Arkivi mujor: Mars 2023

Maqedonia

Shkup, mbahet takimi SHBA-Karta e Adriatikut

Komento

Karta e adreatikutNë Shkup u mbajt takimi i ministrave të Kartës së Adriatrikut dhe Shteteve të Bashkuara, e njohur si Nisma A5. Takimit iu drejtua përmes video-konferencës, Ministri i Jashtëm i Ukrainës Dmytro Kuleba, i cili theksoi rrezikun që Ballkanit, Evropës dhe më gjerë i vjen nga Rusia. Në takim u fol për mundësitë e përforcimit të rolit politik të Nismës në aspektin e ballafaqimit me sfidat e sigurisë dhe ato rajonale. Karta e Adriatikut u formua para 20 vjetësh.

 

Ministri i jashtëm i Ukrainës, Dmytro Kuleba duke folur përmes video-konferencës, tha se Rusia kërcënon jo vetëm Ukrainën, por edhe Evropën, Amerikën Veriore dhe paqen në të gjithë globin. Ai tha se e ardhmja e sigurisë euro-atlantike po vendoset në betejat e Ukrainës.

“Për shumë vite, Rusia është përpjekur të destabilizojë shtetet e Ballkanit përmes sulmeve kibernetike, kërcënimeve e madje edhe me përpjekje për grusht-shteti; Përkundrazi, Ukraina gjithmonë e ka mbështetur qëndrueshmërinë e Ballkanit dhe demokracinë”, shtoi ministri, Kuleba.

“Nëse Rusia nuk do të ishte e zënë (me luftën) në Ukrainë, ajo do të kishte qenë duke minuar qëndrueshmërinë e Ballkanit”, tha shefi i diplomacisë ukrainase.

Ministri i jashtëm i Mqedonisë së Veriut, Bujar Osmani, si kryesues aktual i Nismës së Kartës së Adriatikut theksoi mbështetjen e vendeve të Kartës për Ukrainën dhe gatishmërinë për ndihmë të mëtutjeshme praktike dhe humanitare për popullin e atjeshëm.

Ai tha se që nga fillimi i luftës e deri më tani, të gjitha vendet anëtare të A-5 nga rajoni kanë dhuruar rreth 17 milionë dollarë ndihmë humanitare, ndërsa kanë siguruar rreth 214 milionë dollarë ndihmë ushtarake.

Së bashku me Shtetet e Bashkuara të Amerikës, këto shuma kalojnë shifrën prej 1.6 miliardë dollarë ndihmë humnitare dhe 32.7 miliardë dollarë ndihmë ushtarake.

Zoti Osmani në një konferencë shtypi tha se A5 ka përmbushur synimin fillestar për çka u formua; se tre vendet themeluese, Kroacia, Maqedonia e Veriut dhe Mali i Zi tashmë janë anëtare të NATO-s.

Ndërkohë, ai theksoi nevojën e zgjerimit të bashkëpunimit rajonal për tema dhe çështje aktuale të Aleancës së NATO-s, siç është ballafaqimi me kërcënimet kibernetike, hibride, komunikimet strategjike, etj, teksa foli për nevojën e mbështetjes së politikës së dyerve të hapura të nismës A5, përkatësisht zgjerimin e saj me vende të rajonit:

“Ne si kryesues po angazhohemi fuqishëm që Kosova të anëtarësohet sa më shpejt në A5, aplikimi i së cilës është dorëzuar në vitin 2012. Së dyti, mbështetja e fortë e vendeve anëtare për Ukrainën dhe dënimi i agresionit ushtarak rus”, tha z. Osmani.

Në Kartën e Adriatikut bëjnë pjesë: Shqipëria, Bosnja e Hercegovina, Kroacia, Mali i Zi dhe Maqedonia e Veriut, ndërsa Kosova, Serbia dhe Sllovenia kanë statusin e vendeve vëzhguese. Shtetet e Bashkuara si partnere e A5 i japin kësaj nisme një peshë të veçantë politike.

voa

Kulturë

Thëniet më të Bukura Orientale

Komento

dyftyrsiaMos bëj padrejtësi sepse përfundimi i saj është pishmanllëku; t’i fle gjumë duke mos e ditur se ai që i ke bërë padrejtësi, vetëm lutet kundër teje, e syri i Zotit nuk fle.

Nuk do të ngrihen ndërtesat e një populli, kur moralet e tyre janë të rrënuara.

Nuk e falënderon Zotin, ai qe nuk falënderon njerëzit.

Nuk ka pasuri më të madhe se mendja, varfëri më të keqe se padija, trashëgimi më të mirë se edukata.

Me zjarr provohet ari, ndërsa me ar provohet burri.

Nëse t’i lodhesh duke bërë mirë, lodhja do të shkojë e bamirësia do të mbetet.

Më thonë: “Kur të shikosh një skllav duke fjetur mos e ngacmo, ndoshta ai është duke parë në ëndërr sikur është i lirë.” Ndërsa unë them: “Nëse do të shikosh një skllav që fle, do ta zgjoj dhe do t’i flas rreth lirisë.”

Midis shpenzimit të tepërt dhe koprracisë ka një skkallë; cilado prej tyre të rritet, të shkatërron.

Mjerë për një popull, i mençuri i të cilit është memec dhe i forti, qorr.

Mjeshtri i paaftë zihet me veglat e tij.

 

Mos e falëndero dikë derisa ta provosh, e mos e shaj pa e provuar.

Mos e lavdëro fillimin derisa të shohësh fundin.

Mos e nënvlerëso diçka të vogël sepse ajo mund të zmadhohet, dhe as diçka të pakët sepse mund të shtohet.

Mos e shit atë që nuk e ke.

Mos ji si tymi, i cili rri në ajër kur në vetvete është i pisët.

Mos kërko të jetosh për të ngrënë, por kërko të hash për të jetuar.

Mos ki turp të dhurosh qoftë edhe pak, se nëse nuk jep qoftë edhe pak, ajo është akoma më pak.

Mos premto për atë që nuk je i i fuqishëm ta zbatosh.

Mos rri me armikun e shokut, sepse do të armiqësosh shokun tënd.

Mos shko me dembelin për nevojat e tij; sa njerëz të mirë për shkak të këqijve janë shkatërruar?

 

Mos shpreso diçka që është larg, të mjafton ajo që është afër që të interesohesh për të.

Mos u bëj skllav i dikujt tjetër përderisa zoti të krijoi të lirë.

Mos u tregoni të pakujdesshëm ndaj edukimit të fëmijëve, ata janë krijuar për të jetuar në një kohë tjetër jo si e ajo e juaja.

Është mirë të thuhet “po” pas “jo”-së, por sa e shëmtuar është të thuash “jo” pas “po”-së.

Ndihmoje vëllain tënd, qoftë edhe kur të ka bërë padrejtësi.

