Izraeli njoftoi për ashpërsimin e masave kundër përhapjes së koronavirusit të ri, përfshirë mbylljen e shumë bizneseve, gjatë fundjavës.

Qeveria njoftoi për kufizimet, pasi kryeministri izraelit, Benjamin Netanyahu, tha se “masat e përkohshme” ishin të nevojshme, për të shmangur një izolim tjetër të përgjithshëm.

Netanyahu është përballur me kritika dhe protesta të gjera ditët e fundit, lidhur me trajtimin e pandemisë nga ana e qeverisë së tij, dhe pasojat ekonomike nga një izolim i mëparshëm.

Kufizimet e reja parashohin mbylljen gjatë fundjavave të dyqaneve, qendrave tregtare, salloneve të bukurisë dhe vendeve turistike.

Fundjava izraelite është të premten dhe të shtunën.

Izraeli kryesisht kishte parandaluar shpërthimin e epidemisë, pas vendosjes së masave të ashpra të izolimit që zgjatën dy muaj.

Por, rastet e reja me koronavirusin e ri, janë rritur që kur janë hequr kufizimet.

Izraeli raportoi rreth 1.900 raste të reja vetëm ditën e enjte. Të paktën 384 njerëz kanë vdekur që nga fillimi i pandemisë, ndërsa janë infektuar më shumë se 45,000 persona.

rel

Të dhënat janë për vitin 2019 dhe janë marrë nga Zyra e Statistikave të Serbisë.

rel

SHBA shënoi një rekord shqetësues ditor të enjten prej më shumë se 75 mijë personash të infektuar me koronavirus, sipas të dhënave të gazetës “New York Times”. U desh një javë që të tejkalohej rekordi i mëparshëm prej mbi 68 mijë të infektuarisht të rinj, i vendosur të premten e kaluar.

Ndërsa numri i rasteve të reja me koronavirus po shkon në rritje, zyrtarët shtetërorë vazhdojnë të shpërndajnë mesazhe të ndryshme se si ta trajtojnë pandeminë.

Guvernatori i shtetit jugor të Alabamës Kay Ivey, nxorri të enjten urdhërin që detyron banorët të vendosin maska në publik, ndërsa shteti raportoi rreth 50 vdekje të reja të mërkurën. Guvernatori i Montanës Steve Bullock urdhëroi vendosjen e detyrueshme të maskave në të gjitha mjediset publike të brendshme në ato lokalite ku ka katër ose më shumë persona të infektuar.

Por në shtetin jugor të Xhorxhas, i cili regjistroi rreth 3,900 raste të reja, totali i dytë më i lartë i tij që nga fillimi i pandemisë, guvernatori Brian Kemp lëshoi një urdhër të ri që ndalon qytetet të vendosin me detyrim maska, duke shtuar se “inkurajon fuqishëm përdorimin e tyre”.

Disa kryetarë bashkish të këtij shteti, përfshirë kryeqytetin Atlantën, kanë bërë të ditur se do ta kundërshtojnë vendimin e zotit Kemp dhe do të zbatojnë urdhrat që tashmë kanë nxjerrë për përdorimin e detyruar të maskave.

Deri tani 26 nga 50 shtete amerikane kanë urdhëruar përdorimin e detyruar të maskave. Shtetet e Bashkuara kanë mbi 3.5 milionë persona të infektuar me koronavirus dhe mbi 138 mijë të vdekur, që prej fillimit të pandemisë.

voa

Demokrati liberal Jamaal Bowman ka mundur ligjvënësin prej 16 mandatesh të Kongresit amerikan Eliot Engel në garën për një vend në Capitol Hill për të përfaqësuar një pjesë të Nju Jorkut.

Lajmi u njoftua të premten nga disa media amerikane. Gara po shihej me mjaft vëmendje si një provë force e krahut të majtë të Partisë Demokratike ndërsa Joe Biden, që i takon krahut të moderuar të partisë po shkon drejt kandidimit zyrtar të tij për garën presidenciale. Rezultati i 23 qershorit u bë publik të premten nga gazeta “New York Times” dhe “Associated Press”.

Me fitoren e tij në zgjedhjet paraprake, zoti Bowman i dha fund karrierës së gjatë në Dhomën e Përfaqësuesve të 73 vjeçarit Eliot Engel, i cili është kryetar i një komisioni me peshë në këtë dhomë, atij të Punëve të Jashtme.

