Bodo Weber, analist nga Berlini, analizon ekskluzivisht për DW, rezultatin e zgjedhjeve në Kosovë dhe shpjegon se përse Kurti duhet ta marrë seriozisht dialogun me Serbinë.

Deutsche Welle: Fitorja sërishme e Vetëvendosjes në Kosovë është pritur me entuziazëm brenda Kosovës, por me rezerva nga jashtë . Si duhet lexuar rezultati paraprak i zgjedhjeve të 14 shkurtit 2021?

Bodo Weber: Ngjashëm me rezultatin e zgjedhjeve të parafundit në nëntor 2019, pra, në radhë të parë, si një votë e shumicës së qytetarëve të Kosovës kundër strukturave të vjetra dhe të ngurta politike, kundër elitave që e kanë prejardhjen historike në luftën për pavarësi të viteve 1990, kundër korrupsionit, kundër mungesës së një ekonomie të orientuar drejt zhvillimit dhe politikës sociale. Kjo protestë u përforcua nga episodi me rrëzimin e qeverisë Kurti vitin e kaluar dhe faktin që PDK humbi Thaçin dhe Veselin.

DW: Me gjithë fitoren e thellë të Vetëvendosjes shumë vetë mendojnë se as Kurti nuk do ta ketë të lehtë. Ku i shihni ju pengesat e mundshme për një qeveri të qëndrueshme në Kosovë?

Weber: Mbetet të pritet rezultati përfundimtar i zgjedhjeve dhe i shpërndarjes së ulëseve në parlament. Nëse Vetëvendosja nuk do të arrijë shumicën absolute, ka të ngjarë që të hyjë në koalicion me një pjese të madhe të përfaqësuesve të pakicave joserbe. Interesante do të jenë marrëdhëniet me Listën Serbe. Edhe pse z. Kurti refuzoi në fushatë koalicion me ta, unë nuk do ta përjashtoja një pjesëmarrje indirekte të LS në qeveri, nisur nga pozita e garantuar me kushtetutë e 10 deputetëve të pakicës serbe në parlament. Sa për zgjedhjen e presidentit, nuk besoj se ky problem është zgjidhur me të vërtetë me rezultatin e zgjedhjeve parlamentare.

Një komentues në gazetat gjermane parashikonte se Kurti do t’ia prishë rehatinë politikës së BE-së ndaj Kosovës, Çfarë e pret Brukselin nga Kurti si kryeministër?

Në një farë mënyre, komentuesi ka të drejtë, sepse Kurti dhe Vetëvendosja kanë vizione politike me përmbajtje. Pjesa tjetër e klasës politike e ka dëshmuar se nuk kanë thuajse asnjë qëndrim politik, që nuk është i negociueshëm me poste. Megjithatë, unë nuk shoh ndonjë problem. Qeveria e re do të jetë më e zëshme dhe e drejtpërdrejtë me kritikat legjitime për bllokimin e liberalizimit të vizave. Mbetet të shihet nëse do të realizohen sinjalet e treguara në vitin 2020 se këtë vit mund të jetësohet liberalizimi i vizave.

Ka gjasa që dialogu me Serbinë të jetë më i vështirë ose potencialisht më konfliktual. Duke pasur parasysh katër vitet e fundit dhe sfidat e pandemisë, është më se e kuptueshme që partia e re në pushtet e deklaron në mënyrë demonstrative se dialogu nuk është përparësi për ta.

Por ajo nuk duhet të injorojë faktin që me ardhjen në fuqi të administratës së Bidenit dhe përfundimin e mandatit të kancelares gjermane Merkel në fund të këtij viti, hapet një dritare kohore ndoshta e unike për të gjetur një zgjidhje përfundimtare dhe të drejtë në negociatat me Serbinë. Pra, për të arritur drejt një marrëveshje përfundimtare reale, gjithëpërfshirëse, dhe me njohje reciproke.

Qytetarët e Kosovës votuan për herë të dytë radhazi për një parti alternative. Në vende të tjera të Ballkanit Perëndimor mungojnë alternativa të tilla. Është rastësi?

