Udhëheqësit Bashkimit Evropian, u mblodhën sot në Tiranë së bashku me udhëheqësit e vendeve të Ballkanit Perëndimor, në një takim që u mbajt për herë të parë në një vend jo anëtar, duke dëshmuar mbështetjen e fort ndaj perspektivës evropiane të rajonit. Madje në deklaratën në fund të takimit u bë thirrje për përshpejtimin e procesit të anëtarësimit. Nënshkrimi i marrëveshjes për reduktimin progresiv të tarifave roaming, ishte vetëm një hap konkret, ndërsa gjatë takimit të sotëm u ritheksua mbështetja e fortë financiare për përballimin e krizës energjitike në rajon, si dhe u diskutua mbi projekte konkrete që do të ofrojnë më shumë mundësi për të rinjtë e Ballkanit për të studiuar në universitetet evropiane

Asnjëherë më parë udhëheqësit e vendeve të Bashkimit Evropian nuk ishin mbledhur jashtë kufijve të Unionit, siç ndodhi në takimin e sotëm në Tiranë, ku atyre ju bashkuan dhe udhëheqësit e vendeve të Ballkanit perëndimor.

Kryeministri Edi Rama përsëriti se e sheh këtë takim si “një moment historik dhe shenjë të jashtëzakonshme të një vetëdijesimi të faktit që Bashkimi Evropian ka nevojë për Ballkanin Perëndimor, po aq sa ky rajon ka për BE-në”.

Por nëse fjalët e tij mund të tingëllonin subjektive, për faktin se Shqipëria ishte mikpritëse e takimit, me të njëjtat terma u shpreh dhe presidenti i Këshillit Evropian Charles Michel, sipas të cilit “e ardhmja e fëmijëve tanë është me e sigurt dhe më e begatë me Ballkanin Perëndimor në BE”.

Agresioni rus në Ukrainë duke se ka qenë një nxitës i rëndësishëm në një qasje shumë më dinamike të Brukselit ndaj rajonit të Ballkanit. Dhe vetë pika e parë e deklaratës së takimit të sotëm nënvizon se “përshkallëzimi i luftës së agresionit të Rusisë kundër Ukrainës po vë në rrezik paqen dhe sigurinë evropiane dhe globale dhe nënvizon rëndësinë e partneritetit strategjik midis BE-së dhe rajonit të Ballkanit Perëndimor”. Ndërsa mbajtja e takimit në Tiranë, duket një lëvizje e qartë e BE për të dëshmuar se ky rajon i përket Unionit.

Në këtë këndvështrim deklarata vë në dukje se BE-ja i nxit partnerët e Ballkanit Perëndimor “të bëjnë progres të shpejtë dhe të qëndrueshëm drejt përafrimit të plotë me Politikën e Përbashkët të Jashtme dhe të Sigurisë të BE-së (PPJS) dhe të veprojnë në përputhje me të, duke përfshirë edhe me masat kufizuese të BE-së. Ne përgëzojmë ata Partnerë të Ballkanit Perëndimor që po e tregojnë tashmë angazhimin e tyre strategjik në këtë aspekt duke u përafruar plotësisht me PPJS-në e BE-së dhe inkurajojmë ata që nuk e kanë bërë ende të ndjekin shembullin e tyre”, vihet në dukje me një referencë të qartë kryesisht ndaj Serbisë e cila nuk i ka përkrahur sanksionet ndaj Rusisë.

Edhe vetë qasja deri diku e ndrojtur e Brukselit ndaj procesit të zgjerimit, me zvarritje të shumta, mund të marrë një kthesë tjetër, për sa kohë, në deklaratën përfundimtare bëhet thirrje për përshpejtim të tij, pa lënë megjithatë pas dore, plotësimin e kushteve të nevojshme. Dhe në fakt Bashkimi Evropian nënvizon nevojën për “përpjekje të qëndrueshme në luftën kundër korrupsionit dhe krimit të organizuar, për rritjen e mbështetjes për qeverisjen e mirë, për të drejtat e njeriut, barazinë gjinore dhe për të drejtat e personave që u përkasin pakicave”.

