Parlamenti i Kosovës miraton një rezolutë ku kërkohet pezullimi i dialogut me Serbinë deri në lirimin e Ramush Haradinajt.

Haradinaj, po mbahet në Francë, në pritje të vendimit nga një gjykatë në Kolmar, nëse do ta lirojë, apo, ekstradojë  atë në Serbi. Ai u arrestua me (04.01) nga policia franceze në bazë të një urdhër-arresti ndërkombëtar të lëshuar nga Serbia, e cila e akuzon atë për krime lufte. Rezoluta me të cilën kërkohet pezullimi i dialogut  me Serbinë, u propozua nga Aleanca për Ardhmërinë e Kosovës që udhëhiqet nga Ramush Haradinaj, dhe ajo mori 78 vota të deputetëve.

Lirim pa kusht i Ramush Haradinajt

“Të pezullohet procesi i dialogut për normalizimin e marrëdhënieve ndërmjet Kosovës dhe Serbisë, deri në lirimin e ish-kryeministrit të Kosovës, Ramush Haradinaj. Qeveria e Republikës së Kosovës të kërkojë nga Bashkimi Evropian, që ta detyrojë Serbinë për t’i anuluar të gjitha aktakuzat dhe fletë-arrestet e  lëshuara nga Serbia, përmes Interpolit për shtetasit e Republikës së Kosovës”.

Po ashtu rezoluta i bën thirrje qeverisë së Kosovës që t’i informojë të gjitha instancat ndërkombëtare se “refuzon juridiksionin universal të Serbisë për krimet e pretenduara në territorin e ish-Jugosllavisë dhe konform kësaj të kërkohet edhe lirimi i ish-kryeministrit Ramush Haradinaj”.

Më 2 mars gjykata në Colmar të Francës,  vendosi që ta shtyjë për datën 6 prill vendimin lidhur me kërkesën e autoriteteve serbe për ekstradimin e Ramush Haradinajt.

Dialogu Kosovë-Serbi

Marrëveshja për normalizimin e marrëdhënieve ndërmjet Kosovës dhe Serbisë u nënshkrua me 19 prill të vitit 2013. Që nga ajo kohë janë zhvilluar shumë takime të nivelit të lartë politik dhe janë nënshkruar edhe  një sërë marrëveshjesh ndërmjet të dy vendeve. Për rëndësinë e dialogut Kosovë-Serbi dhe përmirësimin e raporteve ndërmjet dy vendeve, foli  në vizitën e saj të para pesë ditösh nö Kosovë, shefja e diplomacisë evropiane, Federika Mogherini.  Ajo tha në Prishtinë se “përshëndet angazhimin e Kosovës në dialog me Serbinë, duke ritheksuar që “dialogu me Serbinë mbetet formë e pazëvendësueshme për normalizimin e raporteve ndërmjet dy vendeve”.

Partia e zotit Haradinaj i kërkoi Mogherinit që BE,  të ndikojë në lirimin  e zotit Haradinaj, mirëpo, përgjigja e Mogherinit ishte se BE-së nuk mund të ndërhyjë në sistemin e drejtësisë franceze. (dw)

Presidenti i Kosovës Hashim Thaçi, dorëzoi sot në parlament projektligjin për ndryshimin e misionit të Forcave të Sigurisë së Kosovës nga një forcë civile, në një forcë me përgjegjësi mbrojtëse e ushtarake. Në një intervistë për “Zërin e Amerikës” pas dorëzimit të projektligjit, ai tha se do të dëshironte që ky proces të mbështetej edhe nga përfaqësuesit politikë të komunitetit serb në Kosovë, që siç tha ai, po pengohen nga Beogradi. Në intervistën me korrespondentin tonë në Prishtinë Leonat Shehu, presidenti Thaçi tha se fati i Kosovës nuk është i lidhur me fatin e asnjë kryeqyteti të rajonit.

Zëri i Amerikës: Zoti president, sot dorëzuat projektligjin për ndryshimin e misionit të Forcave të Sigurisë së Kosovës. Për çfarë ndryshimesh bëhet fjalë?

Hashim Thaçi: Në kuadër të kompetencave kushtetuese dhe ligjore si president i Republikës së Kosovës dhe si komandant suprem i Forcës së Sigurisë së Kosovës, duke respektuar edhe rregulloren e punës së parlamentit të Kosovës, sot i kam dorëzuar kryetarit të Parlamentit të Kosovës Kadri Veseli dhe kryesisë së parlamentit, projektligjin për transformimin e Forcës së Sigurisë së Kosovës, në një ushtri moderne, një ushtri të standardeve të NATO-s e shumë etnike, si një proces krejt normal, një ndryshim ligjor që e ndryshon karakterin, përmbajtjen dhe misionin aktual të FSK-së. Pra nga një mision civil në një mision të qartë ushtarak.

