Francezët kishin pritur lokcdownin e tretë, por presidenti Macron vendosi ndryshe. Kryeministri Jean Castex bëri të ditur mbylljen e kufijve me vendet jashtë BE nga e diela, dhe kontrolle të ashpra të ndalimqarkullimit.

Një javë me radhë anëtarët e qeverisë franceze i përgatitën qytetarët për masa më të ashpra kundër Coronës. Tani kryeministri, Jean Castex pas një takimi bëri të ditur rezultate të ndryshme nga ato që prisnin vëzhguesit. Qeveria franceze nuk e izolon vendin si në pranverën e kaluar dhe vjeshtë në një lockdown të gjerë, por „ne mund t’i japim një shans vetes për të penguar atë”, tha kryeministri Castex. Për të arritur qëllimin, qendrat e blerjes në Gjermani me një sipërfaqe me të paktën 20.000 metra katrorë do të mbyllen nga e diela. Përjashtime bëjnë supermarketet. Përveç kësaj do të forcohet puna nga shtëpia. Kurse policia dhe xhandarmëria do të kontrollojnë rregullat e ndalimqarkullimit nga ora 18:00.

Masa tjetër: Mbyllja e kufijve. Franca si pasojë e përhapjes së mutacioneve të virusit do të ndalojë udhëtimet nga vendet jashtë Bashkimit Europian nga e diela. Për udhëtarët nga vendet e BE, Franca kërkon një test negativ PCR. Rreth 2000 nga 20000 raste infektimesh në ditë në Francë lidhen me variantin e ri të virusit. Ministri i Shëndetësisë, Olivier Veran që të enjten i kishte përgatitur francezët për ashpërsim masash. “Nuk jemi në një valë të dytë, por infektimet janë të larta”, tha ai.

Sistemi shëndetësor nën presion

Christopher Schlier punon si mjek i reanimacionit në spitalin e qytetit Colmar. Ka një vit që trajtimi i pacientëve me Covid përcakton ditën e tij. Vendimin për reduktimin e mëtejshëm të kontakteve ai e përshëndet. “Nëse nuk duhet lejuar që sistemi shëndetësor të pësojë kolaps të plotë atëherë kjo është e nevojshme.” Vërtet janë rritur kapacitetet e trajtimit intensiv, por megjithatë ofrimi i trajtimit shëndetësor është i kufizuar. „Shtëpitë e kujdesit për të moshuarit janë në atë pikë që nuk përpiqen më të sjellin në spital pacientët me COVID”, thotë Schlier.

Virusi nuk përhapet vetëm në shtëpitë e kujdesit. Në stacione të caktuara spitalesh në Colmar 100% e personelit mjekësor kanë kaluar infektimin. Megjithë masat higjienike, edhë të sëmurët infektohen. „Këtu vijnë pacientë me test negativ Corone dhe pas tre ose katër ditësh edhe ata sëmuren.”

Edhe pse Christopher Schlier nuk dyshon në nevojën e masave të tilla të ashpra, mjeku i shkolluar në Gjermani paralajmëron edhe nga pasojat sociale. Ndalimi akual i qarkullimit në Francë e ka rritur ndjeshëm agresivitetin në rrugë. Ai i sheh të mundura trazirat si në Holandë edhe në vendin e tij. “Shoh diçka dramatike, dhe kjo është lodhja e popullsisë, që thotë: Pse na i detyrojnë këto massa? Kjo nuk sjell gjë. Nuk e kuptojmë këtë më.”

Edhe vëzhguesit e shpjegojnë vendimin e qeverisë franceze kundër një mbylljeje të plotë edhe me shqetësimin për një lëvizje protestash dhe pasojat për ekonominë. Pasojat në ekonomi shteti francez nuk mund t’i kompensojë aq mirë sa fqinji i fuqishëm, Gjermania.

E paqartë mbetet, nëse qeveria planifikon kufizime edhe në arsim. Më 6 shkurt në Francë fillojnë pushimet e dimrit, që sipas zonave zgjasin deri në 8 mars. Tani diskutohet që në të gjithë vendin shkollat të dërgohen në pushime të zgjatura për të ulur numrin e infektimeve. Ndryshe nga Gjermania, në Francë ka një ujdi të gjerë, se shkollat duhet të mbeten jashtë masave ashpërsuese kundër virusit. Përvoja e lockdownit të parë ishte dramatike. Sindikatat e mësuesve njoftuan për një numër të madh fëmijësh, ku mësuesit nuk kishin kontakt për muaj me radhë.

