Kjo është shtëpia e familjes Fejzullai, në fshatin Çellopek të Tetovës. Autoritetet austriake thanë se Kujtim Fejzullai, 20 vjeç, është sulmuesi që vrau 4 persona në Vjenë.

Grupi militant, Shteti Islamik mori përgjegjësinë për sulmin e së hënës në Vjenë, ku u vranë katër civilë dhe u plagosën 22 të tjerë.

Policia austriake vrau sulmuesin e dyshuar, që e identifikuan si Kujtim Fejzullai, 20 vjeç, me shtetësi të Austrisë dhe Maqedonisë së Veriut.

Në qendër të Vjenës, sulmuesi i dyshuar ka shtënë në drejtim të qytetarëve, të cilët ishin dalë në bare dhe restorante. Të shtënat, sipas autoritetet, ndodhën në gjashtë lokalitete në kryeqytetin austriak.

Në deklaratën e grupit militant IS, të publikuar nga agjencia e tij e lajmeve Amaq, nuk janë ofruar të dhëna për marrjen e përgjegjësisë, transmeton Reuters.

Deklarata është shoqëruar me një fotografi të një burri me emër “Abu Dagnah Al-Albany”, duke thënë se ai ka sulmuar turmat e njerëzve në qendër të Vjenës të hënën, para se të vritej nga policia austriake.

Lidhur me sulmin në Vjenë, autoritetet maqedonase konfirmuan të martën se edhe dy shtetas të tjerë maqedonas kanë qenë të përfshirë.

Ministri i Brendshëm austriak, Karl Nehammer tha se 14 persona janë arrestuar në lidhje me sulmin në Vjenë.

Ai shtoi se pas bastisjes së shtëpisë së sulmuesit të dyshuar – tashmë të vrarë – janë kryer edhe 18 bastisje.

Ndërkaq, në Zvicër, policia njoftoi se dy shtetas të saj, të moshës 18 dhe 24 vjeç janë arrestuar në afërsi të Cyrihut, duke shtuar se “shkalla e lidhjes ndërmjet këtyre dy personave dhe sulmuesit të dyshuar, tash për tash është subjekt i hetimit”.

Ministri i Brendshëm austriak tha se bazuar nga të dhënat, nuk ka indikacione se edhe një sulmues i dytë ka qenë i përfshirë në sulmin në Vjenë.

Ai po ashtu shtoi se sulmuesi i dyshuar, dukej se ishte integruar në shoqërinë austriake, por në fakt ishte e kundërta.

Sipas Nehammer, “ai arriti të mashtronte njerëzit brenda programit të derakalizimit dhe përmes kësaj të lirohej nga burgu”.

Dy shtetas të Maqedonisë së Veriut, të lidhur me sulmin në Vjenë

Ministria e Punëve të Brendshme e Maqedonisë së Veriut ka bërë të ditur se përveç Kujtim Fejzullait edhe dy persona të tjerë, shtetas të Maqedonisë së Veriut kanë qenë të përfshirë në sulmin e ditës së hënë në Vjenë.

“Nga lista e policisë austriake, e cila iu dorëzua disa policive, përfshirë edhe policisë sonë, konstatuam se edhe dy persona tjerë, përveç austriakut, gjithashtu kanë shtetësinë e Republikës së Maqedonisë së Veriut, përkatësisht K.F. (i lindur në Modling, Austri), A.G. (i lindur në St. Polten, Austri) dhe U.A. (i lindur në Vjenë, Austri). Sektori për Bashkëpunim Policor Ndërkombëtar në Ministrinë e Brendshme u vu menjëherë në dispozicion të kolegëve nga Austria dhe ne po bashkëpunojmë intensivisht me të gjithë elementët që lidhen me këtë rast”, thuhet në njoftimin me shkrim të MPB-së në Shkup.

Kjo ministri gjithashtu njoftoi për një bisedë telefonike mes kryeministrit Zoran Zaev me kancelarin austriak, Sebastian Kurz.