Zëri i Amerikës: Kur flasim për misionin ushtarak, çfarë përgjegjësish pritet të ketë Forca e Sigurisë së Kosovës?

Hashim Thaçi: Forca e Sigurisë do të luaj rolin dhe detyrat si çdo ushtri e çdo vendi të pavarur dhe sovran. Do të jetë në shërbim të çdo qytetari të Kosovës, do të jetë forcë shumë etnike dhe do të ruaj tërësinë territoriale dhe sovranitetin e Republikës së Kosovës.

Zëri i Amerikës: Kur pritet të miratohet kjo në parlament?

Hashim Thaçi: Tanimë, hapat e parë janë bërë në kuptimin zyrtar institucional. Kryesia e Parlamentit nesër do të shqyrtojë këtë çështje, do t’ia dërgojë qeverisë së Kosovës për të dhënë mendim dhe unë dua të besoj që në ditët e ardhshme, më së largu javën e ardhshme, do të dërgohet për votim në Parlamentin e Kosovës. Dua të besoj dhe shpresoj dhe i bëjë thirrje gjithë spektrit politik të Kosovës pa dallime ideologjike dhe partiake, të bëhemi bashkë për interesin e shtetit, për interesin e qytetarëve të Kosovës, për interesin e së ardhmes së anëtarësimit të Kosovës sa më shpejt në NATO. Nuk ka anëtarësim të Kosovës në NATO, pa ushtri. Dua të besoj që kjo çështje do të bashkojë spektrin politik të Kosovës pa dallim etnik apo partiak.

Zëri i Amerikës: Zoti President, këto ndryshime po kundërshtohen nga përfaqësuesit politik serb në Kosovë dhe autoritetet në Beograd, si i përgjigjeni këtyre kundërshtimeve?

Hashim Thaçi: Unë edhe në vitin 2014 në kuadër të rishikimit të sektorit të sigurisë në Kosovë kam propozuar në atë kohë dhe kemi patur miratimin e plotë të të gjithë faktorit relevant ndërkombëtar, që të kemi shndërrimin nga Forca e Sigurisë, në Forca të Armatosura të Kosovës. Për fat të keq, atëherë, për shkak të çështjeve të ndryshme të brendshme të politikës shqiptare në Prishtinë, nuk ndodhi. Në atë kohë serbët e kanë mbështetur themelimin e Forcave të Armatosura si dhe të gjitha komunitetet tjera, ndërsa tash e tri vite jemi në pritje të një përgjigje tjetër tanimë nga deputetët e Listës Serbe dhe të cilët janë deklaruar shumë qartë se kurrë nuk do ta votojnë themelimin e Ushtrisë së Kosovës. Ky qëndrim i Listës Serbe është i dirigjuar direkt nga qeveria e Beogradit. Fati i Kosovës nuk është i lidhur me fatin e asnjë kryeqyteti të rajonit. Jemi vend i pavarur dhe sovran që marrim vendimet tona. Lista Serbe nuk ka qenë e gatshme të votojë themelimin e Forcave të Armatosura të Kosovës, të votojë ligjin për shndërrimin e FSK-së në Ushtri të Kosovës, një ushtri jo vetëm e shqiptarëve, por një ushtri shumë etnike dhe në shërbim të të gjithëve.

Zëri i Amerikës: Por, këto ndryshime a mund të rrisin tensionet ndërmjet shqiptarëve dhe serbëve në Kosovë, për shkak të mënyrës se si po ndryshohet statusi i Forcave të Sigurisë?

Hashim Thaçi: Definitivisht Forca e Sigurisë së Kosovës si Ushtri e ardhshme dhe moderne e Kosovës, synim kanë anëtarësimin në NATO, do t’u shërbejë të gjithë njerëzve të Kosovës, do të ruaj tërësinë territoriale të vendit, do t’i shërbejë paqes dhe stabilitetit në rajon dhe do të jetë në shërbim të paqes kudo në botë. Pra do të jetë një ushtri e paqes, mbrojtëse dhe do të jetë një ushtri në suaza të funksionimit të vlerave dhe vizionit euro-atlantik.

Zëri i Amerikës: Zoti President, a keni përkrahjen e faktorit ndërkombëtar, posaçërisht të Shteteve të Bashkuara, të cilat vazhdimisht kanë deklaruar se kjo çështje duhet të zgjidhet nëpërmjet ndryshimeve kushtetuese dhe me marrëveshje me përfaqësuesit serb në Kosovë?

