Zëvendëskryeministri i Kosovës, Besnik Bislimi, tha se është arritur një marrëveshje në parim me palën serbe për zgjidhjen e situatës së krijuar me targat e makinave.

Pas disa orë bisedimesh të ndara me të dërguarin e BE-së për bisedimet Kosovë – Serbi, për rrugëdaljen nga situata e krijuar pas vendimit të Kosovës për të zbatuar masën e reciprocitetit për targat e makinave me Serbinë, zoti Bislimi tha se është hartuar një projekt i marrëveshjes, pjesë të së cilës ende nuk janë miratuar nga Beogradi.

Ai tha se “nga e hëna Kosova dhe Serbia do të avancojnë në përdorimin e stikersave (fletëngjitëse) në vend të ndërrimit të tabelave, që ishte edhe synimi i ynë që të kemi trajtim të barabartë”. Kjo tha ai, është masë e përkohshme dhe “do të formohet grup punues për gjetjen e një zgjedhje të përhershme për lëvizjen e lirë të makinave brenda gjashtë muajsh”.

Zoti Bislimi tha se sipas projekt-marrëveshjes, të shtunën forcat e KFOR-it do të zëvendësojnë njësitë e posaçme të policisë së Kosovës në vendkalimet kufitare ne veri dhe njëkohësisht duhet të hiqen barrikadat e vendosura nga protestuesit serbë.

As pala serbe e as i dërguari evropian nuk kanë folur rreth kësaj çështjeje, ndërsa zëdhënësi i Bashkimit Evropian, Peter Stano tha se “takimi nuk ka përfunduar dhe se negociatat po vazhdojnë për të gjetur një zgjidhje për krizën në veriun e Kosovës”.

Ambasadori amerikan në Beograd, Anthony Godfrey, shkroi në Twitter se është në kontakt me Zv/Ndihmës Sekretarin amerikan të Shtetit për Evropën Jugore dhe Qendrore, Gabriel Escobar “që është në Bruksel për të mbështetur bisedimet e drejtuara nga BE-ja. Puna nuk ka përfunduar, por është arritur përparim i mirë”, shkroi ai duke nënvizuar se palët duhet të vazhdojnë punën për ta çuar deri në fund. “Koha është tani”, shkroi ambasadori Godfrey.

I ngarkuari me punë në ambasadën amerikane në Prishtinë, Nicholas Giacobbe, shkroi se “pavarësisht raportimeve në media, negociatat në Bruksel vazhdojnë. Është bërë përparim, por mbetet punë për t’u bërë. Ne inkurajojmë Kosovën dhe Serbinë që të vazhdojnë të angazhohen hapur dhe seriozisht”, shkroi ai.

Situatë e pandryshuar në veriun e Kosovës

Grupe qytetarësh serbë për të dhjetën ditë me radhë po mbajnë të bllokuara rrugët që shpiejnë në vendkalimet kufitare me Serbinë, në Jarinjë dhe Bërnjak në shenjë proteste ndaj vendimit të qeverisë së Kosovës për vendosjen e reciprocitetit me Serbinë për targat e makinave.

Forcat paqeruajtëse të NATO-s, thanë të mërkurën se “në përgjigje të zhvillimeve të fundit në veriun e Kosovës, misioni i KFOR-it i drejtuar nga NATO-ja, ka shtuar patrullimet përgjatë rrugëve kryesore të prekura nga bllokimet dhe ka vendosur njësi në vendkalimet kufitare Jarinjë dhe Bërnjak”.

Në një postim në rrjetet sociale, KFOR –i tha se “mban një qëndrim të paanshëm, të vendosur dhe aftë për t’u përballur me të gjitha situatat e mundshme”, ndërsa komandanti i KFOR-it, Franco Federici, “gjithashtu mbetet në kontakt të ngushtë me të gjitha palët e përfshira, për të kontribuuar për një ulje të shpejtë të tensioneve”.

