Arkivi mujor: Korrik 2024

Bota

Hakerë nga Koreja e Veriut vjedhin sekrete ushtarake

Komento

Koreja V

Britania e Madhe, SHBA dhe Koreja e Jugut paralajmërojnë për një fushatë globale spiunazhi kibernetik nga Koreja e Veriut, e cila synon të plotësojë ambiciet e saj bërthamore.

Hakerë të mbështetur nga Koreja e Veriut kanë ndërmarrë një fushatë globale spiunazhi kibernetik për të vjedhur sekrete ushtarake për të mbështetur programit e armëve bërthamore të Phenianit, thanë në një deklaratë të përbashkët Shtetet e Bashkuara, Britania e Madhe dhe Koreja e Jugut. Ekspertët e sigurisë kibernetike i quajnë hakerët e mbështetur nga Koreja e Veriut “Anadriel” ose “APT45″

Paralajmërimi u bë nga Byroja Federale e Hetimit (FBI), Agjencia e Sigurisë Kombëtare (NSA) dhe agjencitë kibernetike nga SHBA-ja, nga Qendra Kombëtare e Sigurisë Kibernetike e Mbretërisë së Bashkuar (NCSC) dhe Shërbimi Informativ Kombëtar i Koresë së Jugut (NIS).

Çfarë dihet deri tani për sulmin e Anadrielit?

Hakerët e mbështetur nga Koreja e Veriut kanë vënë në shënjestër ose kanë depërtuar në sistemet kompjuterike të një numri të madh kompanish që punojnë në fushën e mbrojtjes ose të inxhinierisë, ndër ta edhe prodhues tankesh, nëndetësesh, anijesh luftarake, avionësh luftarakë, raketash dhe prodhues sistemesh për radarë.

Andariel konsiderohet si krah i agjencisë së spiunazhit të Phenianit.

Në paralajmërimin e agjencive nga Shtetet e Bashkuara, Britania e Madhe dhe Koreja e Jugut thuhet se ato besojnë se grupi dhe teknikat kibernetike vazhdojnë të përbëjnë kërcënim për sektorë të ndryshëm të industrisë në mbarë botën, pra jo vetëm në këto tri vende, por edhe në Japoni apo Indi.

Thirrje për vigjilencë

Sipas FBI-së Andarieli ka përdorur pika të dobta të softuerëve për të filluar sulme kibernetike duke përdorur malware dhe phishing, për të hyrë në banka të dhënash dhe mbledhur informacione sekrete.

FBI u bëri thirrje kompanive të përfshira në sektorët e mbrojtjes, të hapësirës ajrore, të energjisë bërthamore dhe të inxhinierisë “të qëndrojnë vigjilente për mbrojtjen e rrjeteve të tyre nga operacionet kibernetike të sponsorizuara nga Koreja e Veriut”.

FBI njoftoi edhe se Andariel ishte përpjekur të merrte informacione si specifikime dhe projekt-skica për proceset e përpunimit dhe të pasurimin të uraniumit, si dhe për raketa dhe sisteme të mbrojtjes prej raketave.

(AFP, Reuters)

Maqedonia

Gurbetçarë të nderuar! Kujdes! VMRO-VLEN filloi reketimin shtetëror

Komento

euro

Dogana: Konfiskohen 6800 euro nga një shtetas i RMV-së

Doganierët nga vendkalimi kufitar Tabanoc kanë parandaluar tentimin për nxjerrje të kundërligjshme të 6800 eurove, pasi gjatë kontrollit të një pasagjeri kanë zbuluar një sasi më të madhe të devizave të padeklaruara.

“Personi është shtetas i Maqedonisë dhe i pyetur nga doganieri nëse ka diçka për të deklaruar, ai është përgjigjur se nuk ka asgjë. Gjatë kontrollit në çantën e dorës së pasagjerit iu gjetën 8800 euro, për të cilat personi nuk dispononte asnjë dokument të origjinës”.

“Sipas Ligjit për punë devizore, pasagjerit i janë kthyer 2000 euro, shumë që mund të nxirret pa raportim, ndërsa 6800 euro të mbetura mbahen. Ndaj personit është ngritur kallëzim për kundërvajtje devizore”, thonë nga Doganat.

telegrafi

Bota

Një rus mes të arrestuarve në komplotin që synonte Olimpiket e Parisit

Komento

Paris

Autoritetet franceze kanë eliminuar disa komplote që kishin për objektiv Olimpiket e Parisit. Mes të arrestuarve është edhe një rus, thanë autoritetet të mërkurën, vetëm pak ditë nga ceremonia e hapjes së Lojërave Verore të Parisit.

 

Franca ka qenë në gatishmëri të lartë gjatë javëve të fundit ndërsa përgatitjet për Lojërat Olimpike janë në fazën përfundimtare. Lojërat nisin zyrtarisht të premten në lumin Seine me një ceremoni madhështore dhe masa të rrepta sigurie.

Prokurorët thanë se kishin arrestuar të martën një rus 40-vjeçar në apartamentin e tij në Paris, nën dyshimet se kishte planifikuar të “destabilizonte Lojërat Olimpike”.

Ndaj tij janë ngritur akuza se punonte për shërbimet e zbulimit të një shteti të huaj me qëllim provokimin e trazirave në Francë, krime që mund të dënohen me deri 30 vjet burg, sipas një deklarate nga zyra e prokurorit të Parisit.

Gjatë kontrollit të shtëpisë së të dyshuarit në Paris, organet e rendit gjetën sende që “ngjallën frikën e qëllimit të tij për të organizuar ngjarje që mund të çonin në destabilizimin e Lojërave Olimpike”, thanë prokurorët.

Ambasada ruse në Paris tha se nuk kishte marrë asnjë njoftim nga autoritetet franceze për arrestimin dhe u ka kërkuar zyrtarëve shpjegime pasi njoftimeve, ndërsa nuk ka komente të mëtejshme.

