rëndësi kanë idetë dhe veprimet se sa gjuha që flet”, thotë zoti Sharma.

Një kombinim i shumëllojshmërisë së kulturave dhe ideve si dhe liria për novacione, mund të jetë arsyea që në Silicon Valley janë grumbulluar inxhinierë dhe shkencëtarë nga mbarë bota.