Arkivi mujor: Korrik 2015

Shëndeti

Ilaç i ri kundër Alzheimerit

Komento

alzheimerNjë ilaç eksperimental për Alzheimerin mund të ngadalësojë sëmundjen nëse njerëzit e marrin që në fillim, sipas kompanisë farmaceutike Eli Lilly. Ky është një prej ilaçeve të pakta elsperimentale për trajtim më të mirë të Alzheimerit.

Pasi Wendy Mitchell u diagnostikua me sëmundjen Alzheimer një vit më parë, ajo krijoi një tabelë me fotografi dhe shënime për të ndihmuar veten gjatë ditës. Ajo e mirëpriti lajmin se një medikament i ri së shpejti mund të dalë në treg, por mendon se është shumë vonë për të –  ilaçi ndoshta mund të ndihmojë vajzat e saj për të shmangur këtë çrregullim të trurit.

“Kush e di se ku do të jetë truri im pas dy vjetësh, por emocionuese për mua është se më jep shpresë për vajzat e mia, sepse çdo njeri shpreson të mos e provojë këtë sëmundje. Kjo mund të arrihet vetëm me kërkime mjekësore dhe ilaçi i ri shpresoj  se do të jetë i suksesshëm.”

Hollësitë e ilaçit të ri i quajtur Solanezumab u shpallën në Konferencën e Shoqatës Ndërkombëtare mbi Alzheimerin, që u zhvillua në Uashington më 22 korrik. Studimet e mëparshme, kanë treguar se  Solanezumab nuk kishte mundur të ndihmonte pacientët me Alzheimer të përgjithshëm. Por tregoi shenja se ilaçi mund të ndihmonte njerëzit me sëmundje shumë të butë, duket ngadalësuar rënien e tyre mendore me rreth një të tretën.

Një studim më i gjërë është duke u zhvilluar dhe pritet të përfundojë në fund të vitit 2016. Dr Eric Seimers, drejtor mjekësor i firmës Eli Lilly thotë se sa më shpejt që njerëzit trajtohen me këtë ilaç aq më i mirë është rezultati.

“Kjo do të thotë se trajtimi duhet të fillojë herët.  Çdo ditë që pacienti kalon me sëmundje neuro-degjenerative, siç klasifikohet Alzheimeri,  aq më shumë vdesin qelizat e trurit. Kjo tregon se për të ngadalësuar përparimin e sëmundjes, trajtimi duhet të fillojë sa më parë.”

Dr Clare Walton e Shoqatës britanike të Alzheimerit thotë se shenjat janë shpresëdhënëse, por duhet treguar kujdes.

“Ne duhet të presim rezultatet e provave të gjëra klinike. Por lajmi i mirë është se prova të tilla janë duke u zhvilluar dhe priten rezultate përfundimtare.”

Alzheimeri është forma më e zakonshme e dementias. Për sëmundjen, uk ka kurë, por vetëm trajtime për të lehtësuar përkohësisht simptomat. Më shumë se 35 milionë njerëz në mbarë botën kanë Alzheimer në forma të ndryshme, duke përfshirë rreth 5 milionë në SHBA. Këto shifra pritet të rriten me shpejtësi ndërsa popullsia moshohet. (voa)

Bota

Dalje nga kriza me borxhe të reja?

Komento

Greqia, por edhe Spanja, Portugalia dhe Irlanda, kanë humbur shumë prej fuqisë së tyre ekonomike gjatë krizës dhe në të njëjtën kohë është rritur papunësia. Por a mund të ndikojnë borxhet e reja në rimëkëmbjen ekonomike?

penzioner greqiPara së gjithash: askush nuk dyshon se Greqia ka nevojë për reforma themelore: qeverisje më të mirë, më pak korrupsion, më shumë konkurrencë. Po ashtu është e kuptueshme që donatorët i lidhin kreditë e tyre me kushte.