Në çastet e sprovës, njeriu nderohet ose poshtërohet.

Në gjerësinë e moraleve, gjenden thesaret e rreziqeve.

Nëse falenderimi dhe durimi janë dy deve, nuk do të më interesonte se cilës prej tyre do t’i hipja.

Nëse fjala është prej argjendi, heshtja është prej floriri.

Nëse hyn në diskutim me injorantin, duhet të durosh fjalën e tij.

Nëse kafshët do t’i përngjasësh me disa njerëz, do të jetë përulje për to.

Nëse konsultohesh me një të mençur, mendja e tij bëhet e jotja.

Nëse nuk je në rregull në vetvete, mos i qorto ata të cilët sillen keq me ty.

Nëse nuk mbjell dhe shikon të tjerët të korrin, bëhesh pishman për ditët të cilat të kaluan.

Nëse për diçka thua “po”… kryeje atë, sepse “po”- ja është borxh të cilin duhet ta kryesh.

 

Nëse vepron një të mirë fshije, e nëse ta bëjnë shfaqe.

Ngrënia e tepërt është armiku i natyrës së njeriut.

Nuk do të ishte krenare fytyra e të urtit, nëse nuk do të vishej me moralet e larta.

Nuk është bukuria tek rrobat që na zbukurojnë, por tek dija dhe morali.

Nuk është drejtësi të gjykohet i drejti për një dyshim.

Nuk është pasuria të kesh shumë para, por pasuria e vërtetë është ajo e shpirtit.

Nuk ka begati më të madhe sesa morali i lartë.

Nuk ka mirësi në shoqërimin e atij që nuk e konsideronin të mirën tënde si për veten e tij.

Nuk ka mirësi tek ai që lëkundet nga fryn era.

Nuk ka përfitim prej premtimit që është gënjeshtër, dhe fjalës që nuk është vepër.

Shqipëria

“PD në situatë kaotike”, Alibeaj për kandidatët: Rama zvarriti procesin gjyqësor, Berisha zaptoi selinë e PD dhe çdo degë!

Komento

AlibeajTeksa Partia Socialiste, por edhe koalicioni Meta-Berisha, kanë depozituar listat e kandidatëve për kryetar bashkie dhe këshilltarë bashkiakë në të 61 bashkitë, Partia Demokratike e Enkelejd Alibeajt është ende e paqartë se në sa bashki do të kandidojë për zgjedhjet vendore të 14 majit.

Përmes një konference për mediet, Alibeaj shprehet se PD-ja ndodhet në një situatë kaotike dhe përgjegjës  për këtë është Sali Berisha me Edi Ramën.

Sipas kryedemokratit, zaptimi i “Kështjellës” së PD-së në qendër dhe selive në rrethe nga Sali Berisha, pati efektin e vet në mbarëvajtjen e procesit organizacional për zgjedhjet. Sakaq, Edi Rama – sipas tij – është fajtor sepse zvarriti procesin gjyqësor për vulën e PD-së.

Alibeaj i qëndron idesë se forca politike që ai drejton duhet të ketë 61 përfaqësues në zgjedhje.

“Pas shume vitesh po zhvillohet nje debat ne nje forum drejtues te nje partie per kandidatet. Nje debat i dobishem per situaten kaotike ne te cilen ndodhet aktualisht PD. Kush fshihet pas gishtit per te verteten e situates se demokrateve, duke e shitur ate si normale apo frymezuese, ose eshte i kapur nga verberia politike ose thjesht deshiron qe kjo “status quo” ne opozite te vazhdoje pa fund dhe pa zgjidhje.

Eshte e qarte qe PD eshte e percare dhe situata e vitit te fundit vetem se ka ndihmuar ne ndarjen e metejshme te demokrateve. Duke nisur nga manovrat e Edi Rames per ta sterzgjatur procesin e gjyqit e deri tek gjuha tribale dhe banale e Sali Berishes ndaj pjeses se PD qe mendon ndryshe nga ai.

Eshte e qarte per te gjithe qe çdo dege e partise demokratike duke perfshire edhe seline kryesore eshte zabtuar nga Berisha dhe njerezit e tij dhe kjo ka pasur efektin e vete ne organizimin normal te nje partie qe po pergatitet te hyje ne zgjedhje

Me vjen keq qe ne kete periudhe nje pjese e mire e drejtuesve te PD dhe deputeteve, perfshire dhe mua, kemi kaluar kohe me se shumti me debate mes njeri-tjetrit ne forume, studio televizive apo ne kuvend, nderkohe qe duhet te kishim kaluar me shume kohe me demokratet. Ne mbledhjen me drejtuesit lokale te PD kam kuptuar qarte se baza e PD eshte e qarte ne orientimin politik. Per fat te keq me e qarte se ata qe duhet te orientonin bazen e sot perpeliten per te gjetur cfare drejtimi do marrin ne rruget e ndara te kesaj partie.

Vazhdoj ti mbetem mendimit dhe qendrimit se duhet te kishim 61 perfaqesues ne bashkite per zgjedhjet lokale. Por sterzgjatja e procesit gjyqesor per PD, vendimi I KQZ dhe cuarja ne limite kohore na kushtezoi ne kete proces. Pertej faktit qe deri ne momentin e fundit, dora jone ka qene e shtrire per ata kandidate te foltores qe kane dashur dhe jane penguar ne forma te ndryshme te kandidojne ne siglen e PD.

Eshte e qarte per ju te gjjthe se nje pjese e deputeteve dhe kryesise kane qene te ndare lidhur me vendimin per tu prezantuar me kandidate ne zgjedhje. Kjo eshte e bukura dhe e vecanta e rralle e nje force polititke ne Shqiperi. Diskutimet ne forume dhe respektimi i vendimit te shumices. Uroj te jemi shembull per cdo formacion politik qe organizon votime ku rezultati dihet para se te nise procesi apo preferenca kryetaresh qe shiten si proces perzgjedhjeje. Jam po kaq i sigurt se ne rast se Kryesia do te kishte votuar kunder ketij propozimi do ta kisha respektuar.

Persa i perket Tiranes me duhet te them dhe njehere se Belind Kellici e ka patur mundesine te perfaqesohej me siglen e PD. Pavaresisht asaj qe mendoj une personalisht, asnje inat apo preference personale, asnje mllef apo akuze e padrejte ndaj meje nuk me ka penguar te ngrihem mbi to dhe te zgjas doren e bashkepunimit per nje demokrat. Por mesa duket interesat meskine te zgjatimeve te politikes se vjeter vazhdojne me lojrat dhe pazaret duke i kerkuar demokrateve qe ne 14 maj te votojne per listen e LSI-se. E pate besoj sesi nen logon e kesaj partie do te jete dhe Belind Kellici dhe nje liste qe demokrateve do tu shitet si bashkepunim apo aleance.

