Grupet e të drejtave të njeriut, një numër ligjvënësish amerikanë, disa gjeneralë në pension dhe ish-ambasadorë thonë se janë të shqetësuar në lidhje me mbrojtjen që Presidenti Trump i ka bërë presidentit rus Vladimir Putin.

Në një intervistë të transmetuar të dielën në kanalin televiziv Fox para fillimit të ndeshjes së Superbollit, presidenti Trump ritheksoi respektin e tij për Putinin. Kur gazetari Bill O’Reilly e sfidoi zotin Trump, duke e quajtur presidentin rus “vrasës”, Trump u përgjigj duke thënë: “Ne kemi shumë vrasës. Çfarë mendoni ju? Vendi ynë është aq i pafajshëm?”

Kremlini i ka bërë thirrje kanalit Fox që të kërkojë falje për atë që e quajti koment “të papranueshëm dhe fyes”. Gazetari O’Reilly të hënën në mbrëmje gjatë emisionit të tij televiziv, e hodhi poshtë ankesën e Kremlinit, duke thënë se Rusia mund të “më pyesë mua (për këtë çështje) rreth vitit 2023.”

Të martën, Presidenti Trump, deklaroi në Twitter se ai nuk e njeh presidentin rus Putin dhe nuk ka asnjë marrëveshje biznesi në Rusi.

Donald Trump nuk pranoi të thoshte asgjë negative për Putinin, gjatë fushatës së tij zgjedhore, dhe në mënyrë të përsëritur u është përgjigjur pyetjeve në lidhje me presidentin rus, duke thënë se marrëdhëniet e mira me Putinin dhe udhëheqësit e tjerë të botës do të ishin një aset e jo një humbje për Amerikën.

Bashkë-drejtorja për Shtetet e Bashkuara e organizatës Human Rights Watch, Maria McFarland, i tha Zërit të Amerikës të hënën se është e shqetësuar nga komentet presidentit Trump për Rusinë.

“Është një deklaratë e çuditshme në shumë fronte. Por në fund të fundit zoti Trump vazhdimisht ka minimizuar historinë e tmerrshme të shkeljeve të të drejtave të njeriut nga qeveria ruse. Ne jemi duke parë në vitet e fundit një goditje reale ndaj lirisë së shprehjes, kritikëve dhe grupeve të shoqërisë civile në Rusi. Në të njëjtën kohë, ne kemi parë një Rusi e cila është përfshirë në krime të luftës në Siri.”

McFarland shtoi se “këto janë mizori të tmerrshme. Shtetet e Bashkuara duhet të flasin kundër tyre, dhe presidenti Trump nuk duhet të bëjë shaka rreth këtyre veprimeve ose t’i minimizojë ato. Në të njëjtën kohë, është shqetësuese që Trump në disa raste ka shprehur admirim për Putinin, dhe ai vetë është i angazhuar në sulmet ndaj mediave dhe ka bërë disa deklarata shumë agresive edhe për gjykatat në Shtetet e Bashkuara, që kanë ngritur dyshime në lidhje me angazhimin e tij ndaj proceseve demokratike dhe llogaridhënies”.

Gjatë një interviste për programin “Face the Nation” të kanalit televiziv CBS News, Nënpresidenti Mike Pence hodhi poshtë idenë se Trump po krahasonte Shtetet e Bashkuara me Rusinë.

“Unë thjesht nuk e pranojë idenë se ka pasur një ekuivalencë morale në komentet e presidentit.”

I pyetur në emisionin “State of the Union” të kanalit CNN në lidhje me komentet e presidentit Trump, udhëheqësi i shumicës republikane në Senat, Mitch McConnell tha se ai nuk donte të analizonte “çdo shprehje” të presidentit Trump. Por ai vuri në dukje se Putini është një ish-agjent i KGB-së, dhe e quajti atë një “bandit”.

Senatori McConnell tha se: “Ne në asnjë mënyrë nuk veprojmë siç bëjnë rusët.”

