Përdorimi i telefonave inteligjentë ndërsa je i shtrirë në krevat për të fjetur, mund të të dëmtojë sytë. Mjekët këshillojnë t’i qëndroni larg telefonit pasi nevoja për ta kontrolluar atë mund të shkaktojë verbim të përkohshëm.

Telefonat inteligjentë janë pajisje të fuqishme të teknologjisë së informacionit dhe komunikimit. Për shumicën nga ne, ata janë një burim i përhershëm që në çdo moment na jep mundësinë të shohim çfarë po bëjnë miqtë tanë ose të paguajmë faturat.

Por dëshira për të përdorur telefonin në mbrëmje para gjumit tani është identifikuar si shkaktar i humbjes së përkohshme të shikimit.

Në një artikull të botuar kohët e fundit në revistën mjekësore New England Journal of Medicine, mjekët japin shembujt e dy grave të moshës 22 dhe 40 vjeçare, të cilat përjetuan “verbërim të përkohshme nga telefonat inteligjentë” për disa muaj.

Gordon Plant, neurolog në Spitalin Kombëtar të Neurologjisë në Moorfields shpjegon:

“Duhen disa minuta para se syri i djathtë të shoh aq mirë sa i majti. E kundërta është e vërtetë sigurisht në se je i shtrirë në anën e djathtë. Ato mendojnë se problemi qëndron pasi njëri nga sytë ka qënë i ekspozuar ndaj dritës dhe se nuk do ta kishin këtë problem po të kishin përdorur të dy sytë njëlloj. Por sytë do të jenë në të njëjtën gjendje.”

Pasi gratë u ankuan për humbje të përkohshme të shikimit për 15 minuta, ato iu nënshtruan kontrolleve të ndryshme mjekësore, duke përfshirë edhe skanime dhe teste të zemrës. Humbja e përkohshme e shikimit është një simptomë e rëndishme sepse ajo mund të jetë një paralajmërim për një goditje në tru, thotë Dr. Plant.

“Disa vjet më parë këta pacientë do të dërgoheshin në klinika të specializuara, por tani për shkak të mënyrës së funksionimit të goditjeve në tru dhe trajtimit të tyre pacientët dërgohen automatikisht në një njësi të tillë. Më pas ata kontrollohen nga mjekë të cilët mund të mos kenë njohuri mbi çrregullimet e syrit.”

Ndërsa njëra nga pacientet u gëzuar kur mësoi se verbëria e përkohshme nuk ishte sinjal i një problemi më serioz, si goditja në tru, pacientja tjetër ishte më skeptike dhe mbajti një ditar rigoroz ku regjistroi të gjitha incidentet e humbjes së përkohshme të shikimit.

Ajo përfundimisht konfirmoi diagnozën që i dha mjeku, por nuk kishte hequr dorë nga zakoni për të përdorur telefonin në shtrat.

Këta përdorues të telefonave inteligjentë thonë se ky është një problem i zakonshëm:

“Shqetësohem për gjendjen e syve pasi kur e fik telefonin nganjëherë ndjejë disa pika të zeza në sy”, thotë Marcela Montes.

Adeeb Arif thotë: “Unë fle vonë dhe e kam të vështirë të fle për shkak të dritës. Mendoj se dritat blu vështirësojnë përpjekjet për të fjetur.”

Por, pavarësisht shqetësimeve mjekët thotë sa telefonat, kur përdoren sa duhet, janë të sigurt. (voa)

Thonë se distanca të jep një pamje më të qartë. Tani, në sajë të ekuipazhit në bordin e Stacionit Ndërkombëtar të Hapësirës, dhe nëpërmjet imazheve të marra me kamera të posaçme, ne mund të shohim pamje të ndryshme dhe më të qarta të planetit tonë. E parë nga lartësia, bukuria natyrore e Tokës është e qartë; po aq i qartë është edhe ndikimi i njerëzimit në këtë glob të vogël.

Në filmin dokumentar A Planet Beautiful, fituesja e çmimit Oskar, aktorja Jennifer Lawrence përshkruan gjendjen e planetit tonë, atëherë dhe tani.

“Pyje të mëdhenj mbulonin dikur pjesën më të madhe të ishullit të Madagaskarit. Ju mund të shihni se shumë prej tyre janë zhdukur. Pa pemë për ta mbajtur të lidhur, dheu rrëshqet drejt greminës, bie në lumenj dhe zhduken në det.”

Pamjet filmike marrë nga hapësira tregojnë se shtresat e akullit në Greenland po shkrihen në shkallë alarmante. Uji rrjeth poshtë nën akull dhe derdhet në oqean. Nëse gjithë akulli do të shkrihej, niveli i detit mund të rritet gjashtë metra.

“Ndërsa niveli rritet, zonat e ulëta bregdetare do të përmbyten. Qyteti Nju Orleans mund të zhduket.”

Dhe ndërsa gjatë ditës, njerëzimi mund të perceptohen vetëm nëpërmjet efekteve të tij mbi natyrën, gjatë natës, mund të shihet qartë qytetërimi.

