Paralajmërime për armë bërthamore për Perëndimin, zemërim për debatin gjerman për “Taurus”: në një intervistë para zgjedhjeve, presidenti rus përsërit shumë gjëra që dihen. Të rejat kanë të bëjnë me kufirin me Finlandën.

 

Citimet e para u bënë faqet e para të lajmeve televizive në mëngjes, ndërsa intervista me Vladimir Putin nuk u transmetua deri në orën 10 të mëngjesit me orën lokale. Një kohë e çuditshme transmetimi, pa çështje të diskutueshme që mund të kishin ngritur tension, por televizioni shtetëror dhe agjencia gjithashtu publike e lajmeve RIA Novosti i kishin njoftuar tashmë mesazhet që do të bëheshin publike – në Rusi dhe jashtë.

Siç është e zakonshme tani, Putini paralajmëroi Perëndimin për luftë bërthamore dhe në veçanti SHBA kundër testeve bërthamore.

Në Ukrainë nuk ka ekzistuar kurrë synimi për të përdorur armë të shkatërrimit në masë, tha Putini.

Negociata? Jo sipas dëshirës

Gjatë gjithë intervistës, e cila zgjati pak më shumë se një orë e gjysmë, nuk kishte asnjë qasje të re për Ukrainën, edhe pse Rusia prej më shumë se dy vjetësh zhvillon atë që e quaj “operacion ushtarak special” kundër fqinjës.

Rusia është e gatshme të negociojë, tha Putini – megjithatë “jo në bazë të ‘dëshirave’ që i lindin njeriut pas marrjes së drogave psikotrope, por në bazë të realiteteve që, siç thuhet, janë vendosur në terren”.

Gjë që do të thotë thjesht se territoret ukrainase të pushtuara ilegalisht të përfshira në Rusi nuk do të jenë objekt negociatash, sipas Putinit.

Moskuptim për anëtarësimin në NATO

Fakti që frika nga një fqinj agresiv i shtyu Finlandën dhe Suedinë të anëtarësoheshin në NATO – për presidentin rus ishte një veprim pa kuptim: Rusia kishte “në parim marrëdhënie ideale me Finlandën”. “Ne nuk kishim trupa atje, por do të kemi tani. Nuk kishte asnjë sistem shkatërrimi atje, por do të ketë tani.”

Dhe sigurisht, një mesazh iu dërgua edhe politikës dhe shoqërisë gjermane – në lidhje me debatin mbi raketën “Taurus” dhe dërgimin e mundshëm të saj në Ukrainë. Opozita gjermane është këtu edhe më agresive se qeveria, tha Putini e shtoi: “Ata fantazojnë, ata zbaviten së pari. Dhe përpiqen të na frikësojnë. Të shohim se për çfarë do të bien dakord. Ne po e ndjekim këtë nga afër. Raketa britanike dhe amerikane në fakt përdoren”. Situatën në fushën e betejës kjo nuk do ta ndryshojë.

Mandat i ri i sigurtë nga maji

Dy ditë para fillimit të zgjedhjeve presidenciale, Vladimir Putin shfrytëzoi rastin për interpretuar sulmet masive ukrainase me dronë dje dhe sot, si dhe sulmin ndaj lokaliteteve ruse afër kufirit ukrainas nga formacionet vullnetare që veprojnë nga territori ukrainas: “Qëllimi kryesor është padyshim, që nëse nuk arrijnë t’i bëjnë të dështojë plotësisht zgjedhjet presidenciale në Rusi, të paktën të prishin disi procesin e shprehjes normale të vullnetit të qytetarëve”, deklaroi ai.

Gjatë intervistës prej një orë e gjysmë, Putini nuk ofroi ndonjë përfundim që nuk e kishte paraqitur tashmë gjatë fjalimit të tij dy orësh për gjendjen e kombit, disa ditë më parë.

Kjo ndoshta është intervista e fundit e hollësishme e Putinit përpara rizgjedhjes së tij, e konsideruar e sigurt, këtë fundjavë – përpara se ai të kthehet zyrtarisht në pushtet në fillim të majit, për gjashtë vjet të tjerë.

