9 studio arkitekture të huaja dhe shqiptare kanë nisur garën për të prezantuar koncept-idenë më të mirë për hyrjen e parkut kombëtar në Tiranë.

I pranishëm në çeljen e kësaj gare ishte kryeministri Edi Rama, i cili theksoi ngritjen e një qendre për shërbimet publike që pritet të eleminojë burokracitë që hasin qytetarët.

“Juria synon krijimin e hapësirave me rëndësi të veçantë. Së pari, krijimin e qendrës inovative të shërbimeve publike, një qendër e cila do t’i japë të gjitha shërbimet e përqendruara për publikun përmes një sistemi tërësisht inovativ, që do të përbëjë edhe rrëzimin e të gjitha mureve të burokracisë për të gjithë qytetarët që sot enden nga sporteli në sportel”, tha Rama.

Në projektin e qeverisë parashikohen edhe mjedise për strukturat drejtuese të policisë si dhe zgjerimi i hapësirave të Univeristetit të Tiranës në funksion të gjithë të rinjve.

Kryeministri Edi Rama vleresoi kete faze te pare te  projektit si   teper te rendesihem  per transformimin e qyetit: “Është një projekt që i hap rrugë programit të ri transformues për gjithë parkun e integruar të Tiranës. Qëllimi është që të krijojmë një hapësirë të përbashkët mes hapësirave të ndara ekzistuese të Parkut të Liqenit, Kopshtit Botanik dhe Kopshtit Zoologjik”.

Koncept-idetë që do të paraqiten nga 9 studiot do të vlerësohen nga një juri e përbërë nga 9 personalite të arkitekturës, të cilët më pas do të përzgjedhin dhe studion fituese.

/ Top Channel

Niveli i shkëlqyer në raportet politike mes Tiranës dhe Berlinit duhet të pasqyrohej në një stad më të lartë të pranisë së investimeve. Si mund të afrojë Shqipëria më shumë investitorë gjermanë?

Inxhinieri Kolë Gjoka është njëri nga pjesmarrësit e forumit ekonomik gjermano-shqiptar që do të zhvillohet të mërkurën në Tiranë, në prani dhe të Kancelares Angela Merkel. Gjoka ka rreth dy dekada që jeton dhe punon në Gjermani dhe prej rreth një viti e gjysmë është përfaqësues i Dhomës së Tregtisë dhe Industrisë së Tiranës në Hamburg dhe Schleswig-Holstein.

Ai është takuar dhe tri herë të tjera me Kancelaren, por veçon njërin prej tyre, më 22 tetor 2014, në një aktivitet ku ishin pjesmarrës të huaj të suksesshëm të integruar në jetën sociale, ekonomike e politike gjermane. “Vlerësoj shumë mënyrën e gjallë të komunikimit të saj dhe vëmendjen që kushton ajo bashkëbiseduesve. Inspiruese është dhe natyra e thjeshtë dhe miqësore që ajo shfaq me ata që diskuton”, tregon Ing. Kolë Gjoka në bisedën me Deutsche Wellen.

Si i vlerësoni ju aktualisht marrëdhëniet mes dy vendeve në fushën e biznesit?

Janë marrëdhënie që ecin në rrugën e duhur. Nuk mund të them që janë ato që priten, sepse niveli i shkëlqyer në raportet politike mes Tiranës dhe Berlinit do të duhet të kishte një stad më të lartë të prezencës së investimeve në të dy vendet respektive. Aktualisht fushat ku bashkëpunohet janë energjitika, sektori i nxjerrjes e përpunimit të mineraleve, përmirësimi infrastrukturor, arsimi dual profesional, peshkimi, turizmi malor etj.

E keni parasysh zhvillimin e para pak ditëve në Shqipëri, kur u prezantua investimi gjerman “Tirana Business Park”, TBP, në sektorin e pasurive të paluajtshme nga Grupi Lindner. Një sipërmarrje që synon realizimin e një Parku Biznesi në afërsi të Aeroportit Ndërkombëtar “Nënë Tereza” në kryeqytet, një qendër ekonomike të standardeve evropiane, që do të shoqërohet dhe me zhvillimin ekonomik dhe social të asaj zone.

