Në selinë e Parlamentit Europian në Strasburg, gjatë mbledhjes së II-të të Komisionit Parlamentar për Stabilizim Asocim BE-Kosovë, e cila po mbahet në Strasburg, Komisioni i përbashket KPSA (Komisioni parlamentar për Stabilizim Ascocim) në kuadër të rekomandimeve votoi unanimisht amandementin për rastin e aktivistit politik Astrit Dehari.
Amandamenti 22:

“Ka shprehur ngushëllime familjes dhe shokëve dhe shoqeve të aktivistit të ri politik, z. Astrit Dehari, i cili vdiq në paraburgim nën rrethana të dyshimta dhe ka kërkuar nga autoritetet kompetente të hetojnë tërësisht të gjitha rrethanat e vdekjes së tij, duke përfshirë çfarëdo pretendimi të përdorimit të tepruar të forcës nga cilido zyrtar i zbatimit të ligjit, si dhe përgjegjësinë e mundshme të institucioneve shtetërore; ka theksuar se nëse ndonjë vepër e gabuar ka ndodhur, është dashur të ndiqej dhe të dënohej rëndë si shembull;”.

Deputetët e Lëvizjes VETËVENDOSJE! Visar Ymeri dhe Donika Kadaj të cilën po marrin pjesë në këtë mbledhje kanë folur edhe për dështimin e sistemit të drejtësisë në Kosovë dhe për përndjekjen që u bëhet aktivistëve politikë. Po ashtu, është kërkuar edhe lirimi i pesë aktivistëve që vazhdojnë të mbahen në burg padrejtësisht. LVV

Gjykata Penale e Brukselit, më 23 nëntor ka dënuar në mungesë tre shtetas të Serbisë, për vrasjen e Enver Hadrit, veprimtar për të drejtat e njeriut dhe të drejtat politike të shqiptarëve të Kosovës.

Enver Hadri ishte vrarë me 22 shkurt të vitit 1990 në lagjen Sen Zhil në Bruksel. Siç thuhet, nga një automjet në lëvizje ishte shtënë me armë zjarri mbi Hadrin, i cili ishte goditur për vdekje në kokë.

Lajmin për vendimin e Gjykatës Penale të Brukselit e ka konfirmuar vajza e të ndjerit, Teuta Hadri përmes një komunikate për medie, në të cilën thuhet se Bozhidar Spasiq, ish- shef i Shërbimit të Sigurimit të shtetit jugosllav, Veselin Vukotiq dhe Andrija Drashkoviq, janë dënuar për vrasje me paramendim të Enver Hadrit.

Teutra Hadri e ka vlerësuar vendimin e Gjykatës Penale të Brukselit si “fitore e madhe e drejtësisë mbi krimin politik”.

“Shpresojmë se edhe vrasjet e ngjashme politike të kryera kundër shqiptarëve apo kujtdo qoftë tjetër do të zbardhen deri në imtësi dhe organizatorët dhe vrasësit të marrin dënimin e merituar”,thuhet në letrën Teuta Hadrit, të cilën ua ka dërguar medieve.

Hydajet Hyseni, ish-deputet i Kuvendit të Kosovës dhe kryetar i Shoqatës së të Burgosurve politik të Kosovës, duke folur për Radion Evropa e Lirë, thotë se Enver Hadri i takonte plejadës së patriotëve shqiptarë të Kosovës, që siç i vlerëson ai, ishin shndërruar në shtylla të qëndresës, ndërkombëtarizimit të çështjes shqiptare dhe të konsolidimit të saj.

Vrasja e tij nga strukturat e Sigurimit të shtetit të ish Jugosllavisë, ishte sikurse edhe vrasja e vëllezërve Jusuf dhe Bardhosh Gërvalla, si dhe Kadri Zekës në Gjermani.