Ligjvënës të tjerë republikanë dhe demokratë kanë kritikuar ashpër presidentin Trump për komentet e tij në të cilat ai sugjeronte se Shtetet e Bashkuara kanë gjithashtu “vrasës”.

Senatorja republikane Susan Collins i tha Zërit të Amerikës se “thjesht nuk ka ekuivalencë morale. Dhe sugjerimi se një gjë e tillë ekziston, është një keqtrajtim i historisë së vendit tonë dhe mënyrës se si ne veprojmë.”

Senatori demokrat Bob Casey i tha Zërit të Amerikës se “kjo ishte një deklaratë skandaloze e presidentit. Unë kam qenë shumë kritik dhe do të vazhdoj të jem kritik ndaj tij. Shpresoj se presidenti do t’i rishikojë komentet e tij.”

Senatorja demokrate Dianne Feinstein ndau të njëjtin mendim në komentet që bëri për Zërin e Amerikës, duke thënë se: “Shtetet e Bashkuara të Amerikës janë një vend shumë më i ndryshëm se sa Rusia. Ne nuk jemi vend i autokratëve. Ne nuk jemi vend i një despoti. Ne jemi një demokraci e lirë, shumë e ndryshme nga Rusia.”

Gjenerali në pension, Barry McCaffrey reagoi ndaj komenteve të presidentit Trump në kanalin MSNBC.

“Mund të thuhet se kjo është deklarata më anti-amerikane e bërë ndonjëherë nga një president i Shteteve të Bashkuara – ngatërrimi i vlerave amerikane me Putinin, i cili po drejton një oligarki kriminale.”

Disa ekspertë amerikanë dhe rusë theksojnë se nën sundimin e Putinit, disa udhëheqës të opozitës dhe gazetarë që kanë kritikuar autoritetet janë vrarë, përfshirë edhe kreun e opozitës, Boris Nemtsov. Udhëheqësi opozitar rus, Vladimir Kara-Murza është shtruar në spital që nga java e kaluar, dhe të hënën mjekët konstatuan se ai ishte helmuar. Ai i mbijetoi një helmimi tjetër dy vjet më parë.

Michael McFaul ka qenë ambasadori i Shteteve të Bashkuara në Rusi nga viti 2012 deri në vitin 2014. Në një artikull për gazetën Washington Post ai shkruan se nuk e di pse presidenti Trump vazhdon të mbrojë Putinin, duke thënë se një interpretim i mundshëm është se ai thjesht dëshiron të kultivojë marrëdhënie më të mira me Moskën.

McFaul thotë se një interpretim më shqetësues do të ishte nëse Trump në fakt admiron politikat dhe idetë e Putinit në trajtimin e disidentëve dhe shtypit. Gjatë fushatës zgjedhore, Trump ka shprehur admirim për Putinin, duke thënë se të paktën ai është një udhëheqës i fortë, jo si presidenti i atëhershëm amerikan, Barack Obama. Ambasador McFaul thotë se institucionet demokratike të Shteteve të Bashkuara janë shumë më të fuqishme se sa institucione të ngjashme në Rusi, por ai u bëri thirrje amerikanëve që të mos jenë indiferent dhe t’i bëjnë rezistencë çdo hapi të vogël drejt autokracisë. (voa)

Shërbimet sekrete gjermane nuk kanë gjetur ndonjë dëshmi për përpjekjet e Rusisë për të influencuar opinionin gjerman, shkruan gazeta Süddeutsche Zeitung. Raporti nuk është prezantuar publikisht.

Në janar të vitit të kaluar, 13-vjeçarja Lisa F. u zhduk në Berlin, por u gjet papritur një ditë më pas. Gjermania e re me origjinë ruse më pas i tregoi policisë një rrëfim – që më vonë u konstatua si i rremë – për rrëmbimin e saj nga tre meshkuj që “në pamje dukeshin si jugorë”, që nënkptonte origjinën e tyre nga vendet arabe. Policia verifikoi të dhënat nga telefoni i saj dhe konstatoi, se rrëfimi ishte i rremë dhe se Lisa F. e kish kaluar me dëshirën e vet natën tek një 19-vjeçar.

