Arkivi mujor: Maj 2016

Maqedonia

Komandant Hoxha tregon se kush dha urdhër për ti sulmuar djemtë e UÇK-së në Kumanovë

Komento

xhezair shaqiriXhezair Shaqiri, i njohur si komandant Hoxha sërish ka komentuar rastin e Kumanovës dhe vendimin qeveritar për ti nderuar policët e rënën më 9 maj në Lagjen e Trimave në Kumanovë, njofton agjencia e lajmeve INA.

Ai madje nuk habitet me vendimin e VMRO-BDI për ngritjen e përmendoreve policëve të vrarë në Kumanovë.

“Unë nuk po vërej skandal në këtë vendim ku BDI-VMRO kanë marr vendim që t’iu ngrisin përmendore policëve të vrarë në Kumanovë.

Të besosh që BDI nuk ka dhënë urdhër që të sulmohen djemtë e UÇK-së në Kumanovë , duhet të jesh naiv, i krisur, ose të kesh interes partiak e personal.

Ali Ahmeti vet e ka pranuar se ditën e sulmit në Lagjen e Trimave qysh në orët e hershme të mëngjesit ka qenë në selinë e partisë dhe nuk ka marr asnjë një nismë për ti ndihmuar djemtë e UÇK-së.

Aliu vet e pranon se kah fundi i ditës ka patuar një telefonatë nga grupi i Kumanovës, i cili ishte i rrethuar nga njësitet speciale maqedonase dhe nuk ka ndërmarr asgjë. Të vetmen gjë që ka bërë i ka tradhtuar dhe vrarë pasi janë dorëzuar në besë të këtij të pa besi .

A nuk ka mundur Ali Ahmeti ta kërcënon Sashën e Nikollën se, nëse menjëher nuk i ndalin sulmet për disa minuta do të dal prej qeverisë. Në këtë mënyrë Maqedonia nuk kishte qeverisje.

Por jo qe besa, Aliu nuk del nga qeveria as sot as kur e gjithë bota po e lusin të largohet nga krimineli Gruevski. Nuk del se edhe vet i ka lyer duart me gjak shqiptari. Kush të dojë le ti beson ëndrrës së gomarit Ali, por një ditë do të del zhgëndërr”, është shprehur Hoxha. (INA)

Maqedonia

Beqiri: Agjenti iranian pastron paratë e djalit të ministrit të brendshëm Çavkov

Komento

zahir beqirZahir Beqir , i njohur si Çaushi i akuzuar në procesi kryesor “Fabrika e aferave” për letërnjoftime false ka drejtuar akuza ndaj djalit të ministrit aktual të MPB-së, për pastrim parash me një agjent Iranian.

Sipas Beqirit, agjenti Iranian Majkl Civik që jeton në Strumicë, përmes një kompanie në Honkong po pastron para për Ivan Çavkovin, djalin e ministrit aktual Mitko Çavkov, transmeton INA lajmin e portaleve maqedonase.

Beqiri këtë e ka theksuar dje në seancën gjyqësore, duke theksuar se pikërisht Civik ka inskenuar edhe rastin “Spiuni”. Beqiri ka thënë gjithashtu se agjenti Iranian i kishte afruar 1 milionë euro për të pranuar se materialet e përgjimeve i ka marrë nga lideri i LSDM, Zoran Zaev dhe ish-kundërzbuluesi Verushevski. (INA)

Kosova

“Isa Mustafa, ky frikacak i paparë”

Komento

donikaMe “Isa Mustafa, ky frikacak i paparë”, fillon reagimi i kryetares së Lidhjes Demokratike të Degës në Gjermani, Donika Gërvalla, pas ripërsëritjes së skenave të ndalimit të saj për të marrë pjesë në mbledhjet e LDK-së.

Gërvalla ka thënë se nuk është e gatshme që edhe për gjatë ta pranojë përhapjen e të pavërtetave në adresën e saj dhe të veprimtarëve të tjerë të Degës në Gjermani.

“Jo vetëm unë jam ngopur me këto lojëra të shëmtuara intrigash dhe gënjeshtrash. Z. Mustafa, vihuni në kërkim të nderit tuaj, ose së paku pushoni së treguari të pavërteta aty ku një gjë e tillë është krejtësisht e panevojshme”, porosit Gërvalla kryeministrin dhe kryetarin e LDK-së, Isa Mustafa.

