Mbledhja e Këshillit të Sigurisë Kombëtare për çështjen “Balili” ka thelluar konfliktin institucional në vend. Presidenca dhe Kryeministria janë përplasur sërish.

Në mungesë të kryeministrit Rama, i cili ndodhet për një vizitë në Kosovë, sekretari i Përgjithshëm i Këshillit të Ministrave, ka kërkuar që qeveria të përfaqësohet me zëvendëskryeministrin Niko Peleshi. Por, përgjigja e Presidencës ka qenë refuzimi.

Burime nga Presidenca thanë për Top Channel se kryeministri duhet t’i ishte drejtuar vetë presidentit me një kërkesë për t’i treguar arsyet e mospjesëmarrjes. Dhe nëse presidenti do ta pranonte, kryeministri mund të autorizonte dikë tjetër për ta zëvendësuar. Për rastin konkret, presidenti nuk sheh asnjë arsye objektive për të përligjur mungesën e kryeministrit dhe për të pranuar zëvendësin e tij, pohuan burime nga Presidenca.

Këto zhvillime një ditë përpara mbledhjes së Këshillit të Sigurisë Kombëtare, kanë venë në lëvizje ambasadorin amerikan Donald Lu. Ai është takuar fillimisht me shefen e kabinetit të kryeministrit, por detajet mungojnë plotësisht.

Burime jozyrtare, tregojnë se në qendër është konflikti për Këshillin e Sigurisë Kombëtare, i kërkuar nga kryeparlamentari Ilir Meta, sipas të cilit mosarrestimi i Klement Balili ishte i vetmi shqetësim konkret që iu ngrit në Departamentin e Shtetit.

Por ambasadori amerikan nuk ka mundur të takojë palën tjetër në konflikt, presidentin e Republikës. Burime jozyrtare konfirmuan për Top Channel se ambasadori Lu i kërkoi të enjten një takim presidentit Nishani, por takimi nuk u zhvillua.

Stafi i presidentit nuk pranoi të komentojë përse presidenti nuk e priti ambasadorin amerikan, por zëdhënësja e kreut të shtetit tha se ky nuk ishte refuzim.

Të enjten në mesditë, presidenti u takua me kryeprokurorin Adriatik Llalla, aktualisht në konflikt të hapur me ambasadorin amerikan dhe me informacion të thelluar për çështjen “Balili”.

/ Top Channel

Ambasadori amerikan akuzoi kryeprokurorin Adriatik Llalla për shkeljen e Kushtetutës në përzgjedhjen në emër të organit të akuzës të 3 kandidatëve për 3 poste si anëtarë të Këshillit të Emërimeve në Drejtësi.

Llalla u akuzua se për më shumë se 18 muaj ka folur me zë të lartë kundër reformës në drejtësi.

“Nëse ne, shoqëria civile, partnerët ndërkombëtarë dhe media nuk jemi sy shqiponja, politikanë, gjykatës dhe prokurorë të korruptuar dhe krerë të krimit do të përpiqen të vjedhin zgjedhjet, reformën në drejtësi dhe gjithcka etjetër në ekonominë e vendit.
Po shohim njerëz të fuqishëm që po përpiqen të ruajnë kontrollin e tyre mbi gjykatën dhe prokurorinë. Shembulli më i fundit për këtë është veprimi i Prokurorit të Përgjithshëm të Shqipërisë. Për më shumë se 18 muaj ai ka folur me zë të lartë kundër reformës në drejtësi.
Në muajt nëntor dhe dhjetor prokurorët u përpoqën dhe dështuan të sekuestronin serverin e kompjuterave të ILDKPI që është jetik për vettingun. të premten e shkuar u hodh shorti për anëtarët e Këshilli të Emërimeve në Drejtësi një prej institucioneve të reja që mbron pavarësinë e gjyqësorit. Shorti u drejtua sic duhet nga sekretari i përgjithshëm i kuvendit, por Prokurori i Përgjithshëm dhunoi frymën e Kushtetutës duke dërguar një listë me 3 prokurorë për të plotësuar 3 pozicione”, tha Lu.

Ambasadori amerikan tha se javën e ardhshme do të mbërrijnë gjykatës dhe prokurorë amerikanë dhe nga BE për fillimin e operacionit ndërkombëtar të monitorimit, ndërkohë që u bëri  thirrje shqiptarëve patriotë të kualifikuar që të aplikojnë për të shërbyer në komisionin e “vetting”-ut.

Akuzat ndaj kryeprokurorit erdhën pasi Amabasada Amerikane i revokoi vizën amerikane familjes Llalla dhe një grupi prokurorësh.

/ Top Channel

Prokurori i Përgjithshëm, Adriatik Llalla është njëri nga 30 njerëzit e drejtësisë të cilëve Ambasada Amerikane u ka mohuar vizën dhe kjo mesa duket ka hapur kutinë e Pandorës.

“Si shkak për këtë veprim tërësisht në kundërshtim me frymën e bashkëpunimit ka shërbyer një udhëtim për arsye shëndetësore në SHBA i bashkëshortes së prokurorit të përgjithshëm. Ky veprim i ambasadorit Lu është vijim i sjelljeve shantazhuese që ai ka prezantuar ndaj institucionit të Prokurorisë së Përgjithshme. Këto presione të ambasadorit amerikan në Tiranë janë tipike Sorosiane, të cilat kërkojnë të manipulojnë opinionin publik dhe të zhvlerësojnë institucionet”, ka deklaruar Fjorida Ballauri, shefe e kabinetit të prokurorit të përgjithshëm.

