Mesazhi i Ursula von der Leyen për Ballkanin Perëndimor: Ne ndajmë një të ardhme të përbashkët evropiane dhe jemi duke e përgatitur atë tani.

Presidentja e Komisionit Europian, (KE) Ursula von der Leyen ka mbërritur të martën në mëngjes, (28.09) në Tiranë, në kuadër të një turi ballkanik në prag të Samitit Bashkimi Europian-Ballkani Perëndimor, (BE-BP) që do të zhvillohet më 6 tetor në Slloveni, vendin që ka presidencën e radhës së BE. Ajo është pritur me ceremoni zyrtare nga kryeministri Rama në Pallatin e Brigadave. Burime zyrtare nga Delegacioni i BE në Tiranë bëjnë me dije, se pas takimit me kryeministrin Rama, ajo pritet nga Presidenti i Republikës, Ilir Meta.

Programi i qëndrimit disa orësh i Presidentes së KE në Shqipëri vazhdon me një vizitë në kopshtin e fëmijëve “Europa” dhe më pas ajo do të marrë pjesë në përurimin e një shkolle në fshatin Qerek të Krujës, të ndërtuar me fondet e BE, në kuadër të programit EU4Schools, pas tërmetit shkatërrimtar të vitit 2019.

Ursula von der Leyen: Po ndërtojmë tani të ardhmen e përbashkët europiane.

Në një status në twitter Presidentja e KE ka dhënë mesazhin lidhur me turin e saj ballkanik, të nisur sot me Shqipërinë. “Sot filloj vizitën time në gjashtë partnerët tanë të BP përpara Samitit tonë javën e ardhshme. Mesazhi im është i qartë: ne ndajmë një të ardhme të përbashkët evropiane. Ne jemi duke e përgatitur atë tani. Duke kapërcyer COVID, së bashku, duke investuar në mënyrë strategjike. Duke i dhënë mundësi rinisë sonë”, thekson në mesazhin e saj Ursula  von der Leyen.

Turi ballkanik i Presidentes së Komisionit Europian, Ursula von der Leyen do të vijojë në Maqedoninë e Veriut, të mërkurën në Kosovë dhe Malin e Zi dhe përfundon me vizitën e saj në Serbi dhe Bosnjë-Hercegovinë.

dw

Vizita e Ramës në Kosovë ndodh  në kohën e një situate të tensionuar në veri të Kosovës, pas vendosjes së reciprocitetit për targat e Serbisë. Në vizitën në Prishtinë, Rama mbrojti edhe idenë e Ballkanit të Hapur.

Kryeministri i Shqipërisë Edi Rama tha në Prishtinë se Serbia duhet të ndalë manovrat ushtarake afër kufirit me Kosovës, sepse sipas tij, ato nuk mbrojnë qytetarët serbë të veriut të Kosovës. Këtë deklaratë kryeministri i Shqipërisë Edi Rama e bëri gjatë një vizite që po realizon në Kosovë dhe pas një takimi që zhvilloi me kryeministrin e Kosovës, Albin Kurti. Edi Rama nga Prishtina e dënoi “sjelljen e Serbisë karshi vendimit të Qeverisë së Kosovës për reciprocitet lidhur me targat e veturave”. Qëndrimi i Shqipërisë karshi problemit në dy vendkalimet kufitare me Serbinë në veri është shumë i qartë.

“Sot jemi dëshmitarë të manovrave teatrale ushtarake të Serbisë në kufirin me shtetin sovran të Kosovës. Ato manovra nuk mbrojnë qytetarët serbë në veriun e Kosovës, siç pretendohet nga udhëheqja e Beogradit zyrtar”, tha Rama. Kryeministri shqiptar dënoi incidentet e dy ditëve më parë në veri, djegien e qendrave të regjistrimit të veturave në veri të Kosovës. Sipas tij, qytetarët serbë në Kosovë nuk kanë nevojë të mbrohen, pasi jetojnë të sigurtë.

“Qytetarët serbë në Kosovë jetojnë të pakërcënuar nga askush. Madje iu paguhen edhe faturat e energjisë elektrike nga qeveria e këtij shteti këtu si askujt askund, jo vetëm në Ballkan, por edhe në botë”, u shpreh Rama. Sipas tij, problematika e tashmë rreth targave të veturave mund të zgjidhet “vetëm me dialog.”

“E drejta këtu është me Kosovën dhe pikë. Serbia nuk ka asnjë drejtë t’i kthejë targat në një përditshmëri konfliktuale, ku mizën po e bën buall a thua se Qeveria e Kosovës ka paralajmëruar ndonjë luftë”, tha Rama.

Rama jep porosi për mosacarim me ndërkombëtarët

Ai i bëri thirrje edhe Kosovës, siҫ tha, që të mos krijojë probleme me miqtë ndërkombëtarë përmes mbajtjes së njësive speciale të Policisë së Kosovës në kufi.

