Arkivi mujor: Dhjetor 2019

Shqipëria

Shqipëri: Shumica socialiste pritet të miratojë paketën anti-shpifje

Komento

Shumica socialiste pritet të kalojë nesër projekt-amendamentet në dy ligjet për mediat, megjithë kundërshtimet e komunitetit të gazetarëve, që i sheh ato si një përpjekje për censurë dhe pengim të fjalës së lirë.

Kryeministri Edi Rama shkroi në rrjetet sociale se “Projekti do të hyjë nesër për miratim në seancë plenare pas një pune të përbashkët thuajse njëvjeçare me OSBE e i dakordësuar 100% me ekspertët e zyrës së Vjenës nën drejtimin e Harlem Desir”.

Menjëherë pas tij, përfaqësuesi i OSBE-së për lirinë e medias, Harlem Desir, shkroi në rrjetet sociale se “kemi punuar me kryeministrin Edi Rama dhe qeverinë e Shqipërisë deri në minutën e fundit për të përmirësuar draft-ligjet mbi mediat, për t’i sjellë ato në vijën e standarteve ndërkombëtare dhe angazhimet e OSBE-së”.

Ai tha se sot u publikuan disa përmirësime në versionin e fundit të projekt-ligjeve, të cilat kanë të bëjnë me regjistrimin e mediave online, me afatet kohore për rrëzimin e përmbajtjes, kompetencat e AKEP-it, dhe me të drejtën e përgjigjes në publikimet elektronike si masa për të shmangur keqpërdorimin.

“Puna do të vazhdojë për të ulur nivelin e gjobave dhe për adoptimin e akteve nënligjore në të ardhmen, për të garantuar që gjoba disproporcionale të mos u vendosen shërbimeve dhe publikimeve elektronike. Zyra ime do të vëzhgojë nga afër zbatimin e ligjit, i cili nuk duhet në asnjë mënyrë të pengojë lirinë e shprehjes dhe lirinë e medias. AMA duhet të zbatojë ligjin në mënyrë vërtet të pavarur” – shkroi zoti Desir.

Paketa antishpifje i është nënshtruar ndryshimeve të shumta që prej një viti kur u propozua, pas shqetësimeve të vazhdueshme të shprehura nga organizatat e gazetarëve dhe shoqëria civile në Shqipëri, si edhe presioni i organizatat ndërkombëtare, përfshirë Bashkimin Evropian, Këshillin e Evropës dhe vetë OSBE-në.

Edhe pas ndryshimeve të fundit, organizatat e gazetarëve vazhdojnë të jenë kundër saj dhe do të vazhdojnë me planet për protestën e nesërme para parlamentit .

14 organizatat shpërndanë në mbrëmje një deklaratë ku sërish i kërkuan qeverisë shqiptare të tërheqë projektligjet nga procedura parlamentare, sepse sipas tyre, Nuk mund të ketë regjim rregullimi administrativ për median online, dhe se një institucion administrativ si AMA nuk mund të zëvendësojë gjykatat në shqyrtimin e ankesave ndaj përmbajtjes së një publikimi.

voa

Kosova

Kosovë: Koalicioni Vetëvendosje-LDK, afër dhe larg!

Komento

Albin VjosaDy partitë që duan të formojnë koalicionin qeverisës LVV dhe LDK, tashmë kanë harmonizuar programin qeveritar por, nuk po dakordohen për ndarjen e përgjegjësive. Posti i presidentit thuhet të jetë pika e debatueshme.

Dy subjektet politike që dolën të parat në zgjedhje, lëvizja Vetëvendosje dhe LDK, ende po vazhdojnë bisedimet për koalicion qeveritar pa ndonjë marrëveshje finale, ndonëse kanë mbetur vetëm edhe 10 ditë deri në konstituimin e kuvendit të ri të Kosovës. Përfaqësuesit e të dy subjekteve politike thonë se ata tashmë kanë hartuar programin qeveritar, por nuk po merren vesh për ndarje të posteve. Posti i presidentit ndonëse nuk ishte pjesë e zgjedhjeve duket se është pika ku dy partitë nuk po merren vesh.

