Në seancën plenare të Parlamentit Evropian të mërkurën do të votohen raportet për Kosovën, Serbinë dhe Bosnjë e Hercegovinën, që ishin miratuar para një muaji në Komisionin e Politikës së Jashtme. Votimi pason debatin e zhvilluar të martën mbrëma në PE për këto raporte.

Gjatë debatit, sa i përket Kosovës dominuan thirrjet që të liberalizohen vizat dhe të ketë përparim në dialogun me Serbinë, që ndërmjetësohet nga Bashkimi Evropian.

Raportin për Kosovën e ka përgatitur deputetja gjermane, Viola von Cramon. Gjatë fjalimit në debatin e 5 korrikut, von Cramon tha se mirëpret qëndrimet e Kosovës rreth luftës në Ukrainë dhe bëri thirrje edhe një herë që të liberalizohen vizat për qytetarët e Kosovës.

“Qytetarët e Kosovës janë të vetëdijshëm po ashtu se unë personalisht dhe Parlamenti Evropian kemi ngritur vazhdimisht nevojën për liberalizimin e menjëhershëm të vizave, gjë që është zgjatur së tepërmi përkundër faktit se Kosova i ka plotësuar të gjitha kushtet”, tha von Cramon.

Me përjashtim të disa deputetëve nga radhët e të djathtës ekstreme, shumica e ligjvënësve kanë mbështetur liberalizimin e vizave për Kosovën dhe kjo do të jetë edhe në versionin përfundimtar të tekstit të raportit që do të votohet të mërkurën.

Teksti pritet të mbetet pak a shumë ashtu siç ishte miratuar në Komisionin e Politikës së Jashtme. Në seancë plenare, sipas deputetëve, do të jetë sfidues vetëm votimi rreth një amendamenti ku kërkohet që marrëveshja gjithëpërfshirëse mes Kosovës dhe Serbisë, që duhet të dalë nga dialogu, të përfshijë edhe njohjen e ndërsjellë.

Kjo kërkesë ishte miratuar në Komisionin e Politikës së Jashtme edhe pse këtë e kishte kundërshtuar raportuesi për Serbinë, Vladimir Biliçik, i cili është nga Sllovakia, shtet që nuk e njeh pavarësinë e Kosovës.

Tani ka përpjekje që formulimi që përfshin njohjen e ndërsjellë të hiqet gjatë votimit në seancën plenare.

Në tekstin e raportit po ashtu përsëritet thirrja që pesë vendet e BE-së që nuk e njohin Kosovën, ta bëjnë një gjë të tillë.

Pesë shtetet e BE-së që nuk e njohin Kosovën janë: Spanja, Sllovakia, Rumania, Qipro dhe Greqia.

Nga Serbia në raport do të kërkohet që të mbështet qëndrimet e BE-së ndaj Rusisë dhe agresionit ndaj Ukrainës, përfshirë edhe sanksionet që Bashkimi Evropian i ka vendosur kundër Moskës.

Serbia është i vetmi shtet në rajon që nuk ka vendosur sanksione ndaj Moskës, pas nisjes së pushtimit të Ukrainës.

Ndryshe, rezoluta të tilla të Parlamentit Evropian, që në formën e raporteve individuale për vendet e rajonit të Ballkanit Perëndimor miratohen një herë në vit, kanë një rëndësi politike, por ato nuk janë obliguese për vendet anëtare të BE-së.

rel

Kryeministri i Kosovës shpreson që Procesi i Berlinit do të rinisë këtë vjeshtë nga kancelari gjerman, Olaf Scholz. Sipas Kurtit Kosova beson te ky paralajmërim i Gjermanisë.

Kryeministri i Kosovës, Albin Kurti, është i bindur dhe shpreson shumë që procesi i Berlinit që përfshin vendet e Ballkanit Perëndimor, do të rifillohet nga kancelari i Gjermanisë Olaf Scholz. Kurti tha se zgjidhja për Ballkanin Perëndimor është Bashkimi Evropian dhe se drejt arritjes së këtij qëllimi duhet “Procesi i Berlinit 2.0”.

