Ishte vetëm çështje kohe kur ndonjëra nga partitë shqiptare në ish-IRJM do të abuzonte me situatën delikate të krijuar me insistimin e Serbisë për “Republikën Serbska” në Kosovë, duke bërë paralelizma mes serbëve në Kosovë dhe shqiptarëve në ish-IRJM.  Dhe ashtu ndodhi.

Partia erdoganiste Alternativa, e sapodëbuar nga koalicioni qeverisës me LSDM dhe BDI, doli me “shashkën patriotike” të thirrjes drejtuar partive shqiptare BDI, ASH dhe BESA, të cilat drejtojnë Komuna në RMV, të ngrejnë nismën për themelimin e “Asociacionit të Komunave Shqiptare në RMV”, duke kërkuar që ky Asociacion të ketë po ato kompetenca që bashkësia ndërkombëtare kërkon t’i ketë “Asociacioni i Komunave me Shumicë Serbe në Kosovë”.

Motivi skajshmërisht abuzues i krerëve të kësaj partie, i bën moskokëçarës për pasojat dhe pikëpyetjet që ngren kjo iniciativë: – Do ishin dakord ata që “Asociacioni i Komunave Serbe në Kosovë” të ketë kompetenca ekzekutive, në mënyrë që në saje të paralelizmit, këto kompetenca t’i ketë edhe “Asociacioni i Komunave shqiptare në ish IRJM”? Cilat janë pasojat nga refuzimi i pritur i kësaj iniciative nga partitë  tjera shqiptare të akomoduara në pushtetin qendror dhe atë lokal? A i jepet mesazhi i gabuar bashkësisë ndërkombëtare se shqiptarët në ish IRJM janë kundër iniciativave për të vetëvendosur dhe për t’u vetëqeverisur?

Padyshim, çdo kërkesë e shqiptarëve të cilët përfaqësojnë së paku 30% të popullsisë në ish-IRJM, për ridefinimin e shtetit dhe sistemit qeverisës, nga ai unitar në federativ/konfederativ është e drejtë dhe e ligjshme.  Është zgjidhja e vetme që atyre do t’u jepte mundësinë për t’u vetëqeverisur në njësitë e tyre shtetërore. Në këtë mënyrë, jo vetëm që do të gëzonin të gjitha të drejtat kolektive si popull autokton dhe shtetformues, jo vetëm që përfaqësuesit e tyre politikë do ju jepnin llogari drejtpërdrejt zgjedhësve në vend të partive sllave, jo vetëm që do të ishin në gjendje të zbatojnë politika kombëtare zhvillimore, arsimore dhe kulturore me buxhetin që ju takon, për të parandaluar egzodin e të rinjve jashtë vendit, por kjo do të shuante edhe konfliktet dhe do të relaksonte njëherë e mirë marrëdhëniet ndëretnike në këtë vend.

Por jo duke imituar më pak se 4% kolonë serbë në Kosovë, të mbledhur rreth grupeve kriminale serbe që zbatojnë urdhërat e Beogradit në Kosovën me mbi 90% shqiptarë! Kërkesa për “Asociacioni i Komunave Serbe në Kosovë” nuk është një kërkesë e ligjshme e banorëve të Kosovës që mund të merret si shembull, por një rrugë e tërthortë, invazive, hegjemoniste e Beogradit, për të formuar “Rebpublikën Serbska” në Kosovë, që do të coptonte dhe Bosnjëzonte Kosovën, për ta shëndruar atë në një shtet jofunksional, dhe në këtë mënyrë, në një pre të lehtë që në një të ardhme të afërt ta kthente përsëri si pjesë të Serbisë.

Shqiptarët në ish IRJM, që edhe sipas Censusit të fundit i cili nuk fitoi besueshmërinë jo vetëm të shqiptarëve, por gjithë popujve të regjionit, përfaqësojnë 30% të popullsisë, nuk kanë nevojë për një rrugë të ndërmjetjme për të realizuar të drejtat e tyre kolektive, aq më pak duke marrë shembullin e serbëve të Kosovës!

Zgjidhja është shumë e vonuar, por një hap larg!

Mjafton që krerët e korruptuar të partive shqiptare të heqin dorë nga shtëpitë milionshe në lagjet ekskluzive të Shkupit, postet, tenderat dhe përfitimet e tjera në shkëmbim të mercenarizmit të tyre politik, dhe të tërhiqen jo vetëm nga pushteti ekzekutiv, por edhe nga ai legjislativ, duke kushtëzuar çdo komunikim me palën tjetër, me ridefinimin e kushtetutës dhe të shtetit,  për të fituar pjesën e shtetit dhe pushtetit që u takon shqiptarëve.

