Që nga themelimi i saj në vitin 2002 shoqëria bijë e Lufthansës u kthye në shpresën e koncernit. Qëllimi: Me leverdi për të triumfuar ndaj konkurrencës. Por bilanci i suksesit u errësua nga rrëzimi i avionit në Francë.

Realisht Germanwings u themelua si shoqëri fluturimi bijë e Euroëings AG në vitin 1997. Selia që në fillim ndodhej në Köln, ndërsa Lufthansa mbajti një tretën e aksioneve të saj.

Pesë vite më vonë shoqëria Eurowings GmbH u kthye ne Germanwings GmbH. Me pesë avionë të tipit Airbus A3190-100 kjo shoqëri filloi të fluturojë drejt destinacioneve të reja turistike nga aeroporti i Köln-Bonn-it. Fillimisht filozofia e firmës së re bazohej në konceptin “Pa lukse” – pra në emër të çmimeve të leverdisshme të fluturimit duhej hequr dorë nga shërbimet ekstra pa kosto për pasagjerët. Më vonë u afruan tarifa me më shumë komfort dhe u shtua numri i aeroporteve ku aderonin avionët e shoqërisë së re.

Forcimi i Germanwings megjithë kundërshtitë

Nga viti 2009 Germanwings ka kaluar plotësisht tek Lufthansa. Në kuadër të konkurrencës së ashpër në tregun e shoqërive që fitojnë terren me biletat e lira, Germanwings u bë gjithnjë e më e rëndësishme per Lufthansën. Christoph Franz, në vitin 2011 ende kryetari i bordit të Lufthansës e deklaroi si punë të tijën forcimin e shoqërisë bijë. Kritikët e akuzuan se me forcimin e Germanwings ai po dobëson markën e njohur Lufthansa. “Nuk vlen asgjë nëse ofrojmë një produkt me cilësi të lartë në treg, por që klienti nuk do ta blejë”, kundërshtoi Franz.

Pasuesi i Franz, Carsten Spohr vazhdon të ndjekë kursin e paraardhësit edhe më radikalisht. Si pasojë shumë destinacione të Lufthansës i kanë kaluar Germanwings, dhe sipas Spohr nga viti 2015 shoqëria e fluturimit do të ketë një bilanc pozitiv.

Germanëings do të zhduket në vitin 2015

Por nuk do ta zgjasë shumë dhe emri i njohur Germanwings do të fshihet nga Lufthansa. Carsten Spohr bëri të ditur në fund të vitit 2014 se është duke u planifikuar zgjerimi i markës Eurowings në kontekstin e zgjerimit të ofertave të leverdisshme. “Germanwings ishte e suksesshme, por për arsye kostosh ne do të kalojmë tek Eurowings”, tha Spohr. Nga ana tjetër kjo markë ka shanse të futet më shumë në tregjet europiane.

Shoqëria e re bijë e Lufthansës do të fluturojë edhe destinacione në Amerikë, në rajonet e Oqeanit Indian dhe Afrikë. Çmimi do të mund të jetë 40% më i lirë se tek Lufthansa. që të arrihen këto çmime parashihet të kursehet tek personeli, sepse personeli i shoqërisë Eurowings nuk ka të njëjtat tarifa si Lufthansa.

Ky plan nuk është mirëpritur nga sindikatat dhe është një ndër arsyet e grevave të shpeshta tek Lufthansa dhe Germanwings. Shoqëria bijë e Lufthansës që do të shndërrohet së shpejti në Eurowings është aktualisht pas Lufthansës dhe Air Berlin, shoqëria e tretë më e madhe e fluturimit në Gjermani. Ajo ka një kapacitet prej 85 avionësh dhe punëson më shumë 2000 punonjës. (dw)

Për breza të tërë, njerëzimi ka ëndërruar shkuarjen në planetin Mars për të eksploruar fqinjin më të afërt të tokës. Korrespondenti i Zërit të Amerikës Mike O’Sullivan njofton se ndërsa agjenci të hapësirës si NASA po planifikojnë misione me njerëz drejt planetit, disa vullnetarë në shtetin Hauai po mësojnë se si njerëzit t’i përshtaten muajve të izolimit në një bazë që simulon planetin Mars.

Një vullnetare po jeton prej tetë muajsh në një terren që ngjason me sipërfaqen e Marsit. Gjashtë njerëz janë izoluar në lartësinë e malit vullkanor Mauna Loa, në Ishullin e Madh në Hauai, që ngjason me një bazë në Mars. Projekti, i financuar nga NASA, quhet HI-SEAS. Kim Binsted me Universitetin e Hauait mbikëqyr projektin. Ajo thotë se kjo bazë është ambjenti tokësor më i ngjashëm me Marsin.

“Nga ana vizuale ngjason me Marsin. Duket që nuk ka jetë bimore apo shtazore. Kemi një bukuri vullkanike të formuar ngu shkrumbi i llavës në Mauna Loa.” 