Këtë deklaratë kryeministri i Kosovës e bëri  nga Greqia ku po merr pjesë në konferencën “Evropa Juglindore – a mund të ketë stabilitet dhe prosperitet në rajon?”,  organizuar nga Qeveria e Greqisë dhe “The Economist”.

“Unë besoj se me presidentin Joe Biden në Shtëpinë e Bardhë dhe me kancelarin Scholz në Berlin, ne mund të ringjallim urën transatlantike, e cila në shekullin 21-të është edhe më e rëndësishme sesa në shekullin e 20-të. Procesi i Berlinit 2.0, nëse mund ta quajmë kështu, mund të sjellë një valë që mund t’i shtyjë përpara të gjitha anijet në Ballkanin Perëndimor, kryesisht disa nisma, programe të modeluara sipas EFTA EEA, diçka të ngjashme sikurse Norvegjia, Lihtenshtajni, Zvicra dhe Islanda kanë me BE-në, komitete dhe këshilla të përbashkët, mekanizma vëzhgimi, gjykatë të përbashkët me BE-në si vlerë dhe mekanizëm, jo jashtë BE-së”, tha Albin Kurti gjatë diskutimit në këtë konferencë.

Gjermania prioritet ndihmën për shtetet e Ballkanit Perëndimor

Kancelari i Gjermanisë Olaf Scholz, gjatë vizitës së tij në Kosovë me 10 qershor, tha se Qeveria gjermane e ka vendosur si prioritet ndihmën për shtetet e Ballkanit Perëndimor që të përafrohen me Bashkimin Evropian dhe në këtë linjë ai tha se këtë vit do ta rijetësojë procesin e Berlinit me një takim në vjeshtë.

“Rajoni duhet të përparojë referuar krijimit të një tregu të përbashkët rajonal dhe katër marrëveshjet e rëndësishme për lëvizjen e lirë, të njerëzve, për njohjen e diplomave profesionale që duhet të lidhen shpejt”, tha kancelari Scholz.

Nga ana e saj qeveria e Kosovës vazhdon ta refuzojë nismën tjetër rajonale “Open Ballkan”, ndërsa sipas kryeministrit të Kosovës “Procesi i Berlinit do të përshpejtojë reformat dhe do t’i sjellë gjashtë shtetet e Ballkanit më pranë bllokut evropian”.

Procesi i Berlinit është një nismë e iniciuar në vitin 2014 nga kancelarja e atëhershme e Gjermanisë, Angela Merkel dhe ky proces ka në fokus ka lëvizjen e lirë të njerëzve, të shërbimeve, mallrave dhe kapitalit. Procesi i Berlinit përfshin të gjashtë vendet e Ballkanit Perëndimor: Kosovën, Shqipërinë, Serbinë, Malin e Zi, Maqedoninë e Veriut dhe Bosnjë e Hercegovinën. Me nismën e Gjermanisë, shtetet pjesëmarrëse në procesin e Berlinit janë: Gjermania, Austria, Bullgaria, Kroacia, Franca, Greqia, Polonia, Sllovenia dhe Italia.

dw

Një delegacion i Korporatës amerikane Sfidat e Mijëvjeçarit, diskutoi të martën me autoritetet në Prishtinë mbi zbatimin e programit 202 milionë dollarësh të kësaj korporate për energjinë, i cili u miratua ditë më parë. Programi 5 vjeçar parasheh investime në infrastrukturën energjetike.

Drejtoresha për Kosovën e Korporatës amerikane, Sfidat e Mijëvjeçarit (MCC), Sarah Olmstead, tha të martën se programi prej 202 milionë dollarësh i miratuar ditë më parë me qeverinë e Kosovës, po ndodh në kohën e duhur kur bota po përballet me krizë energjetike, të nxitur edhe nga agresioni rus në Ukrainë.

Ajo i bëri këto komente pas takimit të bordit të kësaj korporate me autoritetet në Prishtinë.

