Arkivi mujor: Maj 2019

Maqedonia

Shkup, kryeministri Zaev ndryshon 1/3 e qeverisë

Komento

zaevKryeministri i Maqedonisë së Veriut, Zoran Zaev, ka paralajmëruar ndërrimin e më shumë se një të tretën e ministrave të kabinetit qeveritar, që do të nënkuptonte nevojën për votimin e gjithë Qeverisë në Kuvend.

Njoftimi erdhi pas mbledhjes së Këshillit Qendror të partisë së tij Social-Demokrate, në të cilën u shkarkuan nga detyra të gjithë gjashtë nënkryetarët e partisë dhe organet tjera partiake.

“Unë jam afër ndërrimit të një të tretës së ministrave, që nënkupton se do të kemi votim për gjithë Qeverinë. Do të ketë ndryshime edhe në pozicionet tjera në Qeveri. Gjithkund ku është regjistruar arrogancë dhe mungesë të rezultateve do të ketë ndryshime. Do të përcjellë punën e çdo zyrtari, do të kritikoj dhe kërkoj dorëheqjen e secilit që nuk punon”, tha Zaev.

Zoran Zaev ndryshime pret edhe tek fushat që drejtohen nga Bashkimi Demokratik për Integrim. Siç bëhet e ditur, Zaev i ka dorëzuar kreut të BDI-së, Ali Ahmetit, një listë me emrat e zyrtarëve të kësaj partie që duhet ndryshuar për shkak të rezultateve të dobëta.

Ndryshimet në Qeveri dhe parti, Zaev i paralajmëroi që pas zgjedhjeve presidenciale, i pakënaqur nga rezultati, veçanërisht në raundin e parë, kur partia e tij LSDM, në koalicion me 31 parti, arriti fitoren me vetëm rreth 5 mijë vota diferencë kundrejt VMRO-DPMNE që në zgjedhje mori pjesë e vetme. Bazuar në deklaratat e Zaev, ndryshimet në Qeveri pritet të ndodhin në fillim të muajit qershor.

Top Channel

Kosova

Rezultatet e zgjedhjeve evropiane – sfiduese për Kosovën

Komento

PrishtinaPërfundimi i zgjedhjeve për Parlamentin Evropian dhe rezultatet e tyre lanë të hapura debatet se si mund të pasqyrohen ato në aspiratat integruese të vendeve të Ballkanit Perëndimor, përfshirë edhe Kosovën.

Njohës të çështjeve të integrimeve evropiane në Kosovë thonë se me gjithë rezultatet pozitive të partive që mbështesin Bashkimin Evropian si tërësi, çështja e integrimeve për vendet e Ballkanit Perëndimor, do të jetë sfiduese.

Taulant Kryeziu nga Instituti i politikave evropiane të Kosovës, EPIK, tha për Zërin e Amerikës se shqetësuese për Kosovën mbetet rezultati i zgjedhjeve në Francë, ku partia e ekstremit të djathtë doli fituese.

Mendoj që humbja e presidentit Macron në Francë duhet të na shqetësoj pak, duke e ditur që Marine Le Pen e cila është një kundërshtare e fortë e politikave të migrimit dhe tërë projektit të Bashkimit Evropian prandaj ky është një mesazh që duhet të na shqetësoj duke e ditur që Franca i duhet Kosovës shumë në procesin e vendimmarrjes sa i përket vizave”,tha zoti Kryeziu.

Artan Murati nga Instituti Demokratik i Kosovës thotë se pozitive për rajonin e Ballkanit mbetet largimi i rrezikut nga subjektet e ekstremit të djathtë.

“Tani më e pakta që mund të pritet është që do të vazhdojë një politikë e njëjtë siç ka qenë deri më tani për shtetet e Ballkanit Perëndimor dhe rrejdhimisht edhe për Kosovën, jo që ka qenë një politikë shumë mirë e definuar sepse shpeshherë ka qenë konfuze dhe kanë qenë shtetet e BE-së që janë munduar të shtyjnë agjendat e veta përpara mirëpo tash ka shpresë që me marrjen e mandateve nga liberalët dhe të gjelbrit do të përmirësohet qasja e BE-së ndaj Ballkanit dhe Kosovës në përgjithësi”, tha ai.

Mandati i ardhshëm i institucioneve të Bashkimit Evropian do të zgjasë pesë vjet, një periudhë kjo gjatë së cilës vendet e rajonit do të duhej të përmbushnin reformat e kërkuara për integrim. Por, sa do të mund të përparojë Kosova në rrugën evropiane?

“Në mandatin pesë vjeçar maksimumi që mund të pritet le ta themi është që Kosova në qoftë se rritet niveli i zbatimit të reformave evropiane, ta fitoj statusin e kandidatit dhe ta marr lëvizjen e lirë në zonën Shengen, po flas në këtë mandat. Po ashtu edhe për vendet tjera, maksimumi që mund të arrihet në qoftë se Serbia arrin një marrëveshje me Kosovën mund të shtyj tutje procesin negociator mirëpo unë e shoh shumë të vështirë edhe në mandatin e ardhshëm pesë vjeçar që të keni një nga vendet e Ballkanit Perëndimor si pjesë e Bashkimit Evropian”, tha Taulant Kryeziu nga instituti EPIK.

“Kjo është një fije shprese për Kosovën dhe ne do të duhej ta shfrytëzonim këtë moment që të shtyhen përpara më seriozisht edhe agjendën sepse siç e dimë edhe ne nuk jemi duke i kryer si duhet detyrat e shtëpisë ku plani kombëtar për zbatimin e MSA-së edhe përmbushja e reformave nuk është në nivelin e duhur”, tha Artan Murati nga Instituti Demokratik i Kosovës.

Njohësit e integrimeve thonë se Kosova ndodhet në një gjendje shumë të pafavorshme kundrejt integrimeve për shkak të mungesës së zhvillimit të brendshëm që ka të bëjë me reformat dhe nga mosnjohja e saj nga pesë vende të Bashkimit Evropian. Ata thonë se megjithatë, Kosova nuk ka alternativë tjetër përveç që të përmbushë detyrimet që dalin nga integrimet evropiane pavarësisht brishtësisë së Bashkimit Evropian.

