Arkivi mujor: Gusht 2017

Bota

Merkel kërkon lirimin e gjermanëve të arrestuar në Turqi

Komento

MerkelKancelarja gjermane Angela Merkel flet për raporte të komplikuara me Turqinë. Në konferencën pas pushimeve ajo u prononcua edhe për Poloninë, refugjatët dhe disa çështje të tjera.

Kancelarja gjermane Angela Merkel kërkon mirëkuptim nga bashkëqytetarët me origjinë turke në Gjermani për veprimet e saj ndaj qeverisë në Ankara. “Unë me shumë dëshirë do të kisha raporte më të mira me Turqinë, por duhet të shohim realitetin”, tha Merkel të martën (29.08) në Berlin, në konferencën e shtypit pas pushimeve të verës. Ajo foli për një “fazë shumë të komplikuar” në raportet gjermano-turke.

Për shkak të arrestimit të shtetasve gjermanë në Turqi, ka qenë “për fat të keq” i domosdoshëm edhe riorientimi në raportet me këtë vend, tha Merkel. Përmirësimi i raporteve varet nga “respektimi i rregullave të shtetit juridik”, shpjegoi kryetarja e CDU-së. “Ne nuk shohim momentalisht që kjo po ndodh në Turqi.” Përveç kësaj, ekziston edhe një kërkesë shumë e qartë e qeverisë gjermane që gjermanët e arrestuar për shkaqe politike të lirohen menjëherë.

Aktualisht sipas të dhënave të Ministrisë së Jashtme, nën masa arresti në Turqi po mbahen 10 persona me nënshtetësi gjermane, ndër ta edhe gazetarët Deniz Yücel dhe Mesale Tolu si dhe aktivisti i të drejtave të njeriut Peter Steudtner.

Kërkesa e qartë ndaj Varshavës

Jashtëzakonisht e qartë kancelarja ishte edhe ndaj qeverisë në Poloni dhe sjelljes së saj ndaj shtetit juridik. “Kjo është një temë serioze, sepse ndër parimet elementare për bashkëpunim në BE është respektimi i shtetit juridik” tha Merkel. Uniteti i BE-së është shumë i rëndësishëm edhe për shkak të daljes së Britanisë së Madhe, por kjo nuk do të thotë se mund të anashkalohet respektimi i shtetit juridik. Merkel do të dëshironte raporte shumë të mira me Poloninë, sepse raportet me këtë vend fqinj janë shumë të rëndësishme. Por ne nuk mund të mbyllim gojën dhe të mos themi asgjë, për shkak të ruajtjes së qetësisë. Kjo është një prej bazave të bashkëpunimit në BE. Merkel beson se qëndrimet e BE-së do të thuhen shumë qartë në Varshavë edhe gjatë vizitës së Komisionerit Jean-Claude Juncker, të mërkurën (30.08).

Komisioni i BE-së ka kërcënuar me sanksione Poloninë, për shkak të reformës së kontestuar juridike. Ka nisur madje edhe një procedurë për heqjen e të drejtës së votës së saj në nivelin evropian. Por për këtë kërkohet vendimi unanim i vendeve anëtare të BE-së. Në Gjermani po diskutohet edhe për mundësinë e shkurtimit të mjeteve financiare për shkak të mosrespektimit të shtetit juridik. Polonia i ka hedhur poshtë kritikat si të “pabaza”.

Merkel mbron politikën ndaj refugjatëve

Kancelarja foli edhe për politikën ndaj refugjatëve. Ajo kundërshtoi përshtypjet se ka hequr dorë nga politika e saj e mirëseardhjes për refugjatët. Merkel thotë se masat e fundit ndaj refugjatëve janë në frymën e njëjtë si mirëpritja në vitin 2015. Ajo tha se hapja e kufijve në vitin 2015 për refugjatët në nevojë ishte e domosdoshme, për shkak të gjendjes së rëndë humanitare të tyre.

Por tani kërkohen masa të tjera dhe zgjidhje afatgjate. Evropianët mund të jetojnë në siguri dhe mirëqenie, vetëm nëse shikojnë edhe problemet në vendet e tjera dhe përballen me zhvillimin e tyre ekonomik. Merkel përsëriti kritikat ndaj vendeve të BE-së, të cilat kundërshtojnë politikën e shpërndarjes së refugjatëve. Solidariteti nuk do të thotë vetëm të ndihmosh një vend, por duhet të ndihmohen të gjitha vendet. Në këtë rast edhe Italia dhe Greqia, që po përballen më së shumti me valën e refugjatëve ilegalë.

 

bc/kle/jj (afp, rtre, ape, Phoenix)

Shqipëria

Shtypi gjerman: Prokurori shqiptar rrezikon jetën

Komento

shtypi gjermanGazeta gjermane “tageszeitung” mbi një prokuror shqiptar, të cilit i është rrezikuar jeta, pas hetimeve brenda rrjetit të mafias së ndërtimit në Vlorë. Arben Jorgaqi humbi punën si pasojë e hetimeve.

Nën titullin “Viktimë e korrupsionit” gazeta gjermane “tageszeitung” i kushton vëmendje të martën (29.08) problemeve me të cilat përballen prokurorët shqiptarë, kur hetojnë rrjetet e rrezikshme. Arben Jorgaqi është një prokuror nga Vlora, i cili ka hetuar në rrjetet e mafias së ndërtimit. Ai humbi edhe vendin e punës dhe tani ka frikë për jetën.