F.Aischmann/ARD Moskë

Presidenti amerikan Joe Biden siguroi të martën në mbrëmje emërimin e tij si kandidat i demokratëve, dhe ish presidenti Donald Trump siguroi delegatët e nevojshëm për emërimin republikan, duke hapur rrugën për një përsëritje të garës së vitit 2020.

 

Të dy fituan në zgjedhjet paraprake në Xhorxhia, Misisipi dhe në Uashington, duke siguruar shumicën e mjaftueshme të delegatëve në partitë e tyre.

Presidenti Biden hyri në zgjedhjet e së martës me 102 delegatë më pak nga 1,968 që i nevojiteshin për t’u bërë zyrtarisht kandidati demokrat, ndërsa ish presidenti Trump kishte 137 delegatë më pak nga 1,215 që i nevojiteshin për të fituar emërimin republikan.

Presidenti Biden është përballur vetëm me opozitë ‘formale” e për t’u bërë kandidat i demokratëve.

Ndërkohë, ish presidenti Trump fitoi përballë disa republikanëve në zgjedhjet paraprake, duke përfshirë ish ambasadoren amerikane në Kombet e Bashkuara, Nikki Haley dhe guvernatorin e Floridës, Ron DeSantis. Kandidatë të tjerë, përfshirë ish zëvendëspresidentin e tij, Mike Pence, u tërhoqën nga gara muaj më parë, për shkak të mungesës së mbështetjes së votuesve përballë zotit Trump që ka një mbështetje të madhe të votuesve republikanë.

Edhe pa emërimet zyrtare të partive, të dy kandidatët janë në fushatë tetë muaj përpara zgjedhjeve, duke goditur njëri-tjetrin sa herë që kanë mundësi.

Në fjalimin e tij për gjendjen e kombit javën e kaluar, presidenti Biden përçmoi “paraardhësin” 13 herë, duke mos përmendur kurrë zotin Trump me emër, por duke përshkruar një pikëpamje “të së keqes” mbi një mandat të dytë presidencial të zotit Trump.

Ish presidenti Trump tallet me moshën e presidentit Biden, 81 vjeç, ndonëse është vetëm katër vjet më i ri.

“Unë besoj se ai do të jetë kandidat”, tha zoti Trump për presidentin Biden në rrjetin CNBC të hënën. “Unë jam kundërshtari i tij i vetëm përveç jetës, vetë jetës”.

Shumica e anketave të hershme kombëtare tregojnë se zoti Trump ka një përparësi të lehtë ndaj zotit Biden në disa prej shteteve kryesore të fushëbetejës politike, që ka të ngjarë të përcaktojnë rezultatin kombëtar në votimet e 5 nëntorit. Por zoti Trump po përballet gjithashtu me katër padi penale të pashembullta që përfshijnë 91 akuza, ndërsa një proces gjyqësor pritet të fillojë me 25 mars.

Nuk dihet nëse ndonjë nga rastet e tjera do të hidhet në gjyq para zgjedhjeve, por disa votues u kanë thënë anketuesve se nuk do të votojnë për zotin Trump nëse ai dënohet për ndonjë nga akuzat.

Shtetet e Bashkuara nuk e zgjedhin presidentin me votën popullore, por në zgjedhjet shtet pas shteti në secilin prej 50 shteteve dhe në votimet pasuese në Kolegjin Zgjedhor.

Me disa përjashtime, fituesi i votave në secilin shtet fiton të gjitha votat e Kolegjit Zgjedhor, ndërsa shtetet më të mëdha kanë më shumë vota elektorale dhe ushtrojnë ndikim më të madh në rezultatin kombëtar.

Ndonëse të dy kanë siguruar delegatët për të qenë të emëruarit e partive, emërimet nuk do të jenë zyrtare derisa secila parti të mbajë kuvendin e saj. Republikanët pritet të mbajnë konventën e tyre në korrik, ndërsa demokratët në muajin gusht.

voa

Presidenti Vladimir Putin tha se Rusia është e gatshme të përdorë armët bërthamore, nëse ekziston një kërcënim për shtetësinë, sovranitetin ose pavarësinë e saj, duke shfaqur shpresën se Shtetet e Bashkuara do të përmbahen nga veprimet që mund të shkaktojnë një konflikt bërthamor.