Kosova deri më tani ka përfituar marrëveshjen e stabilizim asocimit me Bashkimin Evropian, por mbetet e fundit në proceset integruese në rajon. Ajo mbetet edhe vendi i vetëm që qytetarët e saj nuk mund të udhëtojnë pa viza drejt Bashkimit Evropian.

voa

Bota

Zgjedhje të parakohshme parlamentare në Greqi

Komento

SyrizaPas humbjes në zgjedhjet për Parlamentin e BE të dielën, kryeministri i majtë Aleksis Cipras deklaroi zgjedhje të parakohshme në Greqi. Zgjedhjet mund të zhvillohen më 30 qershor.

Një humbje shok për SYRIZA: Në zgjedhjet për Parlamentin e BE partia e majtë e Aleksis Cipras merr vetëm 23,8 përqind të votave. Kësisoj kjo parti renditet më shumë se nëntë pikë pas konservatorëve të Nea Dimokratia (ND), që fituan papritur qartazi me 33,2 përqind. Ishte një avantazh i dukshëm në këto zgjedhje të BE-së në Greqi që pas antarësimit të vendit në BE në vitin  1981. E sikur kjo të mos mjaftonte edhe në zgjedhjet lokale po të dielën (26.05) partia e majtë përjetoi një rënie të fortë. Në Athinë kandidati i SYRIZA-s Athanassios Iliopoulos mundi të shpëtojë me një rezultat që do ta nxjerrë atë tani në balotazh të dielën e ardhëshme. Në qytetin e dytë të madh të Greqisë, në Selanik Katerina Notopoulou, një e bashkëpuëntore e besuar e Ciprasit, dështoi që në raundin e parë.

Pas gjithë këtyre dështimeve kryeministri i majtë shpalli në mbrëmje zgjedhjet e parakohshme. Sipas mediave ministri i Financave Eucleid Tsakalotos dhe të tjerë kolegë të kabinetit qeverisës janë shprehur kundër zgjedhjeve të parakohshme nisur nga fakti që në vjeshtë gjithësesi do të jenë zgjedhjet e rregullta. Por Cipras nuk e ndryshoi mendjen.

Pavarësisht humbjeve në zgjedhje politikanët e partisë së majtë shprehen optimistsë për të ardhmen. „SYRIZA mbetet një ndër partitë më të forta progresive në Europë dhe do të vazhdojë të bashkëvendosë fatet e vendit edhe në të ardhmen”, deklaroi eurodeputeti Dimitris Papadimoulis në televizionin Open. Sipas llogarisë së tij majtas qendrës nuk mund të ketë hapësirë veprimi pa partinë e tij. Edhe në Bruksel Papadimoulis preferon idenë e një “mazhorance të gjerë progresive” për Europën.

Pas zgjedhjeve për Parlamentin e BE peizazhi partiak edhe në Greqi mbetet i copëzuar. Politologu Levteris Koussoulis vëren, se: „Eshtë pozitiv fuqizimi i forcave qytetare pro-europiane. Radikalët ende janë të pranishëm, por tashmë janë më të përçarë se kurrë më parë”. Partia socialdemokrate KINAL për herë të parë del në vendin e tretë, por ka dalë nga Parlamenti i  BE partia social-liberale To Potami. Ekstremi i djathtë Agimi i Kuq renditet si forca e pestë dhe do të vazhdojë të ketë në Bruksel dy deputetë. Shumë kandidatë të tjerë nga parti të ndryshme të vogla kanë dështuar në pragun e 3%.

Ka vetëm një suprizë: Kyriakos Velopoulos i afërt me Putinin këtej e tutje do të kujdeset për buja në Bruksel. Deri më sot populisti i djathtë i lindur në Gjermani ka fituar para me shitjen e librave patriotikë dhe të pilulave të paidentifikuara. Madje populisti i djathtë ofron edhe “Letra nga Jezu Krishti” për shitje.

dw

Bota

Tkurren partitë e Qendrës në Parlamentin Europian

Komento

BE“Zgjedhjet vendimtare” bënë që shumë zgjedhës të shkojnë në kutitë e votimit. Partitë e mëdha janë tkurrur. Parlamenti Europian do ketë shumë ngjyra. Populistët e djathtë shtojnë vendet.

E papritura më e madhe e zgjedhjeve europiane është pjesëmarrja e lartë në votime. Rreth 51 përqind e 420 milionë votuesve në vendet e BE, hodhën votën në kutitë e votimeve. Pjesëmarrja në votime kësaj here ishte tetë përqind më e lartë se në zgjedhjet e fundit, pesë vjet më parë. Protestat kundër politikës së klimës, nxënësit në greva dhe rezistenca e partive populiste të djathta që janë kundër BE, i mobilizuan zgjedhësit, mendon eksperti për çështjet politike, Janis Emmanouilidis nga “European Policy Centre” në Bruksel.

Komisarja liberale e BE, danezja Margrethe Vestager tha në një intervistë për DW, se njerëzit e kuptuan se zgjedhjet tregojnë forcë. “Kjo forcë duhet shfrytëzuar dhe u duhet thënë njerëzve se ajo ka kuptim,” mendon Vestager, e cilë kërkon të bëhet presidente e Komisionit të BE. “Në zgjedhje kanë kandiduar parti që duan ta shkatërrojnë BE. Kanë kandiduar parti që e quajnë veten nacionaliste, por që duan ta shesin vendin e tyre tek rusët. Kjo i bëri njerëzit që të mendojnë se duhet shkuar në zgjedhje.” Kandidati kryesor i socialdemokratëve europianë Frans Timmermans, thotë i gëzuar se pjesëmarrja e lartë në zgjedhje është “një sinjal i qartë për një demokraci funksionuese”.

Fitojnë liberalët dhe të gjelbërit

Liberalët dhe të gjelbërit e Parlamentit Europian kanë marrë më shumë vota se të tjerët. Në Gjermani, Të gjelbërit arrijnë me 20 përqind të votave t’ia kalojnë edhe socialdemokratëve dhe të dalin në vend të dytë, pas Unionit konservator. Ky është rezultati më i mirë që Të gjelbërit kanë arritur ndonjëherë në zgjedhjet që zhvillohen në gjithë federatën.

Kryetari i fraksionit të socialdemokratëve në Parlamentin Europian, Udo Bullmann, i zhgënjyer shumë nga rezultati i zgjedhjeve, pranoi për DW se partia e tij e nënvleftësoi temën e politikës për klimën. Në këtë pikë duhen bërë ndryshime. Edhe kryetarja e CDU-së gjermane, Annegret Kamp-Karrenbauer pranoi në Berlin deficite të partisë së saj në temën numër një, atë të ambientit. Megjithatë ajo ishte e kënaqur që Unioni konservator, megjithë humbjet që pësoi mbeti partia më e fortë në Gjermani dhe fraksioni më i fortë në Parlamentin Europian.