“Kryeministri austriak i shprehu mirënjohje kryeministrit Zaev për solidaritetin dhe mbështetjen e shprehur. Kryeministrat shprehën gatishmërinë për të vazhduar komunikimin dhe bashkëpunimin në lidhje me sulmin terrorist nëse shërbimet austriake përcaktojnë një nevojë të tillë”, thuhet në njoftimin e Ministrisë së Punëve të Brendshme.

Ministria е Punëve të Brendshme e Maqedonisë së Veriut ka thënë për Radion Evropa e Lirë se “është në kontakt të vazhdueshme me autoritetet e Austrisë për verifikimin e identitetit të sulmuesit, por edhe për lidhjet e tij të mundshme me persona të tjera. Policia austriake përmes INTERPOL-it ka paraqitur kërkesë për bashkëpunim për këtë rast dhe autoritetet tona menjëherë i janë përgjigjur kërkesës për veprim”.

Sulmuesi, mbështetës i IS-it

Ministri Nehammer tha të martën në mëngjes se sulmuesi i vrarë në të kaluarën ka qenë i dënuar për përfshirje në një organizatë terroriste.

Ai tha se “terroristi i dyshuar” ishte dënuar në prill të vitit 2019, për shkak se kishte tentuar që të udhëtonte për në Siri me qëllim që t’i bashkohej grupit militant, Shteti Islamik. Ai ishte dënuar me 22 muaj burgim, por ishte liruar me kusht në dhjetorin e vitit të kaluar.

Ministri i Brendshëm i Austrisë, Karl Nehammer, e përshkroi sulmuesin e dyshuar, që u vra nga policia si një “terrorist islamik”.

Duke folur në një konferencë për shtyp, ministri Nehammer tha se personi i armatosur rëndë – i vrarë nga policia –ishte një mbështetës i grupit militant, Shtetit Islamik (IS) dhe se shtëpia e tij ishte kontrolluar ku është sekuestruar video-material. Policia tha se ai kishte veshur një rrip shpërthyes të rremë.

Më herët gjatë ditës së martë, ministri Nehammer kishte deklaruar se 1,000 pjesëtarë të sigurisë ishin angazhuar në operacionet e kërkimit për sulmues të mundshëm, duke shtuar se edhe vendet fqinje kanë ofruar ndihmë në këtë drejtim.

Viktimat janë dy gra dhe dy burra. Njëra nga gratë thuhet se ishte kameriere. Gruaja e dytë vdiq nga plagët e saj në spital, thanë raportet.

Viktimat ishin në një zonë të qendrës së qytetit të mbushur me njerëz në bare dhe restorante, afër sinagogës qendrore të Vjenës, por nuk është ende e qartë nëse ajo ishte shënjestra e sulmit.

Shtatë persona që janë plagosur, sipas mediave austriake, kanë marrë plagë të rrezikshme për jetë.

Në mesin e të plagosurve është edhe një polic, 28 vjeç, i cili sipas Ministrisë së Brendshme, është jashtë rrezikut për jetë.

Në sulmin terrorist në Vjenë është plagosur edhe një shtetase e Bosnje e Hercegovinës, konfirmoi për REL, ambasadori i këtij shteti në Austri, Kemal Kotariq.

Sipas tj, Ellma Musiq (1991), është duke u trajtuar në një klinikë në Vjenë.

Në mesin e viktimave është një grua nga Gjermania, ka konfirmuar ministri i Jashtëm gjerman, Heiko Maas.

“Fatkeqësisht, kemi pranuar konfirmimin se një shtetase gjermane është në mesin e viktimave në Vjenë”, tha Maas.

Qeveria austriake ka shpallur tri ditë zie.

Kancelari austriak Sebastian Kurz e quajti atë një “sulm të neveritshëm terrorist”.

Ai të martën tha se është i vetëdijshëm se kjo nuk është një “mosmarrëveshje midis të krishterëve dhe myslimanëve”.

“Por ne gjithmonë duhet të jemi të vetëdijshëm se kjo nuk është një mosmarrëveshje midis të krishterëve dhe myslimanëve ose midis austriakëve dhe migrantëve. Kjo është një luftë midis shumë njerëzve që besojnë në paqe dhe atyre pak që duan luftë”, tha Kurz.