Cila është pritmëria juaj nga vizita ditën e mërkurë të Kancelares Angela Merkel?

Jam me fat që do të jem edhe unë pjesë e forumit ekonomik mes dy vendeve tona në prezencën e Kancelares. Vizita e saj patjerër që do të tërheqi më shumë vëmendjen dhe do të ndikojë në forcimin e besueshmërisë në rradhët e investitorëve gjermanë. Ndaj dhe forumi i përbashkët ekonomik mes dy vendeve do të jetë një bilanc për të deritanishmen, si dhe një projeksion për programet dhe projektet afatmesme dhe afatgjata me interes të përbashkët. Forumet janë pika takimi dhe kontakti edhe për nisma private mes bizneseve që operojnë në të njëjtin sektor, një mundësi për bisedime bilateral një nxisin iniciativën e lirë mes partnerëve. Prezenca e Kancelares Merkel është garanci për palët, si ata që do të jenë prezent, ashtu dhe për ata që informacione dhe të dhëna të tilla i marrin përmes medias, apo në rrugë institucionale dhe joinstitucionale.

Këtu ju keni parasysh dhe karakterin rajonal të vizitës së Kancelares?

Sigurisht. Rreth një vit më parë zhvillimi i Konferencës së Berlinit ishte treguesi për interesimin e jashtëzakonshëm por dhe këmbënguljen e Kancelares, të qeverisë gjermane dhe Bashkimit Europian, për të përmirësuar kooperimin mes vendeve të rajonit, si një garanci për forcimin e stabilitetit, afrimin e investitorëve të huaj, të cilat ndikojnë pozitivisht në përmirësimin e jetës së qytetarëve. Konferenca e Berlinit, që do të pasohet nga ajo e Vjenës, konsiderohet si fillimi i fundit të “eiszeit” në rajonin tonë. Liderët ballkanikë janë të ndërgjegjshëm dhe të bindur për sfidat dhe për mundësitë. Personalisht duke qenë një nga pjesmarrësit e saj, konstatoj me kënaqësi impaktin që ajo po sjell në forcimin e frymës bashkëpunuese për projektet rajonale. Marrëdhëniet mes Tiranës dhe Beogradit, përpjekjet që bëhen për dialogun mes Prishtinës dhe Beogradit e të tjerë tregues konkretë, flasin për vullnet nga palët.

Si përfaqësues i Dhomës së Tregëtisë dhe Industrisë së Tiranës në Hamburg dhe Schleswig-Holstein, cili është angazhimi konkret në këtë aspekt.

Ne vijojmë të lobojmë në mënyrë të vazhdueshme pranë autoriteteve politike dhe ekonomike gjermane për të prezantuar sa më mirë mundësitë dhe kapacitetet që ofron Shqiperia, qofshin mundësi ekonomike, intelektuale dhe zhvillimore. Përveç fushave ku ka kooperim mes dy vendeve, ne jemi të foksuar tek aplikimi i modelit gjerman për reformimin e Dhomës së Tregtisë dhe Industrisë së Tiranës.

Çfarë duhet të bëjë Shqipëria për të afruar më shumë investitorë gjermanë?

Ne e kemi thënë vazhdimisht në takime, tryeza pune a konferenca mbi çështjet e biznesit, se ata nuk mund të afrohen kudo. Jo se janë selektivë. Por se një sipërmarrës gjerman kërkon disa kushte serioze të panegociushme: kuadri ligjor i precizuar dhe i zbatueshëm, klimë që nuk favorizon korrupsionin dhe konkurrencën e ndershme. Ata janë korrektë dhe precizë. Por ka dhe faktorë të tjerë që kushtëzojnë faktin nëse një investitor bën apo nuk bën investim, që lidhen me madhësinë e tregut, me karakteristikat e performancës, vendndodhjen, natyrën e produktit a shërbimit etj. Mbi të gjitha duhet që të mbisundojë ligji dhe të ketë instrumente eficente për luftën kundër korrupsionit, kontrabandës, informalitetit në kuptimin e gjerë etj. Nuk duhet injoruar dhe profili i tyre që kërkojnë projekte konkrete dhe jo fjalë të përgjithshme. Ne duhet të mësohemi të bëjmë dhe të prezantojmë sa më mirë projekte konkrete, të besojmë në aftësitë tona dhe në cilësinë e produkteve dhe shërbimeve “Made in Albania”. (dw)

