Presidenti i zgjedhur i Kosovës, Hashim Thaçi,  në një intervistë për Zërin e Amerikës tha se do të punojë me të gjitha forcat politike për të tejkaluar ato që quajti dallime ndërmjet tyre. Në intervistën dhënë korrespondentit tonë në Prishtinë, Besim Abazi, ai tha se zgjedhja e tij, që u përcoll me kundërshtimet e opozitës,  ka ndodhur në pajtim me kushtetutën e ligjet e vendit, ndërsa mohoi të ketë bërë lëshime ndaj përfaqësuesve të komunitetit serb në këmbim të votës së tyre. Ai tha po ashtu se në Kosovë nuk ka asnjë mëdyshje rreth ngritjes së Gjykatës së Posaçme për krime lufte.

Zëri i Amerikës: Ju u zgjodhët president i Kosovës dy ditë më parë në një seancë, e cila ishte e përshkuar me tensione politike, por edhe përplasje në rrugë. A e lëndon kjo procesin e zgjedhjes suaj?

Hashim Thaçi: Kosova ka kryer një provim të ri, me sukses të plotë. Ka dhënë një provim të jashtëzakonshëm, demokratik, kushtetues, ligjor, transparent dhe politikisht korrekt, në një proces gjithëpërfshirës, participues, prandaj është koha që të gjithë, pa dallime etnike, pa dallime politike, të vazhdojmë të punojmë bashkërisht në prioritetet tona të ardhshme në konsolidimin dhe forcimin e shtetit tonë. Dhe kjo është edhe detyra ime, do të jetë edhe shërbimi im si president i zgjedhur i Republikës së Kosovës.

Zëri i Amerikës: Presidenti i Kosovës, sipas kushtetutës, duhet të përfaqësojë unitetin e popullit të Kosovës. Duke pasur parasysh kundërshtimin e opozitës, a do ta pengojë kjo zbatimin e kësaj detyre?

Hashim Thaçi: Nëse shikojmë historikisht, presidenti i ri i zgjedhur i Republikës së Kosovës para dy ditësh, ka numrin më të madh të votave, që ka fituar ndonjë president në kuvendin e Republikës së Kosovës të dalur nga adresat politike në këto 16 vitet e fundit. Pastaj, presidenti i ri i Republikës së Kosovës është lideri që ka fituar gjashtë palë zgjedhje të njëpasnjëshme prej votës së qytetarëve të Kosovës, është lideri më i votuar në dekadën e fundit. Prandaj, ekziston një bazament i fuqishëm politik, legjitimitet i fuqishëm qytetar e në të njëjtën kohë edhe baza e fuqishme kushtetuese dhe ligjore. Por, në çdo rrethanë, unë do t’ju shërbejë të gjithë qytetarëve të vendit, pa dallime etnike, pa dallime politike, pa dallime ideologjie, pa dallime fetar. Unë do të jem në shërbim të të gjithëve, do të respektojë plotësisht të gjitha përgjegjësitë e mia kushtetuese dhe ligjore. Do të respektojë plotësisht funksionimin e pavarur të institucioneve. Në anën tjetër, do të punojë me urtësi, qetësi, mirëkuptim dhe respekt për të gjithë, me politikën kosovare, me shoqërinë civile, me mediat, me qytetarët, me njerëzit opinionistë, me të gjithë ata që duan të japin kontributin për forcimin e shtetit tonë, fuqizimin e subjektivitetit ndërkombëtar të Kosovës, në mënyrë që ta integrojmë Kosovën sa më shpejt edhe në mekanizmat ndërkombëtarë të nevojshëm, por të punojmë edhe për zhvillimin ekonomik edhe për rendin e ligjin, t’i kryejmë obligimet tona që i kemi para qytetarëve, por edhe karshi bashkësisë ndërkombëtare.

Zëri i Amerikës: Si do të punoni me opozitën kundërshtuese zoti president i zgjedhur?

