Pas incidentit në Gushincë Kanë reaguar edhe ekspertët e sigurisë, që besojnë se ngjarja e Goshincës mund të jetë përpjekje për tërheqjen e vëmendjes nga kriza politike.

Policia e ka quajtur “sulm terrorist” incidentin, për të cilin njoftoi të ketë ndodhur në orët e para të mëngjesit (21.04.2015) në pikën kufitare në fshatin Gushincë të Komunës së Likovës, pavarësisht se nuk ka pasur as krisma e as të lënduar. Sipas versionit të policisë një grup prej rreth 40 personash, me uniformë të UÇK-së dhe armatim të rëndë, kanë hyrë nga Kosova dhe kanë marrë nën kontroll pikën kufitare, duke mbajtur peng edhe 4 policët maqedonas. “Maqedonia ishte shënjestër e një sulmi terrorist. Rreth orës 2:30 pas mesnate një grup i madh prej rreth 40 personash sulmuan kullën kufitare të Gushincës në afërsi të kufirit verior. Personat kanë qenë të armatosur me uniforma dhe maska me shenja të UÇK-së, si dhe kanë folur shqip mes tyre. Gjatë sulmit janë mbajtur peng 4 policë, të cilët në atë moment kanë qenë kujdestarë në pikën e kontrollit”, deklaroi Ivo Kotevski, zëdhënës i MPB-së.
Gjithnjë sipas Kotevskit grupi i armatosur është tërhequr, duke iu lënë afat gjysmë ore, që edhe policët të linin pikën e kontrollit.

Duraku: Nuk kemi vërejtur grupe të dyshimta

Kryetari i komunës së Likovës, Sadulla Duraku, zyra e të cilit gjendet dhjetë kilometra nga vendi i incidentit, thotë se nuk ka informacione se persona të armatosur kanë qëndruar në rajonin e Karadakut të Kumanovës. “Ne si këshill komunal do të kërkojmë nga MPB ndriçimin e këtij incidenti. Ne nuk kemi informata, që persona të armatosur janë vërejtur në fshat. Në komunë nuk është paraqitur askush të ankohet për diçka të tillë”, thotë kryetari i komunës së Likovës, Sadulla Duraku .

Partitë politike me apel për qetësi

Bashkimi Demokratik për Integrim, partia shqiptare në koalicionin qeveritar, përmes një kumtese me shkrim reagoi ndaj incidentit në Goshincë. Sipas BDI-së, ato dëmtojnë rëndë axhendën e shqiptarëve në Maqedoni.
“Ky incident dëmton axhendën e shqiptarëve në Maqedoni, në veçanti dhe atë kombëtare në përgjithësi. BDI fton qytetarët, që të mos te shqetësohen dhe mos te bien pre e provokimeve të tilla”. BDI kërkon nga institucionet kompetente, që të marrin përgjegjësi për të garantuar siguri për qytetarët dhe sa më parë të zbardhin këtë rast.

VMRO-DPMNE përmes një komunikate me shkrim e dënon këtë akt terrorist, i cili ka për qëllim destabilizimin e Maqedonisë
“I ftojmë institucionet, që në mënyrë të vendosur të veprojnë për zbardhjen e këtij rasti dhe ta sigurojnë ligjin, sigurinë dhe stabilitetin. Të gjithë bartësit politikë, individët dhe partitë duhet që në mënyrë të përgjegjshme të veprojnë në këto momente, të përmbahen nga manipulimet dhe të mos nxisin tensione për qëllime të ngushta partiake dhe personale”, thuhet në reagimin e VMRO-DPMNE-së.
Lëvizja BESA e dënon ashpër incidentin në Goshincë dhe i fton të gjitha subjektet relevante vendore dhe ndërkombëtare për qetësimin e situatës dhe izolimin e grupeve destabilizuese. Lëvizja BESA në këtë sulm vëren një inskenim të radhës për zhvendosjen e vëmendjes dhe krijimin e gjendjes së tensionuar, që në fund kjo të kthehet në përfitim politik për subjekte të caktuara në Maqedoni.

