Të premten në Kumanovë është shtuar numri i forcave policore nëpër rrugët kryesore dhe para institucioneve shtetërore. Gjendja ka shqetësuar banorët. Autoritetet nuk bëjnë shpjegime, përveç asaj se po marrin masa sigurie. Ndërkaq, një pjesë e medias spekullon se forcat e shtuara të sigurisë ndërlidhen me kërcënimet eventuale të njërit prej pjesëtarëve të grupit të armatosur, i cili mundi t’i arratisej policisë.

Personi i quajtur Sulejman Osmani ka folur për mjete të informimit ku ka thënë se pasi i ishte dorëzuar policisë speciale maqedonase ishte detyruar t’ua zbulojë atyre vendin e armatimit, në një fshat të zonës së Karadakut dhe, ndonëse i prangosur, kishte arritur të arratisej.

Por, kryetari i Bashkimit Demokratik për Integrim Ali Ahmeti ka hedhur dyshim për të kaluarën e këtij personi gjatë konfliktit të vitit 2001, dhe ka shprehur habi se si mundet një njeri me pranga në duar të arratisej!

Zoti Ahmeti në një intervistë dhënë televizionit Alsat-M në Shkup ka bërë të ditur për përpjekjet e tij që të negociojë dorëzimin e grupit të armatosur, ish-pjesëtarë të Ushtrisë Çlirimtare Kombëtare, pasi i ishte kërkuar ndihmë me telefon nga vetë grupi. Zoti Ahmeti tha se përmes njerëzve të partisë së tij ka njoftuar institucionet përkatëse dhe Ambasadën e SHBA-së dhe përfaqësinë e OSBE-së, gjithashtu, në lidhje me kërkesën e grupit për t’u dorëzuar pa kushte. Sipas, tij, njëzetë e gjashtë pjesëtarë të grupit të armatosur janë dorëzuar, por gjatë kësaj, ka pasur komplikime, me gjasë mosmarrëveshje tek një pjesë e grupit të armatosur dhe se në këtë kohë janë vrarë edhe dy ose tre policë.

Zoti Ahmeti ka pranuar se qysh para këtij konfikti, kishte pasur dijeni për synimet për krijimin e destabilizimit në Maqedoni dhe kishte dërguar një zyrtar të partisë së tij që të bisedonte me Sami Ukshinin, të njohur si komandant Sokoli, për të hequr dorë nga veprimet e tilla dhe ai, Sokoli, të ishte shprehur se nuk ishte pjesë e ndonjë plani të tillë.

Nga ana tjetër, autoritetet e Rendit thonë se nuk ka pasur asnjë lloj negociatash me grupin terrorist, siç e quajnë ata, për t’u dorëzuar.
Policia maqedonase ka njoftuar se nga dhjetë të vrarët në Kumanovë kanë arritur të zbulojnë identitetin e dy vetave dhe ata janë Mirsad Ndrecaj me nofkën Komandant Nato dhe Begë Rizaj që është konfirmuar nga zyra e Interpolit në Shkup.

Megjithatë, një pjesë e medias shpreh mosbesim ndaj njoftimeve të zyrtarëve qeveritarë maqedonas lidhur me ngjarjet e përgjakshme në Kumanovë. Ka që shprehin dyshime se rasti mund të ishte i sajuar nga vetë struktura maqedonase të sigurisë për të tërhequr vëmendjen nga kriza politike dhe skandali i përgjimeve dhe për të frikësuar, njëkohëshisht, popullatën që të mos i bashkohej opozitës në protestat për rrëzimin e pushtetit. voa

I ngarkuari për Evropën Juglindore në Ministrinë e Jashtme të Gjemranisë, Ernst Reichlet, gjatë qëndrimit në Shkup(15.05), dërgoi mesazhe për qeverinë dhe opozitën në Maqedonin të përfshirë nga kriza e thellë politike.

Gjermania kërkon nga pushteti hapa konkretë drejt zbardhjes së aferës së përgjimeve, që kanë të bëjnë me korrupsionin dhe politizimin e institucioneve. Gjermania është thellësisht e shqetësuar për krizën politike që po kalon vendi dhe aksionin në Kumanovë, ka thënë Ernst Reichelt duke shpresuar se zhvillimet e fundit nuk do të tensionojnë mardhëniet ndëretnike. “Jemi të inkurajuar që pamë se si qytetarët në Kumanovë, nga të gjitha bashkësitë etnike, u bënë bashkë gjatë incidentit”, ka thënë Rajhell.