Nuk e besoj se është rastësi. Sa i përket gjendjes së demokracisë dhe shtetit të së drejtës, Kosova nuk ka një dallim të madh nga vendet fqinje, por shoqëria aty është shumë më plurale se pjesa tjeter e rajonit, si në politikë ashtu edhe në media. Ndoshta kjo ka të bëjë ndër të tjera edhe me faktin që popullsia është shumë më e re se në vendet e tjera.

dw

Fitorja e Albin Kurtit në zgjedhjet e Kosovës nuk është ndonjë befasi në Beograd, por paralajmërim se për Serbinë po vijnë kohë më të vështira sa i përket dialogut.

Imazhi i Kurtit si negociator i ashpër për Serbinë është theksuar shpesh në analizat e publikuara në Serbi. Mund të thuhet se udhëheqësi i “Vetëvendosjes” e bëri të qartë këtë me deklaratën e tij se dialogu me Beogradin është në vendin e pestë ose të gjashtë për nga rëndësia. Me këtë ai synon të justifikojë imazhin e tij edhe në kryeqytetin serb.

Kryeministrja e Serbisë, Ana Brnabiq, thotë se deklaratat e Albin Kurtit që dialogu me Beogradin nuk është prioritet, nuk janë të habitshme, por janë “për keqardhje”.

“Kjo tregon mungesën e seriozitetit të elitave politike në Prishtinë. Unë besoj se dialogu është mënyra e vetme për të rënë dakord mbi normalizimin e marrëdhënieve midis të dy palëve, për përparim dhe stabilitet. Në fund të fundit, Prishtina nuk ka një perspektivë të veçantë pa dialog, sepse më shumë se gjysma e vendeve në botë nuk e kanë njohur të ashtuquajturën Kosovë e pavarur”, thotë kryeministrja e Serbisë.

Ana Brnabiq foli edhe për deklaratën e Kurtit se nevojitet një pjesëmarrje më e madhe e SHBA në dialog, duke theksuar se “Kurti ishte i pari kundër Marrëveshjes së Uashingtonit dhe se Serbia nuk i ndryshon deklaratat e saj çdo ditë”. Zëvendëskryeministrja Zorana Mihajloviq tha se udhëheqësi i Lëvizjes Vetëvendosje, Albin Kurti, tmerrësisht gabon nëse mendon se mund t’i japë leksione Serbisë se çfarë lloj politike, veçanërisht të jashtme, duhet të ndjekë ajo. Kjo nuk është rruga për arritjen e ndonjë rezultati në dialogun midis Beogradit dhe Prishtinës”.

Autoritetet serbe komentuan edhe suksesin e Listës Serbe, e cila fitoi të dhjetë vendet e rezervuara për përfaqësuesit serbë, me pothuajse 100 përqind të votave. Drejtori i Zyrës serbe për Kosovë e Metohi, Petar Petkoviq tha se populli serb atje ka votuar “në përputhje me ftesën e vendit të tij dhe presidentit Aleksandar Vuçiq dhe gati unanimisht e mbështeti Listën Serbe”.

“Uniteti serb fitoi edhe një herë, megjithë fshirjen e votuesve nga listat e votimit, zvogëlimit të numrit të vendvotimeve dhe provokimeve politike, në veçanti atyre të Ramush Haradinajt dhe Albin Kurtit” – tha Petkoviq.

Dialogu duhet të sjellë rezultat

Duke komentuar fitoren tjetër zgjedhore të Albin Kurtit, pas largimit të mëparshëm nga pushteti, Jovica Pavloviq, nga Instituti për Studime Evropiane, i tha DW-së, “se ishte një veprim strategjik për të arritur një fitore të tillë, ku ai pothuajse mund të marrë pushtetin vetëm.”

“Kurti e ka paraqitur dorëheqjen e tij si vullnetare, duke theksuar se ai do t’u mbetet besnik qëndrimeve të tij dhe nuk do të pranojë kompromise, veçanërisht ato që lidhen me dialogun midis Beogradit dhe Prishtinës,” tha Pavloviq.