LSDM-ja opozitare ka dënuar sulmin në stacionin policor në Gushincë të Komunës së Likovës. Nënkryetarja e LSDM-së, Frosina Remenski, vlerëson se incidenti është skenar i përgatitur nga pushteti me qëllim shmangien e pushtetarëve nga përgjegjësia penale. Remenski thotë se të gjithë ata, që ndihmojnë këtë skenarë, janë bashkëpunëtorë në tentativën për shfajësimin e pushtetit nga veprat e mundshme kriminele, që po zbardhen me anë të bombave të opozitës.
“Tentativa për të përfshirë Maqedoninë në konflikt etnik të paguar, drejtuar dhe iniciuar me vetëdijesi skenarë për shmangien e pushtetit nga përgjegjësia penale, është akt tradhtar dhe anti-shtetëror i të gjithë të përfshirëve kundër popullit dhe shtetit të vetë”, vlerëson Frosina Remenski, nënkryetare e LSDM-së.

Analistët: Kujdes me marrëdhëniet ndëretnike

Ekspertët e sigurisë besojnë se ngjarja e Goshincës mund të jetë përpjekje për tërheqjen e vëmendjes nga kriza politike. Eksperti për çështje të sigurisë, Ivan Babanovski, ka hedhur poshtë insinuatat e MPB-së se sulmi është bërë nga shqiptarët . “Këtë skenar nuk e mbështesin pjesa më e madhe nga rradhët e BDI-së. Përcillini këto ngjarje dhe gjeni vetëm një njeri në Maqedoni, që do të besojë në këtë punë dhe lojëra qesharake”, thotë eksperti për siguri, Ivan Babanovski.

Edhe opinionisti Milazim Mustafa thotë, se ky incident i ngjan më shumë një ngjarjeje të fabrikuar, se sa një sulmi të organizuar nga ndonjë formacion i uniformuar. “Qytetarët u shqetësuan nga ky incident, sidomos pas komenteve të ditëve të fundit, se partia maqedonase në pushtet do të përpiqet të krijojë ndonjë incident për të tërhequr vëmendjen nga afera e përgjimeve dhe një terren i përshtatshëm është pikërisht rajoni i Likovës, shkaku i pozitës strategjike dhe afërsisë me Kosovën. Por popullata nuk duhet të bjerë pre e provokimeve, që mund të vijnë nga faktorë të ndryshëm, sepse për momentin asnjë faktori shqiptar nuk i shkon për shtati hapja e një krize të re”, vlerëson Milazim Mustafa.

Analisti politik Albert Musliu mendon se kriza momentale nxitet nga grupe të caktuara, me qëllim tërheqjen e vëmendjes kah vetvetja dhe të shfrytëzohet rasti për interesa personale. “E para, mirë është që nuk kemi pasoja më të rënda dhe viktima në njerëz. Ka pasur tortura, por nuk ka pasur viktima. E dyta, situata momentale është e tillë, që grupe të ndryshme do të provojnë që ta tërheqin vëmendjen kah vetja dhe ta shfrytëzojnë për qëllime të tyre. Por nuk e dimë, se kush është ky grup i armatosur”, deklaron Albert Musliu
Vendi i incidentit është vizituar edhe nga përfaqësues të OSBE-së. Stacioni policor në Gushincë është përsëri nën kontroll të MPB. (dw)

Në rajonin e komunës së Likovës po mbretëron një situatë e qetë, por me një prani më të shtuar policore.

Incidenti i djeshëm në zonën kufitare Maqedoni – Kosovë kur një grup i armatosur mori nën kontroll postën kufitare policore në fshatin Goshincë ka shtuar tensionet dhe mëdyshjet tek qytetarët se çfarë në të vërtetë po ndodhë, duke qarkulluar informacione kontradiktore.