Cfaredo emri te perdorin, nuk do ja fshehin dot demokrateve dhe shqiptareve qe pazari mes Ilir Metes dhe Sali Berishes eshte menyra per te mbajtur peng demokratet dhe per ti detyruar qe dhe njehere tjeter te votojne per nje parti te majte qe permes pazareve solli Edi Ramen ne pushtet”- tha Alibeaj.

I pyetur mbi akuzat për pazare me Edi Ramën, kreu i PD-së thekson se këto nuk janë as më shumë e as më pak sesa shpifje të pabaza nga politikanë që janë puthur dhe pështyrë me çdo kundërshtar politik këto 30 vjet.

“Kam zgjedhur qe mos ti pergjigjem shpifjeve te pabaza te atyre qe ne keto 30 vite jane puthur dhe peshtyre me cdo politikan te partise se vet apo kundershtar politik. Kam zgjedhur gjithashtu te jem etik dhe mos te perdor kurre banalitete apo epitete te shemtuara as per kundershtaret politike. Kjo eshte menyra qe kam zgjedhur sepse pervec akuzave te pabaze deri me sot, nuk kam pare apo lexuar nje fakt qe te vertetoje se kam bashkepunuar me Edi Ramen apo dike tjeter nga Rilindja. Kam zgjedhur te jem transparent dhe i hapur ne vend te makinacioneve te fshehta dhe pazareve qe jane kaq te dukshme ne arkiven e politikes shqiptare. E keni pare gjate gjjthe kesaj periudhe se kush ka qene agresiv ne media apo rrjete sociale? Se kush ka financuar takime te perditshme, regji qendrore, media dhe analiste per te perbaltur ata qe mendojne ndryshe ne nje parti politike. Mendoni se do lejonte Edi Rama qe parate te derdheshin lume nese nuk do ti interesonte e gjithe kjo tymnaje dhe sherr i panevojshem mes demokrateve? Une nuk mund te ngre gishtin dhe te akuzoj pa fakte konkrete nese dikush nga foltorja eshte bashkepunetor i Edi Rames. Por ndonjehere ajo qe thone prokuroret “ndiq parane” vlen dhe ne politike. Sidomos per politiken shqiptare. Ndiq parane, shih kush shton te ardhurat dhe shpenzon pa i justifikuar parate dhe te jeni te sigurte se rruget te cojne tek Edi Rama.

Ju ftoj te shihni cdo shpenzim tonin gjate vitit te fundit dhe do ta kuptoni se ku fshihet djalli. Dhe kete here jo ne detaje te vogla, por ne thesin e atyre qe shpenzojne dhe arketojne ne ate qe per demokratet dhe shqiptaret e thjeshte eshte regjimi i Edi Rames”, tha Alibeaj.

Top Channel

 

Kosova

Dialogu Kosovë-Serbi vazhdon javën tjetër në nivel të kryenegociatorëve

Komento

Mirosllav Lajçak me kryenegociatorët nga Kosova dhe nga Serbia ArkiviZëdhënësi i Bashkimit Evropian, Peter Stano, ka bërë të ditur se javën e ardhshme do të zhvillohet një takim në kuadër të dialogut Kosovë-Serbi, në nivel të kryenegociatorëve.

 

Kryenegociatori i Kosovës për këto takime është zëvendëskryeministri, Besnik Bislimi, ndërsa i Serbisë është udhëheqësi i Zyrës për Kosovën në Qeverinë e Serbisë, Petar Petkoviq.

Në këtë takim është thënë se fokusi do të jetë në zbatimin e Marrëveshjes për normalizim të marrëdhënieve – për të cilën Kosova dhe Serbia kanë arritur pajtueshmëri më 27 shkurt – si dhe në aneksin e zbatimit, për të cilin palët janë dakorduar më 18 mars në Ohër të Maqedonisë së Veriut.

Stano është shprehur i kënaqur që, siç ka thënë ai, dialogu po bëhet më i popullarizuar në rajon dhe se po organizohen gjithnjë e më shumë takime.

Ai ka deklaruar kështu duke iu referuar një propozimi të kryeministrit me mandat teknik të Malit të Zi, Dritan Abazoviq, që takimi i radhës mes Kosovës dhe Serbisë të zhvillohet në shtetin që drejton ai.

“Na vjen mirë që dialogu po bëhet kaq i popullarizuar në rajon dhe gjithnjë e më shumë vende po ofrohen që të jenë mikpritës të tij. Por le të shkojmë hap pas hapi. Dialogu është i bazuar në Bruksel dhe kemi arritur një hap shumë të rëndësishëm në Ohër, pas arritjes së pajtueshmërisë mes presidentit të Serbisë dhe kryeministrit të Kosovës, ku ata u pajtuan edhe për Marrëveshjen, edhe për aneksin e implementimit. Tash fokusi është në implementim”, ka thënë ai.

Stano ka folur edhe për hapat që janë bërë pas takimit të Ohrit.

“Kemi pasur takim në Këshillin e Punëve të Jashtme ku Përfaqësuesi i Lartë [Josep Borrell] i njoftoi ministrat. Pastaj, ai ka informuar dhe partnerët tjerë. Kemi pasur edhe Këshillin Evropian, ku liderët miratuan këtë, dhe porositën të dyja palët se duhet të vazhdojnë me implementim të shpejtë, me mirëbesim të obligimeve që kanë marrë mbi vete“.

Stano ka paralajmëruar se brenda BE-së po punohet që të rinisë puna në adaptimin e kornizës negoiciuese me Serbinë, më saktësisht Kapitullin 35, dhe në mënyrë përkatëse edhe në rastin e Kosovës.

“Dialogu si i tillë vazhdon. Do të ketë takime tjera në nivel të lartë për të cilat do të njoftojmë kur të jetë e përshtatshme. Ajo që mund të them në këtë moment është se një takim i kryenegociatorëve do të zhvillohet javën që vjen në Bruksel. Kryenegociatorët nga të dyja palët janë ftuar nga lehtësuesi i dialogut që të vijnë në Bruksel dhe të avancojnë përpara me hapat e parë për implementimin e gjithë asaj që kanë rënë dakord”, ka thënë mes tjerash Stano.

Sipas kryediplomatit të BE-së, Borell, Kosova dhe Serbia kanë arritur pajtueshmëri në Ohër për aneksin e zbatimit të Marrëveshjes për normalizim të marrëdhënieve mes dy vendeve, ndonëse nuk e kanë nënshkruar asnjë dokument.