“Enver Hadri, po ashtu, është një nga shembujt më eklatant që flet vetvetiu, se pse ishte në Bruksel. Ishte, pikërisht, në përpjekjet për ta evropianizuar dhe për ta ndërkombëtarizuar çështjen e pazgjidhur shqiptare. Ky akt i funksionimit të drejtësisë në Belgjikë, uroj që të jetë shembull, model edhe për ndriçimin e rasteve të tjera, si dhe për të kërkuar atë që nuk është kërkuar në masë të duhur, përgjegjësinë shtetërore të Serbisë”, ka thënë Hyseni.

Në anën tjetër, ministrja e Drejtësisë e Qeverisë së Serbisë, Nela Kuburoviq, ka deklaruar se Belgjika deri më tash nuk ka dërguar kërkesë për ekstradimin e tre shtetasve të Serbisë.

Enver Hadri

Megjithatë, siç ka theksuar ajo, nuk ekziston një marrëveshje ndërmjet Serbisë dhe Belgjikës për ekstradimin e ndërsjellë të shtetasve, kështu që Belgjika mund të kërkojë vetëm zbatimin e vendimit të plotfuqishëm të gjyqit.

“Kjo do të thotë që në rast se vendimi i gjyqit belg bëhet i plotfuqishëm, ky shtet mund të kërkojë që Vukotiq, Drashkoviq dhe Spasiq ta kryejnë dënimin në Serbi”, theksoi Kuburoviq.

Bozhodar Spasiq, të cilit Gjykata Penale e Brukselit ia ka shqiptuar dënimin, në një bisedë me Radion Evropa e Lirë ka thënë se nuk ka asnjë informatë zyrtare lidhur me rastin, që sipas tij i ka shkaktuar shqetësim.

“Unë planifikoj madje që ta padis shtetin e Belgjikës dhe familjen Hadri për shkak të shqetësimeve të ndryshme, për veprën penale të akuzës së rrejshme dhe kështu me radhë. Qysh kur ekzistojnë informatat se po zhvillohet një proces në Bruksel, unë nuk kam asnjë gjurmë të shkruar që dikush t’ më ketë informuar. Nuk kam asnjë thirrje me letër, madje nuk e di as për çka jam akuzuar në mënyrë që të mund të jap ndonjë përgjigje për ndonjë akuzë. Pra, nuk kemi marrë asnjë thirrje me shkrim e as me gojë”, tha Spasiq.

Ai ka shtuar se në vitin 1990, si shef i ekipit të Shërbimit të Sigurimit Shtetëror, ka pasur njohuri për vrasjen e Hadrit.

Zoran Mijatoviq, ish pjesëtar i Sigurimit të shtetit në ish-Jugosllavi, i cili kishte përcjellë migracionin shqiptar të Kosovës, thotë për Radion Evropa e Lirë se shërbimi ku ka punuar Spasiq i ka takuar nivelit federal. Ai thekson që nuk ka informata lidhur me aktivitetin e këtij niveli.

“Unë, në një kohë, në Qendrën e Beogradit, e kam udhëhequr sektorin për migracion. Por, në kohën time, kur unë kam qenë shef, mund të them se asnjë migrant nuk ka pësuar nga dora jonë. Se çfarë ka bërë shërbimi federal, këtë e dinë ata të cilët po i gjykojnë njerëzit të cilët kanë punuar në atë shërbim”, tha Mijatoviq.

Spasiq ka theksuar se nuk e ka ndërmend t’i dorëzohet organeve belge, për shkak se nuk e ka kërkuar këtë askush dhe madje nuk ka as fletë-arrest ndërkombëtar për të. (REL)

Intervistë me shefin e Policisë së Kosovës në veri, Zhelko Bojiq. Për DW ai flet për gjendjen e sigurisë, incidentet ndëretnike, integrimin e policëve serbë në Policinë e Kosovës.Deutsche Welle: Zoti Bojiq, mund të na thuani për fillim: si paraqitet gjendja e sigurisë në veri të Kosovës, pasi që ju drejtoni Policinë e Kosovës jo vetëm në veri të Mitrovicës por në tërë rajonin?