“Ju mund të dalloni qytetet e famshme si Amsterdam, Bruksel, dhe Moskë. Apo qytetet Osaka, Nagoya dhe Tokio në Japoni. ”

Për të filmuar këtë dokumentar, ekuipazhi përdoruri një lloj të ri kamerash IMAX, shumë më të lehta se ato që janë përdorur për dokumentarët e më të mëparshëm në Hapësirë, të tilla Hubble 3D, të regjisores Toni Meyers. Dhe pse regjisorja e njohur nuk ishte në stacionin e hapësirës për të drejtuar filmin, ishte ajo që i mësoi astronautët si të filmonin.

“Ajo që kam dashur të tregoj në film është ngashmëria midis stacionit të hapësirës si një sistem i mbyllur dhe të Tokës gjithashtu si sistem i mbyllur. Të dy përmbajnë të gjitha gjërat që na duhen për të qëndruar gjallë. Ajër, ujë, ushqim, por me të vetmin ndryshim se stacioni i hapësirës rifurnizohet me anije nga Toka, prandaj edhe mesazhi kryesor i filmit është se Toka nuk merr furnizime me anije”, tha regjisorja Toni Meyers në një intervistë për Zërin e Amerikës.

Dhe mesazhi i saj është; mos ëndërroni për të kolonizuar planete mijëra vjet larg, por kujdesuni për bukurinë natyrore të Tokës dhe atmosferën e saj të brishtë, sepse nëse Toka vdes, ne vdesim bashkë me të. (voa)

Një grup makinash inteligjente të teknologjisë së lartë u reklamuan së fundmi në një panair të Londrës. Përmes panelit të aparaturave në makinë, shoferi mund të kontrollojë çdo gjë, që nga lista e këngëve të preferuara e deri tek termostatet në shtëpi. Por, ekspertët paralajmërojnë se me më shumë ndërlidhje të teknologjisë vjen edhe një kërcënim më i madh nga hakerat.

Modeli elegant S i kompanisë Tesla tërhoqi mjaft vëmendje në panairin e makinave të ndërlidhura në Londër, por kompania “EVE” thotë se brendësia është ajo që ka rëndësi.

Kompania kanadeze demonstroi eksperiencën më të fundit të ndërlidhjes në makina që lejon motoristët të kenë qasje të shpejtë ndaj aplikacioneve të ndryshme, përshi median sociale, imeilat, kalendarin, motin dhe kilometrazhin.

Teknologjia e re brenda makinës i lejon shoferët të lidhen me pajisjet që kontrollohen përmes internetit në shtëpitë e tyre si dritat, dyert dhe termostatet.

Kjo do të thotë se ata mund të personalizojnë automatizime të ndryshme, si mbylljen e dyerve të shtëpisë apo fikjen e dritave pa lëvizur nga makina.

“Shumë njerëz po fillojnë të vendosin pajisje inteligjente në shtëpitë e tyre si termostatët, çelësat e dritave, të garazheve dhe të dyerve. Ne mundësojmë lidhjen e këtyre pajisjeve nga makina në një mënyrë inteligjente ku mund të automatizosh për shembull një proçes, që kur largohesh nga shtëpia me makinë, të kyçet dera e shtëpisë, garazhi, dritat dhe të ulet termostati,” thotë Jason Taylor, i kompanisë “Evolved Vehicle Environments”.

Zoti Taylor thotë se synimi nuk është që njerëzit në timon të hutohen duke përdorur median sociale si Instagramin apo Twitterin, por e kundërta.

“Synimi është që kur je i bllokuar në trafik të kesh me se të merresh për të shfrytëzuar kohën pa patur nevojën të hapësh telefonin që të tërheq vëmendjen. Realiteti është se njerëzit i përdorin celularët gjithë kohën. Gati 70 përqind e njerëzve e pranojnë se përdorin telefonat kur ngasin makinën megjithëse është e jashtëligjshme“ thotë zoti Taylor.

Kompania “Ecotive” and “Frazer-Nash Research” po demonstron taksi elektrike të ndërtuara për të pakësuar ndotjen në rrugët e Londrës, duke mundësuar njëkohësish shpejtësi në shërbim.

“Është 100 përqind elektrike gjithë kohën”, thotë Noamaan Siddiqi, menaxher në kompaninë “Frazer-Nash Research”.

“Ka një bateri të vogël që furnizon rrotat e pasme dhe kur bateria mbaron, ka një motor me një litër benzinë, një motor me tre cilindra i lidhur gjithmonë me njëgjenerator, i cili furnizon baterinë sa herë ajo shkarkohet.“

Por jo vetëm kaq – taksia e zezë është gjithashtu e pajisur me teknologji inteligjente që ndërlidh argëtimin në shtëpi, komunikimin në zyrë, si dhe atë mes shoferit dhe pasagjerit.

Pasagjerët mund të luajnë video, të dërgojnë imeila, të kontrollojnë median sociale apo të luajnë lojra elektronike.

Por, ndërsa ndërlidhja në makina po shtohet, ekspertët thonë se bashkë me të rritet edhe rreziku i hakerëve.

Andy Davis është drejtor i kërkimeve me kompaninë e ekspertëve të sigurisë kibernetike, “NCC Group”:

“Lidhjet si me Wi-Fi apo Bluetooth, shtojnë mundësinë e hakerave për të hyrë brenda sistemit që ka makina.“

Zoti Davis thotë se prodhuesit e makinave po e mendojnë seriozisht rrezikun që sjell rritja e teknologjisë veçanërisht në panelin e aparaturave të makinës dhe se të gjithë po e kuptojnë rëndësinë që ka siguria kibernetike. (voa)