“Kanë mbetur edhe disa çështje që t’i diskutojmë edhe më tutje. Ajo që ne në LDK vlerësojmë që është themelore është që ne ta shtojmë mirëbesimin dhe respektin reciprok, që ne si partnerë të ardhshëm duhet të kemi besim dhe nëse ky besim mungon, atëherë do të kemi problem në lidhjen e marrëveshjes së koalicionit, sepse këto probleme do të shpërfaqen edhe më vonë”, u shpreh kreu i LDK-së, Isa Mustafa, pas një takimi me kryetarët e degëve të partisë së tij.

“Çështja e presidentit mendojmë, se është parimore dhe është çështje e mirëbesimit ndërmjet nesh më mënyrë që edhe ndarja e pozitave të bëhet e tillë dhe asnjëra të mos dalë super e fuqishme nga ky koalicion”, ka thënë Isa Mustafa.

“Ne zgjedhjet për president nuk i kemi tani dhe kur i vjen koha, organet e LDK-së do ta bëjnë publik edhe emrin për president. Nëse ne kemi besim si LDK që ta votojmë z.Kurti për kryeministër, atëherë presim që një besim të tillë duhet ta ketë edhe partneri jonë ndaj LDK-së, por nuk dyshojmë për këtë”, ka thënë Isa Mustafa.

Nga ana tjetër lideri i Vetëvendosjes Albin Kurti, që pritet të jetë kryeministër i Kosovës, thotë se në zgjedhjet e 6 tetorit qytetarët ua ka dhënë besimin këtyre dy partive (Vetëvendosjes dhe LDK-së) për të qeverisur vendin, dhe se asnjëra nuk kanë nga të shkojnë përveçse ta përmbushin vullnetin e popullit.

“Unë do të dëshiroja që këtë koalicion ta shoh qysh dje. Shpresoj që 24 dhjetori është datë që nuk do të kemi nevojë ta shfrytëzojmë, sepse do ta bëjmë më herët koalicionin. Ne mund ta vonojmë njëri-tjetrin por unë nuk mendoj se kemi ku të shkojmë. Shpëtim nuk ka vetëm vonim”, është shprehur Albin Kurti.

Njohësit e zhvillimeve politike, thonë se të dy partitë LVV dhe LDK, vështirë të gjejnë një kandidat konsensual e që është jashtë politikës.

“nuk mendoj që në Kosovë mund të gjejnë një personalitet me një peshë kaq të madhe politike dhe shoqërore, i cili do t’i bashkonte Lëvizjen Vetëvendosje dhe Lidhjen Demokratike të Kosovës. Kjo për faktin që dy partitë politike kanë pozicione të kundërta ideologjike dhe politike. Kështu që vështirë se është e mundur të gjendet një personalitet, që do të jetë i pranueshëm për të dy partitë”, thotë analisti Artan Muhaxhiri.

Zgjedhjet në Kosovë u mbajtën me 06.10 dhe që nga ajo kohë kanë kaluar më shumë se dy muaj që Kosova vazhdon të jetë pa institucione të reja. Prania ndërkombëtare në Kosovë vazhdon të bëjë thirrje për krijimin e institucioneve të reja, sepse sipas tyre në Kosovë ka shumë punë për t’u bërë. Është ambasadori gjerman në Kosovë, Christian Heldt, që disa herë e përsërit këtë kërkesë, duke thënë se procesi zgjedhor në Kosovë ka marrë shumë kohë.

“Ekziston një numër i madh i sfidave premtuese me të cilat mund të përballet qeveria e ardhshme. Formojeni këtë qeveri sa më shpejt që është e mundur, mblidheni Parlamentin pasi ka shumë punë që duhet të bërë. Arsimi është kyç, pastaj tregu i punës e shumë gjëra tjera”, ka thënë ambasadori gjerman në Kosovë Christian Heldt.

dw

Maqedonia

Tetova dhe Manastiri me ajrin më të papastër

Komento

Maqedonia përsëri thithën ajër të papastër, ndërsa si qytete me ajër më të ndotur gjatë këtij mëngjesi janë Tetova me 183 PM dhe Manastiri me 180 PM.

Stacionet matëse tregojnë se sot në mëngjes krahas Manastiri 2 dhe Tetovës, si qytete me ajër më të ndotur janë Strumica, Milladinovci si dhe Rektoriati dhe Gazi Baba në Shkup.

Gjatë ditës së djeshme Kumanova ishte me ajrin më të ndotur ndërsa stacioni matës kapi 640 PM ndotjen e ajrit.

