“Çdo fëmijë ka lindur që të gëzoje”, tha Prof. Dr. Anila Godo, shefe e shërbimit të Onkohematologjisë në pediatri.

Tre pacientë të vegjël të shërbimit të Onkohematologjisë në pediatri, për katër ditë kanë udhëtuar drejt Qytetit Bilund të Danimarkës, për t’u argëtuar bashkë me familjarët e tyre në Parkun e Lodrave Legoland.

Kjo eksperiencë e paharruar e tre vogëlushëve  u mundësua nga Aeroporti Nënë Tereza,  i cili për të inauguruar destinacionin më të ri atë të Biluntit zgjodhi këtë mënyrë duke gëzuar tre vogëlushët, diagnozat e të cilëve janë leucemi, hemofili dhe talasemi.

Por ky udhëtim nuk është thjesht zbavitës për fëmijët , pasi gëzimi i tyre, shpjegon prof. Godo, ndihmon në terapitë e tyre mjekësore.

Duke falënderuar Aeroportin Nënë Tereza, ajo fton biznese të tjera   për ta vijuar këtë nismë.

Burime nga Aeroporti Nene Tereza konfirmojnë  se kjo nuk  është eksperienca e parë dhe e fundit pasi  do të vijojnë me pacientë të tjerë të vegjël edhe në pasione të tjera.

Top Channel

Në raport me vendet e tjera të Ballkanit Perëndimor Shqipëria rezulton të jetë vendi më i prekur nga ndryshimet klimatike. Me ndihmën e GIZ synohet që krijimi i stacioneve të monitorimit ta ndryshojnë për mirë situatën.

Ballkani Perëndimor (BP) vlerësohet si zonë e nxehtë e biodiversitetit në Evropë me një një larmi të madhe eko-sistemesh që nuk mund t‘u shpëtojnë dot pasojave të ndryshimeve klimatike. “Përmbytjet, erozioni, zjarret, valët e të nxehtit, thatësirat e gjata janë çdo ditë e më të shpeshta në vendet e BP përfshirë edhe Shqipërinë. Vendet në BP nuk po ia dalin dot mbanë të menaxhojnë këto ndryshime për shkak të ekonomive të tyre të brishta,” thotë për DW, Ornela Çuçi, zv/ministre e Turizmit dhe Mjedisit.

Në raport me vendet e tjera të BP, Shqipëria rezulton të jetë vendi më i prekur nga ndryshimet klimatike, thekson për DW, Merita Meksi, eksperte për klimën, zv/menazhere e programeve të klimës të GIZ (Deutsche Gesellschaft für Internationale Zusammenarbeit – Shoqata Gjermane për Bashkëpunim Ndërkombëtar).

“Në Europë Shqipëria renditet si vendi që ka rrezikun më të lartë nga fatkeqësitë natyrore, që janë duke u intensifikuar dhe rritur në frekuencë. Në periudhën 1980 dhe 2010 në Shqipëri kanë ndodhur 23 fatkeqësi të mëdha: nëntë përmbytje, katër tërmete dhe tri ngjarje ekstreme të temperaturave, që prekën rreth 4 milionë njerëz. Vlerësohet se mesatarisht 50.000 shqiptarë preken nga përmbyjet çdo vit dhe ndikimi negativ vjetor në Prodhimin e Brendshëm Brutto, (PBB) është rreth 200 milionë dollarë, ” thotë për DW, ekspertja e GIZ, Merita Meksi.

GIZ dhe ndryshimet klimatie në bazenin e Drinit

Një projekt novator në llojin e vet për Shqipërinë dhe BP, i mbështetur nga GIZ, është në përfundim e sipër. Në sajë të zbatimit të tij gjatë vitit të kaluar janë instaluar stacione monitorimi për përmbytjet në´zonat që ndodhen në breg të lumit Drin, të cilat kanë vuajtur për tri dekada nga përmbytjet kronike. Qindra shtëpi dhe hektarë tokë të përmbytura çdo vit me humbje ekonomike të pallogaritshme.

