Në Shqipëri Gjykata Kushtetuese vendosi sot të pezullojë zbatimin e Ligjit për rivlerësimin e gjyqtarëve dhe prokurorëve, pas kërkesës së paraqitur tre javë më parë nga Partia demokratike, e cila ka kërkuar gjithashtu dhe shpalljen antikushtetues të ligjit. Vendimi i sotëm praktikisht bllokon zbatimin e të gjithë procesit të Reformës në Drejtësi

Gjykata Kushtetuese u vu në lëvizje pasi tre javë më parë Partia demokratike ashtu siç dhe kishte paralajmëruar më herët, i paraqiti asaj kërkesën për pezullimin e zbatimit të ligjit si dhe shpalljen antikushtetuese të përmbajtjes së tij. Në marrjen e vendimit të sotëm, anëtarët e gjykatës mësohet të kenë vlerësuar se zbatimi i procedurave të rivlerësimit të gjyqtarëve dhe prokurorëve, ndërkohë që do të merret në shqyrtim vlefshmëria apo jo e ligjit, do të kishte pasoja të pariparueshme.

Në të njejtën kohë, Gjykata i është drejtuar edhe Komisionit të Venecias, për një opinion të këtij institucioni, nëse ligji është apo jo në përputhje me Konventën Europiane për të Drejtat e Njeriut dhe Kushtetutën e Republikës së Shqipërisë.

Ligji konsiderohet si elementi kryesor i të gjithë procesit të Reformës në Drejtësi, duke synuar kalimin në sitë të të gjithë gjykatësve dhe prokurorëve si dhe verifikimin e pasurive të tyre, me synim spastrimin e radhëve të Drejtësisë nga elementët e korruptuar. Por përmbajtja e tij ka qenë objekt debatesh të forta mes shumicës dhe opozitës e cila që në Komisionin e Reformës paraqiti një sërë vërejtjesh, veçanërisht lidhur me organet që do të përfshiheshin në process për dhënien e informacioneve. Sipas opozitës, përfshirja e institucioneve që varen nga ekzekutivi përbën një përpjekje direkte për kontrollin e procesit nga ana e qeverisë.

Ligji për rivlerësimuin e gjyqtarëve dhe prokurorëve ka patur një mbështetje publike nga misionet e asistencës ligjore të Shteteve të Bashkuara dhe të Bashkimit europian të cilët kanë qenë direkt të përfshirë në hartimin e tij. Bashkimi europian ka vënë mënjanë dhe financime të shumta për procesin e rivlerësimit, ndërkohë që ekspertë të tij janë parashikuar të kenë një peshë domethënëse në vedimmarrjen e institucioneve që duhet të kalojnë në sitë gjyqtarët dhe prokurorët.

Por vendimi i sotëm praktikisht ngrin të gjithë procesin e zbatimit të Reformës në Drejtësi, pasi asnjë prej institucioneve të parashikuara nuk mund të ngrihet dhe të funksionojë, nëse anëtarët e tyre nuk kalojnë më parë filtrin e rivlerësimit.

Ambasada e Shteteve të Bashkuara dhe Delegacioni i Bashkimit europian në Tiranë reagun sot përmes një deklarata ku theksojnë se “Shtetet e Bashkuara dhe Bashkimi Europian respektojnë autoritetin e Gjykatës Kushtetuese për të shqyrtuar Ligjin e Vetingut dhe pezulluar zbatimin e tij. Gjykata Kushtetuese ka thënë se do t’ia referojë ligjin Komisionit të Venecias. Nxisim që ky referim të ndodhë sa më shpejt që të jetë e mundur për të parandaluar vonesa. Shtetet e Bashkuara dhe Bashkimi Europian mbeten të përkushtuar ndaj zbatimit të plotë të reformës së gjyqësorit”, saktëson deklarata. (voa)

“World Justice Project”, një institut kërkimor ndërkombëtar me qendër në Shtetet e Bashkuara të Amerikës, e rendit Shqipërinë të 72-tën ndër 113 vende të botës për sundimin e ligjit.

Në raportin e përvitshëm që klasifikon vendet për nga zbatimi i ligjit, “WJP” thotë se, në vitin 2016 renditja e Shqipërisë u përkeqësua me 9 vende krahasuar me një vit më parë.

Shkaku kryesor i përkeqësimit sipas raportit është treguesi i qeverisjes së hapur. Ky indeks mat transparencën e qeverisë, jo vetëm në publikimin e ligjeve dhe vendimeve që ajo miraton, por edhe cilësinë e informacionit të publikuar.

Po kështu, ai mat lirinë e shprehjes, pjesëmarrjen civile dhe të drejtën e peticionit, që i jep mundësi qytetarëve të ankohen për vendime të qeverisë apo ta padisin atë.

Sipas raportit, në këtë tregues renditja e Shqipërisë është përkeqësuar me 29 vende krahasuar me një vit më parë dhe nga vendi i 54-t që renditej në 2015 ka shkuar në vendin e 83-të në botë.

Raporti i World Justice Project përfaqëson një portret të zbatimit të ligjit në çdo vend të botës.

