Shpërthimet tronditën shumë qytete anembanë Ukrainës të hënën, përfshirë sulme me raketa në Kiev për herë të parë pas disa muajsh, disa orë pasi presidenti rus Vladimir Putin e quajti një “akt terrorist” të organizuar nga shërbimet e posaçme të Ukrainës shpërthimin e së shtunës në urën që lidh Rusinë me territorin e aneksuar të Krimesë.

Rostyslav Smirnov, një këshilltar i ministrisë së Brendshme të Ukrainës tha se sipas informacioneve paraprake, të paktën tetë persona u vranë dhe 24 u plagosën në vetëm një nga sulmet në Kiev.

Kryebashkiaku Vitali Klitschko tha se shpërthime u raportuan në lagjen Shevchenko të qytetit, një zonë e madhe në qendër të Kievit që përfshin qytetin e vjetër historik si dhe disa zyra qeveritare.

Lesia Vasylenko, një deputete e parlamentit të Ukrainës, postoi një fotografi duke treguar se të paktën një shpërthim ndodhi pranë ndërtesës kryesore të Universitetit Kombëtar të Kievit në qendër të qytetit.

Gjetiu Rusia shënjestëroi zonat civile dhe infrastrukturën energjetike ndërsa sirenat e alarmit për sulme ajrore u dëgjuan gjithandej Ukrainës, përveç Krimesë së aneksuar nga Rusia, për katër orë rresht.

Gazetarët e agjencisë së lajmeve Associated Press në qytetin Dnipro, panë trupa të shumë njerëzve të vrarë në një zonë industriale në periferi të qytetit.

Mediat ukrainase raportuan gjithashtu për shpërthime në një numër zonash tjera përfshirë qytetin perëndimor të Lvivit që është një strehë për shumë njerëz që ikin nga luftimet në lindje, si dhe në Kharkiv, Ternopil, Khmelnytskyi, Zhytomyr dhe Kropyvnytskyi.

Sulmet e shumëfishta ndodhën disa orë përpara se presidenti rus Vladimir Putin të zhvillojë një takim me këshillin e tij të sigurisë, teksa lufta e Moskës në Ukrainë po i afrohet momentit historik tetëmuajsh dhe forcat ruse përjetuan tërheqje poshtëruese nga fushëbetejat në zonat që po përpiqet t’i aneksojë nga një kundërsulm ukrainas javët e fundit.

Një ditë më parë, Vladimir Putini e cilësoi sulmin në urën e Kerçit në Krime një akt terrorist të kryer nga shërbimet e posaçme ukrainase. Në një takim të dielën me kryetarin e Komitetit Hetues të Rusisë, ai tha se “nuk ka dyshim se ishte një akt terrorist më synim shkatërrimin e infrastrukturës civile jashtëzakonisht të rëndësishme”.

Në mes të sulmeve, presidenti ukrainas Volodymyr Zelenskyy tha në llogarinë e tij në rrejtin Telegram se Rusia “po përpiqet të na shkatërrojë dhe të na zhdukë nga faqja e dheut”.

Ministri i Jashtëm Dmytro Kuleba shkroi se “taktika e vetme e Putinit është terrori mbi qytetet paqësore të Ukrainës, por ai nuk do ta shkatërrojë Ukrainën. Kjo është gjithashtu përgjigja e tij ndaj të gjithë atyre që duan të flasin me të për paqen: Putin është një terrorist që flet me raketa”, shkroi ai.

voa

Ministria e Jashtme e Gjermanisë i bëri thirrje Bashkimit Evropian që të marrë vendim për t’u ndaluar hyrjen në vendet e bllokut, si dhe ngrirje të pronave, atyre që janë përgjegjës për shtypjen brutale të protestave antiqeveritarë në Iran.

Protestat më të qëndrueshme ndër vite kundër teokracisë së Iranit kanë hyrë tashmë në javën e katërt të tyre. Ato shpërthyen më 17 shtator, pas vdekjes së 22-vjeçares Mahsa Amini, një vajze kurde, e cila vdiq në paraburgim. Mahsa Amini u arrestua nga e ashtuquajtura policia e moralit, nën dyshimet se kishte shkelur kodet e rrepta islame për veshjen e grave e vajzave.

Protestat janë përhapur tashmë në të gjithë vendin dhe po përballën me një goditje të ashpër, që sipas vlerësimeve ka shkaktuar dhjetëra të vrarë e qindra të arrestuar.

“Ata që rrahin gratë dhe vajzat në rrugë, e ndalojnë në mënyrë arbritrare ata që veçse kërkojnë të jetojnë të lirë duke i dënuar me vdekje, qëndrojnë në anën e gabuar të historisë“, citohet të ketë thënë ministrja e Jashtme gjermane Annalena Baerbock për gazetën ‘Bild am Sonntag’.

“Ne do të bëjmë të mundur që BE-ja t’u ndalojë hyrjen atyre që janë përgjegjës për këtë shtypje brutale e të ngrijë pronat e tyre në BE”, shtoi ajo. “U themi njerëzve në Iran: Ne qëndrojmë dhe mbetemi pranë jush“.

Por zonja Baerbock nuk përmendi ndonjë individ apo organizatë specifike që Gjermania kërkon të ndëshkohet përmes sanksionesh.

Të enjten, ligjvënësit e BE-së miratuan një rezolutë ku kërkohej vendosja e sanksioneve kundër përgjegjësve për vdekjen e Mahsa Aminit dhe për shtypjen e dhunshme të protestave.

voa

Një zjarr i fuqishëm që shpërtheu në urën mes Krimesë dhe territorit shtetëror rus ndërkohë është shuar, por ka pasur dëme të rënda. Njoftohen shpërthime edhe në Karkiv.

