Revista amerikane Mother Jones ka botuar një shkrim tjetër hulumtues, mbi përpjekjet për lobim të partive shqiptare në Uashington. Shkrimi hedh dyshime mbi burimin e parave të përdorura për këtë qëllim nga Lëvizja Socialiste për Integrim, LSI.

Autorë të artikullit janë Dan Friedman dhe Hannah Levintova.

Vitin e kaluar, thuhet në këtë shkrim, ish-kongresmeni republikan Howard “Buck” McKeon u kontraktua nga LSI-ja për t’i dhënë asaj akses tek administrata Trump dhe republikanët e Kongresit amerikan. Por pjesa më e madhe e punës së firmës së tij u financua nga një kompani fantazmë qipriote me emrin Dorelita. Sipas artikullit, burimi i parave që rrodhën nga Dorelita për tek firma lobuese e zotit McKeon mbetet i errët.

Artikulli i Mother Jones shtron pyetjen se kush pagoi për LSI-në, që ajo të lobonte pranë zyrtarëve amerikanë në prag të zgjedhjeve të vitit 2017 në Shqipëri.

Shkrimi e vë gishtin gjithashtu te ligjet amerikane të lobimit, që sipas autorëve, ua bëjnë të lehtë interesave të huaja të përdorin kompani fantazmë për të realizuar axhendat e tyre në Uashington pa zbuluar identitetet apo qëllimet e tyre.

Në janar 2017, shkruan Mother Jones, në prag të zgjedhjeve presidenciale dhe parlamentare të Shqipërisë, Grupi McKeon nënshkroi me LSI-në një kontratë lobimi prej 15 mijë dollarësh në muaj. Kontrata nuk u nënshkrua nga zyrtarët e LSI-së, por nga një avokat grek me emrin Iraklis Fidetzis, me të cilin kishte njohje njëri prej njerëzve të LSI-së, Vangjel Tavo.

Në shkurt 2017, Grupi McKeon njoftoi se po i jepte fund kontratës me LSI-në. Por një muaj më vonë, më 24 mars, ky grup nënshkroi një tjetër kontratë, të firmosur po nga avokati Fidetzis, kësaj here për të lobuar për kompaninë Dorelita. Sipas Mother Jones, një burim që kishte dijeni për kontratën, tha se Fidetzis kishte sugjeruar ta paguante Grupin McKeon që ky të vazhdonte lobimin për LSI-në përmes firmës Dorelita. Me kontratën e re të lobimit, që mbulonte një vit punë, shkruajnë autorët, pagesa për Grupin McKeon do të ishte 50 mijë dollarë në muaj, plus shpenzimet, pra mëse tri herë më e lartë sesa kontrata e mëparshme me LSI-në.

Sipas burimit, që autorët nuk e citojnë me emër, synimi kryesor i kontratës me firmën Dorelita ishte që kryetarit të atëhershëm të LSI-së, Ilir Meta, t’i sigurohej akses te Presidenti Trump në formën e një takimi ose fotografie me të, përpjekje që nuk u realizua.

Kontrata e 24 marsit dhe dokumentet e Grupit McKeon nuk e përmendin me emër LSI-në, shkruajnë autorët, të cilët thonë se Dorelita, si kompani fantazmë, kishte një qëllim të vetëm: të realizonte pagesat për Grupin McKeon në emër të LSI-së.

Autorët përmendin gjithashtu se në prill 2017, Grupi McKeon kontaktoi një numër republikanësh për të organizuar takime për llogari të firmës Dorelita, siç ka deklaruar vetë Grupi në dokumentet e paraqitura Departamentit të Drejtësisë. Por sipas Mother Jones, burime të shumta i kanë thënë revistës se disa nga këto takime lidhen me LSI-në.

Autorët hedhin gjithashtu dyshime se një vizitë e zotit Vangjel Tavo në Uashington në fund të prillit 2017 lidhet me takimet që Grupi McKeon po organizonte me republikanë të Kongresit për llogari të firmës Dorelita.

Autorët e shkrimit venë në dukje se ligji amerikan kërkon që firmat lobuese të deklarojnë qeveritë e huaja ose partitë politike për të cilat lobojnë, por Grupi McKeon nuk e identifikoi LSI-në apo Shqipërinë si përfitues të punës së tij për kompaninë Dorelita.

Autorët shkruajnë se nuk ka gjasa që Fidetzis ta ketë financuar vetë fushatën e shtrenjtë të lobimit të firmës Dorelita, por ka vepruar në emër të një pale tjetër. Pyetja që mbetet pa përgjigje, shkruajnë ata, është se kush e financoi lobimin e LSI-së dhe cili ishte objektivi prapa kësaj fushate ndikimi.

