Kryetarja e Dhomës së Përfaqësuesve Nancy Pelosi tha se pret një vendim të shpejtë nga ana e Nënpresidentit Mike Pence nëse ai do të aktivizojë amerndamentin e 25-të të Kushtetutës për ta hequr zotin Trump nga detyra.

Presidenti Donald Trump po përballet me thirrje në rritje për largimin nga posti, një ditë pas trazirave në Kapitol të shkaktuara nga mbështetës të Presidentit.

Megjithëse zotit Trump i kanë mbetur vetëm 13 ditë nga mbarimi i mandatit, ka patur kërkesa të shumta për heqjen e tij nga posti, mes tyre nga demokratë të Senatit dhe nga një kongresmen republikan.

Zonja Pelosi, në komentet e bëra të enjten la gjithashtu të hapur mundësinë që ndaj Presidentit të fillojë procesi i shkarkimit nga posti.

Ajo tha se ata që hynë me forcë në Kapitol janë terroristë.

Kongresi çertifikoi zyrtarisht të enjten herët në mëngjes fitoren e Presidentit të zgjedhur Joe Biden, pavarësisht kundërshtimeve të disa ligjvënësve republikanë.

Ndërkaq, edhe anëtarë të kabinetit të zotit Trump dhe aleatë të presidentit republikan kanë diskutuar aktivizimin e një dispozite të Kushtetutës amerikane për heqjen e tij nga detyra, tha një burim që kishte dijeni për situatën.

Në Uashington, një numër në rritje i ndihmësve të Shtëpisë së Bardhë thanë se do të largoheshin, duke përfshirë të dërguarin diplomatik Mick Mulvaney, ish-shef i kabinetit të zotit Trump, dhe këshilltarin e lartë për Rusinë Ryan Tully. Së shpejti priten largime të tjera.

Udhëheqësi Demokrat i Senatit Chuck Schumer i bëri thirrje Nënpresidentit Mike Pence të heqë nga posti zotin Trump në bazë të amendamentit të 25-të të Kushtetutës, i cili lejon anëtarët e kabinetit të rrëzojnë një president kur konsiderohet i paaftë për postin. Të paktën një republikan dhe 19 demokratë në Dhomën e Përfaqësuesve bënë thirrje për një hap të tillë.

“Ajo që ndodhi dje në Kapitol të SHBA ishte një kryengritje kundër Shteteve të Bashkuara, e nxitur nga presidenti”, tha zoti Schumer në një deklaratë. “Ky president nuk duhet të qëndrojë në detyrë as edhe një ditë më shumë.”

“Nëse Nënpresidenti dhe kabineti refuzojnë ta bëjnë, Kongresi duhet të mblidhet përsëri për të nisur procedurat e shkarkimit të Presidentut,” tha ai.

Kongresmeni republikan Adam Kinzinger bëri thirrje që të aktivizohet amendamenti i 25-të për të hequr zotin Trump.

“Të gjitha indikacionet janë se presidenti është bërë i pandjeshëm, jo vetëm për detyrën dhe betimin që ka dhënë, por edhe ndaj vetë realitetit,” tha Kinzinger në një video që postoi në Twitter.

Një burim i njohur me situatën tha se përpjekja për të përdorur amendamentin në fjalë nuk duket se mund të ketë sukses.

Shumica e republikanëve në Kongres kanë treguar pak interes për të bërë presion mbi kabinetin që të ndërmarrë një hap të tillë.

Senatorja demokrate Amy Klobuchar tha se Kabineti i zotit Trump duhet të jetë i përgatitur të veprojë, pasi presidenti mund të shkaktojë probleme të tjera në kohën e tij të mbetur në detyrë.

“Është më mirë të jenë gati ta bëjnë këtë nëse vazhdon, sepse nuk mund të kesh një president që në thelb drejton një kryengritje kundër qeverisë së vendit tonë,” tha zonja Klobuchar për rrjetin CBS.

Presidenti Trump u zotua në një deklaratë herët në mëngjes për një “tranzicion të rregullt” përpara inaugurimit të zotit Biden, pjesërisht për të ndaluar largimin e njerëzve të tjerë të stafit të tij. Megjithatë ai ka vazhduar të përsërisë pohimin e pabazë se zgjedhjet u vodhën.

Gjithashtu ai nuk e ka dënuar dhunën që ndodhi pasi ai inkurajoi mbështetësit të marshonin drejt Kapitolit, pavarësisht lutjeve nga anëtarë të lartë të administratës.