Sa i përket Beogradit, “ai sigurisht që ka një bashkëbisedues më të fortë, ose më të vendosur, me Kurtin, në dialogun që do të vijojë”. Dialogu me siguri që do të vazhdojë edhe pse Kurti deklaron nuk e thotë se ai është prioritet. Kurti është i vetëdijshëm se do të detyrohet të ulet në tryezën e negociatave. Beogradi do të ketë përballë një lojtar që nuk e ka pasur deri më tani nga pala tjetër, e kjo kërkon ndryshime në strategjinë e dialogut. Kjo do të thotë se nuk do të ketë më hedhje të topit nga njëra anë në tjetrën, por duhet të arrihet ndonjë marrëveshje konkrete”, beson Jovica Pavloviq.

Mesazhet e mëparshme

A do ta marrë Albin Kurti përsëri pushtetin në Kosovë për një kohë të shkurtër, apo do të qëndrojë më gjatë në pushtet? Kjo kryesisht varet nga ajo sa ka mësuar ai në mandatin e tij të parë, thotë për DW Aleksandar Popov, drejtor i Qendrës për Rajonalizëm.

“Në dy gjëra ai është futur me tepër vetëbesim: luftën kundër korrupsionit, të cilën ai në të vërtetë nuk arriti ta fillonte sepse ai gaboi në detyrën e dytë, kur nuk i respektoi pikëpamjet e Perëndimit, veçanërisht të Amerikës.” Ndaj do të jetë interesante të shihet sa ka ndryshur pikëpamjet fillestar – se dialogu është në vendin e gjashtë për nga prioritetet, sepse ekziston rreziku që nëse dialogu nuk është prioritet, ai mund të përjetojë një debakl si në mandatin e mëparshëm”, tha Popov.

Përshpejtimi i dialogut

“Fati i dialogut tani do të varet nga pozicioni i Amerikës dhe Evropës, por unë mendoj se ky proces tani do të përshpejtohet”, vazhdon Popov. “Ata do ta detyrojnë Kurtin ose dikë tjetër të ulet në tryezën e negociatave dhe unë nuk mendoj se nuk do të priten zgjedhjet tjera në Serbi dhe se ky proces nuk do të zvarritet edhe për dy ose tre vitet e ardhshme”.

“Aleksandar Vuçiq tani do të jetë nën një presion të madh. Ai tani është duke e përgatitur publikun për këtë me deklarata se do të jetë e vështirë dhe se ai pret presion mbi Serbinë”, thotë drejtori i Qendrës për Rajonalizëm.

Sigurisht që do të ketë presion mbi Beogradin për të bërë lëshime dhe eventualisht të njohë Kosovën, beson Jovica Pavloviq. Por ai mendon se nuk ka gjasa që dikush në Beograd, përfshirë këtu edhe Aleksandar Vuçiqin, të jetë i gatshëm të vendosë marrëdhënie dypalëshe me krahinën e shkëputur.

“Rrethanë rënduese është që Kurti është një negociator i ngurt dhe është e vështirë të pritet që ai të bëjë ndonjë koncesion për Beogradin.” Madje mund të pritet që kjo të jetë arsyeja për mungesën e ndonjë përparimi të mëtejshëm në negociata”, vëren Pavloviq.

Dialogu megjithatë prioritet?

Beogradi zyrtar tashmë ka vërejtur një ndryshim në qëndrimin e Albin Kurtit, i cili tani e ka zhvendosur dialogun në vendin e tretë ose të katërt të prioriteteve, e më parë thoshte në vendin e gjashtë. Kjo sigurisht u ndikua nga deklaratat e Departamentit amerikan të Shtetit, se dialogu midis Beogradit dhe Prishtinës duhet të jetë një prioritet i autoriteteve të reja të Kosovës.

“Është e qartë se deklaratat e deritanishme të Kurtit kanë qenë vetëm për përdorim fillestar në politikë dhe se deklaratat e sotme do të harrohen nesër. E politikanët do të gjejnë me siguri ndonjë alibi ose justifikim, pse duhej të braktisnin qëndrimet fillestare”, thotë Aleksandar Popov. Mendoj se Kurti është i vetëdijshëm për këtë edhe pa paralajmërimet nga Departamenti i Shtetit, thotë Jovica Pavloviq.