Më poshtë ju sjellim të plotë shënimin e saj të publikuar në Facebook:

Isa Mustafa, ky frikacak i paparë

Sa për informacion:

Natyrisht që unë jam Kryetare e Degës së LDK-së në Gjermani. E zgjedhur në mënyrë korrekte dhe me votë të fshehtë. Z. Mustafa duhet të pushojë së treguari të pavërteta. Ai e di që zgjedhjet në Gjermani kanë qenë korrekte dhe që një gjë e tillë është e dokumentuar. Përsëritja e të pavërtetave para syve të një populli të tërë nuk i bën nder as Isa Mustafës dhe as njerëzve rreth tij.

Nuk jam e gatshme të pranoj edhe më gjatë përhapjen e të pavërtetave në adresë timen dhe të veprimtarëve të Degës në Gjermani. Jo vetëm unë jam ngopur me këto lojëra të shëmtuara intrigash dhe gënjeshtrash. Z. Mustafa, vihuni në kërkim të nderit tuaj, ose së paku pushoni së treguari të pavërteta aty ku një gjë e tillë është krejtësisht e panevojshme.

Këta njerëz i kanë shpallur luftë së vërtetës. Nëse nuk iu dalim ballë për ballë në këtë luftë, atëherë nuk do të na mbetet tjetër, veç se të jetojmë edhe ne në gënjeshtër.

Pikërisht Isa Mustafa, “i zgjedhur” pa i lëvizur qerpiku, para gjithë opinionit shqiptar dhe ndërkombëtar duke shkelur normat statutare të LDK-së në mënyrë krejtësisht jolegale me aklamacion, është personi i fundit, i cili do të duhej të gjykonte apo vlerësonte procese zgjedhore.

Aq më tepër që Statuti i LDK-së e përcakton saktë se kush merret me verifikim e zgjedhjeve brenda LDK-së. Një gjë duhet të kuptojë Isa Mustafa, që kohët kur kryetari i partisë bënte çfarë t’i tekej, në Kosovë kanë vdekur së bashku me shtetin jugosllav.

Të gjithë e dimë se çfarë e shtyn Isa Mustafën: Frika. Nuk është vështirë ta shohësh frikën në sytë e këtij personi, i cili ndërkohë është kthyer në një pengesë serioze për progres dhe zhvillim në Kosovë dhe LDK. Forma e komunikimit publik (jo vetëm në Facebook) dhe marrjes së vendimeve, Isa Mustafën e ka kthyer si brenda, ashtu edhe jashtë Kosovës në një karikaturë.

Dëmi që i është shkaktuar Kosovës edhe deri tani është i madh. Si miqtë, ashtu edhe kundërshtarët e Kosovës e dinë mirë se çfarë po ndodh këtu. Politika e vendit duhet të bëhet nga gra dhe burra të këtij vendi, të cilët janë të guximshëm dhe të qëndrueshëm, dhe jo nga frikacakë, të cilët nuk kanë probleme serioze me të vërtetën.

Statuti i LDK-së është shumë i qartë: kush nuk zgjidhet me votë të fshehtë, nuk konsiderohet si i zgjedhur, sepse votimi është i pavlefshëm. Isa Mustafa në vitin 2015 nuk është zgjedhur me votë të fshehtë. Këtu nuk ka asnjë hapësirë interpretimi.

Ambasadat e vendeve mike të Kosovë, duke u nisur nga SHBA-të e deri tek Gjermania janë njoftuar rreth zhvillimeve në LDK nën drejtimin e Isa Mustafës drejt një partie autoritare dhe jodemokratike. Po ashtu janë informuar edhe rreth rreziqeve që fshehin zhvillimet e tilla.

Askush nuk do të na ndalë të vazhdojmë të themi të vërtetën. Funksionarë, të cilët gënjejnë qytetarët dhe kombin, jo se jo.