“I lutem Presidentit dhe të gjithë zyrtarëve të zgjedhur të dënojnë me forcë dhunën që ndodhi dje,” tha Sekretari në detyrë i Sigurisë së Brendshme Chad Wolf.

Ndërkohë, Byroja Federale e Hetimit i kërkoi publikut informacione për identifikimin e personave të përfshirë në dhunë, gjatë së cilës humbën jetën katër persona.

voa

Ndërsa qeveritë në të gjithë botën kanë shprehur zemërim dhe trishtim rreth trazirave që përfshinë ndërtesën e Kongresit amerikan të mërkurën, Rusia pati një reagim tjetër – të dyzuar mes shfajësimit dhe dyshimit.

“Festa e demokracisë ka përfunduar”, tha Konstantin Kosachev, kreu i komitetit të punëve të jashtme në Këshillin e Federatës Ruse, në një postim në Facebook në të cilin argumentoi – për të disatën herë – kundër vendosjes së Amerikës si modeli i demokracive globale.

“Amerika nuk e ndjek më atë rrugë dhe si pasojë ka humbur të drejtën për ta përcaktuar atë. Aq më tepër t’i detyrojë të tjerët për këtë”, tha ai.
Kosachev argumenton se përçarjet në shoqërinë amerikane janë aq të thella saqë as republikanët dhe as demokratët nuk do të pranonin rezultatet e zgjedhjeve pa kundërshti.

Ministria e jashtme e Rusisë gjithashtu u përqëndrua të enjten në ndarjen e elektoratit amerikan, ndërsa nxorri në pah përsëri kritikat e SHBA-ve ndaj zgjedhjeve të Rusisë në të kaluarën.

“Është një çështje e brendshme e Shteteve të Bashkuara”, tha zëdhënësja e Ministrisë së Punëve të Jashtme Maria Zakharova në komentet e saj për gazetarët.
“Por përsëri, do të theksonim se sistemi zgjedhor amerikan është arkaik dhe nuk plotëson standardet moderne demokratike, krijon mundësinë për shkelje të ndryshme dhe media amerikane është bërë një instrument i konflikteve politike.”

Në mbulimin e saj, media shtetërore ruse promovoi deklaratat e Presidentit Donald Trump, për manipulimin e zgjedhjeve nga mijëra votues të dyshuar të “vdekur”, të cilat janë diskredituar në mënyrë të përsëritur.

Në përgjithësi, shtypi rus gjithashtu ka mbështetur pretendimet e presidentit Trump për një “komplot të thellë shtetëror” që synon të pengojë përpjekjet e tij për të përmirësuar marrëdhëniet me Moskën pas akuzave për ndërhyrje ruse në zgjedhjet presidenciale amerikane të 2016-ës.

Megjithatë, komentatorët përshëndetën zhvillimet e fundit në Uashington duke bërë krahasime mes përgjigjes amerikane ndaj kryengritjeve demokratike në ish republikat sovjetike fqinje si Bjellorusia dhe Ukraina, ku, siç argumenton Kremlini, Shtetet e Bashkuara kanë kërkuar të përmbysin qeveritë miqësore me Moskën duke mbështetur protestuesit.

Ndërkohë, udhëheqësi rus i opozitës Alexei Navalny, aktualisht në Gjermani pas një përpjekje të dështuar helmimi nga një agjent nervor i shkallës ushtarake në Siberi në gusht, u ofroi një kujtesë mbështetësve të Kremlinit që po shijojnë problemet e fundit politike të Amerikës.

“Putinistët festojnë konfliktin në SHBA dhe lavdërojnë ‘stabilitetin e Putinit’. Ata kanë probleme, shumë prej tyre” tha Navalny përmes Twitter-it. “E vetmja gjë është se SHBA-të ende kanë një pagë mesatare mujore prej 306,000 rublash. Në Federatën Ruse ajo është40,000, dhe në realitet, ndoshta 30,000 “.

Zëra më liberalë rusë komentuan gjithashtu nëse drama politike e kësaj jave në Uashington do të kishin ndodhur në Moskë.

Të imagjinosh që Kremlini të sprapset nga parlamenti dhe gjykatat “do të ishte një përrallë Krishtlindjesh”, tha politikani liberal Dmitry Gudkov në Facebook. “Ne nuk kemi qendra alternative të pushtetit.”

Ngjarjet në Uashington ndodhën në festën e Krishtlindjeve Ortodokse Ruse, duke nxitur sugjerime në vend dhe në Shtetet e Bashkuara se kaosi ishte një dhuratë e papritur për Presidentin rus Vladimir Putin.