Hashim Thaçi: Do të punojë me të gjithë. Nuk kam paragjykime ndaj askujt, përkundrazi, do të ofrojë vullnetin më të mirë, do të ofrojë mirëkuptimin në kuptimin e dëgjimit të shqetësimeve të tyre, në mënyrë që të jemi të gjithë të bashkuar në interesat e përbashkëta shtetërore. Natyrisht, ne po zhvillojmë demokracinë dhe opinionet e ndryshme janë shëndeti i demokracisë në Kosovë, por, me rëndësi është që gjithë ky proces të shkojë në një formë të rregullt, të qetë, paqësore, komunikuese dhe natyrisht, konkluzionet i nxjerrim të përbashkëta në interes të vendit, në interes të qytetarëve edhe në interes të investimeve të bashkësisë ndërkombëtare në Kosovë.

Zëri i Amerikës: Cilat do të jenë hapat për të zvogëluar hendekun që ekziston midis jush dhe opozitës aktualisht?

Hashim Thaçi: Unë nuk mendoj që ka ndonjë hendek të madh. Ka dallime politike që kanë ndodhur me herët. Unë do të punojë me tërë energjinë time, me tërë potencialin tim edhe si qytetar edhe me tërë potencialin atdhetar, politik, me tërë fuqinë time edhe me mandatin tim kushtetues dhe ligjor, në mënyrë që këto dallime në mes spektrit politik të tejkalohen sa më shpejt, sa më mirë, në mënyrë sa më efektive në mënyrë që të punojmë me të gjitha energjitë tona për shtetin dhe të interesohemi e të fokusohemi të gjithë mbi të gjitha për interesat shtetërore para atyre politike apo grupore.

Zëri i Amerikës: Ka pasur zëra që mund të kontestohet zgjedhja juaj edhe në Gjykatën Kushtetuese. A jeni i gatshëm të përballeni me të?

Hashim Thaçi: Kosova ka kryer obligimet e veta në afatin e rregullt kushtetues dhe ligjor. Ne do të punojmë bashkërisht të gjithë. Ne do të respektojmë të gjitha institucionet e pavarura në punën e tyre. Do t’i kryejmë të gjitha obligimet në kuptimin e transparencës së plotë dhe llogaridhënies së plotë. Unë jam sot president i zgjedhur nga kuvendi i Republikës së Kosovës në një proces krejt të rregullt, kushtetues, ligjor, transparent dhe do t’i kryejmë obligimet tona në këtë fazë të tranzicionit që kemi deri në prill, kur duhet të bëj betimin si president i zgjedhur i Republikës së Kosovës. Kështu që, tërë energjitë e mia do të fokusohen në tejkalimin e këtyre ndasive politike, në kuptimin e vullnetit të mirë. Pastaj, me marrjen e përgjegjësisë edhe zyrtarisht, do të ketë edhe iniciativa konkrete për mirëkuptim, për tejkalim të këtyre dallimeve dhe vënien në spikamë të agjendës shtetërore.

Zëri i Amerikës: Kritikët tuaj kanë thënë se për të siguruar votat e mjaftueshme për t’u zgjedhur, ju mund të keni bërë lëshime ndaj Listës Serbe. Nëse po, për çfarë lëshimesh bëhet fjalë?

Hashim Thaçi: Unë do t’ju shërbej të gjithë qytetarëve të Kosovës, shqiptarëve, serbëve, malazezëve, turqve, boshnjakëve, ashkalive, romëve, të gjitha komuniteteve që jetojnë në Kosovë. Kosova është atdheu i të gjithë qytetarëve të saj dhe secili duhet të ndjehet mirë e krenar që jeton në Kosovë. Kosova duke respektuar komunitetet jo shqiptare, mund të fitojë edhe më tepër, mund të respektohet në botë edhe më tepër. Minoritetet janë vlera të shoqërisë kosovare, kanë të drejtat e tyre kushtetuese, ligjore, e politike. Ata janë kosovarë. Ne po ndërtojmë dhe forcojmë identitetin tonë shtetëror, prandaj do të punoj fuqishëm në ofrimin edhe më të madh të komunitetit serb edhe në institucione. Ata janë sot pjesë e parlamentit, pjesë e qeverisë, e pushtetit lokal, punojnë me kushtetutën dhe ligjet e Kosovës, prandaj do të jemi në shërbim të të gjithë qytetarëve të vendit dhe mendoj se kjo tolerancë ndëretnike do t’i shërbejë fuqishëm vizionit tim për ndërtimin e Kosovës së re, Kosovës evropiane, Kosovës multietnike. Vetëm kështu mund të kemi sukses.