 

Deklarata e presidentit Putin ishte një tjetër paralajmërim i hapur për perëndimin para zgjedhjeve presidenciale të kësaj jave në të cilat ai është i sigurt se do të fitojë një mandat tjetër gjashtëvjeçar.

Në një intervistë me televizionin shtetëror rus të publikuar herët të mërkurën, presidenti Putin e përshkroi presidentin amerikan Joe Biden si një politikan veteran që i kupton plotësisht rreziqet e mundshme të përshkallëzimit dhe tha se ai nuk mendon që bota po shkon drejt një lufte bërthamore.

Në të njëjtën kohë, ai theksoi se forcat bërthamore të Rusisë janë në gatishmëri të plotë dhe “nga pikëpamja ushtarako-teknike, ne jemi të përgatitur”.

Presidenti Putin tha se në përputhje me doktrinën e sigurisë, Moska është e gatshme të përdorë armët bërthamore në rast të një kërcënimi për “ekzistencën e shtetit rus, sovranitetin dhe pavarësinë tonë”.

Udhëheqësi rus e ka përsëritur gatishmërinë e tij për të përdorur armët bërthamore që nga fillimi i agresionit në Ukrainë në shkurt të vitit 2022. Kërcënimi i tillë më i fundit u bë gjatë fjalimit të tij mbi gjendjen e kombit muajin e kaluar, kur ai paralajmëroi perëndimin se thellimi i përfshirjes në luftimet në Ukrainë do të rrezikonte një luftë bërthamore.

I pyetur gjatë intervistës nëse ka menduar ndonjëherë mbi përdorimin e armëve bërthamore në fushën e betejës në Ukrainë, Putini u përgjigj se nuk ka pasur nevojë për këtë.

Ai shprehu gjithashtu besimin se Moska do t’i arrijë qëllimet e saj në Ukrainë dhe mbajti të hapur derën për bisedime, duke theksuar se Rusia do të mbajë territoret e “fituara” dhe do të kërkojë garanci të forta nga perëndimi.

Presidenti Putin tha se një shtim i sulmet me dronë ukrainas thellë brenda Rusisë kohëve të fundit, është pjesë e përpjekjeve për të dëmtuar zgjedhjet presidenciale tre ditore të vendit, të cilat fillojnë të premten dhe të cilat ai do t’i fitojë me shumicë, duke u mbështetur në kontrollin e rreptë mbi skenën politike të Rusisë që ka vendosur gjatë qeverisjes së tij 24-vjeçare.

Autoritetet ruse raportuan një tjetër sulm të madh nga dronët ukrainas herët të mërkurën. Ministria e Mbrojtjes tha se mbrojtja ajrore rrëzoi 58 dronë në gjashtë rajone. Një nga dronët goditi një rafineri nafte në rajonin Ryazan, duke plagosur të paktën dy persona dhe duke shkaktuar një zjarr. Një tjetër dron është rrëzuar teksa po i afrohej një rafinerie pranë Shën Petersburgut.

Ukraina, ndërkohë, raportoi më shumë sulme ruse herët të mërkurën.

Një sulm rus vrau dy persona dhe plagosi pesë të tjerë në qytetin Myrnohrad në rajonin lindor të Donetskut, rreth 30 kilometra larg vijës së frontit, sipas guvernatorit Vadym Filashkin. Ekipet e shpëtimit vendas arritën të nxirrnin një vajzë 13-vjeçare nga rrënojat e një pallati që u godit nga një raketë ruse.

Një ndërtesë pesëkatëshe në qytetin verior Sumy, u godit nga një dron i hedhur nga Rusia gjatë natës dhe 10 persona u shpëtuan nga rrënojat, duke përfshirë tetë të plagosur, sipas administratës rajonale.

Në qytetin e lindjes së presidentit Volodymyr Zelensky në rajonin qendror Dnipropetrovsk, numri i të vrarëve nga një sulm me raketa ruse natën e kaluar arriti në katër, tha guvernatori Serhii Lysak. Ai tha se 43 persona u plagosën në Kryvyi Rih, duke përfshirë 12 fëmijë.

