Sekretari i Shtetit në Ministrinë gjermane të Ekonomisë, Rainer Bake, deklaroi se vizita e Kancelares Merkel në Tiranë hap një kapitull të ri në marrëdhëniet ekonomike mes dy vendeve.

“Gjermania është një partnere e rëndësishme ekonomike e Shqipërisë për shkëmbimin dypalësh të mallrave. Në vitet e kaluara ka pasur mbi 200 milionë euro shkëmbime, ndërsa tregtia është duke ecur në drejtimin e duhur. Njëkohësisht, këto marrëdhënie ekonomike ne mendojmë se duhet të zgjerohen dhe sot do të donim t’u jepnim impulse të reja. Jemi të bindur se firmat gjermane do të ndërtojnë një pozicion të fortë në Shqipëri”, tha Rainer Bake.

Në Forumin e përbashkët Ekonomik, të organizuar nga Dhoma gjermane e Tregtisë në Tiranë, Bake tha se, Gjermania synon të ketë më shumë investime në Shqipëri, duke evidentuar edhe fushat kryesore. Por, sipas tij, këto investime kanë nevojë për siguri dhe transparencë.

“Ne, investitorët gjermanë jemi të interesuar për një mënyrë procedimi transparente. Biznesi gjerman është i interesuar për një bashkëpunim të qëndrueshëm në fushën e mjedisit, atë të energjisë, të infrastrukturës dhe turizmit”, tha më tej Bake.

Siguria ligjore dhe veçanërisht problemet me pronën mbeten shqetësimet kryesore për investimet e huaja.

“Ne presim sigurisht siguri ligjore. Për ne, si zhvillues projektesh, në këtë kontekst është e rëndësishme kur flasim për shitblerjen e pronave, trojeve, zyrat kadastrale, hipotekat”, u shpreh biznesmeni gjerman Michael Ulmer.

Ministri i Ekonomisë, Arben Ahmetaj tha se, qeveria shqiptare është e vendosur të lehtësojë investimet e huaja. Ai përmendi faktin se, vitin e kaluar Shqipëria u ngjit 40 vende në renditjen e biznesit, ndërkohë që së fundmi janë miratuar një sërë ligjesh të tjera, si ai i Partneritetit Publik-Privat dhe ai i Investimeve Strategjike, që rrisin garancitë për biznesin.

“Nga njëra anë flitet për një koncept të ndjekjes me shpejtësi të investitorëve, qoftë ai i huaj apo vendas dhe, së dyti, i jepet parashikueshmëria maksimale duke marrë kontrata shtetërore, sipas përkufizimit në Parlament. Në Kuvend, kontrata mund të bëhet ligj, gjë që do të thotë një kontratë e sigurisë maksimale. Së treti, parashikohet për procedura të caktuara në mënyrë që të kthehet administrata në një agjent për investitorët”, tha ministri i Ekonomisë, Arben Ahmetaj.

Nën kryesimin e Gjermanisë, verën e kaluar u mbajt Samiti i Berlinit, një nismë që synon të kanalizojë në ekonomitë e Ballkanit miliarda euro investime në projekte madhore, si Autostrada e Kaltër dhe lidhjet energjetike.

/ Top Channel

Vizita e kancelares Merkel ne Tiranë vlerësohet si një inkurajim për intensifikim të mëtejshëm të marrëdhënieve ekonomike bilaterale dhe perspektivën europiane të Shqipërisë.

Kancelarja gjermane, Angela Merkel arriti sot në Tiranë në kuadër të një turi ballkanik, që vijon nesër (09.07) me vizitat e saj në Serbi dhe Bosnjë–Hercegovinë. Vizita në Tiranë vlerësohet historike dhe shumë e rëndësishme për marrëdhëniet ekonomike dhe politike dypalëshe, të cilat ambasadori gjerman në Tiranë Helmut Hoffmann i cilësoi ditët e fundit “të shkëlqyera” . Kryeministri Rama shkruan në rrjetin social Twitter “Willkommen in Albanien Kanzlerin Merkel! Sot ditë e shënuar për Shqipërinë. Vizita e parë dypalëshe e një kancelari të Gjermanisë në Shqipëri.”