Manfred Weber, kandidati kryesor i Partive Popullore Europiane, (EVP), tha në mbrëmje se pretendon të bëhet President i Komisionit të BE. “Ne nuk patëm ndonjë fitore të madhe, por ne mbetemi grupimi më i fortë,” tha politikani i CSU, në Bruksel. Ai i bëri thirrje partive të tjera pro-europiane për të bashkëpunuar dhe foli shprehimisht për të gjelbërit. “Të gjelbërit janë po ashtu fitues të ditës. Prandaj ata janë partnerë të mundshëm. Ne duam të ulemi së bashku dhe të projektojmë një mandat për pesë vitet e ardhëshme.”

Kristiandemokratët mbeten grupimi më i fortë

Në Parlamentin Europian, EVP e Weberit ka marrë paraprakisht 180 vende. Kjo shumë është 42 vende më pak se deri tani. Socialdemokratët janë reduktuar po ashtu dhe kanë marrë 147 vende. Liberalët, përfshirë edhe partinë e re të presidentit francez Macron, kanë marrë 105 mandate. Të Gjelbërit janë shtuar nga 52 në 67 vende. Populistët e djathtë janë të përfaqësuar shumë fort në disa vende si Italia dhe Franca, megjithatë kanë marrë më pak vende, se sa parashikohej në prognoza. Të gjithë bashkë ata kanë marrë 150 vende, por që janë të ndara në tre fraksione të ndryshme. Nacionalistët gjermane të AfD, nuk morrën aq shumë vota sa mendohej të merrnin, por në landin e Brandenburgut morrën shumicën e votave dhe kanë arritur t’ia kalojnë edhe Unionit.

Populistët e djathtë shtojnë votat

Eksperti i BE-së në Bruksel, Janis Emmanouilidis thotë se partitë pro-europiane kanë marrë 80 përqind të vendeve të parlamentit. “Në përgjithësi populistët e djathtë nuk janë shumë të fortë si grupim, ndryshe nga sa kishin paralajmëruar disa vetë. Ne e kemi pas ditur gjithnjë se ato nuk do të marrin shumicën, por ato janë madje edhe më të dobta se sa patëm menduar.” Në Itali, Lega e djathtë e ministrit të Brendshëm, Matteo Salvini mori shumicën e votave. Në Francë politikania e djathtë Marine Le Pen mundi partinë e presidentit francez. “Macron u mundua vërtet të vendoste në peshore peshën e tij politike, për të penguar që Marine Le Pen me partinë e saj të dalin të parët. Por ai nuk e arriti synimin,” analizon Emmanouilidis.

Në shumë nga 28 vendet e tjera anëtare mund të vërehet, se partitë që kanë qenë të mëdha deri tani, partitë e qendrës kanë marrë më pak vota. Liberalët, Të gjelbërit dhe partitë e djathta janë forcuar. Studiuesit e zgjedhjeve në Bruksel folën në natën zgjedhore për rritje të fragmentimit. “Ne vërejmë se partitë e mëdha e kanë humbur fillin dhe se duhet krijuar një koalicion i madh për të marrë shumicën,” thotë Janis Emmanouilidis nga Think Tank “European Policy Centre”. Në Parlamentin e ardhshëm Europian, konservatorët dhe socialdemokratët nuk përbëjnë më shumicën si grup informel koalicioni, siç ka qenë e zakonshme deri tani. Ata duhet të bëhen bashkë me liberalët dhe mbase edhe me fraksionin e Të gjelbërve.

Një shumicë që të jetë majtat Qendrës, e përbërë nga të majtët, socialdemokratët, të gjelbërit dhe liberalët nuk arrin të merret me llogaritje. Shumicë djathtas Qendrës po ashtu nuk vjen në pyetje, sepse kristiandemokratët nuk mund të bëhen bashkë me nacionalistët dhe populistët e djathtë. “Kështu që që tani çështja komplikohet, sepse asnjë nga grupimet nuk e merr dot shumicën pa të tjerët. Ditët e ardhshme do të jetë interesante të shihet kush flet me kë, për të vënë gjërat në lëvizje,” thotë kandidatja kryesore e liberalëve Vestager në intervistë me DW, duke patur parasysh fragmentimin e parlamentit.

dw

Bota

Ultimatum mes partnerëve të NATO-s: SHBA kërcënon Turqinë me sanksione

Komento

raketa S400SHBA i ka dhënë ultimatum Turqisë, partnerit në NATO. Nëse Ankaraja blen sistemin rus të raketave S- 400, atëherë Uashingtoni do të vendosë sanksione kundër Turqisë.

Për çfarë bëhet fjalë në “grindjen për raketat”? 

Turqia kërkon të mbrojë hapësirën e vet ajrore me një sistem rus raketash. Uashingtoni kërkon që si vend partner i NATO-s, Turqia të blejë sistemin amerikan të mbrojtjes, Patriot. Qeveria amerikane i ka dhënë ultimatum qeverisë turke, bën të ditur televizioni amerikan CNBC. Ankaraja ka dy javë kohë për të hequr dorë nga blerja e raketave ajrore ruse, përndryshe do të vendosen sanksione. Uashingtoni kërcënon po ashtu që t’ i refuzojë Turqisë furnizimin e avionëve luftarakë F 35.

Si filloi grindja?

Qeveria amerikane ka muaj që është duke ushtruar presion mbi Turqinë. Presidenti amerikan Donald Trump ka kritikuar blerjen e sistemit rus S- 400 të mbrojtjes ajrore. Ministri i Jashtëm amerikan Mike Pompeo ka kërcënuar madje me sanksione. Por Ankaraja nuk ka ndryshuar mendim. Ministri turk i Mbrojtjes, Hulusi Akar njoftoi këtë javë se ushtarët turq ndodhen tashmë në Rusi për të mësuar për përdorimin e S- 400. Në qershor ose në korrik sistemi do i dorëzohet Turqisë dhe në vjeshtë do të instalohet.

Çfarë problemi ka Trump me këtë pazar?