Zëri i Amerikës: Por, a kishte kundër shpërblim për votën e tyre?

Hashim Thaçi: Deputetët serbë janë pjesë e kuvendit të Republikës së Kosovës. E kanë vizionin e vet, programin e vet, e kanë qëllimin e vet, prandaj gjithçka ka qenë në përputhshmëri të koordinimit të partnerëve të koalicionit, sipas marrëveshjeve të mëhershme dhe votimi i tyre ka qenë një votim i vullnetit të lirë në një votim të fshehtë. Prandaj, nuk mund të paragjykoj se kush ka votuar për dhe kush ka votuar kundër. Por, unë dëshiroj t’i falënderoj të gjithë ata që më kanë besuar dhe të gjithë ata që kanë marrë pjesë në votim. Edhe ata që kanë shprehur opinionet e tyre të ndryshme, unë do t’i respektojë, i dua dhe do t’i vlerësojë, do t’i ofrojë dhe do të punojmë bashkërisht.

Zëri i Amerikës: Kriza politike në Kosovë pasoi marrëveshjet politike me Serbinë dhe atë për shënimin e kufirit me Malin e Zi. Nga pozicioni juaj i ri, si mendoni mund të tejkalohet kjo situatë dhe cili do të jetë roli juaj në vazhdimin e dialogut?

Hashim Thaçi: Parakusht për integrimet euro – atlantike, por edhe parakusht për paqe, stabilitet dhe bashkëpunim rajonal, është ndërtimi i fqinjësisë së mirë. Kosova do të vazhdojë bashkëpunimin me të gjitha vendet fqinje. Kemi bashkëpunim të shkëlqyer me Maqedoninë, me Shqipërinë, me Malin e Zi. Do të vazhdojmë me normalizimin e plotë të marrëdhënieve edhe me Serbinë. Nuk jemi vendet e para në botë që kemi luftuar dhe po ndërtojmë tani paqe. Kështu që duhet të marrim shembullin edhe të vendeve të tjera dhe zgjidhja e vetme është vazhdimi i dialogut. Dialogut jo në kuptimin e vazhdimit vetëm me Serbinë dhe destabilizimit të vendit, por një dialog i cili i normalizon marrëdhëniet Kosovë-Serbi, por në të njëjtën kohë e forcon shtetin e Kosovës dhe kjo është rruga e vetme. Unë kam besim se edhe marrëveshjet e arritura në Bruksel dhe Vjenë, janë argumente të fuqishme për fuqizimin e shtetit tonë e jo në dëm të shtetit tonë.

Zëri i Amerikës: Ju tashmë keni dhënë dorëheqje nga kryetari i Partisë Demokratike?

Hashim Thaçi: Natyrisht, unë kam respektuar të gjitha parametrat kushtetues dhe ligjor dhe në momentin e kryerjes së obligimeve procedurale të kuvendit, unë i kam kryer edhe obligimet tjera kushtetuese dhe ligjore që nuk lejojnë bartjen e përgjegjësive tjera publike apo institucionale apo politike.

Zëri i Amerikës: A keni shqetësim për PDK-në pas Hashim Thaçit?

Hashim Thaçi: Unë ndjehem shumë krenar që kam udhëhequr një parti shumë të fuqishme, një parti që ka konsoliduar dhe forcuar vendin tonë. Një parti më tepër si një lëvizje me mbështetje të gjerë qytetare. Një parti që ka fituar shumë palë zgjedhje në dekadën e fundit. Ndjehem shumë krenar që në momentin kur jam zgjedhur president, PDK ka qenë partia më e fuqishme, më e konsoliduar dhe numër një dhe shkoj në postin e presidentit si lider fitues.