“Duhet bërë kujdes që çuarja e njësive speciale në atë zonë, nga nevoja për t’u siguruar se nuk cënohet siguria dhe rendi publik, në momentin e shtrirjes së problemit, mos të kthehet në një problem mes vetë Kosovës dhe miqve e partnerëve ndërkombëtarë”, tha Rama.

Kryeministri i Kosovës, Albin Kurti e ka arsyetuar prezencën e njësive speciale në vendkalimet kufitare.

“Njësia Speciale e Policisë së Kosovës nuk ndodhet aty për të demonstruar një forcë, por për t’i mbrojtur pikat kufitare dhe policët tanë kufitarë”.

Edhe Ambasadori i Gjermanisë në Kosovë, Jörn Rohde u ka bërë thirrje Kosovës dhe Serbisë që të ulin tensionet dhe të gjejnë zgjidhje përmes dialogut.

“Situata në veri duhet të shtensionohet. U bëj thirrja të dyja palëve që të flasin me njëra-tjetrën dhe jo për njëra-tjetrën. Rruga më e mirë përpara: takohuni në Bruksel dhe gjeni zgjidhje sa më shpejt që të jetë e mundur”, shkroi Rohde në Twitter.

Kryeministri Albin Kurti, nga ana e tij  tha se Kosova është e hapur për bisedime, të cilat janë refuzuar nga Beogradi, ndërsa ritheksoi se masa e reciprocitetit nuk është e drejtuar kundër serbëve të Kosovës.

“Ne kemi bërë një ofertë, me të cilën kemi thënë që nuk ia vlen të kemi targa të përkohshme. Edhe Republika e Kosovës edhe e Serbisë po i heqim ato të dyja palët dhe besoni se pakrahasueshmërisht më shumë kanë arsye shqiptarët që t’iu pengojë targa e Serbisë që ka “katër S” me çirilicë aty e të cilin keni mundur ta gjeni në shumë shtëpi të rrënuara gjatë luftës e madje të bërë me thikë në gjokset e shqiptarëve, se sa do të duhej t’ua vriste sytë harta e Kosovës serbëve në Serbi. Mirëpo ne kemi thënë po i heqim targat e përkohshme, ata le të vijnë lirisht, ne po shkojmë lirisht dhe qarkullimi i lirë, liria e lëvizjes së mallrave, shërbimeve, kapitalit të jetë sa më e kollajshme dhe pa asnjë vonesë”, tha Kurti.

Rama: Ballkani i Hapur pëshpejton procesin e Berlinit

Rrugët që çojnë drejt vendkalimeve kufitare në veri të Kosovës në Jarinjë dhe Bërnjak, po mbahen të bllokuara nga serbët lokalë në shenjë kundërshtimi për vendimin e Kosovës për reciprocitet lidhur me targat e automjeteve.

Kryeministri i Shqipërisë, Edi Rama, gjatë vizitës në Prishtinë takoi edhe udhëheqësit e partive politike opoziare. Ai foli sërish për nismën “Ballkanit të Hapur’,  ku sipas tij, kjo do ta përshpejtojë edhe  procesin e Berlinit.

“Unë jam i bindur edhe më tepër sot që Ballkani i Hapur është i vetmi drejtim strategjik që ne të mos ngecim në të shkuarën, dhe t’i marrim vetes maksimumin, si shqiptarë dhe si rajon. Liria e lëvizjes së njerëzve, të mallrave dhe të kapitaleve. Është më e mundur që të ketë sukses edhe dialogu nga klima që krijohet nga Ballkani i Hapur. Kjo nuk është asgjë, pos marrja në zotërim të procesit të Berlinit dhe përshpejtimi i tij” tha Rama.

“Vëllain dhe fqinjin nuk i zgjedh. Me vëllain të lidh familja dhe gjaku, me fqinjin lidhesh pasi e ke aty”, tha kryeministri i Shqipërisë, pas shumë përplasjeve në distancë që kishte me kryeministrin e Kosovës.

Shqipëria, Serbia dhe Maqedonia e Veriut kanë nënshkruar një nismë të quajtur “Ballkani i Hapur”, në të cilën refuzojnë të jenë pjesë Kosova, Mali i Zi dhe Bosnja.

dw

Kryeministri i Shqipërisë, Edi Rama, tha të hënën në Prishtinë se zbatimi i reciprocitetit për targat me Serbinë është e drejtë e ligjshme e Kosovës, e cila, tha ai, duhet të trajtojë me kujdes situatën dhe në bashkërendim me partnerët e saj strategjikë.

Kryeministri Rama po qëndron për një vizitë në Prishtinë në një periudhë, kur Kosova po përballet me tensione në veri, ku grupe qytetarësh serbë po mbajnë të bllokuara rrugët kryesore në shenjë proteste ndaj vendimit të qeverisë së Kosovës për të zbatuar masën e reciprocitetit me Serbinë për targat e makinave.