Hashim Thaçi: Edhe unë kam punuar tash e tri vite që kjo çështje të kalojë përmes ndryshimeve kushtetuese dhe do të dëshiroja shumë që kjo të ndodhë. Një mbështetje të tillë kemi pasur edhe nga Shtetet e Bashkuara të Amerikës dhe nga NATO-ja, mirëpo është bërë e pamundur thjeshtë pas deklarimeve shumë të hapura, të qarta dhe të vendosura të Listës Serbe dhe të Beogradit që nuk e lejon dhe e kërcënon listën Serbe për të mos votuar FSK-në. Kështu që, tash e vetmja mundësi ka mbetur që Kosova të mbetet pa ushtri ose të kalojë në planin B, do të thotë shndërrimin e FSK-së në ushtri moderne. Kështu që ky vendim është në autoritetin tonë. I kemi informuar të gjithë faktorët relevant ndërkombëtarë. Të gjithë i dëshirojnë ndryshimet kushtetuese dhe do të punojmë deri në momentin e fundit që kjo të ndodhë. Thënë ndryshe procesi i shndërrimit ka filluar është institucional, kushtetues e ligjor, është në kuadër të vlerave dhe kornizës Euro-Atlantike, prandaj unë kam besim të plotë se edhe bashkësia ndërkombëtare do të jetë reflektuese në mirëkuptimin e këtij angazhimi shumë të drejtë të institucioneve të Kosovës. Ushtria e Kosovës nuk po bëhet për t’u angazhuar kundër askujt. Askush nuk ka nevojë të ndihet i kërcënuar, përkundrazi, do të jemi faktor i paqes dhe stabilitetit, fqinjësisë së mirë. Dialogun me Serbinë do t’a vazhdojmë dhe do të punojmë për normalizimin e marrëdhënieve. Unë dua gjithashtu të shpresoj që ky do të jetë një mesazh shumë i mirë se Kosova po konsolidohet si shtet i pavarur dhe Sovran.

Zëri i Amerikës: Zoti President, këto ndryshime në statusin e Forcave të Sigurisë, po ndodhin në një kohë kur rajoni i Ballkanit Perëndimor po përballet me tensione në rritje. Dje shefja për politikën e jashtme në Bashkimit Evropian, Federica Mogherini tha se këto tensione janë “skajshmërisht të rrezikshme”. Çfarë po ndodh aktualisht në këtë rajon sipas jush?

Hashim Thaçi: E ritheksoj edhe njëherë që e gjithë bashkësia ndërkombëtare ka punuar me ne që të ndodhin ndryshimet kushtetuese për themelimin e ushtrisë, mirëpo këto nuk ndodhën dhe bashkësia ka një qëndrim shumë të qartë, në fund të fundit është vendim i institucioneve vendore për formën dhe themelimin e ushtrisë. Është e vërtetë që Ballkani Perëndimor po përballet me një situatë të palakmueshme, të paqëndrueshme, me kriza të brendshme politike, me një vonesë të pajustifikueshme të Bashkimit Evropian për zgjerimin me shtetet e Ballkanit Perëndimor. Një vonesë e tillë po ndodh edhe me Kosovën për fat të keq dhe në kuadër të këtyre vonesave krejt teknike e burokratike të BE-së, kemi lindje të ekstremizmave të formave të ndryshme, të nacionalizmave, por edhe të pretendimit për ndikim të Rusisë në gjithë Ballkanin Perëndimor. Kështu që, Brukseli duhet të ketë një qasje më të shpejtë dhe më strategjike për rajonin që të integrohet. Nuk është e justifikueshme të na tregohet si nuk mund të integrohemi, por duhet të jepen mesazhe si mund të integrohemi sa më shpejt.

Zëri i Amerikës: Zoti President, ditët të fundit janë rikthyer debatet për çështjen e marrëveshjes për shënimin e kufirit me Malin e Zi. Kur pritet ratifikimi i kësaj marrëveshjeje?

Hashim Thaçi: Unë besoj që qeveria e Kosovës do t’a dërgoj në ditët e ardhshme dhe gjithashtu shpresoj që deputetët e Parlamentit të Kosovës më në fund do të votojnë për marrëveshjen për shënimin e kufirit dhe Kosova do të ketë të drejtën e liberalizimit të vizave, sepse tashmë është qëndrim shumë i qartë i Bashkimit Evropian, pa votimin e kësaj marrëveshjeje nuk ka viza për Kosovën, jo me muaj apo vite, por dekada.

