Shpenzimet e mbrojtjes së Gjermanisë janë rritur sërish. Kjo është në përputhje me gatishmërinë e qeverisë për të investuar më shumë për sigurinë.

Sipas një raporti, qeveria gjermane e ka njoftuar NATO-n se shpenzimet e mbrojtjes për këtë vit arrijnë shumën rreth 53 miliardë euro.

Siç raporton më tej agjencia gjermane e shtypit, dpa, kjo është një kuotë e re maksimale dhe një rritje prej 3.2 përqind në krahasim me vitin 2020. SHBA po bën presion për një ndarje të drejtë të barrës brenda aleancës së mbrojtjes transatlantike.

Sekretari i Përgjithshëm i NATO-s Jens Stoltenberg kohët e fundit e kishte bërë të qartë disa herë se ai priste presion edhe nga Presidenti i ri i SHBA, Joe Biden për këtë çështje.

Në telefonatën e parë me Presidentin e ri amerikan Biden, kancelarja gjermane Angela Merkel shprehu gatishmërinë e Gjermanisë për të luajtur një rol më të madh në fushën e sigurisë.

Në samitin e NATO-s në vitin 2014 në Uells, aleatët riafirmuan objektivin e tyre për të shpenzuar dy përqind të produktit të tyre të brendshëm bruto përkatës për mbrojtjen.

Në Gjermani, shpenzimet për mbrojtjen u rritën kohët e fundit vetëm në 1.6 përqind, por edhe për shkak të rënies së prodhimit ekonomik si rezultat i pandemisë së Covid-19.
aud (dpa, dlf)

Përplasjet mes studentëve të Universitetit Bogazici dhe policisë vazhdojnë. Presidenti turk i damkos protestuesit si terroristë. Pse i hyn Erdogani kursit të konfrontimit me këtë grup të rëndësishëm votuesish?

“A janë këta studentë apo terroristë që përpiqen të mësyjnë zyrën e rektorit dhe ta uzurpojnë atë?” Kështu u shpreh presidenti turk, Recep Tayyip Erdogan së fundmi për studentët e universitetit të njohur Bogazici në Stamboll. Që nga fillimi i janarit studentët protestojnë kundër emërimit të ish-politikanit të AKP-së, Melih Bulu si rektor, një vendim me dekret presidencial. Policia përpiqet të ndalë protestat me dorë të hekurt. Ndalimet policore pa arsye apo bastisje shtëpish natën ishin javën e kaluar në rend të ditës. Erdogan pretendoi, se mes studentëve ishin përzier elementë opozitarë, të cilët në të shkuarën në „mitingjet e tyre kishin kërkuar skenarë të ndyrë si puçin.”

Erdogan shikon paralelizëm me protestat Gezi

Presidenti turk i krahasoi protestat studentore me demonstratat e parkut Gezi në vitin 2013. „Atëherë kemi përjetuar si prona e tregtarëve u shkatërrua. Se si ata me kanaçe birre në dorë uzurpuan xhaminë e sulltan Bezmiâlem-Vâlide. Fajësimet e presidentit nuk u provuan. Imami dhe muezini që punonin në atë xhami nuk i vërtetuan akuzat, ata nuk kishin parë askënd të pinte alkool në shtëpinë e zotit. Të dy u zëvendësuan pas pohimeve të bëra.

Paralelizmat që bën Erdogani me protestat e të rinjve aktualisht i kanë habitur shumë vëzhguesit zgjedhorë. Për shkak se elektorati i partisë konservatore islame, AKP, sipas sondazheve, ka rënë nën 40%, mund të mendohej se çdo votë ia vlen, edhe ajo e të rinjve. “Në vitin 2011 partia qeverisëse, AKP ia doli të merret 42-43% të votave tek kjo grupmoshë, nga 18-24 vjeç”, shprehet studiuesi i opinionit, İbrahim Uslu. Marrëdhënia mes AKP dhe rinisë pas protestave të Gezit u prish, më pas miratimi për AKP ra nën 30% në këtë grupmoshë. “Ishte gjuha e ashpër, që bëri që rinia të distancohet nga AKP”, thotë Uslu.

Megjithate Erdogan e vazhdon këtë kurs edhe shtatë vite më vonë në protestat e studentëve në Stamboll. Llogaria pas kësaj: „AKP dëshiron të krijojë një marrëdhënie me të rinjtë, por besnikë të saj”, thotë demoskopi Uslu. “Këtë qëllim ajo e arrin me nxitjen e polarizmit dhe tensioneve në popullsi. Kështu krijohet një lidhje më e fortë me partinë.” Kjo “politikë polarizimi” është në fuqi edhe me grupe të tjera votuesish.

Strategjia e Erdoganit sjell rezultate

Një strategji, që sipas Uslu ka sjellë rezultate deri tani, thotë studiuesi i opinionit. „Mund të shohësh, se si rënia e votave për AKP, megjithë krizën e rëndë ekonomike ecën me ritme të ngadalta.” Politika e tensionit dhe polarizimit i ka forcuar lidhjet emocionale të votuesve të saj.