Por që procesi të ecë përpara, vendet e rajonit do të duhet të zgjidhin më parë mosmarrëveshjet e ndryshme mes tyre, ku çështje kyçe është normalizimi I marrëdhënieve mes Serbisë dhe Kosovës. “Kjo është kritike për stabilitetin dhe zhvillimin e të gjithë rajonit dhe për të siguruar se Palët munden të vazhdojnë rrugëtimet evropiane përkatëse. Ne përsëritim pritmërinë tonë të fortë që të gjitha marrëveshjet e mëparshme të respektohen plotësisht dhe të zbatohen pa vonesë. Ne i nxitim të dy Palët të angazhohen në mënyrë konstruktive për të zgjidhur të gjitha mosmarrëveshjet dypalëshe dhe mos marrin veprime të njëanshme dhe/ose provokuese që mund të shkaktojnë tensione dhe dhunë dhe retorikë që nuk shpie drejt Dialogut. Ne u kujtojmë të dy Palëve përgjegjësinë e tyre të përbashkët për të siguruar paqen dhe stabilitetin”, thekson deklarata e Takimit të Tiranës.

Ndjeshëm, krahasuar me të kaluarën jo të largët, BE-ja po angazhohet dhe me ndihmë dhe aksione konkrete ndaj vendeve të rajonit. Sot në Tiranë u nënshkrua marrëveshja që mundëson fillimin e reduktimit gradual, deri në shuarjen e plotë të tarifave roaming, brenda vitit 2027. Ndërkohë që u ripohua mbështetja për energjinë, nga njëra anë me një paketë 500 milionë eurosh si ndihmë buxhetore për qeveritë e rajonit, dhe një tjetër paketë 500 milionë euro të tjera, për financimin e projekteve konkrete. Ndërkohë që përmes Planit ekonomik të investimeve, po vijohet me financimin e projekteve të tjera zhvillimore. “Sapo është miratuar një paketë e re me 400 milionë euro në grante nga BE-ja me vlerë investimi prej 1.2 miliardë euro, për të financuar 12 projekte investimesh, ndërkohë që projektet e miratuara po hyjnë në fazën e zbatimit”, bëhet e ditur në tekstin e Deklaratës.

Kryeministri Edi Rama dhe Presidentja e Komisionit Evropian Ursula von der Leyen, njoftuan se universitetet e rajonit do të përfshihen ne Aleancën e arsimit të lartë në Evropë, që do t’u mundësojë të rinjve të studiojnë dhe në universitetet evropiane. Zoti Rama bëri po ashtu të ditur se “diskutuam dhe morëm mbështetjen në parim, për të patur në Tiranë kampusin e Kolegjit të Europës”, i cili ka qendrën në Bryzh të Belgjikës dhe një tjetër kampus në Varshavë të Polonisë.

Gjatë takimit janë diskutuar dhe sfidat e përbashkëta, si ajo e migracionit, ku shifrat përmes së ashtuquajturës rruga e Ballkanit kanë ardhur në rritje.

“Menaxhimi i migracionit mbetet sfidë dhe përgjegjësi e përbashkët, të cilën BE-ja dhe Ballkani Perëndimor do ta trajtojnë së bashku, në partneritet të ngushtë. Në dritën e trysninë së shtuar migratore në rajon, mbështetja e fortë financiare e BE-së përmes programeve të posaçme do t’u mundësojë partnerëve të forcojnë sistemet e azilit dhe të pritjes, të rritin mbrojtjen e kufirit, të luftojnë rrjetet e kontrabandës dhe grupet e krimit të organizuar dhe të shtojnë kthimet nga Ballkani Perëndimor drejt vendeve të origjinës. Në këtë perspektivë, BE-ja ka miratuar një program të ri për forcimin e menaxhimit të kufirit me vlerë 40 milionë euro dhe po përgatit një program të dytë për rritjen e kapaciteteve për luftën kundër kontrabandimit të migrantëve dhe trafikimit të qenieve njerëzore, duke i dhënë vëmendje hetimeve dhe përndjekjes penale, me vlerë 30 milionë euro”, shpjegohet në Deklaratën e Takimit të Tiranës.

voa

Përballë agresionit rus në Ukrainë, kërcënues i paqes dhe sigurisë botërore, BE inkurajoi bashkëpunimin gjeo-strategjik me Ballkanin Perëndimor (BP) në samitin BE-BP që u zhvillua të martën, (06.12) në Tiranë.

Në deklaratën e përbashkët për shtyp, në përfundim të punimeve të këtij samiti, u vlerësua qëndrimi i BP në  linjë me atë të BE,” si një tregues i fortë i qendrimit gjeopolitik të partnerëve, veçanërisht kur Rusia vazhdon konfliktin dhe agresionin e saj në Ukrainë. BE-ja mirëpret vendosmërinë e vendeve partnere në BP për të mbështetur idealet dhe parimet europiane në përputhje me të drejtën ndërkombëtare.”