Organizatorët e Lojërave Olimpike po përballen me sfida të mëdha sigurie, përfshirë shqetësimet e sulmeve kibernetike, mes tensioneve të larta ndërkombëtare për shkak të luftës së Rusisë në Ukrainë dhe konfliktit Izrael-Hamas në Gazë.

Sipas zyrtarëve francezë dhe ekspertëve të sigurisë kibernetike në Evropë dhe Shtetet e Bashkuara, fushatat dezinformuese të orkestruara nga Rusia kanë për objektiv Lojërat Olimpike dhe zgjedhjet e fundit në Francë.

Rreth 35,000 punonjës të rendit do të jenë në rrugët e kryeqytetit francez gjatë Lojërave Olimpike me rreth 45,000 gjatë ceremonisë së hapjes. Përveç kësaj, 10,000 ushtarë po marrin pjesë në operacionet e sigurisë në rajonin e Parisit.

Rreth 40 vende po ndihmojnë Francën gjatë këtij sezoni duke dërguar të paktën 1900 punonjës rendi.

voa

Sport

Për tri javë Parisi në frymën e Lojërave Olimpike 2024

Komento

Paris olimpijada

Lojërat Olimpike të verës 2024. Ne i japim përgjigje pyetjeve më të rëndësishme: Cilat janë llojet e reja të sportit që marrin pjesë? Sa kushton një biletë? Dhe sa të sigurta janë lojërat? Sa sportistë marrin pjesë?

 

Rreth 10.500 atlete dhe atletë nga 206 kombe të ndryshme marrin pjesë në Lojërat Olimpike në Francë. Për 19 ditë me radhë nga 26 korriku deri 11 gusht, ata garojnë në 32 lloje të ndryshme sporti për të marrë një vend në shkallëzën me tre shkallë. Gjithësej jepen 329 medalje të arta.

 

Mes yjeve të mëdhenj të lojërave të verës numërohet gjimnasten amerikane, Simone Byles. Fituesja e katër lojërave olimpike u desh të luftonte me problemet psiqike në Lojërat e Tokios, katër vjet më parë. Në atletikën e lehtë, ylli kenian i maratonës Eliud Kipchoge do të marrë për herë të parë në histori, medaljen e tretë të artë, njërën pas tjetrës.

Yjet kryesore 

Sytë e botës së sportit do të përqëndrohen tek ekipi amerikan i basketbollit. Elita botërore e basketbollit do të shkojë në Paris me LeBron James, Stephen Curry dhe Kevin Durant. Kurse futbollisti Kylian Mbappé nuk merr pjesë. Superstari francez nuk ka marrë lejen nga klubi i ri ku merr pjesë, Reali i Madridit.

Atletët e veçantë rusë dhe belarusë do të futen në garim vetëm me flamur neutral. Himnet kombëtare të tyre nuk do të luhen dhe ata nuk lejohet të tregojnë simbole kombëtare, ekipet nga të dy këto vende janë përjashtuar komplet nga lojërat. Përveç kësaj është vendosur si kusht që pjesëmarrësit të mos kenë asnjë lloj lidhjeje me ushtrinë ruse apo organet e sigurimit. Arsyeja ka të bëjë me luftën ruse në Ukrainë.

Sa spektatorë pritet të ketë? A ka më bileta?

Organizatorët presin që të ketë 15 milionë vizitorë. Megjithatë në bursat zyrtare të biletave të Lojërave Olimpike në Paris ka ende bileta për aktivitete të cakuara. Me çmimin 15 euro, biletat e futbollit janë biletat më të lira. Biletat për vaterpolo ose kajak-sllallom janë për shembull 24 euro.

Kush do që të shohë aktivitete të preferuara si not apo gjimnastikë duhet të paguajë shumë më tepër se 100 euro. Për këto aktivitete ka ende bileta vetëm për klasat e çmimeve të shtrenjta. Aktiviteti më i shtrenjtë është ceremonia e hapjes, ku bileta më e lirë kushton aktualisht 500 euro (data 16 korrik).

Ku zhvillohen garat?

Ka 35 vende, disa prej të cilave nuk janë në Paris. Kështu për shembull pentatloni modern dhe garat me kuaj do të zhvillohen para Kështjellës së Versajës. Futbolli do të luhet në stadiumet e gjithë vendit, hendbolli do të luhet në Lilë.

Surfistët i fillojnë garat madje jashtë kufijve të shtetit francez, në Tahiti, ishullin më të madh të Peloponezit francez.

Por pjesa më e madhe e sportistëve garon në qendër të kryeqytetit francez. Gëzim të madh duhet të kenë vojlebollistët e rërës, sepse luajnë me shikim nga Kulla Eifel.

Festimet e hapjes nuk do të zhvillohen si gjithnjë në stadium, por do të lëvizin nëpër Paris duke udhëtuar me 160 varka me të cilët sportistet dhe sportistët do të lundrojnë nëpër Senë.

Ende nuk është e sigurt nëse garat në ujë dhe noti në trialon do të zhvillohet sipas planeve në Senë. Arsyeja është se uji i Senës ka qenë për një kohë të gjatë i infektuar me patogjenë. Dy javë para fillimit të lojërave qyteti i Parisit dha paralajmërimin e bërë me kujdes. “Në 10 ose 11″ ditët e 12 ditëve të fundit, uji ka qenë i pastër sa duhet, për të zhvilluar garat e notit, tha një zëdhënës i qytetit.

Cilat sporte marrin pjesë për herë të parë?

Një herë në katër vjet lloje të reja sportesh bëhen sporte olimpike. Në Lojërat e fundit verore të Tokios, morrën pjesë për herë të parë skateboarding, ngjitjet sportive ose basketbolli tre me tre.

Në Paris, merr pjesë për herë të parë “Breaking”, i njohur edhe si breakdance. Atletet dhe atletët futen në një betejë kërcimi dhe improvizojnë me një muzikë dhe koreografi që nuk e kanë njohur më parë. Një zhuri vendos kush fiton.