Zëri i Amerikës: A mund ta ndryshojë kjo skenën politike në Kosovë, duke pasur parasysh që forcat politike në Kosovë më së shumti identifikohen me udhëheqësin e tyre politik?

Hashim Thaçi: Nuk mendoj që subjektet politike janë pronë e liderëve politikë. Mendoj që subjektet politike në Kosovë gradualisht po krijojnë hapësira për debat, për marrje të vendimeve të përbashkëta, prandaj sot është një përgjegjësi e liderëve të ri në PDK dhe këtë përgjigje mund ta merrni nga lidershipi i ri i PDK-së. Por, PDK nuk ka qenë e Thaçit, por ka qene pronë e elektoratit, e vizionit, programit dhe qëllimit të tyre.

Zëri i Amerikës: Edhe miqtë tuaj, edhe ndërkombëtarë kanë tërhequr vërejtjen se sfida të mëdha ju presin gjatë mandatit tuaj si president, përfshirë këtu edhe përballjen e mundshme, madje edhe tuajën personale me Gjykatën e Posaçme për krime lufte…

Hashim Thaçi: Në do t’i kryejmë të gjitha obligimet tona kushtetuese dhe ligjore. Ne i kemi kryer të gjitha obligimet karshi këtij procesi të rëndësishëm dhe jam njëri nga bartësit e këtij procesi edhe si kryeministër edhe si ministër i jashtëm në përgjegjësitë e mia institucionale që kam pasur. Unë mendoj që ky proces duhet të jetë një avantazh për Kosovën dhe një argument i fuqishëm për konsolidimin e vendit tonë karshi bashkësisë ndërkombëtare, prandaj nuk ka asnjë shqetësim në kuptimin e hezitimit, apo nuk kemi asgjë për të fshehur. Ne duhet t’i japim një mbështetje të fuqishme sistemit të drejtësisë. Ne kemi zhvilluar luftë të drejtë, luftë të pastër, luftë sipas konventave ndërkombëtare, jemi fitues dhe do t’i japim mbështetje me gjithë potencialin tonë institucional dhe shoqëror.

Zëri i Amerikës: A keni shqetësim personal në këtë aspekt?

Hashim Thaçi: Ne kemi zhvilluar luftë të drejtë, kemi zhvilluar luftë kundër regjimit të (Slobodan) Millosheviçit, ligjet qe i kemi shkelë kanë qenë të Millosheviçit, ndërsa kemi respektuar të gjitha ligjet dhe standardet ndërkombëtare.

Zëvendëskryeministri i Kosovës nga minoriteti serb, Branimir Stojanoviq, ka thënë se pas zgjedhjes së Hashim Thaçit President, tashmë nuk ekziston asnjë arsye që të mos procedohet tutje me ato që Prishtina është akorduar me Beogradin në Bruksel, njofton Klan Kosova.

Stojanoviq thotë se pret që Thaçi, i cili ka marrë pjesë në të gjitha proceset në Bruksel, të marrë përgjegjësi në lidhje me atë që është rënë dakord para bashkësisë ndërkombëtare.

Politikani serb ka pohuar se tani duhet të vazhdohet me formimin e Gjykatës Speciale dhe formimin e statutit të Asociacionit e Komunave me Shumicë Serbe.

Shefi i Listës Serbe për Kosovën, Slavko Simiq, ka deklaruar se 10 deputetët e kësaj liste nuk e kanë votuar Hashim Thaçin për President në asnjërin nga tri raundet

Sipas tij, kështu u ruajt neutraliteti karshi subjekteve shqiptare, njofton Klan Kosova.

Se serbët nuk kanë votuar pro Thaçit  ka deklaruar edhe zëvendëskryeministri i Kosovës, Branimir Stojanoviq gjithashtu edhe Kryeministri serb, Aleksandër Vuçiq.