REAGON LSI

Lëvizja socialiste për Integrim hodhi poshtë të gjitha pretendimet e ngritura në shkrimin e revistës Mother Jones, duke e quajtur artikullin e botuar prej saj një manipulim, mashtrim, pa fakte dhe të shtrembëruar.

LSI-ja publikoi të plotë këmbimin e emaileve me gazetarët e Mother Jones, dhe përgjigjet e dhëna prej saj, ku ajo thekson në mënyrë të përsëritur se nuk ka asnjë njohje apo lidhje me shoqërinë “Dorelita Limited”, për të cilën revista ngre dyshime se është përdorur si mbulesë për lobimin në favor të LSI-së.

Zëri Amerikës u përpoq sot të kontaktonte dhe me deputetin e LSI-së Vangjel Tavo, për t’u interesuar për lidhjet e tij me avokatin grek Iraklis Fidetzis, i cili firmosi në emër të LSI-së kontratën e lobimit mes kësaj partie dhe grupit McKeon, apo dhe për faktin që sipas Revistës Mother Jones, ai dyshohet se kishte realizuar një vizitë në Uashington në muajin prill, si pjesë e lobimit përmes shoqërisë “Dorelita Limited”.

Zoti Tavo nuk ju përgjigj telefonatave dhe as mesazheve të korrespondentit tonë në Tiranë. (voa)

te vetë në Shqipëri para pak kohësh, parakushti për hapjen e negociatave, Vettingu, është plotësuar. “Shqipëria është një vend kyç për integrimin e suksesshëm të Ballkanit Perëndimor në BE dhe  momenti aktual është shumë vendimtar për të qenë i suksesshëm në të gjithë rajonin”, argumenton Sarrazin.

Reformat vazhdojnë

Si për Ramën ashtu edhe për favorizuesit e tjerë të çeljes së negociatave është e qartë se negociatat nuk do t’i japin fund reformave. Prandaj edhe ministri i shtetit Roth, përveç premtimit për angazhimin e tij të fortë për çeljen e negociatave i shprehu kryeministrit shqiptar disa shqetësime, që mund të kuptoheshin edhe si fusha në të cilën mund të fokusohej puna e qeverisë shqiptare për t’ua bërë më të lehtë të lëkundurve që të ndryshojnë mendim në favor të Shqipërisë.

Roth tha se shpreson që të hapet një proces ndaj ish-ministrit të brendshëm Saimir Tahirit, “në mënyrë që të bëhet e qartë se organet e drejtësisë janë të pavarura.”

Ai po ashtu tërhoqi vëmendjen që të mos nënvleftësohet ekonomia, në mënyrë që edhe brezi i ri të shohë një perspektivë në vendin e tij: “Gëzohemi për çdo shqiptar të ri që është i diplomuar dhe vjen në tregun e punës në Gjermani. Por ky largim i madh i trurit (brain drain) është i padrejtë për Shqipërinë”, tha politikani gjerman. Ju keni nevojë për të rinjtë, sepse pa këtë brez të ri e të kualifikuar do ta keni të vështirë ta ankoroni vendin tuaj në mes të Evropës.

Roth u ankua edhe për fenomenin e polarizimit total që sundon në sistemin politik në Shqipëri, por edhe në shumë vende të tjera të Evropës Lindore, ku rivali politik shihet si armik: “Sjellja e opozitës në parlament është e papranueshme. Nuk mund të ndërpritet thjesht puna parlamentare dhe të dalësh nga parlamenti. Duhen shfrytëzuar instrumentet demokratike”, tha ministri gjerman dhe shtoi: “Por unë pres që qeveria dhe partitë qeveritare të bëjnë gjithnjë tre hapa përpara drejt opozitës dhe të mos presin derisa të vijë opozita dhe të bëjë një hap drejt tyre.”

Një sugjerim tjetër i ministrit gjerman për kryeministrin Rama por edhe për liderë të tjerë në Ballkan, ishte përfshirja e shoqërinë civile në rrugëtimin drejt Europës. “Nëse nuk e bëjmë ne, do të hyjnë të tjerët që do ta plotësojnë këtë boshllëk”, tha ai duke pasur parasysh ndikimet nga Turqia, Rusia apo Kina. (dw)

Shqipëria do të hyjë në BE por ka jo pak probleme, shkruan “Die Welt”. Kryeministri i Shqipërisë, Edi Rama kërkon të bindë kancelaren gjermane se Shqipëria është gati për hapjen e negociatave.

