Autoritetet në New York thanë se të paktën tetë persona humbën jetën dhe disa të tjerë u plagosën kur një makinë u fut në një shteg të biçikletash dhe shtypi çiklistët dhe këmbësorët jo larg Qendrës përkujtimore të Qendrës Botërore të Tregtisë në Manhattan.

Më pas drejtuesi i makinës doli duke vringëlluar me sa duket një armë.

Policia në New York, tha se arrestoi shoferin pasi e qëlloi atë. Policia tha se i arrestuari është 29 vjeçar, por nuk e bëri të ditur identitetin e tij.

Guvernatori i New Yorkut Andrew Cuomo, e cilësoi sulmin si veprim të një “ujku të vetmuar”, duke theksuar se nuk ka dëshmi që ai mund të ishte pjesë e ndonjë komploti më të gjerë.

Kryetari i bashkisë së New Yorkut, Bill De Blasio, tha se tetë veta humbën jetën dhe një duzinë u plagosën në atë që ai e quajti “akt qyqar i terrorit”.

Autoritetet thanë se 6 veta humben jetën në vendin e ngjarjes, ndërsa dy të tjerë vdiqën më pas nga pasojat e plagëve. Të paktën 11 veta janë dërguar në spital me plagë të rënda.

Një numër i madh makinash të policisë janë në vendin e ngjarjes.

Departamenti i policisë së New Yorkut u bëri thirrje qytetarëve që të shmangin zonën.

Zëdhënësja e Shtëpisë së Bardhë, Sarah Huckabee Sanders, tha se presidenti, Donald Trump, është informuar për incidentin.

Presidenti Trump shkroi më pas në rrjetin social twitter se ” duket si një sulm tjetër nga një person shumë i sëmurë dhe i çrregulluar”.

Hetimi i prokurorit të posaçëm lidhur me mundësinë e bashkëpunimit mes fushatës presidenciale të vitit 2016 të Presidentit Donald Trump dhe Rusisë mori nuanca dramatike dje, me ngritjen e akuzave ndaj dy ish zyrtarëve të fushatës së zotit Trump, Paul Manafort dhe Rick Gates. Prokurori i Posaçëm Robert Mueller po ashtu bëri të ditur se ish-ndihmësi i fushatës së zotit Trump, George Papadopoulos, kishte pranuar fajësinë ndaj akuzave se e kishte gënjyer FBI-në lidhur me hetimin për çështjen e Rusisë.

Ish-menaxheri i fushatës së zotit Trump, Paul Manafort, u paraqit dje në një zyrë të FBI-së në Uashington dhe më vonë tha se ishte i pafajshëm në gjykatën federale, ashtu sikurse edhe ish-ndihmësi i tij, Rick Gates.

Të dy ata përballen me akuzat për komplot, deklarata të rreme, dhe pastrim parash lidhur me përpjekjet e tyre të lobimit në favor të Ukrainës.

Këshilltari i posaçëm Robert Mueller, po ashtu bëri të ditur se ish-ndihmësi i fushatës së zotit Trump George Papadopoulos kishte pranuar në fillim të muajit, se i kishte gënjyer agjentët e FBI-së lidhur me kontaktet me rusët, me qëllimin për të siguruar prej tyre infromacione të dëmshme për rivalen e zotit Trump, Hillary Clinton.

Zëdhënësja e Shtëpisë së Bardhë Sarah Huckabee Sanders tha se

Papadopoulos nuk ishte një person me peshë në fushatën e zotit Trump:

“Ai ishte vetëm një vullnetar i fushatës, me kontribut të kufizuar; nuk pati asnjë aktivitet në kapacitet zyrtar.”

Presidenti Trump reagoi ndaj lajmit me një tweet, ku shkruante “asnjë marrëveshje e fshehtë!”.

Më vonë, avokati i zotit Manafort, Kevin Downing, foli me gazetarët jashtë gjykatës:

“Nuk ka fakte që zoti Manafort, apo fushata e zotit Trump të ketë bashkëpunuar me qeverinë ruse”.