“taz” e përshkruan prokurorin nga fundi i të 30-ve si një tip modern, i interesuar për artin, që në vështrim të parë nuk duket sikur përshtatet me profesionin e tij. “Por ai është prokuror që e merr seriozisht profesionin dhe luftën e propaganduar nga qeveria kundër korrupsionit….Arben Jorgaqi ka imazhin e një prokurori të pakorruptuar…por në majin e këtij viti erdhi kthesa. Jorgaqi u pushua nga puna. Me sa duket ai i ishte afruar shumë disa njerëzve të fuqishëm.”

Në vazhdim “tageszeitung” nënvizon, se prokurori shqiptar ia doli, madje edhe si hetues në fshehtësi të zbulojë, se kriminelët e veshur me petkun honorifik të biznesmenit kishin manipuluar dosje dhe përkatësinë e truallit, në luftën për të siguruar copat më të majme të bregdetit shqiptar.

“Prokuroria megjithatë mblodhi prova dhe bëri goditjen e parë. Në maj të këtij viti ai kërkoi arrestimin e disa personave të rrjetit në fjalë. Por për habinë e tij policia nuk reagoi. Në vend të kësaj ajo mori një qortim. Më vonë ai u zhvendos në Përmet.”

Gazeta gjermane raporton mbi përplasjen e prokurorit shqiptar, Arben Jorgaqi me prokurorinë e Vlorës. Lufta me autoritetet përfundoi me “lirimin” e tij nga detyra dhe më vonë me heqjen e mandatit. “As protestat në Tiranë nuk sollën gjë…. prokurori i padëshiruar u largua para reformës në drejtësi nga detyra.”

300.000 euro kompensim

Por historia e Arben Jorgaqit nuk përfundon me kaq. Ai ka marrë kërcënime pas refuzimit të 300.000 eurove si “kompensim”. “Arbeni u fsheh në Tiranë dhe ndërron rregullisht vendbanimin. Ai ka frikë për jetën…shpresa e vetme është që Gjykata e Apelit në Tiranë të vendosë në favor të tij. Por për shkak të lidhjeve të politikanëve të nivelit të lartë me rrjetin e mafias së ndërtimit, ai është skeptik.”

Vuçiç – “Willy Brandt serb”?

Sërish debati në Serbi për Kosovën tërheq vëmendjen e mediave gjermane. Gazeta “Süddeutsche Zeitung” nën titullin “Prerje e nyjes” (28.08) shkruan se Vuçiçi, dikur i preferuari i nacionalistëve, habit me propozimin e tij për të pranuar humbjen e Kosovës. Debati i kërkuar nga presidenti po zhvillohet me zjarr në Serbi, megjithëse nuk vihet re ndonjë drejtim i qartë i tij.

“Krahas disa teorive të konspiracionit, Vuçiç duhet të dëgjojë akuzat për tradhti nga nacionalistët si edhe nga kisha ortodokse serbe…forcat liberale e shohin këtë tentativë si retorikë boshe.”

Vuçiç i ngritur lart madje edhe si “Willy Brandt serb”, megjithëse nuk tha konkretisht, se si duhet të duket zgjidhja, ia lë të tjerëve propozimet konkrete, shkruan gazeta gjermane. Ministri i Jashtëm serb, Daçiç propozoi jo më vonë se gushti ndarjen e Kosovës. Por Süddeutsche Zeitung kujton se propozimi jo i ri i Daçiç “bie ndesh plotësisht me vizionin e bashkësisë ndërkombëtare që ka si parim mosndryshimin e kufijve në Ballkan, që pas përfundimit të luftës në rajon. Një ndarje e Kosovës do të zgjonte orekse të tjera. Për Serbinë, kjo mund të ishte paraloja për të kërkuar më pas bashkimin e serbëve boshnjakë dhe shpërbërjen e Bosnje-Hercegovinës. Përveç kësaj, kjo mund të rriste ambiciet e shqiptarëve me pasoja deri në Maqedoni, ku një e treta e popullsisë janë shqiptarë etikë.”

“Të ndaluar në kufirin serb”

Po gazeta gjermane “Süddeutsche Zeitung” në numrin e së hënës (28.08) i kushton vëmendje zhvillimeve në Ballkan. Nën titullin “Të ndaluar në kufirin serb” ajo vëren se shoferi i makinës transportit të parave, i kërkuar nga policia e Mynihut është arritur të ndalet në kufirin serbo-hungarez. “Serbi 26 -vjeçar që ishte larguar nga Serbia, akuzohet për vjedhjen e më shumë se 1 milionë eurove nga makina e transportit- të cilën ai e uzurpoi pas largimit të dy kolegëve nga makina”. Punonjësi i firmës të sigurisë, Prosegur, sipas të dhënave të policisë ishte përpjekur të kalonte kufirin me këmbë në Bacsalmas, por u ndal nga autoritetet hungareze.”

la/Sdd,taz,dw

Shqipëria

Tiranë, analistët: Rritja ekonomike nuk po shndërrohet në mirëqenie

Komento

bujkStudiues të njohur të ekonomisë shqiptare pohojnë se ajo ka nevojë për ndryshime strukturore, në mënyrë që të shmanget cilësia e dobët e rritjes ekonomike, e cila nuk përkthehet në fitime të drejtpërdrejta për qytetarët.