Një meme popullore tregoi fytyrën e qeshur të liderit rus të vendosur mbi atë të një demonstruesi duke ngritur një podium nga ndërtesa e Kapitolit.

Por Putini nuk la të kuptohej nëse ishte i kënaqur. Ai nuk i përmendi asnjëherë traziratgjatë një deklarate të shkurtër për festat e Krishtlindjeve.

“Kjo festë e mrekullueshme ndriçon botën me një dritë dashurie dhe mirësie, u jep gëzim dhe shpresë miliona njerëzve dhe i orienton ata drejt vlerave shpirtërore të përjetshme,” tha ai në një deklaratë të publikuar nga Kremlini, duke uruar Krishtlindje të gëzuara për të gjithë.

voa

Prej ditësh u diskutua për shtyrjen e masave kufizuese ndaj koronavirusit. Tani kancelarja Merkel dhe kryeministrat e landeve ranë dakord për ashpërsimin e rregullave. Gjendja është dramatike, u tha në Berlin

Në krizën e koronavirusit kancelarja kristiandemokrate Angela Merkel dhe kryeministrat e landeve vendosën për masa më të rrepta kufizuese: Federata dhe landet do të kufizojnë edhe më tej lirinë e lëvizjes për njerëzit në të ashtuquajturat hotspote. Sikurse njoftoi në një konferencë shtypi kancelarja pas konsultimeve disa orëshe me krerët e landeve, në rajonet me një incidencë shtatë ditore prej më shumë se 200 raste infektimesh për 100.000 banorë liria e lëvizjes do të jetë e mundur vetëm brenda një segmenti deri në 15 km nga vendbanimi. Përjashtime do të ketë vetëm për arsye të forta.

Masa të drejta edhe pse të ashpra

Gjithashtu është përforcuar edhe më shumë kufizimi i kontakteve: anëtarët e një familjeje lejohen të takohen vetem me një person nga një familje tjetër. Deri tani lejoheshin të takoheshin maksimumi deri në pesë persona nga maksimumi dy familje. Merkel e quajti këtë „një kthim në rregulloren e marsit”. Kjo është e drejtë, edhe pse për njerëzit një masë e ashpër. Ashpërsimin e masave kufizuese kancelarja e argumentoi me mutacionin e ri të koronavirusit, që shkakton më shumë infeksione për kontakt, si dhe me mbingarkesën e pavioneve të reanimacionit nëpër spitale. Disa spitale janë përballur me „situata në limite”.

Kufizimet aktuale do të jenë në fuqi deri më 31 janar, shkollat dhe kopështet e fëmijëve deri atëherë do të jenë „në përgjithësi” të mbyllura. Më 25 janar kryeministrat e landeve dhe federata do të bëjnë një rivlerësim të situatës dhe do të konsultohen për masat në muajin shkurt. Kryeministri i Bavarisë, kristiansociali Markus Söder tërhoqi vëmendjen, për të mos pasur iluzione, se në shkurt do të jetë tejkaluar kjo situatë.

Baden-Vyrtemberg ndjek tjetër kurs

Landi i Baden-Vyrtembergut e ka lënë ende të hapur zbatimin e disa masave. Kufizimet e lëvizjes së lirë brenda segmentit 15 km nga vendbanimi në hotspotet e infeksioneve me koronavirusin tani për tani nuk janë planifikuar, deklaroi kryeministri i landit nga partia ambientaliste Winfried Kretschmann. Për këtë do të vendoset javën e ardhëshme pasi të jenë paraqitur shifrat e plota. Nga shifrat aktuale do të varet nëse do të hapen ose jo nga 18 janari kopështet e fëmijëve dhe shkollat fillore.

Këshilla e ekspertëve

Merkel dhe Söder si dhe kryebashkiaku qeverisës i Berlinit, socialdemoktrati Michael Müller vunë në dukje, që një ditë më parë ka pasur një konsultë me ekspertët. Mbi bazën e vlerësimeve shkencore u konsultuan të martën (05.01) politikanet dhe politikanët në Berlin. Fillimisht kufizimet ishin vendosur deri më 10 janar. Por gjatë ditëve të fundit pati konsensus të gjerë për shtyrjen e masave. Edhe përfaqësuesit e mjekëve patën tërhequr vëmendjen nga një zbutje e shpejtuar e masave.

djo/ml/gri (afp, dpa, rtr, Phoenix)