Manafort ishte menaxheri i fushatës së zotit Trump gjatë kuvendit republikan të vitit të kaluar:

“Ne duam që Amerika ta kuptojë kush është Donald Trump si njeri, jo vetëm si kandidat.”

…Por ai u pushua nga kjo detyrë në gusht të vitit të kaluar.

Akuzat që u bënë të njohura dje janë hapat e parë të rëndësishëm të zotit Mueller, pas emërimit të tij si prokuror i posaçëm në muajin maj, për të zhvilluar hetime ndaj akuzave për bashkëpunim mes fushatës së zotit Trump dhe Rusisë.

Pranimi i fajit nga Papadopoulos mund të jetë një pikë kthese, thotë Greta Van Susteren, eksperte ligjore dhe bashkëpunëtore e Zërit të Amerikës.
“Ky është një shteg që çon tek fushata e zotit Trump. Nuk e dimë nëse bëhet fjalë për një akt penal, apo jo. Por është hera e parë që shohim një lloj procedure zyrtare që e lidh një punonjës të fushatës presidenciale me çështjen ruse.” – tha zonja Van Susteren.

Ndërsa hetimi i zotit Mueller hyn në një fazë të re, për Shtëpinë e Bardhë dhe presidentin ky proces përbën një kokëçarje të madhe politike, thotë zonja Van Susteren.

“Patjetër, që kjo është çështje politike që nuk dimë ku do na çojë. Ndoshta pas Papadopulos nuk do të ketë ish-zyrtarë të tjerë të fushatës që pranojnë fajësinp, por mund të jetë edhe maja e ajzbergut për çështje të tjera. Këtë nuk e dimë,”- tha ajo.

Mueller u emërua prokuror special pas vendimit të Presidentit Trump për të pushuar nga puna Drejtorin e FBI-së James Comey. (voa)

Në Wittenberg u mbajt mesha qendrore për jubileun e 500-të të Reformacionit. Edhe Kancelarja Angela Merkel dhe Presidenti Steinmeier ishin ndër të ftuarit.

500 vjet pas fillimit të Reformacionit, katolikët dhe protestantët theksuan vullnetin e tyre për një afrim të gjerë me njeri-tjetrin. Në meshën qendrore festive të protestantëve gjermanë në kishën Schlosskirche në Wittenberg, Kryetari i Këshillit të Kishës Evangjeliste në Gjermani, Heinrich Bedford-Strohm dhe kryetari i Konferencës së Ipeshkvëve Gjermanë, Kardinali Reinhard Marx i dorëzuan së bashku një kryq Presidentit Federal të Gjermanisë, Frank-Walter Steinmeier. Ata e vlerësuan këtë akt si “premtim të të krishterëve” për t’u angazhuar për paqe, pajtim dhe drejtësi, tha Marx. Kisha është më e vjetër dhe më e madhe se grindja midis konfesioneve. “Ne duam të jemi fuqimisht dëshmitarë të shpresës”, tha ai.

Ftesë për Papën Françesk

Më parë, Bedford-Strohm u zgjati simbolikisht dorën katolikëve. Para syve të Presidentit të Gjermanisë, Steinmeier dhe të Kancelares gjermane, Angela Merkel ai iu drejtua në fjalën e tij drejtpërdrejt Papës Françesk: “Kurdo që të vish këtu në Wittenberg, një gjysmë mijëvjeçari pas djegies së qarkores së shkishërimit ne do të themi me gjithë zemër mirëserdhe!” Me “Krishtin duhet folur dhe pastaj të ecet me guxim përpara”.