Në shumë lloje sporti janë bërë ndryshime të vogla. Kështu për shembull do të ketë një garë të re në Kajak Cross. Tifozët e karatesë, bejsbollit, softbollit do të mërziten, sepse këtyre sporteve u është vënë viza. Edhe ecja 50 kilometrëshe nuk do të zhvillohet më.

Sa të sigurta janë Lojërat?

Dhjetra mijëra punonjës të policisë dhe ushtrisë do të jenë në punë çdo ditë për të siguruar Lojërat. Këtyre u shtohen forcat private të sigurisë. Për të patur personelin e mjaftueshëm, qeveria e shkurtoi specilizimin e tyre duke e bërë 3 javë, futi shpërblime për personelin dhe specializoi për Lojërat, personel nga sektorë të tjerë.

Vizitorët dhe banorët do të kenë nevojë për Kodin QR, për të kapërcyer kontrollet e policisë. Qarkullimi do të kufizohet, stacione të caktuara të metrosë do të bllokohen krejt.

Në punë do të vihen edhe sisteme kamerash të drejtuara me Inteligjencë Artificiale (IA). Ato do të dallojnë lëvizje të pazakonshme të masave të njerëzve apo armëve. Ky program nuk do të përdoret për njohjen e fytyrës.

Aktivitetet e mëdha siç janë Lojërat Olimpike janë objektiva të mundshëm sulmet terroriste. Me sulmin kundër Charlie Hebdo ose atë në Bataclan, Franca është një nga vendet që ka qenë disa herë objektiv sulmesh terroriste.

Për festimet e hapjes, që janë me rrezik të madh, qeveria uli kontigjentin e spektatorëve. Për një kohë të gjatë u mendua zhvendosja e tyre në një vend tjetër. Por aktualisht duket se festimet do të zhvillohen në Senë.

Sa prezervativë ka për sportistët?

Mbas ndalimit të marrëdhënieve intimite në Tokio, për shkak të COVID-19, sportistet dhe sportistët do të lejohen të kenë seks në Paris. 300.000 prezevativë janë vënë në dispozicion në Fshatin Olimpik, rezidencën e 9 mijë sportistëve aktivë. Megjithatë atje nuk do të ketë alkool. Por mbase bufeja me ushqime, 350 metra e gjatë do të mjaftojë për të ngushëlluar sportistet dhe sportistët.

dw

Bota

Putin takohet me Assadin në Moskë

Komento

Asad Putin

Presidenti rus, Vladimir Putin, është takuar me presidentin sirian, Bashar al-Assad në Kremlin, njoftoi zyra për media e presidentit rus më 25 korrik.

 

“Jam shumë i interesuar për mendimin tuaj se si situata në rajon në tërësi”, citohet t’i ketë thënë Putini Assadit.

“Fatkeqësisht ka një tendencë drejt përshkallëzimit. Ne po e shohim këtë. Kjo po ashtu vlen drejtpërdrejt edhe për Sirinë”, tha Putin, sipas njoftimit të Kremlinit.

Kremlini tha se takimi mes Putinit dhe Assadit u zhvillua të mërkurën, më 24 korrik.

“Duke pasur parasysh të gjitha ngjarjet që po ndodhin sot në botë dhe në rajonin e Euroazisë, takimi ynë duket shumë i rëndësishëm për të diskutuar të gjitha detajet e zhvillimit të këtyre ngjarjeve, për të diskutuar perspektivat dhe skenarët e mundshëm”, i tha Assadi liderit rus.

Ky është takimi i parë mes dy liderëve që nga marsi i viti të kaluar dhe u zhvillua në kohën kur presidenti turk, Recep Tayyip Erdogan, përmendi mundësinë që tre liderët të takohen dhe të tentojnë të normalizojnë raportet mes Ankarasë dhe Damaskut.

“Tani kemi ardhur në një pikë që sa më shpejt që Bashar al-Assadi të ndërmarrë hapa drejt përmirësimit të raporteve me Turqinë, ne do t’i tregojmë atij të njëjtën qasje”, tha Erdogan.

Fillimisht, Turqia synoi të rrëzonte regjimin e Assadit kur nisi konflikti sirian me shtypjen e dhunshme të protestave paqësore më 2011 dhe Ankarja mbështeti rebelët që kërkonin rrëzimin e tij.

Por, së fundi, Ankaraja ka zhvendosur fokusin në parandalimin e hapjes së asaj që Erdogan në vitin 2019 e quajti “korridor terrorist” në Sirinë veriore.

Erdogan ka thënë se mund të rishqyrtojë raportet me Assadin dhe Qeverinë e tij me qëllim që të punohet në kthimin e sigurt dhe vullnetar të refugjatëve sirianë.

Turqia ka kryer një sërë ofensivash në Siri që nga viti 2016 duke shënjestruar militantët kurdë, ekstremistët e Shtetit Islamik dhe forcat besnike ndaj Assadit.

Forcat proturke në Siri tani kontrollojnë dy rripe të mëdha të territorit përgjatë kufirit mes Sirisë dhe Turqisë.

rel

Shqipëria

Shqipëria hedh hapat e parë drejt ringritjes së industrisë ushtarake

Komento

armet

Në Shqipëri po hidhen aktualisht disa hapa konkrete për rigjallërimin e industrisë ushtarake. Disa komisione të Kuvendit shqyrtuan dhe miratuan sot krijimin e shoqërisë shtetërore për prodhimin dhe tregtimin e armëve, municioneve, pajisjeve dhe teknologjive ushtarake. Nisma më e re ligjore synon të afrojë Shqipërinë me standartet e NATO-s në prodhimin e armatimeve dhe t’i japë fund teknologjive të prapambetura, që trashëgoi nga regjimi komunist. Por deputetët e opozitës kërkuan më shumë transparencë mbi bazën ligjore dhe planet e biznesit të kësaj nisme të re.