Por, në BE kanë përsëritur se edhe pa nënshkrim këto dokumente konsiderohen obliguese për të dyja palët, dhe se të gjitha përpjekjet për t’i vënë në pikëpyetje janë të kota.

rel

 

Shkenca

Gara për riciklimin e paneleve diellore të përdorura

Komento

panelePanelet diellore ofrojnë një mënyrë më të gjelbër për të gjeneruar energji elektrike, por riciklimi i tyre kur nuk funksionojnë më, është i vështirë dhe i kushtueshëm. Në Australi, dhjetëra mijëra panele diellore jofunksionale përfundojnë në landfill, por një grup shkencëtarësh mendon se kanë një zgjidhje.

 

Nuk është e lehtë të riciklosh panelet diellore.

Ato fillimisht duhet të shkëputen, dhe më pas të ndahen në komponentët e tyre, dy procese të cilat janë të shtrenjta dhe kërkojnë kohë.

“Për momentin, do të ishte më lirë t’i vendosnin ato në landfill sesa t’i riparonim,” thotë John Polhill, menaxher i partneritetit të infrastrukturës, Sustainability Victoria.

“Energjia diellore është menduar të jetë energji e rinovueshme, produkt i lidhur me qëndrueshmërinë. Riciklimi më i mirë i një paneli diellor është ndoshta më i rëndësishëm se çdo produkt tjetër”, thotë Anthony Vippond, drejtor ekzekutiv i kompanisë Lotus Energy.

Një ekip shkencëtarësh nga Universiteti Deakin thotë se kanë gjetur një mënyrë për ta bërë këtë proces më praktikë.

Ata thonë se metoda e tyre nuk përdor kimikate të rrezikshme për të nxjerrë silikonin e vlefshëm nga panelet, duke e bërë atë më të lirë dhe më miqësor ndaj mjedisit.

“Ka shumë teknologji të tjera në mbarë botën, por shumica e teknologjive janë të komplikuara, me shumë hapa, dhe kërkojnë kohë,” thotë Mokhlesur Rahman nga Universiteti Deakin.

Metoda e re mund të bëhet financiarisht shumë interesante për bizneset e riciklimit, sepse materiali i silikonit që nxirret nga panelet diellore vlen shumë para.

“Ne do të ishim të entuziazmuar nëse mund ta arrinim këtë për momentin. Sigurisht, janë disa shifra të pabesueshme 31,000 dollarë për kilogram silikoni,” thotë zoti Vippond.

Kjo teknologji e re duhet të testohet për të parë nëse funksionon në nivel industrial.

“Duhet provojmë që jo vetëm të ndajmë panelin dhe silikonin, por ta bëjë atë në një mënyrë që është financiarisht e qëndrueshme si model biznesi, jo vetëm në shkallë laboratorike,” thotë zoti Polhill.

Studiuesit po punojnë tani për të bërë bateri me kosto të ulët nga ky material.

Ministrja Australiane e Mjedisit Tanya Plibersek po ushtron presion mbi industrinë për të bërë më shumë kur bëhet fjalë për riciklimin e paneleve diellore.

Ministrja Plibersek thekson se nëse nuk shtohen përpjekjet, deri në vitin 2030 në landfill mund të ketë më shumë se një çerek milionë ton panelesh diellore.

voa

Bota

A është pornografi Davidi? Ejani shikojeni, u thonë italianët prindërve nga Florida

Komento

DavidiMuzeu i Firences që strehon kryeveprën e Michelangelo-s nga periudha e Rilindjes, Davidin, ftoi të dielën prindërit dhe nxënësit nga një shkollë në Florida për të vizituar muzeun pas ankesave se një leksion për statujën detyroi drejtoreshën e shkollës të jepte dorëheqjen.

 

Kryetari i Bashkisë së Firences Dario Nardella gjithashtu postoi një ftesë për drejtoreshën për ta vizituar skulpturën, në mënyrë që ai personalisht ta nderojë atë. Ngatërrimi i artit me pornografinë është “qesharak”, tha kryebashkiaku Nardella.

Bordi i Shkollës Klasike Tallahassee i bëri presion drejtoreshës Hope Carrasquilla të jepte dorëheqjen javën e kaluar pasi një imazh i Davidit u shfaq në një leksion arti me nxënës të klasës së gjashtë. Shkolla ka një rregullore që kërkon që prindërit të njoftohen paraprakisht për temat “të diskutueshme” që mësohen në shkollë.

Përgjigja italiane vë në dukje se si betejat kulturore në SHBA perceptohen shpesh në Evropë, ku pavarësisht nga një rritje e ndjenjave dhe qeverisjes së krahut të djathtë, periudha e Rilindja dhe kryeveprat e saj, madje edhe ato të zhveshura, janë përgjithësisht pa polemika. Faqja e parë e së dielës të së përditshmes Corriere della Sera paraqiste një karikaturë nga satiristi kryesor i saj që e sillte Davidin me organet e tij gjenitale të mbuluara nga një imazh i xhaxha Semit, që personifikon qeverinë amerikane, me fjalën “Turp”.

Zonja Carrasquilla beson se bordi e kishte vënë në shënjestër pasi tre prindër u ankuan për një leksion që përfshinte një foto të Davidit, një skulpturë mermeri lakuriq 5 metra e gjatë që daton nga viti 1504. Vepra, që konsiderohet si një nga kryeveprat e Rilindjes Italiane, paraqet Davidin biblik, që shkon të luftojë Goliathin, i armatosur vetëm me besimin e tij tek Zoti.

Zonja Carrasquilla tha se dy prindër u ankuan sepse nuk ishin njoftuar paraprakisht se në mësim do të shfaqej një skulpturë nudo, ndërsa një i tretë e quajti statujën e famshme si “vepër pornografike”.

Zonja Carrasquilla tha në një intervistë telefonike të dielën se është “shumë e nderuar” nga ftesat në Itali dhe ajo mund të pranojë të shkojë.

“Unë kam qenë në Firence më parë dhe e kam parë Davidin nga afër dhe personalisht, por do të doja të shkoja dhe të isha e ftuara e kryetarit të bashkisë.”

Cecilie Hollberg, drejtoresha e Gallerisë dell’Accademia, ku ndodhet skulptura e Davidit, shprehu habinë për polemikën.

“Të mendosh se Davidi mund të jetë pornografik do të thotë vërtet të mos kuptosh përmbajtjen e Biblës, të mos kuptosh kulturën perëndimore dhe të mos kuptosh artin e Rilindjes”.

Ajo ftoi drejtoreshën, bordin e shkollës, prindërit dhe nxënësit për të parë “pastërtinë” e statujës.

Tallahassee Classical është një shkollë që financohet nga taksapaguesit dhe funksionon pothuajse tërësisht në mënyrë të pavarur nga distrikti shkollor local. Ajo preferohet nga prindërit që kërkojnë një alternativë ndaj kurrikulës së shkollave publike.