Pozita dhe opozita duhet t’i ndajnë përgjegjësitë

Ai ka zhvilluar takime veçmas me kryetarin e BDI-së Ali Ahmeti, liderin e opozitës maqedonase Zoran Zaev, ministrin e Punëve të Jashtme Nikolla Popovski dhe zëvëndëskryeministrin për Eurointegrime, Fatmir Besimi. “Gjetja e një rruge për dalje nga kjo krizë e rëndë, kërkon që qeveria dhe opozita të tregojnë përgjegjësi por njëkohësisht edhe ta ndajnë përgjegjësinë. Ndaj ne e kemi mirëpritur dhe e mbështesim takimin e katër liderëve të partive më të mëdha në Maqedoni në praninë e BE-së dhe SHBA-së. Kjo është shpresa jonë e sinqertë, se ky format do të çojë në marrëveshje për të rivendosur besimin në institucionet e vendit dhe proceset demokratike”, u shpreh Reichelt.

Reichelt i inkurajoi bashkëbiseduesit në Shkup që të angazhohen në mënyrë më aktive në procesin e ndërmjetësimit të treshes së Parlamentit Europian. Ky angazhim sipas diplomatit gjerman, para së gjithash ka të bëjë me respektimin e standardeve europiane të sundimit të ligjit, transparencës dhe drejtësisë. Si lider europian, Gjermania kërkon që qeveria e Shkupit të marrë në konsideratë në mënyrë konkrete dhe thelbësore, akuzat e shumta për abuzime serioze të qeverisë, që dalin nga bisedat e përgjuara telefonike. “Dorëheqjet e fundit të ministrave të qeverisë dhe të Drejtorit të Sigurimit mund të jenë hapat e parë të rëndësishëm për të filluar rikthimin e besimit të publikut dhe për t’i adresuar problemet më themelore të cilat janë bërë të dukshme. Që kjo të jetë e mundur, janë të nevojshme masa të tjera në të ardhmen”, shprehet Rajhell.

Ai pret një hetim të pavarur gjyqësor dhe të besueshëm për të gjitha akuzat që janë shpalosur në opinion e në veçanti akuzat që kanë të bëjnë me sjelljen korrupitive të qeverisë, ndikimin në gjyqësor si dhe integritetin e procesit zgjedhor. Të gjithë bashkëbiseduesve në Shkup, Reichelt, me theks të veçantë ia ka apostrofuar rëndësinë e ekzistimit të pavarësisë së mediave, pavarësi e cila do të ndihmonte që të gjitha proceset të zhvillohen në mënyrë transparente dhe të besueshme.

Gjermania mbështet protestat paqësore dhe pa dhunë

Në funksion të paralajmërimit të protestave dhe kundër-protestave të opozitës dhe pozitës, për ditën e dielë dhe të hënë (17.05/18.05), Reichelt thotë se Gjermania mbështet plotësisht të drejtën themelore demokratike të qytetarëve për të protestuar në mënyrë paqësore, duke përsëritur thirrjen për të gjitha palët, që të përmbahen nga dhuna në këto protesta. (dw)

Eksperti i Europës Juglindore Florian Bieber mbi zhvillimet e fundit në Maqedoni, sfondin politik dhe jo etnik të ngjarjeve në Kumanovë dhe rrezikun e një destabilizmi të rajonit.

DW: Shkallëzimi i situatës në fundjavë në Kumanovë risolli ndërmend pamje si ato të vitit 2001 në kohën e shpërthimit të konfliktit mes shqiptarëve dhe maqedonasve. Çfarë mund të thuhet për sfondin e këtij konflikti dhe a ka rrezik që ai të kthehet në një konflikt me afatgjatë?

Florian Bieber: Sfondi i këtij konflikti është në të vërtetë kriza e demokracisë në Maqedoni. Prej muajsh opozita publikon regjistrime kompromentuese të bisedave mes anëtarëve të qeverisë, që tregojnë për korrupsionin, keqpërdorimin e pushtetit dhe manipulimin e mediave e gjykatave. Konflikti në Kumanovë pason këto zbulime dhe protestat e mëdha të qytetarëve. Prandaj atë duhet ta shohim në këtë kontekst. Ndërhyrja e policisë në Kumanovë duket e dyshimtë dhe ngre shumë pyetje. Duket sikur qeveria do që të tërheqë vëmendjen nga kriza. Edhe pse është shumë e vështirë të thuhet se çfarë ndodhi vërtet në Kumanovë, shkaku duhet kërkuar më shumë në krizën e brendshme politike se në marrëdhëniet ndëretnike në Maqedoni.

