Ish-lideri i Lëvizjes Vetëvendosje, Albin Kurti ka deklaruar se gara e Isa Mustafës, Hashim Thaçit dhe Kadri Veselit se cili do ta rrënojë murin dhe si, vetëm sa e mobilizon Serbinë dhe i demobilizon shqiptarët.

Ai në debatin për murin ilegal në veri të Mitrovicës, ka thënë se është me rëndësi të dihet që përfaqësues të UÇK-së të dihet çka kanë bërë në vitin 1999, kur është ndarë Mitrovica.

“Nuk është çështje bukurie e shëmtie, është çështje morale, etike, politike, shtetërore e kombëtare, vetëm ashtu do të zgjidhet drejt. U pa një garë e Thaçit, Veselit dhe Mustafës se cili do ta rrënojë murin dhe si, a me eskadrona, a me eskavator, a me ku e di se si, pra kjo garë me cilin ministri do të bëhet vetëm sa e mobilizon Serbinë e paralajmëron Serbinë dhe i demobilizon shqiptarët, nuk tregojnë kur, s’ka afate kjo gjë, po këta edhe kur të tregojnë kur janë të rrezikshëm sepse e lejnë punën në gjysmë si me 25 korrik të vitit 2011”, tha ai. (rtk)

Shifrat e myslimanëve të radikalizuar në Kosovë janë alarmuese. Strukturat shtetërore dhe të shoqërisë civile në Kosovë përpiqen t’i frenojnë këto zhvillime.

Feja radikale islame është një problem në rritje për Kosovën, por edhe për gjithë rajonin dhe për Evropën. Ekspertët në Kosovë janë të alarmuar për zhvendosjen e identitetit në drejtim të fesë tek shqiptarët dhe kërkojnë masa të vendosura politike dhe sociale.

Megjithëse Kosova numëron vetëm më pak se dy milionë banorë, që prej vitit 2012 kanë shkuar në luftë 316 vetë për t’u bashkuar me Shtetin Islamik, midis tyre edhe gra edhe fëmijë. 58 prej tyre ndërkohë janë vrarë. Aktualisht për Shtetin Islamik, IS vazhdojnë të luftojnë ende 140 kosovarë. 117 vetë prej tyre janë kthyer në Kosovë. Këto shifra ia deklaroi sot Deutsche Welle-s Baki Kelani, zëdhënës i Ministrisë së Brendshme të Kosovës. Sipas Kelanit, hetime po bëhen kundër 237 personave, me akuzën: organizim dhe pjesëmarrje në akte terroriste, pjesëmarrje në akte terroriste jashtë Kosovës, rekrutim, mbështetje, financim i terrorizmit. Prej vitit 2013 janë arrestuar 127 vetë prej të akuzuarve, midis tyre edhe të dyshuarit si drejtues.

Zhvendosje identiteti

Pas këtyre shifrave qëndrojnë fenomene sociale të përmasave të mëdha: varfëria në rritje, 40 përqind papunësi, mungesë shansesh dhe zhgënjim i shumë njerëzve si dhe njëkohësisht kthimi në rritje drejt interpretimeve më të rrepta të fesë islame, të cilat më parë nuk i gjeje në Kosovë. Sipas të dhënave të ekspertëve të sigurisë, rreth 50.000 kosovarë janë sot ithtarë të një feje konservatore islame. Pjesa më e madhe e popullatës së Kosovës janë myslimanë, shqiptarë, romë, turq, boshnjakë.

Sot mund të shikosh në rrugët e Prishtinës, por dhe në qytete të tjera e nëpër komuna gjithnjë e më shumë vajza dhe gra me shami koke, 15 vite më parë kjo përbënte përjashtim. Edhe gra të mbuluara krejtësisht sot nuk janë më të rralla. Që këtu është e dukshme që feja tradicionale islame e periudhës osmane, e ndikuar fort nga sufizmi, po mbulohet gjithmonë e më tepër nga forma më të rrepta, të cilat kanë mbërritur në Ballkan përmes ndikimit saudit.

Sipas një studimi të publikuar në verë 2016 nga Instituti për Studime Politike (KIPRED) në Kosovë “57% e shqiptarëve myslimanë në Kosovë ndihen më parë si shqiptarë, në një kohë kur 32% e shohin veten më parë si myslimanë dhe pastaj si shqiptarë”. Lulzim Peçi, autori i studimit sheh te këta njerëz “një zhvendosje të madhe identiteti, nga përkatësia linguistike etnike (komb i gjuhës) drejt një shoqërie fetare-etnike.”

