Arkivi mujor: Mars 2015

Maqedonia

Asnjë rezultat në raundin e parë të bisedimeve VMRO-LSDM në Bruksel

Komento

bruxelles

Asnjë afrim të qëndrimeve në ditën e parë të bisedimeve mes VMRO DPMNE-së dhe LSDM-së. Pas takimeve të ndara dhe drekës së përbashkët të punës me euro-deputetëve Eduard Kukan, Riçard Houit dhe Ivo Uajgëll, delegacionet e dy partive nga Shkupi kanë mbetur në qëndrimet e tyre fillestare për zgjidhjen e krizës.

LSDM-ja nuk ka lëvizur nga qëndrimi se dalje e vetme nga kriza është dorëheqja e Qeverisë aktuale dhe formimi i Qeverisë kalimtare, me mandat të organizojë zgjedhje të pavarura dhe korrekte. Pa përmbushjen e kësaj kërkese, social-demokratët nuk do të vijojë bisedimet për temat e tjera. Kjo është e papranueshme për VMRO-në, e cila tashmë ka bërë të ditur qëndrimin e saj fillestar se nuk do të merr pjesë në asnjë qeveri, që nuk ka marrë paraprakisht legjitimitetin në zgjedhje.

Partia e Gruevskit kërkon kthimin e LSDM-së në Kuvend, përpara hapjes së kapitujve të tjerë. Qëndrimet e dy partive ndeshen edhe sa i përket dorëheqjes së Prokurorit Publik, ndërsa VMRO DPMNE-ja duket se është e gatshme të bisedojë për ndryshimin e strukturës udhëheqëse të RTVM-së. Temë e hapur për bisedime është edhe pastrimi i listës zgjedhore dhe ndarja e partisë nga shteti.

Dy partitë rivale pritet të ndeshen edhe për procedurat juridike, tashmë të filluara në Prokurorinë Publike, për rastin “Puçi” dhe për rastin e përgjimeve. VMRO DPMNE-ja kërkon që të vazhdojë procedura kundër Zaevit për rastin “Puçi” dhe të mos ndikohet nga politika, si dhe të monitorohet nga ekspertë ndërkombëtarë. Sipas LSDM-së, sistemi aktual gjyqësor tashmë nuk ka kredibilitetin e nevojshëm për procedimin e rasteve të një rëndësie kaq të madhe. Partia e udhëhequr nga Zaevi kërkon prokuror të ri publik dhe përfshirje të ekspertëve ndërkombëtarë, për të hetuar rastin “Puçi”, por edhe aferën e përgjimeve, bashkë me të gjitha indikacionet për shkelje të ligjeve dhe kushtetutës, që dalin nga bisedat e përgjuara.

Takimet e delegacioneve të pushtetit dhe opozitës me euro-deputetët ishin të mbyllura për mediat, ndërsa pjesëmarrësit nuk dëshirojnë të japin detaje nga bisedimet. Megjithatë është tashmë e qartë se në raundin e parë të bisedimeve në Bruksel, VMRO dhe LSDM nuk janë marrë vesh për asgjë, përveç për vazhdimin e negociatave pas festës së Pashkëve. Benjamin Arifi
QËNDRIMET E LSDM-SË                     QËNDRIMET E VMRO-SË
Qeveri kalimtare                                       Nuk ka Qeveri kalimtare
Dorëheqje e Prokurorit                           Publik Prokuror Publik mbetet Zvërlevski
Dorëheqje e kryesisë së RTVM-së        Mund të bisedohet
Pastrim të listës zgjedhore                     Mund të bisedohet
Të mos kthehen në Kuvend                   Kthimi në Kuvend para kapitujve tjerë
Funksionarët të ndiqen penalisht           Vazhdon procedura kundër Zaevit

Maqedonia

Negociatat në Bruksel përfundojnë pa sukses

Komento

1_100730040

Në Bruksel ka përfunduar pa asnjë rezultat pozitiv dialogu i nisur politik midis pozitës dhe opozitës maqedonase.

Përfaqësuesit e VMRO-DPMNE dhe të LSDM-së në këto bisedime të ndërmjetësuara nga treshja e eurodeputetëve Ivo Vajgl, Eduard Kukan dhe Riçard Hovit kanë shprehur qëndrime kontradiktore duke mos gjetur asnjë pikë të përbashkët. Bisedimet janë ndjekur edhe nga zyrtarët e lartë të Komisionit Evropian Kristina Grau dhe Dejvid Kulen.

