Në Shqipëri dy europarlamentarët David McAllister dhe Knut Fleckenstein, zhvilluan në mbrëmje një raund të dytë bisedimesh me drejtuesit e shumicës së majtë dhe të opozitës, në përpjekje për të ndërmjetësuar një zgjidhje të krizës politike. Takimet u zhvilluan këtë herë në të njejtin mjedis, në Pallatin e Kongreseve por, ku përfaqësuesit e palëve, kryeministri Edi Rama dhe kryetari i parlamentit Ilir Meta nga njëra anë dhe kreu demokrat Lulzim Basha nga ana tjetër, qëndruan në dhoma të ndara.

Vazhdimi i bisedimeve pas takimeve të para që dy eurodeputetët patën pasdite, u duk si një sinjal shprese se mund të ketë hapësira zgjidhjeje. Por zoti Basha doli pas 35 minutash. Ai deklaroi se “nuk kanë nisur negociatat. Jemi në proces të takimeve dhe bisedimeve me ndërmjetësit europianë”, deklaroi ai pa dhënë shpjegime të tjera. Ndërkohë zoti Rama dhe Meta, dolën pak më vonë, duke evituar çdo lloj komenti. Deri më tani nuk ka ndonjë të dhënë se cilat janë pikat mbi të cilat është diskutuar, dhe as se si do të ecet më tej. Edhe zoti McAllister dhe Fleckenstein, nuk pranuan të jepnin asnjë shpjegim, dhe as të shpreheshin nëse përpjekja e tyre kishte patur ose jo sukses. Zoti McAllister u mjaftua të thotë se gjatë mbrëmjes do të lëshohet një deklaratë, ndërkohë që mbetet e paqartë nëse përpjekjet e tyre do të vijojnë.

Pasdite dy eurodeputetët qëndruan afër 60 minuta me kryeministrin dhe kryetarin e parlamentit, për t’u ndalur më gjatë, afër 90 minuta me kreun e opozitës, i cili gjatë paradites, para takimeve, kishte theksuar dhe një herë se “rrugë tjetër veç zgjedhjeve të lira e të ndershme me një qeveri teknike e cila paraprakisht do të largojë kriminelët nga institucionet, e do luftojë me të vërtetë drogën dhe paratë e drogës, e cila do të zbatojë reformën zgjedhore e do të krijojë kushtet për zgjedhje të lira e të ndershme duke përfshirë votimin biometrik dhe elektronik dhe numërimin elektronik, rrugë tjetër nuk ka”. (voa)

Në Shqipëri nisën sot pasdite bisedimet për zgjidhjen e krizës politike që prej më shumë se dy muajsh sheh në protestë opozitën e vendit, duke kërkuar krijimin e një qeverie teknike e cila të garantojë sipas saj, zgjedhje të lira e të ndershme. Bisedimet po ndërmjetësohen nga një mision i Parlamentit Europian i përbërë nga David McAllister, kryetar i Komisionit për Politikën e Jashtme të Parlamentit europian, dhe nga relatori për Shqipërinë Knut Fleckenstein. Ndërhyrja nga jashtë u kërkua nga drejtuesit e shumicës së majtë në pushtet të cilët i bënë ftesë Partisë Popullore Europiane, (PPE) grupimi i qendrës së djathtë europiane, ku bën pjesë dhe Partia Demokratike. Eurodeputeti McAllister, është zëvendëspresident i PPE.

Burime diplomatike saktësuan se palëve në Shqipëri u është paraqitur që prej ditës së djeshme një dokument me disa pika që do të përbëjë dhe bazën e bisedimeve. Eurodeputetët kanë nisur takimin me kryeministrin Edi Rama dhe kryetarin e parlamentit Ilir Meta, për të vazhduar më pas me kryetarin e opozitës Lulzim Basha. Misioni i tyre, i cili me gjasa do të jetë përpjekja e fundit për të gjetur një zgjidhje, duket tejet i vështirë, duke parë dallimet e thella në qëndrime mes palëve. Edhe sot zoti Basha gjatë fjalës së tij të përditshme në çadrën e ngritur përpara kryeministrisë, theksoi se “rrugë tjetër veç zgjedhjeve të lira e të ndershme me një qeveri teknike e cila paraprakisht do të largojë kriminelët nga institucionet, e do luftojë me të vërtetë drogën dhe paratë e drogës, e cila do të zbatojë reformën zgjedhore e do të krijojë kushtet për zgjedhje të lira e të ndershme duke përfshirë votimin biometrik dhe elektronik dhe numërimin elektronik, rrugë tjetër nuk ka”, deklaroi zoti Basha.