Sipas dokumenteve, 500 vjet më parë Martin Luteri i ngjiti 95 tezat e tij në derën e Schlosskirche të Wittenbergut – prandaj dita e Reformacionit këtë herë është ditë feste pushimi në të gjithë Gjermaninë. Luteri me këtë akt protestoi kundër praktikës së atëhershme të Kishës me tregtinë e çertifikatave të ndjesave – me të cilin mund të bleje faljen e mëkateve. Shpallja e tezave konsiderohet si fillim i Reformacionit të përbotshëm dhe i ndarjes së kishës – si rezultat i lëvizjes lindi Kisha Evangjeliste.

Zhvillime pozitive

Edhe Sekretari i Përgjithshëm i Këshillit Ikumenik të Kishave (ÖRK), Olav Fykse Tveit, e cila përfaqëson rreth 500 milionë të krishterë në të gjithë botën, ishte i pranishëm në Wittenberg. Pastori norvegjez Tveit e karakterizoi Reformacionin si “qytetare të botës”. Ai u bëri thirrje kishave që të ndërmarrin hapa të tjerë në rrugën e unitetit.

Në Poloninë me traditë katolike me rastin e 500 vjetorit të Reformacionit u zhvillua gjithashtu një meshë ikumenike. Kryetari i Këshillit Papnor për nxitjen e unitetit të të krishterëve,  Kardinali Kurt Koch bëri një bilanc pozitiv të procesit ikumenik në kuadër të jubileut të 500-të të Reformacionit. Në dhjetë vitet e kaluara ka pasur zhvillime, për të cilat ai është mirënjohës, tha Koch. “Në fillim të dekadës së Luterit”, situata “dukej pak më e vështirë.” (dw)

Martin Luther paraqiti tezat e tij për reformimin e kishës katolike më 31 Tetor. Sot Gjermania feston Ditën e Reformacionit. Por a është ky vend, vendi i Reformacionit? Shumica e protestantëve nuk jetojnë në Gjermani.

Në fillim ishte fjala. Kjo fjali e famshme nga përkthimi i Biblës i Martin Luterit mund të kishte qënë motoja e jubileut të Reformacionit. Në fund të fundit, Reformacioni u shkaktua nga shpallja me fjalë të fuqishme e tezave të Martin Luterit, 500 vjet më parë.

Por punët erdhën ndryshe. Jubileu ngjalli shpresa dhe ëndrra të mëdha, sepse Martin Luteri rezultoi figurë e mrekullueshme për publicitet. Kush e di, sikur jubileu të shkaktonte këtu një reformacion të ri dhe t’u shtonte papritur besimtarët kishave?

Shpresa e madhe nxiti entuziazëm të madh. Jo vetëm për një vit, por për dhjetë vjet me radhë duhet të festohet në Gjermani përvjetori i 500-të i Reformacionit: në vitin 2007 kisha evangjelike në Gjermani shpalli një “dekadë të Luterit”.

Zhgënjim protestant

Shpresa ndërkohë ia ka lënë vendin zhgënjimit protestant. Përtëritja reformatore nuk ndodhi. Numri i të krishterëve në atdheun e Lutherit është më tej në rënie. Nderimi i thellë i Zotit nga Luteri, radikalizmi i tij dhe thirrja e tij për pendesë për gjithë jetën u duken shumë njerëzve këtu të çuditshme.

Edhe nëse në vitin 2016 për herë të parë hynë në kishën evangjelike më shumë njerëz se sa dolën prej saj: që prej ribashkimit të Gjermanisë në vitin 1990, pjesa e protestantëve në Gjermani nga 36 përqind që ishte, ka rënë në 26 përqind. Gradualisht po pranohet: edhe festimet për një ngjarje të tillë epokale si 500 vjet reformacion nuk mund t’i mbash të gjalla për një dekadë të tërë. Organizatorët, para së gjithash Kisha Evangjelike e Gjermanisë shkuan shumë larg.

Me sharmë dhe radikalitet

Po kjo nuk merr fund këtu. Ata nuk mbajtën parasysh sa duhet as një tendencë të rëndësishme të “Qytetares së botës Reformacion”, një përcaktim i qëlluar i Federatës Botërore Luteriane: sepse ripërtëritja protestante sot nuk kryhet më në Gjermani, por krejt diku tjetër. Dhe bëhet ndryshe nga ajo që mendohej.