“Çdo ditë qytetet dhe fshatrat tona pësojnë sulme të ngjashme. Çdo ditë Ukraina humbet njerëz për shkak të së keqes ruse”, tha presidenti Zelensky.

voa

Në fund të javës së kaluar, menaxherët në Uzinën e Përpunimit të Gazit Natyror në Astrakhan të Rusisë u dorëzuan punëtorëve fletëpalosje me udhëzimet se si të votojnë në zgjedhjet presidenciale të Rusisë, që do të mbahen nga data 15 deri më 17 mars, raporton kanali në Telegram, Ostorozhno Novosti.

 

Sipas udhëzimeve, 5.000 punëtorëve të uzinës do t’u dërgohen mesazhe me tekst, që përmbajnë një vegëz që duhet ta hapin, kur të jenë në qendrat e votimit.

Vegëza do ta lokalizojë telefonin e tyre dhe, në këtë mënyrë, do t’i raportojë menaxhmentit të kompanisë që ata votuan.

Punëtorët që nuk e marrin mesazhin, duhet të skanojnë një kod QR, të paraqitur nga një “person” në qendrën e votimit.

Më 7 mars, grupi i pavarur i monitorimit të zgjedhjeve, Golos, i cili është i ndaluar në Rusi, raportoi se partia në pushtet, Rusia e Bashkuar, ka krijuar një projekt të quajtur GEO-SMS, që synon “të kontrollojë pjesëmarrjen e votuesve të sektorit shtetëror” në zgjedhje, përfshirë këtu punonjësit mjekësorë, mësuesit dhe punonjësit në ndërmarrjet shtetërore.

Përdorimi i softuerit për lokacionin, me qëllim të rritjes së pjesëmarrjes, është një risi në zgjedhjet e këtij viti, në të cilat Vladimir Putin pritet ta sigurojë mandatin e pestë si president.

Ai figuron dukshëm në një dokument që rrodhi e që u postua në Telegram nga politikania e opozitës, Olga Sidelnikova, muajin e kaluar.

Sidelnikova ishte kryetare administrative e qarkut Lomonosov të Moskës dhe tani jeton jashtë Rusisë.

Dokumenti duket se është një prezantim i strategjisë zgjedhore të Kremlinit për Udmurtinë – një rajon me një popullsi prej afro 1.5 milion banorësh në pjesën qendrore të Rusisë.

Sidelnikova nuk pranoi të tregonte se si e ka siguruar dokumentin, por tha se e ka origjinalin dhe se nuk ka asnjë dyshim për vërtetësinë e tij.

Dokumenti prej 38 faqesh tregon se “si janë zgjedhjet në Rusi”, tha Sidelnikova, duke shtuar se informacionet që dalin prej gjithë Rusisë, tregojnë se “rrëfimet janë padyshim të njëjta edhe në rajone të tjera”.

Sergei Antonov, konsulent politik nga Udmurtia, që tani jeton jashtë vendit, thotë se është i sigurt se dokumenti që ka Sidelnikova, është i vërtetë dhe shton se të tilla dokumente “janë lëshuar në të gjitha rajonet e Rusisë”.

“Të premten [15 mars], para orës 14:00, të gjithë punonjësit e sektorit shtetëror duhet të dërgojnë në server një mesazh me vendndodhjen e tyre të aktivizuar”, thotë Antonov.

“Kjo është teknologji e re. Për çdo zgjedhje, sistemi përsoset”, shton ai.

“Ngritja e votuesve në këmbë”

Zgjedhjet nën Putinin nuk janë zhvilluar kurrë në mënyrë të drejtë, thonë grupet e monitorimit dhe kritikët e Kremlinit.

Sipas tyre, shteti kontrollon çdo gjë – nga policia dhe gjykatat deri te komisionet zgjedhore, mediat shtetërore dhe qeveritë lokale.

Por, fushata aktuale – e cila po zhvillohet në mes të pushtimit rus të Ukrainës dhe shtypjes shumëvjeçare të disidencës, që e ka margjinalizuar plotësisht opozitën – shihet si procesi më pak konkurrues në gati 25 vjet të Putinit herë si president, herë si kryeministër.