E nëse ata nuk duan ta bëjnë këtë, janë vetë qytetarët shqiptarë ata që duhet t’i detyrojnë, duke mbushur sheshet dhe rrugët e qyteteve të tyre, për të luftuar sot për një të ardhme më të mirë dhe vende pune për fëmijët e tyre, për dallim nga ajo që kanë bërë deri tani, duke kërkuar vende pune për veten e tyre në shkëmbim të nënshtrimit ndaj këtyre partive.

Është kaq e thjeshtë!

Afrim Fanda

“Ndryshimet kushtetutese për përfshirjen e pakicës bullgare në Kushtetutën maqedonase, si popull shtet-formues duhet të miratohen… shqiptarët do ta mbështesin në tërësi identitetin maqedonas” deklaroi lideri i BDI z. Ali Ahmeti në takimin e kryeministrit shqiptar z. Edi Rama, me krerë të të partive politike shqiptare nga “Maqedonia e Veriut”, më 10 janar 2023.

Por z. Ali Ahmeti nuk është kreu i vetëm i partive politike shqiptare që mbështet identitetin “maqedonas” të bashkëqytetarëve të tij sllavë, në dëm të interesave të bashkëqytetarëve të tij shqiptarë, të cilët kushtetuta e vendit i konsideron si pakicë e ardhur!

Kështu, z. Arben Taravari votimin e ndyshimeve kushtetutese, si kusht për hapjen e negociatave me BE, e konsideron si “një mundësi shumë të mirë për afirmimin ndërkombëtar të identitetit maqedonas”. Ndërsa, kërkesën e shqiptarëve për të drejtën e tyre të pamohushme dhe të domosdoshme për “riorganizimin dhe ridefinim të shtetit” e konsideron si “frustracion” i cili mund të paraqitet vetëm në rast të “rezikimit të perspektivës evropiane”.

Ndërkohë qëndrimi i partive Alternativa dhe Besa, tani më dihet qartë – historia e shqiptarëve fillon me Perandorinë Osmane dhe konvertimin në fenë islame. Ndaj nuk janë të interesuar fare për të kaluarën e vjetër, “të pafe” të shqiptarëve!

Gjetjet arkeologjike të shumta përfshirë edhe këto të ditëve të fundit, që dëshmojnë për Shkupin kryeqendër të Dardanisë, bien ndesh me projektin sllav të identitetit “maqedonas”, që Shkupin e konsideron kryeqytetin e shtetit komb të “Maqedonisë (së Veriut)” dhe shqiptarët pakicë në këtë shtet. Ndaj keto gjurmë arkeologjike dhe këto site arkeologjike duhet të zhduken nga faqja e dheut dhe te zëvendësohen me pallate moderne dhe asfallt që mbulon historinë e vjetër – të vërtetë dhe tregon vetëm historinë e re – atë të mashtrimit dhe përvetësimit.

Lufta për legalizimin e identitetit “maqedonas” të përvetësuar nga sllavët, e maskuar me “perspektivën evropiane të shtetit” është “kauza” politike e partive shqiptare, që sqaron heshtjen e tyre gjatë këtyre ditëve, dhe angazhimin e tyre prej mercenarëve që kanë marrë detyrat nga padroni, në këmbim të privilegjeve që u jep pjesëmarrja e në pushtet.

Heshtin edhe institucionet e shtetit shqiptar, të zhytyr në krim dhe korrupsion, në vazhdimësi të sjelljes së pushtetit monist, që në mbrojtje të ideollogjiive internacionaliste, shqiptarët jashtë kufirit i la në mëshirën e sllavëve.

E Kosova, shpresojmë që mos të harrojë se kryeqyteti i Dardanisë nuk është në Kosovën e Ahtisarit, por në Shkupin e shqiptarëve të “Maqedonisë”!

Afrim Fanda

Ja, ky është dallimi, të jetosh në shtetin tënd, apo i mbajtur peng nga ca shpirt-shitur, në një krijesë artificiale, të huaj për ty siç është IRJM!

Shteti shqiptar, edhe përkundër problemeve të shumta, dëmshpërbleu para ca ditësh të përndjekurin e fundit politik, dhe kësaj kategorie që simbolizojnë ndërgjegjen dhe sakrificën e kombit për liri, ju dha zyrë me fonde të shtetit pikërisht në një godinë me një institucion të rëndësishëm siç është Kontrolli i Lartë i Shtetit (siç shihet dhe nga fotografia e bashkëngjitur).

