Partia maqedonase Lidhja Social Demokrate (LSDM) dhe ajo shqiptare Bashkimi Demokratik për Integrim (BDI) janë në epërsi nga votimi në zgjedhjet e parakohshme parlamentare, të mbajtura të mërkurën në kushte pandemie.

Nga përpunimi i 93.96 për qind të vendvotimeve, LSDM-ja e udhëhequr nga Zoran Zaev ka fituar rreth 321 mijë vota apo 36.12% e pasuar nga VMRO DPMNE e Hristijan Mickovskit me 310 mijë vota apo 34.85%.

Nga partitë shqiptare, sipas të dhënave të Komisionit Shtetëror Zgjedhor, BDI ka siguruar 101 mijë vota apo 11.3 për qind të votave kurse opozita e drejtuar nga koalicioni Aleanca me Alternativa kanë marrë 76 mijë vota apo 8.52 për qind të votave.

Partia e krahut të majtë “Levica”, ka fituar 37 rreth mijë vota 3.96% për qind të votave, ndërsa Partia Demokratike Shqiptare e Menduh Thaçit rreth 13 mijë vota apo 1.48% për qind.

Në bazë të rezultateve të deritanishme dhe simulimit të tyre në mandate, LSDM ka fituar 46 ulëse në Kuvend, VMRO DPMNE-ja 44, BDI-ja 15, Aleanca me Alternativa 12, “Levica” dhe PDSH nga 1 mandat. Por këto ndarje të mandatave mund të ndryshojnë deri në numërimin përfundimtar të votave.

Kryetar i LSDM-së, Zoran Zaev shpalli fitoren e partisë së tij duke theksuar se Maqedonia e Veriut tanimë ka të ardhme edhe më të sigurt.

“Ne kemi sukses, njerëzit e mi, me një avantazh prej më shumë se tre mandate ndaj VMRO-DPMNE, me mundësinë edhe për një ose dy mandate tjera. Koalicioni “Mundemi” është fitues i zgjedhjeve në të cilat u konfirmua vullneti i njerëzve. Qytetarët dolën dhe votuan për një të ardhme të sigurt, për unitet dhe solidaritet, për atdhetarizëm, për drejtësi, për një ditë më të mirë dhe një të nesërme më të mirë. Ne i thamë qartë jo rrezikut”, ka deklaruar Zoran Zaev duke i vlerësuar zgjedhjeve si paqësore, të pastra, bazuar në standardet evropiane.

Për dallim nga Zaevi, kryetari i VMRO DPMNE-së, Hristijan Mickovski nuk doli para mediave të mërkurën në mbrëmje ndërsa qëndrimin e partisë e bëri të ditur, sekretari i përgjithshëm, Igor Janjushev. Ai tha se VMRO-ja është e kënaqur me rezultatin por jo edhe me procesin zgjedhor për shkak të siç tha parregullsive të shumta. Janushev tha se rezultatet tregojnë se populli dëshiron ndryshimin andaj VMRO do të mbetet në garë për formimin e qeverisë së re.

Me këtë kredibilitet do të hyjmë në garë për sigurimin e shumicës në Kuvend. Beteja ende nuk ka përfunduar”, ka deklaruar Janjushev.

Kryetari i BDI-së, Ali Ahmeti ka deklaruar se fitorja e partisë së tij në këto zgjedhje, është fitore e të gjithë shqiptarëve.

“Me këtë fitore të BDI-së kanë fituar shqiptarët dhe nuk ka humbur askush sepse ne u jemi dalë zot të vërtetë ashtu siç kemi qenë edhe më parë. Jemi fitues absolut të zgjedhjeve”, ka deklaruar Ahmeti.

Fitore në disa qytete ka shpallur edhe Aleanca për Shqiptarët dhe Alternativa, por ato kanë akuzuar pushtetin për parregullsi të shumta zgjedhore, në disa fshatra të Shkupit dhe në rajonin e Likovës.

“Përkundër presioneve të shumta dhe frikësimit të votuesve, ne presim fitore nga këto zgjedhje”, ka deklaruar Zijadin Sela.