Edhe mënyra e ashpër e veprimit me studentët është pjesë e kësaj strategjie. Erdogani do „të krijojë armiq”, konkludon İbrahim Uslu. „Nganjëherë ky armik është jashtë, nganjëherë brenda në vend. Por ka heronj dhe njerëz të mirë që luftojnë me këtë armik”, ky është narrativi i zakonshëm.

Sipas Can Selcuki, Drejtor i Instituti të Studimeve Zgjedhore, İstanbul Ekonomi Araştırma, në zgjedhjet e ardhshme parlamentare e presidenciale në vitin 2023 mund të llogaritet me 5 milionë votues të rinj që votojnë për herë të parë.

“Këta njerëz duan të dëgjohen”

“Ky është një potencial i jashtëzakonshëm, si për qeverinë edhe për partitë opozitare”, thotë Selcuki. Të gjitha partitë duhet të jenë të ineteresua të gjejnë një strategji për të fituar votues të rinj. “Nëse e shikon si vepron qevria me Universitetin Bogazici, nuk duket, se qeveria e quan të nevojshme t’i dëgjojë këta të rinj.”

Studiuesit e opinionit të institutit kanë pyetur 236 studentë demonstrues në Stamboll. “Këta njerëz duan thjesht të dëgjohen dhe të merren seriozisht. Ata duan një ndryshim të ligjit, që në të ardhmen rregullon qartë emërimin autonom të drejtorit.” Por askush nga përgjegjësit nuk i dëgjon apo interesohet për atë që duan studentët, thotë politologu Can Selcuki. “Dhe ky është problemi.”

dw

Presidenti i Shteteve të Bashkuara, Joe Biden, i bëri thirrje presidentit të Serbisë që të punojë drejt reformave evropiane dhe arritjen e një marrëveshje gjithëpërfshirëse me Kosovën të përqendruar në njohjen e ndërsjellë.

Thirrja ishte pjesë e një letre që presidenti Biden i dërgoi presidentit serb Aleksandër Vuçiç, me rastin e ditës së pavarësisë së Serbisë.

Në letrën dërguar presidentit serb thuhet se “ne mbetemi të palëkundur në mbështetjen tonë për qëllimin e Serbisë për integrimin evropian dhe ju inkurajojmë që të vazhdoni të bëni hapat e fortë përpara për të arritur atë qëllim – përfshirë reformat e nevojshme dhe arritjen e një marrëveshje gjithëpërfshirëse të normalizimit me Kosovën ku do të përqendrohej me njohjen e ndërsjellë”, thuhet në letër.

Presidenti i Serbisë, Aleksandër Vuçiç tha ndërkaq se ka pasur përpjekje që njohja e ndërsjellë mes Kosovës dhe Serbisë të imponohet si zgjidhje përfundimtare, por sipas tij është detyrim i tij të mbrojë interesat e Serbisë.

“Kam pranuar urimin e presidentit Biden, e falenderoj për urimin. Sa i përket njohjes së ndërsjellë, ajo nuk qëndron në asnjë dokument të organizatave ndërkombëtare. Ne e kuptojmë që kjo është politikë e re amerikane. Kishte përpjekje për të imponuar këtë term si diçka që ne duhet të kishim pranuar si zgjidhjen përfundimtare në Uashington. Unë tashmë kam thënë personalisht një herë se çfarë mendoj për njohjen dhe përgjigjja ime nuk do të jetë ndryshe”, tha presidenti serb.

Presidenti serb tha se vendi i tij është i gatshëm që të vazhdojë bisedimet me Kosovën të ndërmjetësuara nga Bashkimi Evropian.

Letra e presidentit Biden ndërkaq u mirëpritë nga autoritetet në Kosovë.

Kryeministri në detyrë, Avdullah Hoti tha se Shtetet e Bashkuara mbetën aleati i Kosovës. Nëpërmjet një postimi në faqen e tij të Facebook-ut, zoti Hoti tha se nga Shtëpia e Bardhë vazhdojnë të vijnë vetëm lajme të mira për Kosovën.

“Letra e Presidentit Biden, dërguar Presidentit të Serbisë për njohjen e Kosovës, është edhe një dëshmi për lidhjen e veçante midis dy vendeve, miqësinë e përjetshme për të cilën fliste presidenti Rugova, sa herë që thoshte se shtëpia nuk mbahet pa miq”, shkroi ai.

Më katër shtator të vitit të kaluar, Kosova dhe Serbia nënshkruan në Shtëpinë e Bardhë një dakordim për normalizimin ekonomik ndërmjet tyre.

Kosova e Serbia sivjet mbushin dhjetë vjet që nga fillimi i bisedimeve të lehtësuara nga Bashkimi Evropian për normalizimin e marrëdhënieve ndërmjet dy vendeve, por ende nuk shihet fundi i tyre.

Bisedimet që rifilluan vitin që lamë pas, pritet të vazhdojnë në pranverë meqë aktualisht Kosova është në prag të zgjedhjeve të reja parlamentare.