Ndërkaq, gjatë një adresimi televiziv, Kurz u zotua se do të “kapim autorët dhe ata që qëndrojnë pas tyre”.

Liderët botërorë solidarizohen me Austrinë

Presidenti i Shteteve të Bashkuara, Donald Trump dënoi sulmin në Vjenë, duke thënë se akte të tilla “ndaj njerëzve të pafajshëm” duhet të ndalen.

“Lutjet tona janë me njerëzit në Vjenë pas edhe një akti të terrorizmit në Evropë. Këto sulme djallëzore kundër njerëzve të pafajshëm duhet të ndalen. SHBA-ja qëndron me Austrinë, Francën dhe me gjithë Evropën në luftën kundër terroristëve, përfshirë edhe terroristët radikalë islamikë”, ka shkruar Trump në Twitter.

Kancelarja gjermane Angela Merkel, të martën tha se “terrori islamik është armiku ynë i përbashkët”.

“Lufta kundër këtyre vrasësve dhe atyre që i nxisin – është lufta jonë e përbashkët,” shkroi zëdhënësi i Merkelit në Twitter, duke shtuar: “solidaritet” me Austrinë.

Presidenti i Francës, Emmanuel Macron tha se “Evropa është e bashkuar, dhe e vendosur. Ne jemi një”.

Kryeministri izraelit, Benjamin Netanyahu dënoi sulmin në Vjenë duke thënë se “Izraeli dënon sulmin brutal në Vjenë dhe qëndron në solidaritet total me Austrinë.

“Popujt e civilizuar kudo duhet të bashkohen për të mposhtur egërsinë e terrorizmit islamik të ringjallur”, tha ai.

Policia ka thënë se sulmi ka nisur në sinagogën Seitenstettengasse.

Dëshmitarët thanë se sulmi ndodhi teksa qytetarët ishin në bare e restorante, duke shijuar natën e fundit, para se Austria të nisë së zbatuari kufizimet e reja në lëvizje, me qëllim të frenimit të koronavirusit.

Për këtë arsye, shume njerëz janë parë në qendër të Vjenës, nëpër bare dhe restorante, të cilat do të mbyllen deri në fund të muajit nëntor. – njofton rel.

“Autoritetet në Maqedoninë e Veriut, thanë se po bashkëpunojnë me autoritetet austriake rreth sulmit të së hënës në Vjenë, që la pas vetes pesë të vrarë, në mesin e të cilëve është edhe autori i sulmit.” njofton voa në shqip dhe më tej shkruan se:

“Kujtim Fejzullait, 20 vjeçar, me shtetësi të Austrisë dhe të Maqedonisë së Veriut, është identifikuar si i dyshuar për sulmin e së hënës.

Familja e tij është me prejardhje nga fshati Çellopek i komunës së Tetovës. Banorë të këtij fshati thanë se familja nuk njihej për pikëpamje ekstremiste, por se i riu mund të jetë indoktrinuar nga rrethi ku është rritur në Vjenë.

Policia e Maqedonisë së Veriut tha se autoritetet policore austriake përmes EUROPOL-it kanë kërkuar informata dhe bashkëpunim lidhur me rastin dhe se Sektori për bashkëpunim ndërkombëtar i ministrisë së Brendshme po bashkëpunon me zyrtarët austriak, por nuk kanë ndonjë dosje mbi veprimtarinë e Kujtim Fejzullait.

Një nga viktimat e sulmit të së hënës është një shqiptar nga Maqedonia e Veriut. Familjaret thanë se i vrari është Nexhip Vrenezi, 21 vjeçar me prejardhje nga Veleshta e Strugës.” …

Qeveria miratoi masat e reja për të parandaluar përhapjen e koronavirusit:
Objektet e hotelerisë do të punojnë deri në orën 21:00, me përjashtim të furnizimit si dhe shitjes me porosi.
Ky vendim vlen edhe për objektet hotelerike tek pompat e karburantit, por nuk vlen për objektet hotelerike në aeroportet TAV në Shkup dhe Ohër.
Qeveria vendosi për të ndaluar grupimin e më shumë se 4 personave në hapësirën publike pas orës 21:00.
Qeveria sot miratoi një rekomandim për të gjithë qytetarët vendas dhe të huaj në territorin e Maqedonisë Veriore, pas orës 21:00 të mos lëvizin në hapësirën publike nëse nuk kanë nevoja të rëndësishme dhe të nevojshme.

