Këto shtatë automjete të EULEX-it, minuta më parë në këtë aeroport u sollën të shoqëruara deri tek hyrja e në aeroportin ushtarak që është edhe baza e KFOR-it.

Top Channel

Pas dorëheqjes së presidentit Hashim Thaçi dhe konfirmimit të aktakuzës për krime lufte kundër tij, zyrtarisht ushtruese e detyrës së presidentes u bë kryetarja e kuvendit Vjosa Osmani.

Pas dorëheqjes së presidentit Hashim Thaçi, pas konfirmimit të aktakuzës për krime lufte kundër tij nga Prokuroria Speciale, qeveria thotë se në Kosovë nuk ka vakuum institucional. Sipas qeverisë së udhëhequr nga kryeministri Avdullah Hoti, “pas dorëheqjes së Presidentit të Republikës, z. Hashim Thaçi, kushtetuta dhe ligjet në fuqi garantojnë tranzicion të qartë të ushtrimit të përgjegjësive pa krijuar vakuum institucional”.

“Gjatë kësaj faze, Qeveria e Republikës së Kosovë me përkushtim do t’i kryej obligimet dhe përgjegjësitë kushtetuese dhe do të bashkëpunojë me të gjithë aktorët vendas dhe ndërkombëtarë”, thuhet në një komunikatë të qeverisë. Qeveria e Kosovës pret nga të gjithë të vazhdojnë të demonstrojnë kulturë të lartë politike, ndërsa, thekson se “po i përcjell me vëmendje zhvillimet e fundit rreth Dhomave të Specializuara, të cilat janë pjesë e sistemit të drejtësisë së Republikës së Kosovës”.

Tashmë ish-presidenti Hashim Thaçi, kryetari i Partisë Demokratike të Kosovës (PDK) Kadri Veseli, ish-zëdhënësi i UÇK-së, Jakup Krasniqi dhe ish-eprori i lartë i UÇK-së, Rexhep Selimi, kanë aktakuza të konfirmuara për krime lufte nga Prokuroria Speciale me seli në Hagë. Krasniqi u arrestua të merkurën (04.11) dhe u dërgua në Hagë, ndërsa Thaçi, Veseli e Selimi, me një aeroplan special nën shoqërimin e policisë së EULEX-it, u nisën të enjten (05.11) pasdite drejt Hagës. Qeveria e Kosovës në këtë situatë vlerëson se “askush nuk mund të konsiderohet fajtor pa vendim përfundimtar të organeve kompetente të drejtësisë”, duke shtuar se “bartësit e institucioneve si dhe qytetarët e Kosovës kanë qenë gjithmonë dhe vazhdojnë të jenë shembull për respektim dhe bashkëpunim me drejtësinë vendase dhe ndërkombëtare”.

Pas dorëheqjes së presidentit të Kosovës, në mënyrë automatike këtë përgjegjësi si ushtruese e detyrës së presidentit e merr kryetarja e kuvendit të Kosovës, në këtë rast, Vjosa Osmani, e cila tashmë edhe zyrtarisht e mori këtë përgjegjësi, njoftoi zyra e presidencës.

“Në përputhje me obligimet kushtetuese, pas dorëheqjes së presidentit të vendit z.Hashim Thaçi, Kryetarja e Kuvendit të Kosovës, dr.Vjosa Osmani, sot ka marrë zyrtarisht funksionin e u.d. të presidentes së Kosovës. Ceremonia e pranim- dorëzimit është bërë në prezencën e stafit të Presidencës dhe kryetares së Kuvendit të Kosovës”, thuhet në njoftim. Kështu parashihet në nenin 90 të kushtetutës së Kosovës.

“Në rast se Presidenti i Republikës së Kosovës përkohësisht nuk është i aftë për të përmbushur përgjegjësitë e tij/saj, ajo/ai mund t’ia kalojë vullnetarisht detyrat e postit të tij/saj, Kryetarit të Kuvendit, i cili do të jetë ushtrues i detyrës së Presidentit të Republikës së Kosovës”, thuhet në nenin 90 të Kushtetutës së Kosovës, ku specifikohet se kjo nuk mund të zgjasë më shumë se gjashtë muaj.

Në kohën kur presidenti Thaçi dha dorëheqje pas konfirmimit të aktakuzës për krime lufte kundër tij, kryeministri i Kosovës, Avdullah Hoti nuk ndodhej në Kosovë. Ai ishte për një vizitë zyrare në Itali, ndërkaq, njofton se gjatë ditës së premte (06.11) do të mbledhë qeverinë e tij për të diskutuar rreth zhvillimeve të fundit. Partneri më i madh në koalicionin qeveritar Aleanca për Ardhmërinë e Kosovës, kërkoi mbledhje të jashtëzakonshme të qeverisë, mbledhje të Këshillit të Sigurisë Kombëtare, ndërkaq, kërkon nga qeveria ndërprerje të menjëhershme të të tgjitha aktiviteteve që lidhen me procesin e dialogut me Serbinë, deri në një situatë të re.