Qëndrimi konfrontues i administratës së Trumpit ka arsye ekonomike dhe ushtarake. Ankarasë i kërkohet që të prishë pazarin, sepse Uashingtoni do që Turqia të blejë patjetër sistemin amerikan të mbrojtjes nga ajri, Patriot. Përveç kësaj, në SHBA dhe vende të tjera të NATO-s mendohet edhe për çështjet e sigurisë. Sepse teknika ushtarake ruse nuk është e përshtatshme për sistemet e NATO-s. Përveç kësaj ekziston droja se nëpërmjet radarëve të S-400, Moska mund të marrë informacione të fshehta për avionët luftarakë F-35. Në fund të fundit ushtria turke do e kombinojë sistemin rus të mbrojtjes nga ajri me avionët luftarakë amerikanë. Po ashtu është rritur shqetësimi se bashkëpunimi me Moskën mund të nxisë shkëputjen e Ankarasë nga partnerët perëndimorë, me të cilët ndodhet në Aleancë. Ekspertët vërejnë se Turqia është duke u kthyer më shumë nga shtetet lindore si Irani, Kina dhe Rusia, jo vetëm në fushën ushtarake.

Çfarë pasojash mund të ketë për Turqinë?

Sanksionet ekonomike amerikane mund ta godasin fort Turqinë. Që nga viti i kaluar Turqia ndodhet në krizë serioze ekonomike dhe monetare. Inflacioni dhe papunësia e kanë rënduar shumë popullsinë. Se si mund të ndikojnë sanksionet mbi ekonominë tashmë të lëkundur të Turqisë, u pa gushtin e kaluar kur qeveria e Trumpit rriti tarifat doganore për çelikun dhe aluminin pasi qeveria turke nuk po pranonte të lironte nga burgu pastorin amerikan, Andrew Brunson. Ekspertët e ekonomisë vlerësuan se sanksionet amerikane e ashpërsuan shumë krizën ekonomike në Turqi. Kjo ndodhi edhe sepse tensionet midis Turqisë dhe Perëndimit frikësojnë investitorët.

Sa shance ka që grindja të shuhet?

Asgjë nuk tregon se qeveria e Erdoganit ka ndër mend të tërhiqet. Sipas ministrit turk të Mbrojtjes, Hulusi Akar, bisedimet me SHBA për blerjen e sistemit amerikan Patriot vazhdojnë, madje Uashingtoni ka bërë edhe një ofertë më pak të kushtueshme. Por presidenti turk Erdogan vazhdon të thotë se është i vendosur që të bëjë blerjen nga rusët. Ditën e martë Akar tha se SHBA është duke përgatitur sanksionet. Një nga arsyet pse turqit mbajnë qëndrim të palëkundur është se me çmimin 2,5 miliardë dollarë për dy bateri, sistemi rus i mbrojtjes nga ajri është shumë më i lirë se sa ai amerikan. Megjithatë S- 400 është jashtëzakonisht modern dhe eficient, ka rreze veprimi 400 km dhe mund të qëllojë objektiva deri në 60 km lartësi.

S400S- 400, sistemi rus i mbrojtjes nga ajri

Pse nuk bien dakord partnerët e NATO-s?

Që bisedimet për sistemin e raketave janë komplikuar kaq shumë ka të bëjë edhe me faktin se marrëdhëniet amerikano- turke nuk kanë qenë asnjëherë kaq keq sa tani. Grindja për priftin amerikan Brunson është vetëm një gjë e vogël. Lufta në Siri ka vënë në provë raportet midis dy partnerëve të NATO-s. Amerikanët janë lidhur në luftën civile siriane me milicët kurdë YPG, për të luftuar kundër të ashtuquajturit Shtet Islamik. Në Ankara, YPG shihet si dega siriane e organizatës terroriste PKK, prandaj vlerësohet si e rrezikshme. Një pikë tjetër për klimën e keqe midis Ankarasë dhe Uashingtonit është politika amerikane ndaj Iranit. Qeveria amerikane sapo ashpërsoi sanksionet kundër Iranit. Që nga fillimi i muajit maj do të vendosen sanksione ndaj të gjitha vendeve që importojnë naftë nga Irani. Deri tani ka pasur përjashtime vetëm për tetë vende, mes tyre edhe Turqia.

dw

Maqedonia

Pendarovski: Musliu është profesionist, ka vlerësime pozitive nga shërbimet e partnerëve

Komento

Pendarovski“Presidenti Stevo Pendarovski e ka sjellur vendimin për emërimin e Erolld Musliut për drejtor në Agjencinë për Zbulim, pasi analizat kanë treguar se ai është profesionist, ndërsa emërimi i tij është vlerësuar pozitivisht edhe nga shërbimet partnere”.

Kështu thonë nga Kabineti i Stevo Pendarovskit, në lidhje me deklaratat e Bashkimit Demokratik për Integrim (BDI), se vendimi i presidentit i ka shqetësuar, prej të cilit kërkuan edhe që ta rishikojë, njofton Telegrafi Maqedoni.

“Presidenti Stevo Pendarovski menjëherë pas marrjes së funksionit, ka shqyrtuar disa propozime si zgjidhje të mundshme për pozitën e drejtorit të Agjencisë për Zbulim. Pas analizave nga kapacitetet profesionale, emri i Erolld Musliut u nda si zgjidhje për këtë funksion”.

“Bëhet fjalë për profesionist të lartë, i cili karrierën e tij e ka ndërtuar në vend dhe ka bashkëpunim me shërbimet e gjitha shteteve aleate. Për emërimin e Erolld Musliut në postin e drejtorit të Agjencisë për Zbulim, janë njoftuar shërbimet e partnerëve të vendeve të NATO-s”, thonë nga Kabineti i Pendarovskit.

Ndryshe, zv.kryeministri Bujar Osmani sot deklaroi se BDI kërkon që Pendarovski ta shqyrtojë vendimin e tij.

Ndërsa kryeministri Zoran Zaev tha se përzgjedhja e drejtorit të ri të Agjencisë për Zbulim është nën kompetenca të kryetarit të shtetit./Telegrafi/

Shqipëria

Ftesa e dytë e Ramës, Basha: Dialog vetëm me popullin

Komento

Rama BashaKryeministri Edi Rama ju drejtua sot me një tjetër letër kryetarit demokrat Lulzim Basha duke e ftuar sërish për të nisur pa humbur kohë një dialog pa kushte. Ndërsa një ditë më parë, ndonëse pa ju referuar, ftesës së kryeministrit, zoti Basha kishte përsëritur akuzat ndaj drejtuesit të Qeverisë dhe angazhimin se nuk do të lejohet që më 30 Qershor të zhvillohet një proces, sipas tij “fallco”, sot ai ju përgjigj drejtpërdrejt letrës së zotit Rama duke theksuar se i vetmi dialog ku ai do të marrë pjesë do të jetë dialogu me qytetarët