Ndërsa në IRJM, shteti në duart e sllavo-maqedonasve dëmshpërbleu një me një, vetëm sllavo-maqedonasit bullgarofil. Udhëheqësi i BDI-së, i cili shmangu burgun duke bërë pazare me sigurimin shtetëror të Jugosllavisë së atëhershme dhe duke ikur ne Zvicër, shmangu punën në atë shtet duke siguruar dokumentin se vuan nga sëmundja e Skizofrenisë, kurrë nuk përmendi të burgosurit politik në fjalimet e tija patetike, as në institucionet kur përfaqësonte shqiptarët e as jashtë saj. Grumbulloi rreth vetes të tjerë shpirt-shitur, në mes tyre bile edhe disa ish të burgosur politik, duke u dhënë pozicione dhe vende pune në shtet, të cilët, për një grushtë para, mbyllen gojën dhe injoruan vëllezërit e tyre të një gjaku që sakrifikuan jetën ose vite nga jeta e tyre për të mirën e përgjithshme.

Afrim Fanda

Qeni leh aty ku ha, thotë populli. Për ata që financojnë dhe mbështesin islamin politik, me të cilin janë brumosur themeluesit e “Lëvizjes Besa”, të gjitha vajzat dhe gratë e pambuluara janë “kurva” që “dëgjojnë muzikë të zhurmshme, pinë alkool dhe bëjnë pornografi”. Ndaj dhe Bilall Kasami, në shenjë besnikërie ndaj vijës politike të “sulltanit”, kryen me zell detyrën e “policisë së moralit”

Por problemi nuk është tek Bilall Kasami, dhe jeniçerët e “Lëvizjes Besa” e as tek “Aleanca për Shqiptarët” që bashkë me VMRO i dhanë Lëvizjes Besa fuqinë e pushtetit lokal për të vënë në zbatim islamin politik të Erdoganit. Problemi është se këta djem dhe këto vajza për të cilët flet Bilall Kasami, zgjedhin rrugën më të lehtë, apolitike, për t’u përballur me realitetin kryekëput politik: veshët në lesh, symbyllur në ndonjë vend pune, më së miri në ndonjë OJQ… dhe të kënaqur në gjumë. Problemi është sa sa here që realiteti i hidhur ua nxjerr gjumin, vazhdojnë e vazhdojnë të habiten me realitetin e hidhur politik që i rrethon!

https://www.youtube.com/watch?v=f9NJSBiMyto…

Afrim Fanda

Teksa në këto ditë gushti në Tetovë, po shijoja freskinë e Sharit që mbrëmja ja sjell dhuratë të përditshme qytetit të Tetovës,  rrugëve kryesore të qytetit me dhimbje po shikoja po të njëjtën pamje si para zgjdehjeve vendore të vitit të kaluar, që tanimë pothuajse askujt nuk i le përshtypje: kazanë të tejmbushur me plehra, që mbushin edhe gjysmën e trotuarit përreth kazanëve, dhe si për ironi, pranë tyre “bilboarde” me slogane të partive, që këtë herë garojnë me kandidatët e tyre për zgjedhjet e parakohshme për këshillin komunal të Tetovës. Slogane për faqe të zezë, qesharake, apsurde, pa asnjë lidhshmëri llogjike me realitetin, por që shpalosin qartë etjen e partive për ta shtënë në dorë pushtetin lokal në qytetin më strategjik shqiptar në ish IRJM.

Kështu, krerët e BDI vazhdojnë me sloganin e tyre të vjetër “Bashkë… për Tetovën”. Bashkë me kë? Këtë e dinë vetëm ata, por nga përvoja e deritanishme mund të konkludojmë se e kanë fjalën për misionin e përbashkët politik me dy partite sllave, LSDM dhe VMRO-DPMNE, për të vazhduar degradimin e Tetoves (deri tani mjaft të suksesshëm).

Krerët e “Lëvizja Besa”, të cilët në zgjedhjet e kaluara vendore as me ndihmën e ASH, VMRO-DPMNE dhe LSDM, të gjitha bashkë, nuk arritën të siguronin shumicën në këshillin komunal, tani e kërkojnë këtë nga qytetarët përmes sloganit “Shumicë për 8ovën”, dhe duke ofruar pazare, ose më saktë kushte “patriotike” tetovarëve: “na jepni shumicën nëse doni që rruga “Strasho Pinxhur” të quhet “Mujdin Aliu”. Pa sqaruar tetovarët se pse këtë nuk e bënë deri tani, dhe duke lënë të nënkuptohet se “pengesë” për këtë ishin dy këshilltarët e “Më mire për Tetovën”, me ndihmën e të cilëve vitin e kaluar siguruan shumicën në Këshillin Komunal.