Përmes artikullit “Make Albania great again”, gazeta gjermane “Die Welt”i kushton vëmendje të mërkurën vizitës së kryeministrit Rama në Berlin. Ish-basketbollisti dhe artisti në Berlin do të synojë me sharmin e tij të bëjë për vete kancelaren Merkel që të marrë mbeshtetjen për hapjen e negociatave të anëtarësimit me Shqipërinë, shkruan gazeta.

“Dhe vërtet Rama, një socialist ..ka se ç’të tregojë. Ekonomia rritet, Tirana mbushet me fasada që shkëlqejnë, një reformë në drejtësi e kërkuar nga BE ka marrë udhë…Por që ka njerëz që janë skeptikë, kur shtrohet pyetja për Shqipërinë që të bëhet sa më shpejt anëtare e BE-së, kjo lidhet edhe me histori si kjo: Në tetor prokuroria kërkoi heqjen e imunitetit të ish-ministrit të Brendshëm, Saimir Tahiri…sepse emri i tij përmendej disa herë në telefonatat mes tregtarëve shqiptarë dhe italianë të drogës.”

Gazeta gjermane i kushton vëmendje të gjithë zhvillimeve lidhur me rastin Tahiri dhe konkludon me përgjigjen e  Ramës kur i pyetur nga “Die Welt” lidhur me rastin e sëkëlldisshëm Tahiri thotë: “Besoj në radhë të parë se dyshimet ndaj një personi nuk mund të pengojnë përpjekjet e një vendi të tërë.”

Gazeta thekson se “është një nga këto raste që e prishin dhe përcaktojnë imazhin e Shqipërisë në pjesën tjetër të Europës. Deri më sot nuk është i hequr plotësisht dyshimi se kriminaliteti i organizuar ka kapur fort ekonominë e vendit dhe tentakulat e tij arrijnë deri në nivelet më të larta të qeverisë. Në raportin e Interpolit për vitin 2017, Shqipëria renditet ndër prodhuesit më të mëdhenj të kanabisit në Europë, ky vend përshkruhet si pikë e rëndësishme e tregtisë me kokainën dhe heroinën.” (dw)

Gjatë vizitës në Tiranë, presidenti i Këshillit Europian, Donald Tusk theksoi se tani Shqipëria duhet të bindë shtetet anëtare për hapjen e negociatave në qershor. BE mbetet partnerja më e madhe tregtare e Shqipërisë.

Presidenti i Këshillit Europian, Donald Tusk, vlerësoi të martën ( 24.04.2028) përpjekjet që ka bërë Shqipëria për të merituar rekomandimin e Komisionit Europian , për hapjen e negociatave të anëtarësimit. Ai vizitoi sot Tiranën, në krye të një turi në vendet e Ballkanit Perëndimor, në prag të zhvillimit të Samitit të Sofjes, midis BE dhe Ballkanit Perëndimor, më 17 Maj.

”Dua të jem shumë i qartë. Ajo  çfarë ka bërë Shqipëri është e mjaftueshme për të hapur negociatat. Ëndrra ime është që Shqipëria të vazhdojë në rrugën drejt Europës.”  tha ai në një  takim me mediat, të përbashkët me kryeministrin Rama. Shpresa e qeverisë së Tiranës është hapja e negociatave  pas 2 muajsh, në Qershor, kur përfundon presidenca bullgare  e Këshillit Europian.  Tusk tha se është optimist që kjo mund të realizohet , por këtë e krahasoi me një sfidë. “Sfida tjetër e Shqipërisë do të jetë që të binden të gjithë shtete anëtare të BE-së në qershor, për të nisur negociatat” tha Tusk.

Shqipëria dhe BE

Donald  Tusk foli në Tiranë me gjuhën e saktë të shifrave për zhvillimin në rritje  të marrëdhënieve ekonomike dhe tregtare të Shqipërisë me BE. ” BE është investuesja më e madhe, donatorja më e madhe dhe partnerja tregtare më e madhe për të gjithë rajonin. Kjo vlen edhe për Shqipërinë”, tha ai. 78% e eksporteve shqiptare, theksoi Presidenti i Këshillit Europian Tusk, shkojnë në Bashkimin Europian dhe  vetëm 3% e eksporteve shqiptare shkojnë në Kinë, me Turqinë  1% dhe me Rusinë  “0”, duke përmendur tre vende që konsiderohen si vende që po përpiqen të rrisin ndikimin e tyre në Ballkanin Perëndimor, ku Shqipëria ka 14% të eksporteve të saj.