DW: Zëra se qeveria ka si qëllim të tërheqë vëmendjen nga kriza ka pasur. Sa përgjegjësi mban qeveria Gruevski për gjendjen atje?

Bieber: Nëse qeveria ka përgjegjësi direkte, nuk dihet, por ajo ka krijuar një klimë mosbesimi dhe një linjë nacionaliste që përjashton jo vetëm shumë shqiptarë, por edhe shumë maqedonas. Momenti i konfliktit në Kumanovë pas fajësimeve të opozitës dhe protestave, të le të dyshosh se Kumanova nuk ka ndodhur rastësisht dhe se ka lidhje me krizën e brendshme

DW: Ka rrezik të destabilizimit të Maqedonisë siç përmendet shpesh së fundmi në media?

Bieber: Arsyeja kryesore e destabilizimit në Maqedoni buron nga qeveria e saj. Kumanova është vetëm një përpjekje për t’i ikur problemit të vërtetë. Nëse qeveria e ka planifikuar, toleruar apo Kumanova ishte një rastësi do ta zbulojmë në të ardhmen, por sjellja jodemokratike e qeverisë, fajësimet e besueshme të opozitës tregon se qeveria prej vitesh e keqpërdor shtetin për të ushtruar pushtetin e saj.

DW: Një grup shqiptarësh të armatosur, sipas qeverisë maqedonase, të ardhur edhe nga Kosova planifikonin sulme terroriste në vend. Cili është ky grup, i panjohur më parë në Kumanovë, dhe çfarë duan të arrijnë ata?

Bieber: Ne dimë shumë pak për këtë grup, dhe është ende herët të gjykojmë se sa real është një lloj grupimi i tillë.

DW: A duan vërtet të luajnë rol grupe kosovarësh në një konflikt të ri në Maqedoni?

Bieber: Ajo që mund të thuhet është se nuk ka interesa të dukshme të grupimeve kosovare që kanë interes për një konflikt të tillë. Gjendja sot është ndryshe nga viti 2001, kur lufta në Kosovë kishte vetëm dy vite që kishte përfunduar dhe e ardhmja e Kosovës ishte e paqartë. Dinamika e sotme është ndryshe nga ajo e para 14 viteve.

DW: Megjithatë aktualisht në disa media qarkullojnë sërish zërat për Shqipërinë e Madhe. Mediat serbe shkruajt ën menjëherë: “Lufta për Shqipërinë e madhe filloi”. Politika e Shqipërisë dhe Kosovës nuk shkon në këtë drejtim, orientimi është integrimi në BE. Kemi të bëjmë me fobinë e vjetër, apo është panik i qëllimshëm?

Bieber: Kryetituj të tillë për mua janë nxitje e rrezikshme e panikut. Nuk ka forca politike me peshë në këto vende që e propagandojnë këtë qëllim. Fantazma e Shqipërisë së Madhe shërben në radhë të parë për të krijuar frikë. Veç në Kosovë, ku kemi “Vetëvendosjen” që e propagandon këtë qëllim, nuk ka forca të rëndësishme që duan me dhunë një Shqipëri të Madhe. Prioritetet e shqiptarëve në Kosovë, Maqedoni, apo Shqipëri janë diku tjetër. Prandaj edhe konflikti i fundit mund të shpjegohet me politikën e brendshme dhe jo me ëndrrat për Shqipërinë e Madhe.

DW: Ministri i Jashtëm serb, Ivica Daçiç paralajmëroi së fundmi se destabilizimi i Maqedonisë do të destabilizonte të gjithë rajonin. Sa i madh është rreziku i vatrave të reja të ndezura në Ballkan?