“Unë jam i sigurt se ai ka një strategji për të paraqitur veten si dikush që nuk dëshiron të dialogojë – në mënyrë që të rrisë popullaritetin e tij politik. Por ai me siguri di se si ta bëjë këtë pa u dukur në opinion se është nën presion të madh dhe i detyruar t’i ndryshojë qëndrimet”, konkludon bashkëbiseduesi ynë nga Instituti për Studime Evropiane.

Ivica Petrovic/dw

Gjatë 24 orëve të fundit, në Laboratorin e Mikrobiologjisë Molekulare në IKShPK dhe laboratoret private me metodën RT-PCR, janë testuar gjithsej 3.196 mostra të marra nga ShSKUK dhe gjurmimi i kontakteve të rasteve në terren, prej të cilëve rezultojnë 285 raste pozitive. Rastet pozitive janë nga komunat: Prishtinë 123 raste, Gjakovë 22 raste, Pejë 22 raste, Podujevë 17 raste, Vushtrri 12 raste, Lipjan 11 raste, Fushë-Kosovë 9 raste, Mitrovicë 9 raste, Rahovec 9 raste, Gjilan 8 raste, Viti 7 raste, Deçan 5 raste, Prizren 5 raste, Drenas 4 raste, Obiliq 4 raste, Suharekë 4 raste, Dragash 3 raste, Istog 3 raste, Kamenicë 3 raste, Klinë 2 raste dhe me nga një rast komunat Ferizaj, Malishevë dhe Skenderaj.

Fituesi i madh i zgjedhjeve legjislative të 14 shkurtit në Kosovë, Albin Kurti detajon për gazetën e njohur “Le Temps” se si synon të transformojë vendin e tij, ndërkohë që u bën thirrje kosovarëve që jetojnë në Zvicër dhe në Europë.

Dy përparësitë e Albin Kurtit, udhëheqësit të partisë së majtë ”Vetëvendosja”, janë të qarta: të luftojë korrupsionin dhe të angazhohet me pakicën serbe në Kosovë.

Një ditë pas fitores së tij të madhe në zgjedhjet legjislative të së dielës, ai i dha këtë intervistë për gazetarët e ”Le Temps” Jean-Arnault Dérens dhe Laurent Geslin:

Le Temps: Ju keni qenë kryeministër për 50 ditë, në fillim të vitit 2020. Çfarë mësimesh keni nxjerrë nga kjo përvojë e shkurtër, ndërsa ktheheni sërish në këtë zyrë?

A.K: Ne kemi dy përparësi, punën dhe drejtësinë. Kosova është shkatërruar nga papunësia dhe korrupsioni. Ne kemi nevojë për investime, por asgjë nuk mund të ndodhë pa një luftë të vendosur kundër korrupsionit. Kur isha kryeministër, nisa operacione për verifikimin e administrates së lartë. Tani do ta rifillojmë këtë punë, si edhe do të kalojmë ligjin antimafia. Sidoqoftë, gjatë kohës që isha në detyrë, zbulova një fakt shumë inkurajues: korrupsioni është përqendruar në majën e shtetit, nuk është ndërfutur në të gjithë shoqërinë, ndryshe nga vendet e tjera në rajon. Kjo është edhe arsyeja pse njerëzit votuan për ndryshimin. Ne duam t’i japim fund një regjimi të vjetër ku elitat e korruptuara përqendrojnë pasurinë.

Le Temps: Gjatë fushatës, ju e denoncuat shumë këtë “regjim të vjetër”. Çfarë dhe cili është?

A.K: Të gjitha partitë që kanë ardhur në pushtet që nga viti 1999.

Le Temps: Do të mbështeteni te diaspora për të rimëkëmbur ekonominë e Kosovës?