Rreth 400 nxënës nga mosha parashkollore deri në klasën e 12-të ndjekin institucionin trevjeçar. Shkolla ndjek një kurrikul të hartuar nga Kolegji Hillsdale, një shkollë konservatore e krishterë në Miçigan, e konsultuar shpesh nga guvernatori i Floridës, Ron DeSantis për çështjet arsimore.

Barney Bishop, kryetar i bordit të shkollës Tallahassee Classical, u ka thënë gazetarëve se ndërsa fotografia e statujës luajti një rol në heqjen e drejtoreshës Carrasquilla, ai nuk ishte faktori i vetëm. Ai nuk ka pranuar të japë hollësi dhe e ka mbrojtur vendimin.

Disa prindër dhe mësues planifikojnë të protestojnë largimin e zonjës Carrasquilla në mbledhjen e bordit të shkollës të hënën mbrëma, por Carrasquilla tha se nuk është e sigurt se do ta pranonte kthimin në punë edhe nëse i ofrohej një gjë e tillë.

Michelangelo Buonarroti e gdhendi statujën e Davidit mes viteve 1501-1504 porositur nga Katedralja e Firences. Statuja tërheq rreth 1.7 milionë vizitorë çdo vit në muze.

“Është tepër e kërkuar nga amerikanët që duan të bëjnë “selfie” dhe të shijojnë bukurinë e kësaj statuje”, tha drejtoresha e muzeut Hollberg.

Muzeu, si shumë në Evropë, është falas për grupet studentore.

voa

Bota

Rritet varësia kronike e fëmijëve nga mediat sociale

Komento

mediat socialeNë Gjermani rreth 6% e fëmijëve dhe të rinjve janë të varur në mënyrë kronike nga “gaming” dhe mediat sociale – kjo shifër është dy herë më e lartë se para pandemisë së Coronës.

 

Paul është një 19 vjeçar nga Berlini, i cili para një viti ka mbaruar maturën. Për vitet e fundit të shkollës ai nuk ka kujtime të mira. “Për shkak të Coronës ishim rregullisht në lokdaun. Me javë nuk kishte mësim dhe duhej të qëndroje në shtëpi. Të takoje shokë, të dilje nëpër vende të ndryshme të festoje party apo të shkoje në sport – shumë nga këto gjëra të rëndësishme për të rinjtë, e që janë të të vetëkuptueshme, nuk bëheshin dot.”

Paul thotë, se e vetmja gjë që mund të bënte ishte të qëndronte në dhomë para kompjuterit apo smartphone-it dhe të luante lojëra me të tjerët në mediat sociale. Berlinezi tani është i lumtur që kufizimet e Coronës kanë marrë fund. Ai ka dalë nga bota virtuale dhe i është kthyer jetës reale. Por shumë të tjerë kanë ngecur në kozmosin virtual.

 

Shifra “të frikshme”

Sipas një studimi të Klinikës Universitare të Hamburgut, UKE së bashku me sigurimin shëndetësor, DAK numri i fëmijëve dhe të rinjve që janë të varur në mënyrë të sëmurë nga gaming dhe mediat sociale është dyfishuar që nga viti 2019. Rreth 680.000 e të rinjve luajnë lojëra, postojnë, chatte-n apo qëndrojnë rregullisht gati 5 orë në mediat sociale. Andreas Storm, kreu i departamentit të shëndetit në DAK bën fjalë për “rezultate të frikshme”. “Nuk u përmbush shpresa, që rritja e kohës së përdorimit dhe shenjat e varësisë janë frenuar.”

 

Kovë në vend të WC-së

Se çfarë pasojash ka një varësi e tillë e shpjegon psikologu Kai Müller, i cili drejton Shoqatën e Ekspertëve për Analizimin e Varësisë nga Mediat dhe punon në ambulancën që trajton fëmijët me varësi nga lojërat kompjuterike në Klinikën Universitare të Maincit. Aty telefonojnë prindër rë dëshpëruar, që nuk dinë si të veprojnë me fëmijët që kalojnë çdo minutë të lirë në kompjuter apo celular. Janë të rinj që injorojnë shkollën dhe detyrimet familjare, refuzojnë të ndahen nga celulari dhe reagojnë me zemërim, mllef apo nuk e kuptojnë reagimin e prindërve. Janë të rinj që mbyllen në dhomat e tyre, ku prindërit humbasin qasjen tek ata, dhe nuk ndjekin më aktivitete jashtëshkollore apo interesa të tjera. Në raste ekstreme harrojnë të ushqehen dhe vënë një kovë në dhomë në vend që të shkojnë në banjo.

 

Lidhja emocionale

Sipas psikologut Kai Müller, pandemia ishte shumë më e rëndë për adoleshentët se për të rriturit. Konsumi i lojërave, videove dhe mediave sociale ishte shpesh një “ngushëllues shpirtëror”. “Kur mediat e përthithin për vete dikë që ndodhet në një fazë frike, zhgënjimi apo vetë dyshimesh, atëherë kjo mund të kthehet në një lloj kondicionimi emocional, si themi ne në psikologji”. Krijohet një lidhje emocionale, dhe kjo sigurisht që është shtysa e parë të mbetesh varur në një lidhje të tillë.”

Humbje e plotë e kontrollit

Që nga viti 2022 varësia nga lojërat komjuterike është kategorizuar nga OBSH si diagnozë më vete. Psikologu Kai Müller përmend tre kritere, me të cilat bëhet diagnostikimi. Nga njëra anë është humbja e kontrollit, pra të mos vendosësh më me vetëdije. “Pra sa konsumoj, kur nuk konsumoj, sa kohë dhe çfarë konsumoj?” Pika e dytë lidhet me priorizimin. Nëse loja apo përdorimi i mediave sociale nuk është më pjesë e jetës, por dominon gjithçka. “Kriteri i tretë është vazhdimi i konsumit, megjithëse të prekurit e vërejnë, se kjo çon në probleme, apo nuk më bën mirë”, shpjegon Müller.

 

Me kohë fillon reflektimi

Presioni që krijon kjo lloj varësie zhvillohet me kohë, sipas ekspertit. “Kur të rinjtë e vërejnë se ata kanë ngecur në këtë varësi në një kohë që rrethi i shokëve që ka luajtur lojëra për para fillon e i drejtohet gjërave të tjera në jetë: ka për shembull shoqen e parë, të dashurin e parë apo ndjek aktivitete të tjera, që nuk kanë të bëjnë me internetin. Ky është shpesh si një fitil i brendshëm, pasi të prekurit pyesin veten -po pse po ndodh me mua kjo?” Kai Müller, thotë se kemi pasur raste, që vetë 17 vjeçarët të vijnë në ambulancë dhe të kërkojnë ndihmë.