Vizita e kancelares Merkel ne Tiranë vlerësohet si një inkurajim për intensifikim të mëtejshëm të marrëdhënieve ekonomike bilaterale dhe perspektivën europiane të Shqipërisë. Në rrethet politike dhe mediatike të Tiranës, kjo vizitë konsiderohet një inkurajim për të përshpejtuar hapjen e negociatave të anëtarësimit mes Shqipërisë dhe BE. Në një deklaratë për mediat gjermane, në prag të fillimit të këtij turi ballkanik kancelarja Merkel theksoi se “Shqipëria ka bërë progress në këtë drejtim me marrjen e statusit të vendit kandidat për anëtarësim, por i mbetet ende shumë për të bërë”. Zëdhënësi i kancelares Merkel, Steffen Seibert ka bërë të ditur për mediat gjermane se “çështjet kryesore të bisedimeved do të jenë marrëdhëniet bilaterale dhe ato me BE-në, çështjet ekonomike dhe të energjisë.”

Sipas burimeve zyrtare kancelarja gjermane pas mbritjes ne aeroportin ”Nënë Tereza” do të drejtohet për në selinë e Kryeministrisë ku tanimë gjithçka është gati për ceremoninë e lartë shtetërore të mirëseardhjes. Kancelarja Merkel do të zhvillojë më pas bisedime me kryeministrin e Shqipërisë Edi Rama dhe në përfundim të tyre do të ketë një konferencë të përbashkët shtypi. Të njëjtat burime bëjnë të ditur se ajo do të zhvillojë bisedime edhe me Presidentin e Republikës, Bujar Nishani. Në pasditen e vonë kryeministri i Shqipërisë, Rama dhe Kancelarja e Republikës Federale të Gjermanisë, Merkel do t’i drejtohen me fjalime Konferencës Ekonomike Gjermano- Shqiptare që ka nisur punimet e saj sot paradite në mjediset e Tirana Business Park.

Vizita e kancelares gjermane Merkel në Tiranë vjen disa javë para Konferencës së Vienës, që do të zhvillohet në fund të gushtit të këtij viti si vijim i procesit të Berlinit, që filloi gushtin e kaluar kaluar me nismën e znj. Merkel për t’i dhënë një nxitje të re perspektivës europiane të Ballkanit Perëndimor. Për ecurinë e procesit të Berlinit Shqipëria dhe Serbia konsiderohen si faktorë të rëndësishëm drejtues në procesin e pajtimit të Ballkanit Perëndimor dhe bashkëpunimit rajonal si parakusht i integrimit europian.

Konferenca ekonomike gjermano – shqiptare me pjesëmarrhjen e disa qindra investitorëve nga Gjermania pritet të rrisë interesin e tyre për të investuar në Shqipëri. Para një jave u hap Tirana Business Park, një investim i grupit bavarez Lindner pranë Aeroportit Ndërkombëtar “Nënë Tereza”dhe autostradës Tiranë-Durrës , ku pritet të krijohen 9.000 vende të reja pune si edhe fabrika e parë Forchner që brenda këtij viti pritet të krijojë 330 vende pune dhe në një fazë të mëvonshme rreth 1000.

Masa të rrepta sigurie.