A.K: Një e treta e qytetarëve të Kosovës jetojnë jashtë, veçanërisht në Gjermani ose Zvicër. Vendi merr mbi 850 milionë euro në vit nga diaspora përmes transfertave bankare dhe kjo shumë po rritet çdo vit. Duhen përmendur këtu edhe paratë që hyjnë në vend në formë likujditeti që nuk përllogariten, si edhe shumat e shpenzuara nga ata që kthehen në Kosovë për të bërë pushime ose për t’u martuar. Të marra së bashku, paratë e diasporës përfaqësojnë 1,5 miliardë euro në vit ose 60% të buxhetit të përgjithshëm të shtetit. Kosova funksionon si një shtet i Gjirit Persik, vetëm se ne nuk kemi naftë. ”Nafta” jonë është diaspora.

Le Temps: Këto para mbështesin konsumin, por ka 20 vjet që flitet për kanalizimin e tyre drejt investimeve produktive. Si do të kalohet në veprim?

A.K: Ne duam që këto para të jenë të dobishme për vendin, që të mos humbasin për një ekonomi mbijetese. Drejtuesit e Kosovës shpesh e kanë parë diasporën si një burim parash, por ne duam t’i shohim kosovarët jashtë vendit si investitorë, të cilët mund të presin kthime financiare. Sipërmarrësit e diasporës nuk duan domosdoshmërisht të bëjnë fitime të shpejta, por dëshirojnë të investojnë të sigurt në vendlindjen e tyre. Ata janë patriotë, duan të kthehen, prandaj ne duhet të rivendosim shtetin e së drejtës dhe të rrisim nivelin tërheqës të Kosovës. Ne, gjithashtu, duam të bindim studentët tanë, shkencëtarët tanë të kthehen në vend. Ka shumë kosovarë me arsim të lartë, shumë të talentuar që punojnë jashtë vendit. Ne mund të krijojmë një shërbim civil gjashtëmujor për diasporën, kështu të rinjtë do të mund të vijnë të punojnë vullnetarisht në institucione publike, në universitete, gjë që do të ishte e dobishme për të gjithë.

Le Temps: Bashkimi Europian këmbëngul në rinisjen e dialogut me Beogradin, por ju keni thënë se kjo çështje është e gjashta apo e shtata e përparësive tuaja.

A.K: Kjo çështje renditet e gjashta ose e shtata mes përparësive të qytetarëve. Të gjitha sondazhet tregojnë se shqetësimet e tyre kryesore janë punësimi, ekonomia, drejtësia … Sidoqoftë, unë jam i gatshëm të bëj një kompromis për ta vendosur këtë dialogun të tretin ose të katërtin e përparësive të mia! BE dhe Ballkani janë shumë të rëndësishme për njëri-tjetrin, por më shumë sesa një treg të përbashkët, ne kemi nevojë për investime. Europa Juglindore po përjeton largim të trurit dhe BE duhet të na ndihmojë të ndalojmë këtë hemorragji. Vendet e Ballkanit Perëndimor do të integrohen një ditë dhe mendoj se duhet të jenë të gjitha në të njëjtën kohë. Nëse një prej këtyre shteteve hyn në BE para të tjerëve, ne përsëri do të kemi probleme, siç është rasti midis Bullgarisë dhe Maqedonisë së Veriut.

Integrimi nuk do të ndodhë në një të ardhme të afërt, por BE duhet të na japë një afat, në mënyrë që qytetarët e rajonit të kenë një shpresë. Ne gjithashtu duhet të rishikojmë procesin e Berlinit për ta shndërruar atë në një Plan të vërtetë Marshall, me theks në demokratizimin, shtetin e së drejtës dhe arsimimin e brezit të ti. Ish-presidenti Trump pëlqente “faktet dhe interesat” dhe ne duhet t’i shtojmë kësaj “vlerat dhe parimet”. Shpresoj që Brukseli dhe Uashingtoni të jenë në të njëjtën gjatësi vale për marrëdhëniet mes Kosovës dhe Serbisë, ashtu si edhe Berlini dhe Parisi. Na duhet ky sinkronizim i dyfishtë, ky është çelësi i suksesit.

Le Temps: A mendoni se është braktisur ideja e shkëmbimeve territoriale me Serbinë?

