Mesnata e së premtes shënoi fundin e fushatës dhe nisjen e heshtjes zgjedhore. Një ditë përpara zgjedhjeve, ligji, konkretisht Kodi Zgjedhor, ndalon çdo parti të bëjë fushatë apo propagandë drejtuar zgjedhësve.

Vetëm administruesit e procesit të certifikuar nga KQZ janë në detyrë në ditën e heshtjes zgjedhore për të bërë shpërndarjen e materialeve dhe fletëve të votimit në qendrat e votimit.

Procesi do të vëzhgohet nga mbi 5 mijë vëzhgues, përfshirë edhe vëzhguesit afatshkurtër të misioneve diplomatike në vend.

Burime jozyrtare, thonë se në këto zgjedhje që pasojnë dhe krizën politike 3 mujore, do të angazhohen 20 grupe vëzhguesish amerikanë. Ndërkohë sa i takon numrit të zgjedhësve, Ministria e Brendshme publikoi disa ditë më parë numrin e votuesve të regjistruar, për Parlamentaret e 2017-s. Nga 3.451.896 persona 136.239 do të votojnë për herë të parë. Ndër ta, 51 për qind janë meshkuj ndërsa 49 për qind janë femra.

Për herë të parë në vendin tonë 1367 persona të dënuar nuk do të kenë të drejtën e votës, si pasojë e ligjit të dekriminalizimit.

Të dielën në qendrën e votimit, çdo qytetar me të drejtë vote, do të gjejë të listuar në fletën e votimit 18 parti politike, të cilat kanë paraqitur dhe kandidaturat e tyre për parlamentin e ardhshëm. Në total, në garën e së dielës, do të garojnë 2666 kandidatë.

/ Top Channel

Në Shqipëri sot mbyllet fushata elektorale për zgjedhjet që do të mbahen ditën e dielë. Kjo fushatë u dominua nga tre forcat kryesore, Partia socialiste, Partia Demokratike dhe Lëvizja socialiste për integrim të cilat konkurrojnë më vete. Kryeministri Edi Rama po kërkon një mandat të dytë dhe kontrollin i vetëm, të shumicës së ardhshme parlamentare. Kreu i opozitës Lulzim Basha ka vënë fokusin te ekonomia e vendit, ndërsa LSI-ja është përqëndruar në një betejë me dy forcat e mëdha, pas marrëveshjes së arritur mes drejtuesve të tyre në maj.

Shtrëngimi i duarve mes kryeministrit dhe kreut të opozitës pas disa orësh takimi kokë më kokë, ishte akti që shënjoi edhe rrjedhën e zhvillimeve për zgjedhjet e së dielës së ardhshme. Kreu i opozitës la çadrën e protestës tre mujore, për t’u rikthyer në selinë e partisë prej nga pak ditë më vonë ai do të dalë më një listë surprizë emrash për kandidatët me të cilët do të garojë. Një listë e shoqëruar me polemika të shumta për shkak të figurave me peshë të lëna jashtë, së bashku me kritikët e tij. Por zoti Basha do të mbrojë përzgjedhjen e tij personale duke folur për një listë fituese e cila përfaqësonte sipas tij, ndryshimin që qytetarët kishin kërkuar. Me fillimin e fushatës zërat e kundërshtarëve të tij u zbehën. Zoti Basha i qëndroi larg sulmeve me tone të ashpra, duke u përqëndruar në premtimet e pambajtura të shumicës, dhe duke i mëshuar programit të tij ekonomik që premton ulje të taksave: “Më 25 Qershor, këtë të dielë, nuk do të votojmë, për lojërat, teket dhe qejfet e Edi Ramës, as për justifikimet e tij. Mbajeni mend, më 25 Qershor votojmë për ekonominë, punësimin e taksat e ulëta pa të cilat nuk ka ekonomi të fortë”.

Ndërsa mbylli me marrëveshjen e majit një krizë që vështirë se do të mund të kalonte pa pasoja, kryeministrit Rama ju hap një e çarë e madhe në gjirin e koalicionit me të cilin ai drejtoi vendin për katër vjet. Ndarja me LSI-në është përfundimtare. Shkëmbimet e replikave dhe akuzave, dhe gjuha e helmit mes eksponentëve të të dy krahëve ka qenë thuajse e përditshme. Kryeministri fajëson për ndarjen, “lojën me dy porta” nga ana e LSI-së, ish themeluesin e drejtuesin e së cilës, zotin Ilir Meta, socialistët e votuan vetëm pak kohë më parë për postin e presidentit të ardhshëm të vendit. Zoti Rama tani po kërkon një mandat të dytë qeverisës, duke këmbëngulur në nevojën që i vetëm të ketë kontrollin e shumicës parlamentare, duke premtuar një ndërhyrje radikale në administratën shtetërore, punësimet në të cilën ndahen si thela mes partive të pushtetit: “Unë po i flas hapur shqiptarëve: Nëse ju mendoni se është momenti për t’i hyrë këtij revolucioni në administratë, ky revolucion mund të nisë vetëm nga ju, vetëm me votë e të bashkuar në 25 qershor, sepse nëse ne nuk kemi numrat, atëherë jemi fitues, por do të na duhet të ulemi dhe të bëjmë një koalicion, ku jam i bindur do të jetë shumë e vështirë për të ndërmarrë këtë revolucion e për ta çuar atë deri në fund brenda katër viteve”.

