Heqja e interesave, fluksi gjigand i parasë, naftë e lirë, tregje aksionesh në bum: viti 2015 ishte plot thyerje. Ka shumë simptoma që edhe viti 2016 do të jetë i ngjashëm, mendon Henrik Böhme.

I humburi i vitit 2015 është Mario Draghi. Në librat e historisë dikur do të lexohet: ai ishte njeriu, që hapi digat, kur në pranverë shpalli një program gjigand të blerjes së bonove të thesarit, për të derdhur çdo muaj miliarda e shumë miliarda Euro në treg. Kryembrojtësi i monedhës së përbashkët europiane e kurorëzoi këtë me një nivel interesi bankar pothuajse zero. Kjo duket si një përzierje e rrezikshme dhe në fakt është e tillë. Qëllimi i magjistarit italian nga kulla fringo e re e Bankës Qendrore Europiane (BQE) në Frankfurt mbi Main është që bankat paranë pak të kushtueshme t’ia japin si kredi ekonomisë, që sipërmarrjet të investojnë, që të ripërtërihet koniunktura, të rritet inflacioni dhe njerëzit të blejnë, të blejnë dhe të blejnë.

Por problemi është, se kjo nuk funksionon. Bankat preferojnë më mirë t’i ruajnë paratë, ndonëse për këtë u duhet të paguajnë interesa gjobe. Ekonomia nuk investon, sepse ekonomia botërore nuk është e qendrueshme si duhet. Koniunktura në Eurozonë çalon, inflacioni ka mbetur në zero. Përse duhet ndërmarrë patjetër gjithçka për të arritur sërish tek kuota e dëshiruar e dy përqindëshit? A ka kjo kuptim në një kohë, që çmimi i naftës është vazhdimisht në rënie? A mos vallë problemi qendron pikërisht këtu?

Ora e spekulantëve

E vetmja arsye përse njerëzit blejnë, blejnë dhe blejnë është, se ata preferojnë më mirë ta shpenzojnë paranë, se sa ta depozitojnë atë në bankë me interesa praktikisht zero. Eksperimenti gjigand i Draghit është një operacion në zemrën e hapur, që në radhë të parë jep vetëm një efekt: atë të zhvelftësimit të parasë në përmasa historike. Politika e interesit zero është receta e gabuar, ajo i drejton paranë dhe kapitalin vetëm atje, ku mund të shkaktojë gjëmën më të madhe: në duart e spekulantëve. Për njerëzit, që duan të sigurojnë jetesën në pleqëri me kursimet e tyre, kjo politikë është vetëm perversitet. Natyrisht tani mrekullisht mund të investosh në imobilje. Por kjo fluskë do të pëlcasë, më shpejt nga sa do të preferonte ndokush.

Sidoqoftë efekti i operacionit riskant të Draghit dhe padyshim i qëllimi të tij është, se Euro ka humbur dukshëm vlerë kundrejt Dollarit të SHBA-së, kjo i bën eksportet nga Eurozona më të favorshme. Së paku kjo ka funksionuar, e parashikueshme është për vitin e ardhshëm një barazi mes dy valutave. Por kujt i ndihmon kjo përveçse ekonomisë gjermane të orientuar fort nga eksporti? Pozitive është edhe se të paktën fluksi i parasë së lirë i mban në biznez vendet europiano-jugore si Italia. Një dhuratë e Draghit kjo për bashkëatdhetarët e vet. Vetëm se edhe sa kohë do të duhet që politika monetare të marrë përsipër detyrat e politikës reale?

Nuk ka plan kundër ndonjë krize

E të ndalemi tani edhe tek diga tjetër e çarë, që ka prekur Greqinë. A e ka numëruar ndokush, se sa samite të jashtëzakonshme iu deshën BE-së derisa më në fund u derdhën sërish ndihma të reja miliardash në kompensim të premtimeve për reforma të qeverisë së majtë në Athinë? Në fund pati një paketë ndihmash, e sërish u vendos qetësia. Por në të vërtetë diçka thelbësore që ky vend më në fund të mund të qendrojë sërish mbi këmbët e veta këtë vit nuk ka pasur në Greqi. E pra një kapitull ky që do të rihapet edhe në vitin 2016.