Ivan Blagoj, gazetar i televizionit rus shtetëror “Prvi kanal”, ishte i pari që e bëri publik versionin e vajzës dhe gjoja dhunimin e saj nga arabët. Pasuan demonstratat e rreth 700 gjermanëve me origjinë ruse para selisë së kancelares në Berlin. Më pas ministri i Jashtëm rus, Sergej Lavrov i përsëriti akuzat e dëgjuara në këtë rrëfim dhe akuzoi institucionet gjermane për fshehjen e këtij rasti.

„Kursi i konfrontimit”

Rasti i Lisa F. është vetëm një nga shembujt e shumtë të informacioneve të shtrembëruara, ndaj disa politikanë gjermanë kanë filluar të flasin për përzierjen e Kremlinit në politikën e brendshme gjermane dhe për krijimin e një atmosfere kundër autoriteteve gjermane, në veçanti kundër kancelares Angela Merkel, duke e quajtur politikën e saj ndaj refugjatëve si totalisht të dështuar. Këto deklarata janë bazuar edhe tek pohimet amerikane për përzierjen e Rusisë në fushatën elektorale dhe ndihmën e fitores së Trumpit në zgjedhje. Në Gjermani është shfaqur frika, se Rusia po përhap qëllimisht informacione të rreme dhe me sulme të hakerëve ndaj organizatave politike dhe partive duke u përpjekur të influencojë zhvillimet në këtë vend. Kjo fiton peshë veçanërisht kur dihet se në shtator në Gjermani do të zhvillohen zgjedhjet parlamentare.

Por për këtë nuk ekziston asnjë dëshmi konkrete, konstatojnë gazetarët e mediave Süddeutsche Zeitung, WDR dhe NDR. Në tavolinën e ministrit pranë kabinetit të kancelares, Peter Altmeier, që nga vjeshta e kaluar ekziston një raport 50 faqesh, ku thuhet se nuk ka të dhëna konkrete për përzierjen e Kremlinit në këto punë. Raporti nuk është prezantuar publikisht.

„Shtrohet pyetja: a kanë lidhje autoritetet ruse me këto ngjarje? Apo autoritetet gjermane nuk kanë mundur t’i dëshmojnë manipulimet sistematike ruse?”, shkruan gazeta.

Në analizat e shërbimeve sekrete gjermane thuhet se Kremlini prej vitit 2014 është në “kursin e konfrontimeve” me Perëndimin. Por aktivitetet ruse i kanë organizuar personat jashtë shërbimeve dhe jo shërbimet sekrete ruse. Por të gjithë ata së bashku ende nuk luajnë ndonjë rol të rëndësishëm në cënimin e interesave gjermane. Puna në zbardhjen e deklarimeve të tilla do të vazhdojë.

Dëshmia e vetme – influenca përmes mediave shtetërore

Ngjashëm është edhe me raste të tjera. Për shembull, në shkurt të vitit të kaluar, shumë gjermanë me origjinë ruse kanë marrë këtë mesazh përmes WhatsApp: „Myslimanët janë duke u përgatitur që me 14 shkurt të bëjnë një xhihad seksi”. Janë planifikuar gjoja dhunime masive nëpër Gjermani. Mendohet se qëllimi i këtij aksioni ishte rezistenca masive ndaj refugjatëve, por shërbimet mendojnë se një aksion i tillë është tepër banal për të fajësuar Kremlinin. Shërbimet gjermane nuk kanë ende të dhëna as për financimin e populistëve të partisë radikale të djathtë Alternativa për Gjermaninë (AfD) nga Rusia. Nuk janë konfirmuar as pohimet për sulmet e hakerëve ndaj organizatave gjermane, ndër to edhe ndaj Bundestagut.

