Shefja e politikës së Jashtme të Bashkimit Evropian, Federica Mogherini dhe komisionari për Zgjerim, Johannes Hahn, i kërkuan të mërkurën sërish Kosovës që të heqë tarifat prej 100 për qind të vendosura ndaj mallrave nga Serbia dhe Bosnja e Hercegovina.

Komentet ishin pjesë e publikimit të Raportit vjetor të Zgjerimit, i cili përcakton përparimin që kanë bërë vendet që aspirojnë integrimin në Bashkimin Evropian.

“Kosova duhet të përqendrohet në zbatimin e Marrëveshjes së Stabilizim-Asociimit dhe duhet të heqë tarifat prej 100 për qind për importet nga Serbia dhe Bonjë e Hercegovina. Në qershor do të bëj edhe një përpjekje për të zhbllokuar këtë situatë duke shkuar në këto vende, ndoshta për të përgatitur diçka për muajin korrik. Nuk e di nëse do të jetë e dobishme, por duhet ta përdorim çdo mundësi dhe të bëjmë çdo gjë që është e mundur për të zhbllokuar këtë situatë që po pengon jo vetëm zhvillimin e këtyre dy vendeve, por tërë rajonit”, tha komisionari Johhanes Hahn.

Bisedimet ndërmjet Kosovës dhe Serbisë janë pezulluar që nga muaji nëntor i vitit të kaluar, kur Prishtina vendosi tarifat në shenjë kundërshtimi ndaj siç është thënë, qasjes agresive serbe ndaj shtetësisë së Kosovës.

Beogradi kushtëzon vazhdimin e bisedimeve me heqjen e tarifave, por Prishtina ka refuzuar edhe trysninë ndërkombëtare për një gjë të tillë.

Edhe zonja Federica Mogherini, tha se Kosova duhet të heqë tarifat për t’u hapur rrugë bisedimeve meqë sipas saj, ‘status-quoja’ aktuale nuk është e qëndrueshme. Duke ju referuar operacionit të një dite më parë të policisë së Kosovës që nxiti tensione në veri dhe ndërmjet Prishtinës dhe Beogradit, zonja Mogherini tha se “ajo që ndodhi dje na tregon se Prishtina dhe Beogradi duhet të kthehen në tryezën e bisedimeve dhe të arrijnë një marrëveshje detyruese ligjore. Ajo që ndodhi dje është përkujtues se të gjithë ne jemi për marrëveshje të tillë pasi që i tërë rajoni përfiton prej saj. Është e vërtetë, fola për bashkëpunimin në rajon. E dimë dhe pajtohemi që tendencat e së kaluarës për konfrontim, ose për retorika që nuk janë bashkëpunuese, mund të dalin në çdo moment. Dhe, për këtë arsye them se jemi në një udhëkryq”, tha zonja Mogherini.

Bisedimet tashmë të pezulluara, i patën siguruar Serbisë hapjen e negociatave për integrim, ndërsa Kosova deri më tani ka përfituar vetëm Marrëveshjen e Stabilizim Asocimit me Bashkimin Evropian, por mbetet e fundit në proceset integruese në rajon. Ajo mbetet edhe vendi i vetëm, qytetarët e së cilës, nuk mund të udhëtojnë pa viza drejt Bashkimit Evropian.

Pas publikimit të raportit të zgjerimit, përfaqësuesja e posaçme e Bashkimit Evropian në Kosovë, Natalyia Apostolova, tha se raportin theksohet që të gjitha kriteret janë përmbushur dhe Komisioni dhe Parlamenti Evropian rekomandojnë që liberalizimi i vizave për Kosovën të ndodhë sa më shpejt që të jetë e mundur.

“Mendoj që kjo është gjuha më e fortë që kemi parë në raport që nxit shtetet anëtare të gjejnë zgjidhje sa më shpejt”, tha zonja Apostolova.

Raporti i publikuar sot vlerëson mes tjerash se situata ne veriun e Kosovës vazhdon të jetë sfidë edhe për agjencitë e sundimit të ligjit sa i përket krimit të organizuar.