 

Komisionet e Kuvendit për ekonominë dhe financat, për çështjet ligjore dhe për sigurinë kombëtare shqyrtuan dhe miratuan sot projektligjin e përgatitur nga ministria e Mbrojtjes mbi krijimin e shoqërisë shtetërore për prodhimin dhe tregtimin e armëve, municioneve, pajisjeve dhe teknologjive ushtarake.

Nisma cilësohet si hapi i parë për rijetësimin e industrisë ushtarake të Shqipërisë pas shumë vitesh tranzicion, kur i duhej të ndahej nga armatimet dhe teknologjitë e vjetra të para viteve 90.

Zyrtarët e mbrojtjes pohuan para deputetëve se me themelimin e shoqërisë shtetërore nis ngritja e një strukture të përshtatshme për të vepruar në një treg konkurrues.

Sipas tyre, shoqëria do të ketë të gjithë mekanizmat juridikë dhe financiarë, që të jetë aktive në treg, të tërheqë partnerë seriozë dhe të zhvillohë industrinë ushtarake në përputhje me synimet strategjike të vendit.

Zëvendës ministri Dorian Tola tha në komisionin e ekonomisë se miratimi i këtij projekt-ligji sërben si akt themelimi i kësaj shoqërie shtetërore, përbën një ndër hapat e parë dhe më thelbësorë për rijetësimin e industrisë ushtarake në Shqipëri.

“Mbi të gjitha ne në këtë treg ofrojmë cilësitë tona, jemi vend anëtar i NATO-s, jemi një vendet kryesore të Korridorit 8, jemi të sigurtë, prodhojmë afër BE-së, prodhojmë me standartet e NATO-s, vendosja gjeografike, si dhe kemi traditën tonë “Made in Albania”, tha zoti Tola.

Projekti krijon shoqërinë shtetëtore për projektimin, prodhimin, riparimin, demilitarizimin, tregtimin e ligjshëm brenda dhe jashtë vendit të gjithë llojeve të armëve ose pjesëve të tyre, përfshirë edhe armë ushtarake, municione, teknologji dhe pajisje ushtarake, si dhe çdo aktivitet tjetër në këtë fushë, në funksion të sigurisë kombëtare si dhe rritjes së kapaciteteve ushtarake të forcave tona të armatosura.

Ajo është një shoqëri aksionare, ku aksionar i vetëm është shteti dhe përfaqësues është ministria e mbrojtjes. Deputetët e opozitës pohuan se Shqipëria si vend anëtar i NATO-s duhet të jetë edhe përfituese edhe kontribuese në gjirin e Aleancës.

Por deputetja e Partisë Demokratike të opozitës Jorida Tabaku, kundërshtoi futjen e ligjit në program me procedurë të përshejtuar, kur meriton një diskutim të gjerë.

Ajo vërejti se projekti kishte disa paqartësi ligjore, ekonomike në lidhje me pronat e ushtrisë, që shoqëria do të marrë, veprimtarinë konkrete të saj në prodhim si shoqëri shtetërore dhe në raport me kompanitë private, si dhe për planet e saj të biznesit.

“Shoh që ligji nuk na sqaron qartësisht elementë me proceset që lidhen dhe kanë të bëjnë me detyrimet e kësaj kompanie ndaj shtetit dhe bashkërendimin me institucione të tjera. Projektligji fokusohet vetëm tek ngritja e një kompanie, por jo modalitetet e operimit të saj, duke patur parasysh që puna e saj lidhet edhe me sigurinë kombëtare”, thotë zonja Tabaku.

Ndërsa sipas deputetëve të shumicës socialiste, nisma synon të modernizojë industrinë ushtarake të Shqipërisë në përputhje me standartet e NATO-s, duke forcuar rëndësinë e saj strategjike në rajon, rolin e saj për sigurinë ndëkombëtare, si dhe zhvillimin ekonomik të vendit.

Deputetja e Partisë Socialiste, Antoneta Dhima, theksoi se nisma e këtij ligji synon të rritë kapacitetet operacionale të Shqipërisë, nivelin e rezervës në municione dhe armatime, për t’iu përgjigjur ndryshimeve të vazhdueshme të mjedisit të sigurisë.

“Ringritja dhe fuqizimi i industrisë ushtarake është një aktivitet fitimprurës për ekonominë e vendit, pasi do të prodhojë vende pune, si dhe do të rritë të ardhurat në ato vende, ku do të vendoset kjo industri. Kështu ka lindur nevoja dhe domosdoshmëria për rivitalizimin e industrisë ushtarake në vendin tonë përmes krijimit të kësaj shoqërie shtetërore”, tha zonja Dhima.

Projekt-ligji për shoqërinë e re të prodhimit të armëve po shqyrtohet në Kuvend njëkohsisht me Planin Afatgjatë të Zhvillimit të Forcave të Armatosura për 10 vitet e ardhshme 2024-2033, si dhe me Strategjisë Ushtarake të Republikës së Shqipërisë.

Mbi 3 milionë euro janë parashikuar për krijimin e shoqërisë së re, ndërsa mbi 3 milionë të tjera janë për likujdimin e detyrimeve të disa industrive, që kanë pezulluar veprimtarinë, si Uzina e lëndëve plasëse në Mjekës, Uzina mekanike e Gramshit, Kombinati mekanik Poliçan,

Aktualisht ato janë në proces mbyllje, ndërsa pasuritë e tyre i kalojnë shoqërisë së re tregtare. Pas vitit 90 këto industri u përqëndruan në proceset e demilitarizimit dhe shkatërrimit të armëve të vjetra, ndërsa gjendjen e tyre e rënduan më tej teknologjitë e vjetëruara, kostot e larta të prodhimit dhe mungesa e specialistëve.

voa

Sport

Lojërat Olimpike “Paris 2024”, delegacioni shqiptar niset drejt Francës

Komento

lojrat olimpike parisSkuadra olimpike Shqiptare  është nisur drejt Paris aty ku do të mbahen Lojërat Verore Olimpike. 8 sportistë që do të përfaqësojnë Shqipërinë  në këto lojëra u nisën nga Rinasi, të shoqëruar nga kreu i Komitetit Olimpik Shqiptar, Fidel Ylli, i cili ndau për mikrofonin e RTSH-së emocionet e nisjes.