Stacionet e monitorimit synojnë ta ndryshojnë për mirë situatën. „Këto stacione mundësojnë parashikimin e përmbytjeve, paralajmërimin e hershëm dhe vizualizojnë hartën e përmbytjeve. Kësisoj, institucionet kompetente kanë mundësi që të përgatiten në kohë, të koordinohen, të reagojnë dhe të njoftojnë publikun me qëllim minimizimin e rrezikut nga përmbytjet në bazenin e lumit Drin,” thotë për DW Merita Meksi.

Shqipëria pa një shërbim kombëtar hidrometereologjik

Për një vend si Shqipëria me rrezik të lartë ndaj fatkeqësive natyrore për shkak të ndryshimeve klimatike, duket e pabesueshme mungesa e një shërbimi kombëtar modern hidrometereologjik, të aftë të paralajmërojë katastrofat natyrore para se ato të ndodhin.

Shqipëria rezulton të jetë i vetmi vend të rajon dhe në Europë pa një shërbim të tillë. Situata pritet të ndryshojë këtë vit. “GIZ, i mbështetur nga Ministria Federale për Bashkëpunim Ekonomik dhe Zhvillim, (BMZ) po punon për realizimin e projektit të parë në rajon për të ngritur shërbimin kombëtar hidrometeorologjik 24 orë në 7 ditë të javës. Ky shërbim do të përdorë teknologjinë moderne dhe inovacionin për ta bërë infomacionin e tij të aksesueshëm për të gjithë palët e interesuara”, thotë për DW, Merita Meksi. Ajo thekson që ky projekt kërkon një financim prej 40 milion euro, për të cilin do të kontribojë qeveria gjermane, ajo shqiptare, donatorë të tjerë dhe Fondi Global për Ndryshimet Klimatike, (Global Climate Fund, GCF) GCF-i pranishëm në BP.

Zv/ministrja e Turizmit dhe Mjedisit, Ornela Çuçi, anëtare e Bordit të GCF dhe njëherazi përfaqësuese e disa vendeve të ECCA, (Eastern European and Central Asia) në këtë Bord, thotë për DW, se “ky fond synon të ndërhyjë edhe në BP në mënyrë direkte dhe qasje konkrete, gjithëpërfshirëse për zvogëlimin e emetimit të gazrave me efekt sere dhe zbutjen e riskut nga efektet e ndryshimeve klimatike”. “Ballkani Perëndimor është rajoni më pak i financuar globalisht nga fondet e mjedisit dhe klimës pasi ka marrë vetëm 4 përqind të fondeve globale deri në fund të vitit 2020 edhe pse përcaktohet si një nga rajonet me rrezikun më të madh nga ndryshimet klimatike”, thotë për DW zv/inistrja e Turizmit dhe Mjedisit, Ornela Çuçi.

Në fund të vitit të kaluar GCF arriti të ketë burime financiare prej 10 miliardë dollarësh amerikanë dhe të mbështesë gjatë këij viti 190 projekte në 127 vende të botës. „Shqipëria, Mali i Zi dhe Maqedonia e Veriut marrin pjesë në një nismë rajonale dhe globale të financuar nga GCF, që mbështet me asistencë teknike bizneset për të operuar sipas standarteve të energjisë së pastër dhe të teknologjive të rinovueshme” thekson Ornela Çuçi.

Ajo thotë që edhe Bashkia e Tiranës është një prej përfituesve nga GCF përmes projektit “Green Cities ” si edhe bashki të tjera në Shqipëri po mbështeten me asistencë teknike nga GCF. Ky fond po mbështet financiarisht edhe menaxhimin e integruar te burimeve ujore përmes Austrian Development Fund.