Problemi i ndotjes së ajrit është problem i kamotshëm i Maqedonisë ndërsa Shkupi disa herë është radhitur si një ndër qytetet më të ndotura në botë./Telegrafi/

Shqipëria, Uncategorized

“Paketa antishpifje”, KiE: Nevojë për përmirësim urgjent

Komento

Komisionerja DunjaKomisionerja e Këshillit të Europës për të Drejtat e Njeriut, Dunja Mijatovic, tha sot se ndryshimet ligjore, pjesë e së ashtuquajturës “Paketë antishpifje”, të propozuara nga qeveria shqiptare “kanë nevojë për përmirësim urgjent. Disa dispozita në të vërtetë nuk janë në përputhje me standardet ndërkombëtare dhe evropiane për të drejtat e njeriut që mbrojnë lirinë e shprehjes dhe lirinë e mediave”. Përmes një deklarate ajo shprehu “shqetësim të thellë” që parlamenti shqiptar vijoi me shqyrtimin e ndryshimeve të propozuara.

“Unë jam veçanërisht e shqetësuar që kompetencat diskrecionale që u janë dhënë organeve rregullatore, mundësia e vendosjes së gjobave të ekzagjeruara dhe bllokimi i faqeve të internetit të mediave pa një vendim gjyqësor, si dhe ndërhyrja e një rregullimi nga Shteti të mediave online, mund të sjellin një goditje të fortë për lirinë e shprehjes dhe lirinë e mediave në vend” – thekson zonja Mijatovic, e cila më parë ka mbulluar dhe funksionin e Përfaqësuesit të OSBE-së për Lirinë e mediave.

Në deklaratën e saj për situatën e krijuar në Shqipëri, Komisionerja e Këshillit të Europës për të Drejtat e Njeriut nënvizon se “është me rëndësi të madhe të sigurohet që interneti të mbetet një forum i hapur dhe publik dhe që të mbizotërojë vetë-rregullimi nga ana e mediave, përfshirë mediat online”, shprehet zonja Mijatovic ndërsa i bën “thirrje anëtarëve të Parlamentit të Shqipërisë që të rishikojnë projekt-ligjet aktuale dhe t’i bëjnë ato në përputhje me praktikën gjyqësore të Gjykatës Evropiane të të Drejtave të Njeriut dhe standardeve të Këshillit të Evropës ”

voa

Shëndeti

4 fakte rreth anemisë që duhet t’i dini patjetër!

Komento

gjakuNjë anketë e Institutit të Shëndetit Publik dhe Institutit të Statistikave (INSTAT) zbuloi se në dhjetë vjeçarin e fundit prevalenca e anemisë tek fëmijët nga 3 në 59 muajsh është zgjeruar me 17%.

Sipas anketës, një në katër fëmijë të moshës 6-49 muajsh janë anemikë. Prevalenca e sëmundjes është më e lartë në grupmoshat 6-17 muaj se tek të rriturit nga 18 në 59 vjeç.

4 Fakte Që Duhet T’i Dini Për Aneminë

Anemia shfaqet edhe kur qelizat e kuqe të gjakut përmbajnë sasi të pamjaftueshme të hemoglobinës, një proteinë e pasur me hekur. Hemoglobina ndihmon në transportin e gjakut të pasur me oksigjen në pjesë të ndryshme të trupit, ndaj kur ajo nuk mjafton, trupi është i plogësht dhe pa energji.

Anemia Është Shenjë e Një Sëmundjeje Tjetër

Anemia është rezultat i një sëmundjeje të fshehur që mund të jetë serioze ose jo. Ajo shfaqet në rastet e pamjaftueshmërisë së hekurit, kancerit të zorrës së trashë, shtatzënisë, dhe sëmundjeve celiake.

Simptoma Pica e Anemisë

Një nga simptomat më të pazakonshme të anemisë ndodh tek disa njerëz që vuajnë nga kjo sëmundje që nxitet nga mungesa e hekurit. Kjo simptomë quhet pica dhe ka të bëjë me përtypjen dhe gëlltitjen e produkteve të pangrënshme siç janë plastika, kartoni e të tjerë.

