Partia Socialiste mblodhi për herë të parë grupin e saj parlamentar në ambientet e Kryesisë së Kuvendit. E pikërisht nga ai vend ku Lulzim Basha dhe Edi Rama ranë dakord për marrëveshjen e 18 majit, kreu socialist ju rikthye asaj për reformën zgjedhore, duke i cilësuar legjitime kërkesat e Partisë Demokratike, të cilën Rama e quajti opozitën kryesore me të cilën do të arrihet marrëveshja për reformën zgjedhore.

“Partia Socialiste ka patjetër të gjithë vullnetin e mirë që të çelë një diskutim për përmirësimin e mëtejshëm të procesit zgjedhor, por në kuadër të një konceptimi tërësor të marrëdhënies Qeveri-Opozitë, PS-PD. E mirëpresim Partinë Demokratike në një dialog të vërtetë dhe realist lidhur me procesin zgjedhor, por dëshirojmë paraprakisht të përcaktojmë së bashku me PD një kornizë të qartë brenda së cilës do të zhvillohet dialogu dhe bashkëpunimi i shumicës parlamentare me opozitën. Kjo natyrisht nuk përjashton opozitën tjetër, përkundrazi e integron atë, por boshti i dialogut është PS-PD”, tha Rama.

Një pikë që solli debat në mbledhjen e grupit ishte dhe buxheti për institucionet e reja të Vettingut, ku nuk munguan as kundërshtitë, si nga Erjon Braçe, ashtu edhe nga Saimir Tahiri.

Edi Rama: Nuk është çështje numri punonjësisht, por është çështje strukturimi si duhet i një institucioni për të marrë rezultain maksimal. Në rastin konkret, kur është fjala për një proces kaq të rëndësishëm, siç është ai i vettingut, ne jo vetëm nuk do të kursejmë asnjë burim që qeveria ka dhe që duhet t’ja vendosë në dispozicion këtij procesi, por përkundrazi, do të bëjmë gjithçka që është e nevojshme.

Erjon Braçe: Është një vendim që ka në mënyrë të qartë efekte financiare. Kësaj radhe u tejkalua, por unë do ju kërkoj që herë tjetër mos të ndodhë më që vendime të tilla mos të kalojnë në Komisionin e Ekonomisë dhe Financave.

Saimir Tahiri: Dy nga institucionet thanë aty që ne nuk bëjmë dot detyrën me këtë buxhet. Kur këto institucione na e thonë që sot që s’bëjmë dot detyrën, nesër çfarë do na thonë? S’e di, ndoshta duhet parë më pak fleksibilitet nga ana jonë dhe ndoshta nga Ministria e Financave.

Arben Ahmetaj: Unë e ftoj Saimirin që të ulet me mua që të shohim detajet që dhe ai të dalë i qetë që ne i kemi dhënë mbështetjen maksimale strukturës nga ana financiare.

/ Top Channel

Drejtoresha e Zërit të Amerikës, Amanda Bennett, e cila po viziton 5 vende të Ballkanit, ishte sot në Shkodër. Ajo shkoi në Shqipëri pas vizitave në Serbi, Bosnje dhe Mal të Zi. Zonja Bennett theksoi gjatë takimeve rëndësinë e informacioneve të bazuara në fakte dhe të dhëna të sakta. Në këtë vizitë ajo shoqërohet nga drejtori i sektorit të Euroazisë në Zërin e Amerikës, Elez Biberaj dhe shefi i shërbimit shqip, Arben Xhixho.

Takimin e parë, Drejtoresha Bennett e zhvilloi në qytetin e Shkodrës, ku u prit nga Kryetarja e Bashkisë, Voltana Ademi, e cila e falenderoi për rolin që Zëri i Amerikës ka luajtur dhe vazhdon të luajë në mbështetje të shqiptarëve për liri dhe demokraci. Në këtë takim ishin të pranishëm edhe personalitete të tjera të jetës politike dhe sociale në Qarkun Shkodër.

Gjatë qëndrimit në Shkodër, Drejtoresha Bennett u njoh me traditat e qytetit dhe vizitoi Muzeun Kombëtar të Fotografisë “Marubi”.

Në një komunikim me mediat, zonja Bennett foli mbi rolin e Zërit të Amerikës.

Zëri i Amerikës, tha zonja Bennett, trasmeton në Shqipëri prej 75 vitesh dhe se ajo është drejtoresha e parë që viziton Shqipërinë gjatë gjithë këtyre viteve. Ne, tha ajo, e njohim rolin dhe ndikimin që ka Zëri i Amerikës për një shtyp të lirë dhe në mbështetje të zhvillimeve demokratike

Ajo theksoi transparencën në trasmetimet e Zërit të Amerikës.

Ne, tha ajo, financohemi 100 përqind nga qeveria amerikane, por gjithashtu jemi edhe plotësisht të pavarur nga ndikimet, kjo me qëllim që të trasmetojmë në mënyrë sa më transparente për publikun.

Trasmetimi i informacioneve që janë të bazuara në fakte dhe të dhëna të sakta, tha Drejtoresha Bennett, është ajo që ne duam të zhvillojmë në mënyrë që të ndikojmë në zhvillimet demokratike. Ne, tha zonja Bennet, duam me të vertetë të shtojmë praninë në Shqipëri duke mbështetur dhe zgjeruar partneritetin me mediat vendase.

Gjatë vizitës dy ditore në Shqipëri, Drejtoresha e Zërit të Amerikës do të takohet me gazetarë dhe zyrtarë të qeverisë.