Pyetja është deri tani në bisedimet e eurogrupit u është kushtuar më tepër rëndësi masave të kursimit dhe shumë pak investimeve. Në Gjermani flitet gjithmonë në këtë pikë për amvisën, e cila përpiqet që t’i ketë kostot nën kontroll dhe nuk shpenzon më shumë se sa ka, sikurse u shpreh në një intervistën “Der Spiegel”, ministri i Financave Wolfgang Schäuble.

Përfundimet e 104 studimeve ndërkombëtare

Por ekonomitë e vendeve në krizë nuk mund të krahasohen me ekonominë e një shtëpie dhe ekonomistët mendojnë se Greqia mund ta kapërcejë krizën vetëm në rast se ekonomia shënon përsëri rritje dhe krijohen vende të reja pune. Dhe për këtë nevojiten investime.

Ekonomistët kanë analizuar në studime të shumta, se si shtetet mund t’i nxisin ekonomitë e tyre. Sebastian Gechert nga Instituti për Hulumtime Makroekonomike (IMK) në Dyseldorf, ka krahasuar rezultatet e 104 studimeve të botuara në periudhën 1992-2012 në revista shkencore ndërkombëtare. Ato trajtojnë të ashtuquajturit shumëzues fiskalë, me të cilët mund të llogaritet se si shpenzimet shtetërore ndikojnë në rritjen ekonomike.

Rezultati: deri tani efektin më të mirë e kanë investimet shtetërore. Çdo euro e investuar nga shteti, sjell një rritje shtesë prej 1,30 deri 1,80 euro. Sipas studimeve efekti është tepër i dobët, në qoftë se paratë përdoren për të punësuar nëpunës të tjerë publike janë vendosur ose në qoftë se shteti konsumon. Në konsumin publik përfshihen shpenzimet për fusha të ndryshme si arsimi, sporti, kultura, sigurimet shoqërore, por edhe për rendin publik ose për mbrojtjen e mjedisit. Shpenzimet për ushtrinë sjellin ekonomikisht më së pakti.

Greqia, por edhe Spanja, Portugalia dhe Irlanda, kanë humbur shumë prej fuqisë së tyre ekonomike gjatë krizës dhe në të njëjtën kohë është rritur papunësia. Politika e kursimit ka “një ndikim negativ në rritjen dhe punësimin,” shkruan Sebastian Gechert, autor i meta-studim të IMK-së. “Në të kundërt, investimet e financuara publikisht sjellin mesatarisht, një stimul relativisht të madh të rritjes ekonomike.”

Borxhe të reja?

Pyetja është se si mund të financohen investimet publike kur shteti nuk ka para. Përmes rritjes së taksave apo shkurtime në vende të tjera, siç është bërë në Greqi, Spanjë dhe vende të tjera. Megjithatë, këto masa kanë një efekt negativ në rritjen ekonomike dhe kështu dobësojnë efektet pozitive të investimeve.

Sipas analizës së Sebastian Gechert në rast se investimet shtetërore financohen vetëm prej borxheve, kjo nuk e rrit patjetër nivelin e borxhit, sepse në rast se investimet bëjne efekt ato nxisin rritjen ekonomike dhe në këtë mënyrë shpezimet për shtetin mbeten të ulëta, deri në 40%. Por për këtë është parakusht dhe domosdoshmëri një sistem fiskal funksionues.

Dështim i ri?

Në diskutimet e fundit në lidhje me një program të ri ndihmash për Greqinë u fol shumë pak për investime të reja. Vërtet Presidenti i Komisionit Evropian Jean-Claude Juncker u referohet deri në 35 miliardë eurove nga arkat e rregullta të BE-së, por për to Greqia dueht të përdorë paratë e saj si bashkëfinancim – para që shteti nuk i ka.

BE-ja e ka ulur tani kërkesën për bashkëfinancim. Megjithatë ekonomisti dhe Drejtori i IMK-së Gustav Horn rekomandon për të shkuar dhe një hap më tej: “Sugjerimi ynë është që Greqisë t’i mundësohet për një vit një përdorim i kufizuar i këtyre fondeve pa bashkëfinancim, në mënyrë që qeveria të mund të nisë menjëherë një program investimi dhe për shkak të presionit kohor edhe të jetë e detyruar ta bëjë këtë.”