Madje sipas tyre, në mënyrë paradoksale, ekonomia rritet në letër, ndërsa të ardhurat e qytetarëve kanë rënë, si për punëtorët aktivë ashtu edhe për gjithë shtresat dhe moshat e tjera.

“Qysh nga goditja e krizës së madhe 2009-2010, ekonomia shqiptare vazhdon të ketë një rritje të dobët, anemike, një rritje që nuk prodhon punësim, pra, një rritje që nuk krijon baza dhe premisa për të modernizuar ekonominë e vendit, për të krijuar punësim cilësor, për të rritur të ardhurat e qytetarëve etj. Ajo që kemi parë gjatë viteve të fundit, edhe si konfirmohet nga shumë studime e raporte të Bankës së Shqipërisë dhe institucioneve të tjera, është që niveli real i të ardhurave të qytetarëve jo vetëm që nuk është përmirësuar, por në fakt, në shumë këndvështrime, janë pakësuar apo kanë rënë” – tha dr.Selami Xhepa, studiues i ekonomisë.

Edhe për profesorin Adrian Civici, drejtues i UET, shndërrimi i rritjes ekonomike në mirëqenie për popullatën është një sfidë e vërtetë për Shqipërinë, ndaj duhen hequr pengesat që devijojnë kthimin e fitimeve vjetore në më shumë punësim, konsum edhe zhvillim.

“Edhe në rastet kur kemi patur rritje ekonomike 5, 6 apo 7 për qind, që është mirë për një vend si Shqipëria, shndërrimi i saj apo përkthimi i saj në mirëqenie për një masë të madhe të popullsisë apo shtresa të ndryshme të saj, ka patur shumë dobësi dhe shumë shproporcione. Pra, sfida është: nga një anë strukturimi i ekonomisë për një rritje të lartë dhe cilësore, që është e domosdoshme për t’u theksuar, dhe nga ana tjetër përpunimi i gjithë mekanizmave që e shndërrojnë rritjen ekonomike në mirëqenie, që duhet të jetë edhe qëllimi kryesor i vet rritjes ekonomike, për të mos ngelur thjesht në statistika si përqindje” – thotë zoti Civici.

Cilësia e dobët e rritjes ekonomike, sipas profesor Selami Xhepa, lidhet me strukturën e veçantë të ekonomisë shqiptare, e cila dikton edhe strukturën e punësimit. Bujqësia sjell të ardhura modeste në ekonominë kombëtare, shërbimet po ashtu, ndërsa në prodhimet fason shfrytëzohet krahu i lirë i punës dhe pagat nuk janë aspak dinjitoze. Këto janë 3 shtyllat e strukturës ekonomike të Shqipërisë, të cilat nuk sjellin një rritje ekonomike cilësore e të qëndrueshme,

“Kjo strukturë ekonomike mbizotëron gati 60-70 për qind të ekonomisë. Pjesa tjetër është sektori i shërbimeve, i cili edhe ai është i një niveli shumë të ulët. Si rrjedhojë, produktiviteti i fuqisë punëtore vazhdon të jetë shumë problematik. Vetë kjo strukturë e ekonomisë ka diktuar një lloj punësimi jocilësor, që nuk garanton të ardhura të mjaftueshme për të bërë një jetë dinjitoze për familjet shqiptare” – thotë zoti Xhepa.

Ndërsa studiuesi Adrian Civici thotë se vendi ka nevojë për një rritje ekonomike gjithëpërfshirëse; pra që sa më shumë aktorë ekonomikë dhe në një shtrirje gjeografike sa më të gjerë të japin ndihmesë në rritjen ekonomike kombëtare.

Por Shqipëria ka një problem serioz struktural, sipas tij, sepse pjesën më të madhe të rritjes ekonomike e sjellin një numër shumë i vogël aktorësh ekonomikë, dhe pjesa tjetër kërkohen të mbulojnë nevojat me rishpërndarje të të ardhurave fiskale.

“Rreth 80-90 për qind e rritjes ekonomike vjen nga një numër 10-15 për qind e aktorëve ekonomikë, e për pasojë edhe frytet e kësaj rritje ekonomike u shkojnë kësaj kategorie të vogël të këtyre aktorëve ekonomikë e financiarë, që e krijuan. Pjesa tjetër, duke qenë pak e angazhuar dhe pak kontribuese në rritjen ekonomike, edhe përfitimet që ka nga rritja ekonomike janë po aq të pakta. Këta të fundit i kërkojnë qeverisë si zgjidhje rishpërndarjen fiskale, pra, gumbullimin e më shumë të ardhurave nga sistemi fiskal dhe pastaj politika fiskale dhe rishpërndarëse për t’i shkuar kësaj shtrese, e për të krijuar një barazi ekonomike më të pranueshme, se sa ky diferencim i madh që ne kemi sot” – thotë zoti Civici.

Sipas vëzhguesve të ekonomisë shqiptare, financat publike janë nën kontroll, treguesit makro-ekonomikë janë të qëndrueshëm, plani i të ardhurave u realizua sipas parashikimeve dhe nuk ka ndodhur ndonjë shformim i investimeve publike.

