Debati nëse plazhet në Shqipëri janë të mbushura me njerëz apo bosh, u zhvendos te shqetësimet për rritjen abuzive të çmimeve dhe dëmi që ato mund t’ia shkaktojnë turizmit.

 

Këtë shtrenjtim e pranoi si Qeveria, ashtu edhe pushteti vendor, ndërkohë që operatorët turistikë kanë argumentet e tyre se përse ndodhi.

Kryeministri Edi Rama u kërkoi kryebashkiakëve të Vlorës dhe Sarandës – qytete në jug të Shqipërisë, ku u tha se ka më së shumti rritje abuzive çmimesh – që të zhvillojnë takime me operatorët turistikë, për t’u thënë se një gjë e tillë “është e padrejtë dhe strategjikisht vetëvrasje për ta”.

Dhe, duket se ky mesazh u reflektua me një ulje çmimesh. Kështu thonë, së paku, autoritetet lokale dhe operatorët turistikë.

 

Kryebashkiaku i Vlorës: Po rishikohen çmimet, por ka ende abuzime

Kryebashkiaku i Vlorës, Ermal Dredha, ishte zyrtari i parë vendor që e denoncoi rritjen abuzive të çmimeve në jug të Shqipërisë.

Pasi shqetësimi u ngrit edhe në nivel qendror, ai thotë se ndërmori hapa për ta frenuar atë.

“Kemi zhvilluar takime [me operatorët turistikë] dhe kemi diskutuar për një dakordësi në lidhje me çmimet, që të mos kthehen në bumerang dhe të mos largohen turistët që vijnë”, thotë Dredha për Radion Evropa e Lirë.

Sipas tij, çmimet kanë nisur tashmë të ulen, porse ka ende “disa struktura biznesi që abuzojnë”.

“Nuk them se çmimet janë ekzagjeruar, së paku në Lungomare, [pjesa qendrore]. Rritja e çmimit të çadrave është për dy euro krahasuar me një vit më parë. Çmimi ka qenë 800 lekë [8 euro] dhe ka shkuar në 1000 lekë [10 euro]. Por, ka struktura të tjera që pretendojnë se kanë ofertë më të mirë apo shërbim më të lartë. Aty ka abuzim. Çmimi i çadrës mund të arrijë në 2500 lekë [25 euro]. Kjo duhet të ndryshojë”, thotë Dredha.

 

Një tjetër problematikë që ai thotë se ka ndeshur gjatë inspektimeve në terren, është edhe çmimi i lartë për makinat në parkimet private.

“Nuk mund të paguhet një vend-parkim sa gjysma e asaj që paguhet për një dhomë hoteli. Për këtë shqetësim është ngritur një task-forcë që do t’i evidentojë të gjitha rastet dhe do të merren masa”, thotë kryebashkiaku i Vlorës.

Shqetësime që kërkojnë zgjidhje për të, janë edhe cilësia e shërbimit dhe mungesa e punëtorëve.

 

Vasil Bedini, udhëheqës i operatorëve turistikë në Vlorë, konfirmon se në takimet konsultative me përfaqësuesit e pushtetit vendor, pas kritikave të kryeministrit Rama, është rënë dakord që të ketë një rishikim të çmimeve.

Sipas tij, rritje çmimesh ka pasur në zonat e jugut, Dhërmi-Palasë, dhe jo në qytetin e Vlorës.

“Duhet një strategji e qartë për vitet e ardhshme dhe takimet duhet të jenë më të shpeshta. Janë liruar shumë plazhe që kanë qenë të zaptuara. Janë kthyer në publike. Do të rishikohet në fund të vitit prapë paketa e taksave vendore për hapësirat publike, që të kemi çmime reale dhe oferta turistike më të ulëta”, thotë Bedini për Radion Evropa e Lirë.

Pse u rritën çmimet dhe kush abuzoi?

Bedini numëron disa arsye përse, sipas tij, disa biznese abuzuan me çmimet e disa të tjera bënë një rritje që e cilëson modeste.

“Disa operatorë turistikë që nuk janë të lidhur në vazhdimësi me sezonin, kanë menduar të pasurohen në një vit. Por, sektori i hotelerisë, në përgjithësi, ka pasur një ngritje jo më shumë se 10% dhe kjo lidhet me rënien e euros. Vjet, euroja ishte 120 lekë, këtë vit është 92 lekë. Ne i kemi 90% të të ardhurave në euro dhe 100% të shpenzimeve në lekë”, thotë Bedini.