“Të gjithë e dimë se sektori i energjisë në Kosovë dhe në tërë rajonin është në një situatë mjaft të vështirë, për shkak të krizës me energjinë në Evropë dhe luftës, prandaj do t’u bëja thirrje të gjithëve që të shfrytëzojnë këtë moment dhe të punojnë së bashku për të përshpejtuar procesin e përfitimit që do të kenë njerëzit në Kosovë nga ky investim”, tha ajo.

Ministrja e Ekonomisë, Artane Rizvanolli, tha se ky program paraqet investimin më të madh në historinë e Kosovës, që sipas saj edhe një herë dëshmon për partneritetin dhe miqësinë e thellë me Shtetet e Bashkuara të Amerikës.

“Ky program do të sjellë në Kosovë rezerva të energjisë nëpërmjet baterive të kapacitetit të lartë, rreth 347 megavat orë rezerva, të cilat do të kryejnë funksionin e stabilizimit të frekuencave të rrjetit si dhe shfrytëzimit të energjisë së ruajtur gjatë natës – në orët më të ngarkuara gjatë ditës, që do të thotë ulje të importit të shtrenjtë të energjisë”, tha zonja Rizvanolli.

Ajo tha se programi do të përqendrohet edhe në zhvillimin e shkathtësive të fuqisë punëtore, posaçërisht grave, ndërsa do t’ia kursej Kosovës rreth 15 milionë euro në vit.

“Programi kompakt do të mundësojë një tranzicion të shpejtë dhe të drejtë energjetik në Kosovë në një të ardhme me energji të ripërtërishme. Strategjia e energjisë, siç e dini, parasheh instalimin e së paku një mijë 400 megavatëve kapacitete të energjisë diellore dhe të erës të cilat do të kyçen në rezerva për t’u shfrytëzuar në kohërat kur nuk kemi diell ose erëra të mjaftueshme, me anë të baterive që do t’i blejmë përmes këtij programi”, tha ajo.

Zonja Olmstead, tha se përfshirja e grave në sektorin e energjisë dhe në përgjithësi në tregun e punës në Kosovë është shumë e rëndësishme.

“Mendoj se nuk është befasi për askënd këtu që Kosova ka një ndër shkallët më të ulta në botë të pjesëmarrjes së grave në tregun e punës, dhe luftimi i pengesave që po i mbajnë gratë jashtë tregut të punës është shumë me rëndësi, në mënyrë që t’u mundësohet të gjithëve të përfitojnë nga zhvillimet në sektorin e energjisë në Kosovë dhe rajon”, tha ajo.

Programi ‘kompakt’ ka vlerën e 202 milionë dollarëve që nuk duhet të kthehen, ndërkaq qeveria e Kosovës investon rreth 35 milionë euro në të. Programi 5 vjeçar synon nxitjen e rritjes së qëndrueshme dhe gjithëpërfshirëse të ekonomisë së Kosovës.

Marrëveshja u negociua gjatë pranverës dhe pasoi një periudhë debatesh pas vendimit të muajit shtator të vitit të kaluar të qeverisë së Kosovës për t’u tërhequr nga projekti i propozuar nga kjo korporatë, i cili parashihte lidhjen e Kosovës me një gazsjellës ekzistues me Maqedoninë e Veriut.

Korporata Sfidat e Mijëvjeçarit është një agjenci e pavarur e qeverisë amerikane që punon për të zvogëluar varfërinë në botë përmes rritjes ekonomike. E themeluar në vitin 2004, MCC-ja ofron ndihmë të kufizuar në kohë për vendet që përmbushin standardet e rrepta për qeverisje të mirë, luftën kundër korrupsionit dhe respektimin e të drejtave demokratike.

voa

Rexhep Qosja thërret me zë për rikthim drejt vlerave etike.

Ai e orienton thirrjen e tij sidomos ndaj veprimtarëve, intelektualëve dhe qytetarëve. Dhe këtë gjë e bën në një mënyrë tepër të rrallë: “Në Greqinë e lashtë, në kohën e Homerit, rreth zjarrit të ndezur në nderim të heroit të rënë në luftë ecnin shokët, miqtë dhe adhuruesit e tij, duke hedhur në zjarr të gjitha ato që i donin më së shumti: kush kalin, kush robin e kush vetveten…”

së shpejti artikulli i plotë…

koha