Hapat e mëtejmë për rivendosjen e drejtësisë sipas Statutit të LDK-së dhe ligjeve të vendit do të pasojnë gjatë ditëve të ardhshme. (kosovapress)

Shqipëria

Rama: Kush është dënuar nga gjykata nuk mund të ketë mbështetjen e PS-së

Komento

ramaKryeministri Edi Rama ka reaguar pas dorëheqjes së kryebashkiakut të Kavajës, Elvis Rroshi. Në një deklaratë të shpërndarë për mediat, Rama shprehet se Rroshi është kandiduar dhe rikandiduar, pasi është shqyrtuar dëshmia e tij e penalitetit dhe janë verifikuar akuzat e hedhura herë pas here ndaj tij nga opozita. Kreu i qeverisë thotë se pas një verifikimi të thelluar, ka dalë në dritë se Rroshi është dënuar në moshë të mitur në Itali nga gjykata e të miturve. “Jam i keqardhur, por aspak i lëkundur në bindjen time se kur hyn në mes një problem me drejtësinë, vendimmarrja s’ka si të ketë më asnjë ngjyrë tjetër përveçse bardhezi”, shprehet Rama.

Reagimi i Ramës

Kur e kemi zgjedhur Elvis Rroshin si kandidat për Kavajën, kemi marrë si për të gjithë dëshminë e penalitetit, e cila ka rezultuar e bardhë. Po ashtu, kur e kemi mbështetur rikandidimin e tij, kemi sqaruar në rrugë operative të gjitha akuzat e bëra ndaj tij. Dhe asgjë nga çfarë kanë pretenduar akuzuesit e tij publikë deri më sot, nuk ka rezultuar e vërtetë.

Duke i njohur dhe respektuar gjithnjë vështirësitë që të rinjtë shqiptarë kanë kaluar përmes dallgëve të larta të jetesës në emigracion, kam besuar dhe besoj se historia e Elvisit, apo Ervinit, ka qenë thjesht njëra ndër historitë e panumërta të djemve që janë përplasur nëpër ato dallgë, duke jetuar mes ëndrrës për t’ia dalë dhe makthit të rikthimit mbrapsht. Ndërrime emri për të mos u kthyer mbrapsht, përzënie për qëndrim pa leje, kalime ilegale kufiri e me radhë, janë akte të paligjshme që në vitet ’90 i kanë bërë shumë e shumë emigrantë në rrugën drejt ëndrrave të tyre.

Prandaj edhe nuk e kam fshehur përçmimin tim ndaj hipokrizisë ekstreme të atyre që kanë shumë gjëra për t’u  turpëruar apo fshehur nga jeta e tyre në politikë dhe i turreshin kryetarit të Bashkisë së Kavajës me gjithfarë shpifjesh e akuzash. Ashtu sikundër nuk kam pasur pse ta fsheh respektin për punën e jashtëzakonshme të Elvis Rroshit për Kavajën, e cila sot është kthyer në një shembull të shkëlqyer transformimi.

Por fatkeqësisht sot, një verifikim i thelluar ka nxjerrë në dritë një fakt deri tani krejt të panjohur dhe të papërfolur ndonjëherë për Elvis Roshin, për të cilin nuk është lënë gënjeshtër pa treguar. Elvis Roshi është dënuar në moshë të mitur në Itali nga gjykata e të miturve! Jam i keqardhur, por aspak i lëkundur në bindjen time se kur hyn në mes një problem me drejtësinë, vendimmarrja s’ka si të ketë më asnjë ngjyrë tjetër përveçse bardhezi.

Kam qenë dhe mbetem i prerë në këtë pikë: Fajësinë nuk e caktojnë partitë as mediat, po gjykatat. Gjithkush sulmohet me opinione kriminalizuese të pambështetura në fakte po në shpifje, meriton solidaritet. Ama gjithkush që ka një dënim gjykate me heqje lirie, nuk e ka dot mbështetjen e Partisë Socialiste për të kandiduar për çfarëdo qoftë apo qëndruar në një detyrë publike që ka. Fakti në këtë rast që Elvis Roshi nuk e ka vuajtur asnjë ditë dënimin sepse ka qenë në moshë të mitur, nuk mund të ndryshojë gjë.