Vizita e sotme e Kancelares Merkel shënon në fakt vizitën e dytë të një niveli të tillë në Shqipëri, pas asaj të kancelarit Gerhard Schrȍder, në vitin 1999, e cila më shumë se marrdhëniet gjermano-shqiptare 12 vjet pas rihapjes së tyre në vitit 1987, u përqëndrua në përballimin e krizës humanitare, në kohën e luftës së Kosovës. Nga ky këndvështrim , vizita e kancelares Merkel sot në Tiranë konsiderohet si vizita e parë e një kancelari gjerman në Shqipëri. Gjatë 4 orëve e gjysmë që znj. Merkel do të jetë në Tiranë do të ketë masa të rrepta sigurie dhe bllokim të rrugëve kryesore të Tiranës dhe atyre që të çojnë në Tirana Bussines Park ku ka nisur Konferenca Ekonomike Gjermano-Shqiptare. (dw)

Marrëdhënie gjermano-shqiptare kanë qenë konstante pavarësisht cili krah ka qenë në qeveri dhe projektet e financuara nga Gjermania janë modele udhërrëfyese për vendet e tjera donatore të Shqipërisë.

Vizita e Kancelares Angela Merkel në Tiranë, në kuadër të turit të saj rajonal, ka rikthyer në opinionin publik dhe mediatik të Shqipërisë, bilancin e marrëdhënieve mes dy vendeve në planin politik dhe ekonomik, si dhe vlerësimin mbi rolin dhe mbështjen e Gjermanisë në procesin e integrimit evropian të vendeve të rajonit.

Taulant Balla, kryetar i grupit parlamentar të miqësisë Shqipëri-Gjermani, mendon se marrëdhëniet mes dy vendeve janë të shkëlqyera në shumë plane dhe ato janë intensifikuar pas takimit të kryeministrit Edi Rama me Kancelaren në prill të vitit të kaluar. Në bisedë me Deutsche Welle-n, ai thotë se pas këtij takimi lindi procesi i Berlinit me vendet e Ballkanit, si një instrument i ri bashkëpunimi rajonal, të cilin koha tregoi se ishte i domosdoshëm për hapjen e një faze të re marrëdhëniesh dypalëshe dhe shumëpalëshe mes vendeve të kësaj pjese të Evropës, të cilat 2 dekada më parë ishin në konflikte. Sot bëjnë projekte të përbashkëta zhvillimi dhe aspirojnë së bashku për t’u anëtarësuar në Bashkimin Europian, deklaron Taulant Balla.

“Këto 14 muaj kanë qenë shumë të rëndësishëm edhe në identifikimin e projekteve të cilat Gjermania ka vendosur t’i mbështesë në Shqipëri. Në fillim të kësaj jave firmosën 7 marrëveshje ndërmjet Gjermanisë dhe Shqipërisë, përmes të cilave financohen 118 milionë euro në sektorë të rëndësishëm si energjia dhe eficenca energjitike, sektori rural dhe zhvillimi i qëndrueshëm i bujqësisë, investimet në furnizimin me ujë të pijshëm, si dhe mbështetja e SME-ve. Në fakt këto janë sektorë ku Gjermania ka treguar interes të vazhdueshëm në vendin tonë. Dua të them se projektet e financuara nga Gjermania janë modele udhërrëfyese për vendet e tjera donatore të Shqipërisë. Arësyeja është e thjeshtë. Projektet gjermane në Shqipëri janë histori suksesi”.

Marrëdhënie konstante pavarësisht cili krah ka qenë në qeveri

Për ish-ministrin e Jashtëm Prof. Tritan Shehu, aktualisht eksponent kryesor në Partinë Demokratike në opozitë, ecuria e marrëdhenieve shqiptaro-gjermane është zhvilluar pavarësisht ngjyrave politike të qeverisjeve. Gjermania është një mbështetëse e fortë e proceseve tona demokratike e integruese, shprehet ai për Deutsche Welle-n.

“Është donatori kryesor për ne përmes strukturave të BE-së. Janë marrëdhënie lineare dhe në ngritje, gjë që lidhet dhe me avancimin tonë drejt BE-së”.

Prof. Tritan Shehu e konsideron një zhvillim shumë të rëndësishëm faktin që Gjermania kohët e fundit po tregohet më “agresive” me politikat e saj drejt vendeve të Ballkanit Perëndimor.