Policia ruse arrestoi qindra protestues të dielën, ndërsa mbështetësit e kritikut të burgosur të Kremlinit Alexei Navalny filluan të dilnin në rrugë për të dytën fundjavë.

Duke sfiduar arrestimet dhe përndjekjen kriminale, protestat e para u zhvilluan në Siberi dhe Lindjen e Largët të Rusisë, duke përfshirë edhe qytetin Vladivostok.

Bashkëpunëtorët e zotit Navalny bënë thirrje sërish për protesta gjithëkombëtare përpara procesit gjyqësor ndaj tij që pritet të fillojë të martën.

Më shumë se 250 arrestime i paraprinë një tubimi të pritur në Moskë, ku demonstratat janë zakonisht më të mëdhatë.

Policia e Moskës njoftoi mbylljen e shtatë stacioneve të metrosë dhe kufizoi lëvizjen e këmbësorëve në qendër të qytetit.

Autoritetet urdhëruan gjithashtu mbylljen e disa restoranteve dhe dyqaneve në qendër të qytetit dhe devijuan transportin.

Alexei Navalny u arrestua me 17 janar pasi arriti në Rusi nga Gjermania, ku kishte qëndruar pesë muaj për t’u shëruar nga helmimi me një agjent nervor. Arrestimi i tij nxitit protesta mbarëkombëtare një javë më parë në rreth 100 qytete dhe sipas njoftimeve, rreth 4 mijë veta u arrestuan.

Shtetet e Bashkuara dhe Bashkimi Evropian kanë dënuar me forcë arrestimin e zotit Navalny dhe qindra arrestimet e javës ë kaluar dhe kanë kërkuar lirimin e tyre të menjëhershëm.

voa

Kancelarja gjermane, Angela Merkel e sheh si “punë të jashtëzakonshme” për familjet kohën e pandemisë. Ajo lutet për durim, ndërkohë që pediatrit paralajmërojnë me ngulm nga pasojat e lockdownit në Gjermani.

„Nuk jemi ende në atë pikë që të hapim shkollat dhe kopshtet”, tha kancelarja Merkel në mesazhin e saj javor në videopodcast. „Sa më me konsekuencë të veprojmë tani, të heqim dorë nga kontaktet, aty ku është e pashmangshme të mbajmë distancë, të respektojmë rregullat e higjienës e të vemë maskën, aq më shpejt kjo do të jetë e mundur”. Vërtet që shifrat e infektimeve, po bien, sipas Merkelit, por në të njëjtën kohë ka një rrezik real nga mutacionet shumë infektuese të Coronës. „Prandaj duhet që në rrugën tonë në javët e ardhshme të jemi të kujdesshëm dhe të veprojmë me maturi.”

„Askush nuk e nënvlerëson”

„Ne bëjmë gjithçka që të mund të hapim të parat kopshtet dhe shkollat, me qëllim që t’u japim fëmijëve një pjesë të përditshmërisë së tyre të zakonshme dhe të lehtësojmë familjet.” Merkel theksoi se „është një punë tejet e jashtëzakonshme” për nënat e baballarët, që të kujdesen e bëjnë detyrat bashkë me fëmijët e shkollave fillore, apo të kujdesen krahas punës për fëmijët që duhet të shkonin në kopsht. „Ne në qeverinë gjermane jemi shumë të vetëdijshëm, se sa e vështirë është përditshmëria për prindërit dhe fëmijët. Këtë nuk e nënvlerëson askush nga ne.”

„Që tani mjekët dhe psikoterapistët njoftojnë për rritje masive të rasteve të  ndryshme patologjike të fëmijëve“, u shpreh kreu i Shoqatës Gjermane të Mjekëve të Sigurimit Ligjor, KBV, Andreas Gassen. Kërkohet që të hapen shkollat sa më shpejt të jetë e mundur, ndryshe shkatërrohen shanset e arsimit në të ardhmen, u shpreh Gassen për gazetën „Rheinische Post“. Në shkolla vërtet që nxënësit janë bashkë, por ata nuk kanë rënë në sy si „katalizatorë të infektimeve.“ Drejtori i Klinikës së Vestfalisë për Fëmijët, Dominik Schneider është i shqetësuar për rastet e problemeve psikike dhe trupore tek fëmijët nga pandemia e Coronës. Në të gjitha shtresat e shoqërisë janë shtuar rastet e problemeve dhe sëmundjeve, tha Schneider në radion gjermane, „Deutschlandfunk“. Si shembuj ai përmendi gjendjen depresive, probleme me ushqyerjen, rritjen e peshës apo sjellje patologjike.

la/ag