Kjo ka qenë linja ime në këtë aspekt shumë më përpara se sa të kalonte ligji i “dekriminalizimit”, kjo është linja jonë edhe sot. Asgjë nuk ndryshon në raport me hipokritët e lartpërmendur dhe po ashtu asgjë nuk do të ndryshojë në pikën e lartpërmendur. Dhe ndryshe nga partia përballë, që tjetër thotë e tjetër bën, me papastërtitë e hatashme që ka në grupin e saj parlamentar, deri edhe duke justifikuar shkeljen haptazi të ligjit të “dekriminalizimit” nga një deputet i saj, në familjen tonë politike nuk ka llafe përballë fakteve të provuara. Kush gjendet në shkelje të kësaj linje as nuk mund ta marrë, as nuk mund ta mbajë një detyrë me mbështetjen tonë.

Kam besuar dhe me siguri do të besoj gjithnjë se të trajtosh një njeri si kriminel për vepra që nuk i ka bërë, është kriminale. Ishte kriminale dje dhe mbetet kriminale sot e gjithmonë, çdo shpifje, akuzë, fabrikim që synon të kriminalizojë një person për shkak të detyrës. Edhe Elvis Roshin!
Besoj po ashtu se edhe vetë dorëheqja e Elvis Roshit sot, u jep të gjithëve një tjetër provë të qartë se në Partinë Socialiste në këta 32 muaj qeverisje ka fituar një parim i panegociueshëm:

Kur një fakt i provuar nxjerr në pah një problem që i takon drejtësisë, pushteti ynë nuk futet kurrë mes drejtësisë dhe cilitdo ndër ne.

Duke e konsideruar të përfunduar shërbimin e Elvis Rroshit si kryetar i Bashkisë së Kavajës, do të vazhdoj ta mbështes me gjithë zemër projektin ambicioz të Rilindjes Urbane të Kavajës.​

/ G.S. /

Kosova

Ambasada e Shqipërisë fut në sherr politikanët e Prishtinës

Komento

Shpend-AhmetiKryetari i Komunës së Prishtinës, Shpend Ahmeti, ka reaguar ashpër, duke akuzuar dy partitë kryesore LDK dhe PDK se kanë dalë kundër Shqipërisë. Në një deklaratë, Ahmeti thotë se, pas disa muajve diskutimesh me përfaqësuesit e Republikës së Shqipërisë ishte rënë dakord për vendndodhjen e re të Ambasadës së Republikës së Shqipërisë në qendër të qytetit të Prishtinës. Për këtë, Ahmeti bën me dije se prej dy javësh ka kërkuar një mbledhje të jashtëzakonshme të Kuvendit të Prishtinës për të proceduar para mbledhjes së përbashkët të dy qeverive.

“Kur e vërejtëm hezimitin e Kryesuesit e kuptova se në vitin 2007 apo 2008, Komuna gjatë udhëheqjes së LDK kishte ndarë këtë lokacion për partinë, pra për LDK-në, për ta ndërtuar selinë shumëkatëshe të partisë. Sot LDK e bojkotoi mbledhjen, duke thënë se ajo tokë është e tyre. Po ashtu PDK ka bojkotuar seancën, duke dalë hapur kundër Shqipërisë për interesa të LDK-së”, shprehet kreu i komunës. Ai shton se nuk është hera e parë që komuna gjatë viteve te qeverisjes LDK-PDK ka ndarë prona për vetveten, por kjo sot i tejkalon kufijtë e një beteje të cektë politike që po e bëjnë individë të caktuar brenda dhe jashtë kuvendit komunal.

“Republika e Kosovës ka Ambasadë në qendër të Tiranës. Ky veprim i LDK/PDK në Kuvendin Komunal në Prishtinë është turp për shtetin tonë. Qoftë në ndërgjegjen e tyre”, mbyllet komenti i Ahmetit.(shekulli)

Bota

Problemet e vërteta të Hillary Clintonit

Komento

Grindje për E-mailet? Problemet e vërteta të Hillary Clintonit janë diku tjetër.

clinton“Një nga problemet më të mëdha në lidhje me zgjedhjen është perceptimi publik”, thotë Adam Ramey, ekspert për politikën e jashtme në New York University në Abu Dhabi. “Si Donald Trumpi, ashtu edhe Hillary Clintoni kanë nderin e dyshimtë, tww jenë kandidatët me prestigj më të ulët të njërës prej dy partive të mëdha, që kur kanë filluar të mblidhen të dhënat.”