“Nuk ka emocion më të bukur se të përfaqësosh vendin tënd dhe shpresoj që Shqipëria me këtë delegacion që jemi sot këtu, na mungon Luiza Gega pasi do të vij pas 3 ditësh, kemi ëndrrën e parë që Shqipërisë ti sjellim të parën medalje olimpike me të gjithë këta kampion që ne të kemi mundësi të përfaqësojmë dhe me dinjitet, me uniforma por mbi të gjitha me rezultat”, u shpreh për RTSH-në kreu i Komitetit Olimpik Shqiptar, Fidel Ylli.

Po kaq optimist janë edhe sportistët të cilët presin medaljen nga këto lojëra.

“Jam shumë e emocionuar që do të mbaj flamurin, është një nder shumë i madh dhe falënderoj shumë Komitetin Olimpik që më dha këtë mundësi”, u shpreh notarja Kaltra Meça.

“Djemtë tanë janë përgatitur, fatmirësisht shkojmë me 3 djem jo vetëm për medalje por djemtë synojnë më të mirën që është dhe medalja e arit. Për sa kohë kemi shpresë dhe ëndërrojmë ne mbetemi pozitiv që këtë herë Shqipëria do ja dalim”, u shpreh Presidenti i Federatës së Mundjes, Sahit Prizreni, në Lojërat Olimpike “Paris 2024”.

Skuadra Shoqërohet nga Kryeministri Edi Rama, i cili do të ndjek nga afër  ceremoninë  e hapjes së Lojërave Olimpike “Paris 2024” që do të mbahen nga 26 korriku deri më 11 gusht, ndërsa Lojërat Para olimpike “Paris 2024” do të zhvillohen nga 28 gushti deri më 8 shtator.

rtsh

Shqipëria

“Policia ju sheh edhe nga lart”, 2630 gjoba përmes dronit edukues

Komento

droneMinistri i Brendshëm, Taulant Balla ndau në rrjetet sociale pamje nga puna në terren e Policisë Rrugore.

“Kush mendon se mund të parakalojë gabim, apo të shkelë në një formë tjetër rregullat e qarkullimit rrugor, duhet ta dijë se Policia e Shtetit po ju sheh edhe nga lart”, shprehet  ministri Balla.

Njësia Operacionale e Drejtorisë së Policisë Rrugore, në bashkëpunim me sektorët e Policisë Rrugore në qarqe, gjatë ditëve të fundit, ka konstatuar nëpërmjet dronit, në akset rrugore në zonat bregetare, dhe ka ndëshkuar 2630 drejtues mjetesh, për parakalime të gabuara, shkelje kjo me rrezik të lartë për përfshirje në ngjarje rrugore. Policia Rrugore apelon për respektim të rregullave të qarkullimit, me qëllim rritjen e parametrave të sigurisë rrugore.
/ rtsh.al /

Kosova

Shkrimi nga Sarajeva që shkaktoi reagime në Kosovë

Komento

Sllobodna BosnaNjë shkrim i portalit nga Sarajeva “Slobodna Bosna” për planet e supozuara të presidentit serb, Aleksandar Vuçiq, në rajon dhe kontrollin e dy portaleve kosovare nga pushteti i Vuçiqit, shkaktoi reagime të shumta nga gazetarët, Asociacioni i Gazetarëve të Kosovës, partitë opozitare dhe ekspertët e mediave.

 

Në këtë shkrim flitet për portalet nga Kosova “Nacionale” dhe “Periskopi”.

Reagimet e tyre kanë të bëjnë kryesisht me faktin se pjesa e tekstit, që ka të bëjë me ndikimin e pushtetit serb ndaj dy portaleve në Kosovë është shpërndarë nga deputetë e anëtarët e Lëvizjes Vetëvendosje – partisë në pushtet në Kosovë – gjë që po konsiderohet si “frikësim i gazetarëve dhe presion nga pushteti”.

Reagime ka pasur edhe për faktin se pjesë të tekstit janë transmetuar nga transmetuesi publik i Kosovës, Radio Televizioni i Kosovës (RTK), gjë që ka bërë që disa gazetarë dhe redaktorë të punësuar në këtë medium të distancohen nga ajo kronikë që u transmetua më 22 korrik.

Po ashtu kanë reaguar edhe partitë opozitare, të cilat pretendojnë se RTK-ja, që transmetoi tekstin e portalit nga Sarajeva, është “shndërruar në vegël të interesit ordiner të pushtetit”.

Bordi i RTK-së më 23 korrik mbajti mbledhje të jashtëzakonshme dhe përmes një njoftimi tha se është i shqetësuar për publikimin “e artikullit kontrovers në RTK”, që e cilësoi si “lëshim të qartë”, duke kërkuar sqarime të detajuara nga menaxhmenti.

Ushtruesja e detyrës së drejtoreshës së RTK-së, Zana Spahiu, ka informuar bordin se, “do të formojë një komision profesional për ta sqaruar situatën në detaje dhe për ta ndriçuar përgjegjësinë editoriale për këtë lëshim dhe do të merr masa rigoroze konform ligjit dhe akteve të brendshme të RTK-së”.

Ndërkaq, Radio Evropa e Lirë i është drejtuar Qeverisë së Kosovës për koment lidhur me akuzat për “frikësim të gazetarëve”. Por, nga ky institucion nuk janë përgjigjur.

Megjithatë, ministrja e Drejtësisë, Albulena Haxhiu, tha se sa i përket dy portaleve, gjatë të mërkurës i ka dhënë informacione Prokurorisë sepse, siç u shpreh ajo, “është e rëndësishme të dimë se kush financohet nga Serbia”.