Ai shton se Vlorën dhe pjesën tjetër të jugut e kanë zgjedhur kryesisht kosovarët e diasporës dhe nuk pret që sivjet numri i tyre të ndryshojë.

 

Eksperti: Jo vetëm shifra, por analizë

 

Eksperti i turizmit në Shqipëri, Altin Sholla, e vlerëson marketingun që i bëhet turizmit shqiptar, por thotë se mungon analiza.

“Qeveria dhe institucionet vendore duhet të ndjekin politika këshillore me ekspertë dhe duhet të merren masa që problematika të tilla si sivjet me rritjen e çmimeve, të mos përsëriten. Marketingu që bëhet, është në kohën e duhur, por duhet analizë se çfarë turistësh na vijnë, si ta marrim më të mirën prej tyre dhe, më pas, si t’i eliminojmë tendencat abuzive”, thotë Sholla për Radion Evropa e Lirë.

“Kjo do të thotë që ne e sjellim turistin te dera, por duhet të mendojmë edhe si ta mbajmë”, shton ai.

Sipas tij, oferta duhet të jetë e mirëpërcaktuar, sepse “nëse ka tendenca abuzive me çmimet dhe nuk ka shërbime suplementare”, atëherë “turisti vjen, sheh dhe largohet”.

Ndikimi financiar në atë rast “nuk është i madh, nuk është ai që pritet”, thotë Sholla, udhëheqës i institucionit arsimor “Tirana Business University”.

Po sipas tij, statistikat tregojnë se në mars dhe në prill ka pasur rritje të numrit të turistëve – gjë që tregon se “ata nuk vijnë vetëm për vijën bregdetare, por edhe për të vizituar qytete si: Berati, Gjirokastra, Tirana, Shkodra”, të cilat kanë një trashëgimi të pasur kulturore.

“Duhet ta njohim kategorinë e turistëve që vijnë në Shqipëri, në mënyrë që kërkesa dhe oferta të balancohen. Duke njohur mirë turistin që vjen, i harmonizojmë edhe paketat. Nuk mjaftojnë më statistikat se sa erdhën, por kohëzgjatja, sa rrinë apo sa harxhojnë”, thotë Sholla.

 

 

 

Qeveria e Shqipërisë pret që këtë vit vendin ta vizitojnë rreth 14 milionë turistë.

Sipas të dhënave të fundit të publikuara prej saj, të cilat përfshijnë periudhën nga janari i këtij viti deri në qershor, Shqipërinë e vizituan 4.5 milionë turistë, ose 34 për qind më shumë se në të njëjtën periudhë të një viti më parë.

Vitin e kaluar, media ndërkombëtare, të tilla si CNN, raportuan për Shqipërinë, duke e renditur si një ndër destinacionet më interesante të atij sezoni veror, qoftë për plazhet, zonat malore, ushqimet apo edhe çmimet e volitshme.

Këtë vit, tërhoqi vëmendjen publikimi i disa fotografive dhe videove në rrjetet sociale, që, sipas atyre që i shpërndanë, ishin të plazheve shqiptare me shumë pak njerëz ose të boshatisura.

rel

Komiteti i Trashëgimisë Botërore të UNESCO-s, i mbledhur në Nju Delhi në Indi, miratoi të enjten vendimet për Qendrat e Trashëgimisë Botërore shqiptare, Butrintin, Beratin dhe Gjirokastrën dhe shtyu për vitin e ardhshëm vendimin për zonën ndërkufitare shqiptare dhe maqedonase të Liqenit të Ohrit.

 

Në vendimin për Butrintin UNESCO u kërkon autoriteteve shqiptare të dorëzojnë një hartë të kufijve të pronës së Butrintit, të cilët janë ndryshuar dy vjet më parë nga qeveria shqiptare, pa dijeninë dhe pa miratimin e UNESCO-s.

Në vendim UNESCO thotë se “shpreh keqardhje që qartësimi i kufijve të pronës dhe zonës së saj tampon është ende në pritje dhe i kërkon Shqipërisë që të paraqesë, si çështje prioritare, një hartë të qartë dhe të saktë që tregon kufirin e pronës së Trashëgimisë Botërore dhe kufirin e zonës tampon e cila do të merret në shqyrtim nga Qendra e Trashëgimisë Botërore”.

UNESCO kërkon gjithashtu që Ministria e Ekonomisë, Kulturës dhe Inovacionit të mbajë mbikëqyrjen e të gjithë Pronës së Trashëgimisë Botërore.