Raporti vë re mes tjerash se korrupsioni është ende gjerësisht i shtrirë në Kosovë, e cila “është në një fazë të hershme në luftën kundër krimit të organizuar. Disa përparime janë bërë kryesisht përmes reformave të rëndësishme në fushën e sundimit të ligjit, në hetimin dhe ndjekjen penale të rasteve të nivelit të lartë dhe në ngrirjen paraprake të pasurisë. Megjithatë, është bërë pak përparim në konfiskimin përfundimtar të pasurive dhe ende ka shumë pak hetime financiare dhe dënime përfundimtare. Masat janë të nevojshme për të siguruar qartazi se nuk ka ndërhyrje politike në organet e zbatimit të ligjit dhe prokurorisë”.

Raporti njeh përparimin “në luftën kundër terrorizmit, veçanërisht në lidhje me krijimin e kushteve më të mira për rehabilitimin dhe riintegrimin e luftëtarëve të huaj dhe familjeve të tyre. Autoritetet e Kosovës duhet të jenë më efektive në përpjekjet e tyre për të luftuar pastrimin e parave dhe ligji përkatës duhet të jetë në përputhje me kërkesat e BE-së dhe standardet ndërkombëtare”, thuhet mes tjerash në raport.

voa

Policia e Kosovës tha se ka ndaluar një numër zyrtarësh policor dhe disa qytetarë në një operacion në disa komuna në Kosovë dhe është përballur me rezistencë të armatosur në veriun e banuar me shumicë serbe, me ç’rast një pjesëtar i policisë është plagosur lehtë.

Miradije Kelmendi, nga Inspektorati Policor i Kosovës tha se gjatë operacionit janë kryer 12 bastisje dhe “janë arrestuar 19 punonjës të Policisë së Kosovës, prej tyre 11 të nacionalitetit serb, 4 shqiptarë dhe 4 boshnjakë. Nga ta njëri është i gradës së kapitenit, 3 rreshterë dhe të tjerët zyrtarë policorë. Janë konfiskuar gjëra të ndryshme ilegale që do të shërbejnë si provë materiale në procedurat penale si armë, pajisje teknologjike dhe sasi parash. Zyrtarët janë ndaluar për 48 orë dhe si pjesë e procedurës administrative janë pezulluar nga detyra”.

Prokurori i Posaçëm i Kosovës, Sylë Hoxha tha se “që në prill të vitit të kaluar i ka filluar veprimet procedurale ndaj disa personave të dyshuar për keqpërdorim të pozitës zyrtare, për veprën penale të krimit të organizuar, për veprën penale të kontrabandimit me mallra, marrje ryshfeti, dhënie ryshfeti e kështu me radhë”.

Policia tha se operacioni u shtri në disa rajone të ndryshme, përfshirë komunat Zveçan, Zubin Potok, Leposaviç, Mitrovicë e Veriut, Mitrovicë e Jugut, Skenderaj dhe Drenas dhe deri tash janë arrestuar disa qytetarë disa zyrtarë policorë të përkatësive të ndryshme kombëtare si shqiptarë, serbë dhe boshnjakë, të cilët kanë qenë të dyshuar.

“Policia e Kosovës, përveç hasjes në rezistencë të armatosur në Veri të Mitrovicës, ka hasur edhe në disa bllokada të rrugëve, të cilat kanë penguar qarkullimin e mjeteve zyrtare, me ç’rast është detyruar të përdorë mjetet e nevojshme për lirimin e rrugëve me qëllim të vazhdimit të operacionit policor”, thuhet në njoftimin e policisë sipas së cilës për shkak të pengesave ka shoqëruar edhe disa qytetarë të përfshirë në këto raste.

Policia tha se një pjesëtar i saj është plagosur lehtë në këmbë, ndërsa 4 të tjerë kanë pësuar lëndime gjatë operacionit. Po ashtu, policia tha se gjashtë qytetarë janë lënduar gjatë operacionit

Grupe qytetarësh serbë dolën në rrugë pas operacionit, ndërsa autoritetet serbe në Beograd thanë se operacioni ka për qëllim të frikësojë popullatën serbe.

Mediet ne Beograd thanë se presidenti i Serbisë, Aleksandër Vuçiç ka urdhëruar që ushtria dhe policia të jenë në gjendje gatishmërie dhe i ka bërë thirrje komunitetit ndërkombëtare që të ndërhyjë për të “frenuar Prishtinën”.