Gjatë paradites, në pritje të mbërritjes në Tiranë të misionit të eurodeputetëve, ambasadorët e Shteteve të Bashkuara Donald Lu, të Delegacionit të Bashkimit europian, Romana Vlahutin dhe të OSBE-së, Bernd Borchardt, patën një takim me kryetarin e parlamentit Iir Meta. Pas tyre, në zyrën e këtij të fundit shkoi dhe kryeministri Edi Rama. (voa)

Daniel Serwer, profesor në Universitetin Johns Hopkins, Baltimore, analizon deklaratat e Kryeministrit shqiptar Edi Rama dhe Presidentit të Kosovës, Hashim Thaçi, mbi mundësin e bashkimit të Kosovës me Shqipërinë, nëse BE-ja mbyll derën e integrimit për Kosovën dhe tërë Ballkanin Perëndimor.

Sipas Serwer-it, ka dy mënyra për të kuptuar se çfarë tha Rama.

Njëra është se kjo është një deklaratë analitike se mungesa e perspektivës evropiane mund të forcojë dëshirën e shqiptarëve për të formuar një hapësirë të unifikuar në Ballkan, dhe unë mendoj se kjo është reale.
Është fakt se perspektiva evropiane parandalon të gjitha vendet e Ballkanit për të bërë atë që kanë bërë në vitet e nëntëdhjeta dhe kjo është përpjekja për të bashkuar grupet etnike, edhe me koston e vrasjeve masive dhe gjenocidit ndaj grupeve të tjera etnike.
Unë mendoj se këtu kemi të bëjmë me një deklaratë analitike, siç e kuptoj në përgjithësi. Unë nuk e kuptojë këtë si diçka që ai (Rama) dëshiron për ta arritur. Përkundrazi, mendoj se është plotësisht e qartë se ai nuk dëshiron që kjo të ndodhë dhe unë nuk njoh dikë në Prishtinë dhe Tiranë, i cili dëshiron të jetë një politikan në një “Shqipëri të Madhe”, shkruan newsweek, raporton Zeri.info
Nuk do të kishte vend për të gjithë këta politikanë në “Shqipëri të Madhe”, prandaj asnjëri prej tyre realisht nuk dëshiron që bashkimi të ndodhë.

Unë mendoj se në fakt çdo përpjekje për të ndryshuar kufijtë në këtë moment në Ballkan do të çonte në një riorganizim të përgjithshëm i cili nuk mund të bëhet në mënyrë të qetë dhe do të çonte në një dozë të madhe të dhunës, ku të gjithë do të pendoheshin.
Unë mendoj se ka shumë frustrime, jo vetëm në Shqipëri dhe Kosovë, por edhe në Bosnjë e Hercegovinë dhe në Serbi, për shkak se procesi i zgjerimit evropian po ecën ngadalë. Por është fakt se vendet e Ballkanit nuk kanë bërë sa duhet sa i përket reformave politike dhe ekonomike, aq sa Brukseli dhe Uashingtoni do të dëshironin.

Mua më duket se këtu ka vend për një lloj të marrëveshjes dhe kjo duhet të jetë, “le ta bëjmë këtë proces të anëtarësimit real dhe të bëjmë reforma realiste ekonomike dhe politike”. Kjo është, sipas mendimit tim, një marrëveshje shumë e mirë, por ajo është shumë e vështirë të arrihet në rrethanat aktuale për shkak të rrethanave të vështira në kuadër të Bashkimit Evropian, sepse kemi Brexit-in dhe zgjedhjet në Francë që mund të sjellin në pushtet ata që kundërshtojnë Bashkimin Evropian.
Bashkimi Evropian është në telashe të mëdha, në qoftë se mund të shprehem kështu, që të mund të përmbush aspiratat e njerëzve në Ballkan.