Shqipëri a dhe rajoni- të integruara në korridoret paneuropiane të transportit

Lidhja mes vendeve të rajonit, një nga shtyllat e Procesit të Berlinit , do të jetë në qëndër të Samitit  të Sofjes, bëri të  ditur Tusk n ë Tiranë. ” Në Sofje duhet të riafirmojmë perspektivën Europiane të Ballkanit Perëndimor, por ajo çka është po me rëndësi, është që samiti duhet të përcaktojë mënyrat dhe mjetet për të përmirësuar lidhjet me dhe brenda rajonit. Kjo ka të bëjë me lidhjet njerëzore, dixhitale dhe infrastrukturore” tha ai sot ne Tirana.

Donalt Tusk foli për  domosdoshmërinë që  Shqipëria dhe vendet e tjera të Ballkanit Perëndimor, me perspektivë europiane për të qënë plotësisht të integruara në korridoret paneuropiane të transportit. ” Të udhëtosh midis kryeqyteteve të Ballkanit Perëndimor, nuk duhet të zgjasë më shumë sesa fluturimet për në Pekin, siç ndodh ndonjëherë. Për të shmangur ndërprerjet energjetike duhet të investohet më shumë së bashku për përmirësimin e rrjeteve energjetike dhe ndërlidhjet” vuri ai në dukje.

Përmirësimi i konektivitetit mes vendeve  të rajonit dhe me BE  do të jetë në përfitim si të qyteteve dhe bizneseve nga Shqipëria, partnerëve të tjerë nga Ballkanit Perëndimor dhe Bashkimi Europian” theksoi ai.

“Ky program konektiviteti, nuk është alternativë ndaj zgjerimit dhe nuk zëvendëson zgjerimin. Është mënyra për ta shfrytëzuar kohën midis të sotmes dhe së nesërmes në mënyrë më efektive se më parë” sqaroi Presidenti Tusk. Ai solli në Tiranë një lajm të mirë për gjithë rininë e Ballkanit Perëndimor. “Të rinjtë nga rajoni duhet të kenë më shumë mundësi për të studiuar në Bashkimin Europian. Një dyfishim i fondeve të “Erasmus+” do të sigurojë që ky objektiv të jetë i arritshëm ” tha ai.

Shqipëria – partner besnik i BE në sfidat gjeopolitike

Siguria, kontrabandimi i emigrantëve, terrorizmi dhe krimi i organizuar mbeten sfidat e përbashkëta të BE dhe Ballkanit Perëndimor. Presidenti i Këshillit Europian, Donald Tusk, e cilësoi Shqipërinë ” një nga partneret më besnike të BE në përballimin e këtyre sfidave. Ai përgëzoi Shqipërinë për solidaritetin e saj me  BE-në dhe shtetet anëtare lidhur me me sulmin “Skripal” në Salisbury.

Presidenti Tusk e quajti “markë unike të Shqipërisë” tolerancën dhe bashkëjetesën fetare”. ” Këto cilësi vijojnë të jenë tejet të rëndësishme në botën e sotme dhe janë themelet, mbi të cilat mund të vijojmë të ndërtojmë të ardhmen e përbashkët dhe kam këtë ndjesinë personale që jeni më europianë ju këtu, sesa disa europianë të BE-së.” (dw)

Rama zhvilloi të mërkurën takime politike në Berlin për të fituar votën gjermane për çeljen e negociatave. Ai u prit me dashamirësi, por premtime nuk mori.

Vizita e parë e kryeministrit shqiptar menjëherë pas rekomandimit të Komisionit të BE-së për fillimin e bisedimeve të anëtarësimit ishte në Berlin. Ai u takua aty me një sërë personash të rëndësishëm dhe sidomos me kancelaren Angela Merkel. Në të gjitha bisedimet Rama kishte një synim: t’i bindte bashkëbiseduesit të jepnin votën e tyre pro çeljes së negociatave.

Rama pati shumë takime të mërkurën: por më i rëndësishmi ishte ai me kancelaren Angela Merkel. Edhe pse miratimi i rekomandimit të komisionit për çeljen e negociatave do të kalojë nga parlamenti, fjala e kryetares së CDU-së do të luajë një rol të madh.

Por kancelarja gjermane nuk dha asnjë sinjal për të orientuar dëgjuesin se a do të votojë Gjermania pro çeljes së negociatave, apo do ta shtyjë këtë vendim për një moment më të përshtatshëm.