A.K: Shpresoj se po, por nuk kalon as edhe një javë pa një ekspert të ri, pa një ojq të re që të dalë me një plan përrallor që do të zgjidhte të gjitha problemet e Ballkanit me një të rënë të shkopit magjik…

Le Temps: Në vend të dialogut me Beogradin, ju kërkoni t’i jepni rëndësi “dialogun të brendshëm” me serbët në Kosovë. Çfarë do të thotë kjo?

A.K: Unë dua të angazhohem në një dialog të orientuar drejt zhvillimit me serbët e Kosovës. Të gjithë duhet të trajtohen njësoj dhe me respekt, por ne duhet t’i japim fund formulave si “një dialog për pajtimin” ose “një dialog historik”. Pse të mos bashkojmë fermerët shqiptarë dhe serbë dhe të flasim për farërat, plehrat, makineritë, prodhimin apo çmimin e karburanteve? Le të fillojmë duke bërë diçka, në vend që të përsërisim të njëjtat pyetje. Sa i përket dialogut me Serbinë, ai duhet të bëhet për të mirën e njerëzve. Deri më tani, kishte të bënte me atë se çka përfitoi Vuçiç, çfarë përfitoi Thaçi… Drejtuesit autokratë i bënin takimet e tyre pas dyerve të mbyllura, në fshehtësi të plotë.

Le Temps: Prej një kohe të gjatë ju keni mbrojtur të drejtën për të ribashkuar Kosovën me Shqipërinë. A është ende e rëndësishme kjo ide sot?

A.K: Kur Kosova u shpall e pavarur, kushtetutën e saj e shkruan të tjerët, dhe kjo kushtetutë përcakton se vendi nuk ka të drejtë të bashkohet lirisht me vendet e tjera. Sovraniteti ynë është i kufizuar. Kur ne të jemi vërtet të pavarur, ne gjithashtu do të kemi të drejtën të heqim dorë nga kjo pavarësi, për shembull të bashkohemi në një federatë… Sidoqoftë, gjëja thelbësore është respektimi i procedurave demokratike dhe ne kurrë nuk do të jemi në zanafillën e një lufte të re!

Në Kosovë po shënohet 13 vjetori i pavarësisë me parlament të shpërndarë dhe me president e kryeministër në detyrë. Urimet vijnë nga liderë e politikanë si nga BE edhe SHBA.

13 vjetori i pavarësisë e gjen Kosovën me parlament të shpërndarë dhe me president e kryeministër në detyrë, një rast ky i paprecedent dhe i pandodhur në 13 vjet shtet të Kosovës. Megjithatë, tre ditë më parë u mbajtën zgjedhjet e jashtëzakonshme parlamentare dhe ka një parti fituese, lëvizja Vetëvendosja e udhëhequr nga Albin Kurti, e cila fitoi me një shumicë të thellë prej rreth 48%. 13 vjet pas shpalljes së pavarësisë, në Kosovë nuk gjendet drejtuesi kryesor i ish- UÇK-së, Hashim Thaҫi që me 17 shkurt 2008 lexoi deklaratën e pavarësisë. Ish- krerët e UÇK-së, Hashim Thaҫi, Kadri Veseli, Jakup Krasniqi dhe Rexhep Selimi ndodhen në Hagë duke u gjykuar si të dyshuar për krime lufte në Gjykatën Speciale e themeluar nga vet Kosova por me seli në Hagë.

Sfida të mëdha për fituesit

Dy udhëheqësit e rinj politikë të Kosovës që në zgjedhjet e 14 shkurtit dolën të parët, Albin Kurti që pretendon postin e kryeministrit dhe Vjosa Osmani, që synon presidencën, i presin vështirësi të mëdha që në ditët e para të themelimit të institucioneve të reja. Që nga ulja e papunësisë, lufta kundër korrupsionit, reforma në drejtësi e deri tek pika me e nxehtë, dialogu me Serbinë. Lidhur me dialogun me Serbinë, lideri i Vetëvendosjes Albin Kurti, ka thënë se nuk e ka prioritet, por, sipas Bashkimit Evropian dhe SHBA Kosova duhet ta ketë prioritet dialogun.