Qeveria e Kosovës është pajtuar me ofertën e komandantit Federici që trupat e KFOR-it të sigurojnë vendkalimet kufitare me Serbinë, në shkëmbim të largimit të barrikadave dhe njësive të posaçme të policisë së Kosovës.

Por, oferta është refuzuar nga përfaqësuesit e Listës Serbe, subjektit kryesor politik të serbëve të Kosovës.

Nga e hëna e kaluar, makinat që hyjnë nga Serbia në Kosovë, duhet të marrin targa të përkohshme, njësoj sikundër veprohet ne Serbi me makinat nga Kosova për më shumë se dhjetë vjet me radhë.

Qeveria e Kosovës dërgoi njësitë e posaçme në veri për të mbështetur zbatimin e vendimit të saj.

Beogradi reagoi me zemërim dhe njoftoi ngritjen e gatishmërisë ushtarake në afërsi të kufirit me Kosovën. Presidenti serb, Aleksandër Vuçiç, kërkoi tërheqjen e njësive të posaçme të policisë nga veriu i Kosovës dhe anulimin e reciprocitetit për targat e makinave.

Prishtina tha se është e gatshme të heqë dorë nga targat e përkohshme, nëse Beogradi vepron njësoj, ndërsa akuzoi Serbinë për nxitje tensionesh.

voa

Kryetarja e KE, Ursula von der Leyen, tha në Prishtinë se është e shqetësuar për krizën në veri të Kosovës. Në Bruksel faktori ndërkombëtar po ndërmjetëson një takim Kosovë-Serbi pikërisht për situatën në veri.

Kryetarja e Komisionit Evropian, Ursula von Der Leyen, tha në Prishtinë se dialogu është rruga e vetme për zgjidhjen e situatës në veri të Kosovës. Ajo tha se është e shqetësuar për situatën në veri, prandaj sipas Von der Leyen, është jetike që të ndodhë normalizimi i raporteve Kosovë-Serbi. Këto komente, kryetarja e Komisionit Evropian i bëri gjatë qëndrimit në Kosovë, në kuadër të turnit të saj Ballkanit, dhe pas takimeve që zhvilloi me presidenten Vjosa Osmani dhe kryeministrin Albin Kurti.

“Jam shumë e shqetësuar me krizën aktuale. Është me rëndësi që të shtensinohet situata dhe të kthehemi në tryezën e negociatave për të gjetur zgjidhje të qëndrueshme, dhe e vetmja mënyrë për këtë është përmes dialogut të lehtësuar nga BE, që është platforma e vetme për zgjidhjen e krizës aktuale”, tha Von der Leyen, në një konferencë  për medie. Ajo tha se mënyra e vetme për të gjetur zgjidhje për situatën aktuale në veri është dialogu në Bruksel.

“Është më rëndësi që të ecim përpara në rrugën evropiane dhe ka rëndësi jetike që të bëhet normalizimi i raporteve Kosovë-Serbi”, tha von der Leyen.

Kurti: Serbia reagoi me forcë, me tanke dhe avionë rusë

Kryeministri Albin Kurti, nga ana e tij, tha ta ketë njoftuar për së afërmi Ursula von der Leyen-in për vendimin e qeverisë së Kosovës për reciprocitetin në targa të veturave të Serbisë, të cilin nuk e quajti vendim të ri.

“E njoftova për gjendjen në vendkalimet kufitare, Bërnjak dhe Jarinë, se ne nuk kemi marrë vendim të ri, por vetëm po e zbatojmë një dakordim të mëhershëm. Fatkeqësisht, Serbia reagoi me forcë, duke përfshirë edhe tanke, automjete të blinduara e luftarake. Përveç këtyre ka angazhuar aeroplanë ushtarakë të prodhimit rus”, tha Albin Kurti, duke kërkuar që siҫ tha “të dënohen sulmet në Zubin Potok dhe Jarinë pasi janë sulmuar institucionet e Kosovës, e ky sulm erdhi pas deklaratave luftënxitëse të presidentit të Serbisë”.