Sipas faqes politike në internet Rear Clear Politics, Clintoni vlerësohet negativisht nga 55,8 përqind e amerikanëve. Vetëm 37,6 përqind e të pyeturve kanë një mendim pozitiv për të. Vlerat e kandidatit të pritshëm për president të republikanëve, Donald Trump janë vetëm pak më të këqia. Atë e vlerësojnë negativisht 58 përqind e amerikanëve, vetëm 35,4 përqind kanë një mendim pozitiv për të. Rezultatet tregojnë se shumë zgjedhës, edhe në partinë e Clintonit, nuk e duan ose nuk i besojnë asaj.

“Ndershmëria dhe besueshmëria janë problemi qendror i saj, prej të cilit rrjedhin të gjitha të tjerët”, thekson Ramey. Vazhdimi i grindjes për mënyrën si ka vepruar Clintoni me llogarinë e E-Mailit në kohën kur ishte ministre e Jashtme, diskutimi për rolin e të ashtuquajturve superdelegatë demokratë, që do të votojnë për Clintonin si dhe problemet që ka ajo që ta fitojë më në fund garën me Sandersin – të gjitha varen sipas Rameyt nga predispozita bazë negative e shumë amerikanëve ndaj kandidates potenciale për presidente.

Pjesë e shtresës së lartë

Në një vit elektoral, të karakterizuar nga zemërimi populist ndaj së ashtuquajturës shtresë të lartë apo elitë, Clintoni – ish-ministrja e Jashtme, senatorja dhe First Lady – paraqet një tabelë qitjeje politike të lehtë. Dhe kjo jo vetëm për Bernie Sanders-in, por edhe për Donald Trumpin, kundërshtarin e saj të pritshëm në zgjedhjet presidenciale në nëntor.

Sepse Trumpi arriti që të shfrytëzojë frymën kundër elitave drejtuese që sundon aktualisht, për të avancuar kandidaturën republikane për President. Ky nuk është sinjal i mirë për Clintonin, sepse Trumpi do ta përdorë pa mëshirë “kartën e elitës drejtuese” kundër saj edhe në fushatën elektorale. Që Trumpi arriti ta nxjerrë veten deri tani me sukses si kandidat kundër elitave është për t’u habitur, sepse në fund të fundit Trumpi është prototipi i një kandidati të elitave dhe të shtresës së lartë, thekson Scott Lucas, Profesor i Studimeve Amerikane në University of Birmingham në Britaninë e Madhe.

“Ky është truk”, thotë Lucas. “Ne kemi dy kandidatë, të cilët janë që të dy shumë qartë pjesë e elitës drejtuese. Në rastin e Trumpit kemi të bëjmë me elitën ekonomike, te Clintoni kemi të bëjmë me elitën politike”. Por në dallim nga Clintoni, Trumpi, sipërmarrësi i madh i pasurive të paluajtshme, yll i televizionit dhe i vetëemëruari miliarder nga New Yorku – ka arritur deri tani që t’i bindë zgjedhësit, se nuk bën pjesë në elitën e urryer drejtuese. Dhe kjo mund të kthehet në një faktor vendimtar në fushatën elektorale.

Autenciteti

“Vendimtarja është që Hillary nuk lë te njerëzit atë përshtypje që lë Billi, gjë që ai e ka bërë dhe vazhdon ta bëjë”, thotë eksperti nga SHBA, Lucas. “Në daljet e saj në publik ajo lë një përshtypje shumë të ngathët, pavarësisht nëse bëhet fjalë për daljet në fushatë elektorale ose edhe kur ajo thjesht takon njerëz”. Shumë amerikanë mendojnë se Clintoni “sillet si robote dhe joautentike”. “Nëse Hillary do që të ketë një shans të vërtetë”, thotë Ramey, “atëherë ajo duhet të rrezatojë një masë minimale sjelljeje njerëzore dhe të arrijë në njëfarë mënyre që të komunikojë në mënyrë autentike me zgjedhësit e zakonshëm.”