Megjithatë, ndryshe nga ekonomia në letra, në ekonominë reale ende deklarohen 40-45 për qind e banorëve në varfëri relative, një shifër kjo alarmante, sipas tyre, ndërsa kapitalet janë përqëndruar në 10-15 për qind të territorit Shkodër – Tiranë – Vlorë, ndërsa afro gjysma e popullsisë vazhdon të mbijetojë në bujqësi me vetëpunësim dhe pa asnjë mbështetje në zonat rurale të vendit. (voa)

Bota

Astronautja amerikane Peggy Whitson përgatitet të kthehet në Tokë

Komento

AstronautjaAstronautja me përvojë, Peggy Whitson, po përgatitet për të lënë “banesën” ku ka jetuar për afro një vit. Deri sa të kthehet në tokë, astronautja do të ketë shënuar një total prej 665 ditësh në hapësirë. Pas disa muajsh konsumi të ushqimeve të konservuara në Stacionin Ndërkombëtar të Hapësirës, ajo mezi po pret të hajë një picë sapo të kthehet në Tokë.

Peggy Whitson ishte astronaute veteran që para se të nisej drejt hapësirës, nga stacioni i lëshimit në Baikonur të Kazakistanit nëntorin e vitit 2016 me kolegun e Agjencisë Evropiane të Hapësirës, Thomas Pesquet dhe kozmonautin rus Oleg Novitsky.

“Po shpresoja që “Soyuz” të ishte më e madhe, por duket njëlloj si herën e fundit”, ishte shprehur ajo para nisjes.

Kjo është hera e tretë që ajo shijon pamjet mahnitëse nga Stacioni Ndërkombëtar i Hapësirës. Në prill të këtij vitit, Whitson shënoi rekord për kohën më të gjatë të shpenzuar në hapësirë nga një astronaut i agjencisë NASA.

Në vitin 2008, ajo u bë gruaja e parë që komandonte stacionin hapësinor dhe në vitin 2017, ajo u bë gruaja e parë që e komandonte atë për së dyti. Ajo po ashtu ka shënuar rekord për ecjet më të shumta në hapësirë nga një grua.

Duke folur me telefon nga Stacioni Ndërkombëtar i Hapësirës me agjencinë e lajmeve Associated Press, Whitson thotë se e dashuron punën e saj.

“Më pëlqen të punoj këtu lart. Është një prej punëve më të lumtura që kam patur ndonjëherë. E gjithë puna që bëjmë në tokë është fantastike, por të jesh këtu lart dhe të jesh individi përgjegjës për mbajtjen gjallë të stacionit, edhe nëse kjo do të ishte thjeshtë pastrimi i filtrave, mua më sjell shumë kënaqësi.”

Whitson e filloi karrierën në NASA në vitet 80-të, kur anijet e hapësirës përdoreshin për transportimin e astronautëve. Ajo thotë se çdo ditë po bëhen zbulime të reja, dhe po thyhen rekorde.

“Çdo ditë është e rëndësishme për ne në bordin e stacionit. Është mbajtja gjallë e stacionit edhe për një ditë. Kemi vendosur një rekord të ri personal për stacionin në orbitë dhe prani të përheshme njerëzore, për më shumë se 17 vjet. Menondoj se është e mahnitëshme. Çdo ditë mësojmë diçka të re. Gjejmë se diçka funksionon ndryshe nga ç’prisnim.”

Në qershor të 2017 misioni i zonjës Whitson në bordin e stacionit u shty me tre muaj, ndërsa tani thotë se e ka marrë malli për ushqime si pica.

“Ka ndryshime me jetën në Tokë. Ushqimet tona përbëhen nga shumë artikuj hidratues, pra ushqime të cilave u kemi shtuar ujë. Kemi karkaleca dhe tërshërë. Ushqimet që janë disi normale janë rracionet që përdor ushtria…disa pako që i ngoh në furrë. Nuk janë shumë të mira por mësohesh. Ka kohë që dua të ha një picë.”

Me 24 prill 2017, presidenti amerikan Donald Trump e telefonoi astronauten për ta përgëzuar atë për vënien e rekordit për kohën e kaluar në hapësirë.

“Sot, komandantja Whitson, keni thyer rekordin për qëndrimin kohor më të gjatë në hapësirë nga një astronaut amerikan – 534 ditë dhe në vazhdim. Është një rekord i pabesueshëm dhe në emër të kombit tonë dhe sinqerisht në emër të botës Unë do të doja t’ju përgëzoja.”

Veterania 57 vjeçare thotë se hapësira është shumë e rëndësishme për agjencinë NASA dhe për botën. Deri sa të kthehet në tokë në shtator, ajo do të ketë qendruar 665 ditë në orbitë me mbi tre fluturime. Rekordi botëror 879 ditë mbahet mbahet nga rusi Gennady Padlka. Astronautja amerikane pritet të kthehet në Tokë me 2 shtator sipas kohës amerikane ose me 3 shtator sipas kalendarit në Kazakistan. (voa)

Maqedonia

“Der Spiegel”: Në Ballkan Putini dhe Erdogani janë më të dashur sesa Merkel dhe BE

Komento

erdogan-Në Ballkanin perëndimor ka rivalitete mes Rusisë, Kinës dhe SHBA. Humbësi më i madh është Bashkimi Europian: në fakt ata janë investuesit më të mëdhej në rajon, megjithatë ka pësuar rënie besueshmëria dhe magjia e saj, shkruan fillimisht magazina më e madhe e Europës “Der Spiegel”.