Në letrën e tij të dytë, drejtuar kryetarit demokrat Lulzim Basha, zoti Rama shprehet që në fillim se nuk është habitur “me refuzimin brutal të Dialogut”, duke ju referuar kështu deklaratave të zotit Basha gjatë takimit dje në mbrëmje me përkrahësit e opozitës në Durrës. “Edi Rama na propozon që me 30 qershor ne të bëjmë sehir, teksa ai bën një grusht shteti, një proces zgjedhor fallco. Na propozon një proces të dalë tërësisht jashtë rregullave të Kodit Zgjedhor, në kundërshtim flagrant me ligjin, në kundërshtim flagrant me kushtetutën dhe mbi të gjitha të kriminalizuara edhe më shumë sesa zgjedhjet e 2017-s dhe zgjedhjet e 2015-s. Na propozon, pra, kapitullimin na propozon që ne të ulim kokën e të pranojmë një tjetër proces fallc zgjedhor, kësaj radhe edhe pa garë”, u shpreh zoti Basha, ndërsa ritheksoi dhe një herë se përballë qëndrimit të kryeministrit “është alternativa e përballjes në çdo qytet, në çdo shesh, në çdo rrugë, çdo ditë, çdo javë, dhe nëse tenton më 30 qershor zgjedhje fallco, zgjedhje me krimin, zgjedhje me hajdutët, përballje në çdo qendër votimi, në çdo kuti votimi”.

Në letrën e tij sot, kryeministri Edi Rama, duke ju drejtuar zoti Basha shprehet se “për fat të mirë Ju s’jeni vetëm në këtë vend dhe as ata që do vijojnë t’Ju ndjekin në aventurën Tuaj të pashoqe, gjithnjë e më të paktë, nuk janë asfare populli i këtij vendi, i cili lirinë dhe të drejtën për të zgjedhur, nuk i ka marrë borxh nga Ju apo nga unë dhe po ashtu, nuk Ju’a ka borxh as Juve, as mua e askujt në botë, mosmbajtjen në kohë e në paqe të zgjedhjeve të radhës”.

Kryeministri thekson më tej se “fushata e zgjedhjeve nis zyrtarisht në 31 maj dhe ditët e numëruara që kanë mbetur, duhen shfrytëzuar për dialog politik, jo humbur me kërcënimet e dëshpërura dhunënxitëse që nuk Ju turpërojnë vetëm Juve, po edhe vendin tonë e të gjithëve ne bashkë me të”. Zoti Rama vijon më tej duke përsëritur ftesën për dialog që “të arsyetojmë si njerëz me përgjegjësi të mëdha dhe t’i ballafaqojmë divergjencat tona të mëdha, me forcën e arsyes, përpara se sa inercia e rrugës së gabuar që keni marrë t’Ju ketë degdisur në asfaltin e irrelevancës politike, megjithë grupimin Tuaj”. Duke vënë në dukje se ai nuk është i interesuar për fatin politik të Partisë Demokratike, zoti Rama shprehet se “ky moment me rëndësi të veçantë për Shqipërinë, më imponon t’Ju lutem të ktheni rrugë! Sepse Shqipëria s’ka kohë për të humbur për llogaritë e gabuara politike dhe aventurat antidemokratike të kujtdoqoftë”.

Kryeministri e mbyll letrën me zotimin se “sikur të tërë të dëshpëruarit nga Reforma në Drejtësi të hidhen përpjetë, nuk kanë për të ndalur dot as zbatimin e Reformës në Drejtësi, as zhvillimin e zgjedhjeve në 30 qershor”.

Në përgjigjen e tij, përmes një letre drejtuar popullit, zoti Basha nga ana e tij shkruan se “në të vërtetë demokracia e kërkon që pushteti të burojë nga populli e të dialogojë me popullin, demokracia kërkon që mosmarrëveshjet që nuk i zgjidh dot politika t’i zgjidhë populli, me votë. Por për Edi Ramën arti i qeverisjes demokratike është i huaj, ai është artist në artin e mashtrimit”, shprehet zoti Basha sipas të cilit “sikur Edi Rama të kishte qoftë edhe një fije respekt dhe vëmendje për popullin, sikur tek ai të kishte vetëm një fije vetëdije demokratike, ai do ta kishte dhënë dorëheqjen të paktën 20 herë këto gjashtë vitet e fundit”, duke renditur më pas një mori trastesh pas të cilave sipas tij, kryeministri do të duhej të ishte larguar nga detyra.

Në letrën e tij, zoti Basha vë në dukje se “vendi ynë ka shumë plagë të thella, të cilat duan ide, vullnet dhe punë të shërohen. Sot, Shqipëria ka nevojë për një ndryshim të vërtetë politik, ekonomik e shoqëror. Kjo është një sfidë e madhe që na takon të gjithëve, para së gjithash ne politikanëve. Për këto sfida ne kemi filluar një dialog kombëtar gjithëpërfshirës. Ky është i vetmi dialog që ndryshon Shqipërinë dhe i vetmi dialog ku unë do të jem pjesë”, thekson kryetari demokrat duke shtuar se “qëndrimi im i prerë dhe i palëkundur është se Edi Rama duhet të largohet menjëherë nga Kryeministër, sepse ai është shkatërrues i zgjedhjeve të lira dhe dhunues i vullnetit të popullit”, shkruan zoti Basha duke e mbyllur letrën me një ftesë drejtuar popullit “që të bashkohemi të gjithë në protestat tona për largimin e tij, dhe në dialogun kombëtar për ndryshimin e vërtetë që duhet të sjellim për garantuar të ardhmen Europiane të Shqipërisë”.

voa

Kosova

Kosovë: Veseli mohon pretendimet për përfshirje në veprime kriminale

Komento

VeseliKryetari i kuvendit të Kosovës mohoi përfshirje në akte kriminale pas publikimit të një videoje, ku shihen disa persona duke numëruar para dhe ku lakohet emri i tij. Vetëvendosja kërkon dorëheqjen e kreut të kuvendit.