Bota

Tiranë: vendet anëtare të NATO-s bien dakord për të rritur aftësitë mbrojtëse

Komento

Tiranë: vendevet anëtare të NATO-s bien dakord për të rritur aftësitë mbrojtëse të aleancës. Flet ekskluzivisht për DW Michael R. Turner, kongresmen në SHBA, President i Asamblesë Parlamentare të NATO-s.

Michael TurnerDW: Z. Turner a i përmbushi pritshmëritë tuaja Asambleja Parlamentare e NATO-s, sesioni i pranverës, që përfundoi punimet (30 maj 2016) në Tiranë? Cilat ishin çështjet ku u fokusuan diskutimet?

Michael R.Turner: Gjatë këtij viti kemi pasur tri çështje kryesore në fokus: e para është vazhdimi i mbështetjes për zgjerimin e NATO-s; e dyta është kthimi përsëri i NATO-s në një organizatë që mund të frenojë agresorët, si është Rusia; e treta është që të sigurohemi që vendet anëtare janë të zotuara për të kontribuar me 2% të PBB dhe që fondet për mbrojtjen ushatarake nuk janë prerë. Diskutimet tona në Tiranë kanë korresponduar me këto tri çështje. Ka pasur një simbolikë të madhe fakti që Asamblenë Parlamentare të NATO-s e zhvilluam për herë të parë në Tiranë, në një kohë kur Mali i Zi ka marrë ftesën për t’iu bashkuar Aleancës Euro- Atlantike. Fakti që ndodhemi në Ballkanin Perëndimor dhe që Mali i Zi ka marrë ftesën për anëtarësim në NATO u festua shumë në Tiranë. Lidhur me çështjen e agresivitetit të Rusisë, ne shohim vetëm rreziqe më të mëdha për vendet anëtare të NATO-s dhe njëherazi një zotim më të madh, të dakortësuar nga sejcili prej nesh. Neve na duhet të jemi më të fortë në aftësitë tona ushtarake. Dhe natyrisht që kemi diskutuar për burime financiare dhe fonde kur SHBA-ja është zotuar që vitin e ardhshëm të kontribojë me 3,4 miliardë dollarë për forcimin e mbrojtjes në Europë. Pjesë e diskutimeve në Tiranë ka qënë sesi vetë europianët mund të parashikojnë të rrisin kontributet e tyre në mënyrë që të ndahet barra financiare e një mbrojtjeje më të fortë.

DW: Po Gjermania? A do të rrisë kontributin financiar me rritjen e agresivitetit të Rusisë?

Michael R.Turner: Gjermania është një partnere shumë e përgjegjshme, shumë mbështetëse dhe lider në NATO. Mendoj që të gjitha vendet anëtare, të gjithë ne nëse shohim buxhetet e mbrojtjes mund të gjejmë mënyra që t’i rrisim ato për t’iu përgjigjur si agresivitetit të Rusisë, ashtu edhe kërcënimeve nga ISIS , terrorizmi apo kërcënimeve që po shfaqen nga Koreja e Veriut. Por gjithashtu edhe për të qenë të sigurtë se kemi aftësitë e duhura ushtarake për të kontribuar kudo. Nëse shohim sesi sejcili vend i përgjigjet situatës, atëhere të gjithë janë të një mendimi se lidershipi gjerman është shumë i rëndësishem dhe zëri i delegacionit gjerman, ai i Ulla Schmidt, Zv. Presidente e Bundestagut, njëherazi edhe Raportuese e Posaçme e Asamblesë Parlamentare të NATO-s për dimensionin qytetar të Sigurisë në punimet e kësaj Asambleja, ishin zëra shumë të fortë dhe kontribues.

DW: Si mund të forcohet roli dhe kontributi i Asamblesë Parlamentare të NATO-s për të përballuar situatën aktuale gjeo-politike në Europë, veçanërisht kërcënimet teroriste, duke patur parasysh ngjarjet në Stamboll, Ankara, Bruksel?