Ajo që deri tani është dëshmuar është se mediat shtetërore ruse, si RT dhe Sputnjik, të cilat raportojnë edhe në gjermanisht, raportojnë në frymën e së keqes. Gazeta Süddeutsche Zeitung shkruan se niveli i tyre profesional, thënë me eufemizëm, është “kontestues”. (dw)

Me më shumë se një milion studentë të huaj që ndjekin studimet në universitetet amerikane, një nga sfidat me të cilat përballen ata është marrja e miratimit për një kartë krediti. Bankat zakonisht i miratojnë kërkesat për karta krediti bazuar në historinë e kredisë së një personi – diçka që mund të jetë e vështirë për një student të huaj. Por tani ka huadhënës që vlerësojnë studentët e huaj duke përdorur matës të tjerë për të pëcaktuar aftësinë paguese të tyre.

Pasi u largua nga Pekini për të studiuar në Shtetet e Bashkuara, Jack Guo mësoi sit ë përshtat në një mjedis anglisht-folës, sit ë orientohet në qytet, dhe një mënyrë të re për të menaxhuar paratë. Kjo do të thotë sigurimi i një karte krediti.

“Shumë nga miqtë e mi kanë karta tashmë pasi janë shumë të nevojshme në jetën e përditshme në Los Anxheles. Gjithashtu në se kërkon të qëndrosh këtu më pas për një punë, një praktikë, për karrierë, sigurisht do të shqyrtosh mundësinë e blerjes së një shtëpie për të jetuar këtu dhe historia e kredisë është e rëndësishme për të siguruar një hua.”

Ndryshe nga shumë shoqëri që përdorin pare-kesh, në Shtetet e Bashkuara përdoren gjerësisht kartat e kreditit, veçanërisht me përhapjen e blerjeve online kur përdoruesit me një kartë krediti dhe një telefon mund të blejnë gjithshka.

Po marrja e një karte kredie si student i huaj nuk është e lehtë. Huadhënësit tradicionalë amerikanë kërkojnë numrin e sigurimit social për aplikantët dhe shohin historinë e tyre të kreditit… elementë që shumë nga studentët ndërkombëtarë nuk i kanë.

“Sistemi tradicional u hartua në shekullin e 20 para internetit, para telefonave inteligjentë, para medias sociale, kështu që është i vjetëruar. Ne po hartojmë një sistem të ri.”

Kalpesh Kapadia, ish student nga India, është bashkë-themelues i SelfScore, një kompani që jep karta krediti për studentët e huaj.

“Atyre u është dashur të provojnë se arrijnë ta përballojnë koston e studimeve, por kur vijnë këtu, sistemi tradicional i kredisë i trajton sikur të mos kenë ekzistuar kurrë”.

Me seli në Silicon Valley, SelfScore sheh të dhëna të tjera për të përcaktuar besueshmërinë e një personi për të paguar kredinë.

“Të gjithë kanë telefona inteligjentë. Të gjithë janë të pranishëm në median sociale. Ne i shohim këta njerëz përmes shumë filtrave të shoqërisë.”

SelfScore sheh dokumentat e paraqitura nga aplikanti, përfshi pranimin në shkollë, pasaportën, vizën dhe mundësinë për të paguar. Zoti Kapadia thotë se më pak se 1 për qind e 10,000 përdoruesve të kartës së kredisë SelfScore janë me vonesë në pagesa.
“Kjo është një popullatë shumë e motivuar. Dikush që vjen këtu nga një vend tjetëri largët për të përmirësuar jetën përmes edukimit, do të sillet shumë ndryshe.”

15 deri 20 për qind që nuk paguajnë balancën totale mujore kanë një kamatë të lartë – rreth 19 për qind. Pagesat në kohë mund t’i ndihmojnë ata të marrin hua për blerje më të mëdha në të ardhmen në Shtetet e Bashkuara, si për një makinë apo shtëpi.
“Një nga përfitimet, shpresoj është të ndërtosh një histori kredie, që është e rëndësishme për të marr një hua nga banka.”

Deri tani, studentët nga më shumë se 66 vende që ndjekin studimet në 400 kolegje në Shtetet e Bashkuara kanë një kartë krediti nga SelfScore. (voa)