Kryetari i kuvendit të Kosovës Kadri Veseli, hodhi poshtë çdo mundësi për përfshirjen e tij në ndonjë rast të krimit të organizuar dhe keqpërdorimit. Në një konferencë të jashtëzakonshme për medie, Veseli dekalroi publikisht se do të japë dorëheqje nga të gjitha pozitat nëse vërtetohet që ai të jetë i përfshirë në krim të organizuar. Këtë deklaratë, kryetari i Kuvendit e bëri pasi mediet lokale publikuan një video-regjistrim ku shihen disa persona duke numëruar para, persona këta që dyshohen të jenë pjesë e mashtrimeve dhe krimit të organizuar. Në këtë video lakohet emri i Kadri Veselit. Mediet lokale në fillim të kësaj jave e publikuan videon pas një operacioni të policisë së Kosovës ku u arrestua një grup i dyshuar për përfshirje në vepra kriminale dhe fajde. Në njoftimin zyrtar të policisë, thuhet se personat e arrestuar dyshohen të jenë të përfshirë në veprat penale “fajde, detyrim dhe mashtrim” duke përfituar kështu në mënyrë të paligjshme mbi 2 milionë euro. Pas publikimit të kësaj video dhe lakimit të emrit të tij, kryetari i kuvendit Kadri Veseli, mbajti një konferencë të jashtëzakonshme për medie, ku tha se ai “nuk ka të bëj asgjë me këtë rast dhe as me personat e përfshirë në këtë rast”.

“Dua t’iu siguroj se nëse del vetëm një indikacion i përfshirjes sime në këtë aferë unë nga sot deklaroj që do të jap dorëheqje, ky është morali im, ky është besimi im jetësor, kjo është politika ime. E them me siguri të plotë që emri im është keqpërdorur në këtë akt kriminal të mashtrimit. Kur të dal e vërteta e kësaj, atëherë dikush duhet të japë llogari penale dhe institucionale, pavarësisht a janë pjesë e policisë apo e sistemit të drejtësisë ose të politikës”, tha Kadri Veseli.

Kryetari i kuvendit Kadri Veseli që është edhe kryetar i Partisë Demokratike të Kosovës, e cila është pjesë e qeverisë, tha se ky rast kërkon sqarime që ka të bëjë edhe me funksionimin e sistemit institucional në këtë rast të zbatuesve të ligjit. Kreu i Parlamentit, Veseli tha se njerëzit që shihen në videon e publikuar dhe që njëri prej tyre e përmend emrin e tij, nuk i njeh.

“Videoja shpërfaq krimin në mënyrë të hapur, të qartë për secilin qytetar e lëre më për organet tona të drejtësisë. Këtu kemi të bëjmë me dy krime, me krimin e bërë dhe krimin e fshehur. Gjashtë vjet të mbahet krimi i fshehur dhe mos të dënohet është krimi më i madh. Pa asnjë dyshim shihet qartë se kjo është një skemë e krimit të organizuar dhe po ju siguroj që kësaj pune do t’i shkohet deri në fund”, tha Kadri Veseli, duke ngitur pyetjen se pse ky rast që nga viti 2013 është mbajtur në sirtarë ndërsa publikohet tash.

“Si është e mundur që për këtë rast të krimit të organizuar që paska pasur fakte në vitin 2013 të ndërmerren veprime me gjashtë vjet vonesë. Kush është ai, ajo ose ata që e kanë mbuluar këtë krim të organizuar më shumë se gjashtë vjet, kujt dhe për çfarë llogarie iu paska dashtë kjo vonesë që ka mundësuar edhe mbulimin dhe mos dënimin e veprave penale”, deklaroi Veseli.

I menjëhershëm ishte reagimi i partisë politike opozitare Lëvizja Vetëvendosja, e cila përmes një komunikate për medie kërkoi dorëheqjen e menjëhershme të kryetari të Kuvendit, për faktin që sipas kësaj partie “vetëm në këtë mënyrë u hapet rruga hetimeve”.

“Në videon që doli në media, në emër të Kadri Veselit kërkohej para e paligjshme, si haraç a si fajde, nga anëtarë organizatash kriminale. E reagimi i kryetarit të Kuvendit ishte, për të thënë të paktën, frikacak: ai tha se po të vërtetohet se është pjesë e këtij rasti kriminal do të japë dorëheqje. Gjithë Kosova e gjithë bota e di se po të vërtetohet që Veseli është pjesë e rastit kriminal, nuk shkon në dorëheqje por drejt e në burg. Dorëheqja është akt moral, që bëhet për t’i hapur rrugë hetimeve. Pra, kur emrin ta përmendin si kërcënim për fajde, duhet të jetë dorëheqja para hetimeve, e jo hetimet para dorëheqjes”, thuhet në reagimin e lëvizjes Vetëvendosje. Kjo parti rikujton rastin që ndodhi para disa ditësh në Austri, ku personi i përfshirë dha dorëheqje, ndërsa, njëkohësisht u shpallën zgjedhjet e reja.

“Ky është momenti që Kosova të tregojë se dëshiron të ndjekë modelin perëndimor dhe jo atë rus”, thuhet në reagimin e Vetëvendosjes.

Ballkan, Bota

Pikat e nxehta të krimit të organizuar në Ballkanin Perëndimor

Komento

harta e trafikut te drogaveHarta e trafikut të drogave (marrë nga raporti i Global Initiative Against Transnational Crime)

Një raport i ri arrin në përfundimin se trafiqet ilegale që rrjedhin përmes porteve, qyteteve dhe pikave kufitare të Ballkanit Perëndimor mundësohen nga një ekonomi politike e krimit, e cila është e rrënjosur në vendet e rajonit.

Raporti i publikuar nga Observatori i Shoqërisë Civile Kundër Krimit të Organizuar në Evropën Juglindore, pasqyron pikat e nxehta të krimit të organizuar në Ballkanin Perëndimor.

Raporti thotë se në rajon marrëdhëniet e ndërthurura mes politikës, biznesit dhe elitave kriminale e kanë shndërruar aktivitetin në një sipërmarrje të përbashkët mes strukturave shtetërore dhe grupeve kriminale. Një tjetër tipar i përbashkët i rajonit të Ballkanit Perëndimor është se shumë pak raste të krimit të organizuar dërgohen në gjykata dhe edhe kur kjo ndodh, në shumë pak raste jepen dënime.

E ashtuquajtura vijë ballkanike përshkon disa vende të Ballkanit dhe mundëson trafikun e paligjshëm drejt vendeve të Bashkimit Evropian. Shqipëria dhe Kosova radhiten ndër pikat e tranzitit të heroinës, ndërsa përsa i përket kokainës, Shqipëria së bashku me Malin e Zi janë shndërruar në pika të rëndësishme hyrëse drejt Evropës të kësaj droge të ardhur nga vende të Amerikës Latine.