Michael R.Turner: Rëndësia e Asamblesë Parlamentare të NATO-s është që mbledh anëtarë të parlamenteve nga vendet anëtare të aleancës për të diskutuar dhe ndarë informacionin për kërcënimet që ne po përballojmë. Në këtë takim miratuam një rezolutë që informon kryetarët e shteteve për Samitin e ardhshëm të Natos, këtë vit, në fillim të korrikut në Varshavë dhe u bëmë atyre apel të rrisin shpenzimet për mbrojtjen për t’iu përgjigjur agresivitetit të Rusisë dhe kërcënimeve terroriste. Ne duhet të sigurohemi që kemi aftësitë dhe vullnetitn për t’i përballuar sfidat e situatës.

DW: Sfidë përbën edhe përballja me stabilitetin vulnerabël në Ballkanin Perëndimor. Zv.Presidentja e Bundestagut, Ulla Shmidt, tha se “nuk mjafton thjesht mungesa e luftës për të siguruar një të ardhme të qëndrueshme për rajonin”. Si mund të kontribuojë Asambleja Parlamentare e NATO-s në vendet anëtare,që në Ballknain Perëndimor të çimentohet stabiliteti?

Michael R.Turner: Qyteti im i lindjes është Dayton, Ohio, ku u negociua Marrëveshja e Paqes e Dayton-it. Nëse kthehemi 20 vite pas kur kjo marrveshje u firmos, shohim që në Bosnjë- Herzegovinë kemi arritur paqen. Por aty duhet të arrijmë shumë më tepër. Anëtarët e parlamenteve kombëtare të secilit vend anëtar të NATO-s, sjellin këtu zërin e Parlamenteve të tyre dhe çojnë në Parlamentet e tyre çëeshtjet që diskutuam në Tiranë. Përfitoj nga rasti t’i bëj thirrje komunitetit ndërkombetar të ndihmojë Ballkanin Perëndimor si për të arritur një zgjidhje diplomatike të çështjes së emrit të Maqedonisë që të shohim hyrjen e saj në NATO dhe BE ashtu edhe per të mbështetur Bosnjë- Herzegovinën në evolucionin e saj kushtetues që ajo të bëhet një anëtare aktive e NATO-s.

DW: Çfarë u arrit me miratimin në mbyllje të punimeve të asamblesë të “Rezolutës së përbashkët dhe të qëndrueshme” për axhendën e Samitit të NATO-s në Varshavë nga parlamentaret/ët e 28 vendeve anëtare të NATO-s?

Michael R. Turner: Rezoluta njeh rreziqet si edhe mundësitë që ka NATO-ja për t’i përballuar ato. (dw)

Bota

„Raportim nga fronti“ – Në Venecia u hap Bienalja e 15-të e Arkitekturës

Komento

Venecia është kryeqyteti botëror i arkitekturës. Drejtuesi Alejandro Aravena prezanton Bienalen nën titullin “Raportim nga fronti”. Në fokus thelbi i arkitekturës dhe ndërrimi i perspektivës.

Bienalja e VeneciasBienalja e Venecias

Për ekspozitën kryesore drejtuesi i Bienales, Alejandro Aravena, i cili sapo u nderua me çmimin Pritzker, ka ftuar 88 arkitektë dhe grupe inovative arkitektësh, të raportojnë për punën e përditshme. Sipas Aravenas, “reporterët” e tij kishin detyrën të kërkonin “në horizont fusha të tjera veprimi”, dhe të angazhoheshin intensivisht me aktualitetin. Temat kryesore janë problematika e refugjatëve, izolimi, ndotja e mjedisit, katastrofat natyrore, periferia dhe pabarazia, nevoja urgjente për banim dhe krimi, për të përmendur vetëm disa prej tyre. Skena kryesore të Bienales së Arkitekturës, e cila organizohet me ndërrim me Bienalen e Artit, janë krahas “Giardinit” , kopshteve, edhe “Arsenali” i madh, një hapësirë historike për konstruktimin e anijeve.

Ndërrim i perspektivës

Motivi i pllakatit të Bienales: Një femër që qëndron në një shkallë në sfondin e një hapësire. Alejandro Aravena evokon me këtë pamje takimin e shkrimtarit Bruce Chatwin me gjermanen Maria Reiche, e cila udhëtonte nëpër shkretëtirë me një shkallë alumini për të studiuar format enigmatike në tokë. Maria Reiche kishte nevojë për shkallën, me qëllim të dallonte që larg format dhe strukturat. “Por vetëm ndërrimi i perspektivës të çon tek njohuria dhe zgjidhja e problemit”. Aravena beson në shpirtin frymëzues të arkitektëve. Bienalen ai e përkufizon si një shesh përballjeje idesh e konceptesh, por edhe si një vend të guximit të kreativitetit.