Por edhe nëse është e vërtet që deputetët e pakicës serbe nuk kanë votuar pro Thaçit, ata megjithate  qëndruan në sallë që ti siguronin kuorumin e nevojshëm që procesi të mos bllokohet dhe de facto Thaci të mund te zgjidhet president.

Por se nuk ka votuar për Thaçin ka thënë edhe deputeti i Lidhjes Demokratike të Kosovës, Armend Zemaj.

Nëse 10 deputetët e Listës Serbe nuk e kanë votuar Thaçin për President dhe njëjtë ka vepruar edhe Zemaj, atëherë Thaçi do të duhej të kishte 11 vota të pavlefshme e jo 10 sa edhe ishte numri zyrtar i tyre, pasi që rezultati i raundit final ishte; 71 vota pro dhe 10 të pavlefshme nga 81 deputetë sa votuan gjithsejtë, njofton Klan Kosova.

Votimi për President është i fshehtë, prandaj deputetët, si Zemaj, ose grupet parlamentare, si Lista Serbe, shpalosjen e votimit e kanë bërë vullnetshëm, përkundër se numrat nuk po përputhen.

Gjithsesi, Hashim Thaçi është zgjedhur President në raundin e tretë të votimit, kur është nevojitur vetëm shumica e thjeshtë, ose 61 vota e më shumë.

Themeluesi i Partisë Demokratike të Kosovës në raundin e parë të votimit, kur për t’u shpallur President nevojiteshin 2/3 ose 80 pro të paktën, Thaçi nuk ka arritur të fitojë më shumë se 50 vota për.

Në atë votim të parë, në të cilin morën pjesë 81 deputetë, për Hashim Thaçin votuan 50 veta, kurse 27 vota u shpallën të pavlefshme. Katër vota i mori kundërkandidati i Thaçit, bashkëpartiaku Rafet Rama.

Kurse raundi i dytë solli ndryshime të mëdha në numra, përkundër se pragu prej 2/3 përsëri nuk u kalua.

Edhe në këtë raund votuan 81 deputetë, ndërsa këtë herë Hashim Thaçi mori 63 vota për e 16 u shpallën të pavlefshme.

Në raundin final Thaçi mori 71 vota për e 10 ishin të pavlefshme.

Ndërsa Rafet Rama, i cili nuk e votoi as veten, nuk mori asnjë votë.

Hashim Thaçi është Presidenti i pestë qysh se Kosova fitoi lirinë në vitin 1999. Kurse i katërti prej se vendi shpalli Pavarësinë e Kosovës, me 17 shkurt në 2008, deklaratën e së cilës pavarësi, e kishte lexuar vet Hashim Thaçi, atëherë si kryeministër i shtetit më të ri në Europë.

Deputetja e Lidhjes Demokratike të Kosovës, Vjosa Osmani iu ka kundërpërgjigjur ashpër kryeministrit Isa Mustafa.

Ajo ka shkruar në profilin e saj në facebook se për frikësim po flet njeriu që ka frikë mos po takohet me ndonjë nga votuesit e LDK-së, të cilët i tradhtoi dhe vazhdon t’i tradhtojë.

Mustafa e akuzoi Osmanin për mos pjesëmarrje në seancën e djeshme. Kurse, Ajo ka shkruar se për frikësim po flet njeriu që me një lëvizje të vetullave të Thaçit kërcente përpjete për t’iu vërsulur deputetëve të tij.

Ja postimi i plotë i Osmanit në facebook:

Të dashur miq,

E mendoja qe disa orë nëse ja vlenë të merrem me sulmet banale të KM Mustafa. Nëse asgjë tjetër, deri tani, karshi sulmeve e linqimeve të tij (dhe hienave të tij), nuk kam reaguar shpesh për shkak të bashkëpunimit që kemi pasur, besimit që (gabimisht) kam pasur në të, por edhe për shkak të moshës që ka. Por MJAFT është MJAFT.

Kush po na flet për frikësim? Njeriu që me një lëvizje të vetullave të Thaçit kërcente përpjete për t’ju vërsulur deputetëve të tij.