Ministri i Jashtëm shqiptar shprehet se vizita e kancelares gjermane në Tiranë dhe në rajon është me rëndësi për marrëdhëniet dypalëshe por dhe vetë Ballkanin

Të mërkurën e ardhshme kancelarja gjermane Angela Merkel pritet të nis një turne në rajonin e Ballkanit. Ndalesa e parë do të jetë në Shqipëri, për të vijuar më pas me Serbinë dhe Bosnjen. Në një intervistë për Zërin e Amerikës, ministri i Jashtëm shqiptar Ditmir Bushati e vlerëson këtë vizitë si të një rëndësie historike jo vetëm për vendin e tij por dhe rajonin e të ardhmen e tij: “Gjermania, interes të shtuar për Ballkanin”. Në Tiranë Merkel do të marrë pjesë dhe në forumin ekonomik me sipërmarrës nga të dy vendet

Zëri i Amerikës: Zoti Ministër, pas pak ditësh në Tiranë pritet vizita e kancelares gjermane Angela Merkel, një prej udhëheqësve kryesorë europian. Cfarë domethënie ka kjo vizitë?

Z. Ditmir Bushati:  Së pari është vizita e parë dypalëshe, apo vizita e parë një kancelari gjerman në Shqipëri, sepse ajo e kancelarit Schröder ka qenë në kuadër të krizës në Kosovë. Eshtë takimi i tretë që do të zhvillohet ndërmjet kancelares gjermane dhe kryeministrit Rama. Në këtë kontekst vizita e kancelares gjermane në Tiranë merr një rëndësi historike, për zhvillimin e marrëdhënieve dypalësh por dhe ecurinë e Shqiërisë dhe vendeve të tjera të rajonit në kuadër të procesit të integrimit europian.Eshtë një vizitë e cila do të ketë në qendër të vëmendjes jo thjesht marrëdhëniet dypalëshe në planin politik, ekonomik apo cështjet e sigurisë, por edhe zhvillimet në rajon duke qenë se kancelarja do të vizitojë dhe Serbinë dhe Bosnjen pa Shqipërisë.

Zëri i Amerikës: Kancelarja pati një takim para disa ditësh dhe me kryeministrin e Kosovës. Tani Tirana. Serbia, Bosnja… Cfarë domethënie ka dhe për rajonin një vizitë e tillë?

Z. Ditmir Bushati: Së pari Gjermania në planin europian konsiderohet si kontributorja kryesore në rajon gjatë këtyre 25 viteve. Së dyti, është evidente fuqia transformuese që Gjermania ka në rajon, roli i saj i shtuar, aq më shumë gjatë viteve të fundit, kur nga njëra anë duket sikur kemi një ngadalësim të proceseve të zgjerimit në vendet e Ballkanit Perëndimor, dhe në disa raste kemi një vëmendje deri diku sporadike ndaj Ballkanit Perëndimor duke e konsideruar këtë tashmë një histori gati të mbyllur, një histori suksesi. Nga ana tjetër, Gjermania, e cila duket se e ka kuptuar shumë qartë rëndësinë gjeoekonomike dhe gjeostrategjike që ka rajoni i Ballkanit Perëndimor, dhe kërkon një angazhim edhe më kapilar edhe më të strukturuar, për të ngushtuar hendekun që ekziston sot për sot mes vendeve të rajonit dhe BE-së. Eshtë po Gjermania e cila është investuar në rrugë diplomatike dhe politike për të lehtësuar dhe ndihmuar proceset e ripajtimit që kanë nisur në Ballkanin Perëndimor. Dhe është po Gjermania, e cila vjet, me iniciativën e kancelares Merkel, dizenjoi një program për vendet e Ballkanit Perëndimor, jo si zëvendësues ndaj rrugës apo procesit të integrimit europian, por si ndihmues duke patur parasysh gjithnjë nevojat me të cilat përballet rajoni ynë, mungesën e ndërlidhshmërisë, mungesën e komunikimit të plotë, mungesën e një bashkëpunimi rajonal të zhdërvjellët. Dhe shohim që pikërisht në këto fusha, të gjitha vendet po përpiqen të bëjnë progres, falë edhe mbështetjes gjermane.