Ekipi prej gjashtë vetësh brenda tendës jeton i izoluar. Personeli mbështetës sjell ushqime dhe furnizime, por nuk lejohet komunikimi me ta. Zonja Binsted thotë se eksperimenti studion bashkëveprimin mes astronautëve.

“Studiojmë se sa mirë punojnë së bashku, si mund t’i mbajmë të kënaqur dhe me furnizime që të mos kenë konfrontime gjatë kësaj kohe tepër të gjatë.” 

Ekipi aktual jeton në tendë që nga muaji tetor dhe do të qendrojë deri në qershor. Ka patur edhe dy ekipe të tjera.

Pjestarët mbajnë lidhje me botën e jashtëme përmes emailit dhe blogjeve.

Dhe përmes videove në YouTube, si kjo nga komandantja e misionit Martha Lenio.

Po ashtu edhe përmes një programi të telefonave celularë që mundëson një komunikim me vonesë 20 minuta sikurse do të ndodhte nga Marsi.

“Po e shijoj këtë mundësi për të jetuar në këtë tendë dhe pretenduar që jam në Mars dhe po mësoj aftësi të reja.”

Por, ky nuk është i vetmi grup vullnetarësh që aspiron Marsin. Një organizatë e quajtur Mars One me qendër në Holandë, ka kërkuar vullnetarë nga e mbarë bota për ata që duan të shkojnë në Mars.

Ky student  inxhinierie nga India është një prej finalistëve të projektit ambicioz privat që po përpiqet të bëjë diçka. Vëzhguesit besojnë se agjencitë hapsinore të Amerikës dhe Evropës kanë më shumë shanse të arrijnë synimin nga viti 2030 apo më vonë. Pavarësisht se kush është i pari, thotë zonja Bindsted, ndërmarrja nuk do të jetë e lehtë.

Ndërkohë, vullnetarët po shijojnë copëza të jetës në një bazë imagjinare të Marsit. (voa)

Policia gjermane kontrolloi banesat e pilotit gjerman që mendohet se shkaktoi rrëzimin e avionit të linjës Germanwings në Alpet franceze duke vrarë veten dhe 149 personat e tjerë në bord. Sipas zyrës së prokurorit gjerman, piloti po merrte mjekim për probleme shëndetësore që nuk ia kishte bërë të ditura kompanisë.

Policia kontrolloi sot dy banesat që përdorte 27 vjeçari Andreas Lubitz kur nuk ishte me shërbim: një apartament në Duseldorf dhe banesën e prindërve në Montabour. Policia tha se ka marrë një numër objektesh si prova materiale.

Gjatë kontrollit të banesave, autoritetet gjetën “leje mjekësore” të grisura.

Një deklaratë nga prokurorët thotë se dokumentat mjekësore të gjetura tregojnë “ekzistencën e një sëmundje dhe trajtimin mjekësor të përshtatshëm për të”.

Deklarata nuk zbulon llojin e sëmundjes por media gjermane ka spekuluar se Lubitz vuante nga depresioni.

Dje, prokurori francez Brice Robin tha në një konferencë për shtyp se me sa duket Lubitz kishte rrëzuar avionin pasi kishte lënë jashtë kabinës së komandimit pilotin kryesor.

Prokurori tha se regjistrimet nga kutia e zezë e avionit tregojnë se Lubitz kishte çaktivizuar sistemin automatik të drejtimit të avionit duke e detyruar vetë avionin të zbriste gradualisht për tetë minuta, me një shpejtësi 700 km/orë.

Zyrtarët thonë se Lubitz nuk ishte në ndonjë listë të të dyshuarve për aktivitet terrorist. Media gjermane njofton se ai kishte marrë pushime në të kaluarën me arsyetimin se ndjehej i stresuar si dhe për probleme depresioni.

Mattias Gebauer, korrespondent për të përditshmen gjermane Der Spiegel citoi sot shokë shkolle të Lubitzit, sipas të cilëve ai ishte shkëputur për gjashtë muaj gjatë kursit si pilot në 2009, pasi ndjehej i lodhur psikologjikisht. Këto njoftime gjejnë jehonë edhe në një artikull nga gazeta gjermane Bild, e cila njofton se Lubitz mund të ketë qenë duke marrë kura kundër depresionit.

Zyrtarët e kompanisë Lufthansa nuk i kanë konfirmuar këto njoftime, megjithëse Shefi Ekzekutiv Carsten Spohr ka thenë se nuk ka si ta dijë nëse problemet shëndetësore ishin shkaktare për shkëputjen e pilotit nga kursi përgatitor, pasi ligjet gjermane të privacisët nuk lejojnë që hollësi të tilla të bëhen publike. Zoti Spohr ka shprehur shok nga përfundimet e prokurorit që piloti Lubitz e shkaktoi qëllimisht rrëzimin e avionit. Ai tha se analizat mjekësore të Lubitzit tregonin se ai ishte 100% i aftë për të kryer rolin e pilotit.