Të rinjtë mësojnë përditë diçka të re në qendrën e trajtimit, jo vetëm nga ana shkollore, po edhe njerëzore. Kai Müller thotë, se përsa i përket zhvillimit kam shpesh ndjesinë, se nëse dikush që ka moshën biologjike 25 apo 26 vjeç të duket si një 15 apo 16 vjeçar. Edhe një fenomen vënë re ekspertët. Djemtë janë më të prekur se vajzat. Megjithëse varësia prek të dyja gjinitë, në qendrat e trajtimit të varësisë në Mainc gjen më pak vajza se djem. Përdorimi i mediave sociale është sot i vetëkuptueshëm, por Müller bën fjalë për një “shifër të lartë të paditur” të atyre me varësi klinike. Ministria e Shëndetësisë në Berlin ka porositur fushata sqartimi, që fokusohen veçanërisht tek përdorimi tejet i ekzagjeruar i mediave sociale. Kai Müller flet edhe për një projekt studimor që po shikon mënyrat e trajtimit të të sëmurëve.

 

Varësi për gjithë jetën

Sipas ekspertëve kjo varësi mund të trajtohet më mirë me terapi nëse mjekët dhe psikologët ndërhyjnë herët para se varësia të bëhet kronike. “Ne kemi edhe pacientë që kanë treguar që në rini simptoma të varësisë dhe pastaj janë trajtuar vetëm si të rritur, pjesërisht janë shtruar në spital, dhe që kanë moshën 30 vjeç e lart, ata vijnë të trajtohen, sepse kanë humbur kontrollin.” Vështirësi ka për gjetjen e një terapie. Në ambulancën e Maincit pacientët duhet të presin tre muaj për një orar tek psikologu. Më parë kanë qenë dy javë. “Jemi larg asaj që të kemi gjendje të mirë të trajtimit të të prekurve”, thotë Müller. Për të një marrë vend terapie pacientët duhet të presin pastaj deri në gjashtë muaj.

Sipas ekspertit të DAK, Andreas Storm duhet që të zgjerohen ofertat e parandalimit dhe të ndihmës. “Nëse nuk veprojmë shpejt tani, atëherë gjithnjë e më shumë fëmijë e të rinj në të ardhmen do të jenë të varur në mënyrë kronike nga mediat sociale dhe trendi negativ nuk do të ndalet.” Storm kërkon që politika dhe shoqëria të veprojnë. “Fëmijet e të rinjtë duhet të mësojnë, që të vlerësojnë rrezikun e përdorimit të mediave digjitale, dhe të reflektojnë mbi konsumin e tyre me qëllim që në plan afatgjatë të përdorin në mënyrë konstruktive mundësitë e botës digjitale në jetën private dhe atë të punës.” Psikologët u kujtojnë prindërve se janë ata që duhet të vendosin kufij më të qartë tek fëmijët në lidhje me përdorimin e ofertave digjitale. Një gjë është e qartë: kompjuterat dhe smartphone-t janë kudo të pranishëm dhe nuk do të largohen nga bota moderne. Në një kohë që varësia nga alkooli është e mundur të trajtohet përmes mosblerjes së tij, rikthimi tek varësia digjitale është vetëm një klikim larg.

dw

 

Kosova

Osmani dhe Kurti: Serbia kreu gjenocid në Kosovë

Komento

Albin VjosaSot bëhen 24 vjet nga masakra e Izbicës, ku më 28 mars 1999, forcat policore dhe ushtarake serbe, pas rrethimit të mijëra civilëve të fshatit Izbicë dhe vendbanimeve përreth, veçuan 147 burra të rinj dhe pleq, të cilët i vranë dhe i masakruan, ndërsa pjesën tjetër e dëbuan jashtë Kosovës.

Presidentja e Kosovës, Vjosa Osmani  dhe kryeministri Albin Kurti, kanë bërë homazhe në Kompleksin Memorial në Izbicë, Skenderaj.

E para e vendit, tha se Masakra e Izbicës ka qenë njëra ndër masakrat më të tmerrshme të shtetit gjenocidal të Serbisë ndaj popullit shqiptar. “Krimi nuk përfundoi me vrasjet dhe masakrimin e qytetarëve tanë në Izbicë, por u dyfishuar atëherë kur forcat serbe zhvarrosën të vrarët dhe i rivarrosën ata në varreza masive nëpër vende të ndryshme në Serbi dhe në Kosovë”, tha ajo, raporton RTKlive. Sipas saj liria e Kosovës ka ardhur falë luftës së UCK-së, martirëve dhe sakrificës së popullit të Kosovës.

Kurse kryeministri Albin Kurti, tha se sot nderojmë dhe përkujtojmë të vrarët nga regjimi fashist dhe gjenocidal i Millosheviqit. “Masakra e Izbicës është dëshmi i gjenocidit të Serbisë”, tha ai.

“Bashkë me Presidenten e Republikës së Kosovës, znj.Vjosa Osmani Sadriu dhe me Ministren e Drejtësisë, Albulena Haxhiu, jemi këtu sot, që të nderojmë dhe të përkujtojmë të vrarët nga regjimi fashist e gjenocidal i Millosheviqit në Izbicë, 147 sosh gjithsej, 6 janë ende të pagjetur. Siç e tha edhe Presidentja, ata janë rrëmbyer si njerëz, si shqiptarë të gjallë e më pastaj pas pushkatimit u janë rrëmbyer edhe kufomat, janë dërguar në Serbi dhe në fund janë zhvarrosur prej atje, por jo që të gjithë meqenëse 6 ende nuk dihet se ku janë në Petrovo Sello, dhe i kanë sjellë këtu, në atdheun e tyre, në vendlindjen e tyre. Sot është një ditë kur e nderojmë edhe kujtimin e Mustafë Dragajt, i mbijetuar i masakrës, i cili pat dëshmuar kundër Sllobodan Millosheviqit në Tribunalin e Hagës dhe i cili fatkeqësisht ndërroi jetë në shtatorin e vitit të kaluar:, tha ai.

Sipas tij Masakra e Izbicës ndodhet në aktakuzat e gjashtë krerëve të lartë shtetërorë politikë, policorë e ushtarakë të Serbisë dhe është dëshmi e gjenocidit të Serbisë, të cilin ne nuk e harrojmë kurrë dhe për drejtësinë, për viktimat dhe familjet, që janë gjithashtu viktima dhe i gjithë populli, do të angazhohemi përjetë, vazhdimisht edhe si institucione edhe si qytetarë.

Ndryshe Masakra e Izbicës hyn në radhën e krimeve më të rënda të shtetit të Serbisë, ku vrasja masive, përdhosja e trupave dhe varrimi i tyre, përmes pamjeve satelitore, u bë lajm botëror.

Sot 24 vjet pas këtij krimi askush nga autorët dhe ekzekutuesit serbë nuk doli para drejtësisë vendore dhe asaj ndërkombëtare.