Zheljko Bojiq: Situata e sigurisë në veri, pra në zonën e përgjegjësisë së policisë në veri, është në nivelin e kënaqshëm. Natyrisht që nuk është në nivelin më të lartë, por as në vendet më të zhvilluara siguria nuk është gjithmonë në nivelin më të lartë. Ne si udhëheqës dhe pjesëtarë të policisë po përpiqemi që siguria të jetë në nivelin më të lartë të mundshëm, në çdo moment.

Probleme me krimet dhe kriminelët e rëndomtë me siguri që ka në të gjitha anët, por në veri ju keni pasur prej luftës deri më sot shumë shpesh edhe probleme ndëretnike dhe politike. A keni probleme të këtilla edhe tani?

Situata tani është shumë më e mirë se dikur. Ne kemi zyrtarët tanë policorë, të cilët merren me evitimin e konflikteve të këtilla ndëretnike, në veçanti në hapësirat multietnike. Dhe mund të them se situata aktualisht është në nivelin e duhur.

A keni pasur kohët e fundit ndonjë incident me karakter ndëretnik apo politik?

Ajo që na gëzon shumë, është pikërisht fakti që kohët e fundit nuk kemi pasur asnjë konflikt apo vepër penale me karakter ndëretnik apo politik. Për dallim prej kohërave të kaluara, kur kemi pasur raste të shumta të këtilla madje edhe viktima, në periudhën e fundit nuk kemi regjistruar asnjë problem të natyrës së këtillë.

Zoti Bojiq, në veri ka pasur shpesh sulme edhe ndaj pjesëtarëve të Policisë së Kosovës. E ndjeni veten ju të sigurt në këtë uniformë?

Absolutisht. Unë e ndjej veten shumë të sigurt dhe kurrë nuk e kam hequr uniformën kur kam dalë në qytet apo në rrugë gjatë orarit të punës.

Në njësitë tuaja policore ka edhe shqiptarë. Zëvendësi juaj është shqiptari Besim Hoti. A keni probleme apo fërkime mes vetë policëve në veri dhe cili është bashkëpunimi juaj me policinë në jug të Mitrovicës?

Duke marrë parasyshë që detyrat tona shpesh ndërlidhen edhe me gjendjen e sigurisë në jug të Mitrovicës, mund të them se kemi bashkëpunim shumë të mirë dhe kontakte ditore me policinë në jug. Sa i përket gjendjes këtu në veri, ne nuk kemi kurrfarë problemesh me policët shqiptarë.

Pas marrëveshjes në Bruksel, në Policinë e Kosovës janë integruar edhe përfaqësuesit e MUP-it të Serbisë dhe strukturat paralele. A ka përfunduar ky proces dhe si ka kaluar ai?

Procesi ka përfunduar dhe personat që kanë qenë të parashikuar të integrohen janë integruar pa kurfarë problemi.

A keni probleme me policët e integruar?

Ne nuk kemi me ta absolutisht kurrfarë problemi…

…ata janë mësuar t’u nënshtrohen urdhërave nga Serbia dhe strukturave të tjera këtu në veri.

Të gjitha pjesëtarët e Policisë së Kosovës në veri punojnë në përputhje me ligjet dhe rregullat e policisë.

Cilat janë problemet më të mëdha, me të cilat po përballeni ju këtu në veri?

Problemi më i madh, me të cilin po përballet policia në veri të Kosovës është trafiku, sepse janë shtuar lëvizjet, ndërsa hapësira është e vogël. Nuk kemi vendparkime të mjaftueshme dhe ky është aktualisht problemi më i madh me të cilin po përballemi.

Këtu në veri kam parë shumë makina pa targa, me targa të Serbisë dhe të Kosovës. Si do të zgjidhet ky problem?

Ky është një problem që duhet të zgjidhet në kuadër të dialogut në Bruksel dhe unë nuk dua të deklarohem për këtë çështje. Ne po përpiqemi që gjendja e sigurisë të jetë në nivelin e duhur dhe aktualisht kjo gjendje është e mirë. (dw)