Ekonomikisht Horn sheh nga marrëveshja e arritur deri tani ndërmjet eurogrupit dhe Greqisë “të paktën një shans të vogël të rimëkëmbjes së ekonomisë greke”. Megjithatë vetëm kur edhe të investohet me të vërtetë. “Por në qoftë se strategjia e shpëtimit do të jetë një vazhdimin intensiv i shkurtimeve në buxhetin e shtetit, edhe ky program do të dështojë si dhe paraardhësit e tij.” (dw)

Maqedonia

Grupi i punës mblidhet sërish sot

Komento

zaevPas tri orë diskutimesh ka përfunduar mbrëmë takimi i katër partive me përfaqësuesit e BE-së dhe OSBE-së. Pas takimit, asnjëra nga palët nuk ka dhënë deklaratë zyrtare për rezultatin e bisedimeve.

Vetëm Përfaqësuesi i BE-së Pieter Van Hout pas takimit tha se ishte optimist që bisedime do të ketë edhe sot pasdite.

Gjatë takimit të djeshëm supozohet se është biseduar për pyetjet e hapura mbi listën e zgjedhësve dhe votimi në diasporë, ndërsa tema e komisionit zgjedhor shtetëror është lënë për ndonjë prej takimeve të tjera. (alsat)

Maqedonia

Ndërkombëtarët nuk e duan asnjë nga ministrat aktual në qeverinë kalimtare

Komento

qeveria bdiDiplomatë europerëndimor në Shkup  në qeverisjen e ardhshme nuk duan  asnjë nga ministrat aktual, sepse ata janë pjesë e skandaleve qeveritare dhe të një kabineti të korruptuar dhe kriminalizuar, që u zbardh me materialet e përgjimeve .

“Asnjëri nga ministrat aktual nuk duhet të jetë pjesë e qeverisjes së përkohshme. Qeveria e re duhet të përbëhet nga njerëz kompetent dhe që kanë frymë reformash. Nuk duam ministra demagog, që proklamohen si personalitete me kredibilitet dhe me frymën e reformatorëve, ndërsa në anën tjetër janë pinjoll dhe shërbëtor të bosëve të tyre politik. Kështu janë ministrat e dy partive dhe se ata kanë përgjegjësinë e përbashkët  dhe duhet të ikin”, deklaroi për INA, një diplomatë europerëndimor në Shkup.

Përfaqësuesit e BE-së kërkojnë që qeverisja e përkohshme duhet të ketë personalitete me kredibilitet, profesionalizëm të dalluar dhe përvojë menaxheriale. Kabineti i ri qeverisës do të jetë më shumë teknik, i cili do të merret kryesisht me çështje formale deri në formimin e qeverisjes së dalur nga zgjedhjet e 24 prill të 2016. (INA)

Kosova

S’ka seancë për Gjykatën Speciale, pa siguruar votat

Komento

kuvendiNë seancën e ditës së enjte, Kuvendi i Kosovës nuk do ta ketë në rend dite çështjen e ndryshimeve kushtetuese për themelimin e Gjykatës Speciale për krime lufte në Kosovë.

Këtë e ka konfirmuar kryetari i grupit parlamentar të Partisë Demokratike të Kosovës, Adem Grabovci, pas mbledhjes së Kryesisë së Kuvendit të Kosovës edhe pse, ai nuk e ka përjashtuar skajshmërisht një gjë të tillë.

“Njëherë për njëherë jo, nëse Qeveria nuk ndërmerr ndonjë hap që e sjellë ndërkohë”, ka thënë Grabovci.

Zyrtarët e lartë të Qeverisë së Kosovës, patën theksuar se do ta riprocedojnë amandamentin kushtetues për themelimin e Gjykatës Speciale në Kuvend, pas dështimit të miratimit në seancën e 26 qershorit, për të cilin dështim, vendimtare ishin qëndrimet e disa deputetëve të Partisë Demokratike të Kosovës të cilët votuan kundër, abstenuan, apo nuk morrën pjesë në seancë.