Pas Izbicës, kryeministri i Kosovës, Albin Kurti, ka bërë homazhe te varrezat e Familjes Bogujevci dhe Duriqi, në Podujevë.

rtk

Maqedonia

Ministrja e Jashtme e Shqipërisë, Olta Xhaçka vizitë në Shkup

Komento

Xhacka ShkupMinistrja e Punëve të Jashtme të Shqipërisë, Olta Xhaçka po qëndron për vizitë në Maqedoninë e Veriut, ku me homologun e saj Bujar Osmani theksuan bashkërenditjen e politikave të dy vendeve fqinje në procesin e reformave në kuadër të bisedimeve me Bashkimin Evropian. Dy ministrat kanë biseduar edhe për zhvillimet rajonale, me theks të veçantë për marrëveshjen e fundit midis Kosovës dhe Serbisë si dhe për sfida të tjera me të cilat përballen dy vendet ballkanike.

 

Shqipëria dhe Maqedonia e Veriut, të cilat po e bëjnë së bashku rrugën drejt integrimit evropian do të vazhdojnë me këtë ritëm deri sa të mos i pengojë ndonjë prej vendeve të Bllokut. Shkupi e vlerëson durimin e Tiranës zyrtare dhe mirëkuptimin gjatë periudhës sa Bullgaria i kishte vënë veto Maqedonisë së Veriut lidhur me bisedimet për anëtarësim në BE.

Shefat e diplomacisë shqiptare dhe maqedonase thanë se kanë të përbashkëta një sërë çëshjesh me përparësi, ndërsa dy vendet po bëjnë reforma dhe vlerësimin e ligjeve, përkatësisht përshtatjen e tyre me ato të Bashkimit Evropian.

“Me vendosmëri ecim drejt anëtarësimit në BE. Viti 2030 është mundësi reale dhe e arritshme për të dy vendet që të përmbyllin me sukses këtë proces dhe unë personalisht besoj në këtë”, tha Ministri i Jashtëm i Maqedonisë së Veriut, Bujar Osmani.

“Momenti ku ndodhemi sot është një moment i një rëndësie gjeostrategjike të posaçme, me luftën e Rusisë në Ukrainë, e cila e ka bërë Evropën që të vetëndërgjegjësohet se i nevojitet një qasje shumë më proaktive dhe shumë më srtategjike ndaj vendeve të Ballkanit Perëndimor”, theksoi Ministrja e jashtme shqiptare, Olta Xhaçka.

Olta Xhaçka dhe Bujar Osmani kanë diskutuar për lidhjet infrastrukturore siç është Korridori 8, nismat rajonale, për nevojën për më tepër shkëmbim tregtar, bashkëpunimin mbi sfidat kundër sulmeve kibernetike; për kompleksitetin në rajon nga zhvillimet në Ukrainë si dhe mbi Marrëveshjen e fundit në Ohër midis Kosovës dhe Serbisë.

“Kosova është interesi ynë kombëtar; Ne e kemi Kosovën në mendje dhe zemër saherë marrim një vendim qoftë në MPJ, qoftë në qeveri, por dhe në çdo instancë tjetër të gjithë establishmentit politik në Shqipëri ka mbështetje absolute për Kosovën, për anëtarësimin e saj në Këshillin e Evropës, për të gjithë procesin e njohjeve dhe për anëtarësimin e saj të mëtejshëm në organizata ndërkombëtare. Ne jemi të koordinuar me Kosovën gjatë gjithë këtij procesi; ne lobojmë për Kosovën ashtu siç lobojmë për Shqipërinë dhe besoj që me normalizimin e marrëdhënieve, me gjithë sa kemi parë gjatë këtyre ditëve në avansimin e dialogut Kosovë – Serbi, mendoj se anëtarësimi i Kosovës në KihE do të bëhet realitet shumë shpejt”, tha kryediplomatja shqiptare.

Ndërkohë, ministri i Jashtëm i Maqedonisë së Veriut, Bujar Osmani u shpreh: “Ata (Kosova dhe Serbia) janë fqinjët tanë; dhe ne mirëpresim çdo progres, stabilitet dhe mirëqenie për të gjithë rajonin. Pavarësisht interpretimeve të ndryshme të asaj për çka është dakorduar dhe se çfarë duhet të zbatohet, u pajtuam se ekziston marrëveshje dhe se palët duhet ta zbatojnë atë pa vonesë. Ajo që ne e konsiderojmë jashtëzakonisht të rëndësishme është që marrëveshja sipas parimeve dhe elementeve të saj të jetë gjithpërfshirëse dhe në një moment të rezultojë në njohje reciproke”.

Zoti Osmani tha se vendi i tij ka mbështetur dhe vazhdon ta mbështesë anëtarësimin e Kosovës në Këshillin e Evropës (KiE), si një vlerë e shtuar si për Këshillin, po ashtu edhe për vetë Kosovën dhe rajonin.

Zonja Xhaçka vlerësoi rolin e shqiptarëve të Maqedonisë së Veriut si kontribues të qëndrueshmërisë dhe procesit të integrimit evropian të vendit. Ajo u takua edhe me një pjesë të drejtuesve shtetërorë dhe politik në Shkup, teksa ka inkurajuar të gjithë aktorët politikë që të kontribuojnë me konstruktivitet në përmbushjen e angazhimeve dhe për ruajtjen e kësaj dinamike të mirë, siç tha, të avancimit me rezultate konkrete drejt integrimit në Bllokun evropian.

voa

Maqedonia, Nga këndi im

Shqiptarët jashtë kufijve kanë nevojë për prezencën me politika konsistente dhe largpamëse, të Prishtinës dhe Tiranës.

Komento

harta komunat shqiptareShqiptarët e ish IRJM, ashtu si gjithë shqiptarët e tjerë jashtë kufijve të Shqipërisë dhe Kosovës kanë patur dhe akoma kanë nevojë për prezencën me politika konsistente dhe largpamëse, të Prishtinës dhe Tiranës. Dhe kjo prezencë, në forma të ndryshme, ka qenë vendimtare për ruajtjen e sigurisë, vetëdijes kombëtare, gjuhës, kulturës.

Por a është sot kështu?

 

Idetë dhe ndjenjat liridashëse dhe patriotike me të cilat ishte brumosur Mujdin Aliu, një i ri shqiptar i lindur në fshatin Poroj të Tetovës, bënë që ai të rëmbente armën dhe ndër të parët t’ju bashkohej rradhëve të Ushtirë Çlirimtare të Kosovës, në luftën kundër ushtrisë okupatore serbe. Mujdin Aliu ra dëshmor në vendin e quajtur Maja e Gllavës, Kosharë, gjatë luftimeve të ashpra me ushtrinë serbe, për të thyer kufirin shqiptaro-shqiptar, të cilin serbët përpiqeshin ta mbajnë me çdo kusht. Pikërisht kjo sakrificë e Mujdin Aliut dhe bashkëluftëtarëve të tij, përfaqëson simbolikën më të rëndësishme dhe shumë domethënëse – atë të refuzimit të kufijve në mes të shqiptarëve.