Organi qendror i akuzës e akuzoi ambasadorin amerikan se lëvizjet e tij për heqjen e vizave lidhen me përfitimet personale të Donald Lu. Këto akuza Adriatik Llalla i ka bërë zyrtarisht të njohura nëpërmjet një letre presidentit të Republikës dhe kryetarit të Kuvendit. Thelbi i konfliktit, siç e paraqet prokuroria, e ka zanafillën tek reforma në drejtësi.

“Prej kohësh, zoti Lu, duke u prezantuar si nxitës i reformës në drejtësi në Shqipëri, ka kërkuar me presion që Prokuroria e Përgjithshme të mbajë qëndrime hapur pro paketës ligjore, edhe në ato raste kur projektet ligjore, siç ka rezultuar më pas nga Opinioni i Komisionit të Venecias, kanë qenë tërësisht në kundërshtim me normat kushtetuese, si edhe me respektimin e të drejtave të njeriut”, ka vijuar Ballauri.

Ajo ka theksuar se, “në komunikimet zyrtare dhe informale, ambasadori Lu ia ka bërë të qartë Prokurorit të Përgjithshëm se, nëse nuk do të mbronte publikisht ndryshimet ligjore, do të kishte pasoja personale dhe institucionale”. Por nuk është vetëm reforma në drejtësi thelbi i konfliktit mes Ambasadës Amerikane dhe Prokurorit të Përgjithshëm.

“Rasti më flagrant, i cili është i dokumentuar me shkresë zyrtare, i bërë publik edhe në media, i referohet ndërhyrjes së drejtëpërdrejtë të ambasadorit të SHBA në Tiranë në hetimin që Prokuroria e Rrethit Gjyqësor Fier nisi ndaj kompanisë së naftës “Bankers Petroleum”. Kjo kompani akuzohej nga mediat dhe banorët e zonës ku ushtron aktivitetin se u kishte sjellë dëme të pariparueshme në pasuritë dhe shëndetin e tyre.  Për këtë rast, ambasadori Lu ka kërkuar, në kundërshtim me çdo lloj komunikimi diplomatik dhe ligjor, që hetimi të mos vijonte, pasi pasojat do të godisnin në mënyrë të drejtëpërdrejtë Prokurorin e Përgjithshëm”, ka thënë zyrtarja.

Top Channel i kërkoi informacion Prokurorisë së Përgjithshme mbi gjendjen e dosjes “Bankers”, por organi i akuzës nuk konfirmon nëse hetimet vazhdojnë, apo janë mbyllur.

Akuzat e kryeprokurorit ndaj kryediplomatit amerikan u lidhën edhe me politikën. Më saktësisht, me procesin e dekriminalizimit. Ky proces drejtohet nga Rovena Gashi, të cilës i është hequr viza amerikane pa i dhënë asnjë shpjegim, një ditë para hedhjes së shortit për Këshillin e Emërimeve në Drejtësi.

“Fakti që prokuroi u kërkua me urgjencë në Ambasadën Amerikane, vetëm një ditë para hedhjes së shortit për përzgjedhjen e anëtarëve të Këshillit të Emërimeve në Drejtësi, vlerësohet si një manovër aspak diplomatike, për të ushtruar shantazh ndaj përfaqësuesit të Prokurorisë, por edhe institucionit të Prokurorisë së Përgjithshme, për interesa të segmenteve të caktuara politike që synojnë kapjen e institucioneve të drejtësisë”, ka thënë Ballauri.

Por, duke paralajmëruar furtunë në politikë për shkak të Dekriminalizimit, Prokuroria e Përgjithshme ka akuzuar ambasadorin për shantazh edhe ndaj politikanëve.

“Kjo strukturë po vijon me veprimet e saj dhe rezultatet do të prekin edhe deputetë të tjerë të Kuvendit të Shqipërisë, kryesisht persona të cilët Ambasadori Amerikan në Tiranë i ka shantazhuar publikisht dhe privatisht për të siguruar vota parlamentare për kalimin në Parlament të projektit të mbështetur prej tij për reformën në drejtësi, ku, mesazhe telefonike të dërguara nga kjo Ambasadë, janë bërë publike edhe në media”, ka shtuar Ballauri.

Gjatë mandatit të tij, kryeprokurori Adriatik Llalla ka paralajmëruar të paktën dy herë për dosje të mëdha që do të trondisnin politikën. Deri tani nuk kanë ndodhur, por këtë herë paralajmërimi i kryeprokurorit mori tone akuzuese për ambasadorin amerikan.

“Në vijim, ju informojmë gjithashtu se Ambasada Amerikane në Tiranë u ka revokuar vizën edhe disa zyrtarëve të tjerë të lartë të Prokurorisë, të cilët kanë nën hetim persona me pushtet në Shqipëri, të cilët njihen publikisht si faktorë bashkëpunues të Ambasadorit Amerikan në Tiranë, zotit Donald Lu. Këta persona, të cilët gëzojnë mbështetjen e Ambasadorit Amerikan, janë pjesë e segmenteve të caktuara të politikës, por që ka dyshime që janë të lidhur edhe me botën e krimit të organizuar, të cilët po tentojnë në çdo formë për të deligjitimuar, shantazhuar dhe paralizuar institucionin e Prokurorisë”, ka shtuar zyrtarja e Prokurorisë së Përgjithshme.

/ Top Channel