Shefi i grupit parlamentar të PDK-së , Grabovci, ka thënë për Radion Evropa e Lirë se gjatë kësaj kohe është punuar në grupin parlamentar të kësaj partie, si dhe deputetet e saj, që të sqarohen arsyet pse duhet të votohen ndryshimet kushtetuese për themelimin e Gjykatës Speciale për krime lufte.

Sipas tij, janë kërkuar garanci që procesi i gjykimeve të jetë i drejtë, i paanshëm, i pandikuar, të ketë barazi të palëve, si dhe që arkivat t’i kthehen Kosovës.

“Ne kemi punuar me deputetët, të cilët nuk kanë votuar. Shqetësimin, pikërisht, e kanë pasur këtu këta deputetë, të cilët kanë pasur këto kërkesa dhe këto shqetësime. Ne, tashmë, pothuajse, jemi të sigurt se do të kemi garanci dhe do të ishte jologjike që të mos marrim garanci nga Shtetet e Bashkuara dhe nga Bashkimi Evropian, që do të kemi një proces të drejtë, transparent dhe të pandikuar. Pas, këtyre bisedave edhe me këta deputetë, ne kemi marrë përkrahjen, pothuaj, edhe të tyre”.

Por, njohësi i çështjeve politike, Dren Doli nga Grupi për Studime Juridike dhe Politike, duke folur për Radion Evropa e Lirë, vlerëson se keqkuptimet që kanë disa deputetë lidhur me Gjykatën speciale,janë pasojë e mos transparencës nga vet partitë lidhur me këtë gjykatë.

“Besoj që ky është një keqkuptim shumë i madh që i është imponuar deputetëve të Kuvendit të Kosovës, pikërisht për shkak të faktit që vet PDK-ja, partitë tjera si dhe LDK-ja nuk kanë pranuar që detajet mbi këtë gjykatë të diskutohen publikisht dhe tu sqarohen njëherë e mirë deputetëve, në mënyrë që këto lloj të debateve dhe të paqartësive mbi themelimin e Gjykatës Speciale, të mos e shoqërojnë procesin e votimit të themelit të kësaj gjykate”.

Edhe pse ka pasur indikacione se Qeveria e Kosovës do të riprocedojë në Kuvend amandamentin kushtetues për themelimin e Gjykatës Speciale për krime lufte, kjo ende nuk ka ndodhur.

Grabovci ka theksuar se fakti më i rëndësishëm në krejt këtë situatë është që, siç thotë ai, “nuk guxohet të shkohet në seancë pa u përgatitur dhe pa pasur sigurinë e plotë që kjo çështje do të kalojë”.

“Se a mund të ndodhë kjo në këtë javë apo në javën e ardhshme, për mendimin tim, nuk është shumë e rëndësishme. E rëndësishme është që ne duhet të punojmë dhe do të punojmë me këmbëngulje që të japim sqarimet shtesë, kurdo që ka nevojë edhe për disa deputetë, si dhe të jemi 100 për qind të sigurt”.

Ndryshe, zyrtarët e lartë të Qeverisë dhe Kuvendit të Kosovës, të cilët janë nga radhët e Partisë Demokratike të Kosovës, ditë më parë kanë theksuar se Kuvendi duhet ta themelojë Gjykatën Speciale para pushimeve verore, qoftë edhe përmes një seance të jashtëzakonshme. (rel)

Bota

NATO sot në mbledhje urgjente, shkak kërcënimet nga ISIS

Komento

NatoTurqia ka thirrur një takim të posaçëm të ambasadorëve të NATO-s për të diskutuar në lidhje me operacionet ushtarake kundër militantëve të ISIS dhe separatistëve kurdë të PKK.