Edhe presidentja e Kosovës, Vjosa Osmani nga ana e saj, pas takimit me kryetaren e Komisionit Evropian, tha se “Kosova vetëm po e përmbush një aspekt ligjor siҫ është (reciprociteti në targa të veturave) dhe se nuk ka asnjë tendencë nga pala kosovare për ta tensionuar situatën e sigurisë“.

Osmani tha se”një tendencë e tillë, po shpërfaqet hapur nga pala serbe, e cila e ndikuar edhe nga qarqet ruse po përpiqet të shkaktojë destabilizim në gjithë rajonin e Ballkanit”. Ajo i kërkoi faktorit ndërkombëtar “të dënojë tendencat e Serbisë për destabilizim”.

Presidentja e Kosovës tha po ashtu se ia kujtoi von der Leye edhe njëherë që “Kosova tashmë ka plotësuar të gjitha kriteret për liberalizim vizash, ndaj ka kërkuar që BE-ja t`i mbajë premtimet ndaj Kosovës dhe që shtetet anëtare të BE-së ta respektojnë rekomandimin e Komisionit Evropian”.

Bislimi dhe Petkoviç takohen në Bruksel

Sidoqoftë, në dritën e zhvillimeve në veri të Kosovës, të mërkurën në Bruksel dy kryenegociatorët, ai i Kosovës Besnik Bislimi dhe ai i Serbisë Petar Petkoviç, u takuan ndarasi me të ngarkuarin e BE-së për dialogun Miroslav Lajçak dhe zëvendësndihmëssekretarin amerikan për Çështje të Evropës dhe Euroazisë, Gabriel Escobar. Ky i fundit, pas takimit me zëvendëskryeministrin e Kosovës, Besnik Bislimi, tha se “ai po mbështet përpjekjet e Bashkimit Evropian për të gjetur një zgjidhje për situatën e krijuar në veri të Kosovës”.

“Prioritet numër një është që të ulen tensionet. Ato janë shumë të larta tash dhe duhet të ulen menjëherë”, tha Escobar, duke shtuar se “duhet që urgjentisht të gjendet zgjidhje për çështjen e targave të automjeteve dhe që palët t’i kthehen dialogut, përmes të cilit do të zgjidhen çështjet e hapura”.

E mërkura e datës (29.09) shënon ditën e dhjetë të bllokadës së rrugëve që çojnë në dy pikat kufitare me Serbinë, në Jarinjë dhe Bërnjak. Banorët lokalë serbë në shenjë proteste me masën e reciprocitetit për targat e veturave nga Serbia të vendosur nga Qeveria e Kosovës, po mbajnë të bllokuara rrugët me kamionë dhe  vetura.

dw

Kosova së fundmi e ka ndaluar hyrjen e automjeteve me targa serbe në vend – anasjelltas, Serbia e ka bërë të njëjtën gjë me vite. BE-ja bën thirrje për shtensionim, raporton gazeta e njohur gjermane, Süddeutsche Zeitung duke përshkruar zhvillimet e fundit në veri të Kosovës.

Së voni, kur lidershipi i NATO-s ndërhyu, bëhet e qartë se kjo ka të bëjë me më shumë sesa thjesht targa. Jens Stoltenberg, Sekretari i Përgjithshëm i Aleancës së Mbrojtjes, nuk iu drejtua protestuesve që i kanë bllokuar dy pikëkalimet kufitare midis Serbisë dhe Kosovës për më shumë se një javë, por qeverive në kryeqytete: “Beogradi dhe Prishtina”, kërkoi ai , do të duhej të “përmbahen dhe ta rifillonte dialogun”, transmeton Gazeta Express.

Shkaktari për përshkallëzimin e fundit ishte një vendim nga qeveria në Prishtinë, sipas së cilit shoferët kur kalojnë në anën e Kosovës duhet ta vendosin një targë lokale të vlefshme përkohësisht. Natyrisht, kjo një kundërpërgjigje për praktikën e gjatë të qeverisë në Beograd për t’i detyruar shoferët kosovarë në anën e tyre të kufirit t’i përdorin targat serbe.