Prokurori Robin tha se regjistrimet në kabinën e pilotit tregojnë se pasagjerët nuk ishin në dieni të trajektores së frikshme që po ndiqte avioni, deri në momentet e fundit para rrëzimit kur dëgjohen britma.

Zoti Robin shton se regjistrimet tregojnë gjithashtu se piloti kryesor, i cili kishte dalë për të shkuar në banjo, i ra disa herë derës që piloti Lubitz ta lejonte të kthehej në kabinë, por trokitjet e tij pasohen gjithmonë me heshtje. E vetmja zhurmë që dëgjohet në kabinë është frymëmarrja e pilotit Lubitz.

“Nuk është frymëmarrje e vështirësuar, thjesht frymëmarrje e qetë,” thotë prokurori duke shtuar se nuk është zbuluar ndonjë lidhje mes këtij akti dhe ndonjë synimi terrorist.

Fluturimi 9525 ishte nisur nga Barcelona për në Duseldorf me 144 pasagjerë dhe gjashtë pjesëtarë të ekuipazhit, kur u rrëzua 100 kilometra në veri të qytetit francez Nisë. Nga avioni nuk u dërguan sinjale rreziku gjatë zbritjes vdekjeprurëse.

Personat në bord ishin nga 18 vende, 72 prej të cilëve gjermanë dhe të paktën 35 spanjollë. (dw)

Ndërkohë që një sulm me bombë ofron pamje dramatike për edicionet e lajmeve, çdo ditë ka aktivitete pothuajse të padukshme që mund të krijojnë shkatërrim më të madh. Ekzistojnë ndërhyrje në sistemet qeveritare dhe të korporatave private që mund të ndërpresin shërbime jetësore dhe të ndalojnë tregtinë normale.

Kur uragani Sandy goditi zonën e qytetit të Nju Jorkut në vitin 2012, mijëra vetë mbetën pa shërbimet jetësore, si elektriciteti dhe transporti, ndërkohë që ekipet e mirëmbajtjes luftonin të rikthenin sistemet në punë.

Çdo ditë, hakera keqdashës përpiqen të shkaktojnë një shkatërrim të tillë ndërkohë që kontrollojnë kompjuterat që komandojnë këto sisteme.

Shqetësimet për kërcënime të tilla dhe ndërhyrje kriminale mblodhën së bashku përfaqësues të qeverisë dhe sektorit privat në konferencën e sigurisë kibernetike të Chertoff Group.

Një shqetësim i veçantë këtu në Hjuston është kërcënimi ndaj sistemeve të energjisë.

Ish-sekretari i sigurisë kombëtare Michael Chertoff është kryetar i organizatës sponsorizuese.

“Kemi gjetur kode keqdashëse në sistemet e energjisë. Nëse ndodheshin aty për të vjedhur informacion ose për t’u parapërgatitur për sulme, është çështje spekullimi. Një kompani energjie, Saudia Aramco, u sulmua, dhe megjithëse nuk ia dolën ta nxjerrin nga rrjeti, u tregua se kompanitë e tilla janë shënjestra për sulme.”

Zoti Chertoff thotë se gjasat janë të ketë më shumë kërcënime ndaj sistemeve të kontrollit të industrisë energjitike nga terroristët dhe disa qeveri të huaja armiqësore.

Stuart McClure, drejtor ekzekutiv i “Cylance”, thotë se programet e kompanisë së tij mbrojnë klientët nga pjesa më e madhe e kërcënimeve, por se edhe vetë firma “Cylance” bëhet shpesh objekt i sulmeve të sofistikuara.

“Të vetmit që mund të realizojnë sulme të tilla janë qeveri të mëdha, me buxhet të madh dhe shumë njerëz që ekzaminojnë punën tonë dhe që mundohen ta prishin.”

Ekspertët thonë se teknologjia ofron vetëm një pjesë të zgjidhjes dhe se duhet gjithashtu vigjilencë e përhershme për të ruajtur sigurinë kibernetike.

Kompanitë ofrojnë trajnim sigurie për të paralajmëruar ndaj ndërhyrjeve të tilla, si p.sh. futja në një kompjuter rrjeti të një USB-je të panjohur.

Drejtori i firmës së sigurisë kibernetike “SS8, Inc.”, Faizel Lakhani, thotë se faktori njerëzor është i rëndësishëm pasi zgjidhjet teknologjike tentojnë të jenë shumë kufizuese.

“Ekonomia jonë dhe interneti janë të bazuara në një model ndërvarësie, në aftësinë për të komunikuar gjerësisht dhe për të ndarë idetë. Kur e kufizon këtë nëpërmjet një zgjidhjeje teknologjike, atëherë në thelb po heq avantazhin kryesor që ne kemi në Amerikë.”

Zoti Lakhani thotë se njerëzit në çdo organizatë do të bëjnë gabime që lejojnë ndërhyrjet në rrjet, dhe ai thotë se kompanitë duhet ta pranojnë këtë realitet dhe të zhvillojnë metoda për të identifikuar dhe zmbrapsur kërcënimet.(voa)