Mësohet se takimi do të mbahet ditën e martë në Bruksel. Ndërsa, sekretari i Përgjithshëm i NATO-s Jens Stoltenberg foli për BBC-në, ku tha se kërkesa e Turqisë është e bazuar në nenin 4 të Traktatit të NATO-s, i cili i lejon anëtarët të kërkojnë takime të tilla në rastet kur integriteti i tyre territorial ose siguria është cenuar.

“Një takim i tillë i kërkuar nga Turqia mendoj se është i drejtë dhe në kohën e duhur për të trajtuar trazirat dhe paqëndrueshmërinë në Siri, Irak dhe në afërsi të kufijve të vendeve anëtare të NATO-s”, tha Stoltenberg.

Ai tha se kishte folur dy ditë më parë me kryeministrin turk, Davutoglu, ku i kishte shprehur ngushëllimet për viktimat e fundit dhe i kishte dhënë mbështetje Turqisë për të kryer sulme ndaj Shtetit Islamik.

Në anën tjetër, SHBA-ja i ka bërë thirrje Turqisë dhe PKK-së për të shmangur dhunën, por tha se Tu rqia ka të drejtën të mbrojë veten kundër sulmeve të rebelëve kurdë.

Pas ngjarjeve të fundit, avionë turq kanë kryer për herë të parë sulme ajrore ndaj bazave të Shtetit Islamik në Siri. Ndërkohë, policia turke ka bastisur mbi 100 banesa në Stamboll, duke arrestuar 251 persona të lidhur me grupin terrorist. (rel)

Shqipëria

Miratohet pr/ligji për turizmin, Qeveria: Fund investimeve kaotike. PD: Nuk jep zgjidhje

Komento

parlamentiNë seancën e fundit para se të marrë pushimet verore, Parlamenti ka miratuar projektligjin për turizmin me 79 vota pro dhe 13 kundër.

Në besimin e mazhorancës, ligji i ri i turizmit do t’i japë fund ndërtimeve kaotike, familjare dhe lokale në bregdet, duke bërë të mundur atë që ofrojnë fqinjët tanë në rajon, zona turistike me resorte, çka nuk bindi opozitën se ky draft e mundëson një gjë të tillë.

“Ky ligj nuk bën mrekullira, por strukturon dhe ndalon pikërisht atë “Golemizim” që sot i kemi lënë trashëgim fëmijëve tanë. Nëse nuk ndodh ndonjë mrekulli, Golemi do të jetë ndoshta edhe 100 vjet në kurriz të shqiptarëve”, tha ministri i Zhvillimit Ekonomik, Turizmit, Tregtisë dhe Sipërmarrjes, Arben Ahmetaj.

“Nëse ju pretendoni që ky ligj e zgjidh problemin e zhvillimit të qëndrueshëm, atëherë unë propozova që të vendosen në këtë ligj tre masa. Së pari, të mos ketë në zonën e bregdetit asnjë ndërtim mbi 3 deri në 5 kate. Së dyti, nuk ndërtohet 300 metra nga vija e ujit  dhe të mos ndërtohet mbi 150 shtretër për hektar. Nëse sigurohen këto, atëherë shpëton ajo pjesë e bregdetit ku ende nuk ka ndërtime. Ligji nuk të zgjidh tërheqjen e investimeve të huaja. Nuk zhvillohet turizmi pa investime të huaja. Jo vetëm që nuk japim garanci juridike, por edhe mbështetja që ne japim është zero ndaj investitorëve. Atëherë, pse duhet të investojnë këtu?”, u shpreh Edmond Spaho, deputet i PD-së.