“Për të arritur një menaxhim dhe llogaridhënie efektive”, thekson UNESCO, “prona e Trashëgimisë Botërore dhe zona e saj tampon duhet të menaxhohet në mënyrë të koordinuar dhe në tërësi”.

UNESCO thotë se kërkon për më tepër “që Shqipëria të japë sqarime për Qendrën e Trashëgimisë Botërore mbi rregulloret aktuale mbrojtëse dhe përdorimet e përcaktuara për të gjitha zonat e Parkut Kombëtar në lidhje me mbrojtjen e pronës së Trashëgimisë Botërore dhe funksionin e zonës së tij tampon, dhe mbi mënyrën sesi regjimet e ndryshme të menaxhimit do të harmonizohen për të shmangur fragmentimin”.

UNESCO thotë në vendim se “vëren se ICOMOS ka përgatitur një rishikim teknik të projektit të Qendrës së Vizitorëve dhe dokumentacionit përkatës të paraqitur nga Shqipëria dhe i kërkon autoriteteve shqipatre që të zbatojë plotësisht rekomandimet, duke përfshirë dhënien e kohës së mjaftueshme për të përgatitur një Vlerësim të plotë të Ndikimit të Trashëgimisë i cili, ndër të tjera, duhet të bazohet në hulumtime të plota arkeologjike dhe të përfshijë hapësirën e peisazhit”.

UNESCO kërkon që “Shqipëria të vazhdojë të paraqesë në Qendrën e Trashëgimisë Botërore për shqyrtim nga Organet Këshillimore detaje të projekteve që mund të prekin Vlerat e Jashtëzakonshme Universale të Butrintit (VJU) përpara se të merret ndonjë vendim i pakthyeshëm për zbatimin e tyre, dhe që projektet të zbatohen vetëm pasi të ketë rënë dakord UNESCO”.

UNESCO i kërkon Shqipërisë që t’i paraqesë Qendrës së Trashëgimisë Botërore, deri më 1 shkurt të vitit 2025, një raport të përditësuar mbi gjendjen e ruajtjes së pronës dhe zbatimin vendimit duke përfshirë një plan veprimi të detajuar me një afat kohor edhe për zbatimin e rekomandimeve të misioni të vitit 2022, për shqyrtim nga Komiteti i Trashëgimisë Botërore në sesionin e tij të 47-të.

Ndërkohë, në vendimin për Gjirokastrën dhe Beratin, UNESCO thotë se “ vëren me keqardhje se, pavarësisht kërkesave të mëparshme, Shqipëria nuk ka zbatuar plotësisht projektin për zhvillimin e Planit të Menaxhimit në bashkëpunim me sektorin qeveritar dhe civil, financuar nga Fondi i Trashëgimisë Botërore”.

“Shqipëria duhet të përditësojë Planin e Menaxhimit si një çështje me përparësi duke marrë parasysh komentet dhe rekomandimet e bëra tashmë nga Organet Këshillimore dhe duke përfshirë në mënyrë aktive autoritetet vendore të Beratit dhe Gjirokastrës”, thotë UNESCO.

UNESCO thotë më tej se “vëren me keqardhje përfundimin e ndërtimit të rrugës së bypass-it të Gjirokastrës pa zbatuar kërkesat e UNESCOS, dhe për këtë arsye i kërkon Shqipërisë që të kryejë urgjentisht një vlerësim të plotë të pavarur të ndikimit të projektit në trashëgiminë e Gjirokastrës dhe ta dorëzojë në Qendrën e Trashëgimisë Botërore për shqyrtim nga Organet Këshillimore”.

UNESCO i kërkon Shqipërisë të ndërmarrë një studim të integruar për të vlerësuar ndikimin e projekteve të shumta të infrastrukturës dhe zhvillimit dhe t’ia dorëzojë atë UNESCOS për shqyrtim nga organet këshillimore.

UNESCO thotë se mirëpret angazhimin e Shqipërisë për të përmirësuar rregulloret e urbanistikës së Beratit dhe të Gjirokastrës, por kërkon të qartësohen ndërlidhjet ndërmjet Planit të Menaxhimit të Integruar dhe planeve të veçanta për ruajtjen mbrojtjen dhe administrimin e qendrave historike të dy qyteteve.