Siç  mësohet, delegacioni i LSDM-së i udhëhequr nga Radmilla Sheqerinska ka qëndruar pas kërkesave për qeveri kalimtare, dorëheqje të ministrave, udhëheqësisë së RTVM-së si dhe të prokurorit public. Por këto kërkesaq janë hedhur poshtë nga përfaqësuesit e VMRO-DPMNE.

Në një komunikatë të lëshuar nga zyra e treshes së eurodeputetëve theksohet se palët negociatore janë dakorduar për një takim tjetër të radhës. “Sot u zhvillua takimi në Bruksel midis përfaqësuesve të partisë kryesore maqedonase në pushtet dhe partisë opozitare me anëtarët e Parlamentit Evropian. Të gjithë pjesëmarrësit janë dakorduar që negociatat duhet të vazhdojnë”, thuhet në deklaratën e shkurtër të lëshuar nga zyra e eurodeputetëve.  Palët janë dakorduar që pas festave ortodokse të Pashkëve do të zhvillohet raundi tjetër i negociatave.  (INA)

Takimet me dyer të mbyllura në Bruksel

Në Bruksel po zhvillohen takimet midis dy partive politike maqedonase VMRO-DPMNE dhe LSDM për tejkalimin e krizës politike në Maqedoni.

Siç bëhet e ditur, përfaqësuesit e dy partive nga ora 11.00 kanë zhvilluar takime të veçanta të tyre me tre eurodeputetët ndërmjetësues Kukan, Hovit dhe Vajgl, ndërsa pasdite do të jetë takimi i përbashkët që pritet të zgjas deri në mbrëmje.

VMRO-DPMNE e përfaqësuar nga tre përfaqësuesit e saj Nikola Popovski, Nikola Todorov dhe Ilija Dimovski kanë shprehur qëndrimet e tyre para tre eurodeputetëve, ndërsa më pas të njejtën gjë kanë bërë edhe delegacioni i opozitës maqedonase i përbërër nga Radmila Sheqerinska, Renata Deskovska dhe Viktor Gaber.

 

Takimet dhe negociatat po zhvillohen me dyer të mbyllura dhe se gjatë darkës pritet që eurodeputetët të japin vlerësimet e tyre lidhur me ecurinë e negociatave për të tejkaluar krizën politike. (INA)

 

Bruksel, nisin sot negociatat midis VMRO dhe LSDM për krizën politike

Me nismën e Parlamentit Evropian nisin negociatat që përjashtojnë partitë shqiptare.

Përfaqësuesit e dy partive më të mëdha politike VMRO-DPMNE dhe LSDM sot në Bruksel me monitorimin dhe nismën e Parlamentit Evropian do të nisin negociatat për tejkalimin e krizës politike dhe gjetjen e një zgjidhje të pranueshme që do t`i hapte rrugë dialogut politik dhe zgjidhjes institucionale të krizës.

LSDM në këtë tryezë do të jetë e përfaqësuar nga zëvendëskryetarja Radmilla Shekerinska, ndërsa VMRO-DPMNE nga shefi i diplomacisë Nikola Popovski.

Ky format i këtij takimi do të mbikëqyret dhe ndërmjetësohet nga treshja e PE-së, eurodeputetët Ivo Vajgl, Eduard Kukan dhe Richard Howitt. Treshja evroparlamentare ka shprehur optimizëm se dy partitë më të mëdha politike do të gjejnë rrugën e zgjidhjes dhe përmes dialogut do të evitojnë krizën e thellë politike në Maqedoni.

Por, në këto bisedime nuk janë përfshirë partitë politike shqiptare.  BDI kërkoi përfshirjen e saj në këto bisedime, por nuk ka pasur asnjë përgjigje nga organizatorët e këtij formati të negociatave. Negociatat midis dy partive më të mëdha maqedonase pritet të zgjasin deri në mbrëmje, duke qenë një tentim i parë për tejkalimin e krizës. (INA)

Sport

Valon, merr shembull nga Messi – ja si dashurohet atdheu

Komento

MesiLionel Messi jo vetëm se është lojtari më i mirë në historinë e futbollit. Ai mund edhe të shërbejë si shembull për shumë futbollistë me origjinë shqiptare.
Valon Behrami në një intervistë së fundmi tha se ai ndihet zvicëran dhe se ashtu duhet të bëjnë të gjithë ata që u rritën si futbollistë në shtetin helvetik.