Urimet nga BE e SHBA

Në letrën e urimit për Kosovën në 13 vjetorin e pavarësisë, presidenti amerikan Joe Biden, thotë se “mezi presin që të punojnë me Qeverinë e ardhshme për ta çuar Kosovën përpara në rrugën e saj evropiane”. “Ka shumë punë për të bërë, përfshirë marrëveshjen gjithëpërfshirëse të normalizimit të marrëdhënieve me Serbinë që në qendër e ka njohjen e ndërsjellë, me të cilën forcohet sundimi i ligjit, përballimi i pandemisë globale COVID-19 dhe nxitja e rritjes ekonomike që mundëson një të ardhme të prosperuar për të gjithë qytetarët e Kosovës”, thuhet në letrën e Biden, i cili siҫ shprehet në letër për të personalisht “Kosova vazhdon të mbajë një vend të veçantë për familjen Biden”.

Edhe raportuesja për Kosovën në Parlamentin Evropian, Viola von Cramon, shkruan se “Kosova dëshiron të shkojë përpara në rrugën e saj evropiane dhe se ka shumë punë për të bërë”. “Brenda asaj, ju duhet të luftoni korrupsionin dhe të ndihmoni ekonominë, por dialogu me Beogradin është diçka që nuk mund ta neglizhoni. Pa një marrëveshje me Serbinë nuk ka perspektivë për integrimin në BE”, shkroi Cramon.

Edhe raportuesi për Kosovën në Asamblenë Parlamentare të Këshillit të Evropës, deputeti gjerman Peter Beyer, duke uruar Kosovën në 13 vjetorin e pavarësisë, shkruan se BE duhet të mbajë premtimin që Kosovës t’ia japë liberalizimin e vizave. “Siç ka thënë ambasadori prof. Wolfgang Ischinger: Në rregull, ta bëjmë tani! Liberalizimi i vizave për të gjithë qytetarët e Kosovës është një premtim i pa përmbushur i BE-së, është në pyetje kredibiliteti i BE-së. Me këtë unë pajtohem plotësisht dhe e përforcoj duke thënë: Jo më justifikime të padrejta. Liberalizim të vizave tani!”, shkroi Bayer në facebook.

Me ceremoni të ndyshme gjithandej vendit po shënohet 13 vjetori i shpalljes së pavarësisë së Kosovës. Ushtruesja e detyrës së presidentes Vjosa Osmani, tha se “liria dhe pavarësia s’janë aktet e vetme të bërjes së shtetit, kemi rrugë të gjatë për të forcuar pozicionin tonë e për ta bërë Kosovën strehë të sigurt për çdo qytetar”. “Sot më shumë se kurrë duhet të tregojmë që t’i japim shtetit tonë drejtimin e duhur. Sot vendit tonë i duhet solidaritet, unitet e kohezion institucional sepse projekti për shtetin sovran të pavarur e demokratik vazhdon”, tha Vjosa Osmani duke shtuar se “Kosova synon integrimin në Bashkimin Evropian e që shpejt të jetë pjesë e NATO-s”.

Lideri i lëvizjes Vetëvendosja Albin Kurti nga ana e tij, thotë se ai do të punojë shumë “për të nderuar ata që dhanë gjithçka që të mund të jetojmë të lirë”. “Krenar për trashëgiminë tonë, të etur për sukses dhe të ndërgjegjshëm për sfidat që na presin, ne festojmë sot 13 vjetorin e Pavarësisë sonë. Ne do të punojmë shumë për të nderuar ata që dhanë gjithçka që të mund të jetojmë të lirë”, shkroi Kurti në Twitter. Ndonëse 13 vjetori i pavarësisë Kosovën e gjen pa institucione plotësisht funksionale, ato pritet të themelohen shpejt, pas zgjedhjeve të 14 shkurtit dhe certifikimit të rezultatit. Vetëvendosja si partia e parë dhe lideri i saj Albin Kurti, synon ta formojë qeverinë dhe të zgjidhet kryeministër, ndërsa Vjosa Osmani synon postin e presidentës.

dw