Të hënën e kaluar qeveria e Kosovës dërgoi njësitë e posaçme të policisë pë të zbatuar vendimin mbi targat. Kjo nxiti reagimin e zemëruar të Beogradit, i cili tha se ka ngritur shkallën e gatishmërisë ushtarake, ndërsa avionët e tij fluturuan afër vijës kufitare me Kosovën. Presidenti serb, Aleksandër Vuçiç, kërkoi tërheqjen e njësive të posaçme të policisë nga veriu i Kosovës dhe anulimin e reciprocitetit për targat e makinave

“E drejta këtu është me Kosovën dhe pikë. Nuk është me Serbinë. Serbia nuk ka asnjë të drejtë t’i kthejë targat e automjeteve të përdorimit të përgjithshëm në një përditshmëri konfliktuale, ku mizën po e bën buall, a thua se qeveria e Kosovës ka paralajmëruar ndonjë luftë kur në fakt thjesht po bën zbatimin e një marrëveshjeje reciprokisht të dakordësuar”, tha kryeministri Rama, në një konferencë të përbashkët me kryeministrin e Kosovës, Albin Kurti duke i bërë thirrje qeverisë së Kosovës që të trajtojë me kujdes dërgimin e njësive të posaçme në zonë që të mos shndërrohet “në një problem mes vetë Kosovës dhe miqve e partnerëve ndërkombëtarë”.

Kryeministri Rama tha se qeveria shqiptare është e bindur se problemi duhet të zgjidhet me dialog, duke shtuar se “unë besoj fort se janë të gjitha mundësitë që kjo të ndodhë duke e shmangur ngrirjen e konfliktit në këtë pikë, ku demonstrimet e uniformave ushtarake duhet t’ia lënë vendin demonstrimit të forcës së arsyes dhe të argumenteve në rrafshin diplomatik”.

Kryeministri Kurti tha se Kosova është e hapur për bisedime të cilat janë refuzuar nga Beogradi, ndërsa ritheksoi se masa e reciprocitetit nuk është e drejtuar kundër serbëve të Kosovës.

“Ne kemi bërë një ofertë me të cilën kemi thënë që nuk ia vlen të kemi targa të përkohshme. Edhe Republika e Kosovës edhe e Serbisë t’i heqin ato dhe besoi, se pakrahasueshmërisht, më shumë kanë arsye shqiptarët që t’iu pengojë targa e Serbisë, që ka “katër S” me çirilicë, të cilin keni mundur ta gjeni në shumë shtëpi të rrënuara gjatë luftës e madje të bërë me thikë në gjokset e shqiptarëve se sa do të duhej t’ua vriste sytë harta e Kosovës serbëve në Serbi, mirëpo ne kemi thënë se po i heqim targat e përkohshme. Ata le të vijnë lirisht, ne të shkojmë lirisht dhe qarkullimi i lirë, liria e lëvizjes së mallrave, shërbimeve, kapitalit të jetë sa më e kollajshme dhe pa asnjë vonesë”.

Ai tha se njësia e posaçme e policisë nuk ndodhet në veri për të demonstruar forcë, por për t’i mbrojtur pikat kufitare dhe policët kufitarë.

Forcat paqeruajtëse të NATO-s në Kosovë thanë të hënën se kanë shtuar numrin dhe kohëzgjatjen e patrullimeve në mbarë Kosovën, përfshirë edhe në veriun e Kosovës.

“KFOR-i po vëzhgon nga afër situatën në mbarë Kosovën dhe vazhdon të jetë i përqendruar në zbatimin e përditshëm të mandatit të tij – që buron nga Rezoluta 1244 e vitit 1999 e Këshillit të Sigurimit të Kombeve të Bashkuar – që të ofrojë mjedis të sigurt dhe lëvizje të lirë për të gjitha komunitetet që jetojnë në Kosovë. KFOR-i ka rritur numrin dhe kohëzgjatjen e patrullimeve rutinë në mbarë Kosovën, përfshirë në veri të Kosovë”, thuhet në deklaratën e forcave paqeruajtëse.

Ambasada e Shteteve të Bashkuara në Serbi shkroi në rrjetin Twitter se atashetë amerikanë dhe kanadezë të mbrojtjes vizituan vendkalimet Jarinjë dhe Bërnjak, “për të kuptuar më mirë situatën. Ata ishin të kënaqur të vënë re se KFOR-i ishte në zonë si një faktor stabilizues”, thuhet në postimin e ambasadës amerikane.

Diplomatët amerikanë dhe evropianë u kanë bërë thirrje të dyja palëve që të ulin tensionet dhe të punojnë së bashku në kuadër të bisedimeve në Bruksel.

Shefi i Politikës së Jashtme të Bashkimit Evropian, Josep Borrell, u bëri thirrje Serbisë dhe Kosovës që të ulin tensionet në terren, duke tërhequr menjëherë njësitë e posaçme të policisë dhe hequr barrikadat, ndërsa paralajmëroi një takim të negociatorëve të të dyja palëve, në ditët në vijim.

Zyrtarë të BE-së thanë se të mërkurën pritet të mbahet takimi ndërmjet shefave të grupeve negociatore të Kosovës dhe Serbisë, Besnik Bislimi dhe Petar Petkoviç.

voa