Në zgjedhje kanë marrë pjesë 15 parti politike dhe koalicione ndërsa nga gjashtë njësitë zgjedhore, do të zgjidhen nga 20 deputetë apo 120 sa numëron Kuvendi i Maqedonisë së Veriut.

Në zgjedhjet që kanë zgjatur deri në orën 21.00, të drejtën e votës e kanë shfrytëzuar rreth 51 për qind nga 1.8 milion qytetar me të drejtë vote.

Komisioni Shtetëror i Zgjedhjeve në Maqedoninë e Veriut, procesin zgjedhor e ka vlerësuar të rregullt dhe demokratik, me disa parregullsi të vogla që sipas kryetarit të KSHZ-së, nuk kanë ndikuar në mbarëvajtjen e procesit zgjedhor.

“Mendoj se ne përgjithësi mund të jemi të kënaqur nga pasqyra që kemi për këtë proces zgjedhor”, ka deklaruar kryetari i KSHZ-së, Oliver Derkovski.

Procesi zgjedhor u mbikëqyr nga 2,508 vëzhgues vendor dhe 98 të huaj.

Ministria e Punëve të Brendshme, angazhoi rreth 6 mijë forca policore për të siguruar mbarëvajtjen e procesit zgjedhor. MPB-ja njoftoi se ka pranuar 11 denoncime për prishje të procesit zgjedhor.

Zgjedhjet e së mërkurës ishin zgjedhjet e dhjeta parlamentare në Maqedoninë e Veriut.

Zgjedhjet duhej të mbaheshin më 12 prill, por ato u shtynë për shkak të pandemisë së koronavirusit dhe deri në mbajtjen e tyre vendi është drejtuar nga një qeveri teknike, pjesë e së cilës ka qenë edhe opozita maqedonase.

Zgjedhjet e parakohshme në Maqedoninë e Veriut ishin paralajmëruar nga ish-kryeministri Zoran Zaev, që në dhjetor të vitit 2019 pasi ky vend arriti të marrë datën e fillimit të negociatave me Bashkimin Evropian, pavarësisht zbatimit të marrëveshjes me Greqinë për ndryshimin e emrit nga Maqedoni në Maqedoni e Veriut.

rel

Ministria e Shëndetësisë informon se gjatë 24 orëve të fundit, janë kryer 830 testime dhe janë regjistruar 94 raste të reja të COVID -19 edhe atë në : -Shkup 49 – Gostivar 13 – Sveti Nikole 9 – Shtip 8 – Tetovë 6 – Kumanovë 2 – Strugë 2 – Koçani 2 – Kërçovë 2 – Prilep 1

Gjatë 24 orëve u regjistruan 8 viktima : dy pacientë nga Shkupi, dy pacientë nga Gostivari, një pacientë nga Prilepi, një pacientë nga Struga dhe një pacientë nga Kërçova.

Sot, Instituti i Shëndetit Publik regjistroi 42 pacientë të rikuperuar në: Shkup 27 – Prilep 8 – Veles 3 – Koçan 2 – Shtip 1 – Tetovë 1.

Deri më tani, gjithsejtë janë kryer 81,604 teste për Covid-19.

Numri i përgjithshëm i rasteve të diagnostikuara në vendin tonë që nga fillimi i epidemisë është 8623, numri i pacientëve të rikuperuar është 4603 numri i atyre që humbën jetën është 401 dhe aktualisht numri i rasteve aktive në vend është 3619.

Tregoni kujdes me respektimin e rregullave sepse shkujdesja e vërejtur favorizon përhapjen e virusit, i cili po prek çdo moshë, pa dallim, si pasojë, rritja e numrit të të infektuarve.

Përdoreni maskën kudo në ambientet e mbyllura, kur hyni në supermarket, në dyqane, në zyrë dhe në çdo ambient publik ku nuk mund të ruani distancën.

Sipas rezultateve të fundit jozyrtare të Komisionit Shtetëror të Zgjedhjeve, prej 3,421 vendvotimeve të përpunuara nga gjithsejt 3,480 vendvotime, koalicioni i udhëhequr nga LSDM “Mozeme” fitoi 46 vende, ndërsa VMRO-DPMNE dhe koalicioni 44, BDI fitoi 15 vende, Aleanca për Shqiptarët me Alternativa – 12, dhe PDSH 1 vend në Parlament.