Kjo deklaratë u prit nga një furi polemikash prej tifozëve shqiptarë.

Por, një shembull jo vetëm për talentin e futbollit, por edhe për atë se si dashurohet atdheu dhe vendi nga vjen, pa dyshim se është Lionel Messi, transmeton Telegrafi.

Edhe pse i ka fituar të gjitha trofet e mundshme me klubin, Lionel Messi këtë nuk e ka bërë me Argjentinën. Ai ishte afër, por nuk e bëri.

E kishte mundësinë që të luante për Spanjën dhe të fitonte edhe këtë trofe. Por, ai nuk e bëri.

“E dija se Spanja po më kërkonte. Ata më kanë bërë një ofertë të parrefuzuesshme. Por, unë e dua kulturën time, vendin tim. Unë kam jetuar atje për 12 vjet dhe pjesën tjetër në spanjë, kam mundur të shpallem edhe kampion bote me Spanjën”.

“Por, këtë dua ta bëj me vendin tim. Ndonjëherë ndihem xheloz për bashklojtarët e mi të Barcelonës që e kanë Kupën e Botës, por dashuria ime e parë është Argjentina”.

“Unë e di se mund ta fitojmë Kupën e Botës. Ne do ta bëjmë këtë për popullin tonë”, u shpreh Messi në një intervistë kohë më parë.

Fjalët janë të tepërta për të përshkruar madhështinë dhe shembullin që reprezenton ky lojtar i madh. /Telegrafi/

Kosova

Nesër gjashtë orë e pakalueshme Gryka e Kaçanikut

Komento

Nga ora 10:00 deri në 16:00 mbyllët rruga nacionale N2 Hani i Elezit – Prishtinë do të jetë e bllokuar në Grykën e Kaçanikut.

Këtë do ta bëjë Ministria e Infrastrukturës, që siç thotë, me qëllim të largimit të erodimeve,pasi që njëra korsi e saj është jashtë funksionit.

Për t’u kryer kjo punë nga kompania e mirëmbajtjes në Rajonin e Ferizajt,përveç Policisë së Kosovës e cila duhet t’i mbështetë në menaxhimin e trafikut duke e orientuar atë në drejtim të rrugës rajonale Glloboçicë-Doganaj, rruga nacionale Hani i Elezit-Prishtinë në Grykën e Kaçanikut do të jetë e mbyllur për 6(gjashtë) orë dhe se trafiku do të zhvillohet rrugës alternative për Glloboçicë. (rtk)

Kosova

Ende i lirë krimineli serb, që ekzekutoi gazetaren britanike

Komento

Në shenjë hakmarrjeje për bombardimet e NATO-s mbi objektin e Televizionit Shtetëror Serb (RTS) në vitin 1999, mafia serbe në Mbretërinë e Bashkuar vrau gazetaren angleze, Jill Dando.

Kështu shkruan Mirror, duke iu referuar burimeve policore britanike.
Kriminelët e fuqishëm serbë organizuan dhe kryen vrasjen e gazetares britanike në një klub nate në Londër, shkruan në të dhënat policore britanike, transmeton Telegrafi.

“Personat të cilët kanë planifikuar vrasjen e Jill Dando takoheshin rregullisht në klubin e natës ‘Scandal, në West End’ të Londrës. Një nga ata ishte një burrë i gjatë me një tatuazh në qafë”, thotë dokumenti policor.

Por, ky person kurrë nuk është gjetur, ndërsa informacioni kurrë nuk është verifikuar, pasi hetimet u përqendruan tek miku i tij, Barry George.

“Serbët takoheshin rregullisht në klubin “Scandal”. Ata njiheshin mirë, pasi që kishin edhe tavolinën e tyre të rezervuar, ku edhe planifikuan vrasjen e gazetares”, tha një burim i policisë.

Televizioni shtetëror serb u bombardua në vitin 1999, ku u vranë 16 persona, ndërsa Jill u vra vetëm tri ditë më vonë.