“Ndërsa zgjerojmë bashkëpunimin tonë me partnerët, ne i nxisim ata të bëjnë përparim të shpejtë dhe të qëndrueshëm drejt harmonizimit të plotë me Politikën e Jashtme dhe të Sigurisë të BE” theksohet në deklaratë. Kancelari gjerman Scholz tha në konferencën e tij për shtyp, se “të gjitha shtetet e BP duhet të mbështesin politikën e jashtme të BE.”

Bashkëpunimi në fushën e sigurisë dhe të mbrojtjes ishte një tjetër fokus i samitit. “BE dhe BP janë të vendosura të forcojnë më tej bashkëpunimin në çështje thelbësore të sigurisë dhe mbrojtjes edhe në nivel operacional. BE do të vazhdojë të punojë së bashku me rajonin për të zhvilluar më tej aftësitë dhe kapacitetet e tij mbrojtëse edhe nëpërmjet Instrumentit Europian të Paqes. BE do të rrisë më tej angazhimin edhe në fusha të tilla si hapësira dhe lëvizshmëria ushtarake”, theksohet në deklaratë.

BE rikonfirmon angazhim të palëkundër ndaj perspektivës europiane të BP

Treguesit konkretë të këtij angazhimi u bënë të njohura nga Presidentit i Këshillit Europian Charles Michel, Presidentja e Komisionit Europian, Ursula von der Leyen dhe Kryeministri Edi Rama, në konferencën e përbashkët për shtyp, në përfunfdim të samitit. “Jam i bindur në mënyrë absolute që e ardhmja e fëmijëve tanë do të jetë e sigurtë dhe më e begatë me Ballkanin Perëndimor në BE, ”, tha Presidenti i Këshillit Europian, Charles Michel në konferencën e përbashkët për shtyp. Ai bëri të njohur “një paketë financiare për të ndihmuar BP në përballimin e pasojave të rënda lidhur me pasojat e luftës në Ukrainë në furnizmin me energji dhe sigurinë ushqimore”.

Presidentja e Komisionit Europian, Ursula von der Leyen, tha në konferencën e përbashkët për shtyp, se ” BE do ta mbështesë BP me një paketë prej 1 miliardë eurosh. 500 milionë euro do të jenë për të mbështetur bizneset dhe familjet në nevojë, kurse 500 milionët e tjerë për investime në energjinë e rinovueshme për të pasur pavarësi nga Rusia”.

“BP po trajtohet për herë të parë në këtë samit si një rajon gjeo-strategjik në sajë të luftës brutale të Rusisë në Ukrainë. Ka një lëvizje përpara të përbashkët nga BE dhe BP për të përballuar së bashku sfidat”, tha presidentja e Komisionit Eropian, Ursula von der Leyen.

Kryeministri i Shqipërisë Edi Rama e vlerësoi samitin ”me përmasa historike, pasi BE del për herë të parë jashtë kufijve të tij gjë që është një tregues i jashtëzakonshëm i vetëdijes se BE ka nevojë për BP dhe BP për BE.” Kryeministri Rama vlerësoi si një “lajm të shkëlqyer për rininë” ngritjen në Tiranë të kampusit të kolegjit të Europës në Brugge, Belgjikë. “Universitetet e BP do të bëhen pjesë e universiteteve në BE. Studentët nga vendet e BP do të mund të ndjekin studimet edhe duke qëndruar në vendin e tyre”, bëri me dije kryeministri Rama.

Si tregues i forcimit të bashkëpunimit mes BE dhe BP në samitin e Tiranës u nënshkrua edhe marrëveshja e bashkëpunimit për tarifat roaming mes operatorëve të telekomit të BE dhe BP. Ursula von der Leyen tha  lidhur me këtë marrëveshje, se operatorët e BE dhe BP “do të nisin të ulin tarifat e roaming duke filluar nga viti i ardhshëm, gjë që do të ketë ndikime pozitive për biznesin, turizmin dhe afrimin e njerëzve.

Sfida e emigrimit masiv nga BP

Shifrat në rritje të numri të emigrantëve që hyjnë në vendet e BE përmes rrugës së BP, mbetet një shqetësim i madh për BE, i shprehur edhe në samitin e Tiranës. Presidenti i Këshillit Europian, Charles Michel, e cilësoi fluksin në rritje të emigrimit nga rajoni një “çështje sfiduese që duhet përballuar së bashku.” Ai foli për „bashkëpumim konkret operativ mes BE dhe BP, hamonizim të politikave të vizave dhe vendime shtesë.”