Ky raport mat 8 faktorë, që janë: kufizimi i pushtetit të qeverisë, mungesa e korrupsionit, transparenca, të drejtat themelore, rendi e siguria, kuadri rregullator, drejtësia civile dhe ajo kriminale.

Shqipëria renditet më mirë në treguesit e kufizimit të pushtetit të qeverisë, të drejtat themelore dhe rendi e siguria. Ndërsa faktorë ku vendi ynë renditet me keq janë korrupsioni, transparenca e qeverisë dhe zbatimi i kuadrit rregullator.

/ Top Channel

Nga një projekt kualifikimi dhe punësimi që po zbatojnë në Tiranë dy organizata joqeveritare nga Shqipëria dhe Gjermania kanë përfituar rreth 700 vetë, 90 përqind e të cilëve i përkasin grupmoshës 15 – 35 vjeç

Marsela, rreth të tridhjetave, është e divorcuar dhe nga martesa me ish-bashkëshortin ka tre fëmijë. Jeton larg qytetit të origjinës dhe familjes me fëmijët e saj, për të cilët kujdeset pa asnjë lloj ndihme sociale. Ajo është dhe rast i ushtrimit të dhunës në familje dhe i varfërisë ekstreme. Në këtë situatë Marsela është kontaktuar nga një organizatë joqeveritare e profilit socio-humanitar, DEV-AID, që e ka përfshirë në njërin prej projekteve tё  veta, quajtur “Tё bёjmё tregun e punёs tё funksionojё pёr grupet nё nevojё!”. Mbështetja është me synim që Marsela të kryejë kursin për kuzhiniere që më pas të ketë mundësi punësimi. “Shpresoj që ta mbyll me sukses kursin, sepse me një certifikatë profesioni kam mundësi të zë punë dhe t’i bëj halleve të jetesës”, thotë Marsela.

Por Marsela nuk është përfituese e vetme nga projekti mbështetës i DEV-AID-it. Në evidencat e kësaj organizate joqeveritare janë rreth 700 persona që janë përfshirë në harkun kohor nga prill 2014 deri në shtator 2016, prej  të cilëve, gjysma janë integruar në tregun e punës nëpërmjet ndërmjetësimit për punësim dhe inkurajimit për vetëpunësim në profesionet e përfituara nga ndjekja e kurseve.

Punёsimi i shtresave në vështirësi

DEV-AID ka tre vjet që funksionon dhe fokusi kryesor është të mbështesë dhe përfaqësojë komunitetet në zhvillim në fushën e të drejtave të njeriut, barazisë gjinore dhe progresit social në tërë aspektet. Po ashtu ekspertët dhe bashkëpunëtorët e organizatës ofrojnë shërbime komunitare, nëpërmjet orientimit, ndërmjetësimit, informimit dhe dhënies së alternativave për përmirësimin e kushteve socio-ekonomike dhe politike. Pikërisht një prej angazhimeve kryesore të DEV-AID-it është “Tё bёjmё tregun e punёs tё funksionojё pёr grupet nё nevojё!”, në partneritet me Drejtorinë Rajonale të Formimit Profesional Publik Nr.4, të Ministrisë së Mirëqënies Sociale dhe Rinisë, si dhe me mbështetjen financiare nga organizata gjermane Brot fur die Welt, BfdW, me qendër në Berlin.

Drejtuesja e projektit Endrita Cici thotë se qëllimi mbetet integrimi në tregun e punës i grupeve në vështirësi të shoqërisë nëpërmjet arritjes së objektivave specifike të tilla si, realizimit të kurseve të ofruara nga formimi profesional publik për të  përmbushur më mirë nevojat e tregut të punës, rritja e aksesit në formimin profesional publik për grupet në vështirësi, rritja e aksesit në tregun e punës për këto grupe nëpërmjet punësimit në tregun formal.

“Përfituesit në këtë projekt janë kryesisht përfaqësues të shtresave në vështirësi të shoqërisë, persona me të ardhuara minimale jetese, kryesisht të përfituara nga skema e ndihmës ekonomike ose tregu informal i punës, punëkërkues afatgjatë të papunë, migrantë të brendshëm, të rinj që punojnë në rrugë, individë me nivel të ulët arsimor ose pa arsim te detyrueshem, të rinj që kanë braktisur shkollën, emigrantë te rikthyer në vendin e origjinës në kërkim të një pune, komuniteti rom dhe egjyptian, jetimë socialë dhe biologjikë, persona me aftësi të kufizuar fizike dhe mendore, si edhe gra dhe vajza viktima të dhunës në familje dhe trafikimit. Rreth 90 përqind e përfituesve i përkasin grupmoshës 15 – 35 vjeç dhe pjesa e mbetur i përkasin grupmoshës 35-45 vjeç”, thotë Cici për Deutsche Welle-n.

