Udhëheqësi i LSDM-së opozitare, Zoran Zaev publikoi këtë të premte disa biseda të përgjuara, ku sipas tij dëgjohen ish-ministrja e Brendshme, Gordana Jankullovska, zëvendësi i saj Ivo Kotevski, ish-shefi i Shërbimit Sekret, Sasho Mijallkov, si dhe shefi i kabinetit të Gruevskit, Martin Protugjer, duke shprehur padurimin e tyre ndaj shqiptarëve.

Në një bisedë, ku sipas opozitës flet Jankullovska, ajo dëgjohet duke thënë se brenda një ore mund t’i shtypë shqiptarët, për t’i pastruar përgjithmonë llogaritë me ta.

Zëri, për të cilin Zaev tha se është i Mijallkovit, pajtohet me Jankullovskën, por sipas tij, për një gjë të tillë nevojitet konsensus midis maqedonasve. Opozita nuk e tregoi kohën, se kur janë zhvilluar këto biseda.

Biseda mes Gordana Jankullovskës dhe Martin Protugjer;
Zëri 1 (Jankullovska): Duhet të pastrojmë llogaritë përgjithmonë.
Zëri 2 (Protugjer): Shëndet…
Zëri 1: Jo, këto janë çështje strategjike.
Zëri 2: Sikur të bënin luftë?
Zëri 1: Nëse duam të tregojmë kush është më i fortë, për një orë duhet t’i shkatërrojmë, por idea është që të mos tregojmë muskuj.

Biseda mes Sasho Mijallkovit dhe Gordana Jankullovskës;
Zëri 1 (Mijallkov): Zgjidhje ka, por ne nuk kemi konsensus kombëtar, kurse zgjidhje menjëherë gjendet.
Zëri 2 (Jankullovska): Edhe unë jam për një zgjidhje të tillë, për hir të së vërtetës. T’i pastrojmë përgjithmonë.

Kreu i opozitës maqedonase publikoi edhe disa biseda të tjera të përgjuara, që sipas tij zhvillohen midis Jankullovkës dhe ndihmësit të saj, Ivo Kotevski, lidhur me vrasjen e dy shqiptarëve nga një pjesëtar i Policisë maqedonase në vitin 2012, në qytetin e Gostivarit. Gjatë bashkëbisedimit, ata nuk kursejnë fyerjet ndaj shqiptarëve, për të cilët urojnë të kenë fatin e dy bashkëkombësve të tyre të vrarë.

Biseda midis Ivo Kotevskit dhe Gordana Jankullovskës;
Zëri 1 (Ivo Kotevski): Neve na votojnë maqedonasit dhe reagimi i tyre është “ashtu duhet, që herën tjetër të mendohen se çfarë bëjnë”.
Zëri 2 (Jankullovska): Po, po.
Zëri 1: Sepse ata llogariten si të egër. Nëse e provojnë përsëri, do të humbin edhe dy të tjerë.
Zëri 2: Po, po. Kështu u ngjajnë egërsirave. Pajtohem.

Udhëheqësi i opozitës, Zoran Zaev tha se këto materiale zbulojnë faktin, se qeveria e Gruevskit është nxitësi kryesor i tensioneve ndëretnike në vend.

“Gruevski, ti je krijuesi i krizave në Maqedoni. Nuk ke fytyrë t’i mbrosh forcat e sigurisë, pasi para disa ditëve humbën jetën 8 policë, kurse tani e kemi të qartë pse. Ti krijon kriza të sigurisë së vendit. Punon fshehurazi për shkatërrimin e Maqedonisë, në kundërshtim me vullnetin e shumicës së qytetarëve, që dëshirojnë një Maqedoni të qëndrueshme, të sigurt dhe me perspektive evropiane”, është shprehur Zoran Zaev.

Udhëheqësi i opozitës maqedonase tha se protestat masive, që do të fillojnë të dielën, do të vijojnë deri në rrëzimin e kryeministrit Gruevski nga pushteti.

/ Top Channel

Ministri i Jashtëm i Rusisë, Sergei Lavrov, ka thënë se incidentet e fundit në Maqedoni dhe situata në Kosovë nuk japin kurrfarë optimizmi.