Pas një shëprthimi u shkaktua një zjarr i fuqishëm në urën, e cila që nga viti 2018 ndërlidh territorin shtetëror rus me gadishullin e Krimesë të aneksuar nga Moska përkundër së drejtës ndërkombëtare. Zjarri, sipas të dhënave të Ministrisë ruse për Mbrojtjen Civile, ndërkohë është shuar. Dëmet e shkaktuara në kompleksin e shinave dhe në korsitë e automjeteve përgjatë urës janë masive. Mediet e afërta me Kremlinin publikuan video, në të cilat shihen pjesë nga korsitë e rëna në ujë. Në segmentin hekurudhor shihen disa vagonë të djegur të një treni mallrash, që transportonte naftë.

Komiteti rus i anti-terrorit deklaroi, se sipas të dhënave paraprake në një kamion që ndodhej mbi urë ka shpërthyer një bombë. Nga shpërthimi ka rënë zjarr në vagonët e trenit të mbushur me karburant. Automjeti, sipas këtyre të dhënave, vinte nga territori rus dhe udhëtonte në drejtim të zonës bregdetare Kerç të Krimesë.

Harku i urës, që lidh ngushticën detare të Kerçit, nuk është dëmtuar, bëhet e ditur më tej. Ura e ndërtuar me shina dhe korsi, me udhëzimin e kreut të shtetit Vladimir Putin, shërben ndërkohë kryesisht për transportin e mjeteve ushtarake për forcat ruse në Ukrainë.

Këshilltari i presidentit ukrainas bën fjalë për një “fillim”

Këshilltari i presidentit ukrainas, Myhajlo Podoljak, përmes twitterit deklaroi duke përdorur shprehjen, ky është “fillimi”. Ai nuk vendos në një kontekst zjarrin në urën e Krimese, por shkruan më tej: “Gjithçka ilegale duhet të shkatërrohet, gjithçka e vjedhur duhet t’i kthehet Ukrainës, gjithçka pushtuese nga Rusia, duhet dëbuar.”

Gazeta ukrainase në internet Ukrajinska Pravda duke iu referuar qarqeve të sigurisë në Kiev raporton, se Shërbimi Sekret SBU qendron pas “operacionit special”. SBU nuk e konfirmoi këtë, por publikoi si edhe shumë faqe të tjera zyrtare në Ukrainë në rrjetet sociale regjistrime nga ura duke u djegur duke postuar edhe një vjershë.

Putini udhëzoi hetim zyrtar të rastit. Kremlini në Moskë më parë herë pas here ka paralajmëruar me theks të veçantë nëse ndërmerret ndonjë sulm ndaj urës 19 km e gjatë duke kërcënuar, që në një rast të tillë do të shënjestrohet qendra e komandës në Kiev.

Shpërthime në Karkiv

Një seri shpërthimesh kanë tronditur të shtunën (08.10) në mëngjes në qytetin lindor të Ukrainës Karkiv. Sikurse njofton agjencia e lajmeve AP, shtëllunga gjigante tymi u ngjitën në qiell. E sipas këtyre informacioneve ka pasuar një seri shpërthimesh.

Sipas të dhënave të kryebashkiakut të Karkivit, Ihor Terehov, janë hedhur raketa në qendër të qytetit. Shpërthimet kanë shkaktuar zjarre në një institucion mjekësor të qytetit dhe në një godinë jo banimi. Nuk është bërë e ditur deri tani nëse ka të plagosur.

se/AR/cw (ap, dpa, rtr, afp)

Një zjarr gjigant i shkaktuar nga një makinë bombë ka shpërthyer në një urë kyçe që lidh Krimenë me Rusinë, një territor që Moska e aneksoi në vitin 2014. Lajmi u njoftua të shtunën nga autoritetet ruse, por ata nuk fajësuan menjëherë Ukrainën lidhur me ngjarjen.

Ura, e cila shërben për transport rrugor dhe hekurudhor, është ndërtuar me urdhër të Presidentit rus Vladimir Putin dhe u inaugur në vitin 2018. Ajo shërbente si një pikë kyçe për transportin e pajisjeve ushtarake dhe trupave ruse që luftonin në Ukrainë.

Ura është vendkalimi i vetëm mes territorit të okupuar të Krimesë dhe Rusisë.

Agjencitë ruse të lajmeve duke iu referuar Komitetit kundër Terrorizmit thanë se makina-bombë shkaktoi gjithashtu shpërthimin e shtatë cisternave me naftë që po transportoheshin për në Krime.

Zëdhënësi i Kremlinit tha se presidenti Putin kishte urdhëruar krijimin e një komisioni për të hetuar ngjarjen.

Kreu i parlamentit rajonal të instaluar nga Rusia në Krime, Vladimir Konstantinov, fajësoi ata që i quajti “vandalët ukrainas”.

Rusia kishte pretenduar më parë se ura ishte e sigurt, pavarësisht luftimeve në Ukrainë, dhe nga ana tjetër kishte kërcënuar Kievin, me hakmarrje nëse ajo sulmohej.

Nëse vërtetohet se pas shpërthimit qëndron Ukraina, kjo do të përbënte një shqetësim serioz për Moskën pasi ura ndodhet larg vijës së frontit të luftës.

Në gadishullin e Krimesë ka pasur disa shpërthime në objektet ushtarake ruse.

Përparimet e fundit të rrufeshme territoriale të Ukrainës në lindje dhe jug të vendit kanë hedhur dyshime mbi pretendimin e Kremlinit për aneksim të Donetskut Luhanskut dhe rajoneve jugore të Zaporizhias dhe Khersonit.

Të katër territoret krijojnë një korridor të rëndësishëm tokësor mes Rusisë dhe gadishullit të Krimesë, dhe së bashku përbëjnë rreth 20% të territorit të Ukrainës.

voa