Në samitin mbi klimën që po mbahet në Glasgou të Skocisë presidenti amerikan u zotua për një angazhim të ri të guximshëm nga Shtetet e Bashkuara: një reduktim prej 50 deri në 52 për qind të emetimit të gazrave karbonike deri në vitin 2030, objektiv ky që e vendos Uashingtonin në rrugën e duhur drejt reduktimit në zero të emetimit deri në vitin 2050.

“Rruga që kemi përpara është shumë e qartë. A do të reagojmë, a do të bëjmë atë që është e nevojshme, a do ta shfrytëzojmë mundësinë që kemi para vetes, apo do të shohim gjeneratat e ardhshme teksa vuajnë. Kjo është dekada që do të përcaktojë përgjigjen. Shkenca është e qartë. Kemi vetëm një dritare të vogël para vetes, e cila po ngushtohet, për të rritur ambiciet dhe përmbushur detyrimin”, thotë Presidenti Biden.

Ndër çështjet kryesore në programin e konferencës së Kombeve të Bashkuara mbi klimën janë përfundimi i rregulloreve për mekanizmat e tregut të Marrëveshjes së Parisit dhe premtimet e paplotësuara nga vendet e pasura për të ndihmuar financiarisht vendet në zhvillim në luftën ndaj sfidave që lidhen me klimën.

Konferenca vjen në një kohë kur bota po përballet me një seri katastrofash natyrore, si përmbytje dhe zjarre, të shkaktuara nga ndryshimet e klimës.

“Ndryshimet e shpejta klimatike po alarmojnë botën mbi domosdëshmërinë e marrjes së masave, për të adresuar humbjet dhe dëmet dhe që ngrohja globale të mbahet në 1.5 gradë Celsius. Ne e dimë se kjo konferencë është shpresa jonë e vetme për ta arritur këtë. E di se kemi një program të paprecedent për të negociuar, por besoj se do të arrihen rezultate”, thtë Alok Sharma, president i konferencës.

Samiti për klimën pason takimin e udhëheqësve të G20-ës në Romë, ku përfaqësuesit e vendeve u pajtuan që të punojnë për arritjen e neutralitetit të karbonit nga mesi i shekullit dhe u zotuan që deri në fund të vitit të ndërpresin financimin e termocentraleve me qymyr në vende tëp tjera, por ata nuk ranë dakord për eliminimin graduale të qymyrit në vendet e tyre.

dw

Mediat lokale në Majami raportuan se ylli i rrokut Jon Bon Jovi u detyrua të anulojë një koncert të shtunën disa minuta para se të dilte në skenë pasi doli pozitiv nga testimi për COVID-19.

Një stacion televiziv i Majamit tha se një zëdhënës i këngëtarit plotësisht të vaksinuar i tha audiencës të shtunën në mbrëmje se Bon Jovi kishte rezultuar pozitiv pasi ai dhe anëtarët e grupit të tij bënë testet e shpejta. Zëdhënësi tha se ylli i muzikës rock “ndihet mirë”, por se nuk do të luante në skenë dhe se ishte nisur për t’u çlodhur.

Grupi raportohet se ka qëndruar dhe ka luajtur për turmën pa këngëtarin kryesor.

Nuk pati asnjë fjalë nëse koncerti do të caktohej për t’u zhvilluar sërish në një datë tjetër.

Bon Jovi mori pjesë në fushatat e shërbimit publik vitin e kaluar duke inkurajuar njerëzit të mbajnë maska dhe të praktikojnë distancimin shoqëror.

Më herët të hënën, Sekretari i Përgjithshëm i OKB-së Antonio Guterres tha se më shumë se 5 milionë vdekje nga COVID-19 ishte “një turp global” dhe një kujtesë se shumica e botës po “dështon” nga pabarazia e vaksinave.

Mbi 5 milionë njerëz në të gjithë botën kanë humbur jetën si pasojë e COVID-19-ës. Qendra që monitoron dhe informon publikun mbi situatën lidhur me pandeminë, në universitetin “John Hopkins”, e njoftoi shifrën e zymtë ditën e hënë.

Vetëm disa muaj më parë, në qershor, numri i të vdekurve si pasojë e pandemisë së koronavirusit arriti në 4 milionë.

Shifra e re vjen ndërsa disa vende vazhdojnë të hasin vështirësi në sigurimin e vaksinave, në një kohë kur një pjesë ka nisur të vaksinojë popullsinë me dozën përforcuese.

Në një letër të hapur, drejtuar udhëheqësve të vendeve anëtare të Grupit të Njëzetëshes, që u takuan në Romë, Organizata Botërore e Shëndetësisë vinte theksin tek pabarazia në shpërndarjen e vaksinave mes vendeve të pasura dhe atyre me të ardhura të ulëta.

“Hendeku aktual demonstron një mospërfillje për jetën e më të varfërve dhe më të pambrojturve në botë“, thuhej në deklaratë.

“Për çdo 100 persona në vendet me të ardhura të larta, janë ofruar 133 doza vaksinash, ndërsa në vendet me të ardhura të ulëta, vetëm 4 doza për 100 persona”.

Në letrën e OBSH-së thuhej se pabarazia në shpërndarjen e vaksinave po merr çdo ditë jetë njerëzish dhe vazhdon të rrezikojë të gjithë.