Pasi anëtarët e pakicës serbe në Kosovën veriore filluan ta bllokojnë kufirin me kamionë në shenjë proteste kundër vendimit të ri për targat, Kosova dërgoi njësi speciale të policisë në atë rajon. Beogradi pastaj shtoi trupat e ushtarëve pranë kufirit dhe bëri që avionët ushtarakë të fluturonin mbi atë zonë.

Përshkallëzimi është një katastrofë për Bashkimin Evropian. Pas fundit të administratës së Donald Trump në SHBA, e cila kishte nxitur trazira me simpati të hapur për planet e shkëmbimit të zonave përgjatë kufirit kosovaro-serb, shpresat në fakt u rritën në Bruksel se dialogu i ndërmjetësuar nga BE-ja midis Prishtinës dhe Beogradit mund të ringjallej. Përfaqësuesi i BE-së për çështjet e jashtme, Josep Borrell u bëri thirrje të dyja palëve që ta “shtensionojnë pa kushte” situatën, shkruan Süddeutsche Zeitung.

Të hënën, presidenti i Serbisë, Aleksandar Vuçiq i priti në takim ambasadorët nga Britania e Madhe, Gjermania, Italia, Franca dhe SHBA-ja, të cilët thuhet se i kërkuan atij që ta shtensionojnë situatën në kufi. Ai pastaj tha në një intervistë televizive se në bisedë me “ambasadorin e një prej vendeve më të fuqishme në botë” (emrin e të cilit ai nuk e tha), ishte bërë “emocional” herë pas here: “Ju doni të më tregoni se ku njësitë tona lejohet të lëvizë brenda territorit tonë? A je normal, njeri?”.

Në një deklaratë zyrtare, Vuçiq kishte deklaruar se është akoma i përkushtuar ndaj Marrëveshjes së Brukselit për normalizimin e marrëdhënieve midis dy shteteve, por tha se në asnjë mënyrë nuk do ta pranonte “poshtërimin e Serbisë dhe qytetarëve të saj”.

Misioni paqësor ndërkombëtar i udhëhequr nga NATO, KFOR ka rritur ndërkohë patrullimet rutinore në të gjithë Kosovën, përfshirë Kosovën veriore.

rtk

Të mërkurën në Bruksel po qëndrojnë shefat e grupeve negociatore të Kosovës dhe Serbisë, Besnik Bislimi dhe Petar Petkoviç, për të diskutuar rrugëdaljen nga situata e krijuar pas vendimit të Kosovës për të zbatuar masën e reciprocitetit për targat e makinave me Serbinë.

Të dy negociatorët u takuan fillimisht ndarazi me të dërguarin e BE-së për bisedimet Kosovë – Serbi, Miroslav Lajçak, ndërsa diskutimeve u është bashkuar edhe Zv/Ndihmës Sekretari amerikan i Shtetit për Evropën Jugore dhe Qendrore, Gabriel Escobar.

Zoti Lajçak shkroi në Twitter pas takimeve ta ndara se “diskutimet do të vazhdojnë gjatë gjithë ditës”.

Diskutimet së mërkurës u bënë të mundura me përpjekjet perëndimore për të ulur tensionet në veriun e Kosovës, ku grupe qytetarësh serbë për të dhjetën ditë me radhë po mbajnë të bllokuara rrugët që shpiejnë në vendkalimet kufitare me Serbinë, në Jarinjë dhe Bërnjak në shenjë proteste ndaj vendimit për targat.

Forcat paqeruajtëse të NATO-s zgjeruan patrullimet në zonë të hënën dhe thanë se kanë biseduar më qeverinë dhe udhëheqësit lokal serbë për uljen e tensioneve.

Ministri i punëve të Brendshme të Kosovës, Xhelal Sveçla, tha të martën se serbët në veriun e Kosovës refuzuan një ofertë të trupave të KFOR-it që të përkujdesen për vendkalimet kufitare me Serbinë, në shkëmbim të largimit të barrikadave dhe njësive të posaçme të policisë së Kosovës.