Nevojën e ndryshimit në politikën e vizave të BE theksoi edhe kancelari gjerman Scholz në konferencën e tij për mediat. FRONTEX, agjencia kufitare e BE, ka publikuar në tetor të këtij viti shifrën prej 22.300 tentativash hyrjeje të parregullta në BE, shifër që është tri herë me e lartë sesa një vit më parë.

Mbetet pa datë hyrja në BE e vendeve të BP

Samiti BE-BP dha disa tregues konkretë dhe të qartë të vullnetit për të përforcuar bashkëpunimin gjeo-strategjik mes tyre. Por nuk dha asnjë datë se kur rajoni do të mund të anëtarësohet në BE. Liderët e BE nuk qartësuan, nëse do të zbatojnë rekomandimin e fundit të Parlamentit Europian që ‘negociatat e anëtarësimit të vendeve kandidate në BP duhet të përfundojnë deri në vitin 2030”.

Kancelari gjerman Scholz tha në konferencën e tij për mediat pas përfundimit të samitit, se „Franca dhe Holanda kanë ndryshuar qëndrimin e tyre skeptik ndaj  zgjerimit të BE drejt BP, krahasuar me një vit më parë.”

Anëtarësimi i plotë në i BP në BE, me sa duket, mbetet një perspektivë e largët, pa datë edhe pse BE i dha rajonit në samitin e Tiranës  tregues konkretë që vendet e tij kanë në të ardhmen në BE. Një  premtim  në rrethana të reja kur lufta e Rusisë në Ukrainë kërcënon të riformojë ekuilibrat gjeo-strategjikë në Europën Jug-Lindore.

Sulm fizik ndaj ish-kryeministrit Berisha në protestën antiqeveritare e opozitës

Një protestë antiqeveritare e paralajmëruar e opozitës u zhvillua në Tiranë kur samiti filloi punimet e tij. Ish-kryeministri Sali Berisha, që kishte thirrur këtë protestë u sulmua dhe u godit me grusht në fytyrë nga një kalimtar kur ishte në krye të protestuesve drejt godinës së kryeministrisë. Sipas njoftimit të policisë 31 vjecari Gert Shehu, që sulmoi Berishën, rezulton të jetë i sëmurë mendor me diagnozë “çrregullim psikotik të papërcaktuar”, vërtetimi mjekësor i cili u publikua nga mediat lokale rezulton të jetë marrë në tetor të këtij viti.

dw

Marrëveshja e parë që është nënshkruar në samitin e Be-Ballkani Perëndimor sot në Tiranë është marrëveshja Roaming, që synon uljen e tarifave.

Marrëveshja Roaming i hap rrugë nisjes së procesit për heqjen e tarifës roaming mes vendeve të Bashkimit Evropian dhe Ballkanit Perëndimor.

Pas negociatash të gjata Komisioni Europian dhe RCC drejtuar nga Sekretarja e Përgjithshme, Majlinda Bregu kanë arritur marrëveshjen me operatorët e telefonisë celulare në Europë e Ballkan për uljen e tarifave roaming.

Nënshkrimi i Deklaratës së Roaming-ut, do të garantojë ulje të ndjeshme të tarifave roaming  që nga 1 tetori 2023. Tarifat afër niveleve të çmimeve kombëtare synohen të arrihen deri në vitin 2027.

Top Channel

Në Tiranë sot, (06.12) zhvillon punimet samiti BE-Ballkan Perëndimor,(BP) i pari që zhvillohet në një vend jo anëtar të BE dhe në rajonin e Ballkanit.

Burime zyrtare nga Këshilli Europian (KE) bëjnë me dije që ky samit është “pjesë e zbatimit të axhendës strategjike 2019-2024 të këtij Këshilli”. “Samiti është një mundësi për të rikonfirmuar rëndësinë e madhe të partneritetit strategjik mes BE-së dhe Ballkanit Perëndimor (BP), këtij rajoni me një perspektivë të qartë europiane”, thekson zyra e shtypit e KE.