Gjithashtu në këtë raport policor thuhet se vrasësi ishte tifoz serb i klubit londinez të Chelseat, i cili rregullisht gjendej në shkallët e stadiumit të Stamford Bridge, pranë shtëpisë së gazetares në Fulham, Londrën Juglindore.

Në raportin policor thuhet se krimineli serb është “i gjatë 180 centimetra, mbi 30-vjeçar “, ndërsa “serbi këtë krim e kreu duke u hakmarrë për bombardimet e NATO-s, të cilat kishin për qëllim ndaljen e spastrimit etnik shqiptar në Kosovë dhe vrasjen e civilëve” .

Kujtojmë se Jill Dando udhëhiqte fushatën televizive për ndihmë ndaj refugjatëve shqiptarë të Kosovës, të cilët u larguan nga shtëpitë e tyre gjatë viteve të ’90-të të shekullit të kaluar dhe vrasjes së civilëve shqiptar nga ana e kryekriminelit serb, Sllobodan Millosheviq.

Dokumentet e policisë gjithashtu zbulojnë se tre ditë pas vrasjes së Jill Dando, televizioni BBC morri një telefonatë kërcënuese, ku paralajmërohej vrasja e Anne Robinson dhe Alice Bir.

“Lajmërohem nga Serbia, do ta vras Anne Robinson, Alice Bear dhe dy të tjerë”, shkruan në raportin policor.

Avokati Michael Mansfield, që përfaqëson Barry George, këmbëngul për një rishikim urgjent të lidhjeve me Serbinë.

“Në atë kohë ka pasur presione politike në lidhje me atë që ndodhte në Ballkan dhe me Millosheviqin. Ne argumentojnë se kjo ishte hakmarrje”, beson avokati duke shtuar se klienti i tij nuk kishte lidhje me vrasjen e gazetares britanike. (rtk)

Shqipëria

Basha nuk kandidon në Tiranë, vendimi pritet të bëhet sot publik

Komento

Basha

Partia Demokratike vendosi të mos kandidojë sërish për Bashkinë e Tiranës, kryetarin e saj Lulzim Basha.

Burime zyrtare e konfirmuan këtë lajm për Top Channel dhe shtuan se zoti Basha do ta deklarojë këtë vendim paraditen e sotme.

Ky është një vendim i pritshëm i kryetarit të opozitës, i cili zgjedh t’i përkushtohet plotësisht drejtimit të Partisë Demokratike.

Strukturat e kësaj partie ende nuk janë mbledhur për të shqyrtuar propozimet e bazës për Bashkinë e Tiranës, kjo pritet të ndodhë javën e ardhshme.

Të mërkurën, zoti Basha ka parashikuar një takim me aleatët në opozitë për të vendosur se si do të paraqiten në zgjedhje.

Sipas disa informacioneve në Partinë Demokratike mbizotëron ideja që ajo të mos u lërë aleatëve zona të lira dhe praktikisht të provojë të dalë e vetme në zgjedhje. Megjithatë kjo mbetet për t’u konfirmuar në ditët në vazhdim. E sigurt është se Bashkia e Durrësit nuk do t’i lihet Partisë Republikane me kandidatin e saj Agron Duka.

Partia Demokratike do të nisë procesin e kandidatëve pas datës 4 prill, pasi ajo të zhvillojë edhe dy protesta të rëndësishme anti-qeveritare, një në Shkodër më 2 prill, në ditën përkujtimore të katër të vrarëve të 24 viteve më parë dhe një në Vlorë në datën 4 prill.

Me deklarimin që do të bëjë sot zoti Basha hapet edhe gara e kandidatëve të Partisë Demokratike për Tiranën. Ajo që dihet brenda kësaj partie është se më i favorizuari është Sekretari i Përgjithshëm, Arben Ristani, si emri më i votuar nga strukturat e Partisë Demokratike të kryeqytetit.  Top Channel

Shqipëria

Zgjedhjet vendore, Rama kërkon zgjerimin e koalicionit, ftesë edhe FRD-së

Komento

Rama

Kryeministri Edi Rama kërkon ta zgjerojë sa më shumë gamën e bashkëpunimit politik për zgjedhjet lokale të 21 qershorit.

Në një deklaratë për mediat pas mbledhjeve me deputetët e PS në qarqe dhe më pas me ata të Tiranës, Rama ka theksuar se për kandidatët do të vendosë në konsultim me aleatët.