Ndikim i shteteve islamike

Islamizimi i shqiptarëve të Kosovës filloi pas fundit të luftës së Kosovës fillimisht ngadalë. Arabia Saudite, Kuvajti dhe shtete të tjera islamike investuan në mënyrë masive në rindërtimin dhe në ndërtimin e xhamive, dërguan predikues dhe mbështetën njerëz në nevojë. Sot në Kosovë ka 742 xhami. Në përgjithësi, numri i ndërtesave myslimane, duke përfshirë edhe shkollat e Kuranit arrin në 798. Por me paratë e predikuesve në vend hyri edhe një fe tjetër islame. Sociologu Smajl Hasani e sheh fajin edhe në sistemin e keq arsimor të Kosovës, ku i është kushtuar pak rëndësi pajisjes së identitetit kosovar me një identitet fetar, multifetar. Kjo u dëshmua edhe nga studimi i fundit i Pisas.

Përfaqësuesit e Bashkësisë Islame nuk pranojnë se janë bashkëfajtorë për radikalizimin. Asnjë nga personat që janë bashkuar me rrjetet terroriste nuk ka dalë nga bashkësia e saj, thotë Besa Ismaili, teologe e Bashkësisë Islame të Kosovës. Ajo thotë se midis besimtarëve të vërtetë “nuk ka ekstremizëm, në besim nuk ka dhunë, por vetëm dashuri.”

Rol i rëndësishëm i Gjermanisë

Por megjithë përpjekjet për punë sqaruese, kushtet kuadër në Kosovë mbeten shumë të vështira. Kushtet ekonomike shumë të vështira si dhe mungesa e perspektivës për rininë, e cila e sheh veten gjithnjë e më të izoluar në Evropë si dhe strukturat e dobëta shtetërore, me pavendosmërinë, korrupsionin dhe paaftësinë e tyre kanë ndikuar në gjendjen aktuale, thotë Florian Qehaja, drejtor i Qendrës për Studimet e Sigurisë në Kosovë. Ai kërkon një strategji të gjerë të integruar, si në arsimimin e rinisë, në zgjedhjen e imamëve, në mediet si dhe në arkitekturën e sigurisë në vend, në bashkëpunimin rajonal me Maqedoninë dhe Shqipërinë dhe mbështetje të mëtejshme ndërkombëtare, për ta ndalur islamizimin e mëtejshëm.

Kosova është pjesë e aleancës globale kundër terrorizmit dhe ka plotësuar në këtë kuadër edhe kushtet ligjore kuadër, për të vepruar kundër terrorizmit. Por në mënyrë që feja radikale islame të mos zërë rrënjë në Kosovë dhe që vendi të mos kthehet në vatër të islamizmit, nevojiten masa të gjera të shoqërisë dhe të politikës, po edhe fuqitë mbrojtëse ndërkombëtare duhet të veprojnë në mënyrë më të vendosur kundër zhvillimeve. Gjermania është e lidhur me Kosovën veçanërisht përmes një numri të madh migrantësh (rreth 400.000 vetë). Atentatori i aeroportit, që vrau në 2011-ën dy ushtarë amerikanë, ishte fëmijë migrantësh shqiptarë. Dhe arrestimi sot i dy kosovarëve në Oberhausen, në Gjermani tregon forcën shpërthyese që ka radikalizimi në Kosovë edhe për Gjermaninë. (dw)

Tribunali Ndërkombëtar i Arbitrazhit e ka obliguar Postë dhe Telekomin e Kosovës që t’ia paguaj kompanisë Z Mobile humbjen e pretenduar prej 30 milionë euro tashmë të konstatuar. Posta dhe Telekomi i Kosovës u padit për mos zbatimin e këtyre pikave të kontratës:

1. Vonesat në liferimin e SIM kartelave nga ana e PTK-së për Zmobile,
2. Mos alokimi i bllokut numerik shtesë prej 100 mijë numrave që fillon me 045 7XX XXX,
3. Mos dhënia e shërbimeve 3G dhe 4G, si dhe
4. Degradimi i shërbimeve.