Artikulli fillon me ministrin e jashtëm austriak Sebastian Kurz, që në fakt nuk është avokat i afrimit të shpejtë të vendeve të Ballkanit perëndimor në BE, por kërkon të mos zbeh shpresën e gjashtë vendeve për integrim. “Në rast të kundërt ky vakum do shfrytëzohet nga vende si Rusia, Kina, Turqia ose Arabia Saudite, ku dy të fundit mund të rrisin radikalizmin islam.” Paradoksi qëndron se BE është investitori kryesor i rajonit politikisht, diplomatikisht dhe financiarisht; megjithatë rajoni ka humbur besueshmërinë dhe magjinë te insitucionet europiane. Për të dëshmuar këtë, artikulli jep disa fakte.

Zv.sekretari i jashtëm amerikan Hoyt Brian Yee arriti të zgjidh krizën politike në Shqipëri dhe Maqedoni brenda disa ditësh, pas një përpjekje të dështuar disamujore nga kolegët e tij europianë.

Për Kinën krahas Rumanisë, Bullgarisë dhe Greqisë pikë me vlerë është edhe rajoni i Ballkanit perëndimor, veçanërisht Serbia. Kina do investojë 3 miliardë dollarë një linjë moderne hekurudhore mes Beogradit dhe Budapeshtit.

Rusia më së tepërmi shfrytëzon lidhjet tradicionale me Serbinë, duke i shitur aeroplanë luftarakë, tanke dhe sisteme tjera ushtarake. Rusia dhe Serbia kryejnë shpesh edhe manovra ushtarake të përbashkëta; ndërsa pavarësisht anëtarësimit të Malit të Zi në NATO, Podgorica dhe Moskva mbesin ndër patnerët më të rëndësishëm ekonomik.

Pas një pushimi, presidenti turk Rexhep Taip Erdogan, kërkon të fuqizojë rolin e Turqisë në Ballkanin perëndimor. Në shtator ai do udhëtojë drejt Serbisë sëbashku me 150 përfaqësues ekonomik. Hierarkia politike nga Bosnja, Shqipëria dhe Kosova, zyrtarisht janë prej kohësh mysafirë të rregullt tek ai. Tradicionalisht, Turqia dhe Arabia Saudite financojnë kryesisht në rrafshin religjioz të programeve arsimore; mbi të gjitha në Bosnjë dhe Kosovë.

“BE nuk liferon asgjë gjeo-ekonomikisht, çfarë Ballkani perëndimor ka nevojë. Për atë rajoni është vetëm një bankë e zgjatur,” thotë politologu Dusan Reljic nga “Berliner Stiftung ëissenschaft und Politik”. Për këtë rajoni gjithmonë regjistron zbehje për anëtarësim në BE.

“Erdogan vlen si burrë i fortë”

Politologu tjetër Vedran Dzihic nga Universiteti i Vjenës thekson se nuk duhet të mbivlerësohet ndikimi i shteteve si Rusia dhe Turqia në rajon, “por sa më larg shkon integrimi i premtuar drejt BE, aq më e pabesueshme bëhet BE dhe aq më tepër zgjerohen fuqitë si Rusia dhe Turqia.

Për këtë gjithmonë e më tepër ka tendenca autoritare në qeveritë e Ballkanit perëndimor. “Putin dhe Erdogan janë më popullorë se Angela Merkel ose BE,” vijon Dzihic. “Mbi të gjitha Erdogan vlen si burrë i fortë, i cili sfidon edhe të fortët e botës. Ky është materiali që impresionon shumë në Ballkan dhe shërbehet nga elitat politike.”/Bota sot

Shqipëria

Në Shqipëri prezantohet kabineti qeveritar “Rama 2″

Komento

RamaNjë ditë pasi zyrtarizoi emrat e kandidatëve për ministra, kryeministri Edi Rama do të zhvillojë sot takimin e parë me kabinetin e tij të ri. Mbledhja do të mbahet në Vlorë.

Kabineti i ri qeveritar i kryeministrit Edi Rama zhvillon sot pasdite në Vlorë takimin e parë, ku do të bisedohet për vizionin e qeverisë “Rama 2″, në katërvjeçarin e ardhshëm. Qeveria e ardhshme do të ketë rreth 25 % më pak ministri, krahasuar me mandatin e kaluar.

Kryeminsitri Edi Rama e ka paraqitur dje ( 27.08.2017), në mbledhjen e Asamblesë së Përgjithshme të Partisë Socialiste, përbërjen e qeverisë së re –  Rama 2. Kjo përbërje duhet të miratohet në Parlament, në shtator.

Qeveria do të ketë 11 poste ministrore, nga 20 sa kishte në mandatin e parë. Kryeministri Rama tha se qeveria e re do të jetë “më e vogël, por më bashkëpunuese”. Me këtë qeveri Rama synon të ngrejë rritjen ekonomike nga 3.8 % në 5%  brenda katër viteve të mandatit të dytë.