Bieber: Deklarata të tilla janë të papërgjegjshme. Konflikti i Maqedonisë do parë brenda kontekstit të tij. Megjithëse shqiptarët në Maqedoni, Shqipëri, Kosovë, Serbi komunikojnë me njëri-tjetrin, shqetësimet që ata kanë dhe qëllimet janë të ndryshme. Por sigurisht nuk ka dyshim që një destabilizim i Maqedonisë do të kishte pasoja negative për vendet fqinje, por është e gabuar t’i kërkosh arsyet e konfliktit të tanishëm tek tensionet etnike. Më shumë problemi qëndron tek tendencat autoritare dhe populiste të disa qeverive në rajon.

DW: Megjithatë shqiptarët në Maqedoni ende ankohen se Marrëveshja e Ohrit nuk është zbatuar plotësisht. Pas një konflikti si në Kumanovë dhe gjendjes aktuale në vend, çfarë mund të thuhet sot për të?

Bieber: Po, është e vërtetë që Marrëveshja e Ohrit nuk është zbatuar plotësisht. Përgjegjësia veçse këtu nuk qëndron vetëm tek partia qeverisëse VMRO-DPMNE, por edhe tek partneri shqiptar i koalicionit, BDI. Kjo marrëveshje paraqet bazën më të mirë për Maqedoninë, por zbatimi i saj ka kaluar në hije në vitet e fundit. Nuk bëhet fjalë për përmbajtje formale, por për substancën. Psh. projekti “Shkup 2014″ që e mbushi kryeqytetin me vepra të reja dhe monumente nxit vetëm identitetin kombëtar, por jo një shoqëri të hapur, siç është parashikuar në Marrëveshjen e Ohrit.

DW: Maqedonia kritikon BE-në që nuk tregon vëmendjen e duhur për këtë vend. Nuk duhet të bien më së voni tani pas ngjarjeve në Kumanovë këmbanat për BE-në në lidhje me Maqedoninë dhe gjendjen në rajon?

Bieber: Reagimet e BE-së lidhur me krizën në vend kanë qenë të dobta. BE e ka interpretuar gjendjen atje kryesisht si një konflikt mes qeverisë dhe opozitës. Në këtë kuptim BE ka çuar ujë në mullirin e qeverisë. Sigurisht që hapësira e veprimit të BE-së është e kufizuar për shkak të bllokadës greke për emrin, që pengon afrimin e Maqedonisë me BE. Pra si besueshmëria ashtu edhe aftësia e saj vepruese janë të kufizuara. SHBA gjen fjalë më të qarta në kritikën e saj ndaj qeverisë, dhe do të ishte mirë sikur edhe BE të ishte kaq e qartë, sepse nuk mund të jetë në interesin e BE-së që një vend kandidat të largohet nga standardet demokratike. Përplasja e përgjakshme në Kumanovë e tregon këtë rrezik, dhe të shpresojmë që më në fund BE do ta kuptojë se kërkohet një qëndrim më i qartë dhe më shumë angazhim.

Lideri i LSDM-së Zoran Zaev publikoi një tjetër skandal ku përfshihet kryeministri Gruevski. Nga bisedat telefonike të publikuara në bombën e 31-të të opozitës, dëshmohet se Gruevski ka blerë me paratë e Ministrisë së Brendshme, veturë të tipit “Mercedes” në vlerë prej 575 mijë eurosh.

Bisedat e publikuara sot dëshmojnë gjithashtu edhe kurdisjen e një tenderi në vitin 2011 për nxjerrjen e qymyrit, projekt me vlerë prej 20 milion eurosh.

Zaev publikoi edhe një bisedë mes Jankullovskës dhe Nikolla Todorovin, në të cilën pretendohet se synojnë të mbulojnë një shpërdorim prej 400 mijë eurosh në Ministrinë e Shëndetësisë, gjatë kohës kur ky dikaster drejtohej nga Bujar Osmani.

Zaev publikoi edhe një telefonatë mes shefit të shërbimit sekret në dorëheqje Sasho Mijallkov dhe zv/kryeministrit nga radhët e BDI-së Musa Xhaferi, ku ky i fundit kërkon tërheqjen e disa aparateve për pika karburanti, të konfiskuara nga policia.