Çëshjet kryesore të aktualitetit – në tryezën e bisedimeve

Diapazoni i çështjeve që do të diskutohen nga liderët e BE dhe ata të BP përmbledh probleme të mprehta të aktualitetit. Sipas zyrës së shtypit të KE-së samiti do të ndalet “në trajtimin së bashku të pasojave të agresionit rus kundër Rusisë, intensifikimin e angazhimit politik, dhe në politikë, riforcimin e sigurisë dhe qëndrueshmërisë kundër ndërhyrjeve të huaja si edhe adresimit të sfidave që paraqet migracioni, lufta kundër korrupsionit dhe krimit të organizuar” . Liderët e BE dhe të BP pritet të bëjnë një deklaratë në përfundim të samitit.

Lufta e Rusisë kundër Ukrainës

Liderët e BE dhe të BP do të diskutojnë bashkëpunimin për të përballuar sfida të përbashkëta që burojnë nga agresioni i Rusisë kundër Ukrainës. „Ata do të ndalen më konkretisht në trajtimin e pasojave negative në energjinë dhe sigurinë ushqimore në Ballkanin Perëndimor,” thekson zyra e shtypit e KE.

Angazhimi politik dhe në politikë

Liderët e BE dhe të BP do të diskutojnë rrugët për thellimin e angazhimit politik dhe në politikë me një fokus të veçantë tek rinia. Ata do të vlerësojnë gjithashtu “progresin e arritur në procesin e integrimit europian të BP në tregun e brendshëm të BE, në modernizimin e sistemit të pagesave në përputhje me standardet e BE në fushën e dixhitalizimit dhe në zbatimin e korsive të gjelbra BE-BP një nismë kjo për të lehtësuar logjistikën ndërkufitare dhe rrjedhën e vazhdueshme të mallrave”, thekson zyra e shtypit të KE.

Siguria dhe qendrueshmëria kundër ndërhyrjeve të huaja

Samiti do të jetë një mundësi për të diskutuar veprime të koordinuara për çështjet e sigurisë dhe mbrojtjes, të cilat janë bërë edhe më të rëndësishme në kontekstin e agresionit rus kundër Ukrainës. Kjo përfshin luftimin e manipulimit të informacionit të huaj dhe përmirësimin e sigurisë kolektive kibernetike.

Menaxhimi i migracionit

Sipas zyrës së shtypit të KE liderët e BE dhe të BP do të shkëmbejnë pikëpamje lidhur me trajtimin e përbashkët dhe menaxhimin e migracionit, pasi shifrat në rrugën migratore të Ballkanit Perëndimor janë rritur ndjeshëm gjatë vitit të kaluar. Kjo përfshin harmonizimin e politikës së vizave të BE-së dhe bashkëpunimin në sistemet e kthimit. Ata do të diskutojnë gjithashtu se si të forcohet bashkëpunimi për të luftuar terrorizmin dhe parandaluar radikalizimin.

Tirana në masa të rrepta sigurie

Ardhja në Tiranë e 27 kryetarëve të shteteve, anëtare të BE, dhe atyre të BP ka vendosur kryeqytetin në masa të rrepta sigurie. Policia rrugore ka përcaktuar perimetrin e sigurisë së lartë. Për mbarëvajtjen e samitit ajo ka publikuar hartën e rrugëve, në të cilat nuk lejohet kalimi dhe parkimi i automjeteve, Që në orën 06:00 të mëngjesit policia ka mbyllur hyrjet në Tiranë nga Durrësi, Elbasani dhe qytetet në veri të vendit. Bulevardi “Dëshmorët e Kombit” do të jetë i bllokuar.

Në njoftimin e Policisë rrugore bëhet me dije që ”për mbarëvajtjen e samitit do të ketë bllokime të disa akseve rrugore urbane dhe interurbane të Tiranës”.

dw

Udhëheqësit e 27 vendeve anëtare të Bashkimit Evropian dhe ata të 6 vendeve të rajonit të Ballkanit Perëndimor, pritet të ulen sot së bashku në Tiranë, në takimin e dytë sipas këtij formati, por të parin që zhvillohet në një vend jo anëtar. Takimi i nivelit të lartë, shihet si një mundësi për të rikonfirmuar rëndësinë kyçe të partneritetit strategjik midis BE-së dhe Ballkanit Perëndimor.

Në një postim në Twitter, pasditen e djeshme, Presidenti i Këshillit Evropian, Charles Michel i mëshoi pikërisht këtij aspekti, ndërsa shkruante se takimi “është shumë simbolik sepse do të zhvillohet në Tiranë, në zemër të rajonit. Dëshmon një evolucion të fortë për sa i përket angazhimit”.