“Ligji synon që ta lehtësojë investitorin në marrëdhënie me pronarët. Shteti asiston në një negociatë të mundshme me pronarët dhe në qoftë se aty kemi një gangrenë 22 vjeçare, ku toka nuk është regjistruar, atëherë detyrohet ZRPP me këtë ligj që brenda tre muajve të bëjë regjistrimin fillestar sepse pronësia mbi tokën është një nga problemet kryesore. Ka pak toka shtetërore për shkak të kazinosë që keni bërë me to në bregdet. Ato toka shtetërore do t’i jepen investitorëve strategjikë me 1 euro, me konkurrim. Një investitor strategjik që investon 50 milionë euro e sipër në fushën e turizmit, mund të sjellë me kërkesën e tij në këtë Parlament kontratën që ka dhe ta bëjmë ligj. A ka siguri më të madhe se sa një kontratë investimi të kalojë si ligj në këtë Parlament? Problemi i ndërtimit të fshatrave fantazmë ndalohet një herë e mirë nga ky ligj. Nuk ka më që ti të ndërtosh 100 vila dhe t’i shesësh të gjitha ato. Duhet të ngresh struktura akomoduese turizmi, të cilat menaxhohen, nëse doni edhe 12 muaj”, shtoi Ahmetaj.

E pavarësisht garancive të ministrit Ahmetaj, ish-kryeministri Berisha hodhi dyshimet më të forta për ligjin.

“Ligjin nuk mund ta votoj sepse është ligj burracakësh dhe burrecësh. Ligji duhet të sillte këtu paketën me stimuluese të ndërtimeve të turizmit në zonat strategjike, që ekziston mbi tokë. Ligjin nuk e votoj sepse shoh në nene të tëra Koço Kokëdhimën që nxin në ligj. Shoh resortin e tij turistik, shoh përkujdesjen vëllazërore që tregoi duke u grabitur shtëpitë gjysmës së fshatit Qeparo. Ruhuni nga ju nga Vunoi. Pra ky ligj, është një ligj i interesave të ngushta kriminale të kreut të qeverisë dhe sivllaut të tij Kokëdhima dhe ndonjë sivëlla tjetër që shkon e ndërton në monumentin kulturor më të mbrojtur të Tiranës”, u shpreh ish-kryeministri Berisha.

Ligji gjithashtu do të bëjë realisht të mundur vlerësimin e shërbimeve që ofrohet, duke shmangur abuzimin me yjet që vetëvendosen nga hotelet, sipas ministrit të Ekonomisë.

“Nuk do t’i certifikoi as ministri i Turizmit, as Komisioni nëse doni; do ta bëjmë me kompani ndërkombëtare, me një nga 8, ose me të 8-ta nëse doni, kompani ndërkombëtare që standardizojnë yje. Do ta bëjë një kompani ndërkombëtare që nuk ka interesa të drejtpërdrejta klienteliste, siç u tha nga ish-kryetari i PD-së, por ka interesa standardi për ta futur Shqipërinë në hartën e destinacioneve më të mira turistike”, tha Ahmetaj.

Deputetë të mazhorancës kërkuan që projektligji të shoqërohet me masa fiskale gjithashtu.

“Me këtë ligj nuk zgjidhet gjithçka, por përmirësohen shumë gjëra. Jemi të paduruar të presim propozimet për ndërhyrjet në sistemin fiskal në sektorin e turizmit, ku Shqipëria nuk mund të ketë TVSH 20 përqind kur vendet e rajonit përfshirë edhe Italinë nuk e kalojnë 5 përqind dhe ku është shumë e domosdoshme ndërhyrja me subvencionime për të rritur gjatësinë dhe cilësinë e sezonit turistik në Shqipëri”, tha deputeti i PS-së,Artan Gaçi.

“Ky ligj sjell turizëm vjetor të integruar, zhvillimin e turizmit të qëndrueshëm, formalizimin dhe standardizimin e industrisë së turizmit, krijimin e programeve kombëtare për stafin për turizmin, me tre programe, turizmi për të rinjtë, eko-turizmi dhe programi për turizmin malor dhe bregdetar”, u shpreh Bashkim Fino, deputet i PD-së.

Deputetët e mazhorancës thanë se ministrisë së drejtuar nga Ahmetaj i është lënë një afat tremujor për të bërë të mundur paketën e masave lehtësuese për industrinë  e turizmit.

Ligji i turizmit mbylli dhe këtë sesion parlamentar për të rifilluar në shtator.