Policia theksoi se bëhet fjalë për një atak terrorist ndaj institucioneve të sigurisë dhe se ajo është në kërkim të personave që kanë ndërmarrë sulmin dhe kontrollin e postës, e cila u la e lirë pas disa orëve.

Lidhur me këtë sulm dje  organizatë e thirrur në UÇK përmes një komunikate shpërndarë mediave mori përsipër kryerjen e këtij sulmi, por duke mos dhënë detaje dhe zbuluar identitetin e tyre.

Situata po vazhdon të nxis kurreshtje dhe pikëpyetje të ndryshme.  Dy partitë e koalicionit VMRO-DPMNE dhe BDI kanë dhënë komente dhe vlerësime kontradiktore mbi incidentin. VMRO këtë akt e quajti sulm terrorist, derisa BDI ka theksuar se sulmi dëmton agjendën e shqiptarëve dhe kërkon siguri dhe izolimin e këtyre grupeve edhe përmes aktiviteteve rajonale, duke nënkuptuar Kosovën.  Partia opozitare maqedonase LSDM ka akuzuar se incidenti është skenar i pushtetit me qëllim shmangien e pushtetarëve nga përgjegjësia penale, pas aferës së pëgjimeve për skandale korruptive dhe kriminale.

“Skenari i paguar dhe i përgatitur mediatikisht i pushtetit për nxitjen e mos tolerancës ndër-etnike dhe shpikja e armiqve dhe sulmeve, janë përgjigjja dhe vendi i kërkimit të përgjegjësisë për gjithçka që ndodh dhe që mund të ndodhë”, deklaroi nënkryetarja e LSDM-së, Frosina Remenski.

Derisa po vazhdojnë reagimet, njësitet speciale dhe forcat e rregullta policore me jelekë antiplumbë dhe kallashnikovë po patrullojnë në një hapësirë me perimetër prej 15 kilometrave në këtë zonë që është disa kilometra nga kufiri me Kosovën.

Zona kufitare vazhdon të ndiqet edhe nga helikopterë të policisë, ndërsa nga orët e para të mëngjesit në terren janë edhe ekipet e OSBE-së. (INA)

Ushtria Çlirimtare Kombëtare përmes një komunikate për media të nënshkruar nga “Komandant Flamuri” e ka marrë përseripër aksionin e sotëm në fshatin Gushincë, ku katër policë të Maqedonisë u zunë rob në stacionin e këtij fshati kufitar.

Lexojeni të plotë komunikatën e UÇK-së:

Diskriminimi dhe shtypja e shqiptarëve në Maqedoni është bëre e padurueshme.

Dekadenca dhe paaftësia politike, diskriminimi ekonomik, kulturor e social e ka bërë të pashmangshëm rizgjimin e U.Ç.K-së.

Ne i bëjmë thirrje të gjithë policëve, sidomos atyre shqiptarë që menjëherë të dorëzojnë uniformat dhe te bashkëngjiten kryengritjes.

Thirrje e veçantë i bëhet dhe ushtarëve që menjëherë të marrin anën e popullit e jo te oligarkëve fashistë qe do i dërgojnë drejt vdekjes.

I bëjmë thirrje gjithë faktorit politikë që menjëherë të ngrijnë aktivitetin e vetë në Maqedoni.

Fitorja e parë e U.Ç.K-së në Gushincë na jep vullnet për fitore të tjera dhe më të mëdha e të lavdishme.

Popullin shqiptarë po e presin ditë të mira.

Presim përkrahje të shqiptarëve kudo që janë.

Komandant Flamuri

Maqedoni

21.04.2015

Presidenti Gjorge Ivanov thirri një mbledhje, në të cilën të gjitha institucionet që kanë të bëjnë me mbrojtjen, sigurinë e vendit dhe shërbimet e kundërzbulimit, do të informojnë krerët e shtetit për ngjarjet aktuale.