Por kjo temë me siguri që nuk do të tërheqë kaq shumë vëmendjen sa sivjet, kur vëmendja e aktorëve politikë u zhvendos drejt çështjes tjetër madhore: dyndjes masive të refugjatëve. Përderisa destinacioni kryesor i shumicës së refugjatëve, që kanë kaluar vështirësi të shumta, është Gjermania, dhe përderisa vala e tyre nuk do të ndalet as vitin e ardhshëm, kjo do të mbetet një sprovë e madhe për shoqërinë gjermane – e po ashtu do ta çojë në limitet e veta edhe kapacitetin e rendimentit të ekonomisë gjermane. Por ndonëse ekonomia sivjet ka ecur në një farë mase mirë, kjo nuk do të thotë që automatikisht do të vazhdojë kështu edhe vitin e ardhshëm.

Gjermania është e varur nga ekonomia botërore, e ndërkohë nuk ka shenja, që vendi do t’i bëjë ballë një recesioni të mundshëm mbarëbotëror. Vala e refugjatëve, edhe nga Gjermania ishte e pritshme, por atë nuk donte ta shihte askush. Kriza tjetër do të vijë me siguri. Por qeveria gjermane preferon më shumë bamirësitë miliardëshe sociale si pensioni në moshën 63 vjeçare. Mbetet të shpresojmë, që kriza e ardhshme të mos prekë ekonominë botërore. Sepse, për t’u kthyer sërish tek Mario Draghi: ai ka shkarkuar të gjithë barutin, i ka konsumuar të gjitha instrumentat për stimulimin e koniunkturës. Agjenda e tij e politkës monetare është helm për Europën, sepse ajo pengon reformat. Ndaj motoja për vitin 2016 është: ndaleni Draghin! (dw)

Presidenti Barack Obama dhe kandidatja demokrate për presidente, Hillary Clinton janë në krye të listës së personave “më të admiruar” në Shtetet e Bashkuara, të shpallur nga organizata e sondazheve Gallup.

17 për qind e amerikanëve zgjodhën zotin Obama si më të admiruarin mes burrave, ndërsa 13 për qind votuan për zonjën Clinton si gruan më të admiruar.

Ish-sekretarja e Shtetit, Hillary Clinton ka qenë në krye të listës 20 herë, dhe kjo është hera e 14 radhas, ndërsa Presidenti Obama është emëruar tetë herë.

Në vend të dytë e të tretë mes burrave janë Papa Françesku dhe kandidati republikan për President Donald Trump, secili me nga pesë për qind. Zoti Trump ka qenë edhe më parë ndër dhjetë më të admiruarit, nga viti 1988 deri në 1990 ndhe përsëri në vitin 2011.

Aktivistja pakistaneze, Malala Yousafzai dhe Oprah Winfrey ishin në vend të dytë dhe të tretë mes grave me 5 për qind dhe 4 për qind respektivisht. (voa)

Stuhitë goditën pjesën jugore dhe qendrore të Shteteve të Bashkuara gjatë fundjavës së Krishtlindjes, me përmbytje dhe tornado që shkaktuan vdekjen e të pakën 43 vetëve, shkatërrime godinash dhe bllokims transporti për miliona vetë në një kohë të ngarkuar udhëtimesh.
Moti i keq ose parashikimet për stuhi, sollën si rezultat vendosjen e gjendjes së emergjencës në shtetet e Mizurit dhe Nju Meksikos.
Përmbytjet shkaktuan vdekjen e 13 vetëve në Mizuri dhe Ilinoi. Në Teksas të paktën 11 vetë gjetën vdekjen në zonën e Dallasit gjatë fundjavës nga tornadot.

Këto stuhi, pasuan ato të para Krishtlindjes, ku gjetën vdekjen 18 vetë.Guvernatorët e disa shteteve kanë evakuuar banorët nga shtëpitë.
Moti i keq solli si rezultat anullimin e afro 1 mijë e 500 fluturimeve të dielën. (voa)

Moti gjatë këtij sezoni festash në SHBA po shkakton viktima dhe po lë pas shkatërrime. Një front i ftohtë i ardhur nga pjesa perëndimore e Shteteve të Bashkuara po ndërvepron me të nxehtin nga pjesa jugore e vendit.