Një natë më parë, presidenti serb, Aleksandër Vuçiç, gjatë një fjalimi në parlamentin serb pranoi që Beogradi e ka humbur kontrollin mbi Kosovën, por paralajmëroi se Serbia do të reagojë nëse shqiptarët sulmojnë serbët në Kosovë.

Të martën ai tha në parlamentin serb që “nëse ndodhë të rrezikohet rendi dhe jetët e njerëzve në veriun e Kosovës, ushtria jonë do të mbrojë popullin tonë”, ndërsa kritikoi komunitetin ndërkombëtarë për qasjen ndaj operacionit të policisë së Kosovës.

​Forcat paqeruajtëse të NATO-s thanë ndërkaq se ky “është vetëm një operacion policor dhe se as Forca e Sigurisë së Kosovës ose ndonjë forcë tjetër ushtarake nuk është vendosur në veri të Kosovës. Për shkak të ndjeshmërisë politike, komandanti KFOR-it fton të gjitha palët që të merren me mosmarrëveshjet në mënyrë paqësore dhe me përgjegjësi, pa përdorimin e forcës. Njerëzit duhet të qëndrojnë të qetë, nuk kanë asgjë për t’u frikësuar. KFOR-i vazhdon të vëzhgojë situatën dhe është i gatshëm të ndërhyjë, nëse i kërkohet si përgjegjës i tretë, në mënyrë që të garantojë sigurinë për të gjitha komunitetet, në përputhje me mandatin e tij sipas Rezolutës 1244 të Këshillit të Sigurimit të Kombeve të Bashkuara”, thuhet në një njoftim të forcave paqeruajtëse të udhëhequra nga NATO-ja në Kosovë.

Drejtori i Policisë së Kosovës, Rashit Qalaj tha se “gjatë përpjekjeve për largimin e barrikadave dhe për të arritur të lokacionet që i kemi pasur në plan për bastisje, në njërën nga barrikadat ka qenë edhe një veturë e OKB-së dhe në të ka qenë një zyrtar i OKB-së me prejardhje nga Rusia dhe një zyrtar lokal që punon po për OKB-në. Kjo është edhe arsyeja që ne i kemi shoqëruar në polici”.

Të dy punonjësit e UNMIK-ut në orët e pasdites janë lënë të lirë.

Presidenti i Kosovës, Hashim Thaçi, shkroi në rrjetet sociale se “institucionet e rendit dhe ligjit kanë nevojë për besim dhe përkrahje maksimale të tërë shoqërisë në luftën e pa kompromis kundër krimit të organizuar, kontrabandës dhe korrupsionit, në tërë territorin e Republikës së Kosovës. Shpreh keqardhjen time për plagosjen e policit tonë në krye të detyrës dhe i uroj shërim sa më të shpejt. Në dekadën e dytë të Republikës së Kosovës s’do të ketë vend për krim të organizuar dhe ata që merren me aktivitete të kundërligjshme do të përfundojnë prapa grilave. Operacioni i sotëm policor është në të mirë të të gjithë qytetarëve pa asnjë dallim dhe ftoj komunitetin serb në veri që ta ruajë qetësinë dhe ta përkrah luftën kundër krimit të organizuar. Forcimi i rendit dhe ligjit është jetik për barazinë e gjithë qytetarëve dhe përshpejton lëvizjen tonë drejt procesit të integrimeve euroatlantike!”, shkroi ai.

Në një paraqitje para gazetarëve, presidenti Thaçi i cilësi si veprime për nevoja të brendshme politike paralajmërimet e presidentit serb për ndërhyrje në rast të rrezikimit të serbëve të Kosovës.

“Është një deklaratë populiste, një deklaratë që kryesisht ka parasysh opinionin e brendshëm në Serbi, presidenti i Serbisë Vuçiç e di shumë mirë se nuk mund të lëvizë në drejtim të Kosovës, diçka që është e pamundur dhe e pa imagjinueshme dhe edhe vet ai është i bindur, por në çdo rast institucionet e Republikës së Kosovës duke përfshirë edhe Forcën e Sigurisë së Kosovës janë në gjendje gatishmërie”, tha presidenti Thaçi.

​Kryeministri i Kosovës, Ramush Haradinaj, tha se operacioni është i drejtuar ndaj individëve të përfshirë në kontrabandë, krim të organizuar dhe vepra të tjera kriminale. Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë. Si Kryeministër i vendit, konfirmoj se bëhet fjalë për zbatimin të ligjit dhe asgjë tjetër. Ftoj serbët e veriut ta ruajnë qetësinë dhe ta respektojnë ligjin!”, shkroi ai në rrjetet sociale.