“Duke qenë se KFOR-i ka ofruar angazhime shtesë dhe është ofruar që të sigurojë policinë tonë kufitare dhe pikat kufitare, ne kemi thënë se me largimin e barrikadave, prezenca e njësive speciale do të ishte e panevojshme. Por, edhe kjo ofertë e komandantit të KFOR-it është refuzuar nga këto elemente ekstremiste dhe me këtë refuzim, këta veç e kanë dëshmuar që nuk janë të brengosur, siç thoshin më herët, me praninë e forcave speciale, por qëllimet e tyre janë thellësisht politike dhe në dëm të sovranitetit të vendit tonë”, tha ministri Sveçla.

Përfaqësuesit e Listës Serbe, konfirmuan të kenë refuzuar ofertën e KFOR-it.

Nga e hëna e kaluar, makinat që hyjnë nga Serbia në Kosovë, duhet të marrin targa të përkohshme, njësoj sikundër veprohet ne Serbi me makinat nga Kosova për më shumë se dhjetë vjet me radhë.

Qeveria e Kosovës dërgoi njësitë e posaçme në veri për të mbështetur zbatimin e vendimit të saj.

Beogradi reagoi me zemërim dhe njoftoi ngritjen e gatishmërisë ushtarake në afërsi të kufirit me Kosovën. Presidenti serb, Aleksandër Vuçiç, kërkoi tërheqjen e njësive të posaçme të policisë nga veriu i Kosovës dhe anulimin e reciprocitetit për targat e makinave.

Prishtina tha se është e gatshme të heqë dorë nga targat e përkohshme, nëse Beogradi vepron njësoj, ndërsa akuzoi Serbinë për nxitje tensionesh.

voa

Nisur nga situata e tensionuar në kufirin Kosovë-Serbi, ministria e Jashtme të Gjermanisë ka bërë thirrje për uljen e tensioneve dhe kthimin në tryezën e bisedimeve.

Ministria e Jashtme e Gjermanisë i bën thirrje Kosovës dhe Serbisë të punojnë për çtensionimin e situatës në veri të Kosovës. Në një prononcim për Deutsche Wellen, ministria e Jashtme në Berlin thotë ndër të tjera se po e “ndjek me vëmendje gjendjen e krijuar në veri të Kosovës dhe në pikat ndërkufitare midis Kosovës dhe Serbisë. Ne kërkojmë nga të dyja palët që t’i lënë provokimet e çdo lloji dhe të çtensionojnë situatën sa më shpejt.

Në prononcim thuhet më tej se Gjermania vijon ta mbështesë “pa kufi punën e të ngarkuarit të posaçëm të BE-së, Miroslav Lajçak,për të forcuar dialogun e udhëhequr nga BE, për normalizimin e marrëdhënieve midis Serbisë dhe Kosovës”. Po ashtu, diplomacia gjermane nënvizon se mbështet edhe “deklaratat e fundit të përfaqësuesit të lartë të BE-së, Josep Borrell, për këtë temë”.

Ministria e Punëve të Jashtme të Gjermanisë e përshëndeti edhe takimin e sotëm, më 29 shtator, në Bruksel, ndërmjet drejtuesve të ekipeve negociatore të Serbisë dhe Kosovës, Besnik Bislimi dhe Petar Petkoviq.

Sekretari gjerman i shtetit, Miguel Berger, theksoi në një mesazh në Twitter të martën që të dyja palët tani duhet të çtensionojnë situatën dhe të kthehen në tryezën e bisedimeve. “Progresi në dialog është në interes të të dyja palëve”, shkroi Berger, pas një takimi me zëvendëskryeministrin e Kosovës Besnik Bislimi, në Berlin.

Bislimi është takuar në Berlin me një sërë zyrtaresh nga ministria e Jashtme  e Gjermanisë, zyra kancelarore dhe përfaqësues të ekonomisë gjermane.

dw