Gjatë sezonit të festave, Shtetet e Bashkuara po përballen me një mot të pazakontë që ka shkaktuar viktima dhe shkatërrime në pjesë të mëdha të vendit.

“Po binte një shi me erë dhe papritur të gjithë kuptuam që po vinte një tornado dhe se duhet të mbroheshim,” thotë një e mbijetuar nga tornado në Teksas.

Mbrëmjen e së shtunës, shteti i Teksasit u godit nga disa tornado, të cilat shkaktuan shtatë të vdekur dhe shkatërruan disa shtëpi në zonën e Dallasit.

“Kur dola nga shtëpia dëgjova vetëm kaos. Pashë njerëz të bllokuar në makinat e tyre. Ndihmova një grua që kishte ngelur në makinë prej pemëve që ishin rrëzuar,” thotë një i mbijetuar nga tornado.

Sipas kanalit televiziv për kohën, ky mot u shkaktua prej frontit të ftohtë të ardhur nga pjesa perëndimore e SHBA-së dhe ndërveprimit me të nxehtin e pahasur më parë në pjesën jugore të vendit.

Në Teksas dhe në Oklahoma banorët po përgatiten për një furtunë bore që pritet të sjellë të deri në 45 cm dëborë.

Edhe në jugun e Shteteve të Bashkuara kushtet e pazakonta të motit kanë shkaktuar dhjetë viktima në Misissippi. (voa)

Pёrmes njё aksioni nё shkallё tё gjerё tё policisё nё Serbi u arrestuan (26.12) nёn dyshimin pёr korrupsion 79 vetё.

Gjatё aksionit tё pёrbashkёt tё policisё dhe prokurorisё nё Serbi u arrestuan 79 vetё, ndёr ta edhe njё ish-minstёr, dy ish-zёvendёsministra, disa shefa tё sipёrmarrjeve shtetёrore dhe ish-shefja e autoritetit pёr luftёn kundёr korrupsionit. Pёrmes pastrimit tё parave, abuzimit me postin dhe ryshfeteve ky grup ka mashtruar shtetin qё nga viti 2004 duke shkaktuar njё dёm prej rreth 100 milionё Eurosh, komunikoi ministri i Brendshёm Nebojsa Stefanovic nё njё konferencё shtypi nё Beograd. Ky ёshtё deri mё sot aksioni mё i madh i policisё kundёr korrupsionit, tha ministri mё tej. “Pёrmes njё operacioni tё pёrbashkёt policia dhe prokuroria e Serbisё arrestuan 79 vetё dhe pesё tё tjerё janё ende nё kёrkim. Po ashtu po kryhen hetime ndaj 39 personave tё tjerё. Ky ёshtё njё aksion i ndёrmarё pёr tё parandaluar kriminin financiar dhe korrupsionin nё radhёt e zyrtarёve publikё. Dyshimet kanё tё bёjnё me larje parashё, abuzim me detyrёn, falsifikim dokumentash, ҁertifikime tё rreme, punё e paskrupult, ryshfet, abuzim me prokurimet publike dhe tё tjera vepra penale. Shumica e veprave penale kanё tё bёjnё me makinacione nё sektorin e ndёrtimit, gjё qё i ka shkaktuar miliona Euro dёm buxhetit. Por të gjitha këto veprime, pavarësisht nga shkalla e dëmit financiar, që kanë shkaktuar, paraqesin rrezik për shoqërinë tonë”, deklaroi ministri i Brendshёm nё konferencёn pёr shtyp.

Lufta kundёr korrupsionit kushti numёr njё pёr antarёsimin nё BE

Serbia është një vend, ku korrupsioni ka depërtuar në të gjitha poret e shoqërisë. Në indeksin e korrupsionit të Transparency International Serbia renditet në vendin e 78-të, mes Malit të Zi dhe Tunizisë. Së fundi gazeta më e madhe serbe “Blic” ka publikuar një “listë të çmimeve të korrupsionit”. Në bazë të saj për 300 Euro mund të realizohet ndryshimi i shkollës. Një punim për mbrojtjen e doktoraturës kushton rreth 3000 Euro dhe një leje ndërtimi 1000 Euro. Për trajtimin me preferencë gjatë lindjes nëna duhet të paguajë 1000 Euro.