Pas arrestimit në Rusi të opozitarit Navalny, në Gjermani po kërkohet sërish që të ndërpritet ndërtimi i gazsjellësit Nord Stream 2. Ky është mashtrim i rrezikshëm i vetvetes, mendon Roman Goncharenko.

Fati i gazsjellësit Nord Stream 2 është një nga temat që nuk e kanë humbur rëndësinë megjithë rrjedhën e lajmeve për Coronën. Arrestimi i Aleksej Navalnit dhe shpërndarja me dhunë e protestave që kërkonin lirimin e tij, e kanë futur këtë temë sërish mbas një pushimi gjashtë mujor në titujt e emisioneve televizive me biseda, Talkshows. Në fund të muajit gusht, shkaku ishte arrestimi i opozitarit rus. Projekti energjetik që është shoqëruar me kontroversa që në fillim të tij, u kthye në shqetësimin kryesor të marrëdhënieve gjermano-ruse. Por a është i gatshëm Berlini të lëshojë pe? Dyshimet për këtë janë të mjaftueshme.

Kritika për gazsjellësin që sjell naftë direkt nga Rusia në Gjermani nëpërmjet Detit Balltik janë bërë qëkurse u nënshkrua kontrata e ndërtimit. Dhe Nord Stream 1 është në funksionim që prej vitit 2011. Por ndalimi i ndërtimit të tubacionit të dytë të çiftit naftësjellës, është kthyer në skenar real që kur SHBA vendosi në vitin 2020 të vendoste sanksione kundër firmave që marrin pjesë në ndërtimin e tij. Ndërhyrja e Uashingtonit e ka frenuar ndjeshëm shtrimin e tubacionit të fundit në bregdetin gjerman.

Pse Gjermania nuk do të heqë dorë nga Nord Stream 2

Tani diskutimet janë shtuar edhe në Gjermani. Sidomos politikanët e “Të Gjelbërve” në opozitë kërkojnë ndalimin e menjëhershëm të ndërtimit, për shkak të fatit të Navalny-t dhe të të drejtave të njeriut në Rusi. Edhe politikanë të veçantë të partisë në pushtet, Unionit të kristiandemokratëve dhe kristiansocialëve, kanë mbështetur marrjen e masave të forta kundër Moskës.

Qeveria federale reagon ndaj kërkesave të tilla vazhdimisht njësoj duke thënë: Kemi të bëjmë me një projekt ekonomik dhe jo politik. Në një konferencë shtypi me presidentin francez Emmanuel Macron, kancelarja Angela Merkel tha për të njëqindtën herë se sanksionet kundër Rusisë mund të shtohen për shkak të arrestimit të Navalny-t. Por qëndrimi i saj ndaj Nord Stream 2 vazhdon të mbetet i palëkundshëm.

Kjo “fillimisht” nuk duhet mbivlerësuar. Sepse, për shkak të arsyeve të ndryshme Gjermania nuk mund ta ndalojë ndërtimin e Nord Stream 2. Një hap i tillë do të trondiste sidomos besimin e ekonomisë tek politika, gjë që të dy palët e vlerësojnë si shumë të rëndësishëm. Por, jo vetëm kaq. Berlinit do t’i duhej të paguante dëmshpërblime të mëdha, sepse projekti ka marrë në Gjermani të gjitha lejet e domosdoshme.

Marrëdhëniet e specifike gjermano – ruse

Megjithatë puna nuk është vetëm tek paratë. Një refuzim për përfundimin e Nord Stream 2 do të shkaktonte prishjen e traditës tashmë 50 vjeçare të marrëdhënieve të Gjermanisë me Moskën, jo vetëm në sektorin e energjisë. Hapat radikalë nuk janë pjesë e stilit të diplomacisë gjermane, sidomos me Rusinë, me të cilën Gjermania ka marrëdhënie të veçanta për shkak të ngarkesave të mëdha historike. Frenimi i menjëhershëm i projektit do të bënte po ashtu që Angela Merkel dhe koalicioni i saj qeverisës të humbisnin fytyrën. Ata nuk e kanë vënë në dyshim projektin as pas aneksimit të Krimesë dhe luftës në Ukrainën Lindore, as pas vrasjes së politikanit opozitar rus Boris Nemtsov, ose mbas sulmit të hakerave rus ndaj internetit të parlamentit gjerman, Bundestag.