“Kemi konsultuar shumë emra dhe do të vendosim bashkarisht me partnerët e koalicionit. Në këtë koalicion ka hapësirë edhe për zëra të tjerë. Kam parasysh këtu FRD-në. Pasi kemi hartuar një reformë të madhe elektorale besoj se në këtë fazë kjo forcë politike mund të bëhet pjesë e koalicionit qytetar jo për të përputhur programet, por për të rritur spektrin e ideve”, ka deklaruar Rama.

I pyetur nga mediat, shefi i qeverisë ka nënvizuar se ka biseduar edhe me kreun e PBDNJ-së, Vangjel Dule, i cili sipas tij është dhe do të jetë pjesë e koalicionit për këto zgjedhje.

Kreu i partisë më të madhe të mazhorancës ka bërë më tej me dije se rezultatet e anketimeve të para për zgjedhjet janë inkurajuese, ndërsa ka shtuar se koalicioni do të bëjë të tjera në ditët në vazhdim.

“Besoj se në ditët e ardhshme do të mund të harmonizojmë qëndrimet në koalicion”, ka thënë Rama, i cili është shprehur i sigurt se më 21 qershor Bashkia e Tiranës do të kalojë majtas.

“Në këtë proces Tirana ka zënë vendin kryesor dhe më 21 qershor Bashkia e Tiranës do të ndahet nga kryetari që nuk bëri asgjë për kryeqytetin”, ka shtuar Rama.

Takimi me deputetët e PS, diskutohen emrat për kryeqytetin

Në orët e pasdites së të hënës kryeministri Rama zhvilloi një maratonë takimesh me deputetët socialistë sipas qarqeve, në kuadër të përzgjedhjes së kandidatëve për zgjedhjet vendore.

Të fundit që ai takoi ishin deputetët e Tiranës, me të cilët kryetari i PS diskutoi për emrat e kandidatëve për bashkinë e kryeqytetit.

Nuk ka informacione se çfarë kanë propozuar deputetët, por nga kontaktet me ta ka rezultuar se ndajnë mendime të ndryshme mbi kandidatin që do të përfaqësojë Tiranën.

Në përfundim të takimit, deputeti Fatmir Xhafaj bëri këtë deklaratë: “Procesi i përzgjedhjes së kandidatëve është shumë i rëndësishëm, për këtë arsye do të merren parasysh gjithë faktorët e mundshëm. Kriteret pastaj janë çështje e brendshme e partisë”, deklaroi Xhafaj.

Ndërkohë, nga burime konfidenciale mësohet se opinionet janë të ndara përsa i përket emrave të Erjon Veliajt, Pandeli Majkos dhe Blendi Klosit për Tiranën.

Fjala e fundit, pavarësisht propozimeve, i mbetet kryeministrit Rama. Edhe kryetari i LSI, Ilir Meta, pas një takimi të zhvilluar me Ramën, tha se kryeministri ka dorë të lirë për të zgjedhur.

Vlen të theksohet se menjëherë pasi dolën nga selia e PS, deputetë të qarqeve të ndryshme nuk dhanë emra. Por gjatë takimit po. Ben Blushi tha se, për në Elbasan është propozuar emri i kryetarit aktual Qazim Sejdini, ndërsa në Fier nuk do të kandidojë më Armand Zeqo.

Për këtë bashki, deputeti Armando Subashi deklaroi se, do të ishte i gatshëm ta merrte nëse do t’i jepej “bekimi” nga Edi Rama.

Sa për Korçën ka një propozim për kryetarin aktual Sotiraq Filo, ndërsa për Shkodrën, nga dy burime të ndryshme mësohet se propozimi është zonja Keti Bazhdari.

Për në Durrës, deputeti i këtij qarku Blendi Klosi tha se kandidatura e Vangjush Dakos është më e mira. Ndërkohë, është propozuar rikandidimi i Indrit Dukës për Bashkinë e Shijakut.

Dy aleatët e koalicionit qeverisës, Edi Rama dhe Ilir Meta, në ditët e ardhshme mund të bëjnë një dalje të përbashkët publike për të shpallur kandidatët.  Top Channel

 

Shqipëria

Ndalohet shefi i Interpolit dhe ish-shefja, dyshohen për lidhje me çështjen “Frroku”

Komento

Shërbimi për Çështjet e Brendshme dhe Ankesat ka ndaluar gjatë orëve të vona të së hënës dy drejtues të lartë të Interpol Tiranës për çështjen e Mark Frrokut në Belgjikë.