Shqetësuese, sipas tij, janë edhe dëshirat e udhëheqjes shqiptare për krijimin e “Shqipërisë së Madhe”. Lavrov i ka bërë këto komente në Beograd, pas takimit me homologun serb, Ivica Daçiq. “I bëjmë thirrje Bashkimit Evropian, që përmes pranisë së tij në Ballkan, t’iu kushtojë vëmendje të veçantë këtyre tendencave shqetësuese, e veçanërisht shprehjes së qartë të terrorizmit”, ka thënë Lavrov. Sipas tij, asnjë politikan i arsyeshëm nuk mund të qëndrojë gjakftohtë ndaj këtyre thirrjeve. Lavrov ka këmbëngulur se ngjarjet në Kumanovë kanë qenë “aksione terroriste, të përgatitura mirë”. Alsat-M

Lideri i opozitës, Zoran Zaev sot ka publikuar bombën e 32-të më dëshmi të shumta që sipas tij nxjerrin në shesh fytyrën e vërtetë të pushtetit aktual, i cili paraqitet si nxitësi kryesor i tensioneve ndëretnike në vend. Janë publikuara biseda të shumta mes zyrtarëve të lartë të cilët shprehin mos-durimin e tyre në veçanti ndaj shqiptarëve. Si protagonistë e fyerjeve të rënda sërish paraqiten, Gordana Jankullovska, Sasho Mijallkov, Ivo Kotevski, e të tjerë përfshirë edhe kryeministrin Gruevski.

Zaev ka publikuar të dhëna edhe për vrasjen e dy shqiptarëve në Gostivar nga një polic maqedonas. Jankullovska dhe Kotevski flasin duke për plane për ta bërë dramë të vërtetë rastin në fjalë. Jankullovska sërish ofendon shqiptarët ndërsa Kotevski rrëfen se si maqedonasit dëshirojnë që të gjithë shqiptarët të kenë fatin e njëjtë.

Në disa biseda tjera janë publikuar edhe biseda për plane dhe kërcënime ndaj gazetarëve dhe të gjitha atyre që nuk mendojnë njëjtë si pushteti. Plane për likuidime në veçanti janë bërë ndaj gazetarit Bozhinovski ndërsa në një bisedë tjetër Protuger thotë se ai personalisht do ta vrasë gazetarin Llatas.

Kreu i LSDM-së tha se dëshmitë e prezantuara flasin qarë për kriminalitetin e pushtetit aktual i cili duhet të ikë sa më parë. Zaev foli edhe për protestën e së dielës duke bërë thirrje për pjesëmarrje masive të të gjithë qytetarëve pa dallim përkatësinë e tyre etnike dhe fetare.

alsat

‘Na ndihmo që të dalim të gjallë prej këtu sepse kemi gabuar dhe më kurrë s’do ta bëjmë këtë gabim’. Me këtë kërkesë grupi i armatosur iu kishin drejtuar liderit të BDI-së Ali Ahmetit, të shtunë kur po zhvilloheshin luftime në lagjen e trimave në Kumanovë.

Ahmeti, në Rruga Drejt, tha mbrëmë se grupi i armatosur kishin kërkuar një korridor për tu larguar nga vendi i luftimeve. Por, Ahmeti thotë se nuk kishte mundur të merr një përgjegjësi të tillë nga frika se dikush do të mund ti kishte vrarë. Pas një kohe, siç shpjegon Ahmeti kishin qenë vetë pjesëtarët e grupit të armatosur ata që kishin kërkuar të dorëzohen, që të mos digjen të gjallë në flakët e luftimeve që u zhvilluan në lagjen e trimave në Kumanovë për dy ditë radhazi.

“Unë asnjëherë nuk kërkova që ata të dorëzohen. Ata vetë e paraqitën opsionin e dorëzimit dhe pasi ja kam propozu organeve, ekipi që unë e dërgova, pas dy orësh më ka thirr Nikolla Gruevski. Më tha çka mendon për gjendjen, thash unë njerëzit i dërgova propozimin projektin e dorëzova, tha ajo a mund të bëhet. Thash sigurisht se mund edhe të bëhet sepse nuk është mirë as për shtetin as për banorët dhe kështu duhet të marrë fund kjo përleshje”, deklaroi Ali Ahmeti, kryetar i BDI-së.