Bilal23 vite pas rënies dëshmor të Mujdin Aliut, Glauk Konjufca, kryetar i parlamentit të Kosovës, do të vinte në Tetovë, qytetin e lindjes së Mujdin Aliut, për t’ua kujtuar familjarëve dhe bashkëqytetarëve të tij, kufijtë dhe marrëdhëniet „e shkëlqyera“ mes Kosovës dhe shtetit komb të „maqedonasve“. Për t’i bindur ata, se vrasësit që granatuan dhe vranë bashkëfshatarët dhe bashkëqytetarët e Mujdin Aliut gjatë luftës së 2001, nuk janë aq „të këqinj“ sa vrasësit që vranë Mujdin Aliun në Kosovë. Duke këkuar nga ata, që të bëjnë atë që Glauku, me të drejtë, refuzon ta bëjë në Kosovë – t’i falin vrasësit e tyre pa kërkuar ata falje dhe të bashkëqeverisin me ta. Duke kërkuar ti bindi ata se e drejta për vetëvendosje, që për shqiptarët në Kosovë rrezultoi me pavarësimin e saj, për të cilën Mujdin Aliu dha jetën, nuk vlen për ta!

 

Shqiptarët e ish IRJM, ashtu si gjithë shqiptarët e tjerë jashtë kufijve të Shqipërisë dhe Kosovës kanë patur dhe akoma kanë nevojë për prezencën me politika konsistente dhe largpamëse, të Prishtinës dhe Tiranës. Dhe kjo prezencë, në forma të ndryshme, ka qenë vendimtare për ruajtjen e sigurisë, vetëdijes kombëtare, gjuhës, kulturës… Duke filluar me periudhën e artë të rilindjes kombëtare 1941 – 1944, kur në shumicën e qyteteve shqiptare u shtri administrata e shtetit shqiptar të bashkuar, duke hapur për herë të parë, administratën në gjuhën shqipe, shkollat e para shqipe, institucionet e para kulturore shqiptare… Duke vazhduar me kontributin e institucioneve arsimore dhe kulturore të Kosovës (në atë kohë Krahinë Autonome) në arsimimin dhe ngritjen e vetëdijes kombëtare të studentëve shqiptar nga ish IRJM. Dhe duke përfunduar me mbështetjen që erdhi nga këto dy shtete shqiptare të pavarura, gjatë lufës së vitit 2001.

teuta

Por për fat të keq, kohëve të fundit kjo prezencë, që për mision kishte mbrojtjen e interesave kombëtare, ia la vendin ndikimeve të udhëhequra nga politika ditore, me interesa dhe motive krahinore dhe partiake. Institucionet e shtetit shqiptar, tregohen totalisht të painteresuar, përpos nevojës së herëpashershme të kryeministrit për teatër me partitë shqiptare të ish IRJM. Ndërsa prezenca e Vetëvendosjes, partia e vetme nga Kosova që tregoi interesimin për hapsirën politike të shqiptarëve në ish IRJM, para dhe pas ardhjes në pushtet, karakterizohet me mosnjohje të rrethanave politike dhe politikë jokonsistente, shkurtpamëse dhe stihike. Prezencë që filloi me urimet për fitoren e LSDM-se kundër VMRO-së të „korruptuar dhe antishqiptare“ dhe përfundoi me përkrahjen e koalicionit të ASH e më vonë LB me VMRO kundër LSDM-së të „korruptuar dhe antishqiptare“.

 

E painteresuar për nevojën e shqiptarëve për të drejta kolektive përmes ridefinimit të kushtetutes dhe shtetit, por shumë aktive në përkrahjen e partive „opozitare“ të cilësuar si „e keqja më e vogël“, në „luftën“ e tyre kundër BDI-së të cilësuar si „e keqja më e madhe, me „kauzën“ e vetme, për ta zëvendësuar atë në pushtetin unitar të ish IRJM.

Pikërisht kjo politikë ditore solli para pak ditësh Glauk Konjufcën në Tetovë në mbështetje të partisë erdoganiste „Besa“, duke degjeneruar një datë të rëndësishme të 25 vjetorit të rënies së Jasharajve, në një miting propagandistik partiak, ku defilonin të krekosur para kamerave „ministrat e ardhshëm“ të „Besës“ në qeverinë „në ardhje“ të VMRO. Po kjo politikë ditore, prodhoi edhe teatrin e shëmtuar ku partia tjetër erdoganiste, Alternativa, do të luante aktin e parë, “patriotik”, me kërkesën për “Asociacionin e Komunave Shqiptare në Maqedoninë e Veriut”, me “kompetenca të njëjta me ato që Bashkësia Ndërkombëtare do t’u jepte serbeve në Kosovë”. Ndërsa Glauk Konjufca do të luante aktin e dytë “kritik dhe konstruktiv”, me mesazhin drejtuar shqitparëve, por për veshët e bashkësisë ndërkombëtare, se “nuk ka zgjidhje territorial për probleme etnike”.

Shqiptarët në ish IRJM do të vazhdojnë të përkrahin pa rezerva qëndrimin e drejtë të Vetvendosjes ndaj presioneve të fundit, lidhur me të ashtuquajturin “normalizim të marrëdhënieve mes Kosovës dhe Serbisë” e në veçanti lidhur me kërcënimin që përfaqëson “Asociacionin e Komunave Serbe në Kosovë” për sigurinë dhe stabilitetin e shtetit të Kosovës dhe në përgjithësi të gjithë shqiptarëve. Duke qenë shumë të vetëdishëm se nuk ka një zgjidhje të lehtë për ata që kanë marrë mandatin si përfaqësues të Kosovës, përveçse shtrëngimi i dhëmbëve dhe ngulja këmbë në refuzimin e kërcënimit që “Asociacioni i Komunave Serbe” përfaqëson për sovranitetin dhe integritetin e shtetit të pavarur të Kosovës.

Por shqiptarët në ish IRJM nuk do të pranojnë në asnjë mënyrë që e drejta e tyre për ridefinimin e shtetit të ish IRJM, në funksion të të drejtave të tyre kolektive si grup etnik që përfaqëson së paku 30% të banorëve në shtet, të keqpërdoret për teatër, duke bërë paralelizma të papranueshëm, me asociacionin e kërkuar për serbët në Kosovë. Sepse, ashtu siç tha edhe Glauk Konjufca në fund të fjalimit të tij në akademinë solemne mbi “Epopene e UÇK-së,”, për sinqeritetin e të cilit na bëri të dyshojmë, edhe për shqiptarët në ish IRJM “pa liri nuk ka jetë”!

Afrim Fanda