Burime të policisë thanë se është ndaluar  drejtori i Interpolit Tiranës, Artan Bajraktari dhe specialistja, Loreta Alla. Ata nuk kanë njoftuar autoritetet që Frroku ka qenë i kërkuar në Belgjikë, pasi kërkesa nga autoritetet belge ka mbërritur në Tiranë në janar të këtij viti.

Oficerët akuzohen se kanë fshehur disa prova dhe nuk kanë vepruar për këtë çështje.

Zyrtarisht Prokuroria e Përgjithshme njoftoi të shtunën se Belgjika kërkon arrestimin e deputetit Mark Frroku nën akuzën e “vrasjes me paramendim”, mbi një ngjarje të ndodhur në vitin 1999 në Bruksel.

Për këtë çështje, Këshilli i Mandateve dhe Imuniteteve diskuton sot për heqjen e imunitetit të Mark Frrokut, i cili ndodhet në ‘arrest shtëpie’ për çështjen e denoncuar nga Tom Doshi.   / Top Channel

Analiza

Të (mos) jesh shqiptar

Komento

MM

Shqiptarët ortodoksë të Maqedonisë po rikthehen në vëmendje. Ka prej tyre që po pranojnë rrënjët shqiptare, të tjerë jo. Të çarë e përçarë me shqiptarët muslimanë, ata u asimiluan duke krijuar një identitet tjetër nga ai shqiptar, e duke u deklaruar në masë dërrmuese maqedonas. Mes tyre edhe Mavrova, një zonë turistike kaq shumë e njohur, që fsheh pas gjurmët e rrënjët shqiptare, që pavarësisht asimilimit nuk janë zhdukur.

Reka e Epërme, jo larg Dibrës së Madhe dhe dikur pjesë e natyrshme e saj, ka pasur fshatra të shumtë, të cilët – sipas të dhënave të kohës së Perandorisë Osmane, por edhe ato më të vona – në masën 80 për qind jetoheshin nga shqiptarë të besimit ortodoks dhe atij musliman.

Fillimisht bullgarët e më pas serbët vijuan skemat për asimilimin e këtij komuniteti. Gjithçka vazhdoi në shekullin e XIX, u ndal disa kohë për shkak të Luftës së Dytë Botërore, dhe mori trajtë të plotë e të dhunshme sidomos pas krijimit të Jugosllavisë, ose më saktë pas prishjes së Shqipërisë komuniste të Enver Hoxhës me Jugosllavinë e Titos.

Presioni i vazhdueshëm, dhuna në ndryshimin e mbiemrave, shkollimi i detyrueshëm vetëm në gjuhën sllave, e më pas edhe joshja me mënyra të ndryshme, çuan në një proces asimilimi dhe largimi masiv. Kjo ishte e vetmja zgjidhje për këtë zonë të thellë por me zemër të madhe, që përballoi shumë mbi kryet e saj, duke nisur nga humbja e detyruar e identitetit kombëtar.

Sot, masa dërrmuese e fshatrave të Rekës janë të zbazëta, pasi shumica e banorëve janë larguar. Mes tyre, vetëm Mavrova vazhdon të ruajë ritmin e jetës, e kjo vetëm falë turizmit.

Parku kombëtar i Mavrovës, i shpallur i tillë në vitin 1949, shtrihet në një hapësirë të gjerë, ku natyra e paprekur ofron bukuri të rralla, me florë dhe faunë mjaft të pasur, siç në të gjithë Rekën e Epërme. Banorët të flasin në masë dërrmuese shqip, edhe pse nuk pranojnë të jenë të tillë.

Shqiptarë në rrënjë, me gjuhë shqipe, dhe jo shqiptarë sot, edhe pse gjuha është po aty. Për kamera të hapur nuk bëhet fjalë, gjithçka duhet bërë në fshehtësi.

Mjafton një kredhje bizneseve të zonës, për të kuptuar e për të prekur të vërtetat e tyre, sigurisht jo në mënyrë të drejtpërdrejtë.