Ahmeti thotë se para përleshjeve në Kumanovë, gjegjësisht pas sulmit në Goshincë kishte dërguar Sadulla Durakun që të bind komandant Sokolin të heqin dorë nga veprime të këtilla, por i njëjti kishte mohuar çdo përfshirje eventuale në atë sulm. Ahmeti tha se ai kishte qenë kundër një konflikti të armatosur pasi vlerëson se kjo shkon në dëm të shqiptarëve.

“Kam qenë njeriu që kam shpjeguar që nuk është në interes të shqiptarëve ndarja e Maqedonisë, nuk është në interes të shqiptarëve në tërësi çdo veprimtari që ushtrohet dhunë apo përdoret arma. Në këtë rast ne jemi të dëmtuar si shqiptarë në tërësi, edhe Kosova edhe Shqipëria, sepse mund të keqpërdoret nga dashakeqas të shqiptarëve se ja shqiptarët janë ata që e destabilizojnë vendin. Dhe unë po e them këtu përpara jush dhe u them gjithë shqiptarëve se nuk është në interes të gjithë shqiptarëve as ndarja e Maqedonisë, sepse nuk ke si e ndan, nuk ke vija demarkacioni”, tha Ali Ahmeti, kryetar i BDI-së.

I pyetur për protestën e 17 majit të thirr nga opozita, Ahmeti tha se BDI nuk do t’i mbështeste në rast se përdoret dhunë. Në të kundërtën, kreu i BDI-së, Ali Ahmeti, ftoi që lirshëm të dalin dhe të protestojnë në mënyrë paqësore të gjithë ata që kanë pakënaqësi.

“E drejtë e çdo subjekti është që të protestojë, paqësisht, pa ushtrim dhune le ti shprehe kërkesat e veta. Në atë moment që ushtrohet dhunë nuk kanë përkrahje të bashkimit Demokratik për Integrim. Të gjithë le të dalin në protesta le të shprehin pakënaqësitë e tyre, pa përdorur dhunë”, u shpreh Ali Ahmeti, kryetar i BDI-së.

Duke folur për Sulejman Osmanin, personi i cili kishte arritur ti arratisej policisë, Ahmeti ngre dyshime madje se si është e mundur që me pranga në duar tu ikë policëve. Ahmeti tha se personi në fjalë, në vitin 2001 ka qenë i arrestuar nga UÇK si person i dyshimtë. Arben Zeqiri

Sylejman Osmani, të cilin policia maqedonase e arrestoi gjatë luftimeve në Kumanovë, por ai arriti tu ikë policisë, rrëfen se si mundi të ik i lidhur me pranga dhe i plagosur.

Ai në pjesën e dytë të intervistës në RTK ka treguar se në detaje se si ka arritur tu ikë 20 policëve të Maqedonisë.

Omsani po ashtu ka treguar se si ka ndodhur zënka mes Policisë së Maqedonisë dhe asaj shqiptare, e qe thotë se ky moment i shërbeu për tu arratisur.

“Aty ishte një vend strategjik menjëherë me hy në breg edhe ishim në breg. Edhe ky më ka brit mas atje stoj, unë hiq s’jam nal. Thash le të m’vrasin. Dhe jam hi në mal, ata mas janë nis stoj stoj”, tha ai.

Frika se po hasin në mina apo po u dalin në prit grupet shqiptare, policia kishin frik ta ndiqnin.

“Pse nuk iu ndjeken ata prapa. Se tjerët ishin të zantë. E unë këtu nuk e di,s e erdhen rreth malit, folshin kshyrshin e kishin edhe atë (identifikuesin e minave) se mu më thanë se mundet me pas edhe ndonjë grop që ka mina knej ka hina. Me atë aparatin e minave ecshin e kshyrshin”, tha ai.

Pas ikjes i arrestuari thotë se prangat ia hoqën disa banorë të zonës.

Për ikjen se Osmanit ka folur mbrëmë edhe kreu i BDI-së, Ali Ahmeti. Ai ka thënë se nuk e njeh atë por se ka qenë i arrestuar në vitin 2001 nga Ushtria Çlirimtare Kombëtare.

Ahmeti tha se ai person tash gjendet në Kosovë, ndërsa pranon se disa nga familjarët e të arrestuarve nga Kosova e kanë thirrur për të marrë më shumë informata për ngjarjet në Kumanovë. (rtk)