Pas zhvillimeve në Prishtinë pati edhe një takim të ambasadorëve të vendeve më të industrializuara QUINT, por tani për tani ende nuk dihet përmbajtja e bisedave të mbyllura mes tyre. Situata e sigurisë vazhdon të jetë e qetë. Forca të shtuara të policisë shihen në sheshet e Prishtinës dhe përreth godinave të institucioneve të Kosovës.

dw

Pas dorëheqjes së Presidentit të Kosovës, Hashim Thaçi, si pasojë e aktakuzës për krime lufte, ka reaguar edhe Bashkimi Evropian.

Zëdhënësi i komisionit të jashtëm, Peter Stano, nëpërmjet një mesazhi në Twitter tha, se e mirëpret faktin që presidenti i Kosovës ka vendosur të bashkëpunojë me Dhomat e Specializuara të Kosovës dhe Zyrën e Prokurorit të Specializuar.

“BE mbështet fuqimisht punën e Dhomave të Specializuara të Kosovës dhe Zyrës së Prokurorit të Specializuar. Bashkëpunimi i plotë me këto institucione është thelbësor si një demonstrim i rëndësishëm i angazhimit të Kosovës për sundimin e ligjit, i cili nga ana tjetër është një element thelbësor për përparimin e Kosovës në rrugën e saj evropiane dhe për angazhimin e BE-së me Ballkanin Perëndimor në tërësi.”

Pas dorëheqjes së Presidentit Thaçi, ne kemi besim te përfaqësuesit e Kosovës për të siguruar vazhdimësinë e institucioneve, në përputhje me ligjet e Kosovës, përfundon Stano.

Debati për presidentin

Pas paralajmërimit të dorëheqjes së Presidentit Thaçi shtrohet pyetja se si do të vazhdojë më tej me koalicionin e deritanishëm, pasi AAK ka kërkuar që kryetari i kësaj partie të bëhet president. Ky post për momentin mbahet nga Vjosa Osmani, kryetarja e parlamentit.

DW mësoi nga qarqe qeveritare në Berlin se Gjermania, e cila është edhe kryetare re radhës së BE-së, favorizon një zgjidhje që nuk provokon zgjedhje të reja në Kosovë, çka do ta shtynte edhe më tej vendimmarrjen për çështje të rëndësishme, siç është sidomos ajo e dialogut.

dw

Presidenti i Kosovës, Hashim Thaçi, dha dorëheqje të enjten dhe u nis për në Hagë për t’u përballur me drejtësinë pasi që është konfirmuar akuza kundër tij e ngritur nga Prokuroria e Posaçme e cila e ngarkon atë për krime lufte dhe krime kundër njerëzimit.

Duke publikuar njoftimin për konfirmimin e akuzës, ai tha se dorëheqja është veprim për të mbrojtur integritetin e presidencës.

“Ashtu, siç kam premtuar, nuk do të lejoj në asnjë rrethanë që para gjyqit të dalë presidenti i Republikës së Kosovës. Prandaj, për të mbrojtur integritetin e presidencës së Republikës së Kosovës, integritetin e shtetit të Kosovës, integritetin dhe dinjitetin e qytetarit të Kosovës , popullit të Kosovës, duke respektuar edhe partneritetin edhe me bashkësinë ndërkombëtare, unë sot jap dorëheqje nga pozita e presidentit të Republikës së Kosovës”, tha presidenti Thaçi.

Ai theksoi se do të bashkëpunojë ngushtë me drejtësinë dhe “nga ky moment jam në dispozicion të drejtësisë, duke besuar në drejtësi, unë besoj në të vërtetën, pajtimin dhe të ardhmen e shtetit dhe shoqërisë sonë. Prandaj sot më shumë se kurrë ju bëj thirrje e ju lus që të mos e humbisni shpresën, durimin dhe besimin”.

Zoti Thaçi tha se aktakuza ndaj tij dhe bashkëluftëtarëve të tij “është çmim i vogël i radhës që kërkohet të paguajmë për lirinë e vendit dhe popullit tonë”.

“Asnjë pretendim nuk do të mund të ndryshojë apo rishkruaj historinë, Kosova ka qenë viktima dhe Serbia ka qenë agresori. Prandaj kjo situatë e re është një mundësi e re për Kosovën dhe duhet ta shndërrojmë në avantazh për të tashmen dhe të ardhmen e vendit. Kjo mund të arrihet duke ruajtur unitetin politik dhe qytetar në vend si dhe duke ruajtur partneritetin me bashkësinë ndërkombëtare”, tha ai.