Çfarë thuhet në tekstin e portalit “Slobodna Bosna”?

Teksti, që për autor ka ekipin hulumtues të “Slobodna Bosna”, u publikua më 22 korrik dhe, duke u bazuar në burime, tregon se si minierat e litiumit në Serbi “janë shkaktar i mundshëm i i konflikteve të reja në Serbi dhe rajon, por edhe në Bosnje e Hercegovine”.

Bashkëbisedues në këtë tekst të “Slobodna Bosna” është edhe Boban Bogdanoviq nga Beogradi, i cili u vu në qendër të vëmendjes së publikut në vitin 2022, kur në cilësinë e shokut të anëtarit të vrarë të grupit kriminal të Velko Belivukut, për rrjetin hulumtues nga Beogradi, KRIK, deklaroi se për vrasjen e politikanit serb në Kosovë, Oliver Ivanoviq, morën pjesë grupi Belivuk dhe Zvonko Vesellinoviq.

Bogdanovic RasicKush është Boban Bogdanoviq?

Në llogarinë e tij në rrjetin social X, Bodganoviq thotë se është “disident politik”.

Në një intervistë për KRIK të Beogradit, ai e kishte përshkruar veten si një biznesmen që zhvillon dhe shet kompani dhe se ishte anëtar i Lëvizjes opozitare të Qytetarëve të Lirë në Serbi.

Në dhjetor 2022, Bogdanoviq dhe Lëvizja e tij “Odgovor” nënshkruan një memorandum bashkëpunimi me Nismën Qytetare për Liri, Drejtësi dhe Mbijetesë, të politikanit serb nga Kosova, Nenad Rashiq.

Rashiq aktualisht është ministër për Komunitete dhe Kthim në Qeverinë e Kosovës. Ai u emërua në këtë post nga kryeministri i Kosovës, Albin Kurti, pasi Lista Serbe u largua nga institucionet e Kosovës në nëntor të vitit 2022.

Pas nënshkrimit të memorandumit të bashkëpunimit, Bogdanoviq dhe Rashiq në një konferencë për media thanë se duan të përmirësojnë kushtet e jetesës së serbëve në Kosovë dhe të kontribuojnë në bashkëjetesën e qëndrueshme mes serbëve dhe shqiptarëve.

Megjithatë, Rashiq tha për Radion Evropa e Lirë më 23 korrik se përveç nënshkrimit formal të memorandumit, “bashkëpunimi praktik nuk filloi kurrë”.

Në mesin e janarit 2023, Bogdanoviq shkroi për të përditshmen beogradase, Danas, për takimin e tij me kryeministrin e Kosovës, Albin Kurti, lidhur me “për pozitën e serbëve në veri të Kosovës”.

Ai në rrjetin X shkroi se nuk është ai burimi i portalit të Sarajevës, sa i përket pjesës së tekstit ku përmenden dy portalet nga Kosova.

 

 

Në një pjesë të tekstit, duke cituar burime të paidentifikuara, “Slobodna Bosna” shkroi se pushteti i Vuçiqit po zgjerohet kur bëhet fjalë për “heshtjen” e mediave të papërshtatshme në rajon dhe se tashmë ka ardhur koha që e njëjta gjë të bëhet edhe ndaj mediave në Kosovë.

“Në rend të parë është portali ‘Periskopi’, i cili është nën kontrollin e drejtpërdrejtë të terroristit nga Banjska, Millan Radoiçiq, dhe kohët e fundit është bërë një transaksion miliona dollarësh te [portali] ‘Nacionale’, i cili është vënë në dispozicion të pushtetit të Vuçiqit me tekste kritike për Qeverinë e Albin Kurtit, duke shkaktuar zemërim te shqiptarët e Kosovës”, shkroi ndër të tjera “Slobodna Bosna”.

Radoiçiq, ish-nënkryetari i Listës Serbe, mori përgjegjësinë për sulmin e armatosur ndaj Policisë së Kosovës në Banjskë të Zveçanit në shtator të vitit 2023.

“Periskopi” dhe “Nacionale” mohuan këto akuza dhe paralajmëruan padi ndaj portalit nga Sarajeva dhe ankesë ndaj RTK-së.

RTK ka cituar pjesë nga teksti i “Slobodna Bosna”, por pa përmendur saktësisht se për cilat media në Kosovë bëhet fjalë.

Shkrimet e RTK-së dhe portalit “Slobodna Bosna” më pas janë shpërndarë nga deputetët e Vetëvendosjes, Salih Zyba dhe Dimal Basha, në rrjetin social Facebook.

Lidhur me këtë ka reaguar Asociacioni i Gazetarëve të Kosovës, duke treguar se kundër dy portaleve kosovare po bëhet një “fushatë e rrezikshme” nga anëtarët e kësaj partie.

“Shkrimi i ‘Slobodna Bosna’ bazohet në burime dhe në deklaratat e një individi kontrovers, me emrin Boban Bogdanoviq, që thotë se është disident politik serb. AGK-ja dënon fuqishëm këtë fushatë të rrezikshme dhe të papranueshme të deputetëve të partisë qeverisëse, Vetëvendosje, që targeton këto dy media dhe gazetarët që punojnë aty. Fushata si kjo rrezikon seriozisht sigurinë e gazetarëve të këtyre dy mediave, dhe Vetëvendosja e deputetët e saj duhet të mbahen përgjegjës për nxitjen e urrejtjes dhe sulmeve potenciale kundër tyre”, u tha në reagimin e AGK-së.

 

AGK-ja po ashtu shprehu keqardhje që një “lajm” si ky, që sulmon gazetarët, ka gjetur hapësirë edhe në lajmet qendrore të RTK-së.

Çfarë portali është “Slobodna Bosna”?

Pas reagimeve të shumta, më 23 korrik, “Slobodna Bosna” publikoi edhe një artikull me titullin: “Panik në Serbi dhe Kosovë: Hulumtimi i Slobodna Bosna është transmetuar nga RTK, në mediat nën vëzhgimin e Aleksandar Vuçiqit bëhet kaos”.