Ministri i Brendshëm austriak, Karl Nehammer tha se sulmuesi i vrarë në Vjenë ishte një 20-vjeçar, me shtetësi të Austrisë dhe Maqedonisë së Veriut, raporton AP.

Sulmuesi është identifikuar si Kujtim Fejzullahi, tha për agjencinë e lajmeve APA, ministri Nehammer.

Policia në Austri tha se po kërkojnë për të paktën edhe një të dyshuar, për sulmet e shumëfishta në Vjenë të Austrisë, që lanë të vrarë të paktën katër persona.

Agjencia e lajmeve APA ka raportuar se dy persona janë arrestuar në lidhje me sulmet në Vjenë. Kjo agjenci tha se arrestimet kanë ndodhur në qytetin Shën Poelten, rreth 65 kilometra në lindje të Vjenës.

Të hënën mbrëma, në kryeqytetin austriak, persona të armatosur, hapën zjarr në gjashtë vende të ndryshme, duke plagosur edhe 17 persona, disa prej të cilëve janë në gjendje të rëndë.

Një sulmues u qëllua për vdekje nga policia, thanë zyrtarët, dhe një u arrestua, transmeton BBC.

Ministri Nehammer tha të martën në mëngjes se sulmuesi i vrarë në të kaluarën ka qenë i dënuar për përfshirje në një organizatë terroriste.

Ai tha se “terroristi i dyshuar” ishte dënuar në prill të vitit 2019, për shkak se kishte tentuar që të udhëtonte për në Siri me qëllim që t’i bashkohej grupit militant Shteti Islamik. Ai ishte dënuar me 22 muaj burgim, por ishte liruar me kusht në dhjetorin e vitit të kaluar.

Ministria е Punëve të Brendshme e Maqedonisë së Veriut ka thënë për Radion Evropa e Lirë se “është në kontakt të vazhdueshme me autoritetet e Austrisë për verifikimin e identitetit të sulmuesit, por edhe për lidhjet e tij të mundshme me persona të tjera. Policia austriake përmes INTERPOL-it ka paraqitur kërkesë për bashkëpunim për këtë rast dhe autoritetet tona menjëherë i janë përgjigjur kërkesës për veprim”.

Ministri i Brendshëm i Austrisë, Karl Nehammer, e përshkroi sulmuesin e vrarë nga policia si një “terrorist islamik”.

Duke folur në një konferencë për shtyp, ministri Nehammer tha se personi i armatosur rëndë – i vrarë nga policia –ishte një mbështetës i grupit militant, Shtetit Islamik (IS) dhe se shtëpia e tij ishte kontrolluar ku është sekuestruar video-material. Policia tha se ai kishte veshur një rrip shpërthyes të rremë.

Më parë, Nehammer tha se të paktën një sulmues “i armatosur rëndë dhe i rrezikshëm” besohej të ishte akoma i lirë. Zyrtarët u cituan të thoshin se mund të kishin qenë deri në katër sulmues. Ministri i Brendshëm kërkoi nga njerëzit të shmangnin Vjenën qendrore dhe u tha prindërve të mbanin fëmijët e tyre në shtëpi të martën.

Ministri Nehammer tha se në operacionet e kërkimet për sulmuesit – numri i të cilëve është ende i paqartë – janë angazhuar edhe 1,000 pjesëtarë të sigurisë, ndërkaq shtoi se edhe vendet fqinje kanë ofruar mbështetjen e tyre për këto operacione.

Viktimat janë dy gra dhe dy burra. Njëra nga gratë thuhet se ishte kameriere. Gruaja e dytë vdiq nga plagët e saj në spital, thanë raportet.