/ Top Channel

Shqipëria

Trafiku njerëzor, Shqipëria pa ndryshim

Komento

trafikimi i njerezve 2015Në raportin e këtij viti Shqipëria klasifikohet në shkallën e dytë, pa ndryshim nga viti i kaluar.

Gratë dhe fëmijët në Shqipëri, thuhet në raport, janë kryesisht objekt trafikimi seksual në vendet fqinje, Kosovë, Maqedoni dhe Greqi, por edhe në vende të tjera evropiane.

Viktimat shqiptare dhe disa viktima të huaja janë objekt pune të detyruar në Shqipëri, sidomos në industrinë e turizmit.

Një numër në rritje fëmijësh shqiptarë, shpesh të etnisë rome ose egjiptiane, janë objekt lypjeje të detyruar dhe formash të tjera pune të detyruar në Shqipëri si dhe në vendet fqinje: Greqi, Kosovë, Maqedoni dhe Mal të Zi.

Disa vajza shqiptare bëhen objekt trafikimi seksual ose pune të detyruar pas martesave me kontratë.

Një numër grash të huaja nga vende evropiane, si Ukraina, Rusia, Britania dhe Norvegjia janë objekt trafikimi seksual në Shqipëri.

Në raport thuhet se bashkëpunimi i zyrtarëve në krimet e trafikimit mbetet një shqetësim i rëndësishëm. Aty përmendet fakti se një deputet i tanishëm i parlamentit ka qenë dënuar më parë për krime që lidhen me trafikimin.

Qeveria e Shqipërisë, thotë raporti, nuk i plotëson krejtësisht standardet minimale për eliminimin e trafikimit të qenieve njerëzore, megjithatë po bën përpjekje të rëndësishme në këtë drejtim.

Raporti rekomandon që Shqipëria të rrisë financimet për strehimin e viktimave të trafikimit dhe të vërë rregullisht në dispozicion fonde për këtë qëllim. Aty rekomandohet gjithashtu që për viktimat të sigurohet kujdes shëndetësor dhe mendor falas, sipas një ligji të vitit 2014 dhe vendimit të ministrisë përkatëse.

Në raport thuhet që viktimat të mos ndëshkohen për akte të paligjshme të kryera si rezultat i drejtpërdrejtë i faktit që kanë qenë objekt trafikimi.

Raporti rekomandon gjithashtu që të vazhdohen përpjekjet për kontrollin e fëmijëve të rrugëve për shenja trafikimi. (voa)

Kosova

Kosova: Korrupsioni krijon kushtet për trafik njerëzor

Komento

trafikimi 2015Në raportin e Departamentit të Shtetit për trafikun njerëzor për këtë vit, Kosova klasifikohet si edhe një vit më parë, në shkallën e dytë, në një sistem me tre shkallë.

Kosova, thuhet në raport, është një vend burim dhe destinacion për trafikimin e qenieve njerëzore për shfrytëzim seksual dhe punë të detyruar.

Shumica e viktimave të trakikut seksual në Kosovë janë vajza, megjithëse grupet kriminale në Kosovë, detyrojnë edhe femra nga Shqipëria, Serbia, Rumania dhe vende të tjera evropiane për prostitucion.

Gratë dhe vajzat i nënshtrohen trafikimit seksual në shtëpitë private dhe apartamente, klube nate dhe sallone masazhi.

Trafikantët u premtojnë punësim femrave si valltare apo këngëtare në restorante por i detyrojnë viktimat të trafikohen seksualisht.

Fëmijë nga Kosova dhe vendet fqinjë detyrohen të dalin në rrugë dhe të lypin brenda vendit. Trafikantët i bëjnë qytetarët e Kosovës subjekt i prostitucionit dhe punës së detyruar në gjithë Evropën.

Korrupsioni qeveritar krijon kushtet që mundësojnë disa lloj krimesh trafikimi. Disa oficerë policie, zyrtarë të ministrisë së punës dhe zyrtarë të tjerë të qeverisë janë akuzuar ose dënuar për krime trafikimi.