Në këtë artikull, “Slobodna Bosna” tha se disa tabloidë në Serbi i “shtrembëruan të gjitha faktet” dhe “shpikën akuza” duke krijuar një tregim të sajuar për të mashtruar opinionin.

Radio Evropa e Lirë ka tentuar të marrë një deklaratë nga ky portal lidhur me pretendimin se dy media nga Kosova janë nën kontrollin e pushtetit serb, por nga “Slobodna Bosna” nuk kanë dashur të komentojnë.

Boro Kontiq, gazetar veteran nga Bosnja dhe Hercegovina dhe drejtor i Qendrës Mediale në Sarajevë, shpjegoi për REL-in se “Slobodna Bosna” është një media e themeluar në vitet 1989-1990 nga Senad Avdiq.

Sipas mendimit të tij, Avdiq ishte një nga gazetarët më të mirë në atë kohë dhe “Slobodna Bosna” një nga mediat kryesore të besueshme që luajti një “rol revolucionar” në vitet 1990 në nxjerrjen në pah të planit për rrethimin e Sarajevës nga ushtria jugosllave.

“Për shumë, ajo ishte një surprizë, por doli që shumica e asaj që publikuan ishte e vërtetë”, tha Kontiq.

Megjithatë, ai tha se nuk e di nëse mund të flasë më për besueshmëri, pasi ky portal ka pësuar disa ndryshime. Në mesin e viteve ’90, kjo media u kthye në gazetë të përjavshme dhe në 15 vjetët e fundit është vetëm online.

“Në një moment u fol shumë se ata u mbështetën nga SDA [Partia e Veprimit Demokratik], partia më e madhe boshnjake. Nuk e di se çfarë po ndodh. Unë njoh disa nga gazetarët që punojnë atje, janë gazetarë të mirë, profesionistë. Prandaj, është një media që ka një të kaluar të madhe, por çfarë është sot, t’iu them të drejtën, nuk e di”, tha Kontiq.

Reagime të tjera në Kosovë

Nga Lëvizja Vetëvendosje thanë gjithashtu se Prokuroria duhet të hetojë pretendimet për shkrimin e portalit nga Sarajeva dhe i bën thirrje AGK-së të jetë profesioniste.

Vlora Çitaku nga Partia Demokratike e Kosovës në opozitë u shpreh se ka ndodhur “një tjetër sulm i Qeverisë dhe eksponentëve të saj ndaj mediave dhe gazetarëve”.

Flutura Kusari, këshilltare e lartë juridike e Qendrës Evropiane për Lirinë e Shtypit dhe Medias, shkroi në Facebook se “dëmi që i është bërë kredibilitetit të RTK-së është vështirë i rikuperueshëm”, duke shtuar se “vetëm shkarkimet sot të të gjithë personave përgjegjës do të ndihmonin sado pak”.

Ndërkaq, Ehat Miftaraj nga Instituti i Kosovës për Drejtësi shkroi se mbështet gazetarët e RTK-së që po distancohen “nga politika editoriale që cenon vlerat dhe standardet”, që sipas tij duhet të jenë sinonim i një transmetuesi publik. Megjithatë, ai tha se Bordi i RTK-së “është ende në gjumë”.

rel

Ballkan, Maqedonia

Ndalohen aktivitetet e Qendrës Islame Shiite në Hamburg

Komento

hamburgMinistria Federale e Brendshme e Gjermanisë ka ndaluar aktivitetet e Qendrës Islamike Shiite në Hamburg. Kjo qendër fajësohet për mbështetjen e terrorizmit.

 

Vitin e kaluar hetuesit gjermanë ishin në rrugën “Schöne Aussicht” në veri të Hamburgut. Në nëntor të vitit 2023 oficerët kontrolluan një ndërtesë mbresëlënëse në Außenalster: Xhaminë Shia Imam Ali, e njohur si “Xhamia Blu”. Sot (24.07.24), policia shkoi sërish në të njëjtën adresë. Por këtë herë ajo jo vetëm bastisi, por edhe e mbylli xhaminë.

Sipas informacioneve të ARD-së, Ministria Federale e Brendshme gjermane ka ndaluar punën e shoqatës Qendra Islame Hamburg (IZH), e cila menaxhon “Xhaminë Blu”. Ministria njoftoi se shoqata shkel rendin kushtetues të Republikës Federale të Gjermanisë dhe nxit urrejtje antisemite dhe anti-izraelite. Për më tepër, përfaqësuesit e kësaj organizate, siç raportohet, në të kaluarën kanë lavdëruar aktet e dhunshme të organizatave terroriste si Hamasi dhe kanë mbështetur organizatat terroriste si Hezbollahu.

 

Ndalim edhe për pesë shoqata të tjera

Përveç kësaj, Ministrja Federale e Brendshme Nancy Faeser ndaloi pesë shoqata të tjera që konsiderohen nën-organizata të IZH. Bastisjet e policisë u kryen në tetë lande federale mëngjesin e ditës së mërkurë. Janë kontrolluar gjithsej 53 ndërtesa, duke përfshirë xhamitë dhe ambientet e shoqatës, si dhe janë sekuestruar materiale dhe prona të shoqatës.

Pas bastisjeve vitin e kaluar, autoritetet e udhëhequra nga Zyra Federale për Mbrojtjen e Kushtetutës (BfV) shqyrtuan materialet e sekuestruara në lidhje me ndalimin aktual të shoqatës. Mes materialeve kishte dokumente të shumta të shkruara, pajisje për ruajtjen e të dhënave, kompjuterë dhe literaturë.

Sipas dokumentit të Ministrisë Federale të Brendshme, i cili përmban më shumë se 200 faqe, IZH dyshohet se propagandon antisemitizëm agresiv dhe armiqësi masive ndaj Izraelit, gjë që shkel idenë e mirëkuptimit ndërkombëtar. Shoqata gjithashtu, siç u tha, përhap ideologjinë e islamizmit totalitar, siç mbështetet nga regjimi iranian.