Zëri i Amerikës: Po përse gjithë ky interes i shtuar i Gjermanisë ndaj Ballkanit, i cili sic thatë dhe ju, gati gati është në kontrast me atë të vetë Bashkimit europian?

Z. Ditmir Bushati: Gjermani është vendi me peshën kryesore në BE, dhe besoj se ka kuptuar më së miri rëndësinë gjeopolitike dhe gjeoekonomike që ka Ballkani Perëndimor në raport me Europën, me atë që konsiderohet BE. Kriza në Ukarinë, në Lindjen e Mesme, fenomenet e terrorizmit, fenomenet që kanë ndërtuar apo që kanë vënë në pikëpyetje arkitekturën e sigurisë europiane, kriza greke e cila po shpërfaqet në të gjithë dimensionet e saj, besoj se e kanë bërë Gjermaninë më të vëmendshme për t’u angazhuar së bashku me vende të tjera të BE-së, me institucionet e BE-së dhe me institucionet e tjera financiare ndërkombëtare, dhe pse jo me partnerë në botën e tregut privat, për të mbështetur një angazhim më të struktuar të vendeve të Ballkanit Perëndimor, për ta transformuar Ballkanin Perëndimor në një rajon të vërtetë në kuptimin politik, në kuptimin ekonomik të fjalës, cka nuk është i tillë. Dhe Gjermania gjithashtu ka një interes të shtuar në rajonin tonë, gjë e cila shihet me pozitivitet nga të gjitha vendet e tjera të rajonit, për të mos lejuar asnjë vakum që mund të shfrytëzohej nga aktorë të tjerë.

Zëri i Amerikës: Sa realiste janë shpresat e vendeve të rajonit ndaj këtij angazhimi të Gjermanisë, duke patur parasysh dhe ato që ju përmendët, Konferencën e Berlinit, konferencvën e radhës që pritet të mbahet në muajin gusht në Austri, për mbështetjen financiare që rajoni i Ballkanit kërkon për infrastrukturën, ndërlidhjen…

Z. Ditmir Bushati: Besoj se duhet të jemi shumë të drejtpërdrejtë dhe shumë të sinqertë me qytetarët shqiptarë. Ne nuk po presim një thes me para në kuptimin figurative të fjalës nga Gjermania. Ne do të duhet të bëjmë të gjitha detyrat e shtëpisë një më një. Ne shpresojmë dhe dëshirojmë të përfitojmë në radhë të parë nga kultura e punës gjermane, nga kultura e të bërit biznes, nga mënyra se si mund të përmirësojmë marrëdhëniet me njëri-tjetrin në rajon, falë mbështetjes gjermane, falë eksperiencës që Gjermania ka në këtë proces. Dhe ne gjithashtu, shpresojmë që të kemi një vëmendje edhe më të shtuar gjermane për të zbatuar një më një të gjitha ato cështje për të cilat ne kemi rënë dakort vjet në konferencën e Berlinit, dhe të shkojmë në konferencën e Vjenës që do të jetë në vetëm pak javë, me një paketë të plotë projektesh për vendet e Ballkanit Perëndimor, të cilat do të duhet të zbatohen në të ardhmen e afërt, dhe shpresoj jo në të ardhmen e largët. Dhe në këtë drejtim besojmë që ndihma dhe prania gjermane do të jetë strumentale për të gjitha vendet e rajonit.