Prokuroria ende nuk ka dhënë ndonjë njoftim por, më 24 qershor ajo beri të ditur se ka ngritur akuza ndaj presidentit të Kosovës Hashim Thaçi dhe kryetarit të Partisë Demokratike të Kosovës Kadri Veseli, si të dyshuar për krime kundër njerëzimit dhe krime lufte ndër të cilat, vrasje të paligjshme, zhdukje e detyruar e personave, përndjekje dhe tortura. Sipas prokurorit akuzat janë ngritur më 24 prill.

Në aktakuzë pretendohet se Hashim Thaçi, Kadri Veseli dhe të dyshuar të tjerë janë penalisht përgjegjës për afërsisht 100 vrasje të paligjshme. Krimet e paraqitura në aktakuzë përshijnë qindra viktima të identifikuara; shqiptarë, serbë dhe romë të Kosovës dhe kundërshtarë politikë.

Njoftimi qe publikuar derisa presidenti Thaçi ishte ne rrugë për në Shtëpinë e Bardhë për një takim me presidentin e Serbisë, Aleksandër Vuçiç, të ndërmjetësuar nga administrata e presidentit amerikan Donald Trump.

Qeveria e Kosovës, udhëheqës institucionesh e partish politike reaguan pas konfirmimit të akuzave ndaj zotit Thaçi si dhe drejtuesve të tjerë të ish Ushtrisë Çlirimtare duke theksuar se historia e Kosovës nuk mund të rishkruhet dhe se lufta e saj duke qenë e drejtë siguroi edhe mbështetjen e bashkësisë ndërkombëtare.

Konfirmohet akuza edhe ndaj Kadri Veselit

Kryetari i Partisë Demokratike të Kosovës, Kadri Veseli, tha se është njoftuar nga Zyra e Prokurorit të Dhomave të Specializuara se gjyqtari i procedurës paraprake ka konfirmuar aktakuzën kundër tij.

“Jam i vetëdijshëm se ka njerëz në Kosovë që mendojnë se Dhomat e Specializuara janë një fyerje e luftës sonë historike për të mbrojtur popullin e Kosovës nga krimet e regjimit të Millosheviqit. Por unë nuk e shoh në këtë mënyrë, unë e shoh si një mundësi që më në fund të përgjigjem ndaj këtyre dyshimeve dhe thashethemeve të rrejshme të cilat kanë qarkulluar për vite të tëra. Që kur Dick Marty publikoi raportin e tij të pabazuar, ishte e pashmangshme që kjo ditë do të vinte. Ishte e pashmangshme që akuzat e tij të padrejta do të duhej të testoheshin në një gjykatë, në mënyrë që tu jepej fund njëherë e mirë. Kjo është arsyeja që unë e kam përkrahur themelimin e këtij tribunali, dhe kjo është arsyeja që unë tani jam i gatshëm që të luaj rolin tim në këtë proces”, thuhet në një deklaratë të zotit Vesli që u shpërnda nga partia e tij.

Prokuroria e Specializuar nuk ka bërë të ditur ndonjë njoftim rreth konfirmimit të aktakuzës, njoftimi për të cilën u publikua më 24 qershor, kur prokuroria tha se ka ngritur akuza të pakonfirmuara ndaj presidentit të Kosovës, Hashim Thaçi dhe kryetarit të Partisë Demokratike, Kadri Veseli, si të dyshuar për krime kundër njerëzimit dhe krime lufte.

Zoti Veseli, një nga ish drejtuesit e lartë të Ushtrisë Çlirimtare të Kosovës, është personi i katërt me akuzë të konfirmuar nga Dhomat e Specializuara me seli në Hagë, që trajtojnë pretendimet për krime të luftës dhe të pasluftës në Kosovë.

Të mërkurën prokuroria arrestoi Jakup Krasniqin, ish zëdhënës i UÇK-së, ndërsa Rexhep Selimi, një nga drejtuesit e lartë të saj, u nis të enjten për në Hagë pas njoftimit se është konfirmuar akuza kundër tij.

Në shtator, prokuroria arrestoi Sali Mustafën.

Gjykata e Posaçme u themelua në vitin 2015 nga parlamenti i Kosovës dhe ideja për themelimin e saj pasoi pretendimet e ngritura në raportin e vitit 2011 të hartuar nga i dërguari i Këshillit të Evropës, Dick Martty, i cili ngriti dyshimet për përfshirjen e ish kryengritësve në vrasjen e civilëve serbë dhe kundërshtarëve politik shqiptarë.