Edhe pyetjet duhet të jenë të kujdesshme, ose më mirë duhet të duken sa më natyrale, për të mos lënë asnjë hije dyshimi.

Ndarja fetare ka qenë ajo që ka ndikuar më shumë. Makineria e propagandës ka dhënë rezultatet e saj. Shumica e banorëve të flasin në gjuhën shqip, ka të tjerë që dukshëm të kuptojnë, por nuk duan të të përgjigjen. E pavarësisht kësaj, shqipja pasohet natyrshëm brez pas brezi, edhe pse shkolla nuk ka pasur kurrë, apo banorët detyroheshin dhunshëm të mos flisnin as rrugicave të fshatit gjuhën e tyre.

“Këtu kemi të ndryshëm, ka dhe shqiptarë, ka edhe serbë e bullgarë, të përzier janë. Por flasin edhe shqip, flasin. Nuk ka Rekë, janë ngritur dhe kanë shkuar nga qytetet. Ka qenë njëherë, tani është zbrazur krejt”, thotë një banor.

Për të gjetur Rekën, Mavrovën e dikurshme, mjafton të shikosh fotografitë e vjetra. Dasmat karakteristike, luftëtarët, banorët e këtyre zonave, e gjithçka tjetër që flet për identitetin e tyre, përmes veshjeve e traditave të shumta.

Sigurisht ka kaluar kohë që nga kryengritja e 1913-s, që vinte si pasojë e shkëputjes nga toka amë. Një kryengritje që nisi nga Dibra, e arrinte deri në malin e Prishtinës, të Manastirit, Velesit, Gostivarit, Strugës e kështu me radhë. Ishte 26-28 shtatori i atij viti, kur luftimet më të ashpra do të bëheshin pikërisht në Mavrovë e Kërçovë, ku trupat kryengritëse morën gjithçka nën kontroll, duke kërkuar bashkimin e menjëhershëm me Shqipërinë, çka tregohet edhe në dokumente të shumta të Arkivës shqiptare të Shtetit.

Mëse 102 vite më pas, shumëçka ka shkuar, është shuar, është mbuluar, ashtu si mjergulla që duket sikur do të përpijë gjithçka, edhe historinë.

Në Mavrovën e sotme nuk ka më asgjë të dukshme, që të lidh me identitetin e shkuar. Askush nuk tregon, askush nuk flet, askush nuk kërkon të thyejë realitetin e imponuar.

“Moti sot nuk është mirë. Se kur është i mirë, është tjetër gjë. Mjegulla ka rënë tashmë dhe nuk mund të shohësh liqenet”. Shumica, nëse i pyet për gjuhën, të përgjigjen shkurt. “Po, e di, e kam mësuar”.

Mjafton pak, për të kuptuar kaq shumë, e për të ndjekur përmes tyre gjurmët, që të çojnë te të vërtetat. Të vërteta, që s’kanë lidhje me nacionalizmat e sëmura, e aq më pak me thirrje për urrejtje, por thjesht dhe vetëm me historinë, atë histori që e kanë bërë njerëzit e këtyre zonave, e që është e dokumentuar dhe faktuar kudo, edhe pse nuk pranohet.

Përtej përpëlitjeve të sfilitura të politikës shqiptare në Maqedoni, një punë të jashtëzakonshme me këtë komunitet po bën sot shoqata “Josif Bageri”, që ka nisur të shkundë atë që dukej e humbur kohë më parë. Atë që, megjithatë, flet ende kudo, edhe në Mavrovë, gjuhën shqipe. / Top Channel

Bota

Kush ka “hise” në luftën e Jemenit?

Komento

Jemeni është në qendër të një lufte në mes të fuqive rajonale, Iranit dhe Arabisë Saudite. Kjo po shërben si burim i frikës për një luftë më të gjërë në mes të sunitëve dhe shiitëve. Ndikimi i kësaj lufte shkon përtej kufijve të saj.

Konflikti në Jemen është një tregim me dy pjesëmarrës

Vendi i ka praktikisht dy liderë, ish presidentin Ali Abdullah Saleh që është shiia, i zëvendësuar nga ish zëvendësi i tij, Abdu Rabbu Mansour Hadi që është sunit, zëvendësim ky që u bë gjatë pranverës arabe.