Lidershipi i grave në përshtatjen me ndryshimet klimatike

Me nismën e zv/ministres së Turizmit dhe Mjedisit, Ornela Çuçi në Bordin e GCF kohët e fundit u krijua një grup jo formal i grave, anëtare të Bordit të GCF. “Në tryezën e Bordit të GCF tani paraqiten edhe argumenta që i shërbejnë grave dhe vajzave, pra gjysmës së globit. Kontributi i grave dhe vajzave në axhendën e zbutjes së ndryshimeve klimatike është i domosdoshëm. Barazia gjinore dhe lidershipi i grave në ndryshimet klimatike janë të një rëndësie kyçe në përpjekjet globale në përputhje me Angazhimet Ndërkombëtare të OKB-së dhe Axhendën 2030”, thekson zv/ministrja e Turizmit dhe Mjedisit.

Gratë rezultojnë të jenë më të prekurat nga ndryshimet klimatike, fatkeqësitë natyrore dhe degradimet mjedisore, zbutja e të cilave kërkon pjesëmarrjen aktive të grave. Shqipëria ratifikoi Marrëveshjen e Parisit më 14 Korrik 2016, duke hyrë në epokën e re të procesit të politikave ndërkombëtare për klimën. Marrëveshja e Parisit përcaktoi një kornizë globale për të shmangur ndryshimet e rrezikshme klimatike duke kufizuar ngrohjen globale nën 2°C dhe bërë përpjekje për ta kufizuar ulur në 1.5°C. Marrëveshja synon të forcojë aftësinë e vendeve për t’u marrë me ndikimet e ndryshimeve klimatike dhe për t’i mbështetur ato në përpjekjet e tyre.

dw

“Kriza e çmimeve në tregjet botërore po godet gjithnjë e më shumë xhepat e qytetarëve shqiptarëve. Shtrenjtimi i fortë veçanërisht i produkteve ushqimore dhe karburanteve ka bërë që inflacioni në Prill të arrijë në 6.2%, norma më e lartë e shënuar në dy dekada.”

Edhe pse ndikimin më të fortë në inflacion e dha transporti me një rritje prej 22.5% dhe mallrat e shportës , gjatë prillit u shtrenjtua gjithçka duke rritur ndjeshëm kostot e jetesës, pasi për të njëjtat sasi malli kanë paguar shumë më shumë se krahasuar me një vit më parë.

Brenda grupit të ushqimeve që u rritën me 10% për të cilat shqiptarët shpenzojnë mbi 40% të buxheteve të tyre, rritja më e madhe e çmimeve është vërejtur te vaji.

Aktualisht, një litër vaj shitet për 381 lekë me vendimin e ri të bordit të transparencës, një nga produktet më të shtrenjta të shportës bazë. Më tej janë rritur edhe kostot për blerjen e produkteve të bulmetit, mishit dhe ato për fruta perimet.

Me shpejtësi gjatë prillit janë shtrenjtuar edhe çmimet për qiratë e shtëpive, energjinë e ujin, ndërsa edhe për veshjet qytetarët kanë paguar më shumë para për blerjen e tyre.

Mobilimi dhe arredimi i shtëpive po kushton gjithnjë e më shumë, pasi trendi rritës i çmimeve vijoi edhe përgjatë prillit për këtë grup si pasojë e rritjes së kostove të transportit dhe energjisë elektrike.

Presionet që vijnë nga situata e krijuar nga lufta në Ukrainë po e bëjnë rritjen e çmimeve të papërballueshme për konsumatorët dhe shqetësues është fakti se projeksionet flasin që do të vazhdojnë të qëndrojnë të larta për një periudhë afatgjatë, duke rrezikuar tkurrjen e konsumit.

Me këtë normë, inflacioni është 2 herë më i lartë se objektivi i Bankës së Shqipërisë prej 3%, për të cilin vetë institucioni parashikon që të kthehet në normalitet të paktën në pjesën e parë të vitit 2024.

Top Channel