Zaev publikoi edhe biseda të tjera që dëshmojnë sipas tij, se ministrat e dorëhequr kanë qenë vetëm realizues të përpiktë të urdhrave të kryeministrit Nikolla Gruevski.  Benjamin Arifi

Ministria e Brendshme ka konfirmuar zyrtarisht shkrimet e Alsat M se trupat e Mirsad Ndrecajt, i njohur si komandant NATO dhe Beg Rizajt, komandant Begu janë në mesin e të vrarëve në aksionin policor të Kumanovës. Identiteti i tyre ishte vërtetuar në bashkëpunim me Byronë e Interpolit në Shkup. Siç njoftuam jo zyrtarisht dje, nga Ministria e Brendshme sot kanë konfirmuar se tek Ndrecaj janë gjetur edhe dokumentet e tij të identitetit. Policia thotë se është e sigurt edhe për identitetin e një tjetër të vrari, i cili është shtetas i Maqedonisë.

“Deri tani është konfirmuar pozitivisht identiteti i Mirsad Ndrecajt, i lindur më 17.06.1979, nga Kosova i ashtuquajtur Komandant NATO për të cilin kishte dyshime se është një nga udhëheqësit e grupit të armatosur. Arriti konfirmimi pozitiv për identitetin e Beg Rizajt i lindur më 25.12.1977, nga Kosova i njohur si komandant Begu. Nga të vrarët, është konfirmuar identiteti i Nusret Kaloshit i lindur më 18.04.1975, shtetas i Maqedonisë”, njoftojnë nga Ministria e Brendshme.

Në njoftimin publik nga MPB-ja shkruhet se vazhdon identifikimi edhe i trupave tjerë të gjetur. Por, numri i tyre nuk është 14 siç u deklarua fillimisht. Prikoruri publik i cili doli në vendngjarje për hetim, ka gjetur gjithsej 10 trupa të pajetë. Ky informacion vërtetohet zyrtarisht nga Zyra e Prokurorisë Publike që ndjek Krimin e Organizuar. Nga MPB-ja thonë se nuk kishte asgjë të pazakontë, sepse numri 14 i viktimave ishte fillestar, dhe mbështetej në bazë të asaj që ishte parë nga njësiti special, në orët e natës, në luftime. Përveç se është konfirmuar identiteti i Ndrecajt dhe Rizajt, nga MPB-ja thonë se vazhdon identifikimi edhe i 30 të arrestuarve të tjerë. Zyrtarisht, ajo që mund të shihet nga fotografitë e djeshme të aksionit, u konfirmua se në polici është Sami Ukshini, i njohur si Komandant Sokoli. Alsat M, që dje njoftoi se përveç Sokolit, MPB-ja në Kumanovë ka arrestuar edhe Muhamed Krasniqin i njohur si komandant Malisheva dhe komandant Junikun, Demë Shehun. Deri tani, policia nuk e ka konfirmuar lajmin, për shkak se sipas informatave jozyrtare, Malisheva dhe Juniku kanë dhënë identitet të rremë, dhe ende pritet konfirmim përfundimtar. Siç raportuam edhe dje, është thuajse e sigurt se të pesë personat që janë konsideruar si udhëheqës të grupit të Kumanovës, të gjallë ose të vdekur, janë në duart e policisë. Alsat-M

Kuvendi i Republikës së Maqedonisë sot duhet ta mbajë seancën e 50-të, të në të cilën në rend dite është Propozimi për zgjedhjen e anëtarëve të rinj të Qeverisë. Seanca është caktuar pasi që mbrëmë kryeministri Nikolla Gruevski në Kuvend dorëzoi propozim të ministrave të rinj për Ministrinë e Punëve të Brendshme dhe Ministrinë e Transportit dhe Lidhjeve, Mitko Çavkov dhe Vllado Misajllovski.

Paraprakisht Gruevski i pranoi dorëheqjen e ministres së Punëve të Brendshme, Gordana Jankulloska dhe të ministrit të Transportit dhe Lidhjeve, Mile Janakieski, si dhe të drejtorit të Drejtorisë për siguri dhe kundërzbulim Sasho Mijallkov.

Kryetari i Kuvendit Trajko Veljanovski seancën për zgjedhjen e anëtarëve të rinj të Qeverisë e caktoi për në orën 13:00. Pritet që Kuvendi t’i konstatojë edhe dorëheqjet e dy ministrave, pas së cilës kryetari i Kuvendit do ta elaborojë propozimin e tij deri te Shtëpia ligjvnënëse, Ministrat e rinj do të votohen nëse propozimi pranohet nga shumica e numrit të përgjithshëm të deputetëve.