Jemeni ka dy rajone, Jemenin verior dhe atë jugor, të cilat u bashkuan në vitin 1990 derisa Saleh ishte president.

Vendi ka gjithashtu dy kryeqytete, Sanaa në veri dhe Aden në jug, si dhe ka dy degë të Islamit (65 % e popullatës myslimane që përbëjnë 95 % të vendit, janë suni, ndërsa 35 % janë shiia).

Ky shtet i ka dy grupe ekstremiste, Huthit që janë rebelë shiit dhe që e morrën veriun nën kontroll duke e detyruar presidentin Hadi që të largohet. Të njëjtit janë tani duke lëvizur në drejtim të Adenit.

Al Kaida sunite, në anën tjetër është grupi militant më aktiv që kontrollon pjesë të mëdha të veriut dhe pjesës qëndrore të Jemenit, derisa lufton kundër qeverisë, Arabisë Saudite, Huthit, separatistëve jugor dhe përfundimisht kundër SHBA-ve.

Jemeni ka gjithashtu dy përkrahës rajonal. Irani e përkrah Huthin, materialisht dhe ushtarakisht; Arabia Saudite e përkrah qeverinë e udhëhequr nga Hadi, ndërsa nga 25 marsi po udhëheqë sulmet ajrore të 10 vendeve kundër rebelëve Huthi, duke e detyruar Teheranin që ta dënojë intervenimin.

Solidariteti sunit

Të gjitha shtetet që janë pjesë e koalicionit që po e realizon fushatën ajrore kundër rebelëve shiit, Huthi, janë shtete sunite.

Pjesë e tij, janë kryesisht vendet e Gjirit arab, por edhe vende si Egjipti, Sudani, Pakistani, Turqia.

Çmimet e naftës

Lufta në Jemen ka ndikuar pak në çmimet e naftës, pasi siç ka vlerësuar edheGoldman Sachs, ky konflikt do të ketë pak ndikim në furnizimet globale të naftës.

Arabia Saudite është figura qëndrore në rënien e çmimeve të naftës që filloi në vitin 2014. Ndërsa Irani, vlerëson se rënia e çmimeve të naftës është rezultat i konspiracioneve saudite dhe amerikane kundër Teheranit, të hyrat nga nafta të së cilës janë goditur rëndë nga sanksionet perëndimore.

Rusia

Moska e cila përfiton më së shumti kur çmimet e naftës ngriten, është duke u munduar shumë që të luajë rolin e paqebërësit, prejse kanë nisur sulmet ajrore kundër Huthit në Jemen.

Presidenti rus, Vladimir Putin, deri më tash ka biseduar me kryeministrin izraelit, Benjamin Netanjahu, presidentin iranian, Hassan Rohani, ndërsa mediat iraniane e interpretuan bisedën e dy liderëve si kërkesë ndaj Arabisë Saudite që të ndalojë intervenimin.

Turqia

Presidenti turk, Rexhep Taip Erdogan, i cili do ta vizitojë Teheranin në muajin prill, ka qenë kritik i ashpër ndaj rolit të Teheranit në Jemen.

Ditë më parë, Erdogan përpos që i ka përkrahur sulmet ajrore në Jemen, ka thënë se është i gatshëm edhe të ofrojë përkrahje logjistike, varësisht nga situata.

Iraku

Iraku është në gjendje më të vështirë, pasi varet nga milicitë e përkrahura nga Irani që të rimarrë kontrollin mbi territoret e okupuara nga Shteti Islamik, por edhe nga sulmet ajrore amerikane.

Shtetet e Bashkuara të Amerikës

SHBA-të janë të përfshira në disa konflikte, që janë ose kundër grupeve të përkrahura nga Irani, apo pro tyre.

Në Irak, SHBA-të po luftojnë përkrah Iranit kundër militantëve të Shtetit Islamik, derisa në Siri është duke i armatosur disa grupe që po luftojnë kundër regjimit të Bashar al Assadit, që përkrahet nga Irani dhe Rusia.

Ndërsa tani, SHBA-të janë duke i përkrahur sulmet ajrore të sauditëve në Jemen, kundër grupit shiit që e ka përkrahjen e Teheranit.

Të gjitha këto, po ndodhin në një kohë kur Uashingtoni shpreson për arritjen e një marrëveshjeje me Iranin për programin bërthamor të kësaj të fundit.  (rel)