Bashkimi i ministrive

Në qeverinë e re është bashkuar në një Ministria e Financeve me atë të Ekonomisë si dhe Ministria e Energjitikë dhe ajo e e Transportit dhe Infrastrukturës. Por është vendosur që të krijohet një ministri e re – ajo e Diasporë, që ka për qëllim forcimin e bashkëpunimit dhe shtimin e investimeve të diaspores ne Shqipëri. Kryeministri Rama ka vendosur që në kabinet të mbajë 7 ministra të deritanishëm, por në pozicione të reja. Kurse katër ministra janë emërime të reja. Kryeministri Rama ka bërë përpjekje që të ruajë edhe barazinë gjinore, duke emëruar numër të barabartë ministrash burra dhe gra.
Bushati mbetet ministër i Jashtëm

Kabineti i ri qeveritar do të kryesohet nga Edi Rama, ndërsa zv/kryeministre e tij do të jetë Senida Mesi. Një ndër postet e debatuara ka qenë edhe ai i ministrit të Jashtëm, ku janë përfolur si kandidatë madje edhe persona nga Kosova. Por Rama vendosi që këtë post t’ia besojë sërish Ditmir Bushatit. Minsitritë e tjera do t’i  udhëheqin:

Ministër për Diasporën, Pandeli Majko

Ministrja e Shtetit për mbrojtjen e sipërmarrjes Sonila Qato

Ministër i Brendshëm, Fatmir Xhafaj

Ministre e Mbrojtjes, Olta Xhaçka

Ministre e Drejtësisë, Etilda Gjoni

Ministre e Kulturës, Mirela Kumbaro

Ministër i Financave, Ekonomisë dhe Punës Arben Ahmetaj

Ministre e Arsimit, Sporteve dhe Rinisë, Lindita Nikolla

Ministre e Shëndetësisë, Ogerta Manastirliu

Ministër i Energjisë dhe Infrastrukturës, Damian Gjiknuri

Ministri i Bujqësisë dhe Zhvillimit Rural Niko Peleshi

Ministria e  Turizmit dhe Mjedisit Blendi Klosi.

PS fituese e zgjedhjeve

PS e ka fituar mandatin e dytë të qeverisjes pas fitores së thellë në zgjedhjet parlamentare të mbajtur në qershor. Ajo ka fituar 74 mandate, në një parlament prej 140 deputetësh. Vendin e dytë zuri Partia Demokratike me 43 deputetë, ndërsa Lëvizja Scialiste për Integrim, që ishte në koalicion me PS në mandatin 2013-2017, ka fituar 19 deputetë.

Prioritet kryesore të qeverisë së re të kryeministrit Edi Rama, siç tha ai, do të jenë çrrënjosja e korrupsionit, lufta kundër drogës, hapja e vendeve të reja të punës dhe ulja e papunësisë. Ndërsa PD kumtoi se në qeverinë e re është “kthyer në pushtet ish-elita komuniste”. Kabineti i ri qeveritar duhet të votohet në Parlament në fillim të shtatorit. (dw)

 

Sport

Majlinda Kelmendi fitoi “Everestin”

Komento

MajlindaMajlinda Kelmendi ka fituar çmimin “Xhudistja më e mirë e sotme” (Best Female Judoka Today) nga Federata Ndërkombëtare e Xhudos. Çmimi është si “topi i artë” në futboll!

Majlinda Kelemdi (kampione olimpike nga Kosova) është nderuar në Budapest të Hungarisë me çmimin më të madh në karrierën e saj – një natë para fillimit të Kampionatit Botëror në xhudo, i cili zhvillohet nga sot 28 gusht deri më 3 shtator. Edhe në këtë kampionat Majlinda Kelmendi konsiderohet si kandidatja kryesore për titullin e më të mirës.  Ajo theksoi se çmimi Best Female Judoka Today është më i madhi në karrierën e saj.

Majlinda Kelmendi falënderoi të gjithë ata që e kanë mbështetur në rrugën e saj shumë të vështirë deri tek sukseset më të mëdha për shtetin e ri – Kosovën. Ajo falënderoi edhe kryetarin e Federatës Ndërkombëtare të Xhudos, Marius Vizer, për të cilin tha se mbështetja e tij që i ka mundësuar suksese xhudos kosovare.

“Është një nder i madh të jem këtu, ndaj dua të them disa fjalë. Fillimisht dua të uroj presidentin për mandatin e ri. Faleminderit që e keni mbështetur Kosovën. Ju jeni arsyeja që Kosova është pranuar në Komitetin Olimpik. Falë jush më është mundësuar të përfaqësoj Kosovën në Rio (në Lojërat Olimpike Verore). Falë jush Kosova e ka fituar edhe medaljen olimpike. Faleminderit nga zemra”, theksoi Majlinda, duke falënderuar Marius Vizer.

Por Majlinda falënderoi në mënyrë të veçantë edhe trajnerin Driton Kuka dhe familjen e saj. “Të gjithë e njihni storien time. E kam nisur karrierën në Kosovë dhe kam fituar gjithçka. Por ky çmim sot është ‘Everesti’ i të gjitha fitoreve”, theksoi Majlinda Kelmendi.

Ndërsa trajneri i Kosovës në xhudo, Driton Kuka tha se çmimi që mori Majlinda Kelmendi është i rëndësishëm sikurse “Topi i Artë” në futboll. (dw)

Bota

Hjustoni i përmbytur përgatitet për shira të tjera

Komento

HjustonZona rreth Hjustonit në Teksas, vazhdon të goditet nga shira rekord të një stuhie tropikale që pritet të vazhdojnë edhe për disa ditë, ndërsa ekipet e shpëtimit punojnë për të arritur tek njerëzit e bllokuar nga përmbytjet masive.

Parashikuesit e motit thonë se stuhia e cila të premten goditi bregdetin e Teksasit në formën e Uraganit Harvey do të sjellë reshje të tjera, duke shkaktuar përmbytje të reja në qytetin e katërt më të madh të Shteteve të Bashkuara.