Lidhur me vendimit e UNESCO-s Ministria e Ekonomisë, Kulturës dhe Inovacionit ((MEKI) tha përmes një deklarate se “mbështeti pa asnjë rezevë projekt vendimet e Qendrës së Trashëgimisë Botërore që Komiteti i UNESCO-s i zyrtarizoi me një qendrim, unanim, që e konsiderojmë si shumë objektiv, tërësisht korrekt dhe jashtëzakonisht profesional”.

MEKI thotë se edhe pika e vetme në të cilën shprehet keqardhje për vonesën e sqarimit të kufijve të pasurisë botërore, reflekton situatën e kohës kur është përgatitur projektvendimi i UNESCO-s.

MEKI thotë se ka dërguar në Paris paketën e parë të hartave dhe ka marrë komentet paraprake nga Qendra e Trashëgimisë Botërore.

Por ndërsa MEKI flet “për një paketë të parë” të hartave të Butrintit kur UNESCO ka kërkuar një hartë të pronës, autoritetet shqiptare ende nuk kanë sqaruar se përse u mor vendimi dy vite më parë për heqjen nga Parku i Butrintit të rreth 800 hektarëve pa vënë në dijeni dhe pa marrë miratimin e UNESCO-s.

Gjatë një interpelance të zhvilluar të enjten me ministrin e Ekonomisë, Kulturës dhe Inovacionit, Blendi Gonxhe deputetja e opozitës Ina Zhupa, tha se në ish zonën tampon të Parkut Kombëtar të Butrintit po zhvilloheshin projekte të mëdha ndërtimore.

Duke treguar në parlament dy foto të investimeve zonja Zhupa tha se “këto janë modele zhvillimi që injorojnë UNESCO-n, që ndërtojnë në zonat e mbojtura dhe që fragmentarizojnë Butrintin”.

voa

Shqipëria, BE dhe BERZH kanë firmosur një marrëveshje për marrjen e 136 milionë euro grant nga Bashkimi Evropain për rehabilitimin e linjës hekurudhore Vorë-Hani i Hotit. Marrëveshja u nënshkrua sot (26 korrik), nga Ministri i Financave Ervin Mete, Ambasadori i BE-së Silvio Gonzato dhe Shefja e BERZH-it në Shqipëri Ekatarina Solovova.

 

Teksa ka shprehur vlerësimet për mbështetjen e BE përmes fondeve për zhvillim të infrastrukturës së rëndësishme për vendin, Ministri Mete tha se granti prej 136 milionë euro është më i madhi i akorduar ndonjëherë. Ky grant do të shërbejë për krijimin e një sistemi modern të transportit, tha Mete, duke shtuar se kjo do të behet sipas standardeve të BE-së.

“Investimi synon të përmirësojë më tej infrastrukturën dhe konektivitetin në Shqipëri nëpërmjet ofrimit të një shërbimi modern të transportit dhe arritjen e lëvizshmërisë së qëndrueshme sipas standardeve të BE-së. Granti që nënshkruajmë sot prej 136 milionë Euro është granti më i madh i akorduar ndonjëherë nga Bashkimi Evropian për një projekt investimi në Shqipëri. Duke i shtuar edhe grantin për linjën hekurudhore Durrës-Rrogozhinë, shuma totale e granteve të akorduara nga institucionet e BE-së për investime në infrastrukturë pritet të arrije në mbi 200 milionë Euro. Gjithashtu Plani i ri i Rritjes për vendet e Ballkanit Perëndimor nga i cili Shqipëria pritet të përfitojë mbi 900 milionë Euro në formë grant ose kredi të buta, do të krijojë edhe me tepër hapësirë financimi për mbështetjen e projekteve prioritare në vend”, tha Mete.

Ky investim është pjesë e strategjisë së BE-së për ta shtrirë Rrjetin Trans-Evropian të Transportit të BE-së – TEN-T – në rajonin e Ballkanit Perëndimor. Kjo është lidhja hekurudhore ndërkombëtare e Shqipërisë me rrjetet hekurudhore rajonale dhe të BE-së. Ky grant i BE-së përmbyll strukturën financiare të projektit dhe shënon fillimin e zbatimit të tij. Investimi do t’u mundësojë Hekurudhave Shqiptare të elektrizojnë më shumë se 120 km binarë dhe të rinovojnë 12 stacione treni, përfshirë sisteme të reja sinjalizimi, si dhe përmirësime të sigurisë. Kjo do të mundësojë udhëtime më të sigurta dhe më të shpejta me shpejtësi funksionimi deri në 100 km/h.

rtsh