 

Akuza për mbështetje të Hezbollahut

Dokumenti përmban edhe një pjesë ku flitet për mbështetjen e terrorizmit: Shoqata akuzohet për mbështetjen e organizatës terroriste Hezbollah, e cila është e ndaluar në Gjermani, për shembull përmes rekrutimit të njerëzve dhe mbledhjes së donacioneve.

Ministria Federale e Brendshme pretendon gjithashtu se IZH ka ndërtuar një strukturë në të gjithë Gjermaninë që ofron udhëzime politike dhe fetare për xhamitë lokale dhe transmeton pikëpamje antisemite dhe antidemokratike në emër të shtetit iranian.

“Xhamia Blu” njihet si një nga qendrat më të rëndësishme të komunitetit fetar shiit në Evropë. Shoqata IZH, e cila u themelua në vitin 1953, fillimisht u financua nga iranianët në mërgim. Ajo konsiderohet të ketë lidhje të ngushta me Iranin, veçanërisht që nga marrja e pushtetit pas 1979 nga fundamentalistët fetarë në Teheran.

Zyra e Hamburgut për Mbrojtjen e Kushtetutës monitoron punën e IZH që nga viti 1993 dhe e klasifikon këtë shoqatë si islamiste, sepse përfaqëson ideologjinë fundamentaliste të regjimit iranian. Sipas Zyrës për Mbrojtjen e Kushtetutës, ajo është një “degë e jashtme e Teheranit që vepron sipas direktivave”.

 

Aktakuza e pasuksesshme

Kundër mbikëqyrjes nga Zyra për Mbrojtjen e Kushtetutës, drejtuesit e IZH kanë bërë padi, por pa sukses. Në qershor 2023, pas një gjyqi dyditor, Gjykata Administrative në Hamburg vendosi që autoritetet ende mund ta klasifikonin shoqatën si një organizatë islamiste me qëllime që janë kundër kushtetutës dhe se mund ta përmendnin atë në Raportin për Mbrojtjen e Kushtetutës. Gjykata vlerësoi se vetëm disa deklarata për IZH në Raportin për Mbrojtjen e Kushtetutës të vitit 2019 ishin të paligjshme.

“IZH është qartësisht një institucion ekstremist dhe antidemokratik,” tha Senatori i Brendshëm i Hamburgut Andy Grote (SPD) pas dënimit.

Një rrethanë fatlume për shërbimet e sigurisë ishte një zbulim aksidental disa vite më parë, kur në aeroport kontrollohej bagazhi i imamit të “Xhamisë Blu”, i cili shpesh qëndronte në Teheran. Me atë rast, anëtarët e Policisë Federale zbuluan disa fletore dhe dokumente, duke përfshirë dokumente që mund të lidhen me aparatin e sigurisë iraniane.

Nga dokumentet e gjetura, doli se udhëheqja e xhamisë me sa duket ka lidhje të ngushta me regjimin në Teheran. Në dokumente, për shembull, kreu i IZH, Mohammad Hadi Mofatteh, në letra përmendej si “përfaqësues i liderit suprem, kreu i Qendrës Islamike të Hamburgut”. Shërbimi Federal i Inteligjencës (BND) gjithashtu konfirmoi në një raport zyrtar se vetë Mofatteh shërbeu në Korpusin e Gardës Revolucionare iraniane në fillim të viteve 1990.

 

Prona padyshim bëhet pronë e shtetit

Ndalimi i sotëm i veprimtarisë së IZH përmban edhe një zë të veçantë. Sipas informacioneve nga NDR, WDR dhe SZ, prona në Außenalster tani është në pronësi të shtetit. Nuk dihet ende se cila do të jetë e ardhmja e këtij objekti. Sipas informacioneve nga qarqet e sigurisë, Xhamia Blu duhet të vazhdojë të shërbejë për qëllime fetare edhe në të ardhmen, por ende nuk është vendosur se kujt do t’i besohet menaxhimi.

Ndalimi i sotëm i punës së IZH-së përbën një goditje të rëndë ndaj aktiviteteve dhe strukturave të regjimit iranian në Evropë, kjo u dëgjua nga qarqet e sigurisë, ndërsa në qarqet diplomatike pritet që Teherani të mund të reagojë ndaj kësaj lëvizjeje duke ndaluar punën e Organizatave dhe institucioneve gjermane në këtë vend. Apo edhe masa më të rënda hakmarrëse.

 

Frikë nga hakmarrja

Sipas informacioneve të NDR dhe WDR, në Ministrinë e Punëve të Jashtme ka shqetësim të madh se shtetasi gjermano-iranian Jamshid Sharmahd, i dënuar në shkurt 2023 për akte të dyshuara terroriste, tani mund të ekzekutohet. Sharmahd, i cili ishte aktiv në opozitën iraniane në mërgim, u arrestua nga shërbimi i inteligjencës iraniane në Dubai në verën e vitit 2020 dhe u transferua në Iran. Që atëherë ai është në burg në Teheran.

Gjykata Revolucionare e shpalli këtë 68-vjeçar ndër të tjera përgjegjës për sulmin terrorist ku mbetën të vrarë 14 persona. E njëjta gjykatë e akuzoi edhe për bashkëpunim me shërbime të huaja inteligjente, si CIA amerikane apo Mossadi izraelit. Sharmahd, megjithatë, i ka mohuar vazhdimisht akuzat.

Ministrja e Jashtme, Annalena Baerbock (të Gjelbërit) e quajti vendimin të papranueshëm dhe i bëri thirrje qeverisë iraniane që ta “anulojë atë menjëherë”. Në reagim ndaj vendimit, qeveria gjermane dëboi dy punonjës të ambasadës iraniane në Berlin, duke përfshirë një anëtar të shërbimit inteligjent iranian.

WDR/MDR/ARD