Problematika e refugjatëve

Jo më pak se 64 vende nga e gjithë bota janë pjesë e ndërrimit të perspektivës dhe i prezantojnë idetë e tyre nga data 28 Maj deri në 27 Nëntor 2016 në pavijonin “Giardini”, “Arsenale” dhe galeri të tjera të shpërndara në Venecia. Gjermania dhe Austria ofrojnë problematikën e refugjatëve në veprat e tyre. Pavijoni gjerman drejtohet nga Peter Cachola Schmal, drejtor i Muzeut Gjerman të Arkitekturës në Frankfurt. Nën moton “Të ofrosh atdhe – Gjermania Arrival Country” ai e përshkruan Gjermaninë si një vend emigrimi dhe ofron koncepte të reja ndërtimi për refugjatët.

Luani i Artë të arkitekturës i ofrohet këtë vit Paulo Mendes da Rochas. Arkitekti brazilian, fitues i çmimit Pritzker 2006, i njohur për arkitekturën e tij gjeometrike nderohet për veprën e tij në vite. (dw)

Bota, Shëndeti

Paketimi i thjeshtë i cigareve shpëton jetë njerëzish

Komento

cigareOrganizata Botërore e Shëndetësisë njofton se të dhënat kanë vërtetuar që paketimi i thjeshtë i prodhimeve të duhanit shpëton jetë duke ulur kërkesën për këtë produkt vdekjeprurës në rritje. Për të shënuar Ditën Botërore Pa Duhan, OBSH u kërkon vendeve ta bëjnë pirjen e duhanit më pak tërheqëse duke i ambalazhuar produktet e duhanit në paketa të thjeshta.

Lloji i paketimit të thjeshtë të produkteve të duhanit propozuar nga Organizata Botërore e Shëndetësisë ndryshon shumë nga paketat që tregojnë Cowboys duke pirë duhan.

Paketat e propozuara janë të zeza, me paralajmërime se pirja e duhanit vret dhe me imazhe njerëzish që vdesin nga kanceri. Douglas Bettcher, drejtor i OBSH-së për parandalimin e sëmundjeve jo të transmetueshme, thotë se paketimi i thjeshtë është për të pakësuar kërkesën për duhan duke e bërë atë më pak tërheqës.

“Etiketa e tregon duhanin siç është, prodhim i ligjshëm në dispozicion për të gjithë botën që kur përdoret si qëllim vret gati gjysmën e përdoruesve të tij.”

OBSH raporton se gati 6 milionë njerëz në vit vdesin para kohe nga sëmundjet që lidhen me duhanin. Ky numër është parashikuar të rritet në mbi 8 milionë deri në vitin 2030, me më shumë se 80 për qind e këtyre vdekjeve të parandalueshme në vendet në zhvillim.

Australia në vitin 2012 u bë vendi i parë që vendosi paketimin e thjeshtë të produkteve të duhanit, së bashku me paralajmërimet e reja dhe të zgjeruara shëndetësore. Franca dhe Britania kanë ndjekur të njëjtin shembull. OBSH thotë se vende të tjera, duke përfshirë Irlandën, Norvegjinë, Singaporin, Belgjikën dhe Zelandën e Re janë duke planifikuar zbatimin e kësaj mase.

Benn McGrady është avokat australian dhe zyrtar në OBSH. Ai thotë se Australia ka kryer një shqyrtim 34-mujor nga mesi i dhjetorit 2012 deri në shtator 2015 për të vlerësuar ndikimin e paketimit të thjeshtë.

“Gjatë kësaj periudhe ka pasur rreth 2 për qind ulje të duhanpirjes në Australi dhe 0. 5 përqind i atribuohet ndryshimeve në paketim.”

Zoti McGrady thotë se ka pasur rreth 108.000 më pak duhanpirës gjatë kësaj periudhe si pasojë e ndryshimeve të paketimit dhe etiketimit. (voa)