Zëri i Amerikës: Si mund të ndodhë kjo kur ka ende mospajtime të thella ndërmjet partive politike?

Hashim Thaçi: Unë besoj dhe shpresoj që këto mospajtime të tejkalohen dhe do të dominojë përgjegjësia dhe arsyeja e interesit shtetëror më tepër sesa interesat partiake.

Zëri i Amerikës: Zoti President, për sa i takon detyrimeve ndërkombëtare, ditët e fundit janë shuar kërkesat për të rishqyrtuar ligjin mbi Gjykatën e Posaçme për Kosovën. Sa është e mundur të bëhen ndryshime në të?

Hashim Thaçi: Ne e kemi theksuar edhe më herët rëndësinë e themelimit të kësaj gjykate, por edhe padrejtësinë historike për themelimin e saj vetëm për shqiptarët. Sidoqoftë, institucionet e Kosovës kanë kryer obligimet e tyre kushtetuese dhe ligjore dhe i kemi dhënë mbështetje të plotë funksionimit të drejtësisë. Nuk kemi asgjë për të fshehur dhe në kuadër të bashkëpunimit me bashkësinë ndërkombëtare kemi bërë edhe këta hapa konkretë.

Zëri i Amerikës: Zoti President, jeni kritikuar kohët e fundit për themelimin e komisionit për pajtim dhe për shumë në Kosovë ky është një veprim i parakohshëm që do të duhej të bëhej pasi të jetë vënë drejtësia në vend. Si u përgjigjeni këtyre kritikave?

Hashim Thaçi: Iniciativa ime për themelimin e Komisionit për të Vërtetën dhe Pajtimin është në kuadër të angazhimeve të mia presidenciale për ndërtimin e një shoqërie shumë etnike, me demokraci qytetare për Kosovën si atdhe i gjithë qytetarëve të saj. I kuptoj zërat kritikë, por ndihem i inkurajuar nga një mbështetje masive prej spektrit politik, prej shoqërisë civile, mediave dhe prej shoqatave të personave të pagjetur. Prandaj nëse po ndodh fenomeni i mrekullueshëm, që njerëzit që kanë të humburit e tyre po deklarohen për të vërtetën dhe pajtimin, mendoj se deklarimet politike janë krejt të paqëndrueshme, të individëve të caktuar. Do të vazhdojmë të punojmë për të vërtetën, sepse e vërteta e ndihmon drejtësinë dhe nuk e zëvendëson dhe që të ndodhë pajtimi ndër etnik në Kosovë. Ky pajtim e ndihmon Kosovën të ecë përpara, është standard ndërkombëtar dhe civilizues evropian është edhe në traditën tonë. Ne e dimë që Serbia ka kryer gjenocid, por nuk duam armiqësi, urrejtje dhe hakmarrje, por duam mirëkuptim, fqinjësi dhe të ardhme të përbashkët si vende të pavarura në rajon që të jemi si Kosova edhe Serbia pjesë e NATO-s dhe BE-së. Prandaj i kuptoj edhe zërat ndryshe, por kjo është rruga e drejtë, e qëndrueshme, efektive dhe një rrugë që na çon përpara.

Presidenti i Kosovës, Hashim Thaçi i ka dorëzuar kryetarit të Kuvendit, Kadri Veseli, Projektligjin për transformimin e Forcës së Sigurisë së Kosovës në një forcë me kompetenca mbrojtëse, ushtarake.

Me këtë Projektligj, Thaçi ka kërkuar nga Kuvendi i Kosovës që t’i jap një mision dhe mandat të ri Forcës së Sigurisë së Kosovës, përfshirë edhe komponentin e mbrojtjes.

Njëherësh, Presidenti i Kosovës ka deklaruar se ky mision i ri i FSK-së, nuk do të ndeshet me misionin që aktualisht e ka forca e KFOR-it në Kosovë.

“Roli dhe misioni i ri i FSK-së do të jetë ai i paqes, i stabilitetit, i mbrojtjes dhe natyrisht kurdo që të kërkohet do të jetë pjesë e misioneve ndërkombëtare, do t’i ketë detyrat e përcaktuara qartë me ligj për mbrojtjen e stabilitetit dhe integritetit territorial të Republikës së Kosovës”, ka thënë Thaçi.

Presidenti Thaçi tha po ashtu se që nga koha kur ishte kryeministër dhe tani si president i Kosovës, ka tentuar që transformimi i FSK-së në Forca të Armatosura, përkatësisht në ushtri, të bëhet përmes ndryshimeve kushtetuese dhe jo ligjore. Por, këto ndryshime, theksoi Thaçi, janë pamundësuar nga Lista Serbe.