Shqipëria

Ballkani vazhdon të radhitet si furnizuesi kryesor i kanabisit për Bashkimin Evropian dhe Shqipëria përmended si vendi kryesor i prodhimit, megjithë një rënie të konsiderueshme të kultivimit që nga gjysma e vitit 2017, si dhe një rritje domethënëse të konfiskimit. Rajoni vazhdon të shërbejë si një territor i përshtatshëm për kontrabandën e armëve, kontrabandën e cigareve, trafikun e qenieve njerëzve dhe tashmë vihet re edhe rritja e pranisë së drogave sintetike.

Ndër pikat kufitare dhe portet hyrëse nëpërmjet të cilave zhvillohen aktivitete të shumëllojshme kriminale radhiten Shkodra, Durrësi, Vlora dhe Saranda, ndërkohë që zonat përreth Kurbinit dhe Lezhës përshkruhen si zona të nxehta të krimit të organizuar. Aktiviteti kryesor i grupeve të përqëndruara në kryeqytetin Tiranë është në funksion të aktiviteteve në vende të tjera, si në Hollandë, Belgjikë, Spanjë, Zvicër, Gjermani, Itali, Kosovë dhe Mbretëri e Bashkuar, ndërkohë që lidhjet kriminale shtrihen në Turqi dhe Amerikën Latine. Zona të tjera të nxehta janë Elbasani dhe Fieri.

Kosova

Raporti e përshkruan Kosovën si pjesë e “trekëndëshit të krizës”, zona ndërmjet Maqedonisë së Veriut dhe Serbisë Jugore, të cilat për shkak të zhvillimit të ulët ekonomik, paqëndrueshmërisë, kufijve porozë dhe qeverisjes së dobët, janë të ekspozuara ndaj krimit të organizuar. Veriu i Kosovës përmendet në veçanti si një zonë gri dhe e përshkuar nga aktivitete të paligjshme.

Nga përfundimet e raportit

Raporti arrin në përfundimin se ka shenja që popujt e Ballkanit janë të tejngopur me ndikimin e krimit të organizuar në komunitetet dhe vendet e tyre. Protestat më të fundit në disa prej vendeve të rajonit dëshmojnë për irritimin në rritje me elitat dhe korrupsionin e tyre.

Megjithatë, raporti thotë se ekonomia politike e kriminalitetit është tashmë e rrënjosur thellë. Rrjetet kriminale janë zhvilluar prej dekadash dhe ekzistojnë faktorë të jashtëm të interesuar në mbajtjen dhe shfrytëzimin e status quo-së për mundësi përfitimesh të paligjshme. Raporti thotë se do të jetë e vështirë të ndryshohet sistemi, nëse nuk krijohen institucione më efikase dhe një sistem kontrolli dhe balancimi të pushtetit për të përmirësuar llogaridhënien, transparencën dhe integritetin.

Observatori është pjesë e Iniciativës Globale Kundër Krimit të Organizuar Ndërkombëtar. Ai financohet nga Fondi për Konfliktet, Stabilitetin dhe Sigurinë i Mbretërisë së Bashkuar dhe lidh aktorët e shoqërisë civile në Ballkan.

(Teksti i plotë i raportit: https://globalinitiative.net/wp-content/uploads/2019/05/Hotspots-Report-English-16May1245-Web.pdf )

voa

Maqedonia, Shqipëria

Kur do të çelen negociatat e Shqipërisë me BE-në?

Komento

BENë prag të publikimit të progres-raportit të BE-së po shtohen gjasat që vendimi për çeljen e negociatave me Shqipërinë dhe Maqedoninë e Veriut të shtyhet për në vjeshtë.

Në Gjermani kanë dalë në pah kohët e fundit dallimet mes Partisë Socialdemokrate dhe Unionit Kristiandemokrat e Kristiansocial. Grindja e dy partive më të mëdha në parlamentin e Gjermanisë (Bundestag) ka të bëjë me datën e votimit për çeljen e negociatave. Ndërsa socialdemokratët kërkojnë që votimi të bëhet sa më shpejt, pra, menjëherë pas publikimit të progres-raporteve të dy vendeve, Unioni Kristiandemokrat dhe Kristiansocial e ka caktuar datën e vendimit për 23 shtator.

Një datë, me të cilën, ministri i shtetit Michael Roth, që është përfaqësuesi më i flaktë i qeverisë gjermane pro çeljes së negociatave me Shqipërinë dhe Maqedoninë e Veriut, nuk është dakord. Siç e tha edhe një intervistë me Deutsche Welle-n, ai mendon se ka ardhur koha që BE-ja të mbajë premtimin e dhënë një vit më parë ndaj këtyre dy vendeve dhe të japë dritën e gjelbër për negociatat qysh në qershor.

Por edhe pse Michael Roth është përfaqësues i ekzekutivit, nuk mund të thuhet ende me siguri nëse ky është qëndrimi përfundimtar i qeverisë gjermane. Kancelarja Angela Merkel nuk e ka shprehur akoma mendimin e saj për këtë çështje. Zëdhënësi i saj, Steffen Seibert, i pyetur para do kohësh në konferencën e rregullt të shtypit, tha se “vendimi për çeljen e negociatave do të varet nga progresraporti i Komisionit”. Por sipas ligjit, qeveria gjermane duhet të marrë parasysh edhe mendimin e Bundestagut para se të formulojë qëndrimin e saj për Këshillin e BE-së në qershor të këtij viti.

Shumica e Bundestagut pro anëtarësimit të Ballkanit në BE

Që shumica e Bundestagut është pro perspektivës evropiane të Ballkanit Perëndimor në BE, kjo u vu re edhe nga një debat që u zhvillua para ca kohësh (9 maj) në plenum, kur Bundestagut iu desh të merrej me një kërkesë të partisë populiste djathtiste Alternativë për Gjermaninë (AfD). Partia në fjalë kërkonte që Ballkanit Perëndimor të mos i ofrohej anëtarësim, por vetëm “partneritet i privilegjuar”.

Siegbert Droese, folës i grupit parlamentar të AfD-së për çështje të jashtme, tha se sidomos në rastin e Ballkanit Perëndimor, BE-ja duhej “të ndërgjegjësohej për prejardhjen e saj si një bashkësi ekonomike” dhe të orientohej në ekspertizën ekonomike”. Sipas AfD-së, Ballkani nuk i sjell asnjë përfitim ekonomik tregut evropian.”

Kërkesa e AfD-së tani është duke u shqyrtuar nga komisionet përkatëse, por në bazë të deklaratave të deputetëve mund të thuhet se këtë propozim nuk e mbështet asnjë parti e Bundestagut. “E Majta” është në përgjithësi kritike ndaj politikës së BE-së në Ballkan dhe për pasojë edhe kundër negociatave. Sevdim Dagdelen, deputetja e kësaj partie, e akuzoi BE-në se e trajton Ballkanin si “shesh konfliktesh ndërmjet fuqive të mëdha” dhe jo si “partner me të drejta të barabarta”.