Rajoni ka përjetuar tashmë më shumë se 60 centimetra shi në disa vende.

Meteorologu Patrick Burke i tha Zërit të Amerikës se të paktën deri të mërkurën priten 40-60 centimetra reshje.

“Mesazhi që po përcjellim sot është se kurrë nuk kemi parë një stuhi të tillë. Nuk kemi parë kurrë sasi të tilla reshjesh në një zonë kaq të madhe, pra dëmi është tashmë katastrofik dhe për fat të keq do të vazhdojë të jetë katastrofik në ditët që vijnë”, tha zoti Burke.

Stuhia po largohet, por mund të forcohet përsëri

Shërbimi Kombëtar i Motit tha se qendra e stuhisë po lëvizte sot ngadalë për në juglindje në një drejtim që do ta kthente atë përsëri në Gjirin e Meksikës dhe kjo mund ta forconte për të goditur përsëri tokën të martën.

Korpusi i Inxhinierëve të Ushtrisë njoftoi të hënën herët se po fillonte shkarkimin e kontrolluar të dy rezervuarëve, për të parandaluar përmbytjet e mëtejshme. Shkarkimi i ujit do të vazhdojë për disa javë.

Qindra operacione shpëtimi janë ndërmarrë në të gjithë zonën me ekipe të pajisur me helikopterë, anije dhe kuaj nëpër ujërat e përmbytjeve. Vullnetarët u janë bashkuar policisë, si dhe ekipeve të zjarrfikësve dhe atyre mjeksore. Po ndihmojnë gjithashtu 3 mijë anëtarë të Gardës Kombëtare.

Guvernatori i Teksasit, Greg Abbott tha se do të urdhëronte edhe 1 mijë trupa të tjera të Gardës Kombëtare në Hjuston të hënën. Ai ka deklaruar gjendjen e katastrofës në rreth një të katërtën e qarqeve të shtetit, duke lejuar qeverinë të shpejtojë ndihmën në ato zona.

Çdo autostradë e madhe brenda dhe jashtë Hjustonit është kthyer në një lumë dhe dy aeroportet e qytetit janë mbyllur.

Zyrtarët e emergjencave këshillojnë banorët

Zyrtarët e emergjencave i kanë këshilluar banorët të mos qëndrojnë brenda shtëpive, qoftë edhe në papafingo, por të hipin mbi çati dhe të përpiqen të tërheqin vemendjen e ekipeve të shpëtimit duke tundur një shami të bardhë.

Të dielën, në qiellin e Hjustonit dhe në zonat përreth u përdorën 22 mjete fluturimi për t’ju përgjigjur thirrjeve për ndihmë të banorëve. Shpëtimet me helikopter u kthyen në diçka të zakonshme ndërkohë që barka dhe gomone të shumta ishin në kërkim të viktimave.

Presidenti Trump ka në plan ta vizitojë rajonin të martën

Presidenti Donald Trump do ta vizitojë zonën e prekur të martën por vetëm nëse bëhet e qartë se udhëtimi i tij nuk do të pengojë përpjekjet e ndihmave, thanë zyrtarët e Shtëpisë së Bardhë. (voa)

 

Kosova

Takimi i radhës Kosovë – Serbi, më 31 gusht

Komento

hashim vucicShefja e politikës së jashtme të Bashkimit Evropian, Federica Mogherini, do të ndërmjetësojë të enjten më 31 gusht, takimin e radhës ndërmjet presidentit të Kosovës, Hashim Thaçi dhe presidentit të Serbisë, Aleksandër Vuçiç.

Ajo tha të hënën se të dy presidentët do të “shkëmbejnë pikëpamjet mbi vazhdimin e bisedimeve për normalizimin e marrëdhënieve ndërmjet Kosovës dhe Serbisë, pas pajtimit të tyre në muajin korrik që të fillojnë përgatitjet për një fazë të re të bisedimeve”. Në takim pritet të diskutohet edhe çështja e zbatimit të marrëveshjeve të arritura në bisedime.

Presidenti i Kosovës, Hashim Thaçi dhe ai i Serbisë, Aleksandër Vuçiç, qenë takuar më 3 korrik dhe pas atij takimi thanë se janë pajtuar që bisedimet për normalizimin e marrëdhënieve ndërmjet të dyja palëve të hyjnë në një periudhë të re ku do të diskutohen çështje më me peshë sesa aspektet teknike.

Presidenti i Kosovës, Hashim Thaçi, tha atëherë se periudha e re e bisedimeve do të qonte drejt një normalizimi dhe pajtimi mes të dyja vendeve dhe të dy popujve. Ajo periudhë do të mbyllë kapitullin e errët të së kaluarës dhe do të hapë një perspektivë të sigurt për të ardhmen evropiane, tha ai duke shfaqur besimin se “normalizimi dhe pajtimi në mes të shqiptarëve dhe serbëve është i mundur dhe do të arrihet”.

Presidenti i Serbisë, Alesksandër Vuçiç, tha se aty ishte shtruar thelbi i përmbajtjes së bisedimeve në të ardhmen ku do të bisedohet për çështje thelbësore se si i shohin palët marrëdhëniet ndërmjet tyre për një, dy apo pesë vjet. Kjo do të thotë, sipas tij se duhen biseda me serioze dhe më të guximshme brenda opinionit serb dhe atij shqiptarë duke vënë theksin tek fakti se siç tha, “po bëhen përpjekje për të çuar përpara çështje më të rëndësishme sesa çështjet teknike”.