Në zgjedhjet e dhjeta parlamentare, të cilat zgjatën për tre ditë në kushtet e tanishme të pandemisë aktuale të koronavirusit, të drejtën e votës e ushtruan rreth 923 mijë qytetarë ose afërsisht 51% e votuesve të regjistruar në Listën e Votuesve.

Në Maqedoninë e Veriut në mesnatë hyri në fuqi heshtja elektorale për zgjedhjet e parakohshme parlamentare pas fushatës 20 ditëshe. Prej pandemisë votimi realizohet në tri ditë dhe me masa sigurie.

Më 13 korrik votojnë personat e infektuar me korona virusin e ri dhe ata që janë të izoluar për shkak të virusit. Një ditë më pas më 14 korrik do të votojnë të sëmurët e tjerë, të burgosurit dhe personat që jetojnë në strehimoret për të moshuar, ndërsa dita kryesore e zgjedhjeve do të jetë të mërkurën më 15 korrik. Vendvotimet do të jenë të hapura deri në orën 21:00 ndryshe nga e kaluara kur janë mbyllur në ora 19:00.

Zgjedhje në kushte specifike

Mbi 1.8 milionë votues janë thirrur të japin votën e tyre për 15 koalicione dhe parti politike që konkurojnë për 120 mandate të parlamentit. Këto janë zgjedhjet më specifike që deri tani janë organizuar në vend duke  marrë parasysh gjendjen me koronavirusin dhe masat që duhet të respektohen, si nga ana e qytetarëve me mbajtje të maskës, mbajtje të distancës, ashtu edhe nga ana e anëtarëve të këshillave zgjedhorë, vëzhguesve dhe gjithë atyre që janë të përfshirë në procesin  votimit.

Të drejtën e votës e shfrytëzojnë edhe personat të prekur nga Covid-19

Komisionet zgjedhore komunale kanë pranuar 716 kërkesa nga persona pozitivë me korona virusin ose në vetizolim për votim, që do të realizohet (13.07) si pjesë e zgjedhjeve të parakohshme parlamentare më 15 korrik. Këtë proces të votimit po e realizojnë këshilla të veçantë zgjedhorë të përbërë prej tre punonjësve shëndetësorë dhe përfaqësues të partive politike.

Protokoll i veçantë për votim

Votimi i të sëmurëve me Covid-19 dhe personave të cilët janë në vetizolim zhvillohet sipas protokollit të veçantë të konfirmuar shëndetësor për mbrojtje. Të drejtën e votës mund ta realizojnë 716 persona, të cilët u paraqitën në KSHZ. Ata votojnë në shtëpitë e tyre. Këshillat e veçantë zgjedhor, që shkojnë për ta realizuar votimin në shtëpitë e personave të cilët janë pozitiv të Covid-19 dhe janë në izolim shtëpie para nisjes përgatiten me pajisje personale mbrojtëse e cila përbëhet nga: manteli për një përdorim, dorezat për një përdorim, maska mbrojtëse standarde kirurgjike dhe mjete për dezinfektim. Personi i cili voton patjetër e ka të mbajë maskë në pjesën e hundës dhe gojës.Gjatë dhënies së letërnjoftimit, votuesi e zbret maskën për pak kohë për identifikim dhe e mban distancën e rekomanduar nga anëtarët e këshillit zgjedhor. Në të gjithë procesin e votimit duhet të sigurohet distancë e detyrueshme prej 1,0-1,5 metra.

Të martën do të votojnë të sëmurët, të pafuqishmit, të sëmurët kronikë, personat në burgje, ata në shtëpitë e pleqve dhe ata nën arrest shtëpie.

Në këto zgjedhje nuk do të mbahet votimi në diasporë, sepse gjatë paraqitjes e cila ndodhi para shpalljes të gjendjes së jashtëzakonshme nuk u paraqitën numër i mjaftueshëm i votuesve. Megjithatë, mërgimtarët do të mund të votojnë nëse kanë udhëtuar për në vendlindje me dokumentacion të vlefshëm.

dw