“Konferenca e Berlinit, e cila do të vijojë pas pak javësh me atë të Vjenës, vizita e Kancelares në rajon, mesazhet e lëshuara prej saj për dinamikën e zhvillimeve në Ballkan, janë tregues që bindin për rolin aktiv të Gjermanisë. Për Shqipërinë dhe vendet e rajonit vizita e Kancelares Merkel është suport për procesin e integrimit evropian. Unë mirëkuptoj deklaratat e qarta të saj për nevojën e përmbushjes së standardeve nga ana e Shqipërisë, për përshpejtimin e procesit të integrimit është një ndihmë konkrete shtesë ndaj nesh”.

Azilkërkuesit nga keqinformimi dhe keqinterpretimi

Një nga temat që Kancelarja do të diskutojë me autoritetet zyrtare në Tiranë është dhe fenomeni i azilkërkuesve. Për kryetarin e grupit parlamentar të miqësisë Shqipëri-Gjermani, realisht rritja e numrit të tyre me origjinë nga Ballkani Perëndimor përbën një shqetësim për qeverinë gjermane dhe vende të tjera anëtare të Schengen-it.

“Fillimviti shënoi një rrije të madhe të azilërkuesve nga Shqipëria kjo edhe për shkak të keqinformimit dhe keqinterpretimit se gjoja Gjermania ka nevojë për punëtorë apo se shqiptarët mund të përfitojnë azil ekonomik në Gjermani. Këto keqinformime u keqpërdorën dhe çuan në një rritje të pakuptimitë të azilërkresve shqiptarë. Por pas intensifikimit të komunikimit publik nga ana e institucioneve shtetërore shqiptare dhe atyre gjermane se shqiptarët nuk përfitojnë azil në Gjermani, pas shfryrjes së tullumbacit artificial të azilit, ka një rënie të numrit të shqiptarëve që gënjehen për tu nisur drejt Gjermanisë me qëllim azilin”.

Për Ballën faza e emergjencës ka kaluar dhe këtu një rol shumë të mirë po luan edhe Policia e Kufirit, të cilët në shumë raste kthejnë mbrapsht kontigjentet e dyshuara që kanë objektiv azilkërkimin.

Duke folur për çështjen e azilkërkuesve nga Shqipëria në Gjermani eksponenti i PD-së, Tritan Shehu thotë se kemi të bëjmë me nje simptomë të qartë të problemeve të brendshme, i gabimeve dhe i defekteve që nuk po marrin zgjidhje.

“Përpjekjet tona konkrete për përmbushjen e standardeve të BE, forcimi i institucioneve tona, zhvillimi ekonomik e social i vendit etj., do ta minimizojnë këtë fenomen tejet negativ. A rrezikojmë që realisht të rivendoset regjimi i vizave? Kjo për mua është dytësore. Parësore është detyrimi i shtetit shqiptar për të luftuar këtë fenomen, që ka në origjinë shumë faktorë, siç u shpreha më parë. Pa dyshim nëse kjo dukuri zgjat e zgjerohet, atëherë ka rrezik dhe sistemi aktual i lëvizjes së lirë të qytetarëve shqiptarë në zonën Schengen të BE-së”.

Mundësia e rivendosjes së vizave, sipas deputetit të mazhorancës së majtë, do të ishte një absurditet. Do të kishte efekt të kundërt, shprehet Taulant Balla për Deustche Welle-n.

“Në vend që të pakësonte numrin e azilkërkuesve do ta stimulonte. Muri i vizave për vendet e Ballkanit Perëndimor ka rënë dhe as nuk duhet kujtuar. Ka qenë një histori e keqe e ndarjes së Europës. Europa ka nevojë për bashkim. Prandaj apeli im për Gjermaninë është që të mbështesë aspiratën e vendeve të Ballkanit për anëtarësim sa më të shpejtë në Bashkimin Europian. Bashkimi ynë me Europën është ndreqje e gabimeve të historisë. Edhe ndarja e Gjermanisë ishte gabim i historisë, ndërsa ndreqja ishte një domosdoshmëri”.