Sipas kryeministrit Haradinaj, “forcimi i sundimit të ligjit është në interesin e Kosovës dhe rajonit dhe krimi i organizuar e kontrabanda janë kërcënim për përparimin, prandaj nuk duhet të mbështeten në baza etnike. Qeveria e Serbisë, nuk duhet të pengojë përpjekjet për t’i luftuar ato”, tha ai.

voa

Gjatë një aksioni të Policisë së Kosovës në veri të vendit dhe ne Drenicë, janë arrestuar shumë persona. Policia njofton për të plagosur me armë zjarri.

Një operacion në shkallë të gjërë zhvilloi sot (28.05.2019) Policia e Kosovës në veri të vendit dhe në Drenicë, duke arrestuar rreth 20 zyrtarë doganorë, zyrtarë të policisë dhe qytetarë që dyshohet të jenë të përfshirë në vepra të ndryshme kriminiale. Të ndaluarit dyshohet se janë të përfshirë, në vepra, pjesëmarrje ose organizim i grupit kriminal, kontrabandim me mallra, keqpërdorim i pozitës zyrtare, dhënie e ryshfetit dhe tregti e ndaluar, njofton policia e Kosovës. Sipas medieve lokale serbe, në mesin e të arrestuarve është edhe komandanti serb i policisë së komunës së Zubin Potokut, komunë kjo e banuar më shumicë serbe. Gjatë operacionit policia ka hasur në rezistencë të armatosur të grupeve të serbëve. Njoftohet se ka pasur edhe policë të plagosur.

Plagosjet e policëve

“Përkundër hasjes në rezistencë të armatosur në veri të Mitrovicës, operacioni policor është duke vazhduar, përfshirë arrestimin dhe kontrollin e disa lokacioneve, të cilat kanë rezultuar me konfiskimin e dëshmive relevante përfshirë edhe armë të gjata”, thuhet në njoftimin e Policisë së Kosovës. Mediet lokale njoftojnë se grupe serbësh në veri kanë bllokuar disa rrugë kryesore të veriut, për të vështirësuar operacionin e Policisë së Kosovës. Policia mohon që operacioni në veri të Kosovës ka të bëjë me rastin e policit të vrarë në veri vitin 2011 Enver Zymberi dhe për rastin e vrasjes së politikanit serb Oliver Ivanoviq. Gjithashtu, policia pohon se aksione për arrestimin e të dyshuarve janë zhvilluar edhe në Drenicë dhe jo vetëm në veri të Kosovës.

“Këtij operacioni policor i ka paraprirë një hetim disamujor i Inspektoratit të Policisë së Kosovës IPK, dhe Policisë së Kosovës i udhëhequr nga Prokuroria Speciale e Kosovës, i cili ka rezultuar me dyshimin e bazuar të përfshirjes së disa zyrtarëve policorë dhe të disa qytetarëve në veprimtari kriminale “pjesëmarrje ose organizim i grupit kriminal” dhe vepra tjera të specifikuara. Ky operacion policor është ende në vazhdim e sipër. Si pasojë e rezistencës në Veri të Mitrovicës, një zyrtar policor është plagosur por është jashtë rrezikut për jetë, përderisa deri më tani janë arrestuar disa zyrtarë policorë, disa qytetarë si dhe janë konfiskuar gjësende të ndryshme përfshirë edhe disa armë”, thuhet në njoftimin e policisë. Ndërsa zëdhënësja e spitalit të Mitrovicës, Nita Mustafa ka deklaurar për mediat e Kosovës se ndërkohë numri i policëve të plagosur është rritur. “Për momentin katër policë janë të plagosur, por ata janë jashtë rrezikut për jetë. Tre prej tyre janë duke u trajtuar në emergjencë dhe njëri në kirurgji”, tha Mustafa. Këto të dhëna ende nuk janë konfirmuar nga Policia e Kosovës.