“Çelja e negociatave kërkon plotësimin e një numri parakushtesh,” tha Merkel të mërkurën para medias në Berlin. “Shqipëria me shumë sforco i ka përmbushur disa syresh. Në javët e ardhshme ne do të krijojmë mendimin tonë përfundimtar se a ka gjëra që duhen bërë, a ka përparime dhe këtë duam ta bisedojmë edhe me kolegët tanë europianë”, tha kancelarja më tej. Dita më e afërt për këtë bisedë do të jetë 17 maji, në Sofje, ku Merkel do të marrë pjesë në samitin e vendeve të Ballkanit Perëndimor me BE-në.

Lavdërime për vettingun

Lavdërime mori kryeministri i Shqipërisë  nga Gjermania sidomos për procesin e vettingut, në vazhdën e të cilit janë kontrolluar e vlerësuar qindra gjykatës dhe prokurorë e si pasojë kanë dhënë dorëheqjen qysh tani, vetëm disa javë pas fillimit, 21 gjykatës e prokurorë.  “Ky ligj e forcon sistemin juridik, integritetin dhe seriozitetin e tij,” tha Merkel, e cila e inkurajoi Ramën që ta zgjeronte vettingun edhe te organet policore.

Kancelarja ofroi përkrahjen e Gjermanisë: “Gjermania dëshiron të japë mbështetje, Gjermania do të japë ndihmesë në mënyrë që ne të mund t’i shohim me të vërtetë përparimet që na nevojiten për të marrë një vendim në qershor”, tha Merkel.

Kryeministri i Shqipërisë, Edi Rama, me presidentin e Bundestagut, Wolfgang Schäuble

Në qershor do të mbahet samiti i BE-së nën kryesinë e Bullgarisë, dhe  aty do të merret vendimi, nëse rekomandimi i Komisionit për nisjen e bisedimeve do të mund të vijohet nga një vendim apo jo.

Për Edi Ramën negociatat duhet të kishin filluar një orë e më parë. Një dëshirë, të cilën ai e shprehu edhe në konferencën e përbashkët të shtypit me kancelaren e Gjermanisë.

Rezultatet e vettingut të gjyqësorit, ligji i të cilit u hartua me ndihmën e Gjermanisë dhe sipas Ramës është kthyer tashmë në një model edhe për vende të tjera, kanë bërë që Shqipëria të merrte këtë rekomandim pozitiv nga Komisioni. Tani Shqipërisë i nevojitet një shpërblim, argumenton Rama, pra çelja e negociatave, në mënyrë që vettingu i policisë të jetë po aq i suksesshëm.

Deputetët konservatorë skeptikë

Që Gjermania të japë votën për hapjen e negociatave, nevojitet miratimi i Kuvendit Federal. Ndërsa socialdemokratët janë treguar më të hapur dhe më të gatshëm për të përqafuar rekomandimin, shokët e partisë së kancelares Merkel janë më të rezervuar.

Pikërisht për të mënjanuar këto rezerva, Edi Rama, kërkoi ndihmë ku të mundte: Ai u takua me  presidentin e Bundestagut, Wolfgang Schäublen, një nga figurat më të vjetra të partisë, fjala e të cilit është me peshë, si edhe pati një dëgjim pikërisht në komisionin e Bundestagut për Çështje të BE-së, që drejtohet pikërisht nga Günther Krichbaum, politikani CDU që u përfol aq shumë nga disa media në Shqipëri, pasi nuk iu bashkua euforisë që kishte kapluar Shqipërinë pasi komisioni dha rekomandimin. Rama pati edhe një darkë me deputetë nga grupi parlamentar CDU/CSU.

Vërejtje nga miqtë

Në mbrëmje, Rama pati një takim më të ngrohtë, në fondacionin e partisë socialdemokrate, simotrës së Partisë Socialiste në kuadër të Internacionales Socialiste. Rama ishte ftuar aty të diskutonte me ministrin gjerman për Evropën, Michael Roth, për Shqipërinë dhe mundësinë e çeljes së negociatave. Roth vuri në dukje se çelja e negociatave nuk pritet me eufori nga vendet anëtare të BE-së. “BE po kalon kohë të vështira, sepse ka një sërë problemesh të brendshme dhe nuk është e gatshme për anëtarë të rinj.”

Veç lëvdatave për arritjet në procesin e Vettingut, Roth nuk harroi t’i kujtonte mikut të tij socialist, se reforma gjyqësore pa një proces kundër ish-ministrit të brendshëm, Saimir Tahiri, nuk mund të bëhet. Ndaj duhet filluar procesi gjyqësor kundër ish-ministrit të brendshëm Saimir Tahirit për të dëshmuar kështu se pavarësia e gjyqësorit me të vërtetë funksionon, tha Roth. (dw)