Dhënia fund e projektit me anë të një vendimi të BE-së, do të kishte qenë për Berlinin mbase rruga e vetme për t’i shpëtuar pagesës së shumave të mëdha të dëmshpërblimit. Sidomos Polonia dhe Republikat Baltike e preferojnë shumë një gjë të tillë. Por, nuk është e sigurt se BE do ishte unanime për këtë. Sepse, zgjatja e sanksioneve jo shumë të ashpra që BE ka vendosur kundër Rusisë për shkak të trajtimit që i bën Ukrainës, nuk ka marrë shumicën prej vendeve si Italia ose Austria. Sidoqoftë, Brukseli nuk e ka me ngut futjen e kësaj teme në axhendë dhe ka arsye të forta për këtë gjë.

Nuk është e udhës të bëhen kërcënime boshe

Prandaj, të gjitha diskutimet për t’i dhënë fund Nord Stream 2 janë si të mashtrosh vetveten. Kërkesat për të ndaluar ndërtimin e gazsjellësit gati të përfunduar janë fjalë që i merr era, sepse nuk mund të zbatohen. Dhe tregojnë para Kremlinit dobësinë e Gjermanisë dhe Europës. Kjo ka dëmtuar tashmë imazhin. Si rezultat, apelet iluzionare kanë efekt të kundërt: Ato forcojnë presidentin rus Vladimir Putin kundrejt BE-së dhe kundrejt komunitetit ndërkombëtar. Sipas motos: Shikoni çfarë ndodh! Europa nuk mund të bëjë asnjë gjë!

Duke pasur parasysh këtë, nuk është çudi që kryediplomati i BE-së, Josep Borrell u poshtërua kur pikërisht gjatë vizitës së tij në Moskë, u njoftua dëbimi i tre diplomatëve europianë, mes tyre edhe një gjerman.

Sinjale që kuptohen nga Moska

Si pasojë, ajo që duhet bërë nuk është ndalimi i ndërtimit të Nord Stream 2, por ndalimi i kërcënimeve boshe. Një recetë e moçme diplomatike e suksesshme thotë, se kërcënimet duhen bërë për ato gjëra, të cilat je i gatshëm edhe t’i vësh në jetë.
Sepse hapësira për sanksione kundër Rusisë është e vogël dhe politikanët me përvojë e dinë mirë këtë. Kjo hapësirë është zvogëluar edhe më shumë për shkak të kushteve të pandemisë. Kjo nuk do të thotë se Berlini nuk ka çfarë t’i thotë Moskës, si për trajtimin e opozitarëve në Rusi ashtu edhe për shkeljen e të drejtave të njeriut ose shkeljet e së drejtës ndërkombëtare.

Nga e kaluara e afërt mund të kujtohen si dëbimet e diplomatëve pas helmimit të ish-agjentit të dyfishtë Sergej Skripal dhe së bijës në Britaninë e Madhe, ashtu edhe sanksionet ekonomike pas goditjes së avionit MH17 mbi Ukrainën Lindore. Sinjale të tilla Moska i kupton mirë: Më mirë se sa kërcënimet boshe, për ndalimin e ndërtimit të Nord Stream 2.

Roman Gonçarenko / dw

Federata dhe landet në takimin e ri të nivelit të lartë mbi masat ndaj koronavirusit vendosën të shtyjnë deri më 7 mars masat kufizuese. Sidoqoftë do të ketë disa lehtësime: Floktoret do të lejohen të hapen nga 1 marsi.

Lockdown-i i kufizuar fillimisht deri në mes të shkurtit për të luftuar pandeminë e koronavirusit në Gjermani do të shtyhet deri më 7 mars. Përjashtim do të ketë për floktoret, që mund të rihapen nga 1 marsi nën masa të rrepta për ruajtjen e higjenës. Kështu vendosën kancelarja Angela Merkel dhe kryeministrat e landeve. Hapja e shkollave dhe kopshteve të fëmijëve nuk do të rregullohet në nivel federal, por në bazë të kompetencave të landeve.