Katër partitë e tjera të përfaqësuara në parlamentin gjerman janë më të moderuara dhe për pasojë pro çeljes së negociatave, edhe pse kanë përfytyrime të ndryshime përsa i përket momentit të nisjes së negociatave dhe shpejtësisë së zhvillimit të tyre.

Liberalët janë më neutralët në këtë pikë dhe nuk hyjnë në debatin se kur duhen çelur negociatat: Thomas Hacker, deputeti i kësaj partie, lavdëroi arritjet e Shqipërisë në procesin e Vetingut: Fakti që mbi 100 gjyqtarë janë kualifikuar, do të thotë se kjo reformë nuk është një tigër pa dhëmbë,” tha ai duke shtuar se “kjo dëshirë për reforma duhet marrë seriozisht”.

Të Gjelbrit, partia më e vogël opozitare, por që sipas sondazheve të deritanishme, pritet të pësojnë rritje në zgjedhjet e Parlamentit Evropian janë gjithashtu, sikurse edhe ministri Roth, ndër përfaqësuesit më të flaktë të çeljes së negociatave: “Besueshmëria e BE-së është e lidhur me mundësinë faktike për të bërë hapa drejt Evropës”, tha raportuesi i kësaj partie për Ballkanin, Manuel Sarrazin. “Çelja e negociatave me Shqipërinë dhe Maqedonisë qysh brenda këtij viti do të jetë prova e lakmusit”, tha Sarrazin.

Veç të Gjelbërve, ministri gjerman i shtetit gëzon edhe mbështetjen e kolegëve të partisë së tij, socialdemokratët, të cilët, siç i tha DW-së, në një intervistë raportuesi i kësaj partie për Ballkanin Perëndimor, Metin Hakverdi, janë për një trajtim njëherazi të Shqipërisë dhe Maqedonisë së Veriut.

Skeptik ndaj rekomandimit të Komisionit

Këtë e kundërshton Unioni Kristiandemokrat e Kristiansocial, grupi parlamentar i të cilit është më i madhi  në Bundestag: Siç mësoi Deutsche Welle pranë qarqeve të këtij Unioni, ai është marrë vesh brenda vetes që kjo temë të trajohet më 23 shtator, pra, jo në qershor.

Argumenti zyrtar, të cilin e përdori gjatë takimit me kryeministrin Edi Rama në fund të prillit edhe zëvendëskryetari i këtij grupi parlamentar, Johann David Wadephul, dhe që ai e tha edhe në një intervistë me Deutsche Wellen është mungesa e kohës për të shqyrtuar me kujdes progres-raportet që do të dalin më 29 maj.

Komisioneri Johannes Hahn ishte javën e kaluar personalisht në Berlin, por nuk arriti t’i bindte kolegët e CDU/CSU-së që ta ndryshonin mendimin, duke marrë parsysh rekomandimin pozitiv për çeljen e negociatave qysh në qershor që pritet të jetë si rezultat i raportit. Deputetët konservatorë gjermanë janë në përgjithësi skeptikë ndaj  rekomandimeve të komisionit. Sipas tyre, rekomandimet e zbukurojnë gjendjen objektive që pasqyrohet në raporte. Prandaj edhe deputetët e CDU/CSU-së kërkojnë më shumë kohë për t’i mbledhur të gjitha faktet, që përmban raporti i Komisionit dhe për të nxjerrë konkluzionet, bëhet e ditur nga qarqet e CDU/CSU në Berlin. Të njëjtat burime nuk e përjashtojnë mundësinë që, ndërsa Maqedonia e Veriut të marrë një „po“ të plotë, Shqipërisë t’i formulohen disa kushte, që duhen plotësuar deri sa të çelet kapitulli i parë i negociatave. Edhe komisioneri i zgjerimit la të nënkuptojë në një intervistë me DW se Maqedonia e Veriut nuk mund të penalizohet, për  shkak të Shqipërisë.

Koordinim me Francën

Siç ka ndodhur edhe më parë, deputetët gjermanë të partisë CDU/CSU, pritet ta formulojnë mendimin e tyre edhe pasi të jenë konsultuar më parë me Francën. E kjo është shumë skeptike sidomos ndaj Shqipërisë, bëjnë të ditur, burime të DW në Bruksel. Në parim, Franca, sikurse edhe Unioni Kristiandemokrat e Kristiansocial në Gjermani, duan që njëherë të bëhet konsolidimi i brendshëm i BE-së, e më pas zgjerimi. Po ashtu Franca e sheh zgjerimin si një çështje të brendshme të BE-së, e jo si çështje të jashtme e të sigurisë. Kjo u vu re edhe në Samitin e Berlinit, ku me insistimin e presidentit Macron, zgjerimi nuk u tematizua dhe nuk u ofrua si instrument për zgjidhjen e problemeve në rajon. „Franca është për negociata të shkurtra e efektive, në mënyrë që shtetet aspiruese të jenë më të përgatitura, kur të hyjnë në negociata”,  iu  tha DW-së nga qarqe diplomatike në Bruksel.

Ndryshe nga Maqedonia e Veriut, e cila së paku ka arritur të fitojë pikë me arritjen e marrëveshjes së emrit me Greqinë dhe shmangien e mosmarrëveshjeve me Bullgarinë, duke u bërë kështu edhe vendi i vetëm në rajon pa konflikte me fqinjët, Shqipëria, në sytë e Francës, ka humbur pikë, thonë diplomatët. Kjo, së pari, për shkak të numrit jashtëzakonisht të madh të azilkërkuesve nga ky vend. Sipas statistikave të Eurostatit, në vitin 2018 Shqipëria ishte vendi i dytë i prejardhjes së azilkërkuesve në Francë, me 9600 azilkërkues, pas Afganistanit (10 270).

Së dyti, për shkak të „imazhit të keq“ të krijuar nga kontrolli i tregjeve ilegale në Evropë dhe lidhjet e “mafies shqiptare” me trafikime, bëjnë të ditur burimet diplomatike. Kjo është një gjë të cilën Maqedonia Veriore nuk e ka. Prandaj edhe qarqet diplomatike nga Brukseli, thonë se, nëse vjen deri te ndonjë vendim i negociuar politikisht, atëherë çelja e negociatave me Maqedoninë e Veriut do të jetë më e mundshme se ajo me Shqipërinë.

dw