Qeveria e Kosovës nuk i plotëson krejtësisht standardet minimale për eliminimin e trafikut, thuhet në raport por gjithsesi po bën përpjekje të konsiderueshme për ta bërë një gjë të tillë dhe për këto arsye është në grupin e vendeve të shkallës së dytë

Qeveria e rriti numrin e rasteve të shpalljeve fajtorë për trafikime, por dënimet që u dhanë ishin të buta dhe qeveria ndoqi penalisht më pak të dyshuar për trafik. Qeveria i rriti fondet për mbrojtjen e viktimave po nuk arriti të krijojë një fond për kompensimin e viktimave që parashikohet nga ligji dhe në raport sugjerohet që ligji për mbrojtjen e viktimave të zbatohet plotësisht, përfshirë fondin për kompensim.

Qeveria ka identifikuar më pak viktima krahasuar me periudhën që përfshinte raporti i mëparshëm.

Departamenti i Shtetit bën thirrje që Kosova të hetojë, ndjekë penalisht dhe të dënojë me forcë trafikantët, përfshirë zyrtarë të implikuar.

Në raport sugjerohet që të mbahen kurse kualifikimi anti-trafikim për gjykatësit, prokurorët dhe organet e rendit, të intensifikohen përpjekjet për të identifikuar dhe ndihmuar fëmijët që detyrohen të lypin.

Po ashtu mes rekomandimeve bëhet thirrje që t’u krijohet mundësia viktimave të trafikimit që të shkojnë në strehat e sigurta. (voa)

Shkenca

Teknologji, avionët me një motor

Komento

avioniNë rast të dështimit të motorit, avionët me disa-motorë shpesh kanë fuqi të mjaftueshme për të bërë një ulje të sigurtë në tokë, por avionët me një motor kanë një shans shumë të vogël për të shmangur një aksident fatal. Dy novatorë spanjollë thonë se sistemi i tyre rezervë i energjisë, i projektuar veçanërisht për avionët e vegjël, mund të përmirësojë ndjeshëm shanset e tyre.

Sipas Departamentit amerikan të Transportit, më shumë se 550 njerëz vdesin çdo vit, mesatarisht në aksidente me avionë të vegjël me një motor.

Pilotët si Miguel Suarez thonë se dështimi i motorit në një avionë të lehtë me helika nuk ofron shumë shanse për të mbijetuar.

“Në këtë rast, nuk ka alternativë tjetër vetëm të përpiqesh të shpëtosh cdo gjë që ke, të përpiqesh të ulesh por aksidenti është i sigurtë.”

Në bashkëpunim me universitetin Carlos III të Madridit, Suarez dhe partneri i tij, inxhinieri Daniel Cristobal, zhvilloi një motor që funksionon me bateri e që i jep një avioni të dëmtuar shtatë minuta fluturim.

“We integrated in series an electric motor with a clutching system that isolates the main engine when it fails and then the pilot has an additional 20 kilometers when the main engine fails to find a safe place to land.”

Forca rezervë vjen nga një bateri litiumi me kontroll elektronik.

Me një celës të thjeshtë, piloti mund të shkëpusë rrotullimin e helikave nga motori kryesor dhe të aktivizojë motorin elektrik.

Gjatë një fluturimi normal, një karikues siguron që bateria të jetë gjithmonë gati.

Por motori ndihmës mund të përdoret edhe në rrethana të tjera.

“Sistemi nuk është vetëm sistem sigurimi. Është gjithashtu një sistem hibrid që lejon për të shtuar më shumë fuqi tek motori kryesor kur ke nevojë për më shumë fuqi për shembull gjatë ngritjes.”

Një avantazh tjetë është se motori mund të instalohet në avionët me dy apo katë sedilje pasi mund të vendoset mes motorit dhe helikës.

Inxhinierët e Axter Aerospace po përpiqen tani të reduktojnë peshën e sistemit ndërsa presin për një certifikatë nga Agjencia Evropiane e Sigurisë së Aviacionit. (voa)