Takimi do të mbahet në Kabinetin e Presidentit, pas kthimit në vend edhe të kreut të Qeverisë dhe të Kuvendit. Data e mbajtjes së takimit do  të njoftohet në të ardhmen, në një njoftim të radhës nga Presidenca. Alsat-M

LSDM-ja opozitare ka dënuar sulmin e sotëm në stacionin policor në Gushincë të Komunës së Likovës.

Nënkryetarja e LSDM-së Frosina Remenski vlerëson se incidenti është skenar i përgatitur nga pushteti me qëllim shmangien e pushtetarëve nga përgjegjësia penale. Remenski thotë se të gjithë ata që ndihmojnë këtë skenarë, janë bashkëpunëtorë në tentativën për shfajësimin e pushtetit nga veprat e mundshme kriminele që po zbardhen me anë të bombave të opozitës.

“Tentativa për të përfshirë Maqedoninë në konflikt etnik të paguar, drejtuar dhe iniciuar me vetëdije si skenarë për shmangien e pushtetit nga përgjegjësia penale, është akt tradhtar dhe anti-shtetëror i të gjithë të përfshirëve, kundër popullit dhe shtetit të vetë. Çfarëdolloj përgatitje, mundësim, ndihmë ose pjesëmarrje e vetëdijshme në dhunë të tillë, por edhe të formave të tjera, përbën akt ndihmese të drejtpërdrejtë në anashkalimin e përgjegjësisë të këtij pushteti kriminal. Skenari i paguar dhe i përgatitur mediatikisht i pushtetit për nxitjen e mos tolerancës ndër-etnike dhe shpikja e armiqve dhe sulmeve, janë përgjigjja dhe vendi i kërkimit të përgjegjësisë për gjithçka që ndodh dhe që mund të ndodhë”, tha Frosina Remenski, Nënkryetare e LSDM-së. Alsat-M

Kosovës hedhin poshtë pretendimet e homologëve nga Maqedonia se grupi i dyshuar që ka sulmuar stacionin policorë të Goshincës, mund të ketë qenë nga Kosova.

Pavarësisht se një gjë e tillë nuk theksohej në mënyrë të prerë, autoritetet e Maqedonisë aluduan se sulmuesit flisnin shqip, me serbizma, duke lënë të ku7ptohej se ata mund të ishin formacion UÇK-je nga Kosova

“Policia e Kosovës ka planin operativ për mbulimin dhe kontrollin e vijës kufitare, duke përfshirë patrullimet e përbashkëta me zyrtarët kufitarë të Maqedonisë dhe mund të konfirmojmë se gjatë realizimit të detyrave policore nuk është vërejtur asnjë element apo lëvizje e individëve apo grupeve të dyshuara nga Republika e Kosovës drejt Maqedonisë dhe anasjelltas”.

Sipas policisë së Kosovës, forcat e saj vazhdojnë të përmbushin detyrën për menaxhimin dhe kontrollimin kufitar, me qëllim parandalimin e krimit trans-kufitar. Nga ana tjetër, edhe Ministria e Jashtme e Kosovës e dënuan aktin, duke ofruar madje edhe ndihmë në hetimin e rastit.

“Ministria e Jashtme dënon ashpër çdo akt të dhunshëm ndaj organeve të rendit në Republikën e Maqedonisë, dhe njëkohësisht bën thirrje për hetim të paanshëm dhe profesional. Ministria e Jashtme shpreh edhe gatishmërinë të ndihmojë autoritetet maqedonase në gjetjen e autorëve të këtij akti”.

Sipas reagimit të Prishtinës Zyrtare, Republika e Kosovës si faktor stabiliteti në rajon, mbetet e përkushtuar në avancimin e frymës së fqinjësisë së mirë duke respektuar integritetin dhe sovranitetin territorial të Republikës së Maqedonisë si shtet fqinjë, si dhe të implementimit të plotë të Marrëveshjes së Ohrit.  Alsat-M