E mësuar me rolin e forcës që përcakton nga cila anë do të anojë peshorja e pushtetit, LSI u gjet e papërgatitur nga marrëveshja Rama-Basha e cila u pa si një përpjekje për ta lënë atë jashtë skenës së qeverisjes së ardhshme. Ndonëse kishte premtuar se nuk do të përfshihej në fushatë, i porsa dorëhequr nga posti i kryetarit, zoti Meta u rikthye duke i dhënë sërish tonin asaj në cdo cep të vendit. Disa incidente me përfaqësuesit dhe mbështetësit e saj, i rritën tensione kryesisht me kreun socialist, i cili ishte në qendër të sulmeve të zotit Meta, pa lënë jashtë edhe kreun e opozitës. Sipas tij vota e së dielës, “në radhë të parë do të jetë për kreyfaqeziun që flet për Vettingun dhe Reformën në Drejtësi, për atë që e mbuloi të gjithë Shqipërinë me drogë. Do të çlirojmë edhe Edin edhe Lulushin nga oligarkia. Do të bëjmë një marrëveshje në dritë, me transparencë, me të gjithë shqiptarët, me votën e tyre me 25 Qershor”.

Duke përjashtuar kategorikisht mundësinë e një aleance të ardhshme me LSI-në, zoti Rama nuk ka bërë të njejtën gjë kur bëhet fjalë për Partinë Demokratike. Kreu i kësaj të fundit i ka qëndruar më larg hipotezave për koalicionet e ardhshme, ndërkohë që LSI i është përgjigjur me të njejtën monedhë qëndrimit të kryeministrit Rama. Rezultati i së dielës do të jetë ai që do të përcaktojë jo vetëm fituesin, por dhe do të qartësojë formën që do të ketë qeveria e katër viteve të ardhshme. (voa)

Jo vetëm zhvillimet në Shqipëri, por edhe tendenca e rritjes së numrit të luftëtarëve islamistë në Kosovë zë vend në faqet e shtypit gjerman të së premtes.

Në një artikull të botuar të premten (23.06) nga gazeta gjermane “tageszeitung” vëmendja drejtohet tek zgjedhjet parlamentare që zhvillohen në Shqipëri të dielën. Autori dyshon, nëse kësaj here do të kemi votim të lirë e të drejtë. “Zgjedhjet e lira e të ndershme janë një temë e vazhdueshme në Shqipëri. Organizata për Siguri e Bashkëpunim në OSBE gjithmonë ka pasur kritika për votimet.”

Gazeta gjermane vëren, se gjatë fushatës zgjedhore të dyja palët kanë akuzuar njëra-tjetrën për korrupsion. “Opozita akuzon qeverinë, se nuk ka bërë gjë kundër fenomenit të kanabisit në zonat e largëta malore, dhe se zyrtarë komunalë, policë apo gjykatës janë pjesë e sistemit që merr miliona euro. Shqipëria u ngrit në prodhuesin më të madh të marijuanës nën qeverisjen Rama, sipas opozitës. Por opozita harron, se pikërisht në këto zona rurale ajo ka shënuar suksese të mëdha në votime, dhe se po ashtu është e lidhur me shumë fije me mafian e ndërtimit. Ndërsa Edi Rama dhe socialistët kundërpërgjigjen se demokratët nuk e duan reformën në drejtësi.”

Sipas gazetës gjermane, “taz”, plani i Edi Ramës është “shndërrimi radikal” i shtetit dhe shoqërisë. “Diplomatët e huaj në Tiranë prandaj besojnë tek ai, se mund ta çojë përpara anëtaren e NATO-s.” Rama mund të fitojë në këto votime shumicën parlamentare, shkruan “taz.”

Kosova – nga laike në ndikim salafist

Ndërsa gazeta “Die Welt i kushton vëmendje islamizmit në Kosovë, duke theksuar, se Kosova krahasuar me numrin e popullsisë ka dendësinë më të madhe të islamistëve në Europë. Në shumë xhami kërkohet të rekrutohen milicë terroristë.

Nga njëra anë shëtisin në sheshin para monumentit të Bill Klintonit vajza të reja të veshura me funde, shumë pak mbajnë shami koke, shkruan gazeta gjermane. Por kjo është njëra anë e shtetit të ri të Kosovës, sipas “Dië Welt”. Ana tjetër duket pak metra më larg në një xhami të futur mes ndërtesave. Para saj qëndrojnë dy burra me mjekra të gjata që reagojnë me agresivitet ndaj kamerave ‘futi ato brenda, ndryshe do kesh probleme’. Një tjetër ofrohet dhe përpiqet të qetësojë situatën. Mos jini kaq agresivë me miqtë.”

Sipas gazetës “Die Welt” arsyet e përhapjes së salafizmit në Kosovë gjenden në Bosnjën e viteve 90-të. Sipas gazetës gjermane, “në Kosovë salafistët zunë vend pas bombardimit të NATO-s në Jugosllavinë e mbetur….Me ndihmën e parave arabe Kosova laike brenda pak vitesh u bë një fortesë e salafizmit në Europë.”

Një imam, Visar Duriqi pyetur nga gazeta gjermane është shprehur se ai e ka përjetuar vetë se si u radikalizuan bashkënxënësit e tij. Gazeta gjerman shkruan, se Ai zgjodhi rrugën tjetër, u bë gazetar dhe raporton për islamizmin. “Shkollën e dikurshme ai e sheh me sy kritik. Na mësuan një islam që i bën njerëzit të vrasin.” “Die Welt” vëren se pas ndalimit të fondacioneve nga Arabia Saudite “është bërë edhe më e vështirë transparenca e e burimeve financiere. e nuk mund të verifikohet, nëse derdhen para në Kosovë dhe drejt kujt.”

taz, Die Welt