Lëvizja VETËVENDOSJE! ka reaguar me kohë për kontratën mes PTK-së dhe operatorin “Z Mobile”. Kontrata e nënshkruar dhe tash dëmi i bërë lidhet me njerëz kryesorë të asaj kohe, veçanërisht me Hashim Thaçin si kryeministër dhe paraardhësin e tij Agim Çeku, me Ahmet Shalën si ministër i zhvillimit ekonomik dhe drejtuesve të ART-së e PTK-së, veçanërisht të Etrur Rrustemaj si drejtues i PTK-së dhe pasardhësit të tij Shyqyri Haxha.

Kjo kontratë që kur u nënshkrua kishte vetëm një qëllim: zhvatja e pasurisë publike dhe orientimi i saj në xhepat privat, në këtë rast vëllazërisë Pronto të Hashim Thaçit e Kadri veselit dhe të vëllezërve Devolli.

Asnjë nevojë, asnjë përfitim e asnjë arsye nuk kishte Republika e Kosovës e as PTK-ja e publikut që të hynte në një kontratë të tillë.

Lëvizja VETËVENDOSJE! vazhdimisht ka kërkuar hetime në lidhje me menaxhimin e kësaj ndërmarrje publike, ndërhyrjet e mafioze të klanit pronto në të, gjë që tash u konfirmua me humbjen 30 milionë eurove në arbitrazh nga Kompania Dardafone.net e njohur në treg si Z-mobile.

Historia e kontratës kriminale të bërë midis PTK-së dhe Dardafon.net është debatuar e adresuar në Kuvendin e Kosovës, e atë botë Ministri Shala, ose personazhi që i realizoi Hashim Thaçit gjithë punët e pista në ekonomi, deklaronte se gjithçka është bërë sipas ligjit, anipse  Dardafon, një kompani private do të përdorte të gjithë infrastrukturën e entit publik dhe do të merrte 73% të fitimit kundrejt 27 % që i lihej PTK-së.

Në këtë kuptim edhe ndërrimet e pronësisë nga Dardafon.LCC, në Dardafon.net/Z-mobile janë po ashtu të dhëna për komprometimin e kësaj kontrate.

Për këtë kontratë mafioze, EULEX pati hapur hetime dhe arrestoi drejtuesit e PTK-së. Ato hetime pas ndikimeve nga klani printo u heshtën, madje edhe u shuan.

Kudo, pra në çdo vend normal, me qeveri e institucione serioze, kjo kontratë do të ishte objekt i hetimit e më pas i anulimit të saj për shkak të shkeljeve të shumta që përmban. Por në qeverisjen e zaptuar nga krimi i organizuar u sajuan shkelje të qëllimshme të kontratës që duhej të hetohej, dhe si pasojë u ndërtua  një rast kundër kompanisë publike në Tribunalin ndërkombëtar të Arbitrazhit. Rast i cili rezultoi me një gjobë 30 milionëshe kundrejt PTK-së e si fitim nga një kontratë e paligjshme.

Nuk ka reagim të institucioneve shtetërore në këtë rast. Nuk tregohet se pse u pranua arbitrazhi në këtë rast, duke e ditur se dërgimi i një rasti në arbitrazh nuk mund të bëhet pa pajtimin e të dyja palëve. Për më tepër pse u pranua arbitrazh ndërkombëtar kur në sistemit juridik të Kosovës ka mekanizëm të arbitrazhit? Ende nuk kemi asnjë informatë nga institucionet shtetërore për atë se kush e ka përfaqësuar PTK-në në arbitrazh? Cila ka qenë strategjia e mbrojtjes? Pse nuk u padit ARKEP nga PTK-ja kur e obligoi këtë të fundit që ta zgjerojë bllokun numerik përtej kontratës fillestare në favor të Z Mobile? Pse ARKEP si rregullator i pavarur i tregut ia mirëmban me vendime të veta pozicionin zhvatës një kompanie private karshi publikut?

Menaxhmenti i tanishëm i PTK-së dhe Ministria e Zhvillimit ekonomik, madje dhe kryeministri sigurisht që nuk dërgojnë për ndjekje penale përgjegjësit për kontratën e dëmshme dhe nuk kërkojnë dëmshpërblimin për dëmtimin e kompanisë publike por dorëzohen para kompanisë private me të cilën sigurish që i lidh shumëçka e paligjshme. (LVV)