Ndërkohë, gjatë vizitës në rajon, Drejtoresha e Zërit të Amerikës, Amanda Bennett, u prit mbrëmë në Podgoricë nga Presidenti i Malit të Zi, Filip Vujanoviç, i cili nderoi me një mirënjohje shtetërore Zërin e Amerikës me rastin e 75-vjetorit.

Presidenti Vujanoviç vuri në dukje rolin e veçantë të Zërit të Amerikës për dëgjuesit dhe shikuesit e rajonit me informimin objektiv e të paanshëm.

Ndalesën e fundit në 5 vendet e rajonit të Ballkanit, drejtoresha e Zërit të Amerikës, Amanda Bennett, do ta bëjë në Kosovë. (voa)

Debati për universitetet për akreditimin dhe vlerësimin e tyre është një debat që tërheq gjithnjë e më shumë vëmendjen dhe dalja e një raport të agjencisë britanike të akreditimeve ka ndezur akoma më shumë diskutimin mbi këtë temë.

Në raportin e kësaj agjencise, universiteti publik duket sikur e ka humbur monopolin e cilësisë.

Për të diskutuar mbi këtë raport dhe për gjendjen reale në universitetin publik dhe privat në vend, këtë të hënë në Top Story ishin të ftuar anëtari i Komisionit të Arsimit, Luçiano Boçi, drejtori i Kurrikulave në UT, Çlirim Duro, sipërmarrësi në arsimin privat, Henri Çili dhe pedagogu, Agron Gjekmarkaj.

Drejtori i Kurrikulave në UT tha se ky institucion ka marrë një draf-raport nga agjencia britanike e akreditimit dhe ky raport është kundërshtuar në disa pika.

“Akreditimi është një proces që Universiteti i Tiranës e ka mbështetur dhe në fund kemi një draft-raport të ekspertëve shqiptarë dhe britanikë, që na solli 19 problematika. Ne bëmë kundërshtimet tona dhe këto kundërshti i paraqitëm tek grupi i ekspertëve”, tha ai.

Sipas Duros, UT plotëson të gjitha standardet dhe argumentoi mungesën e strategjisë së këtij institucioni, një vërejtje e bërë edhe në raportin e akreditimit me hyrjen në fuqi të ligjit të ri të arsimit të lartë.

“Kemi strategjinëe e vjetër të zhvillimit, por ligji i ri na imponon një strategji të re. Strategjia e re, për shkak të ligjit kërkon që ajo të shkojë nëpër universitetet. Ne kemi strategjinë e vjetër dhe jemi duke hartuar strategjinë e re”, deklaroi ai.

Deputeti i Partisë Demokratike, Luçiano Boçi hodhi mëdyshje saktësinë e vlerësimit për disa universitete publike dhe fajësoi për këtë reformën në arsimin e lartë dhe përplasjen për anëtarin në Bordin e Administrimit të Universitetit.

“Ligji i ri kërkon që strategjia të kalojë njëherë tek Bordi i Administrimit dhe më pas të kalojë në Senat dhe universitete. Situata dhe konfliktualiteti me Ministrinë e Arsimit për kontrollin e bordit solli këto pasoja. Universitetet publike janë akredituar mes një tronditjeje ligjore. Nuk është i saktë akreditimi për të gjitha universitetet publike. Reforma nuk ka dhënë asnjë efekt pozitiv në organizimin e universiteteve publike. Reforma e fundit ka sjellë të gjitha pasojat dhe mosradorddimin e atyre standardeve që kërkohen në universitetet duhet të riorganizohen sipas ligjit të ri me një afat 2-vjeçar, që nuk ka përfunduar ende”, tha ai.

Pedagogu Agron Gjekmarkaj tha se raporti i britanikëve konfirmon një sërë problematikash serioze të Universitetit të Tiranës, por shtoi se ky universitet vijon të jetë ende më i miri në vend.

“Disa probleme janë neglizhuar tek institucioni kryesor i arsimit në vend, por Universiteti i Tiranës nuk ka simuluar strategji false dhe nuk ka trajnuar studentët sesi të përgjigjen para atyre që do të bëjnë akreditimin”, tha ai.

Gjekmarkaj hodhi dyshimin se goditja ndaj këtij universiteti lidhet edhe me reformën në arsimin e lartë dhe kundërshtimin, sipas tij, të kësaj reforme nga ky institucion.

“Universiteti i Tiranës i ka bërë rezistencën më të madhe ligjit për reformën në arsim dhe duket sikur ky rezultat kërkon që t’i japë të drejtë dikujt politikisht. Universiteti i Tiranës po goditet në imazh për të dalë përballë opinionit për të thënë që ne kishim të drejtë kur kërkuam këtë ligj të arsimit të lartë”, tha ai.

Henri Çili tha se raporti i britanikëve është përfundimtar dhe risjell në vëmendje nevojën për një treg të lirë arsimor. Ai tha se universiteti shtetëror duhet të reformohet.

“Në Shqipëri ka një hipokrezi për universitetin shtetëror, që për mendimin tim duhet të reformohet. Por, ne duhet të kemi konkurencë sipas parimit të tregut. Kështu nuk shkojmë përpara. Shqipëria bëri hapjen e tregut për televizionet, për bankat, për tregun e lirë”, tha ai.

Çili deklaroi se institucionet private të arsimit të lartë janë të gatshme për këtë.

“Universitetet private janë të monitoruara, të ligjshme, kanë kapacitetet dhe janë të shkëlqyera. Duhet t’i japim fund një sistemi hipokrit në arsim. Duhet të dalim të barabartë në treg”, deklaroi ai.

/ Top Channel