Slogani i hallall partisë “simotër” e LB, Alterntivës, “Tetova ka alternative”, na kujton paralajmërimin e presidentit Makron, për agjendën e islamit politik erdoganist të rezikshëm, të imponuar shqiptarëve si alternativë ndaj BDI. “Tek popullata shqiptare në RMV po punohet nga disa shërbime te huaja për turqizimin e tyre… dhe qëllimi është që deri në vitin 2050 të ketë një rritje drastike të përqindjes së turqve në RMV” ishte paralajmërimi i Makron, i cili të përforcohet akoma më shumë, kur lexon “alternativën” që na ofrojnë në deklarimet e tyre publike përplot ikonografi patriotike turke disa eksponentë të LB dhe Alteraniva, të cilët në fillim shkruajnë turqisht, pastaj “maqedonisht” e në fund shqip.

Ndërkohë krerët e ASH zgjodhën sloganin më ironik të mundur: “Jepi zë rinisë”.

Çfarë zëri ofrojnë partitë shqiptare të rinjve pa shpresa, pa motive dhe frymëzime politike, të përballur me një pasiguri absolute ekonomike dhe sociale?  Përse po largohen kaq masivisht të rinjtë shqiptarë nga Tetova dhe qytetet e tjera shqiptare në ish IRJM? Pikërisht nga pabarazia e tmerrshme sociale ku në punë hyjnë vetëm militantët e partive, të detyruar për prostituim politik për “padronët” politikë të partive, të cilët shesin ndikimin dhe fuqinë e tyre në përpjekje për të siguruar arritje dhe perfitime personale, gjë të cilën bota quan “prostituim politik”.

Te shqetëson dhe deprimon fakti qe nje numër kaq i madh i të rinjve dhe të rejave jane te gatshëm te bëhen pjese e pornografive partiake duke shkelur mbi dinjitetin dhe te ardhmen e tyre, kur sheh “billboardet” me të te rinj e te reja, të reshtuar si ushtarë partishë me në ballë injorantë me mendësi provinciale që prej vitesh kane uzurpuar partite, pushtetin dhe në përgjithësi hapsirën politike të shqiptarëve në ish IRJM. Te shqeteson fakti që ka kaq shum “prostituta intelektuale”, te gatshëm të shesin edhe mendimet e tyre këtyre injorantëve, dhe me te pavertetat ose me gjysem te vertetat e tyre të mbajne gjalle pushetin e tyre, duke demtuar te ardhmen e brezave të tërë.

Të shqetëson dhe deprimon fakti që edhe ata pak të rinjë që, në pamje të pare, nuk kanë pranuar të jenë ushtarë të bindur partish, ndaj garojnë sit ë pavarur në këto zgjedhje, nuk kanë guxim të ballafaqohen me faktin që të nxjerr sytë, se janë të drejtat kolektive të mohuara, të konsideruara si rrezik për shtetin unitar në duart e partive sllave, përgjegjesë për qytetet e pajetueshme shqiptare. Dhe për mjerim, këto shqetësime të shprehura nga të tjerët, i quajnë “radikale”. Ndaj nuk kanë guxim ta pranojnë faktin e pamohueshëm se degradimi kaq i shprehur i qytetit të Tetovës nuk është një problem teknik keqmenaxhimi që do zgjidhej me transparencën e diskutueshme të siguruar nga ata, por pasojë e abuzimit politik dhe korruptiv me pushetin lokal nga ata, që duart e lira për korupsion dhe kriminalitet në pushtetin lokal i kanë si shpërblim për dëgjueshmërinë dhe shërbimet që i kanë bërë dhe akoma i bëjnë pushtetit qendror në duart, herë të LSDM-së e herë të VMRO-së. Mungesa e guximit i bën të verbër për faktin që të nxjerr sytë, se pushteti qendror në duar e LSDM dhe VMRO, vetëm 40 km larg, kështu e do Tetovën: pa plan urbanistit, me rrugë të pista dhe me gropa, trafik kaotik, paligjshmëri dhe mungesë rendi, e mbrojtur nga vet ligji dhe rendi …! Sepse nga këto qytetet të pajetueshme, merret më lehtë vendimi për të ikur!

Ndërkohë, qytetarët shqiptarë vazhdojnë akoma të brohorasin dhe admirojnë “mbretërit lakuriqë”, krenarë për “veshjen e tyre të bukur”. Derisa një ditë, shpresojmë sa më shpjejtë,  nga turma e frikësuar e qytetarëve, të dalin  “fëmijët” e H.K. Andersenit  që do të guxojnë të thonë “por mbreti është lakuriq!”

Afrim Fanda