Raportet e mediave dhe komentet e zyrtarëve tregojnë se Kremlini synon të sigurojë 80-85 për qind të votave për Putinin, me një pjesëmarrje prej së paku 70 për qind.

Analistët thonë se Putin dhe administrata e tij duan t’i shfrytëzojnë zgjedhjet për të rritur legjitimitetin e tij.

Sigurimi i një pjesëmarrjeje të lartë ka qenë gjithmonë një “pikë e dobët” për Qeverinë, sipas Sidelnikovës.

“Pavarësisht risive të viteve të fundit, si: eliminimi i monitorimit të pavarur, zgjerimi i votimit online, kontrollimi i komisioneve zgjedhore në të gjitha nivelet, ata kanë ende nevojë për njerëz që dalin në qendrat e votimit”, thotë ajo për Radion Evropa e Lirë.

“Dhe,kontrollimi i pjesëmarrjes nuk është i lehtë. Është pika e tyre e dobët”, thotë Sidelnikova.

Sipas saj, ata kanë nevojë që njerëzit të ngrihen në këmbë dhe të shkojnë në votime.

“Pasi ta sigurojnë pjesëmarrjen, ata mund të nxjerrin çfarëdo rezultati që duan, marrë parasysh se nuk ka monitorim të pavarur dhe se komisionet zgjedhore janë plotësisht të kontrolluara”, thotë Sidelnikova.

Nga provat e brendshme, duket se dokumenti i siguruar nga Sidelnikova, u është paraqitur zyrtarëve në Udmurti jo më vonë se qershori i vitit 2023 – kohë në të cilën planifikimet për fushatën presidenciale kanë qenë në zhvillim e sipër.

Dokumenti i kushton vëmendje të konsiderueshme problemit të rritjes së pjesëmarrjes nga 55% – sa është shifra tipike në Udmurti – në 80%.

Përveç softuerit të vendndodhjes, dokumenti bën thirrje për “mobilizimin” e votuesve edhe përmes zyrave të partisë Rusia e Bashkuar, si dhe përpjekjeve të administratave komunale dhe ligjvënësve lokalë.

Ai i udhëzon administratat komunale që “ta kontrollojnë pjesëmarrjen përmes përfaqësuesve të tyre” në komisionet në vendvotime.

Antonov thotë se Rusia e Bashkuar synon “të rrisë pjesëmarrjen me anë të burimeve administrative, duke mobilizuar punëtorët dhe duke mbajtur gara të ndryshme, ashtu si dhe ngjarje patriotike”.

Megjithatë, shton ai, partia është shpesh e hendikepuar në aftësitë e saj për të realizuar plane të tilla, për shkak të mungesës së përgjithshme të entuziazmit në nivelet e saj më të ulëta.

“Kur bëhet fjalë për realizimin e ideve të tilla, rezulton se në celulat e partisë lokale ka njerëz që, realisht, nuk bëjnë asgjë ose njerëz që u është bërë presion për të qenë atje”, thotë Antonov.

“Pastrimi i projektit”

Dokumenti që ka rrjedhur detajon, gjithashtu, përpjekjet e Kremlinit “për të kontrolluar opinionin publik”, përfshirë edhe përpjekje të mëdha përmes mediave sociale.

Fushata e Putinit, sipas dokumentit, i monitoron vazhdimisht bisedat në mediat sociale dhe grupet e diskutimit, me qëllim të kontrollimit të informacioneve negative dhe diskreditimit të nismave të opozitës.

Dokumenti përfshin pika të tilla si “xhirimi dhe përpilimi i përmbajtjeve të dobishme”, “puna kundër çdo veprimi protestues që lind”, “krijimi dhe shpërndarja e kundërpërmbajtjes” e të tjera.

Ai përfshin edhe “pastrimin e projektit”, që synon ta identifikojë dhe “ta eliminojë shpejt” nga interneti të gjithë “materialin agjitativo-propagandues të opozitës”.

Qeveria ka krijuar gjithashtu “organizata të vetëqeverisjes publike territoriale” – të përbëra nga aktivistë miqësorë ndaj Qeverisë – nga të cilat ka rekrutuar vëzhgues “të pavarur” të zgjedhjeve.