“Deputetët e komunitetit serb janë deklaruar dhjetëra herë dhe kanë qëndrime shumë të qarta se kurrë nuk do të votojnë për ushtrinë e Kosovës dhe se ky qëndrim është drejtpërdrejtë i vendosur në Beograd”, tha Thaçi.

“Por, ne nuk mund të mbetemi peng i disponimit të Beogradit se a duhet të themelojë Kosova ushtrinë e vet apo jo. Ne jemi vend i pavarur, sovran, kemi kushtetutën dhe ligjet tona dhe vendimet i marrim vet”, deklaroi ai.

Projektligji për transformimin e FSK-së, do t’i procedohet kryesisë së Kuvendit për hapat e mëtutjeshëm deri në miratimin e tij, ka deklaruar në anën tjetër, kryetari i Kuvendit, Kadri Veseli.

“Nëpërmjet transformimit të FSK-së, Kosova nuk do të jetë më konsumues i paqes në rajon, por kontribuues saj. Shumica e kadetëve të FSK-së janë duke u trajnuar nëpër vendet më prestigjioze të botës. FSK-ja do të jetë partner i sigurt për NATO-n dhe të gjitha etnitetet në Kosovë”, theksoi kryeparlamentari Veseli.

Kreu i Kuvendit vlerësoi se Kosova ka nevojë për rrumbullakimin e identitetit të saj shtetëror.

Partitë opozitare, e mbështesin në parim transformimin e FSK-së në forcë mbrojtëse, ndonëse preferojnë që fillimisht ta lexojnë dhe analizojnë Projektligjin e propozuar.

Deputetja e Lëvizjes Vetëvendosje, Aida Dërguti, thotë se me rëndësi është përmbajtja se çfarë ushtrie synohet të formohet.

“Përmbajtja e projektligjit për ushtrinë është shumë më e rëndësishme sesa emërtimi. Çështja e emërtimit është shumë më e lehtë dhe është çështje e një votimi”, ka thënë Dërguti.

Ndërkaq, Burim Ramadani nga Qendra Kërkimore për Politikat e Sigurisë, thotë se pavarësisht nëse FSK merr përgjegjësi shtesë vetëm me anë të ligjit, kjo nuk e pengon atë që të ushtrojë funksionin e vet mbrojtës dhe ushtarak, nëse i ndryshohet misioni dhe roli që ka.

Ndërsa rreth dilemave, se a duhet të themelohet ushtria e Kosovës me ligj apo me Kushtetutë, Ramadani thotë se në me rëndësi është që në cilindo variant, ajo duhet të mbështetet nga NATO dhe partnerët ndërkombëtar.

“Unë besoj se në cilindo variant, Kosova dhe institucionet e saj duhet të bashkërendojnë aktivitetet dhe veprimet me partnerët strategjik dhe në rend të parë me Shtetet e Bashkuara të Amerikës dhe me NATO-n”.

“Bashkërendimi është i domosdoshëm, për faktin se FSK-ja, me misionin e ri ushtarak, nuk duhet të jetë e kontestuar nga partnerët strategjik të Kosovës, as nga SHBA dhe as nga NATO, sepse Kosova më pastaj synon që të anëtarësohet në NATO”, ka thënë Ramadani.

Kosova, është një shtet shumetnik, që nënkupton se institucionet e saj, duhet të respektojnë edhe parimin e shumëetnicitetit në përbërje.

Presidenti Thaçi ka premtuar që gjatë transformimit, FSK do të përmbushë edhe komponentin e shumë-etnicitetit.

“Është një transformim jo për krijimin e një ushtrie shqiptare, por shumetnike”, ka theksuar Thaçi.

Kosova, vijoi ai, dëshiron të jetë pjesë e NATO-s, por nuk mund të jetë anëtare e NATO-s pa ushtrinë e saj.

Forca e Sigurisë së Kosovës është forcë shumetnike, e armatosur lehtë dhe me uniformë, e cila aktualisht ka për detyrë të zbatojë operacione në rast të krizave në Kosovë dhe jashtë saj, operacione këto për mbrojtjen civile në Kosovë dhe për të ndihmuar autoritetet civile në rast të fatkeqësive elementare dhe rasteve tjera të jashtëzakonshme.

Me transformimin e saj, presidenti dhe institucionet tjera të Kosovës pretendojnë që FSK-së t’i japin edhe kompetenca dhe përgjegjësi nga fusha e mbrojtjes, të cilat kryesisht u përkasin vetëm ushtrive. (REL)