Sipas të dhënave të “Qendrës për Studimin e Krishtërimit Global”, rreth 228 milionë prej 560 milionë të krishterëve evangjelistë jetojnë në Afrikë. Rreth 130 milionë janë në kontinentin amerikan, rreth 100 milionë në Azi dhe rreth 90 milionë në Evropë.

Në të gjithë botën, janë gjithsej 2,3 miliardë njerëz të besimit të krishterë, dy të tretat prej tyre jetojnë në Azi, në Afrikë dhe në Amerikën Latine. Shumica janë katolikë. Por në këto rajone ngrihen edhe kisha evangjeliste, të cilat fjalën e Zotit e interpretojnë në mënyrë konservatore, krejt në të kundërtën e asaj që bën protestantizmi gjerman.

Kundërreformacion në Lagos

Ky revolucion i ri konservator do të vijë edhe në Evropë. Si duhet të reagojnë kishat e këtushme për këtë zhvillim? Çfarë do të thoshte Luteri për këtë lloj reformacioni? A do ta përshëndeste interpretimin fjalë për fjalë të Biblës?

Në vend që të harxhojnë fuqitë edhe pas 500 vjetësh me kishën katolike dhe me Papën, protestantët sot duhet të vendosin veton e tyre kundër predikuesve të indulgjencës të epokës së re: deklaruesve të të ashtuquajturit evangjelizëm i mirëqënies ose i fundit të botës.

Nga pikëpamja teologjike Gjermania është e përgatitur më së miri për këtë debat, sepse në rang ndërkombëtar bën pjesë në vendet drejtuese të shkencave teologjike. Dhe ngulitja në shoqëri e protestantizmit vazhdon të formësojë edhe më tej kulturën politike në këtë vend – edhe nëse besimi te Zoti po bie. Prandaj është koha më e përshtatshme për t’u kthyer në fillesat e Luterit: “Në fillim ishte fjala”. Debati teologjik për Reformacionin e vjetër dhe të ri nuk duhet të zhvillohet në Gjermani, por në Lagos, në Seul dhe në Sao Paolo. Në njërin prej këtyre metropoleve duhet të kremtohet edhe jubileu i ardhëm i Reformacionit. (Astrid Prange De Oliveira)

Facebooku njoftoi se një hetim i brendshëm i kompanisë lidhur me përpjekjet e Rusisë për të ndikuar zgjedhjet presidenciale amerikane tregoi se “operativë të mbështetur nga Rusia” kanë publikuar rreth 80 mijë postime në rrjetin social që gjetën përhapje tek 126 milionë amerikanë gjatë një periudhe dyvjeçare.

Lajmi vjen ndërsa avokatët e Twitter-it, Facebook-ut dhe Google-it pritet të dëshmojnë sot përpara një komisioni të Senatit, nëse ka patur ndikim fushata ruse në zgjedhjet amerikane vitit 2016. Kompanitë janë nën presion për të dëshmuar përpara ligjvënësve, se po i përgjigjen ndikimit rus me masa të reja, për të siguruar që kjo nuk do të ndodhë në të ardhmen.

Avokatët do të dëshmojnë para komisionit Juridik të Senatit, një nga tre panelet e kongresit që kërkon detaje të ndërhyrjes së Rusisë në zgjedhjet amerikane, apo të bashkëpunimit të mundshëm të fshehtë të zyrtarëve të fushatës së Presidentit Donald Trump me rusët.

Dje në një postim, kompania “Google” tha se gjeti atë që e përkufizoi si “veprimtari e kufizuar” në platformat e saj nga “individë që mudn të jenë rusë”, por premtoi se do të “ndërmerrte veprime të reja për të siguruar më shumë transparencë dhe për të rritur sigurinë”. (voa)