Analizat Për Aneminë Janë Analiza Gjaku

Ndryshe nga rasti i kolesterolit dhe tensionit të gjakut, anemia nuk është pjesë e problemeve rutinë, për të cilat mjekët kërkojnë kryerjen e analizave. Kur njerëzit ankohen për plogështi dhe lodhje, mjekët zakonisht rekomandojnë kryerjen e analizave të gjakut. Nëse këto tregojnë rënie të nivelit të hemoglobinës, atëherë mjeku do të bëjë një ekzaminim më të thellë të situatës.

Shfaqja e Anemisë

Anemia është një sëmundje që përparon në mënyrë të ngadaltë, e megjithatë në shumicën e rasteve ajo tregon praninë e një një sëmundjeje të fshehur. Zbulimi i shkakut është kyç për trajtimin e anemisë.

Qytetet Me Prevalencën Më Të Lartë të Anemisë

Qarku i Dibrës shënon nivelin më të lartë të rasteve të anemisë. 44 përqind e fëmijëve të moshës 6-59 muaj në këtë qark janë anemikë. Qarku i Vlorës renditet i dyti me rreth 35% të fëmijëve të grupmoshës së lartpërmendur që janë anemikë.  Ndiqet nga Qarku i Elbasanit me 28% të fëmijëve dhe Qarku i Gjirokastrës me 28%.

Niveli më i ulët i anemisë besohet të jetë  në Tiranë me 18 % të fëmijëve dhe në qarqet e Lezhës dhe Fierit përkatësisht me nga 20% secila./AgroWeb.org

Top Channel

Bota

Gjermania, strategji të reja për të marrë punëtorë të kualifikuar

Komento

MerkelQeveria e kancelares Angela Merkel diskutoi të hënën me zyrtarët gjermanë të biznesit dhe të sindikatave strategjitë për tërheqjen e punëtorëve me aftësi profesionale nga jashtë Bashkimit Evropian, në kushtet kur vendi po përpiqet të zgjidhë çështjen e mungesës së profesionistëve të kualifikuar.

Zonja Merkel u tha gazetarëve se qasja e qeverisë së saj ndaj problemit do të ishte më shumë trajnime për gjermanët dhe tërheqja e më shumë njerëzve të kualifikuar nga vendet e tjera të BE-së.

Por, duke e ditur se vetëm kjo do të ishte e pamjaftueshme, Gjermanisë i duhet të sjellë punëtorë nga jashtë BE-së, tha ajo. Për këtë, Gjermania do të duhet t’ua lehtësojë punëtorëve të kualifikuar marrjen e vizave për të filluar sa më shpejt në vendet e reja të punës. Ajo tha gjithashtu se duhet punuar që Gjermania të shihet si një vend tërheqës për t’u sistemuar.

“Nuk jemi ne të vetmit që kërkojmë punëtorë të kualifikuar në botë,” tha ajo. “Në këtë fushë ka një konkurrencë të madhe.”

Legjislacioni që do të hyjë në fuqi më 1 Mars do t’ua bëjë më të lehtë shtetasve jashtë BE-së të marrin viza për të punuar dhe për të kërkuar punë në Gjermani.

Lehtësitë që aplikohen aktualisht për të diplomuarit e universiteteve po zgjerohen tani tek emigrantët me kualifikime profesionale dhe njohuri të gjuhës gjermane.

Sektorë të tillë si teknologjia e informacionit dhe infermieria kanë nevojë për vende pune.

“Shumë kompani në Gjermani kërkojnë urgjentisht punëtorë të aftë, madje edhe në një kohë kur ekonomia është dobësuar,” thotë Eric Schweitzer, president i Shoqatës së Dhomave të Tregtisë dhe Industrisë Gjermane. Për më shumë se gjysmën e kompanive, mungesa e punëtorëve të aftë është aktualisht rreziku më i madh për biznesin.”

Ingo Kramer, kreu i Konfederatës së Shoqatave Gjermane të Punëdhënësve, thotë se rreth 430,000 migrantë që erdhën si azilkërkues që nga viti 2015, tani janë në punë, kështu që nuk do të ishte e paarsyeshme të shpresohet që vendi të mund të punësojë të paktën 100,000 vende pune në vit, duke kërkuar në mënyrë aktive profesionistë nga jashtë.

“Procesi duhet të ecë shpejt, të mos jetë i gjatë dhe burokratik,” tha ai.

Ai shtoi se nëse Gjermania dëshiron që këta punëtorë të qëndrojnë, “është e rëndësishme që ata të ndjehen në Gjermani si në vendin e tyre”.