Ata janë “pseudo-monitorues publikë”, thotë Antonov për 4.500 monitoruesit që Qeveria planifikon t’i shpërndajë në rajon.

“Detyrë e tyre është të mos lejojnë asnjë ‘provokim’ apo ‘falsifikim’”, thotë ai.

“Kjo nënkupton se ata gjithmonë do të thonë se nuk ka pasur shkelje”, sipas tij.

Sipas dokumentit, fushata e Putinit në Udmurti udhëhiqet nga kreu rajonal, Aleksandr Brechalov, i cili udhëheq edhe degën rajonale të Rusisë së Bashkuar që nga korriku i vitit 2020.

Shefi i kabinetit të tij, Aleksandr Zhuravlyov, është një nga zëvendësit e tij në fushatë, i ngarkuar me “organizimin”.

Dy zëvendësit e tjerë janë: nënkryetari i Udmurtisë, Roman Yefimov, i ngarkuar me financat, dhe kryetarja e Komisionit Rajonal të Zgjedhjeve të Udmurtisë, Svetlana Palchik, përgjegjëse për koordinimin e punës së qendrave të votimit dhe “mobilizimin e partisë”.

Struktura e fushatës, e përshkruar në dokumentin që ka rrjedhur, “dyfishon de facto strukturën e Qeverisë së Udmurtisë”, thotë Antonov.

“Zgjedhjet në Rusinë e Putinit i janë afruar përsosmërisë së tyre logjike”, shton ai, “dhe do të mbahen sipas modelit të Bashkimit Sovjetik – pa alternativa, me një kandidat të vetëm”.

rel

 

Pentagoni do të dërgojë me shpejtësi armatime me vlerë prej 300 milionë dollarësh në Ukrainë, pasi shqyrtoi kontratat aktuale dhe identifikoi hapësira për të ulur kostot. Shtëpia e Bardhë tha të martën se sidoqoftë ushtrisë i duhen të paktën 10 miliardë dollarë buxhet shtesë për të riplotësuar të gjitha armatimet që ka tërhequr nga rezervat për t’ia dërguar Ukrainës.

 

Kjo është ndihma e parë për Ukrainën që njofton Pentagoni që nga muaji dhjetor, kur pati njoftuar se kishin mbaruar fondet. Madje gjatë ditëve të fundit, zyrtarët pranuan publikisht se jo vetëm që kishin përfunduar fondet, por se duheshin edhe 10 miliardë dollarë të tjera.

Njoftimi u bë ndërsa Ukrainës i ka rënë në mënyrë të rrezikshme niveli i municioneve dhe ndërsa përpjekjet për të siguruar armatim të ri kanë ngecur në Dhomën e Përfaqësuesve për shkak të kundërshtive të ligjvënësve republikanë. Zyrtarët amerikanë patën këmbëngulur prej muajsh se Shtetet e Bashkuara nuk do të ishin në gjendje të rifillonin me dërgesat e armatimeve derisa Kongresi të miratonte fondet shtesë, të cilat janë pjesë e projektbuxhetit të ngecur.

Fondet shtesë do t’i kishin mundësuar Pentagonit që të tërhiqte nga rezervat aktuale bazuar në urdhëra ekzekutivë të presidentit, për t’i dërguar ato në Ukrainë dhe për të shpallur kontrata të reja për blerje armatimi që do të zëvendësonte këto rezerva të nevojshme për gjendjen e gatishmërisë së ushtrisë amerikane.

“Kur forcat ruse përparojnë dhe godasin me artileri, Ukraina nuk ka municion të mjaftueshëm për t’iu kundërpërgjigjur zjarrit”, tha këshilltari i sigurisë kombëtare Jake Sullivan, ndërsa njoftoi ndihmën prej 300 milionë dollarësh.

Pentagoni gjithashtu ka vepruar në kuadrin e një iniciative tjetër për Ndihmën për Sigurinë e Ukrainës (USAI), që ka mundësuar financimin e kontratave më afatgjata me industrinë e mbrojtjes për të prodhuar armë të reja për Ukrainën.

voa