“Historia dhe shkenca e bëjnë të qartë: veprimi i koordinuar me qasje të barabartë në burimet e shëndetit publik është mënyra e vetme për t’u përballuar me plagë globale të shëndetit publik si COVID-19. Ne kemi nevojë për një shtytje të fortë e kolektive për të shpëtuar jetë, për të zvogëluar vuajtjet, si dhe për të siguruar një rimëkëmbje të qëndrueshme globale”, thuhet më tej në deklaratën e OBSH-së.

voa

Në Konferencën Botërore të Klimës që po zhvillohet në Glasgou të hënën vështrimi drejtohet tek takimi i krerëve të shteteve dhe qeverive nga e gjithë bota. Sinjalet para konsultimeve nuk kanë qenë shumë shpresëdhënëse.

“Ora është një 1 minutë para mesnate dhe ne duhet të veprojmë tani”, kërkon kryeministri i vendit mikpritës, Boris Johnson, sipas fragmenteve të publikuara para fjalimit të tij në Konferencën Botërore të Klimës, (COP26) në Glasgoun britanik. Njerëzimi për një kohë të gjatë ka luajtur me kohën për sa i përket klimës. Në listën e atyre që do të marrin fjalën në Glasgou krahas kryeministrit britanik, është edhe Sekretari i Përgjithshëm i OKB-së, Antonio Guterres, presidenti amerikan, Joe Biden, ai francez, Emmanuel Macron dhe krerë të BE. Për Gjermaninë kancelarja Merkel do të japë një statement përmes videos në këtë konferencë. Në këtë konferencë mungojnë dy presidentë të dy vendeve që janë emetues të mëdhenj të gazrave karbonikë, presidenti kinez, Xi Jinping dhe ai rus, Vladimir Putin. Me shumë interes pritet të hënën, nëse presidenti i Indisë, Narendra Modi do të bëjë të ditur objektiva ambiciozë të klimës për vendin e tij, kjo mund të rrisë presionin ndaj Kinës.

Jo sinjal i fortë nga Roma

Fundjavën që kaloi në takimin e 20 vendeve më të industrializuara në Romë, vende përgjegjëse për një pjesë të madhe te emetimeve dëmtuese për klimën, u arrit vetëm një konsensus minimal: Vërtet që u përforcua premtimi për kufizimin e ngrohjes globale mundësisht në 1,5 gradë krahasuar me periudhën paraindustriale, por nuk u dha një datë e caktuar për këtë.

Edhe në drejtim të mosemetimit të CO2-it nuk pati një ujdi mes shteveve të G20-s. Sipas deklaratës së samitit, ky objektiv duhet të arrihet “deri në mesin apo fundin e shekullit”. Në samit pati shumë kundërshtime nga vendet në ekspansion dhe shtetet me prodhim të madh të energjisë nga lëndët fosile.

Aktivistët e klimës i kritikuar rezultatet e samitit si të pamjaftueshme. Edhe Sekretari i Përgjithshëm i OKB-së, Antonio Guterres u tregua i pakënaqur. “Po largohem nga Roma me shpresa të papërmbushura, por të paktën ato nuk janë varrosur”, shkroi Guterres në twitter. Kurse kryeministri britanik, Boris Johnson u shpreh, se “nëse dështon Glasgou, dështon e gjitha.”

Gjermania dëshiron të jetë urëndërtuese

Ministrja gjermane e Mjedisit në detyrë, Svenja Schulze e shikon Gjermaninë në Konferencën Botërore të Klimës në rolin e një urëndërtueseje. “Ne kemi ekspertizën, përvojën, dhe bazën e një përvoje, që mund të bëjë të mundur progresin në konferenca të tilla”, tha Schulze për gazetën gjermane “Rheinische Post”. Gjermania mund të ndihmojë vendet e tjera në luftë kundër ndryshimit të klimës financiarisht dhe me përvojën e saj. Schulze thekson, se Gjermania në këtë konferencë shkon me një objektiv shumë të fortë dhe ligjërisht të detyrueshëm në këtë konferencë. “Ne duam të jemi neutral ndaj klimës në vitin 2045, pra pesë vite më herët se BE.”

Në hapjen e konferencës COP26 në Glasgou, e ngarkuara e OKB-së për klimën, Patricia Espinoza u shpreh të dielën, se “nëse vazhdohet edhe më tej kështu”, në drejtim të emetimit të gazrave karbonikë, kjo do të thotë “investim në shuarjen tonë”. Kreu i presidencës britanike të COP26, Alok Sharma tha se dritarja për arritjen e objektivit të kufizimit të ngrohjes globale në 1,5 gradë po mbyllet. “Kjo konferencë ndërkombëtare duhet të ofrojë zgjidhje.”

Përgjysmim i emetimeve

Sipas ekspertëve, objektivi i kufizimit të ngrohjes globale në 1,5 gradë mund të arrihet vetëm atëherë, nëse përgjysmohen emetimet botërore të gazit karbonik CO2 në fund të këtij dhjetëvjeçari, dhe më së voni bota në vitin 2050 është neutrale ndaj klimës. Sipas të dhënave të fundit të Kombeve të Bashkuara, Toka po shkon drejt një ngrohjeje globale në 2,7 gradë në këtë shekull.

la/wa/sti (afp, dpa, epd)