Reagimi i Kforit dhe Unmikut

Kfori pohon se kjo është vetëm një operacion policor dhe se as Forca e Sigurisë së Kosovës ose ndonjë forcë tjetër ushtarake nuk është vendosur në veri të Kosovës. Për shkak të ndjeshmërisë politike të momentit, komandanti Kforit fton të gjitha palët që të merren me mosmarrëveshjet në mënyrë paqësore dhe me përgjegjësi, pa asnjë forcë ose dhunë. Njerëzit duhet të qëndrojnë të qetë, nuk kanë asgjë për t’u frikësuar.

Kfori vazhdon të monitorojë situatën dhe është i gatshëm të intervenojë, nëse kërkohet si përgjegjës i tretë, në mënyrë që të garantojë sigurinë për të gjitha komunitetet, në përputhje me mandatin e vet sipas Rezolutës 1244 të Këshillit të Sigurimit të Kombeve të Bashkuara, thuhet në kumtesën e Kforit. Nga veriu njoftohet edhe për fluturimin e një helikopterri të forcave ndërkombëtare, por nuk ka pasur ndonjë ndërhyrje.

Pas informacioneve se në mesin e të arrestuarve mund të ketë edhe dy bashkëpunëtorë të Unmikut, ka reaguar edhe kjo organizatë. Unmiku pohon se po përcjellë “me shqetësim të thellë zhvillimet në veri të Kosovës, përfshirë ndalimin e dy punonjësve të OKB-së, gjatë kryerjes së detyrave të tyre nga ana e Policisë së Kosovës.” Sipas kumtesës së Unmikut, “që të dy punonjësit më vonë janë transferuar në spital për trajtim të lëndimeve”.

Shefi i Unmikut Zahir Tanin, ka apeluar për lirimin e menjëhershëm të punonjësve të OKB-së, duke shtuar se “çfarëdo dëmi shkaktuar punonjësve të Kombeve të Bashkuara do të përcillet me përgjigje më të larta diplomatike dhe ndërkombëtare ligjore”.

Reagimet e zyrtarëve

Edhe kryeministri i Kosovës, Ramush Haradinaj, tha se operacioni policor në veri ka në shënjestër individë të përfshirë në kontrabandë, krim të organizuar dhe aktivitete të tjera kriminale. “Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë. Operacioni u zhvillua me sukses edhe në komunat veriore të Kosovës. Si kryeministër i vendit, konfirmoj se bëhet fjalë për zbatim të ligjit dhe asgjë tjetër. Ftoj serbët e veriut ta ruajnë qetësinë dhe ta respektojnë ligjin”, shkroi në profilin e tij kryeministri Ramush Haradinaj.

Edhe Presidenti i Kosovës, Hashim Thaçi, ftoi serbët e veriut që ta ruajnë qetësinë, sepse sipas tij, operacioni i policisë është kundër grupeve kriminale dhe për zbatim të rendit dhe ligjit. Ai tha se “forcat e Kosovës janë në gjendje gatishmërie, nëse është e domosdoshme”.

“Institucionet e rendit dhe ligjit kanë nevojë për besim dhe përkrahje maksimale të tërë shoqërisë në luftën e pakompromis kundër krimit të organizuar, kontrabandës dhe korrupsionit, në tërë territorin e Republikës së Kosovës. Në dekadën e dytë të Republikës së Kosovës s’do të ketë vend për krim të organizuar dhe ata që merren me aktivitete të kundërligjshme do të përfundojnë prapa grilave”, shkroi në profilinn e tij Presidenti Thaçi.

Për operacionin e njësive speciale të policisë së Kosovës në veri i menjëhershëm ishte edhe reagimi i Beogradit zyrtarë. Medium publik i Serbisë RTS, shkruan se Presidenti i Serbisë Aleksandër Vuciq, ka urdhëruar, “vendosjen e të gjitha njësive të Forcave të Armatosura të Serbisë në gjendje të plotë të gatishmërisë luftarake”. Ndërkohë, drejtori i Zyrës për Kosovën në Qeverinë e Serbisë, Marko Gjuriq, tha për mediet në Serbi se “nëse ndërkombëtarët nuk e ndalin Policinë e Kosovës, Serbia do të kundërpërgjigjet”.

“Flas në emër të presidentit të Serbisë, Aleksandar Vuçiq, i kemi informuar përfaqësuesit ndërkombëtar se nëse nuk e ndalin aksionin e Prishtinës, kundëraksioni i Serbisë do të ndërmirret brenda ditës së sotme”, citon RTS, Marko Gjuriqin.

dw