Deri më tani gjatë këtij cikli zgjedhor, pesë ligjvënës aktualë të kësaj dhome, dy demokratë dhe tre republikanë, kanë humbur garën për rizgjedhje përballë kundërshtarëve të tyre brenda partisë.

voa

Veprimtarë dhe mbështetës të Rezistencës Iraniane, NCRI-së dhe MEK-ut, zhvilluan këtë të premte në mënyrë online Samitin e përvitshëm për Lirinë e Iranit.

Samiti bashkoi mbështetësit e Iranit të lirë nga mbi 100 shtete në 5 kontinente, duke përfshirë edhe Iranin dhe Ashraf 3 në Shqipëri, ku banojnë anëtarët e Organizatës Muxhahedine të Popullit të Iranit (PMOI/MEK).

Presidentja e zgjedhur e NCRI-së, Maryam Rajavi, paraqiti planin me 10 pika për Iranin e së ardhmes dhe u bëri thirrje të gjitha qeverive dhe komuniteteve ndërkombëtare që të mbështesin popullin iranian në përballjen me rrezikun më të madh për paqen dhe sigurinë në botë.

“Ky samit i jep jehonë zërit të Rezistencës 40-vjeçare të popullit iranian kundër diktaturës e fashizmit fetar dhe përpjekjes për liri e demokraci. Ky samit u jep jehonë thirrjeve për përmbysjen e regjimit klerikal në kryengritjet e njëpasnjëshme nga dhjetori 2017 deri në janar 2020. Ky samit është zëri i Njësive të Rezistencës dhe qyteteve të rebeluara në mbarë Iranin” – tha zonja Rajavi.

Ajo shpjegoi se kryengritjet e viteve të fundit vërtetuan se teokracia në pushtet mund të përmbyset dhe rezistenca iraniane e njësitë e rezistencës të MEK kanë rol kryesor.

“Populli ynë duhet të gëzojë të drejtën për të patur shëndet, për të patur strehim, punë, organizim dhe sindikata, autonominë e minoriteteve etnike, të drejtën për pjesëmarrje të barabartë në menaxhimin e punëve të shoqërisë, barazinë gjinore, dhe sovranitetin popullor. Rezoluta e miratuar kohët e fundit nga shumica në Dhomën e Përfaqësuesve të SHBA ofron një model të besueshëm që mund ta ndjekin të gjitha qeveritë dhe komuniteti ndërkombëtar për sa i përket Iranit dhe popullit iranian” – tha zonja Rajavi.

Afro një mijë politikanë dhe parlamentarë të spikatur nga pesë kontinente morën pjesë në këtë tubim në mbështetje të popullit iranian për liri.

Mes folësve ishin Rudy Giuliani, Senatori Joe Lieberman, ish Ministra të Jashtëm të Francës, Italisë, Kanadasë, dhe Polonisë dhe përfaqësues nga parlamentet europiane, gjermane, franceze dhe italiane.

Ish kryeministri shqiptar dhe ministri i diasporës, Pandeli Majko, tha në Samit se merrte pjesë aty si shqiptar dhe si mik.

“Dua t’i them Kampit Ashraf në Shqipëri: ju jeni pjesë e familjes sonë. Ju jeni në besën tonë. Muxhahedinët janë flamuri i së ardhmes së lirisë në vendin e tyre” – tha zoti Majko.

Kryetar i Partisë Demokratike të Shqipërisë Lulzim Basha tha në fjalën e tij se në qeverisje apo në opozitë shqiptarët mbështesin objektivin e popullit iranian për një republikë demokratike, laike, dhe jo-bërthamore të Iranit.

“Qëndrojmë fuqishëm kundër regjimit iranian, nëse ai vazhdon t’i rikthehet praktikave të paligjshme e terroriste në tokën tonë dhe të vazhdojë me eksportimin e fondamentalizmit në Shqipëri e në rajonin tonë” – tha zoti Basha.

Samiti lidhi bashkë tubime të njëkohshme në qytete madhore të Europës, në Shtetet e Bashkuara, Shqipëri dhe Australi me mbi 30 mijë lidhjeje online në mbështetje të një Irani të lirë.

Afro një mijë personalitete politike, kulturore dhe fetare, morën pjesë në tubim dhe mbështetën thirrjen e popullit iranian për përmbysjen e diktaturës fetare në vendin e tyre.

voa