Sipas propozimeve që dolën nga takimi i së hënës, qeveria shpreson të rrisë përdorimin e portalit të saj informativ “Make it in Gjermany” (“Arrijeni suksesin në Gjermani”) për punëtorët e kualifikuar.

Ministri i Ekonomisë Peter Altmaier tha se qeveria dhe grupet e biznesit kishin rënë dakord gjithashtu të krijojnë projekte pilot me disa vende, si India, Brazili dhe Vietnami.

Ministri i Jashtëm Heiko Maas premtoi të rrisë aftësinë e ministrisë së tij për të përpunuar vizat dhe për të dixhitalizuar procesin.

dw

Bota

Erdogani kërcënon se do të mbyllë baza strategjike për ushtrinë amerikane

Komento

ErdoganTurqia i ka kërcënuar SHBA me hakmarrje, nëse ato vendosin sanksione ndaj Ankarasë për blerjen e një sistemi raketash ruse.

Presidenti turk Rexhep Tayipp Erdogan kërcënoi  se do të mbyllë dy baza ushtarake strategjike të përdorura nga Shtetet e Bashkuara në Turqi, nëse Uashingtoni vendos sanksione kundër Ankarasë për blerjen e një sistemi raketash ruse.

“Po të jetë e nevojshme, ne do t’i mbyllim Incirlikun dhe gjithashtu Kurecikun,” i tha Presidenti turk Rexhep Tayipp Erdogan stacionit A Haber të dielën, duke iu referuar dy bazave ushtarake të përdorura nga Shtetet e Bashkuara. “Po të zbatohet kundër nesh kërcënimi i sanksioneve, ne do t’u përgjigjemi atyre në kuadrin e reciprocitetit.”

Incirliku është një bazë ajrore në jug të Turqisë, që ka luajtur një rol të madh në operacionet ushtarake amerikane në Lindjen e Mesme dhe në Afganistan, dhe së fundmi kundër grupit “Shteti Islamik” (IS) në Siri dhe Irak. Ushtria amerikane ka strehuar gjithashtu rreth 50 bomba bërthamore me gravitet B-61 në këtë bazë. Në Kurecik në Turqinë lindore ndodhet një stacion radari i NATO-s.

Në fillim të kësaj jave, Ministri i Jashtëm turk Mevlut Cavusoglu e ngriti gjithashtu çështjen e mbylljes së dy bazave për SHBA nëse Uashingtoni vendos sanksione.

Sanksionet në horizont

Ligjvënësit amerikanë kanë bërë presion ndaj presidentit amerikan Donald Trump që të vendosë sanksione ndaj Turqisë për blerjen dhe vendosjen e sistemit të mbrojtjes raketore S-400 të Rusisë, për të cilin Uashingtoni thotë se është i papajtueshëm me NATO-n dhe kërcënon avionët luftarakë F-35. Si reagim, SHBA e larguan Turqinë nga programi i avionëve luftarakë F-35, në të cilin Ankaraja ishte partner.

Administrata e Trumpit deri tani është përmbajtur për të mos vendosur sanksione ndaj aleates së NATO-s, për blerjen e S-400. Sipas një ligji amerikan të njohur si Akti i Kundërshtimit të Kundërshtarëve me sanksione (CAATSA), shtetet që blejnë pajisje të caktuara ushtarake nga Rusia duhet të sanksionohen.

Marrëdhëniet midis dy aleatëve të NATO-s gjithashtu janë tendosur në lidhje me ndërhyrjen ushtarake të Turqisë në verilindje të Sirisë kundër forcave kurde, që janë partnerë me SHBA kundër IS-it. Pasi ushtria amerikane u tërhoq nga kufiri turko-sirian, Turqia arriti një marrëveshje me presidentin rus Vladimir Putin për të patrulluar veriun e Sirisë.

Turqia e konsideron milicinë YPG siriane kurde një grup terrorist me lidhje me kryengritësit kurdë që luftojnë në një kryengritje 35-vjeçare kundër shtetit turk. Erdogani kërcënoi të dielën gjithashtu se do të hakmerret ndaj SHBA, pasi Senati dhe Dhoma votuan pro njohjes së vrasjes së armenëve në vitin 1915 si gjenocid. Trumpi nuk e ka nënshkruar rezolutën.