Njerëzit në Ballkan, udhëheqja politike në Ballkan, nuk ndjenë se nga Brukseli po merr atë që pret për të vazhduar me reformat shumë të rënda politike dhe ekonomike. Ne jemi në një moment shumë të vështirë, por kjo në fund do të tejkalohet.
Ekonomia evropiane ka filluar të rimëkëmbet dhe me kalimin e kohës ne do të shohim një ndryshim të madh të qëndrimit, në varësi të asaj se çfarë do të ndodhë me zgjedhjet në Francë dhe në Gjermani.
Por unë shpresoj në ruajtjen e perspektivës evropiane dhe ruajtjen e vullnetit të liderëve politik në Ballkan për të zbatuar reformat politike dhe ekonomike.

Këto kërcënime natyrisht mund të rrëshqasin nga duart dhe mund të çojnë në zhvillimet fatkeqe politike.
Unë mendoj se të gjithë në Ballkan janë shumë të vetëdijshëm se retorika nacionaliste në të kaluarën solli vetëm tragjedi. Nëse njerëzit e mbajnë këtë në mend, atëherë do të vetëpërmbahen.
Por fakt i thjeshtë është se në qoftë se një perspektivë evropiane nuk është në dispozicion, disa gjëra të këqija do të mund të ndodhin në Ballkan dhe duhet vepruar mbi këtë bazë./Zëri

Ministri i Brendshëm Fatmir Xhafaj, reagoi sot në mbrëmje lidhur me deklaratat e disa ditëve më parë të Prokurorit të Përgjithshëm Adriatik Llalla, për mospraninë e prokurorëve gjatë sekuestrimit dhe asgjësimit të lëndëve narkotike. Gjatë një takimi me drejtuesë të prokurorisë në prani dhe të ministrit të Drejtësisë Petrit Vasili, zoti Llalla ngriti shqetësimin “për mospërfshirje totale të Prokurorëve në mënyrën sesi administrohen, sekuestrohen dhe asgjësohen lëndët narkotike. Në të gjitha rastet, lënda narkotike, ashtu si çdo provë tjetër do të asgjësohet në prani të prokurorit”, deklaroi kryeprokurori.

Por ministri i Brendshëm, në një letër dërguar zotit Llalla shprehet i habitur nga deklaratat e tij. “Ky fakt nëse mbetet i provueshëm dhe i vërtetë, së pari më bën përshtypje se përse nuk u diskutua në takimin tonë të përbashkët e nuk gjen asnjë gjurmë të ndonjë komunikimi zyrtar të mëparshëm mes dy Institucioneve”, shkruan zoti Xhafaj, duke shtuar se dhe në dy raportet e Prokurorisë të paraqitura në parlament në vitin 2016 dhe në fillim të këtij viti, “në të gjitha faqet e atyre raporteve, që shpjegojnë shumë detaje, nuk gjendet asnjë rresht i vetëm lidhur me këtë akuzë të artikuluar publikisht nga Ju disa ditë pasi keni paraqitur raportin tuaj në Parlament”.

Duke njohur rolin e Prokurorit dhe domodoshmërinë e pranisë së tij gjatë administrimit të provave, ministri i Brendshëm nënvizon se “shkeljet e pretenduara prej Jush publikisht, për më tepër si tërësi praktike, kalojnë cakun e përgjegjësisë administrative” dhe për këtë arsye zoti Xhafaj thekson se “mirëpres nga ana juaj të evidentoni shkeljet konkrete dhe personat përgjegjës në rradhët e Policisë së Shtetit. Duke njohur përgjegjësitë për institucionin që unë drejtoj jam i gatshëm të ndëshkoj cdo shkelje të ligjit në rradhët e tij. Jam i sigurt, referuar shqetësimit publik që Ju ngritët, se të njëjtën gjë do të bëni edhe Ju edhe për drejtuesit e prokurorive përkatëse që kanë lejuar situata të tilla paligjshmërie. Duke Ju siguruar për veprimin tim të menjëhershëm deri në kufijtë që më lejon ligji, në ndëshkim të çdo rasti në mënyrë të shëmbullt, pres prej Jush krahas informacionit zyrtar që dispononi, edhe përmbushjen e detyrës Suaj proceduese penale, ndaj secilit individ që i provohet shkelja”, nënvizon ministri I Brendshëm duke shprehur besimin se “prokurorët e ndershëm në rradhët e prokurorisë, në reflektim edhe të frymës së ndryshimeve të reja kushtetuese do të jenë të pandikuar nga emocionet dhe interesat e politikës së ditës”. (voa)