Kombinimi i aktiviteteve promovuese nё qendёr dhe komunitet

Në mjediset e organizatës mësojmë se shërbimet që u ofrohen përfituesve janë të larmishme dhe kryesisht me karakter social: që prej regjistrimit në kurs dhe deri në certifikim dhe më pas integrim në tregun e punës, përfituesit e qendrës referuar nga OJF-të e rrjetit janë objekt i mbështetjes së përditësuar nga stafi i DEV-AID.

Psikologia dhe ndërmjetësja e punësimit në projekt, Andja Trasja, përmend propagandimin e formimit profesional afatshkurtёr si njё mjet i rёndёsishёm drejt punёsimit nepermjet aktiviteteve promovuese nё qendёr dhe nё komunitet, por dhe aktivitetet masive ndёrgjegjёsuese. Ndër shërbimet janë dhe aktivitetet masive informuese, sociale, kulturore me pёrfituesit e qendrёs sipas nevojave, thotë Trasja për Deutsche Welle-n.

“Po kështu bëjmë trainime për aftësimin interpersonal të përfituesve në përballjen e ardhshme me tregun, jepet informacion i pёrgjithshёm pёr funksionimin e strukturave shtetёrore lidhur me aplikimin pёr punёsim dhe pёrfitime tё tjera sociale tё pёrfituesve, realizohen ndёrhyrje sociale dhe ndjekje e progresit social tё pёrfituesve, individualisht dhe nё grup sipas problematikave, jepet asistencë dhe mbёshtetje social-psikologjike sipas rasteve, mbështetje ligjore, ndёrmjetёsim i praktikave profesionale pranё njёsive tё bizneseve lokal pas certifikimit, ndërmjetësim për punësim etj.”

Mbështetja gjermane jo thjesht financiare

Bashkëpunimi me organizatën gjermane Brot fur die Welt ka nisur që prej muajit prill 2014, fillimisht me një kontratë me kohëzgjatje 1 vit e gjysëm, e cila më pas u vijua nga kontrata e dytë me afat 3 vjeçar që përfundon pas rreth dy viteve

“Mbështetja e BfdW për DEV-AID-in për të arritur realizimin e objektivave të projektit nuk është thjeshtësisht financiare por tejet kësaj, konsiston edhe në mbështeteje profesionale për ngritje kapacitetesh organizative, duke mundësuar trajnimin e stafit dhe konsultim të vazhdueshëm lidhur me metodat e reja të ndërhyrjes”, shton Andja Trasja,  psikologe dhe ndërmjetëse në projektin “Tё bёjmё tregun e punёs tё funksionojё pёr grupet nё nevojё!”. (dw)

Përpunimi i sasive të marijuanës që u kultivua këtë vit në zona të ndryshme të Shqipërisë po përfshin dhjetëra persona. Operacionet policore po zbulojnë në zonat e banura dhe zona të thella malore mjedise të magazinimit dhe punëtorë që përpunojnë bimët e thara të marijuanës.

Policia njoftoi të hënën se gjatë një operacioni të zhvilluar në një zonë rurale të Mallkastrës u bllokua 380 kilogramë marijuanë dhe u arrestuan 11 persona nga Fieri, Vlora,Mallakastra dhe madje edhe Ksamili, një qytezë e vogël në bregdetin jugor të Shqipërisë. Mes të arrestuarve policia tha se gjeti në mjediset e përpunimit edhe dy gra dhe shpalli në kërkim edhe persona të moshuar, që dyshohen se kanë vënë banesat në shërbim të magazinimit të lëndës narkotike.

Policia nuk ka dhënë hollësi se ku ishte kultivuar bima narkotike që po përpunohej. Policia shqiptare nisi të premten një operacion në disa qarqe të vendit ndaj narkotrafikut duke angazhuar rrreth 300 forca mes të cilave edhe një repart special policor. Mbi 2 tonë marijuanë janë shkatërruar, dhjetëra persona janë përfshirë në hetime dhe arrestime dhe janë sekuestruar armë e municione që shërbenin për ruajtjen e drogës.

Arrestime për marijuanën janë njoftuar edhe në kufirin greko- shqiptar nga polica greke.Pas bllokimit në fundjavë të 175 kilogramëve marijuanë dhe arrestimit të një 44 vjeçari nga Saranda, policia greke tha se arrestoi edhe tre të rinj të tjerë shqiptarë që kishin transportuar lëndën narkotike nga kufiri shqiptar dhe më pas droga ishte ngarkuar në autoveturë në anën greke.

Ndërkohë policia italiane njoftoi të hënën se një tjetër sasi e madhe kokaine e pastër, me prejardhje nga Brazili dhe destinacion Durrësin është kapur nga forcat e “Rojës Bregdetare ”- në portin Gioia Tauro në brigjet italiane. Sipas burimeve zyrtare policore italiane droga ishte ndarë në 17 pako dhe peshonte 19 kg. Sipas përllogaritjeve të Rojës Bregdetare nëse sasia e kokainës do të shitej në tregun italian do të kapte një vlerë prej afro 4 milionë eurosh.

Burimet italiane thanë se sasia e kokainës u zbulua brenda një kontenieri që transportonte pula të ngrira, i cili vinte nga Paranagua e Brazilit dhe do të shkarkohej në Durrës. (voa)