Marrëdhëniet gjermano shqiptare nga donacionet te partneriteti

Një temë kryesore që pritet të prekë Kancelarja në vizitën e saj në Tiranë është bashkëpunimi ekonomik mes dy vendeve, ku ajo pritet të jetë pjesmarrëse në një forumin të përbashkët. Gjergj Buxhuku, kryetar i AlbKonfindustria-s e vlerëson Gjermaninë si një partner të rëndësishëm tregtar dhe ekonomik të Shqipërisë, por ende, sipas tij, mjaft larg mundësive reale, që paraqesin tregjet tona.

“Në pothuaj çerek shekulli forma e marrëdhenieve ndërmjet dy vendeve është shndërruar cilësisht në kohë varësisht fuqizimit ekonomik të Shqipërise. D.m.th nga marrëdhënie fillestare me Gjermaninë si donatore dhe Shqiperinë në vështrim të parë si përfituese, drejt kalimit gradual në formë të pastër partneriteti me përfitim të ndërsjellë për të dy vendet. Strategjia e pranisë gjermane në ekonominë shqiptare ka synuar qartësisht tregjet strategjike si energji, telekomunikacion, sistem bankar, rrjete konjeksioni, furnizim me ujë, aeroporte, etj. Por, tashmë, që Shqipëria është fuqizuar dhe po përfshihet në tregjet globale vlerësoj, se ende jemi në fillimet e bashkëpunimit ekonomik në përfitim të ndërsjellë”.

Vizitën e Kancelares Merkel Gjergj Buxhuku e shikon edhe si tregues të qartë të miqësisë historike mes dy vendeve, por edhe si një vetëkorrigjim të qëndrimit të diplomacisë së deritashme të Berlinit ndaj kombit shqiptar dhe rajonit.

“Pas dështimeve dramatike të Greqisë, pamundësisë së Italisë dhe paaftësisë së Bashkimit Europian, politika gjermane ka kuptuar, se duhet të jetë e pranishme me projekte zhvilluese dhe ndikim në mënyrë të drejtpërdrejtë politik në hapsirat shqiptare dhe rajonin e Ballkanit Perendimor. Për më shumë rëndësia ekonomike dhe gjeostrategjike e kombit rreth 7 milionësh shqiptar ne hapësirat e Shqipërise, Kosovës, Maqedonisë etj., është thelbësore për zhvillimin e qendrueshëm të gjithë rajonit dhe gjithmonë edhe më e rëndësishme për vetë BE-në. Sa më sipër krijon mbështetje të fuqishme për bashkëpunim të suksesshëm ndërmjet bizneseve të dy vendeve”.

Në nxitjen e investimeve gjermane në Shqipëri ka rol dhe grupi parlamentar i miqësisë Shqipëri-Gjermani me 39 deputetë. Drejtuesi i kësaj strukture Taulant Balla, shprehet se përpos synimit të forcimit të dialogut politik mes dy parlamenteve, ai shërben gjithashtu edhe si një instrument mbështetës për çdo kompani gjermane që është e interesuar për të investuar në Shqipëri.

“Për këtë qëllim i drejtohem sot çdo sipërmarrësi gjerman, duke i thënë se deputetët e këtij grupi miqësie kërkojnë dhe do të mbështesin më shumë prezencë të kompanive gjermane në Shqipëri. Vizita e Kancelares Merkel është një rast më shumë për të ritheksuar domosdoshmërinë e rritjes së bashkëpunimit ekonomik, për shkak se ne vlerësojmë se modeli transformues i Gjermanisë, modeli i suksesshëm në kulturën e sipërmarrjes të sektorit privat në Gjermani, janë një mundësi por edhe edhe një kërkesë legjitime, për të kërkuar më shumë prezencë të kompanive gjermane në rajon dhe sigurisht, edhe në Shqipëri”. (dw)