Mitko Çavkov, i cili është propozuar për ministër të ri është drejtor aktual i Zyrës për siguri publike, ndërsa Vllado Misajllovski, i propozuar për njeriun e parë në Ministrinë e Transportit dhe Lidhjeve është drejtor i Ndërmarrjes publike për rrugë shtetërore.
Jankulloska, Janakieski dhe Mijallkov kanë dhënë dorëheqje pas akuzave të opozitës dhe publikimit të bisedave të përgjuara telefonike dhe krizës së shkaktuar politike në vend.

Ministrja e Punëve të Brendshme, Gordana Jankulloska dha dorëheqje nga funksioni. Për vendimin Jankulloska me shkrim e ka njoftuar kryeministrin Nikolla Gruevski.
Në dorëheqjen e saj Jankulloska thekson se në periudhën e kaluar ka punuar në mënyrë profesionale dhe të përkushtuar duke u udhëhequr nga interesat e qytetarëve dhe të Republikës së Maqedonisë. “Në këto ditë të vështira, kur Maqedonia është në krizë të thellë politike, vlerësoj se është koha të tërhiqem, duke besuar se tërheqja ime nga funksioni ministre e Punëve të Brendshme, do të kontribuojë për tejkalimin e saj, qëndron në dorëheqjen e ministres Jankulloska.

Edhe ministri Janakieski në dorëheqjen thekson se vlerëson se me tërheqjen e tij nga funksioni do të kontribuojë për stabilizimin e gjendjes politike në shtet. “Konsideroj se dorëheqja ime do të kontribuojë për stabilizimin e gjendjes politike në RM dhe do të mundësojë që vendi ynë të vazhdojë të hapërojë drejt BE-së dhe NATO-s”, thuhet mes të tjerash në dorëheqjen.

Mbrëmë nuk ka pasur koment zyrtar nga ana e LSDM-së dhe partive të tjera opozitare për dorëheqjen e Jankulloskës, Janakieskit dhe Mijallkovit. Nuk ka informnacion nëse deputetët e bllokut opozitar do të marrin pjesë në punën e mëtutjeshme të Parlamentit, edhe pse atë nga ata dje sërish e kërkuan disa ambasadorë të huaj, të cilët kanë qenë në takim me liderin e LSDM-së Zoran Zaev. (alsat)

Dorëheqjet e Jankullovskës dhe Mijallkovit kanë pasuar pas një takimi që ata kanë pasur të hënën në mbrëmje në ambasadën amerikane në Shkup, raporton portali Libertas.

Sipas burimeve të afërta me ambasadën, në këtë takim Jankullovskës dhe Mijallkovit u janë dhënë regjistrime (incizime) nga kontaktet telefonike midis përfaqësuesve të Drejtorisë së Sigurisë dhe Kundëzbulimit (DSK) me grupin e komandant NATO dhe njerëzit e tij.

Siç thuhet më tej, aty u është dëshmuar përfshirja e DSK-së, e cila ka biseduar me grupin e armatosur në Kumanovë.

“Shqiptarë të punësuar në DSK kanë kontaktuar përmes telefonit me grupin, duke thënë se ata kanë kontaktuar me urdhër direkt të shefit të DSK-së, i cili ka pyetur se çfarë kompensimi kërkojnë që të tërhiqen. Praktikisht MPB ka hyrë në bisedime me ta”, thotë burimi i Libertasit.

Paralelisht me këtë, edhe lideri i BDI-së, Ali Ahmeti, në marrëveshje me partnerët e koalicionit ka kërkuar ndihmë nga OSBE për të tërhequr tre persona të afërt me të që ishin pjesë e grupit, që më pas të negocion me ta.

“Gjatë takimit të sotëm në ambasadën amerikanë, edhe Ahmetit iu bë e ditur se komuniteti ndërkombëtar përmes këtyre incizimeve e ka të qartë edhe përfshirjen e Qeverisë në ngjarjet në Kumanovë dhe se aksionin e përgjakshëm MPB-ja e filloi kur veçse në terren kishin humbur jetën disa pjesëtarë të forcave policore”, bën të ditur burimi.

“Dorëheqjet që ndodhin sonte janë logjike pas takimeve të sotme mes ambasadorëve dhe zyrtarëve”, ka thënë burimi diplomatik, duke mos e bërë të qartë nëse edhe kryeministri Gruevski së shpejti do të japë dorëheqje, edhe pse sipas burimit ai ka pasur informatat për kontaktet e kushëririt të tij me grupin kriminal. (Libertas)