Kush po na flet për instruksione? Ai që ato i merr nga Hashim Thaçi e Kadri Veseli, dhe për këtë madje mburret. Njeriu pà «r të cilin Thaçi na qenka shteti, dhe parandalimi i bërjes së Thaçit president, quditërisht na qenka rrënim i shtetit.

Për frikësim po na flet njeriu që nuk ndihet mirë të pijë kafe e të takohet me qytetarë nëpër Kosovë se mos po takohet me ndonjë nga votuesit e LDK-së, të cilët i tradhtoi dhe vazhdon t’i tradhtojë. Por nuk ndihet i lirë as tek ata që e mbajtën në Gjermani e gjetiu në diasporë, sepse ua mbylli derën veprimtarëve shumëvjeqarë të diasporës në LDK, të cilën e kishin mbajtur partinë tonë dhe Kosovën gjallë.

Le t’i pyet partnerët e tij të dashur të koalicionit se kë e kanë frikësuar ata, kë e kanë shantazhuar, e kë e kanë joshur me oferta. Mua nuk do më gjesh në asnjërën prej atyre listave. Kurrë përjetë, dhe ti, Isa Mustafa këtë e di shumë mirë.

Ka 1 vit që kam paralajmëruar se nuk do të marrë pjesë në seancën ku zgjedhet Thaçi dhe se e vetmja mënyrë për të parandaluar këtë s kenar do të ishte pamundësimi i kuorumit. Dje kam mundur të jem kudo, por assesi në atë seancë të turpit. Poashtu, të gjithë ata që kanë qenë të interesuar t’a dijnë, e kanë kuptuar që unë kam udhëtuar për çështje shëndetësore e jo për qejf. Por Kryeministri ynë nuk ka respekt për askënd e asgjë, as për shëndet, as për familje, as për shtet, për ASGJË, e prandaj edhe flet për çadra. Unë nuk i bëjë planet e mia sipas instruktioneve të Mustafës, SHIK-ut, apo kujtdo tjetër. Për dallim, për Isa Mustafën, e tërë bota sillej rreth Hashim Thacit dhe zgjedhjes së tij President. Qe 1 vit vetëm për të ka lobuar. Por nëse është dikush që e di mirë, që unë nuk dorëzohem para asnjë presioni, ai është Isa Mustafa. Nuk marr leje as prej tij e as partnerëve të tij për asnjë qëndrim politik e për asnjë votim. I përgjigjem vetëm elektoratit e qytetarëve. Apo nuk i kujtohet që para syve të tij ngrita dorën kundër për zgjedhj en e Qeverisë PDK-LDK dhe zgjedhjen e Shefit të SHIK-ut në krye të Kuvendit?

Mustafa poashtu paska kërcënuar duke thënë mirë që jemi gjallë, ne deputetët që ja bojkotuam Thaçin? Por ai e di më së miri që jemi gjallë, sepse ju kemi kujtuar edhe kur i dolën vetëm 50 vota për Thaçin, edhe kur frikësohej mos po i dalin edhe dy deputetë nga salla për t’ja prishur kuorumin Thaçit. Por ka shumë veprimtarë të LDK-së që nuk janë gjallë, në emër të të cilëve, dhe duke sharë SHIK-un, Mustafa mori votat e LDK-së.

Gjuha e Mustafës, lëre që ka përqarë tërë skenën politike të Kosovës, por po e përqanë edhe LDK-në. Se ai nuk është në paqe me vetveten e as me elektoratin e LDK-së, më së miri e dëshmon fshirja e menjëhershme e komenteve në çdo postim të tij. Për dallim prej tij, unë jam në paqe edhe me vetveten, e edhe me ata që më besuan t’i përfaqësojë. Jam ballëhapur dhe gjumin e bëjë me ndërgjegje të pastë r. Mustafa zor se e di këtë ndjenjë. Zëri i elektoratit të LDK-së do t’a ndjekë pas dhe kurrë nuk do t’a lë rehat. (rtk)