Për kryeministrin shqiptar Edi Rama mbajtja e takimit në kryeqytetin shqiptar, në një nga vendet e rajonit “është një kthesë strategjike në historinë e BE-së të shumë viteve të fundit, një kthesë drejt një qasjeje tërësisht të re ndaj Ballkanit Perëndimor. Është një kthesë strategjike patjetër e nxitur nga pandemia si fillim, pastaj edhe nga agresioni rus në Ukrainë në vijim, por është edhe një vlerësim strategjik për Shqipërinë”, është shprehur zoti Rama duke e konsideruar po ashtu dhe “një ngjarje të jashtëzakonshme, një ngjarje historike, më të rëndësishmen në historinë e marrëdhënieve ndërkombëtare të Shqipërisë”.

Pasojat e agresionit rus në Ukrainë do të jenë një nga temat qendrore të diskutimeve. “Udhëheqësit do të diskutojnë bashkëpunimin përballë sfidave të përbashkëta që rrjedhin nga agresioni i Rusisë kundër Ukrainës. Ata do të shikojnë më konkretisht se si të trajtohen efektet negative në sektorët e energjisë dhe sigurisë ushqimore në Ballkanin Perëndimor”, shpjegon një njoftim i Këshillit Evropian.

Në këtë kontekst pritet të diskutohet dhe mbi çështjet e sigurisë dhe përgjigjes ndaj ndërhyrjeve të huaja. “Takimi do të jetë një mundësi për të diskutuar veprimet e koordinuara për çështjet e sigurisë dhe mbrojtjes, të cilat janë bërë edhe më të rëndësishme në kontekstin e agresionit rus kundër Ukrainës. Kjo përfshin luftën ndaj informacioneve të huaja të manipuluara dhe përmirësimin e sigurisë kibernetike kolektive”, bën të ditur Këshilli Evropian.

Migracioni, një tjetër problem me të cilin BE-ja vijon të përballet, do të jetë po ashtu pjesë e diskutimeve edhe për shkak të asaj që njihet si “rruga e Ballkanit”. “Udhëheqësit do të shkëmbejnë pikëpamjet për trajtimin e përbashkët të menaxhimit të migracionit pasi shifrat në rrugën migratore të Ballkanit Perëndimor janë rritur ndjeshëm gjatë vitit të kaluar. Kjo përfshin harmonizimin e politikës së vizave të BE-së dhe bashkëpunimin në sistemet e kthimit”.

Udhëheqësit evropianë dhe ata të Ballkanit Perëndimor, pritet të shqyrtojnë dhe mënyrat e thellimit të angazhimit politik, me një fokus të veçantë te të rinjtë, ndërsa do të vlerësojnë përparimet e bëra në disa fusha, duke nisur nga integrimi i Ballkanit Perëndimor në tregun e brendshëm të BE-së, te modernizimi i sistemeve të pagesave në përputhje me standartet e Unionit, digjitalizimi apo vënia në jetë e korridoreve të gjelbra BE-Ballkani Perëndimor, një nismë që synon të lehtësojë logjistikën ndërkufitare dhe lëvizjen e vazhdueshme të mallrave.

Gjatë takimit pritet të nënshkruhet dhe një marrëveshje e cila synon reduktimin progresiv të tarifave të roamingut për telefoninë celulare mes vendeve të BE-së dhe atyre të Ballkanit perëndimor, duke nisur që nga viti 2023.

Në Tiranë, që mbrëmë ka nisur bllokimi rrugëve rreth e qark zonës ku do të zhvillohet takimi, në atë që është përcaktuar si perimetër sigurie, ndërsa forca të shumta policie shihen në të gjitha akset kryesore, dhe ato ku pritet të kalojnë delegacionet pjesëmarrëse në takim. Gjatë ditës pritet dhe organizimi i një proteste nga ana e opozitës. Drejtuesit e saj, ish kryeministri Sali Berisha i cili ka rimarrë kontrollin e Partisë Demokratike, dhe ish presidenti Ilir Meta, në krye të Partisë së Lirisë, do të manifestojnë kundër cenimit të vlerave europiane dhe të demokracisë, nga ana e kryeministrit Rama dhe qeverisë së tij. Ata kanë këmbëngulur për zhvillimin e protestës përpara godinës së kryeministrisë. Por policia ka bërë të qartë se protesta mund të zhvillohet në çdo mjedis tjetër që nuk është brenda perimetrit të sigurisë së takimit të nivelit të lartë BE-Ballkani Perëndimor.

voa