Presidenti serb, Aleksandër Vuçiç, në fund të korrikut paralajmëroi hapjen e një dialogu të brendshëm në Serbi për, siç tha, zgjidhje të qëndrueshme e afatgjatë të çështjes së Kosovës.

Aleksandër Vuçiç, një ish ultra nacionalist që pohon të jetë shndërruar në një reformator pro evropian, ishte pjesë e Partisë Radikale Serbe të drejtuar nga ultra nacionalisti Vojislav Sheshel deri në vitin 2008. Gjatë luftës në Kosovë, ai kishte shërbyer si ministër për informim në qeverinë e ish presidentit serb, Sllobodan Millosheviç, i cili vdiq në vitin 2006 derisa po gjykohej për krime lufte dhe gjenocid në hapësirat e ish Jugosllavisë. Në qershor të këtij vitit ai mori postin e presidentit të Serbisë.

Serbia e mbështetur nga Rusia kundërshton, pavarësinë e Kosovës të shpallur më vitin 2008, por është përfshirë në një proces bisedimesh në shkëmbim të afrimit më strukturat evropiane.

Presidenti serb është zotuar të vazhdojë rrugën evropiane por edhe të ruaj lidhjet me aleatin e saj Rusinë, një dëshirë e nacionalistëve serb që nuk pajtohen me pavarësinë e Kosovës.

Më shumë se dy vjet më parë, në maj të vitit 2015, presidenti serb, atëbotë kryeministër i Serbisë, kishte paralajmëruar një ndryshim të mundshëm të qasjes ndaj Kosovës, që është kushti themelor në përpjekjet e Beogradit për integrimin në Bashkimin Evropian.

Ai kishte thënë atëbotë të përditshmes “The Wall Street Journal”, se është “duke shqyrtuar mundësinë e ndryshimeve kushtetuese deri në fund të vitit 2017, ku do të mund të përfshihej heqja e përkufizimit të Kosovës si pjesë e Serbisë”. Aktualisht Kosova zë vend në preambulën e kushtetutës serbe.

Nisma e tij nxiti shumë reagime në Serbi ku janë hedhur edhe ide për ndarjen e Kosovës, ide këto që janë hedhur poshtë nga Prishtina.

Të ndërmjetësuara nga Bashkimi Evropian, bisedimet e deritashme i siguruan Kosovës, Marrëveshjen e Stabilizim Asocimit, ndërsa Serbisë hapjen e negociatave për anëtarësim në Bashkim Evropian. (voa)

Bota

Lulekërma çel në kopshtin botanik në Uashington

Komento

lulekermaLulja me aromën më të fortë në botë ka çelur në Kopshtin Botanik të Uashingtonit. Por era e kutërbimit të saj është tejet e rëndë, ajo krahasohet erën e plehrave dhe vetë lulja madje quhet “lulekërma”. Bima me përmasa të mëdha lëshon një lule gjigande, e cila jetojnë vetëm pak ditë.

Vështirë ta besosh se një lule kaq e bukur, bie erë kaq të keqe.

Lulja e lëshon kutërbimin me intervale. Temperatura e brendshme e saj arrin 46 gradë celsius dhe nxehtësia ndihmon që aroma të shpërhapet më me shpejtësi.

“Në këtë moment lulja po lëshon një aromë të fortë, që po mbush ajrin. Nëse ngjitesh në katin sipër, të duhet një maskë”, – thotë një vizitore.

Po përse kjo lule kutërbon?

“Fajin e kanë insektet që bëjnë polenizimin e lulekërmës, brumbujt e kërmave dhe mizat, që si burim kryesor ushqimi kanë mishin e kalbur”, – thotë punonjësja e Kopërshtit Botanik

Bima e rrallë me origjinë nga pyjet tropikale të Sumatrës në Indonezi, rriten deri në tre metra e gjysmë dhe jetojnë dyzet vjet. Lulekërma nuk lulëzon shpesh; në fakt, kjo bimë pesë vjeçare po çel për herë të parë; një 8 vjeçar është kaq i mrekulluar nga bima, saqë ka bërë edhe kërkime paraprake.

“E prisja të kutërbonte, por jo kaq shumë”,- thotë ai.

Në Kopshtin Botanik të Shteteve të Bashkuara ka mbi dymbëdhjetë lulekërme. Së shpejti, dy të tjera do të lulëzojnë dhe do jetë hera e parë që në Amerikë çelin tre lulekërme njëkohësisht. Rrallë ndodh që lulet të çelin njëkohësisht, pasi lulëzimi ndodh vetëm kur bima ka grumbulluar energjinë e mjaftueshme në organe e saj nën tokë.

Për të mundësuar rritjen e lulekërmës larg habitatit natyral, në trupin e saj hapen disa vrima për të vjel polenin mashkullor e femëror:

“Lulekërmat bëjnë pjesë në listën e specieve të rrezikuara dhe të dish si t’i riprodhosh në kopshtet botanike është një ndër mënyrat për ta pasur bimën edhe për shumë vite të tjera. Kjo është diçka e mirë, duke pasur parasysh edhe se habitati i tyre natyral në Sumatra është i rrezikuar”, – thotë punonjësja e Kopështit. (voa)