Zëri i Amerikës: Duke u kthyer në marrëdhëniet dypalëshe. Gjatë vizitës së saj, kancelarja Merkel do të marrë pjesë së bashku me kryeministrin Rama dhe në një forum ekonomik. Sa është e gatshme Shqipëria të ofrojë garanci dhe siguri për investimet gjermane dhe praninë e kompanive serioze gjermane

Z. Ditmir Bushati: Ky është një proces në të cilin ne jemi të dedikuar plotësisht. Eshtë një proces i vështirë sepse kërkon një vullnet të hekurt politik, kërkon ndërtimin e institucioneve të forta demokratike, institucioneve ligjzbatuese të cilat kanë një përgjegjësi në tërheqjen e investimeve të huaja, sidomos investimeve gjermane. Disa punë të mira janë bërë në këtë drejtim, edhe me inaugurimin e Parkut të Biznesit, edhe me takimin e madh të biznesit që do të organizohet në praninë e kancelares Merkel dhe ryeministrit Rama. Po punohet me palën gjermane në sektorë strategjikë të zhvillimit ekonomik të vendit, sic është telekomunikacioni, energjia apo portet dhe aeroportet. Dhe ne do të shpresonim dhe do të dëshironim që të punonim në hapjen e shtigjeve të reja për të mundësuar një prani edhe më të madhe të kompanive gjermane këtu. Dhe për të bërë biseda dhe aktivitete më të strukturuara, sic dhe kanë nisur, me landet gjermane, sepse dihet pesha e tyre dhe interesi për të qenë të pranishëm në këtë pjesë të Europës.

Pas një operacioni policor 16 orësh, policia arrestoi të dyshuarin si vrasës të turistëve çekë.

20-vjeçari Sokol Fran Mjacaj, iu dorëzua rrethimit policor në ambientet e një shkolle në fshatin Grudë në Dukagjin. 20-vjeçari i armatosur, edhe pse ka bërë rezistencë për të mos u dorëzuar, nuk ka qëlluar me armë ndaj policisë, por i është dorëzuar thirrjeve pasi ishte i rrethuar.

Policia e ndoqi Mjacën për më shumë se 16 orë, pak çaste pasi kishte dalë në përfundimin se provat rrethanore të gjetura në vendin e ngjarjen, gjurmët e gjetura në automjet dhe prova të tjera materiale të sekuestruara në vendin, ku u vranë dy çekët, të çonin në përfundimin  se ai është i dyshuar si vrasës i tyre.

Në operacion u përfshinë më shumë se 350 policë mes të cilëve forcat RENEA si edhe ato të ndërhyrjes së shpejte, të cilët i krijuan përshtypjen edhe të dyshuarit se nuk do të kishte mundësi të largohej nga fshati Grudë, ku strehohej, në drejtim të kufirit.

Më herët, policia ja kishte bërë të ditur banorëve të zonës se do të penalizohej kushdo që do t’i jepte ndihmë dhe do të strehonte Mjacajn, ndaj edhe vetë i dyshuari gjeti të vetmen strehë si ndihmë një ndërtesë dykatëshe, në afërsi të shkollës 9-vjeçare.

Ai u shoqërua drejt qelive të komisariatit të Malësisë së Madhe. Mjacaj do të akuzohet për dy vrasje. Paraprakisht dyshohet nga policia se edhe këtë vrasje e kreu me qëllim grabitjeje.

Mjacaj, që kishte lënë gjurmë edhe në automjetin e turistëve, ishte një i dënuar i mëparshëm dhe në kartelën e tij kriminale rëndon edhe vrasja e një 12-vjeçari, vetëm për t’i vjedhur zinxhirin e floririt që fëmija mbante. I ndihmuar në 2010-ën edhe nga dy shokë të tjerë të tij, ai e vrau 12-vjeçarin vetëm për ta grabitur. U përpoq të fshihte krimin, duke sajuar një vendngjarje sikur ai u mbyt në lumë, në fshatin Pjollë të Dukagjinit, por hetimet policore dolën në përfundimin se fëmija ishte vrarë.

Ai e mbyti fëmijën me sende të forta. Vetë Mjacaj e pranoi këtë vrasje dhe përfitoi ulje të dënimit, për shkak se ishte në moshë të mitur kur kreu vrasjen e parë.

Ai mori një tjetër ulje dënimi në Apel, çka i dha mundësinë të dilte nga burgu pas pesë vjetësh për këtë krim të kryer, ndërsa njeriu që e ndihmoi në krim mori dënimin me burgim të përjetshëm.

/ Top Channel