Hapja e shkollave planifikohet për më 22 shkurt

Disa lande duan t’i hapin shkollat gradualisht duke nisur nga java e ardhëshme. Berlini planifikon të fillojmë më 22 shkurt me hapjen e shkollave, tha kryebashkiaku që qeveris landin Michael Müller. Edhe lande të tjera janë orientuar në këtë datë, shtoi kryetari i konferencës së kryeministrave. Müller e përshkroi hapjen e shkollave dhe kopshteve si një procs të vështirë të vendimmarrjes mes dilemës për mbrojtjen e shëndetit dhe nga ana tjetër pasojave sociale nëse shkollat vazhdojnë të mbahen mbyllur. Nuk synohet hapja e menjëhershme, por “një proces gradual i mësimit në prezencë në shkollat fillore” me orare me rotacion, rregulla higjene dhe mundësi testimi për mësuesit dhe fëmijët.

Më shumë siguri në klasa dhe në kopshte pritet të arrihet përmes shtimit të testimeve të shpejta. Përveç kësaj ministrat e shëndetësisë do të mandatohen që të provojnë nëse mësuesit dhe edukatoret do të mund të vaksinohen më përpara nga sa ishte planifikaur deri tani. Merkel ka tërhequr vëmendjen, që pikërisht edukatoret nuk kanë mundësi të ruajnë distancat e nevojshme, mësohet nga pjesëmarrësit.

Incidenca 7 ditore maksimumi 35 infeksione të reja

Federata dhe landet në vendimin e tyre tërheqin vëmendjen për përhapjen e shpejtë të mutacioneve të virusit. Kjo kërkon përpjekje të shumta shtesë, për ta ulur numrin  e infeksioneve të reja. “Ndaj duhet të ruhen edhe gjatë javëve të ardhshëme rregullat për kufizimin e kontakteve.” Edhe vendimet e tjera ekzistuese si mbyllja e një pjese të madhe të dyqaneve të tregtisë me pakicë, restoranteve e bareve, muzeve dhe teatrove do të mbeten në fuqi. Një hap tjetër drejt zbutjes së masave do të merret vetëm pasi të jetë arritur një incidencë e qendrueshme shtatëditore në kuotën e më së shumti 35 infeksioneve në 100.000 banorë. Vetëm atëherë mund të rihapen dyqanet, muzeumet, galeritë e të tjera shërbime publike.

Hapja më përpara e floktoreve do të realizohet nën massa të rrepta higjene, duke pranuar hyrjen me rezervim si dhe duke përdorur maskat mjekësore. Si argument për këtë vendim jepet rëndësia që ka kujdesi për flokët në higjenën e trupit si dhe për të mundësuar këtë shërbim pas një mbylljeje të gjatë deri tani veçanërisht edhe për të moshuarit, që e kanë të nevojshëm atë.

Merkel: Rrezik nga një valë e tretë

Merkel e cilësoi rrezikun nga mutacionet e koronavirusit deri në mes të marsit si „ekzistencial” për zhvillimet e mëtejshme në sfondin e pandemisë në Gjermani. Në këtë fazë do të kuptohet, nëse koronaviruset që kanë pësuar mutacion do të dominojnë, tha Merkel.

Ka rrezik për një valë të tretë, që duhet luftuar me masa politike.

Incidenca shtatëditore, pra numri i infeksioneve për 100.000 banorë sipas Institutit Robert Koch (RKI) është ulur në 68,0  nga 72,8 që ishte një ditë më parë. Numri i rasteve të reja të infeksioneve të provuara brenda 24 orëve ka qenë rreth 8072 duke çuar kështu shifrën e përgjithshme në 2.299.996. Janë komunikuar gjithashtu 813 raste të reja vdekjeje nga koronavirusi. Gjithsej që nga fillimi i pandemisë në Gjermani kanë humbur jetën nga infeksioni 62.969 vetë.

1,5 miliardë Euro për luftimin e koronavirusit në mbarë botën

Qeveria gjermane do të ndihmojë me 1,5 miliardë Euro në mbarë botën për luftimin e koronavirusit. Këto ndihma janë pjesë e një pakete ndërkombëtare ndihme, deklaroi një zëdhënës në Berlin. Të mërkurën (10.02) pasdite Bundestagu miratoi lëvrimin e kësaj shume. Gjermania merr pjesë në programin ACT-Accelerator (Access to COVID-19 Tools), që përfshin përpjekjet ndërkombëtare në luftën kundër pandemisë. Një komponent i rëndësishëm është në të sigurimi dhe shpërndarja e vaksinave në vendet, që janë të prekura nga varfëria ekstreme.

sti/se/rb (rtr, afp, dpa, rki)