 

 

ad/ag

Kosova, Maqedonia, Shqipëria

Përvjetori i Normales së Elbasanit/ Shkolla që nisi funksionin 110 vite më parë

Komento

110 vite më parë, në dhjetor të vitit 1909 me vendim të Kongresit të Elbasanit do të krijohej normalja e parë e Elbasanit, si i parë institucion në vend që do të përgatiste mësues e do të përhapte gjuhën shqipe në të gjitha trojet shqipfolëse.

Të shumta kanë qenë aktivitetet me rastin e kësaj datë të shënuar, jo vetëm për Elbasanin.

Normalistët e ftuar ndanë mes tyre kujtimet dhe traditat e një arsimi dhe kulture që do të jetojnë gjatë në këtë qytet.

Mësuesit e parë të normales do të pushtonin të gjitha trojet shqiptare, që nga zonat e thella malore, Kosova, Çamëria apo në çdo cep ku duhej përhapur gjuha amtare, pa të cilën një komb është i destinuar të zhduket. Normalja e Elbasanit mban titullin e lartë “Nderi i Kombit” akorduar nga Presidenti i Republikës.

Top Channel

Shqipëria

Si do funksionojë SPAK? E shpjegon ambasada Amerikane

Komento

Ambasada amerikane me anë të një postimi në facebook, shpjegon se si do të funksionojë Struktura e Posaçme Anti-Korrupsion dhe Krim i Organizuar, ose SPAK, që do të shënjestrojë korrupsionin e nivelit të lartë.

Ambasada ka postuar një video ku tregon se si mbështetja prej 2 milionë dollarësh nga Shtetet e Bashkuara po përdoret për të siguruar që SPAK do të ngrihet dhe do të funksionojë në mënyrë të pavarur.

Postimi i ambasadës

Qeveria e Shteteve të Bashkuara është e përkushtuar në luftën kundër korrupsionit dhe respektimin e sundimit të ligjit në mbarë botën. Lufta kundër korrupsionit është prioritet i punës së Ambasadës së Shteteve të Bashkuara në Tiranë. Këtë javë, mësoni se si Struktura e Posaçme Anti-Korrupsion dhe Krim i Organizuar, ose SPAK, do të funksionojë. Me t’u ngritur, do të shënjestrojë korrupsionin e nivelit të lartë. Kjo video tregon se si mbështetja prej 2 milionë dollarësh nga Shtetet e Bashkuara po përdoret për të siguruar që SPAK do të ngrihet dhe do të funksionojë në mënyrë të pavarur.

Top Channel

Bota, Uncategorized

Zgjedhjet në Mbretërinë e Bashkuar dhe e ardhmja e Brexit-it

Komento

Polling StationZgjedhësit në Mbretërinë e Bashkuar po hedhin votën e tyre në zgjedhjet e parakohshme që mund të jenë vendimtare për largimin nga Bashkimi Evropian, të cilin shumica e miratoi në referendumin e qershorit të vitit 2016.

Kryeministri Boris Johnson, përqendroi fushatën e tij në parullën “Ta përmbyllim Brexit-in”. Ai thotë se një shumicë parlamentare për Partinë e tij Konservatore, do t’i mundësonte ta çojë përpara një marrëveshje të refuzuar më parë për ndarjen nga BE-ja dhe ta përmbyllë Brexit-in deri më 31 janar.

Sfiduesi i tij, udhëheqësi i Partisë Laburiste, Jeremy Corbyn, tha që nëse fiton, do të organizojë një referendum të ri për të pyetur qytetarët nëse ende duan largimin nga Bashkimi Evropian apo vendi të mbetet edhe më tej pjesë e bllokut 28 anëtarësh.

Boris Johnson mori detyrën e kryeministrit pasi që pararendësja e tij, Theresa May, dështoi të në përpjekjet e saj të përsëritura që të sigurojë miratimin e parlamentit për një marrëveshje që kishte arritur me BE-në. Zonja May u përpoq të forcojë pozicionin e saj negociues për Brexit-in duke organizuar zgjedhje të parakohshme, por partia e saj vetëm sa humbi disa vende në parlament.

Anketat para zgjedhjeve lanë të kuptohet se partia e kryeministrit Johnson ishte në përparësi, por dallimi u ngushtua në ditët e fundit të fushatës.

Rezultatet zyrtare priten në mëngjesin e së premtes.

voa